This document is an excerpt from the EUR-Lex website
Document 52011PC0877
Proposal for a DIRECTIVE OF THE EUROPEAN PARLIAMENT AND OF THE COUNCIL Amending Directive 2003/98/EC on re-use of public sector information
Proposta għal DIRETTIVA TAL-PARLAMENT EWROPEW U TAL-KUNSILL li temenda d-Direttiva 2003/98/KE dwar l-użu mill-ġdid tal-informazzjoni tas-settur pubbliku
Proposta għal DIRETTIVA TAL-PARLAMENT EWROPEW U TAL-KUNSILL li temenda d-Direttiva 2003/98/KE dwar l-użu mill-ġdid tal-informazzjoni tas-settur pubbliku
/* KUMM/2011/0877 finali - 2011/0430 (COD) */
Proposta għal DIRETTIVA TAL-PARLAMENT EWROPEW U TAL-KUNSILL li temenda d-Direttiva 2003/98/KE dwar l-użu mill-ġdid tal-informazzjoni tas-settur pubbliku /* KUMM/2011/0877 finali - 2011/0430 (COD) */
MEMORANDUM TA’ SPJEGAZZJONI
1.
IL-KUNTEST TAL-PROPOSTA
1.1.
Ir-raġunijiet għall-proposta u l-għanijiet tagħha
Id-Direttiva 2003/98/KE tal-Parlament
Ewropew u tal-Kunsill dwar l-użu mill-ġdid ta’ informazzjoni tas-settur
pubbliku (id-"Direttiva PSI") ġiet adottata
fis-17 ta’ Novembru 2003. L-għan tad-Direttiva kien li
tiffaċilita l-użu mill-ġdid tal-PSI mal-Unjoni kollha, billi tarmonizza
l-kundizzjonijiet bażiċi għall-użu mill-ġdid, u għat-tneħħija tax-xkiel
għall-użu mill-ġdid, fis-suq intern. Id-Direttiva fiha dispożizzjonijiet dwar
in-nondiskriminazzjoni, it-tariffi, l-arranġamenti esklussivi, it-trasparenza,
il-ħruġ tal-liċenzji u l-għodod prattiċi, biex tiffaċilita s-sejbien u l-użu
mill-ġdid tad-dokumenti pubbliċi. L-Artikolu 13
tad-Direttiva sejħet għal reviżjoni tal-applikazzjoni tad-Direttiva qabel
l-1 ta’ Lulju 2008. Din ir-reviżjoni saret mill-Kummissjoni, u
wasslet għall-pubblikazzjoni tal-Komunikazzjoni COM(2009) 212[1]. Minkejja l-progress li sar,
sabet li għad baqa' xi ostakoli, speċifikament tentattivi min-naħa
tal-entitajiet tas-settur pubbliku li jżidu kemm jista' jkun l-irkupru
tal-ispiża, kontra l-benefiċċji għall-ekonomija f'sens usa'; fost ostakoli oħra
nistgħu nsemmu l-kompetizzjoni bejn is-settur pubbliku u dak privat;
kwistjonijiet prattiċi li jxekklu l-użu mill-ġdid, bħalma hu n-nuqqas ta'
informazzjoni dwar il-PSI disponibbli; u l-atteġġjament tal-entitajiet
tas-settur pubbliku, li ftit li xejn huma konxji tal-potenzjal ekonomiku.
Il-Kummissjoni kkonkludiet li kellha ssir reviżjoni oħra sal-2012, b'aktar
evidenza disponibbli dwar l-impatt, l-effetti u l-applikazzjoni tad-Direttiva.
Din il-proposta tal-Kummissjoni hija r-riżultat tat-tieni reviżjoni. L-informazzjoni
tas-settur pubbliku huwa materja prima importanti għall-prodotti ta' kontenut diġitali
u għal servizzi li s'issa l-potenzjal tagħhom ftit li xejn ġie sfruttat. L-għan
ġenerali ta’ din l-azzjoni tal-Unjoni huwa li tikkontribwixxi lejn it-tkabbir
ekonomiku u l-ħolqien tal-impjiegi, billi tberraħ il-potenzjal ekonomiku
tad-dejta fil-proprjetà tal-gvernijiet permezz ta' kundizzjonijiet imtejba
għall-isfruttar tal-PSI. Dan il-għan jaqbel għalkollox mal-istrateġiji
orizzontali tal-Unjoni, b'mod partikulari l-Istrateġija Ewropa 2020
tal-Kummissjoni, li tnediet fit-3 ta' Marzu 2010 bil-għan li
tittrasforma l-Ewropa fi "ekonomija intelliġenti, sostenibbli u
inklussiva b'livelli għoljin ta' impjiegi, produttività u koeżjoni soċjali". Il-ftuħ tal-PSI
għall-użu mill-ġdid tagħha jkollu effett pożittiv ukoll fejn jidħlu
t-trasparenza, l-effiċjenza u r-responsabbiltà tal-gvernijiet, u
jikkontribwixxi biex jingħata iktar setgħat liċ-ċittadin. Għaldaqstant,
fil-fond tagħha, id-Direttiva PSI timmira li tqabbad bidla kulturali fis-settur
pubbliku, billi toħloq ambjent favorevoli għal attivitajiet b'valur miżjud
imnisslin mill-użu mill-ġdid tar-riżorsi tal-informazzjoni pubblika. L-isfida
regolatorja hija li s-suq jiġi pprovdut b'qafas legali ottimali biex iħeġġeġ
is-suq tal-kontenut diġitali għall-prodotti u s-servizzi bbażati fuq il-PSI,
inkluża d-dimensjoni transkonfinali tagħha, u li ssir prevenzjoni tat-tagħwiġ
tal-kompetizzjoni fis-suq tal-Unjoni għall-użu mill-ġdid tal-PSI. B'hekk,
il-Kummissjoni qiegħda timmira l-katina tal-isfruttament kummerċjali u mhux
kummerċjali tal-PSI, biex tiżgura kundizzjonijiet speċifiċi fi stajdi
differenti tal-katina bil-għan li jittejjeb l-aċċess u jiġi ffaċilitat l-użu
mill-ġdid. Id-dejta ma għandhiex tibqa' maqfula, u wieħed
għandu jkollu l-possibbiltà li jsibha disponibbli għall-użu mill-ġdid tagħha.
L-ispejjeż tat-tranżazzjonijiet finanzjarji u mhux finanzjarji għandhom
jinżammu kemm jista' jkun baxxi. Min juża l-PSI mill-ġdid għandu jkollu aċċess
għal mekkaniżmu effiċjenti u effettiv ta' rikors biex ikun jista' jeżerċita
d-drittijiet tiegħu. Id-Direttiva oriġinali għandha tissaħħaħ sabiex tegħleb
ix-xkiel li għad baqa', eż. in-nuqqas ta’ informazzjoni dwar id-dejta
effettivament disponibbli, regoli restrittivi jew mhux ċari fir-rigward
tal-kundizzjonijiet ta' aċċess u użu mill-ġdid, prezzijiet inkonsistenti u mhux
ċari fejn l-użu mill-ġdid tal-informazzjoni huwa soġġett għal tariffi, u
l-kumplessità ġenerali żejda tal-proċess biex jinkiseb permess għall-użu
mill-ġdid tal-PSI, partikularment għall-SMEs. Barra minn hekk, l-utenti tal-PSI
u l-entitajiet 'ibridi' eżistenti tas-settur pubbliku (li jħalltu l-kompiti
pubbliċi mal-isfruttar kummerċjali tad-dejta) għandhom igawdu kundizzjonijiet
ekwi ta’ kompetittività, li ma jkunux imxekkla minn trattament diskriminatorju
jew minn ftehimiet esklussivi mhux iġġustifikati għall-isfruttar tal-PSI. Fl-aħħar
nett, is-suq intern tal-użu mill-ġdid tal-PSI ma jkunx jista' jwarrad sakemm ma
jitneħħewx il-fruntieri regolatorji u prattiċi għall-użu mill-ġdid mal-Unjoni
kollha, u sakemm l-istess tipi ta’ dejta ma jkunux disponibbli b'termini u
kundizzjonijiet simili (jekk mhux eżattament ugwali), irrispettivament
mill-oriġni nazzjonali tagħhom. Il-benefiċċji li għandhom jinsiltu mill-aċċess
imtejjeb għall-PSI u għall-użu mill-ġdid aktar faċli tagħha jinkludu:
l-innovazzjoni fi prodotti direttament ibbażati fuq il-PSI, u fi prodotti
komplementari; spejjeż imnaqqsa ta’ tranżazzjoni, u ksib ta’ aktar effiċjenza
fis-settur pubbliku; u t-tgħaqqid dejjem jikber ta’ informazzjoni pubblika u
privata biex jinħolqu prodotti ġodda.
1.2.
