52011PC0664

MEMORANDUM TA’ SPJEGAZZJONI

Il-punt 28 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda[1] jippermetti l-mobilizzazzjoni tal-Fond Ewropew ta' Aġġustament għall-Globalizzazzjoni (FEG) permezz ta' mekkaniżmu ta' flessibbiltà, sal-limitu massimu annwali ta' EUR 500 miljun, u dan apparti mill-intestaturi rilevanti tal-qafas finanzjarju.

Ir-regoli applikabbli għall-kontribuzzjonijiet mill-FEG huma stipulati fir-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta’ Aġġustament għall-Globalizzazzjoni[2].

Fis-6 ta' Ġunju 2011, il-Portugall ressaq l-applikazzjoni EGF/2011/005 PT/Norte-Centro Automotive għal kontribuzzjoni finanzjarja mill-FEG, wara s-sensji li ngħataw fi tliet intrapriżi li joperaw fid-Diviżjoni 29 tan-NACE Reviżjoni 2 ("Manifattura ta' vetturi bil-mutur, trejlers u semitrejlers")[3] fir-reġjun NUTS II ta' Norte (PT11) u Centro (PT16) fil-Portugall.

Wara analiżi fil-fond ta' din l-applikazzjoni, il-Kummissjoni, b'mod konformi mal-Artikolu 10 tar-Regolament (KE) Nru 1927/2006, ikkonkludiet li l-kundizzjonijiet għal kontribuzzjoni finanzjarja skont dan ir-Regolament huma ssodisfati.

SOMMARJU TAL-APPLIKAZZJONI U ANALIŻI

Dejta ewlenija: ||

Nru ta' Referenza tal-FEG || EGF/2011/005

Stat Membru || Il-Portugall

Artikolu 2 || (b)

Intrapriżi kkonċernati || 3

Reġjuni NUTS II || Norte (PT11) Centro (PT16)

Diviżjoni tan-NACE Reviżjoni 2 || 29 ("Manifattura ta' vetturi bil-mutur, trejlers u semitrejlers")

Perjodu ta’ referenza || 1.7.2010 – 1.4.2011

Data ta' bidu għas-servizzi personalizzati || 1.7.2010

Data tal-applikazzjoni || 6.6.2011

Sensji matul il-perjodu ta’ referenza || 726

Ħaddiema li ngħataw is-sensja u li huma identifikati għall-għajnuna || 726

Nefqa għas-servizzi personalizzati (EUR) || 2 241 100

Nefqa għall-implimentazzjoni tal-FEG[4] (EUR) || 95 000

Nefqa għall-implimentazzjoni tal-FEG (%) || 4,07

Baġit totali (EUR) || 2 336 100

Il-kontribuzzjoni tal-FEG (65 %) (EUR) || 1 518 465

1. L-applikazzjoni kienet ippreżentata quddiem il-Kummissjoni fis-6 ta’ Ġunju 2011 u kienet supplimentata b'tagħrif addizzjonali sat-18 ta’ Lulju 2011.

2. L-applikazzjoni tissodisfa l-kundizzjonijiet biex jintuża l-FEG kif stabbilit fl-Artikolu 2(b) tar-Regolament (KE) Nru 1927/2006, u tressqet fil-limitu ta' żmien ta' 10 ġimgħat imsemmi fl-Artikolu 5 ta' dak ir-Regolament.

Ir-rabta bejn is-sensji u l-bidliet strutturali ewlenin fix-xejriet tal-kummerċ dinji minħabba l-globalizzazzjoni jew il-kriżi finanzjarja u ekonomika globali

