ANNESS

DIKJARAZZJONI TAR-RAĠUNIJIET TAL-KUNSILL

I.   INTRODUZZJONI

Fit-2 ta’ Settembru 2009, il-Kummissjoni adottat il-proposta għal Deċiżjoni li temenda d-Deċiżjoni Nru 573/2007/KE li tistabbilixxi l-Fond Ewropew għar-Refuġjati għall-perijodu mill-2008 sal-2013 bħala parti mill-Programm ġenerali “Solidarjetà u Ġestjoni tal-Flussi ta’ Migrazzjoni” u li tħassar id-Deċiżjoni tal-Kunsill 2004/904/KE.

Fit-18 ta’ Mejju 2010, il-Parlament Ewropew adotta l-pożizzjoni tiegħu fl-ewwel qari bl-għan tal-adozzjoni tad-Deċiżjoni. Il-Kunsill ma kienx f'pożizzjoni li japprova l-pożizzjoni tal-Parlament u adotta l-pożizzjoni tiegħu fl-ewwel qari fit-8 ta’ Marzu 2012 f'konformità mal-Artikolu 294 tat-Trattat.

II.   GĦAN TAL-PROPOSTA

L-għan tal-proposta hu li tikkontribwixxi għat-twaqqif ta’ Programm Konġunt tal-UE dwar ir-Risistemazzjoni. Waqt li l-Komunikazzjoni tal-Kummissjoni lill-Kunsill u l-Parlament Ewropew dwar it-twaqqif ta’ Programm Konġunt tal-UE dwar ir-Risistemazzjoni mit-2 ta’ Settembru 2009 jfisser il-kuntest politiku u l-prinċipji li jiggwidaw lil dan il-programm, il-proposta tissuġġerixxi mekkaniżmu għall-identifikazzjoni ta’ prijoritajiet komuni tal-UE dwar ir-risistemazzjoni fuq bażi annwali. Il-ħolqien ta’ Programm Konġunt tal-UE dwar ir-Risistemazzjoni jkollu l-iskop li jtejjeb il-koordinament tal-approċċ tal-UE lejn ir-risistemazzjoni u jħeġġeġ sabiex aktar Stati Membri jibdew attivitajiet ta’ risistemazzjoni.

III.   ANALIŻI TAL-POŻIZZJONI TAL-KUNSILL FL-EWWEL QARI

Ġenerali

In-negozjati saru f'kuntest ta’ politika msawwar mill-programm tal-Aja li jistabbilixxi l-għanijiet u l-istrumenti fil-kamp tal-ġustizzja u l-affarijiet interni għall-perijodu mill-2005 sal-2010 u sussegwentement mill-programm ta’ Stokkolma li jkopri l-perijodu mill-2010 sal-2014. Fiż-żewġ każijiet, il-Kunsill Ewropew esprima l-impenn tiegħu sabiex jiżviluppa aktar is-Sistema Komuni Ewropea tal-Asil billi jiġi emendat il-qafas leġislattiv u billi tissaħħaħ il-kooperazzjoni fil-prattika. Il-Kunsill Ewropew enfasizza wkoll l-importanza tal-iżvilupp tad-dimensjoni esterna tal-asil permezz ta’ kooperazzjoni mal-pajjiżi u r-reġjuni tal-oriġini. Fil-Programm tal-Aja l-Kunsill Ewropew appella għall-iżvilupp ta’ Programmi ta’ Protezzjoni Reġjonali tal-UE li jkunu jinkludu fost oħrajn programm konġunt ta’ risistemazzjoni għall-Istati Membri li lesti jipparteċipaw fih. Fil-Programm ta’ Stokkolma, il-Kunsill Ewropew ħeġġeġ favur il-parteċipazzjoni volontarja tal-Istati Membri fl-iskema konġunta tal-UE dwar ir-risistemazzjoni u sabiex jiżdied l-għadd ta’ refuġjati risistemati.