Il-kuntest ġenerali
L-entitajiet pubbliċi jipproduċu, jiġbru u
jaħżnu teżor ta’ informazzjoni u ta’ kontenut, li jvarja mid-dejta statistika,
ekonomika u ambjentali għall-materjali ta’ arkivju, kullani ta’ kotba jew
xogħlijiet artistiċi. Ir-rivoluzzjoni diġitali żiedet b'mod sinifikanti l-valur
ta’ din ir-riżorsa għall-prodotti u s-servizzi innovattivi bbażati fuq id-dejta
bħala materja prima. L-importanza ekonomika tal-ftuħ tar-riżorsi
tad-dejta, inkluża d-dejta pubblika, illum hija ferm magħrufa. Ngħidu aħna,
skont rapport ta’ The Economist tal-2010, id-dejta saret "materja prima
ekonomika li tħabbatha mal-kapital u max-xogħol"[2], filwaqt li r-Rapport Finali
ta’ "Digital Britain" irrikonoxxa d-dejta bħala "munita
innovattiva... il-qofol tal-ekonomija tal-għarfien"[3]. Stħarriġ riċenti ħareġ
bl-istima li s-suq totali tal-informazzjoni tas-settur pubbliku fl-2008 kien
jammonta għal EUR 28 biljun mal-Unjoni kollha[4]. L-istess stħarriġ jindika li
l-benefiċċji ekonomiċi globali mit-tkomplija tal-ftuħ tal-informazzjoni
tas-settur pubbliku permezz ta' aċċess iffaċilitat jammontaw għal madwar
EUR 40 biljun fis-sena għall-UE-27. Il-benefiċċji ekonomiċi diretti u
indiretti totali mill-applikazzjonijiet tal-PSI u mill-użu tagħha mal-ekonomija
kollha tal-UE-27 kieku jilħqu l-EUR 140 biljun fis-sena. Lil hinn mit-trawwim tal-innovazzjoni u
tal-kreattività li jistimulaw it-tkabbir ekonomiku, id-dejta pubblika miftuħa
tagħti aktar setgħa liċ-ċittadini, u b'hekk ittejjeb id-demokrazija
parteċipattiva filwaqt li tippromwovi ggvernar aktar trasparenti, responsabbli
u effiċjenti. L-isfida tad-Direttiva hija li tipprovdi
lis-suq bl-aqwa qafas legali biex jiffaċilita u jixpruna l-użu mill-ġdid
kummerċjali u mhux kummerjċali tad-dejta pubblika miftuħa. Għaldaqstant,
fil-fond, id-Direttiva u r-reviżjoni tagħha jimmiraw li jqabbdu bidla kulturali
fis-settur pubbliku, billi joħolqu ambjent favorevoli għal attivitajiet b'valur
miżjud imnisslin mill-użu mill-ġdid tar-riżorsi tal-informazzjoni pubblika. Għalhekk, ir-reviżjoni tad-Direttiva tifforma
parti mill-Aġenda Diġitali għall-Ewropa, u mill-istrateġija Ewropa 2020 li
timmira lejn tkabbir intelliġenti, sostenibbli u inklussiv[5]. Din ir-reviżjoni hi
effettivament azzjoni ewlenija tal-Aġenda Diġitali (azzjoni ewlenija 1c).
1.3.
Koerenza ma’ politiki oħrajn
1.3.1.
Il-politika tal-PSI u r-regoli tal-Unjoni dwar
il-kompetizzjoni
Wieħed mill-għanijiet tad-Direttiva tal-PSI
huwa li jillimita t-tagħwiġ tal-kompetizzjoni fis-suq tal-Unjoni, u b'hekk
toħloq kundizzjonijiet indaqs għall-utenti potenzjali tal-PSI. F'dan
ir-rigward, id-Direttiva PSI fiha formulazzjoni partikulari tar-regoli aktar
ġenerali tal-Unjoni dwar il-kompetizzjoni, speċifikament l-Artikolu 10(2)
–li jipprojbixxi s-sussidjar reċiproku–, u l-Artikolu 11 –li jipprojbixxi,
b'ċerti eċċezzjonijiet, l-arranġamenti esklussivi–.
1.3.2.
Il-politika tal-PSI u l-politika ambjentali
Id-Direttiva PSI, id-Direttiva 2003/4/KE
dwar l-aċċess pubbliku għat-tagħrif ambjentali (id-Direttiva ta’ Aarhus), u
d-Direttiva 2007/2/KE li tistabbilixxi Infrastruttura għall-Informazzjoni
Ġeografika fil-Komunità Ewropea (INSPIRE), flimkien jikkostitwixxu sensiela ta'
miżuri tal-Unjoni biex jiżguraw l-usa' tixrid possibbli tat-tagħrif ambjentali
miżmum mill-entitajiet pubbliċi. Għalkemm dawn id-Direttivi ma jaqsmux
għanijiet komuni immedjati, jikkomplementaw 'il xulxin u jaqsmu l-għan komuni
tat-tisħiħ tat-trasparenza u tad-disponibbiltà tad-dejta pubblika. Id-Direttiva dwar l-aċċess pubbliku
għat-tagħrif ambjentali tikkontribwixxi għal għarfien usa' dwar kwistjonijiet
ambjentali, skambju ħieles tal-fehmiet, parteċipazzjoni iktar effettiva
mill-pubbliku fit-teħid tad-deċiżjonijiet dwar l-ambjent, u fl-aħħar
mill-aħħar, tikkontribwixxi wkoll lejn ambjent aktar f'saħħtu. Id-Direttiva
msemmija tappoġġa l-politika tal-Kummissjoni dwar l-użu mill-ġdid tal-PSI billi
l-aċċess wiesa' għat-tagħrif huwa prekondizzjoni għall-użu mill-ġdid tiegħu, u
billi d-dejta ambjentali hija għajn importantissma ta’ tagħrif għall-ħolqien
ta’ prodotti u servizzi ġodda. Id-Direttiva INSPIRE tiżvolġi rwol simili fejn
tidħol id-dejta spazjali. Barra minn hekk, id-Direttiva tal-PSI hija ta’
importanza vitali għall-koerenza globali tas-Sistema għall-Qsim
tal-Informazzjoni Ambjentali.
1.3.3.
Il-PSI u l-politika marittima integrata
F'Settembru 2010, il-Kummissjoni ħarġet
Komunikazzjoni lill-Parlament Ewropew u lill-Kunsill –l-Għarfien
Marittimu 2020– li kellha fil-mira l-ftuħ tal-potenzjal tal-għarfien
marittimu tal-Ewropa. L-istrateġija tagħha kellha tliet toroq paralleli:
l-iffaċilitar u t-traħħis tal-użu tad-dejta dwar l-ambjent marittimu, it-trawwim
tal-kompetittività tal-utenti tal-istess dejta, u t-titjib tal-fehim ġenerali
tal-ibħra u l-oċeani tal-Ewropa. Din l-istrateġija hija konsistenti
mal-politika tal-Kummissjoni dwar l-użu mill-ġdid tal-PSI, u ssaħħaħha
fl-istess ħin.
1.3.4.
Il-politika tal-PSI u l-politika komuni
tat-trasport
Waħda mill-40 inizjattiva mressqa fil-White
Paper il-ġdida dwar it-Trasport[6]
hija l-ħolqien ta’ kundizzjonijiet ta' qafas għat-trawwim tal-iżvilupp u
tal-użu ta’ sistemi intelliġenti għall-iskedar interoperabbli u multimodali,
għall-informazzjoni, sistemi ta’ bbukkjar online u ta’ biljettar intelliġenti. Din l-inizjattiva hi marbuta direttament
mal-Pjan ta’ Azzjoni għall-iskjerament ta' Sistemi tat-Trasport Intelliġenti
fl-Ewropa (STI)[7]
għat-trasport bit-triq u l-interfaċċji tiegħu ma' mezzi oħra tat-trasport,
adottat mill-Kummissjoni f'Diċembru 2008; u hija marbuta wkoll
mad-Direttiva 2010/40/UE tas-7 ta’ Lulju 2010[8] dwar il-qafas għall-varar ta’
Sistemi ta’ Trasport Intelliġenti fil-qasam tat-trasport bit-triq u għall-interkonnessjonijiet
ma’ modi oħrajn ta’ trasport. Dawn iż-żewġ strumenti jimmiraw li jħaffu u
jikkoordinaw l-implimentazzjoni tal-applikazzjonijiet tal-STI, inklużi servizzi
ta’ informazzjoni tat-traffiku f'ħin reali mal-Unjoni kollha, u servizzi ta’
informazzjoni tat-trasport mal-Unjoni kollha. Skont id-Direttiva 2010/40/UE,
il-Kummissjoni se tadotta speċifikazzjonijiet vinkolanti għall-"provvista
ta’ servizzi ta’ informazzjoni tat-traffiku f'ħin reali mal-Unjoni kollha"
u għall-"provvista ta’ servizzi ta’ informazzjoni tat-trasport mal-Unjoni
kollha", sabiex tindirizza l-forniment tad-dejta dwar ir-regolazzjoni
tat-traffiku mill-awtoritajiet tat-trasport, u sabiex tiggarantixxi l-aċċess
mill-kumpaniji privati għal dejta pubblika rilevanti. Dawn l-ispeċifikazzjonijiet, flimkien ma' proposta leġiżlattiva
possibbli ta’ segwiment biex tiżgura l-aċċess għat-tagħrif dwar it-trasport
pubbliku u l-użu mill-ġdid tiegħu, għandhom mnejn jikkontribwixxu b'mod
sinifikanti lejn il-politika tal-Kummissjoni dwar l-użu mill-ġdid tal-PSI,
billi jagħtu liċ-ċittadini jew lill-kumpaniji d-dritt li jaċċessaw u jużaw
mill-ġdid l-informazzjoni dwar it-traffiku fit-toroq jew dwar it-trasport
pubbliku għal prodotti u servizzi ġodda bbażati fuq il-kontenut dinamiku ta'
tali dejta. Dan jimxi bi qbil mal-politika tal-Kummissjoni dwar l-użu mill-ġdid
tal-PSI.
1.3.5.
Il-politika tal-PSI u l-inizjattiva dwar l-aċċess
miftuħ għat-tagħrif xjentifiku
L-għan tal-Kummissjoni fil-qasam tat-tagħrif
xjentifiku huwa li jkattar kemm jista' jkun il-benefiċċji tat-teknoloġiji
tal-informatika (l-internet, in-netwerks tas-superkompjuters, l-estrazzjoni ta’
dejta) għal aċċess eħfef għat-tagħrif xjentifiku u l-użu mill-ġdid eħfef
tiegħu. Il-politiki tal-'aċċess miftuħ' ifittxu l-għan li l-artikli xjentifiċi
u d-dejta tar-riċerka jagħmluhom disponibbli għall-qarrejja fuq ix-xibka.