3. Sabiex tiġi stabbilita r-rabta bejn is-sensji u l-kriżi finanzjarja u ekonomika globali, il-Portugall jisħaq li din il-kriżi poġġiet pressjoni partikolari fuq is-settur tal-vetturi bil-mutur madwar id-dinja. Il-Kummissjoni diġà għarfet li, billi xi 60-80 % (dan jiddependi fuq l-Istat Membru) tal-karozzi l-ġodda fl-Ewropa jinxtraw bl-għajnuna ta' kreditu, fil-bidu tat-tnaqqis fir-ritmu ekonomiku l-kriżi finanzjarja laqtet l-industrija tal-vetturi bil-mutur b'mod partikolarment sever. Skont l-Assoċjazzjoni Ewropea tal-Manifatturi tal-Karozzi (ACEA), id-domanda għal vetturi bil-mutur ġodda fl-Unjoni Ewropea fl-2009 naqset b'5,6 % meta mqabbla mal-2008 u bi 13,3 % meta mqabbla mal-2007 is-sena ta' qabel il-kriżi. L-UE għalhekk segwiet ix-xejra nnotata fil-livell dinji fejn id-domanda għal vetturi ġodda bil-mutur naqas b'5,6 % fl-2009 meta mqabbel mal-2008. Minħabba dan it-tnaqqis fid-domanda, il-manifatturi tal-vetturi bil-mutur naqqsu l-produzzjoni tagħhom b'mod aktar drastiku. Fl-2009 il-produzzjoni tal-vetturi bil-mutur fl-UE naqset bi 17 % meta mqabbla mal-2008 u bi 23 % meta mqabbla mal-2007. Din ix-xejra ’l isfel kompliet fl-2010. Fl-ewwel disa' xhur tal-2010, il-produzzjoni ta' vetturi bil-mutur fl-UE kienet 14 % inqas minn dik tal-istess perjodu fl-2008.

4. Il-waqgħa fid-domanda għal tagħmir elettroniku għall-karozzi, li ġiet wara t-tnaqqis fil-manifattura tal-karozzi, ikkombinata mal-impossibbiltà li jitnaqqsu aktar l-ispejjeż tal-produzzjoni u/jew l-aċċess għall-kreditu, irriżultat fl-għeluq ta' Krombert & Schubert Portugal, Lda u tal-impjant tal-produzzjoni ta' Lear fi Guarda. L-għeluq ta' Leoni Wiring Systems Viana, Lda kien riżultat tal-kombinazzjoni ta' sitwazzjoni ekonomika diffiċli minħabba fil-kriżi kif ukoll ir-rilokazzjoni tal-impjant tal-produzzjoni lejn il-Marokk.

5. L-argumenti ppreżentati fil-każijiet preċedenti[5] dwar l-industrija tal-vetturi bil-mutur u li fihom is-sensji kienu riżultat dirett tal-kriżi jibqgħu validi.

Turija tal-għadd ta’ sensji u l-konformità mal-kriterji tal-Artikolu 2(b)

6. Il-Portugall ressaq din l-applikazzjoni skont il-kriterji ta' intervent tal-Artikolu 2(b) tar-Regolament (KE) Nru 1927/2006, li jitlob li jkun hemm minn tal-inqas 500 sensja fuq perjodu ta' disa' xhur f'intrapriżi li joperaw fl-istess Diviżjoni tan-NACE Reviżjoni 2 f'reġjun wieħed jew f'żewġ reġjuni kontigwi fil-livell tan-NUTS II fi Stat Membru.

7. L-applikazzjoni ssemmi 726 sensja fi tliet intrapriżi li joperaw fid-Diviżjoni 29 tan-NACE Reviżjoni 2 ("Manifattura ta' vetturi bil-mutur, trejlers u semitrejlers")[6] fir-reġjuni NUTS II ta' Norte (PT11) u Centro (PT16) matul il-perjodu ta' referenza ta' disa' xhur mill-1 ta' Lulju 2010 sal-1 ta' April 2011. Dawn is-sensji kollha ġew ikkalkulati skont it-tieni inċiż tat-tieni paragrafu tal-Artikolu 2 tar-Regolament (KE) Nru 1927/2006.