F'konformità mal-Artikolu 3 u l-Artikolu 4a(1) tal-Protokoll Nru 21 dwar il-Pożizzjoni tar-Renju Unit u l-Irlanda fir-rigward tal-Ispazju ta’ Libertà, Sigurtà u Ġustizzja, anness għat-Trattat dwar l-Unjoni Ewropea u għat-Trattat dwar il-Funzjonament tal-Unjoni Ewropea, ir-Renju Unit innotifika x-xewqa tiegħu li jieħu sehem fl-adozzjoni u l-applikazzjoni tad-Deċiżjoni preżenti, iżda l-Irlanda mhix qed tieħu sehem fl-adozzjoni ta’ din id-Deċiżjoni u mhix marbuta biha jew soġġetta għall-applikazzjoni tagħha.

F'konformità mal-Artikoli 1 u 2 tal-Protokoll Nru 22 dwar il-Pożizzjoni tad-Danimarka, annessa għat-Trattat dwar l-Unjoni Ewropea u għat-Trattat dwar il-Funzjonament tal-Unjoni Ewropea, id-Danimarka mhix qed tieħu sehem fl-adozzjoni tad-Deċiżjoni u mhix marbuta biha jew soġġetta għall-applikazzjoni tagħha.

Kwistjonijiet ewlenin

F'konformità mad-dispożizzjonijiet tad-Dikjarazzjoni Konġunta dwar arranġamenti prattiċi għall-proċedura ta’ kodeċiżjoni (1), ir-rappreżentanti tal-Kunsill, il-Parlament u l-Kummissjoni daħlu f'kuntatti bil-ħsieb li jikkonkludu ftehim fl-istadju tal-pożizzjoni tal-Kunsill fl-ewwel qari. Biex tiġi rikonċiljata l-pożizzjoni taż-żewġ istituzzjonijiet u b'kont meħud tal-ftehim milħuq f'dawk il-kuntatti, il-Kunsill jadotta, dwar il-proposta għal Deċiżjoni li temenda d-Deċiżjoni Nru 573/2007/KE li tistabbilixxi l-Fond Ewropew għar-Refuġjati għall-perijodu mill-2008 sa l-2013 bħala parti mill-programm ġenerali “Solidarjetà u Ġestjoni tal-Flussi ta’ Migrazzjoni”, u li tħassar id-Deċiżjoni tal-Kunsill 2004/904/KE, il-pożizzjoni tiegħu fl-ewwel qari li tintroduċi l-modifiki prinċipali li ġejjin għall-proposta tal-Kummissjoni:

Stabbiliment tal-prijoritajiet komuni tal-UE (Artikolu 1(1)(a))

B'riżultat tal-kuntatti informali bejn il-Kunsill u l-Parlament, il-Kunsill jemenda l-proposta tal-Kummissjoni billi jelenka l-prijoritajiet tar-risistemazzjoni fid-Deċiżjoni għall-kuntrarju tas-suġġeriment inizjali mill-Kummissjoni li kien jgħid li l-prijoritajiet komuni tal-UE għar-risistemazzjoni jiġu stabbiliti fuq bażi annwali fil-proċedura ta’ komitoloġija. Peress li l-Fond Ewropew għar-Refuġjati jkopri l-perijodu sa tmiem l-2013, effettivament fadal biss sena ta’ programmar waħda taħt il-Fond attwali. Għaldaqstant hu ġġustifikat li f'din id-Deċiżjoni jiġu elenkati l-prijoritajiet għal dik is-sena biss u li jiġi speċifikat mekkaniżmu għall-istabbiliment tal-prijoritajiet komuni tal-UE dwar ir-risistemazzjoni fl-istrument li joħloq fond ġdid għall-perijodu mill-2014 sal-2020.