Il-Kummissjoni beħsiebha tieħu passi biex tippromwovi l-aċċess għat-tagħrif
xjentifiku u ż-żamma tiegħu, inklużi l-pubblikazzjonijiet u d-dejta
tal-proġetti ta’ riċerka ffinanzjati mill-baġit tal-Unjoni. L-għanijiet tal-Kummissjoni f'dan il-qasam
huma allinjati mill-qrib ma' dawk tad-Direttiva tal-PSI, fis-sens illi t-tnejn
li huma jimmiraw li jagħmlu t-tagħrif pubbliku iktar disponibbli fl-Ewropa
għall-aċċess u l-użu mill-ġdid usa' tiegħu.
1.3.6.
Il-politika tal-PSI u l-politika dwar
id-diġitizzazzjoni u l-wirt kulturali
Id-diġitizzazzjoni
tal-kollezzjonijiet kulturali tippromwovi l-aċċess għall-kultura billi trendi
l-wirt kulturali tal-Ewropa, miżmum mill-istituzzjonijiet kulturali Ewropej
–kotba, mapep, materjal awdjo, films, manuskritti, oġġetti tal-mużewijiet,
eċċ.–, aktar disponibbli għal kulħadd għall-finijiet ta’ xogħol, studju u
pjaċir. Fl-istess ħin, id-diġitizzazzjoni ssarraf dawk ir-riżorsi f'assi
dejjiema għall-ekonomija diġitali, u b'hekk toħloq ħafna opportunitajiet
għall-innovazzjoni, anki jekk l-isfruttar bis-sħiħ tal-assi kulturali diġitali
għadu qed jieħu passi ta’ tarbija. Qed jiġu esplorati mudelli ta’ negozju, u
l-attivitajiet kummerċjali għadhom qed jirrankaw. L-għanijiet tal-iżgurar
tad-disponibbiltà wiesgħa tal-informazzjoni tas-settur pubbliku (id-Direttiva
PSI), u tat-tqegħid tal-assi kulturali diġitizzati għad-dispożizzjoni
tan-negozji kreattivi u innovattivi (il-politika tad-diġitizzazzjoni), huma
għalkollox konsistenti, isaħħu 'l xulxin, u jikkonformaw bis-sħiħ mal-Aġenda
Ewropea għall-Kultura u mal-Pjan ta' Azzjoni tal-Kunsill għall-Kultura.
2.
RIŻULTATI TAL-KONSULTAZZJONIJIET MAL-PARTIJIET
INTERESSATI U L-VALUTAZZJONIJIET TAL-IMPATT
2.1.1.
Il-konsultazzjoni pubblika
Saret konsultazzjoni pubblika wiesgħa fuq
l-internet dwar ir-reviżjoni tad-Direttiva, skont l-istandards stabbiliti
tal-Kummissjoni. Il-konsultazzjoni kienet miftuħa
mid-9 ta’ Settembru 2010
sat-30 ta’ Novembru 2010. Ġiet ippubblikata fuq il-paġna
tal-Kummissjoni "Leħnek fl-Ewropa":
(http://ec.europa.eu/yourvoice/ipm/forms/dispatch?form=psidirective2010). Ħarġet stqarrija għall-istampa mat-tnedija
tal-konsultazzjoni miftuħa. It-tnedija ġiet irriklamata wkoll fuq it-Twitter,
fuq is-sit tal-Kummissjoni dwar is-Soċjetà tal-Informazzjoni u l-PSI (http://ec.europa.eu/information_society/policy/psi/index_en.htm),
u fuq il-portal tal-ePSIplatform[9].
Barra minn hekk, il-partijiet interessati ġew informati dwar il-konsultazzjoni,
u ġew mistiedna jressqu l-fehmiet tagħhom permezz tal-għaqdiet tagħhom, jew
individwalment bil-posta elettronika. Il-partijiet kollha interessati, inklużi
l-gvernijiet, l-entitajiet tas-settur pubbliku li jżommu l-kontenut (inkluż
minn setturi li bħalissa huma esklużi), l-utenti kummerċjali u mhux
kummerċjali, l-esperti, l-akkademiċi u ċ-ċittadini, kienu mistiedna
jikkontribwixxu. Il-konsultazzjoni rċeviet 598 tweġiba, li
ġew ippubblikati fuq is-sit tal-PSI tal-Kummissjoni[10]. It-tweġibiet jirrappreżentaw
l-atturi kollha varji tal-katina ta' valur tal-PSI: dawk li jżommu l-kontenut
tal-PSI (8%), awtoritajiet pubbliċi oħra li ma jżommux PSI (4 %), utenti
mill-ġdid tal-PSI (13 %), akkademiċi u esperti (23 %), iċ-ċittadini
(48 %) u dawk li identifikaw ruħhom bħala 'oħrajn' (4 %). Il-biċċa l-kbira
sew minn dawk li wieġbu indikaw li l-użu mill-ġdid tal-PSI kien għadu ma laħaqx
il-potenzjal sħiħ tiegħu, u kienu favur iktar azzjoni biex jiġi xprunat l-użu
mill-ġdid u biex tinġieb 'il quddiem il-provvista transkonfinali tal-prodotti u
s-servizzi bbażati fuq il-PSI. Ħafna minn dawk li wieġbu kienu favur li jsiru
emendi fid-Direttiva, b'firxa ta' madwar 40 % ta’ dawk li jżommu
l-kontenut tal-PSI, sa 70 % tal-utenti mill-ġdid. Is-suġġerimenti għal
emendi leġiżlattivi u għal iktar għajnuna permezz ta’ linjigwida mhux
vinkolanti ma vvarjawx wisq fost il-kategoriji speċifiċi ta’ dawk li jwieġbu,
iżda l-maġġoranza kienu favur li jiġi emendat il-prinċipju ġenerali biex jiġi
stabbilit id-dritt tal-użu mill-ġdid, kif ukoll biex jiġu adottati miżuri
addizzjonali (biex jinfetħu r-riżorsi tad-dejta pubblika u biex jitħaffef l-użu
mill-ġdid, eż. listi tad-dokumenti disponibbli, kundizzjonijiet ta’ liċenzjar
issemplifikati jew l-ebda kundizzjoni ta' xejn, l-ispejjeż marġinali, eċċ.). Il-kwistjoni
tat-tariffi rċeviet ħafna attenzjoni wkoll minn dawk li wieġbu. Joħroġ ċar minn
ħafna tweġibiet li hemm bżonn ta’ kjarifika u ta’ gwida fuq ħafna kwistjonijiet
fir-rigward tat-tariffi, inklużi strateġiji ta’ tariffar vs. l-aċċess ħieles,
kif ukoll it-tariffi li wieħed jista' jippermetti. It-tariffi għall-użu
mill-ġdid, ibbażati fuq l-irkupru sħiħ jew parzjali tal-ispejjeż, ma rċevewx l-appoġġ
tal-partijiet interessati. Spiss, dawk li jwieġbu sejħu jew għal projbizzjoni
tat-tariffar, jew għal kjarifika tat-terminu "l-irkupru raġonevoli
tal-ispejjeż mill-investiment". Il-biċċa l-kbira kienu favur l-użu
mill-ġdid mhux kummerċjali. Tressqu ħafna argumenti favur u kontra s-soluzzjoni
tal-ispejjeż marġinali mill-kategoriji kollha ta' dawk li wieġbu, u fuq dan
il-punt ma hemmx kunsens. Fl-aħħar nett,
mis-setturi kollha ta’ dawk li wieġbu, kien hemm sejħa ġenerali għal miżuri ta’
appoġġ u ta’ implimentazzjoni biex jiġi promoss l-użu mill-ġdid tal-PSI, inkluż
b'mod transkonfinali. Dawn il-miżuri jvarjaw mill-gwida fuq għadd ta’ suġġetti
(il-liċenzjar, it-tariffar, il-kwalità tad-dejta) għall-appoġġ għall-iżvilupp
ta’ portali tad-dejta nazzjonali u għal punt ta’ aċċess wieħed Ewropew
għad-dejta. F'kelma waħda,
it-tweġibiet għal din il-konsultazzjoni wrew li, imqabbel mar-reviżjoni
tal-2009, il-kultura tal-użu mill-ġdid imxiet 'il quddiem f'ħafna mill-Istati
Membri (b'mod partikulari d-Danimarka, Franza u r-Renju Unit). Madankollu,
baqa' ħafna xi jsir biex jiġi sfruttat bis-sħiħ il-potenzjal tal-użu mill-ġdid
tal-PSI, kif ukoll biex jiġu sfruttati r-regoli stabbiliti mid-Direttiva PSI
tal-2003. Għadd ta’ dispożizzjonijiet ta’ din id-Direttiva jeħtieġu emenda jew
kjarifika. Barra minn hekk, in-nuqqas ta’ kunsens jew ta’ xejriet ġenerali fost
dawk li wieġbu f'dak li jirrigwarda l-kwistjoni tat-tariffi għall-użu mill-ġdid
tal-PSI, juri li l-ebda soluzzjoni universali ma tkun biżżejjed, u li għandhom
jitqiesu d-differenzi fil-bżonnijiet ta’ min iżomm il-PSI u min juża mill-ġdid
il-PSI, bil-għan li l-użu mill-ġdid tad-dejta ma jixxekkilx. It-tweġibit
irċevuti tqiesu fil-valutazzjoni tal-alternattivi li wasslet għall-pakkett ta’
miżuri leġiżlattivi mhux vinkolanti inkluż f'din il-proposta.
2.1.2.