Spjegazzjoni tan-natura mhux prevista ta' dawk is-sensji

8. L-awtoritajiet Portugiżi jisħqu li l-manifatturi tal-vetturi bil-mutur ilhom ipoġġu pressjoni fuq il-fornituri għal dan l-aħħar żmien sabiex dawn inaqqsu l-marġini tagħhom. Il-kriżi drastika u għal għarrieda marbuta mat-tnaqqis fid-domanda għal vetturi bil-mutur fl-2009, li setgħet tiġi prevista, irriżultat fi tnaqqis sinifikanti fl-utilizazzjoni tal-kapaċità tal-produzzjoni Il-manifatturi Ewropej tal-komponenti tal-vetturi bil-mutur, għażlu li jtejbu l-kapaċità tal-produzzjoni ta' xi impjanti filwaqt li għalqu oħrajn sabiex inaqqsu n-nefqa tal-produzzjoni.

Identifikazzjoni tal-intrapriżi li taw is-sensji u l-ħaddiema li huma identifikati għall-għajnuna

9. L-applikazzjoni tirrilata ma' 726 sensja fit-tliet intrapriżi li ġejjin:

Intrapriżi u għadd ta' sensji

Leoni Wiring Systems Viana, Lda || 332

Kromberg & Schubert Portugal, Lda || 120

Delphi Automotive Systems – Portugal, S.A. || 274

Għadd totali ta' Intrapriżi 3 || Għadd totali tas-Sensji: 726

10. Is-726 sensja kollha huma fil-mira tal-assistenza. Madankollu l-awtoritajiet Portugiżi – abbażi ta' esperjenzi preċedenti tal-ġestjoni tal-kontribuzzjonijiet tal-FEG – jikkalkulaw li madwar 500 ħaddiem se jitolbu l-appoġġ tal-FEG.

11. It-tqassim tal-ħaddiema identifikati huwa kif ġej:

Kategorija || Numru || Perċentwal

Irġiel || 248 || 34,16

Nisa || 478 || 65,84

Ċittadini tal-UE || 726 || 100,00

Ċittadini mhux tal-UE || 0 || 0,00

Età bejn il-15 u l-24 sena || 3 || 0,41

Età bejn il-25 u l-54 sena[7] || 709 || 97,66

Età bejn il-55 sal-64 sena || 14 || 1,93

Aktar minn 64 sena || 0 || 0,00

12. Tliet ħaddiema għandhom problema ta' saħħa fit-tul jew diżabbiltà.

13. Fir-rigward ta' kategoriji ta’ xogħol, it-tqassim huwa kif ġej:

Kategorija || Numru || Perċentwal

Maniġers || 15 || 2,07

Professjonisti || 14 || 1,93

Tekniċi u professjonisti assoċjati || 99 || 13,64

Skrivani || 57 || 7,85

Ħaddiema tas-servizz || 1 || 0,13

Ħaddiema fl-artiġjanat u snajja' relatati || 9 || 1,24

Operaturi tal-impjanti u tal-magni || 474 || 65,29

Okkupazzjonijiet elementari || 57 || 7,85

14. F'termini ta' livell edukattiv, it-tqassim huwa kif ġej:

Livell edukattiv || Numru || Perċentwal

L-edukazzjoni bażika[8] || 469 || 64,60

Edukazzjoni sekondarja || 221 || 30,44

Edukazzjoni terzjarja || 36 || 4,96

15. Skont l-Artikolu 7 tar-Regolament (KE) Nru 1927/2006, il-Portugall ikkonferma li ġiet applikata, u se tkompli tiġi applikata, politika ta' ugwaljanza bejn in-nisa u l-irġiel, kif ukoll politika ta' nondiskriminazzjoni matul l-istadji varji tal-implimentazzjoni tal-FEG u, b'mod partikolari, fl-aċċess għall-FEG.

Deskrizzjoni tat-territorju kkonċernat u l-awtoritajiet u l-partijiet interessati tiegħu

16. Ir-reġjun Norte għandu l-aktar popolazzjoni għolja fil-pajjiż, kif ukoll huwa r-reġjun bl-anqas dħul ras għal ras u bl-ogħla rata ta' qgħad. Il-livell ta' edukazzjoni u l-kwalifiki tal-popolazzjoni huma baxxi. Ir-reġjun jiddependi ħafna fuq l-industrija, u huwa b'saħħtu l-aktar fl-industriji tradizzjonali bħat-tessuti, il-ħwejjeġ, iż-żraben u s-sufra, fejn kellu suċċess fis-swieq tal-esportazzjoni. L-agrikoltura hija b'saħħitha fil-ħalib u fl-inbid (partikolarment l-inbid Port) u l-forestrija huwa settur b'potenzjal għall-futur.