Fid-dawl tas-sena ta’ programmar tal-2013, il-pożizzjoni tal-Kunsill tipprevedi li l-Istati Membri għandhom jikkomunikaw lill-Kummissjoni, sal-1 ta’ Mejju 2012, stima tal-għadd ta’ persuni li beħsiebhom jirrisistemaw matul l-2013 f'konformità mal-prijoritajiet speċifikati fid-Deċiżjoni. Peress li fil-pożizzjoni tal-Kunsill ma hu previst ebda mekkaniżmu għall-istabbiliment tal-prijoritajiet tal-UE dwar ir-risistemazzjoni fuq bażi annwali, id-dispożizzjonijiet kollha fil-proposta tal-Kummissjoni li jirreferu għall-ipprogrammar annwali ma jibqgħux rilevanti.

Prijoritajiet komuni tal-UE dwar ir-risistemazzjoni għall-2013 (Artikolu 1(1)(a), Premessi 3, 4 u 5)

Il-prijoritajiet komuni tal-UE dwar ir-risistemazzjoni għall-2013 kif speċifikati fil-pożizzjoni tal-Kunsill ikopru persuni minn pajjiż jew reġjun innominat għall-implimentazzjoni ta’ Programm ta’ Protezzjoni Reġjonali, persuni li jappartjenu għal grupp vulnerabbli speċifiku jew refuġjati minn pajjiż jew reġjun speċifiku. L-ewwel żewġ ġabriet ta’ prijoritajiet huma fformulati bħala prijoritajiet ġenerali u jixbhu ħafna l-kategorijiet stipulati fl-Artikolu 13(3) tad-Deċiżjoni Nru 573/2007/KE li tistabbilixxi l-Fond Ewropew għar-Refuġjati għall-perijodu mill-2008 sal-2013. Meta titqabbel mad-Deċiżjoni Nru 573/2007/KE l-pożizzjoni tal-Kunsill iżżid mal-lista l-gruppi vulnerabbli li ġejjin: superstiti ta’ vjolenza u tortura kif ukoll persuni li jeħtieġu risistemazzjoni ta’ emerġenza jew risistemazzjoni urġenti għal ħtiġijiet ta’ protezzjoni legali jew fiżika. Din iż-żieda hi ġustifikata peress li ż-żewġ kategoriji ta’ persuni jagħmlu parti wkoll mill-prijoritajiet tal-UNHCR dwar ir-risistemazzjoni.

It-tielet ġabra ta’ prijoritajiet hija msemmija bħala prijoritajiet komuni speċifiċi tal-UE għall-2013 u l-lista ta’ dawn il-prijoritajiet tinstab fl-Anness għal din id-Deċiżjoni. Kif hemm spjegat fil-Premessa 3, din il-lista ta’ prijoritajiet komuni speċifiċi tal-UE għall-2013 hi stabbilita fuq il-bażi tal-kriterji tal-UNHCR dwar ir-risistemazzjoni u t-tbassir annwali tal-UNHCR dwar ir-risistemazzjoni b'kont meħud ta’ fejn l-azzjoni komuni tal-UE jkollha impatt sinifikattiv biex tittratta l-ħtiġijiet ta’ protezzjoni.

Il-pożizzjoni tal-Kunsill iżżid ukoll Premessa 5 li hija aġġornament tal-Premessa 26 tad-Deċiżjoni Nru 573/2007/KE li tistabbilixxi l-Fond Ewropew għar-Refuġjati għall-perijodu mill-2008 sal-2013. Fil-Premessa 5, il-pożizzjoni tal-Kunsill taġġorna l-informazzjoni dwar il-pajjiżi u r-reġjuni li attwalment huma nnominati għall-implimentazzjoni ta’ programmi ta’ protezzjoni reġjonali.

L-ammont fiss li għandu jiġi rċevut għal kull persuna risistemata (Artikolu 1(1)(b), Premessa 6)