Il-ġbir u l-użu tal-għarfien espert
Tul l-aħħar snin, il-Kummissjoni wettqet
l-istudji li ġejjin biex tivvaluta l-aspetti differenti tas-suq tal-użu
mill-ġdid tal-PSI, inkluża l-valutazzjoni ekonomika tiegħu: MEPSIR (Measuring
European Public Sector Information Resources)[11],
studju dwar l-Arranġamenti Esklussivi[12],
Indikaturi Ekonomiċi u Każi ta' Studju dwar il-mudelli ta' pprezzar tal-PSI[13], studju dwar il-mudelli ta'
pprezzar għall-PSI (Deloitte, għadu ma ġiex ippubblikat), studju dwar il-valur
tas-suq tal-PSI (Vickery, għadu ma ġiex ippubblikat), u studju dwar l-użu
mill-ġdid tal-materjal kulturali[14]. Dawn l-istudji kejlu l-użu mill-ġdid tal-PSI
fl-Istati Membri, ħarġu stimi tad-daqs ġenerali tas-suq għall-PSI fl-Unjoni
(fl-2006 u fl-2010-2011), evalwaw l-eżistenza ta’ arranġamenti esklussivi
possibbli konklużi mill-entitajiet tas-settur pubbliku skont l-Artikolu 11
tad-Direttiva, xetħu dawl fuq l-iżviluppi attwali tal-PSI fl-Istati Membri,
irrakkomandaw indikaturi ekonomiċi biex ikejlu l-użu mill-ġdid tal-PSI,
ivvalutaw il-mudelli differenti tal-provvista u tat-tariffar għall-PSI, u
pprovdew ħarsa ġenerali tal-użu mill-ġdid tal-PSI fis-settur kulturali.
Ir-riżultati ta’ dawn l-istudji pprovdew dejta ekonomika siewja biex jiġu ddeterminati
l-iktar alternattivi xierqa għar-reviżjoni tad-Direttiva tal-PSI. Barra minn hekk, il-Kummissjoni kisbet analiżi
legali importanti mir-riċerka mwettqa fi ħdan in-netwerk tematiku LAPSI[15] (Legal Aspects of Public
Sector Information), li stħarrġet l-implikazzjonijiet legali ta' kwistjonijiet
speċifiċi marbutin mal-użu mill-ġdid tal-PSI, bħal eċċezzjonijiet għal regola
awtomatika għat-tariffar tal-ispejjeż marġinali, il-kunċett tal-"kompitu
pubbliku" u n-nondeskriminazzjoni, jekk l-impriżi pubbliċi għandhomx jiġu
koperti mid-Direttiva PSI, u l-kundizzjonijiet tal-liċenzjar. Fl-aħħar nett, inġabret iktar dejta permezz
ta’ attivitajiet ta' netwerking, kooperazzjoni, koordinazzjoni u tqajjim ta’
kuxjenza, mal-Istati Membri u mal-partijiet interessati. Il-pjattaforma
ePSIplatform tipprovdi dejta wiesgħa ta' PSI mill-Unjoni kollha[16].
2.1.3.
Il-valutazzjoni tal-impatt
Il-valutazzjoni tal-impatt studjat 5
alternattivi biex jiġu indirizzati l-problemi identifikati, eż. in-nuqqas ta’
ċarezza jew ta’ trasparenza tar-regoli dwar l-użu mill-ġdid tal-PSI, ir-riżorsi
ta’ informazzjoni maqfulin, in-nuqqas ta’ kundizzjonijiet indaqs ta’
kompetizzjoni, infurzar insuffiċjenti tad-dispożizzjonijiet tal-użu mill-ġdid,
u l-istrateġiji inkonsistenti adottati mill-Istati Membri individwali. Apparti
r-revoka tad-Direttiva, l-alternattivi jistgħu jinqasmu, b'mod ġenerali, f'żewġ
kategoriji: l-alternattivi li jinvolvu ż-żamma tad-dispożizzjonijiet attwali, u
l-alternattivi li jinvolvu tibdiliet, minn 'irfinar' tekniku sempliċi għall-emendar
sostanzjali tad-dispożizzjonijiet. Alternattiva 1: L-ebda bidla
politika: l-ebda bidla fid-Direttiva (linja bażi) Għall-użu mill-ġdid
tal-informazzjoni tas-settur pubbliku, din l-alternattiva ta’ "l-ebda
bidla ta’ politika" tkun tfisser li jibqgħu applikabbli
d-dispożizzjonijiet attwali tad-Direttiva u l-istrumenti nazzjonali
tat-traspożizzjoni. Alternattiva 2: Il-waqfien
tal-intervent attwali tal-Unjoni: revoka tad-Direttiva PSI Id-Direttiva PSI stabbiliet il-kundizzjonijiet
bażiċi għall-użu mill-ġdid tal-PSI mal-Unjoni kollha, u wasslet għal bidla
fil-politiċi u fil-leġiżlazzjoni tal-Istati Membri. Mingħajr id-Direttiva,
l-Istati Membri jkunu liberi li jirrevokaw jew jemendaw il-leġiżlazzjoni ta'
implimentazzjoni nazzjonali għall-użu mill-ġdid tal-PSI. Dan ikun jirriżulta
fit-tneħħija tal-obbligi regolatorji kollha li fiha bħalissa d-Direttiva, kif
ukoll l-istrumenti ta’ traspożizzjoni. Alternattiva 3: Miżuri leġiżlattivi
mhux vinkolanti Dawn l-istrumenti, eż. il-linjigwida jew
ir-Rakkomandazzjonijiet tal-Kummissjoni, jipprovdu tagħrif addizzjonali u/jew
l-interpretazzjoni ta’ wħud mid-dispożizzjonijiet tad-Direttiva PSI. Il-miżuri
leġiżlattivi ta’ gwida jkunu jinkludu eż. dispożizzjonijiet irrakkomandati
għal-liċenzjar, gwida dwar il-formati tekniċi, jew gwida dwar il-kalkolu
tal-prezzijiet (inkluż għall-kalkolu tal-ispejjeż marginali). Alternattiva 4: Emendi leġiżlattivi Din l-alternattiva tikkonsisti fl-emendar
tas-sustanza tad-Direttiva, jiġifieri d-drittijiet u l-obbligi stabbiliti
mid-dispożizzjonijiet tagħha. Dawn jinkludu: i) it-twessigħ tal-firxa
tad-Direttiva biex tħaddan setturi li bħalissa huma esklużi (stabbilimenti
kulturali, tat-tagħlim u tar-riċerka, kif ukoll xandara tas-servizz pubbliku);
ii) l-istabbiliment ta’ regola għat-tariffar imsejsa fuq l-ispejjeż marġinali,
aktarx b'eċċezzjonijiet; iii) l-emendar tal-prinċipju ġenerali biex
id-dokumenti aċċessibbli jkunu jistgħu jintużaw mill-ġdid; iv) l-impożizzjoni
ta’ rekwiżit li d-dejta tiġi ppubblikata f'formati li jinqraw b'mod elettroniku;
v) l-impożizzjoni ta’ rekwiżit biex jinħatar regolatur indipendenti, u biex
jiġi pprovdut mekkaniżmu effikaċi u effiċjenti ta’ rikors; vi) l-inverżjoni
tal-obbligu tal-evidenza tal-konformità mar-rekwiżiti tat-tariffar; vii)
l-impożizzjoni ta’ rekwiżit biex tiġi ddefinita l-firxa tal-"kompitu
pubbliku" b'mod leġiżlattiv biss. Alternattiva 5: Pakkett ta’
soluzzjonijiet Din l-alternattivi tkun tgħaqqad bidliet
sostanzjali fil-qafas tal-użu mill-ġdid (l-Alternattiva 4) ma' gwida
addizzjonali dwar il-prinċipji li għandhom jiġu applikati mill-awtoritajiet
nazzjonali meta jimplimentawh fuq il-livell nazzjonali (l-Alternattiva 3). Ir-riżultat tal-valutazzjoni tal-impatt Fil-valutazzjoni tal-impatt, il-kapaċità
tal-prodotti u s-servizzi bbażati fuq il-PSI li jġibu magħhom benefiċċji
ekonomiċi u soċjali għall-konsumaturi kollha, ġiet imwieżna mal-ispejjeż
ekonomiċi u soċjali mnisslin mit-telf potenzjali fid-dħul minħabba l-ħruġ
tad-dejta pubblika għall-użu mill-ġdid bl-irħis jew mingħajr ħlas. Ingħatat
attenzjoni partikulari lill-fatt li kwalunkwe politika f'dan il-qasam għandha
tiżgura li jkun hemm kundizzjonijiet indaqs bejn l-entitajiet pubbliċi ibridi
li huma attivi fl-użu mill-ġdid kummerċjali tad-dejta li jipproduċu jew jiġbru
b'fondi pubbliċi, u bejn il-kompetituri privati tagħhom; u għandha tiżgura
wkoll li ma jiġix impost piż sproporzjonat fuq is-settur pubbliku, li jaf
jipperikola l-produzzjoni u l-innovazzjoni tal-PSI, kif ukoll l-investiment
fiha. Skont
il-valutazzjoni, jekk ma ssir l-ebda bidla fil-qafas legali attwali
(l-Alternattiva 1), tikber il-probabbiltà ta' strateġiji diverġenti fuq
il-livell nazzjonali, sitwazzjoni li tista' twassal għal inċertezza regolatorja
u għat-taħwiġ tal-kundizzjonijiet ta’ kompetizzjoni fis-suq intern. Jekk id-Direttiva tiġi rrevokata
(l-Alternattiva 2), titneħħa x-xibka ta’ sikurezza pprovduta fuq il-livell
tal-Unjoni bis-saħħa tar-regoli minimi għall-użu mill-ġdid tal-PSI. Jekk
l-Istati Membri jitħallew liberi li jaġixxu f'qasam li qabel kien soġġett għal
regoli armonizzati tal-Unjoni, jiżdiedu l-inċertezza legali u d-diverġenza
tal-istrateġiji nazzjonali, bi ħsara għall-kompetizzjoni u għas-suq intern
għall-użu mill-ġdid tal-PSI. Ir-revoka tad-Direttiva tkun ukoll għalkollox
inkonsistenti mal-inizjattivi relatati ta’ aċċessibbiltà u użu mill-ġdid
tad-dejta, imfittxija fuq il-livell tal-Unjoni kif ukoll dak nazzjonali. Jekk jiġu adottati
biss miżuri leġiżlattivi mhux vinkolanti (l-Alternattiva 3), titħaffef
l-applikazzjoni tar-regoli tad-Direttiva PSI dwar il-liċenzjar u t-tariffar,
iżda xorta waħda tiżdied il-probabbiltà ta’ strateġija diverġenti fuq
il-livelli nazzjonali, sitwazzjoni li tista' ġġib magħha inċertezza regolatorja
u kundizzjonijiet imgħawġa ta’ kompetizzjoni fis-suq intern. L-emendar tad-dispożizzjonijiet attwali
tad-Direttiva (l-Alternattiva 4) ikun jgħin biex jiġi stabbilit qafas
regolatorju aktar ġeneruż u komprensiv għall-użu mill-ġdid tal-PSI: dan għandu
jwessa' l-kamp tal-applikazzjoni tad-Direttiva billi tinkludi l-materjal
kulturali, toħloq dritt eżerċitabbli tal-Unjoni għall-użu mill-ġdid tal-PSI,
irażżan il-prezzijiet għall-użu mill-ġdid tal-PSI, isaħħaħ l-effiċjenza
tal-mekkaniżmu ta’ rikors għall-infurzar tad-dritt tal-użu mill-ġdid, u jwassal
għal kundizzjonijiet iktar indaqs mal-entitajiet pubbliċi li jikkompetu ma'
utenti privati. Madankollu, din l-alternattiva fiha riskju ta’ diverġenzi –u
ta’ inċertezza legali– fl-applikazzjoni tad-dispożizzjonijiet individwali,
partikularment rigward il-kalkolu tal-ispejjeż u l-kundizzjonijiet
għal-liċenzjar. Jekk jingħaqdu emendi leġiżlattivi ma' miżuri
leġiżlattivi ta' gwida (l-Alternattiva 5), jiġu kkombinati l-benefiċċji
tal-alternattivi 3 u 4. Dan għandu jiżgura l-konverġenza ta' strateġiji
regolatorji nazzjonali iktar ġenerużi u miftuħin għall-użu mill-ġdid mas-suq
intern kollu, u b'hekk isaħħaħ iċ-ċertezza legali, iżid l-inċentivi u jneħħi
mill-ostakoli għall-użu mill-ġdid tal-PSI. L-analiżi li saret fil-valutazzjoni
tal-impatt tindika li din l-għażla toffri l-aqwa bilanċ bejn il-promozzjoni
tal-użu mill-ġdid tal-PSI, l-armonizzazzjoni u ċ-ċertezza legali, fid-dawl
taċ-ċirkustanzi nazzjonali.
3.
L-ELEMENTI LEGALI TAL-PROPOSTA
3.1.
Il-bażi legali
Id-Direttiva tal-PSI ġiet adottata abbażi
tal-Artikolu 114 tat-TFUE (95 tat-TKE), billi s-suġġett tagħha tikkonċerna
l-funzjonament tajjeb tas-suq intern u ċ-ċirkolazzjoni ħielsa tas-servizzi.
Għaldaqstant, kwalunkwe emenda li ssir fid-Direttiva għandu jkollha l-istess
bażi legali.
3.2.
Is-sussidjarjetà u l-proporzjonalità
Id-Direttiva PSI ġiet adottata abbażi
tal-Artikolu 114 tat-TFUE (li qabel kien l-Artikolu 95 tat-TKE).
L-għan globali ta’ din ir-reviżjoni hu li jitneħħew id-differenzi persistenti u
li għadhom jitfaċċaw fost l-Istati Membri fejn jidħol l-isfruttar
tal-informazzjoni tas-settur pubbliku, differenzi li jingombraw l-ilħiq
tal-potenzjal ekonomiku sħiħ ta' din ir-riżorsa. L-għanijiet speċifiċi
tar-reviżjoni huma li tħaffef il-ħolqien ta’ prodotti u servizzi bbażati fuq
l-PSI madwar l-Unjoni, li tiżgura l-użu transkonfinali effiċjenti tal-PSI għal
prodotti u servizzi b'valur miżjud, li tillimita t-tagħwiġ tal-kompetizzjoni
fis-suq tal-Unjoni, u li tipprevjeni t-twessigħ tad-diverġenzi fost l-Istati
Membri fejn jidħol l-użu mill-ġdid tal-PSI. Il-kontenut
ta’ din il-proposta jikkorrispondi ma' dawn l-għanijiet. L-importanza
ekonomika tad-dejta miftuħa, b'mod partikulari d-dejta tal-gvernijiet, bħala
bażi għal servizzi u prodotti ġodda ta’ tagħrif, illum hija ferm iktar magħrufa
milli kienet fl-2002, meta l-Kummissjoni kienet ressqet il-proposta tagħha għal
Direttiva. Filwaqt li r-regoli ta’ qafas bażiċi għall-użu mill-ġdid
tal-informazzjoni tas-settur pubbliku ġew armonizzati fuq il-livell tal-Unjoni,
baqa' ħafna kwistjonijiet x'jissolvew, u intant inqalgħu wkoll oħrajn. B'riżultat ta’ dan, il-partijiet interessati
jqisu li l-qafas legali eżistenti m'għadux kapaċi jiżgura kif xieraq
il-kundizzjonijiet li jistgħu jkattru safejn possibbli l-benefiċċji potenzjali
tar-riżorsi tad-dejta pubblika fl-Ewropa. Bl-iżvilupp tal-attivitajiet ibbażati
fuq il-PSI, uħud mir-regoli attwali ta’ sustanza jfixklu l-iżvilupp
tal-attivitajiet ibbażati fuq l-użu mill-ġdid tal-PSI, u jwasslu
għall-frammentazzjoni tas-suq intern. Ir-reġim attwali tat-tariffi, imsejjes fuq
l-irkupru tal-ispejjeż kif permess mir-regoli tad-Direttiva, jitqies li mhux
adegwat għat-tħeġġiġ tal-attivitajiet ibbażati fuq l-użu mill-ġdid tad-dejta
pubblika. L-armonizzazzjoni fuq il-livell tal-Unjoni biss tista' tiżgura li
r-regola awtomatika tat-tariffar u l-eċċezzjonijiet għaliha jkunu konsistenti
mal-Unjoni kollha, sabiex jitħeġġew l-attivitajiet tal-użu mill-ġdid tal-PSI. Barra
minn hekk, f'ċerti Stati Membri, huwa f'idejn l-entitajiet pubbliċi li
jiddeċiedu jippermettux jew le l-użu mill-ġdid tal-PSI[17]. B'riżultat ta’ dan, "hemm
nuqqas evidenti ta' armonizzazzjoni fost l-Istati Membri f'dak li jirrigwarda
l-użu mill-ġdid tad-dejta pubblika, u dan in-nuqqas aktarx jeżisti wkoll
għad-dejta (pubblika) dwar it-traffiku"[18]. Jeħtieġ azzjoni fuq il-livell
tal-Unjoni biex tiggarantixxi, pereżempju, li l-użu mill-ġdid ikun permess għal
dejta bażika ta’ valur tas-settur pubbliku fl-Istati Membri kollha, u li
entitajiet pubbliċi individwali li jkunu attivi fis-suq ma jfixklux l-iżvilupp
ta' prodotti u servizzi innovattivi. Ta’
min insemmu wkoll id-diffikultajiet biex wieħed jikseb rikors effettiv f'ħafna
mill-Istati Membri meta ma jiġux rispettati r-regoli dwar l-użu mill-ġdid,
diffikultajiet li jġiegħlu lill-utenti joqogħdu lura milli jidħlu għal proġetti
ambizzjużi ta’ użu mill-ġdid mal-Unjoni kollha. Armonizzazzjoni
iktar profonda tal-prinċipji bażiku, ir-reġim tat-tariffi, il-kamp ta’
applikazzjoni, u l-mekkaniżmi biex tittaffa l-frammentazzjoni tas-suq intern u
biex jitħeġġeġ il-ħolqien ta' prodotti u servizzi transkonfinali bbażati fuq
il-PSI, ma jistgħux jinkisbu fuq il-livell tal-Istat Membru biss. F'dak
li jirrigwarda l-kamp ta’ applikazzjoni, l-għan tar-reviżjoni mhuwiex li jiġi
rregolat, b'mod dirett jew indirett, id-dritt għall-aċċess għad-dokumenti
pubbliċi, għax dan jibqa' fil-kompetenza esklussiva tal-Istati Membri.