B'riżultat tal-kuntatti informali mal-Parlament, il-pożizzjoni tal-Kunsill temenda l-proposta tal-Kummissjoni billi tipproponi ammont fiss ogħla għal kull persuna risistemata li jirċievu mill-Fond dawk l-Istati Membri li ma użawx il-Fond għal dan l-iskop qabel. Billi l-Artikolu 13(3) tad-Deċiżjoni Nru 573/2007/KE li tistabbilixxi l-Fond Ewropew għar-Refuġjati għall-perijodu mill-2008 sal-2013 jipprevedi li l-Istati Membri jirċievu ammont fiss ta’ EUR 4 000 għal kull persuna risistemata f'konformità mal-prijoritajiet stipulati fid-Deċiżjoni, il-pożizzjoni tal-Kunsill tipprevedi ammont ta’ EUR 6 000 għal kull persuna risistemata għal dawk l-Istati Membri li għandhom jirċievu l-ammont fiss mill-Fond għall-ewwel darba u ammont ta’ EUR 5 000 għal dawk l-Istati Membri li rċevew l-ammont fiss mill-Fond darba biss qabel. L-iskop ta’ din l-emenda hu li jħeġġeġ lil dawk l-Istati Membri li ma għamlux dan sa issa jniedu programmi ta’ risistemazzjoni.

Żieda ta’ Premessa 2

Il-pożizzjoni tal-Kunsill temenda l-proposta tal-Kummissjoni billi żżid il-Premessa 2. Fl-ittra tiegħu lill-President tal-Kumitat tar-Rappreżentanti Permanenti tal-10 ta’ Frar 2012 (dok. 6370/12) fejn indika li kien ser jirrakkomanda lill-membri tal-Kumitat LIBE u lill-Plenarja, fit-tieni qari tagħha, biex jaċċettaw il-ftehim milħuq dwar id-Deċiżjoni mingħajr emendi, il-President tal-Kumitat LIBE talab iż-żieda tal-Artikolu 80 TFUE għall-bażi legali ta’ din id-Deċiżjoni. Madankollu, fil-fehma tal-Kunsill, l-Artikolu 80 ma jistax jikkostitwixxi bażi legali għall-adozzjoni ta’ dan l-att peress li ma jagħtix lill-istituzzjonijiet tal-Unjoni s-setgħa li jadottaw atti legali. Għaldaqstant, bħala kompromess, il-Kunsill iddeċieda li jżid il-Premessa 2 li tirreferi għall-Artikolu 80 TFUE u l-prinċipji msemmijin fih.

Emendi tal-Parlament Ewropew

Fil-pożizzjoni tiegħu, il-Kunsill aċetta l-emendi 2, 3 u 4 fl-intier tagħhom, parzjalment jew fil-prinċipju. Il-Kunsill ma jaċċettax l-emendi 1, 5, 6, 7, 8, 9, 10 u 11 peress li dawn huma dwar proċedura għad-definizzjoni ta’ prijoritajiet komuni tal-UE dwar ir-risistemazzjoni fuq bażi annwali. Il-pożizzjoni tal-Kunsill tieħu approċċ differenti u tistabbilixxi lista ta’ prijoritajiet komuni tal-UE dwar ir-risistemazzjoni għall-2013 li hija l-unika sena ta’ programmar li fadal taħt il-Fond Ewropew għar-Refuġjati attwali.

IV.   KONKLUŻJONI

Il-pożizzjoni tal-Kunsill fl-ewwel qari tirrifletti l-kompromess milħuq f'negozjati bejn il-Kunsill u l-Parlament Ewropew, iffaċilitati mill-Kummissjoni. Il-COREPER approva dan il-kompromess fil-laqgħa tiegħu tat-22 ta’ Frar 2012. Qabel dan, il-President tal-Kumitat LIBE tal-Parlament Ewropew f'ittra lill-President tal-COREPER bid-data tal-10 ta’ Frar 2012 kien indika li jekk it-test ta’ kompromess jintbagħat lill-Parlament bħala l-pożizzjoni tal-Kunsill fl-ewwel qari, huwa ser jirrakkomanda lill-membri tal-LIBE, u sussegwentement lill-plenarja, li l-pożizzjoni tal-Kunsill tiġi aċċettata mingħajr emendi fit-tieni qari tal-Parlament, soġġett għall-verifika mill-ġuristi lingwisti taż-żewġ istituzzjonijiet.

(1)  ĠU C 145, 30.6.2007, p. 5.