Id-dispożizzjonijiet irreveduti jkunu japplikaw għall-użu mill-ġdid ta’
dokumenti fejn ikunu ġeneralment disponibbli, inkluż skont regoli nazzjonali
dwar l-aċċess. Barra
minn hekk, l-għan tar-reviżjoni lanqas m'huwa li jiġi rregolat l-ipproċessar
tad-dejta pubblika mill-entitajiet tas-settur pubbliku, jew il-qagħda
tad-drittijiet tal-proprjetà intellettwali, li mhumiex affettwati lil hinn
mis-sitwazzjoni attwali bir-regoli eżistenti tad-Direttiva. Mingħajr azzjoni
mmirata fuq il-livell tal-Unjoni, l-attivitajiet regolatorji fuq il-livell
nazzjonali, li diġà bdew f'għadd ta' Stati Membri, aktarx ikabbru d-differenzi
sinifikanti li diġà jeżistu. Fin-nuqqas ta' armonizzazzjoni iktar fil-fond,
id-dispożizzjonijiet nazzjonali eżistenti se jfixklu l-funzjonament tas-suq
intern. Mill-banda l-oħra, l-azzjoni tal-Unjoni hija ristretta għat-tneħħija
jew għall-prevenzjoni tax-xkiel li ġie identifikat. 2011/0430 (COD) Proposta għal DIRETTIVA TAL-PARLAMENT EWROPEW U
TAL-KUNSILL li temenda d-Direttiva 2003/98/KE dwar
l-użu mill-ġdid tal-informazzjoni tas-settur pubbliku
(Test b'rilevanza għaż-ŻEE) IL-PARLAMENT EWROPEW U L-KUNSILL TA'
L-UNJONI EWROPEA, Wara li kkunsidraw it-Trattat dwar
il-Funzjonament tal-Unjoni Ewropea, u b’mod partikulari l-Artikolu 114
tiegħu, Wara li kkunsidraw il-proposta
mill-Kummissjoni Ewropea, Wara li ġie trażmess l-abbozz tal-att
leġiżlattiv lill-Parlamenti nazzjonali, Wara li kkunsidraw l-opinjoni tal-Kumitat
Ekonomiku u Soċjali Ewropew[19], Wara li kkunsidraw l-opinjoni tal-Kumitat
tar-Reġjuni[20],
Filwaqt li jaġixxu bi qbil mal-proċedura
leġiżlattiva ordinarja, Billi: (1)
Id-Direttiva 2003/98/KE tal-Parlament Ewropew
u tal-Kunsill tas-17 ta’ Novembru 2003 dwar l-użu mill-ġdid
tal-informazzjoni tas-settur pubbliku[21]
tistabbilixxi sett minimu ta’ regoli li jiggvernaw l-użu mill-ġdid tal-PSI u
l-mezzi prattiċi biex jiġi ffaċilitat l-użu mill-ġdid ta’ dokumenti eżistenti
miżmuma minn entitajiet tas-settur pubbliku tal-Istati Membri. (2)
Il-politiki tad-dejta miftuħa li jinkoraġġixxu d-disponibbiltà
wiesgħa u l-użu mill-ġdid mifrux tal-informazzjoni tas-settur pubbliku għal
finijiet privati jew kummerċjali, bl-ebda restrizzjoni legali, tekniċi jew
finanzjarji jew b'restrizzjonijiet minimi, jistgħu jiżvolġu rwol importanti
fit-tqabbid tal-iżvilupp ta’ servizzi ġodda msejsa fuq mezzi ġodda biex tiġi
kkombinata u użata l-informazzjoni msemmija. Madankollu, dan ikun jirrikjedi
kundizzjonijiet indaqs fuq il-livell tal-Unjoni fir-rigward tad-deċiżjoni dwar
l-awtorizzazzjoni tal-użu mill-ġdid ta' dokumenti, u dawn il-kundizzjonijiet
indaqs ma jistgħux jinkisbu billi jitħallew f'idejn ir-regoli u l-prattiċi
differenti tal-Istati Membri, jew tal-entitajiet pubbliċi kkonċernati. (3)
L-awtorizzazzjoni tal-użu mill-ġdid tad-dokumenti
miżmuma minn entità tas-settur pubbliku żżid il-valur għal min juża mill-ġdid
l-informazzjoni, għall-utenti aħħarija u għas-soċjetà b'mod ġenerali, u f'ħafna
każijiet, għall-entità pubblika nfisha, billi l-utenti mill-ġdid u l-utenti
aħħarija jibagħtu l-kummenti tagħhom bil-għan li min iżomm l-informazzjoni
miġbura ikun jista' jtejjeb il-kwalità tagħha. (4)
Mindu ġiet adottata l-ewwel sensiela ta' regoli
dwar l-użu mill-ġdid tal-informazzjoni tas-settur pubbliku fl-2003, l-ammont
ta’ dejta fid-dinja, inkluża d-dejta pubblika, sploda, u qed jiġu ġġenerati u
miġbura tipi ġodda ta’ dejta. B'mod parallel, qed nixhdu rivoluzzjoni kontinwa
fit-teknoloġiji għall-analiżi, l-isfruttar u l-ipproċessar tad-dejta. Din
l-evoluzzjoni teknoloġika mgħaġġla tippermetti l-ħolqien ta’ servizzi u applikazzjonijiet
ġodda, mibnija fuq l-użu, l-aggregazzjoni u l-kombinazzjoni tad-dejta.
Ir-regoli adottati fl-2003 m'għadhomx jimxu pari passu ma' dawn il-bidliet
mgħaġġlin, u għaldaqstant hemm il-periklu li nitilfu u ntellfu
l-opportunitajiet ekonomiċi u soċjali offruta mill-użu mill-ġdid tad-dejta
pubblika. (5)
Fl-istess nifs, l-Istati Membri stabbilew politiki
dwar l-użu mill-ġdid skont id-Direttiva 2003/98/KE, u wħud mill-Istati
Membri ilhom jadottaw approċċi ambizzjużi lejn id-dejta miftuħa, bil-għan li
jitħaffef l-użu mill-ġdid tad-dejta pubblika aċċessibbli miċ-ċittadini u
min-negozji, lil hinn mil-livell minimu stipulat mid-Direttiva. Biex jiġi
evitat li regoli differenti fi Stat Membri differenti jkunu ta’ xkiel
għall-offerta transkonfinali tal-prodotti u s-servizzi, u biex settijiet ta'
dejta komparabbli jkunu jistgħu jintużaw mill-ġdid għal applikazzjonijiet
pan-Ewropej imsejsa fuqhom, jeħtieġ armonizzazzjoni minima rigward x'tip ta'
dejta pubblika tkun disponibbli għall-użu mill-ġdid fis-suq intern tal-informazzjoni,
konsistenti mar-reġim rilevanti tal-aċċess. (6)
Id-Direttiva 2003/98/KE ma fihiex obbligu li
jiġi awtorizzat l-użu mill-ġdid ta’ dokumenti. Id-deċiżjoni dwar jekk l-użu
mill-ġdid jiġix awtorizzat jew le tibqa’ f'idejn l-Istati Membri jew l-entità
tas-settur pubbliku kkonċernata. Fl-istess nifs, id-Direttiva tibni fuq regoli
nazzjonali dwar l-aċċess għad-dokumenti. Ċerti Stati Membri rabtu espressament
id-dritt tal-użu mill-ġdid ma' dan id-dritt ta' aċċess, b'mod li d-dokumenti
kollha ġeneralment aċċessibbli jistgħu jintużaw mill-ġdid. Fi Stati Membri
oħra, ir-rabta bejn iż-żewġ settijiet ta’ regoli hija inqas ċara, u dan huwa
sors ta’ inċertezza. (7)
Għaldaqstant, id-Direttiva 2003/98/KE għandha
tistipula l-obbligu ċar li l-Istati Membri joffru d-dokumenti kollha
ġeneralment disponibbli għall-użu mill-ġdid tagħhom. Billi dan jikkostitwixxi
limitazzjoni tad-drittijiet tal-proprjetà intellettwali tal-awturi
tad-dokumenti, l-ambitu ta' tali rabta bejn id-dritt tal-aċċess u d-dritt
tal-użu mill-ġdid għandu jitqassar biex ikopru biss dak li hu strettament
meħtieġ biex jintlaħqu l-għanijiet imfittxija minn din l-introduzzjoni. F'dan
ir-rigward, fid-dawl tal-leġiżlazzjoni tal-Unjoni u tal-obbligi internazzjonali
tal-Istati Membri u tal-Unjoni, speċifikament skont il-Konvenzjoni ta' Bern
għall-Protezzjoni tax-Xogħlijiet Letterarji u Artistiċi u l-Ftehim dwar
l-Aspetti Marbutin mal-Kummerċ tad-Drittijiet tal-Proprjetà Intellettwali
(il-Ftehim TRIPS), id-dokumenti li partijiet terzi jżommu drittijiet
tal-proprjetà intellettwali fuqhom għandhom jiġu esklużi mill-kamp ta’
applikazzjoni tad-Direttiva 2003/98/KE. Fil-każ li parti terza kienet
is-sid inizjali ta’ dokument miżmum minn libreriji (inklużi l-librerija
universitarji), mużewijiet jew arkivji, li jkun għadu protett bid-drittijiet
tal-proprjetà intellettwali, għall-finijiet ta’ din id-Direttiva, dak
id-dokument għandu jitqies li partijiet terzi jżommu drittijiet tal-proprjetà
intellettwali fuqu. (8)
L-applikazzjoni tad-Direttiva 2003/98/KE
għandha tkun bla ħsara għad-drittijiet li jistgħu jgawdu l-impjegati
tal-entitajiet tas-settur pubbliku skont ir-regoli nazzjonali. (9)
Barra minn hekk, fejn dokument isir disponibbli
għall-użu mill-ġdid tiegħu, l-entità tas-settur pubbliku kkonċernata għandha
żżomm id-dritt li tisfrutta d-dokument. (10)
Il-kamp ta’ applikazzjoni tad-Direttiva titwessa'
għal-libreriji (inklużi l-libreriji universitarji), għall-mużewijiet u
għall-arkivji. Id-Direttiva ma tapplikax għal istituzzjonijiet kulturali
oħrajn, bħal operi, ċentri tal-ballet jew teatri, inklużi l-arkivji li jkunu
parti minn dawn l-istituzzjonijiet. (11)
Biex jiġi ffaċilitat l-użu mill-ġdid tal-PSI,
l-entitajiet tas-settur pubbliku għandhom iqiegħdu dokumenti għad-dispożizzjoni
permezz ta' formati li jinqraw elettronikament, u flimkiem mal-metadejta
tagħhom fejn possibbli u xieraq, f'format li jiżgura l-interoperabbiltà eċċ.,
billi jipproċessawhom b'mod konsistenti mal-prinċipji tar-rekwiżiti ta’
kompatibbiltà u użabbiltà għall-informazzjoni spazjali skont
id-Direttiva 2007/2/KE tal-Parlament Ewropew u tal-Kunsill
tal-14 ta' Marzu 2007 li tistabbilixxi Infrastruttura
għall-Informazzjoni Ġeografika fil-Komunità Ewropea (Inspire)[22]. (12)
Fejn jiġu imposti tariffi għall-użu mill-ġdid ta’
dokumenti, fil-prinċipju, għandhom ikunu limitati għall-ispejjeż marġinali
mġarrba bir-riproduzzjoni u t-tixrid tagħhom, sakemm ma jkunx iġġustifikat mod
ieħor skont l-għan, it-trasparenza jew kriterji li jistgħu jiġi vverifikati.
Għandha titqies b'mod partikulari l-ħtieġa li ma jitfixkilx il-funzjonament
normali ta’ dawk entitajiet tas-settur pubbliku li jkopru parti sostanzjali
tal-ispejjeż tal-operat imnissla mill-qadi tal-kompitu pubbliku tagħhom, billi
jittellef l-isfruttar tad-drittijiet tagħhom tal-proprjetà intellettwali.
Għandu jkun f'idejn l-entità tas-settur pubbliku li tkun qiegħda timponi
tariffa għall-użu mill-ġdid tad-dokumenti, li tagħti evidenza li t-tariffi huma
msejsa fuq l-ispejjeż, u li tikkonforma ma' limiti rilevanti. (13)
B'rabta ma' kwalunkwe użu mill-ġdid li jsir
mid-dokument, fejn ikun vjabbli, l-entitajiet tas-settur pubbliku jistgħu
jimponu kundizzjonijiet fuq l-utent mill-ġdid, pereżempju r-rikonoxximent
tas-sors. Fi kwalunkwe każ, kull liċenzja għall-użu mill-ġdid tal-informazzjoni
tas-settur pubbliku għandha tqiegħed l-inqas restrizzjonijiet possibbli fuq
l-użu mill-ġdid tal-PSI. Il-liċenzji miftuħin disponibbli fuq l-internet, li
jagħtu drittijiet usa' tal-użu mill-ġdid mingħajr restrizzjonijiet teknoloġiċi,
finanzjarji jew ġeografiċi, u li jistrieħu fuq formati ta’ dejta miftuħin,
jistgħu jiżvolġu rwol importanti wkoll f'dan ir-rigward. Għaldaqstant, l-Istati
Membri għandhom iħeġġu l-użu tal-liċenzji ta' governanza miftuħa. (14)
L-implimentazzjoni tajba ta’ wħud mill-elementi ta’
din id-Direttiva, ngħidu aħna l-mezzi ta’ rikors, il-konformità mal-prinċipji
tat-tariffar, u l-obbligi ta' rappurtar, jeħtieġu monitoraġġ minn awtoritajiet
indipendenti b'kompetenza fl-użu mill-ġdid tal-informazzjoni tas-settur
pubbliku. Biex tiġi żgurata l-konsistenza fost l-approċċi fuq il-livell
tal-Unjoni, għandha titħeġġeġ il-koordinazzjoni bejn l-awtoritajiet
indipendenti, b'mod partikulari bl-iskambju ta’ tagħrif dwar l-aqwa prassi u
l-politiki ta’ użu mill-ġdid tad-dejta. (15)
Billi l-għan ta’ din id-Direttiva, speċifikament
l-iffaċilitar tal-ħolqien ta’ prodotti u servizzi ta’ informazzjoni bbażati fuq
dokumenti tas-settur pubbliku, l-iżgurar tal-użu transkonfinali effiċjenti
tad-dokumenti tas-settur pubbliku mill-kumpaniji privati għal prodotti u
servizzi ta' informazzjoni b'valur miżjud, u l-limitazzjoni tat-tagħwiġ tal-kompetizzjoni
fis-suq tal-Unjoni, ma jistax jintlaħaq kif xieraq mill-Istati Membri u,
għaldaqstant, u fid-dawl tal-ambitu intrinsikament pan-Ewropew tal-azzjoni
proposta, jista' jintlaħaq aħjar fuq il-livell tal-Unjoni, l-Unjoni tista'
tadotta miżuri skont il-prinċipju tas-sussidjarjetà kif stipulata
fl-Artikolu 5 tat-Trattat dwar il-Funzjonament tal-Unjoni Ewropea. Skont
il-prinċipju tal-proporzjonalità kif stipulat fl-istess Artikolu, din
id-Direttiva ma tmurx lil hinn minn dak li huwa meħtieġ biex jinkisbu dawk
il-miri. (16)
Din id-Direttiva tirrispetta d-drittijiet
fundamentali u tosserva l-prinċipji rikoxxonuti partikularment mill-Karta
tad-Drittijiet Fundamentali tal-Unjoni Ewropea, inkluż id-dritt għall-proprjetà
(l-Artikolu 17). Xejn f'din id-Direttiva ma għandu jiġi interpretat jew
implimentat b'mod li jkun inkonsistenti mal-Konvenzjoni Ewropea tad-Drittijiet
tal-Bniedem. (17)
Jeħtieġ li jiġi żgurat li l-Istati Membri (ara
l-premessa 19) jirrappurtaw lill-Kummissjoni rigward l-ammont ta' użu
mill-ġdid li jsir mill-informazzjoni tas-settur pubbliku, il-kundizzjonijiet li
skonthom issir disponibbli, u l-ħidma tal-awtorità indipendenti. Biex tiġi
żgurata l-konsistenza fost l-approċċi fuq il-livell tal-Unjoni, għandha
titħeġġeġ il-koordinazzjoni bejn l-awtoritajiet indipendenti, b'mod partikulari
bl-iskambju ta’ tagħrif dwar l-aqwa prassi u l-politiki ta’ użu mill-ġdid
tad-dejta. (18)
Il-Kummissjoni għandha tgħin lill-Istati Membri
jimplimentaw id-Direttiva b'mod konsistenti billi tkun ta' gwida,
partikularment fejn jidħlu t-tariffi u l-kalkolu tal-ispejjeż,
il-kundizzjonijiet rakkomandati tal-liċenzjar, u l-formati tad-dejta, wara li
tkun ikkonsultata mal-partijiet interessati. (19)
Skont id-Dikjarazzjoni Politika Konġunta tal-Istati
Membri u tal-Kummissjoni dwar id-dokument ta’ spjegazzjoni ta’ [data], l-Istati
Membri ntrabtu li jehmżu, f'każijiet iġġustifikati, man-notifikar tal-miżuri
ta’ traspożizzjoni tagħhom, dokument wieħed jew aktar li jispjega r-rabta bejn
il-komponenti ta’ direttiva u l-partijiet korrispondenti tal-istrumenti
nazzjonali ta’ traspożizzjoni. Fir-rigward ta’ din id-Direttiva, il-leġiżlatur
jikkunsidra ġġustifikata t-trażmissjoni ta’ tali dokumenti. (20)
Għaldaqstant, id-Direttiva 2003/98/KE għandha
tiġi emendata f’dan is-sens, ADOTTAW DIN ID-DIRETTIVA: Artikolu 1
Emendi għad-Direttiva 2003/98/KE Id-Direttiva 2003/98/KE hija emendata kif
ġej: 1.
Emenda għall-Artikolu 1: (Suġġett u kamp ta’
applikazzjoni): (1)
Fil-paragrafu 2, il-punt (a) jinbidel
b'li ġej: "(a) dokumenti li l-provvista tagħhom hija
attività li taqa' barra mill-ambitu tal-kompitu pubbliku tal-entitajiet
tas-settur pubbliku kkonċernati, kif iddefinit mil-liġi jew minn regoli
vinkolati oħra fl-Istat Membru inkwistjoni;" (2)
Fil-paragrafu 2, il-punt (e) jinbidel
b'li ġej: "(e) id-dokumenti miżmuma minn stabbilimenti
tat-tagħlim jew tar-riċerka, bħal faċilitajiet għar-riċerka, inklużi, fejn
relevanti, organizzazzjonijiet imwaqqfa għat-trasferiment ta' riżultati
tar-riċerka, skejjel u universitajiet (għajr il-libreriji universitarji
fir-rigward ta' dokumenti li ma jkunux ta' riċerka u protetti minn drittijiet
tal-proprjetà intellettwali ta' partijiet terzi) u;" (3)
Fil-paragrafu 2, il-punt (f) jinbidel
b'li ġej: "(f) dokumenti miżmuma minn stabbiliment
kulturali, li ma jkunux libreriji, mużewijiet jew arkiviji;" (4)
Fil-paragrafu 4, "il-Komunità"
tinbidel ma' "l-Unjoni". (5)
Fi tmiem il-paragrafu 5, tiżdied is-sentenza
li ġejja: "Id-dispożizzjonijiet ta’ din id-Direttiva
huma mingħajr ħsara għad-drittijiet ekonomiċi jew morali li jgawdu l-impjegati
tal-entitajiet tas-settur pubbliku skont ir-regoli nazzjonali." 2.
Fl-Artikolu 2 (Definizzjonijiet), jiddaħħal
il-paragrafu li ġej: ‘6. "li jinqara elettronikament" tfisser
li dokumenti diġitali jkunu strutturati b'mod xieraq biex applikazzjonijiet
tas-softwer ikunu jistgħu jidentifikaw b'mod affidabbli dikjarazzjonijiet
individwali ta’ fatt u l-istruttura interna tagħhom." 3.
L-Artikolu 3 jinbidel b'li ġej: “Artikolu 3 Il-prinċipju
ġenerali (1)
Soġġett għall-paragrafu (2), l-Istati Membri
għandhom jiżguraw li d-dokumenti msemmija fl-Artikolu 1 ikunu jistgħu
jintużaw mill-ġdid għal finijiet kummerċjali u mhux kummerċjali, skont
il-kundizzjonijiet stipulati fil-Kapitoli III u IV. (2)
Għad-dokumenti li l-libreriji (inklużi l-libreriji
universitarji), il-mużewijiet u l-arkivji jkollhom id-drittjiet tal-proprjetà
intellettwali tagħhom, l-Istati Membri għandhom jiżguraw li, fejn ikun permess
l-użu mill-ġdid tad-dokumenti, id-dokumenti jkunu jistgħu jintużaw għal
finijiet kummerċjali u mhux kummerċjali, skont il-kundizzjonijiet stipulati
fil-Kapitoli III u IV. 4.
Emendi għall-Artikolu 4 (Rekwiżiti applikabbli
għall-ipproċessar ta’ talbiet għall-użu mill-ġdid): (3)
Fi tmiem il-paragrafu 3, tiżdied is-sentenza
li ġejja: "Madankollu, il-libreriji (inklużi
l-libreriji universitarji), il-mużewijiet u l-arkivji ma għandhomx l-obbligu li
jinkludu tali referenza." (4)
Fi tmiem il-paragrafu 4, tiżdied is-sentenza
li ġejja: "Il-miżuri ta’ rikors għandhom jinkludu
l-possibbiltà ta’ reviżjoni minn awtorità indipendenti li tingħata setgħat
regolatorji speċifiċi fir-rigward tal-użu mill-ġdid tal-informazzjoni
tas-settur pubbliku, u li d-deċiżjonijiet tagħha jkunu vinkolanti għall-entità
tas-settur pubbliku kkonċernata." 5.
Emendi għall-Artikolu 5 (Formati disponibbli): (5)
Fil-paragrafu 1, il-kliem "b'mod
elettroniku" jinbidel bil-kliem "f'format li jinqara elettronikament,
flimkien mal-metadejta korrispondenti.". 6.
Emendi għall-Artikolu 6 (Tariffi): (6)
Jiddaħħlu l-paragrafi li ġejjin fil-bidu
tal-Artikolu: "1. Fejn jiġu imposti tariffi għall-użu
mill-ġdid tad-dokumenti, l-ammont totali impost mill-entitajiet tas-settur
pubbliku għandu jkun limitat għall-ispejjeż marġinali mġarrba bir-riproduzzjoni
u t-tixrid." "2. 2. F'każijiet eċċezzjonali,
partikularment fejn l-entitajiet tas-settur pubbliku jiġġeneraw parti
sostanzjali mill-ispejjeż tal-operat tagħhom, marbutin mal-qadi tal-kompiti ta’
servizz pubbliku tagħhom, mill-isfruttar tad-drittijiet tal-proprjetà
intellettwali tagħhom, l-entitajiet tas-settur pubbliku jistgħu jitħallew
jimponu tariffi għall-użu mill-ġdid tad-dokumenti 'l fuq mill-ispejjeż
marġinali, skont l-għan, it-trasparenza u kriterji verifikabbli, sakemm dan
ikun fl-interess pubbliku u soġġett għall-approvazzjoni tal-awtorità
indipendenti msemmija fl-Artikolu 4(4), u mingħajr ħsara
għall-parafrafi 3 u 4 ta' dan l-Artikolu." "3. Minkejja l-paragrafi 1 u 2,
il-libreriji (inklużi l-libreriji universitarji), il-mużewijiet u l-arkivji
jistgħu jimponu tariffi 'l fuq mill-ispejjeż marġinali għall-użu mill-ġdid
tad-dokumenti li jaħżnu." (7)
It-test tal-Artikolu 6 isir
il-paragrafu 4. (8)
Jiddaħħal il-paragrafu 5 ġdid: "Jibqa' f'idejn l-entità tas-settur
pubbliku li tkun qiegħda timponi tariffi għall-użu mill-ġdid, li tagħti
evidenza li t-tariffi jikkonformaw ma' dan l-Artikolu." 7.
Fl-Artikolu 7 (It-trasparenza), jiddaħħal
il-kliem "'l fuq mill-ispejjeż marġinali jew" wara l-kliem
"il-kalkolu tat-tariffi". 8.
Emendi għall-Artikolu 8: (9)
Il-paragrafu 1 jinbidel li ġej: "L-entitajiet tas-settur pubbliku
jistgħu jippermettu l-użu mill-ġdid mingħajr kundizzjonijiet, jew jistgħu
jimponi kundizzjonijiet, bħall-indikazzjoni tas-sors, fejn xieraq permezz ta’
liċenzja. Dawn il-kundizzjonijiet ma għandhomx jirrestrinġu bla bżonn
il-possibbiltajiet għall-użu mill-ġdid, u ma għandhomx jintużaw biex
jirrestrinġu l-kompetizzjoni.". 9.
L-Artikolu 9 jinbidel b'li ġej: “Artikolu 9 Arranġamenti
prattiċi L-Istati Membri għandhom jiżguraw li jkunu
implimentati arranġamenti prattiċi li jiffaċilitaw it-tiftix, b'ilsna
differenti, għad-dokumenti disponibbli għall-użu mill-ġdid, bħal listi ta’
dokumenti ewlenin bil-metadejta rilevanti, preferibbilment aċċessibbli fuq
l-internet u f'format li jinqara elettronikament, u siti u portali li jkollhom
ħolqa għal listi deċentralizzati ta’ assi." 10.
Fl-Artikolu 11 (il-projbizzjoni
tal-arranġamenti esklussivi), tiżdied is-sentenza li ġejja fi tmiem
il-paragrafu 3: "Madankollu, arranġamenti ta’ dan it-tip
li jinvolvu l-istabbilimenti kulturali u l-libreriji tal-università għandhom
jintemmu fi tmiem il-kuntratt, jew f'kull każ mhux iktar tard mill-31 ta'
Diċembru 20XX [sitt snin wara d-dħul fis-seħħ ta’ din
id-Direttiva].". 11.
L-Artikolu 12 (It-traspożizzjoni) jinbidel b'li
ġej: “Artikolu 12 L-Istati Membri għandhom jibagħtu
lill-Kummissjoni t-test tad-dispożizzjonijiet ewlenin tal-liġi nazzjonali li
jkunu adottaw fil-qasam kopert minn din id-Direttiva." 12.
Fl-Artikolu 13 (Reviżjoni), id-data
tal-1 ta’ Lulju 2008 tinbidel bid-data [tliet snin wara d-data
tat-traspożizzjoni], u jiżdied il-paragrafu li ġej: "L-Istati Membri għandhom iressqu
rapport ta' kull sena lill-Kummissjoni dwar l-ammont ta’ użu mill-ġdid li jkun
sar mill-informazzjoni tas-settur pubbliku, il-kundizzjonijiet li skonthom
issir disponibbli, u l-ħidma tal-awtorità indipendenti msemmija
fl-Artikolu 4(4)." Artikolu 2 (2)
L-Istati Membri għandhom jaddottaw u jippubblikaw,
sa mhux aktar tard minn 18-il xahar, il-liġijiet, ir-regolamenti u
d-dispożizzjonijiet amministrattivi meħtieġa għall-konformità ma' din
id-Direttiva. Malli jagħmlu dan, l-Istati Membri għandhom jibagħtu
lill-Kummissjoni t-test ta’ dawk id-dispożizzjonijiet, kif ukoll tabella ta’ korrelazzjoni
bejn dawk id-dispożizzjonijiet u din id-Direttiva. (3)
Fejn l-Istati Membri jadottaw dawk
id-dispożizzjonijiet, dawn għandhom jirreferu għal din id-Direttiva jew ikunu
akkumpanjati minn referenza simili fil-pubblikazzjoni uffiċjali tagħhom.
L-Istati Membri għandhom jiddeċiedu kif għandha ssir tali referenza. Artikolu 3 Din id-Direttiva għandha tidħol fis-seħħ
l-għada tal-jum tal-pubblikazzjoni tagħha f'Il-Ġurnal Uffiċjali tal-Unjoni
Ewropea. Artikolu 4 Din
id-Direttiva hija indirizzata lill-Istati Membri skont it-Trattati. Magħmul fi Brussell, Għall-Parlament Ewropew Għall-Kunsill Il-President Il-President [1] http://eur-lex.europa.eu/LexUriServ/LexUriServ.do?uri=COM:2009:0212:FIN:MT:PDF. [2] http://www.economist.com/node/15557443. [3] http://webarchive.nationalarchives.gov.uk/+/interactive.bis.gov.uk/digitalbritain/report,
p. 214. [4] "Review of recent studies on PSI re-use and related
market developments", G. Vickery, Awwissu 2011. [5] http://ec.europa.eu/information_society/digital-agenda/index_en.htm. [6] WHITE PAPER Pjan direzzjonali għal Żona Unika Ewropea
tat-Trasport – Lejn sistema tat-trasport kompetittiva u li tuża r-riżorsi b'mod
effiċjenti. COM(2011) 144 finali (28.3.2011). [7] COM(2008) 886 finali/2 —
Korriġendum tal-20.3.2009. [8] ĠU L 207/1, 6.8.2010. [9] http://www.epsiplatform.eu. [10] http://ec.europa.eu/information_society/policy/psi/index_en.htm. [11] http://ec.europa.eu/information_society/policy/psi/actions_eu/policy_actions/mepsir/index_en.htm. [12] http://ec.europa.eu/information_society/policy/psi/facilitating_reuse/exlusive_agreements/
index_en.htm. [13] http://ec.europa.eu/information_society/policy/psi/docs/pdfs/economic_study_report_final.pdf. [14] http://tinyurl.com/culturePSI. [15] http://www.lapsi-project.eu. [16] http://www.epsiplatform.eu. [17] UK Re-use of Public Sector Information Regulations 2005,
"A public sector body may permit re-use" (regulation 7(1)). [18] "Study on guaranteed access to traffic and travel
data and free provision of universal traffic information", Lyon,
il-11 ta' Ottubru 2010. [19] ĠU C , , p. . [20] ĠU C , , p. . [21] ĠU L 345, 31.12.2003, p. 90. [22] ĠU L 108, 25.4.2007, p. 1.