17. Ir-reġjun Centro għandu popolazzjoni aktar skarsa, b'popolazzjoni li qed tixjiħ (indiċi tax-xjuħija ta' 153 % fl-2009, li jisboq il-medja nazzjonali ta' 118 %). Il-bażi industrijali tar-reġjun hija komposta minn varjetà ta' strutturi produttivi tradizzjonali li jiddependu minn xogħol b'irħis u nuqqas ta' kompetittività. Dan, flimkien mal-livell baxx ta' edukazzjoni u kwalifiki tal-popolazzjoni (madwar 46 % tal-forza tax-xogħol għandha sitt snin jew anqas ta' edukazzjoni) jista' jagħti spjegazzjoni għall-produttività reġjonali baxxa. Il-qgħad huwa baxx, l-aktar minħabba fil-migrazzjoni tal-popolazzjoni attiva lejn żoni urbani jew barra 'l pajjiż.

18. L-awtoritajiet prinċipali kkonċernati huma l-Instituto do Emprego e Formação Profissional (IEFP, I.P.), istituzzjoni tal-amministrazzjoni pubblika b'ċentri tal-impjiegi u ċentri għat-taħriġ vokazzjonali; it-trejdjunjins: STIMM, SINDEL u SIMA; u Associação de Fabricantes para a Industria Automóvel-AFIA (l-Assoċjazzjoni Portugiża tal-Manifatturi għall-Industrija tal-Vetturi). Partijiet oħra interessati huma ċentri tat-taħriġ vokazzjonali konġunti (ċentri li l-ġestjoni tagħhom hija maqsuma bejn IEPF, I.P u msieħba settorjali – organizzazzjonijiet ta' min iħaddem u/jew trejdjunjins – bħal CINEL, CEPRA, INOVINTER u CEFOSAP).

L-impatt mistenni tas-sensji fir-rigward tal-impjiegi lokali, reġjonali jew nazzjonali

19. Skont l-Istitut Nazzjonali tal-Istatistika (INE) il-livell tal-qgħad fil-Portugall fit-tielet kwart tal-2010 kien 10,9 % li huwa 1,1 % ogħla minn dak tal-istess perjodu tal-2009. Ir-rata tal-qgħad fir-reġjun Norte żdiedet minn 11,6 % fit-tielet kwart tal-2009 għal 13,2 % fl-istess perjodu tal-2010 u din hija l-ogħla rata tal-qgħad fil-pajjiż. Fir-reġjun Centro kien hemm żieda żgħira fir-rata tal-qgħad (minn 7,2 % għal 7,4 % fl-istess perjodu bħal dak imsemmi hawn fuq).

20. L-impatt ta' dawn is-sensji fuq livell lokali huwa għoli minħabba l-kombinazzjoni ta' dawn il-fatturi, li flimkien joffru sitwazzjoni diffiċli u mhux normali fuq il-ħaddiema u r-reġjuni kkonċernati.

21. Iż-żewġ reġjuni fejn seħħew dawn is-sensji diġà ġew aċċettati għall-appoġġ mill-FEG f'każ preċedenti, EGF/2009/001 PT/Norte-Centro.

Pakkett ikkoordinat ta' servizzi personalizzati li jridu jiġu ffinanzjati u analiżi tal-ispejjeż stmati tiegħu, inkluża l-komplementarjetà tiegħu mal-azzjonijiet iffinanzjati mill-Fondi Strutturali

22. Qed jiġu proposti t-tipi ta’ miżuri li ġejjin, li kollha jingħaqdu biex jiffurmaw pakkett koordinat ta’ servizzi personalizzati mmirati lejn l-integrazzjoni mill-ġdid tal-ħaddiema fis-suq tax-xogħol:

– Profil, tagħrif u gwida: L-azzjonijiet ta' profil u tagħrif jikkonsistu fl-aġġornament tal-benefiċjarji potenzjali kollha dwar il-miżuri disponibbli, it-tħeġġiġ tal-ħaddiema biex jieħdu sehem attiv fihom, il-provvista ta' tagħrif dwar is-suq tax-xogħol, kif ukoll l-istabbiliment u l-adattament tal-Pjanijiet Personali tal-Impjiegi rispettivi tagħhom, li għandhom jiddeskrivu l-miżuri li l-ħaddiema beħsiebhom jieħdu sehem fihom. Il-profil u t-tagħrif se jitwettaq miċ-Ċentri tal-Impjiegi u mhuwiex kofinanzjat mill-FEG. Il-gwida se tinkludi azzjonijiet dwar kwistjonijiet orizzontali bħall-motivazzjoni għax-xogħol u l-motivazzjoni għat-taħriġ u t-taħriġ mill-ġdid, it-tagħlim matul il-ħajja; l-iżvilupp personali u l-promozzjoni tal-istima personali; u t-taħriġ dwar it-tiftix tax-xogħol. Se jingħataw konċessjonijiet għall-ikel u t-trasport b'limiti u kundizzjonijiet stretti.

– Ir-rikonoxximent, il-validazzjoni u ċ-ċertifikazzjoni tal-kompetenzi: Bl-għajnuna ta' "Centros de Novas Oportunidades – CNO" rikonoxxuti (Ċentri għal Opportunitajiet Ġodda), il-ħaddiema se jidentifikaw l-għarfien u l-ħiliet akkwistati matul ħajjithom f'kuntesti formali u informali. Matul is-sessjonijiet individwali u fi gruppi, flimkien ma' għalliema professjonisti, huma se jħejju portafoll li jkun fih l-evidenza tal-proċess ta' tagħlim tagħhom li jwassal għall-validazzjoni taċ-ċertifikazzjoni tal-iskola u/jew iċ-ċertifikazzjoni vokazzjonali.

– Taħriġ Vokazzjonali: Il-ħaddiema se jirċievu t-taħriġ li huwa l-aktar adattat għal-livelli tal-edukazzjoni u tal-ħiliet tagħhom, u dan se jgħinhom sabiex jerġgħu jintegraw malajr fix-xogħol. Se jkun hemm korsijiet ta' taħriġ għall-adulti li jwasslu għal ċertifikazzjoni doppja (edukattiva u vokazzjonali), xi wħud se jingħataw fuq bażi modulari (taħriġ flessibbli organizzat f'unitajiet ta' taħriġ fuq żmien qasir, ippreżentati fil-parametri referenzjarji tal-Katalgu Nazzjonali tal-Kwalifiki) u xi wħud se jikkonsistu f'taħriġ speċifiku, adattat għall-ħtiġijiet speċifiċi tas-suq tax-xogħol. Il-korsijiet tat-taħriġ se jingħataw miċ-Ċentri tat-Taħriġ Vokazzjonali u entitajiet oħra ta' kompetenza rikonoxxuta identifikati mill-IEFP, IP[9]. Se jingħataw konċessjonijiet għat-taħriġ, l-ikel, it-trasport, l-assigurazzjoni personali kontra l-inċidenti u l-akkomodazzjoni b'limiti u kundizzjonijiet stretti.

– Għotja għat-taħriġ fuq inizjattiva personali: Din għandha tippermetti lill-ħaddiema jieħdu sehem f'korsijiet xierqa tat-taħriġ, miftiehma magħhom bħala parti mill-pjanijiet personali tal-impjieg tagħhom, u li jingħataw minn istituzzjonijiet rikonoxxuti tat-taħriġ. Huma se jingħataw il-possibbiltà li jattendu aktar minn kors wieħed konsekuttivament jew simultanjament. Il-parteċipanti ta' dan it-tip ta' taħriġ se jiġu offruti għotja sa EUR 8 000 (li tkopri l-ispejjeż kemm tat-taħriġ kif ukoll ta' allokazzjoni għat-taħriġ) skont kundizzjonijiet stretti.

– Appoġġ għas-sejba ta' impjieg mill-persuna nnifisha: Din hija għotja mogħtija lil ħaddiema li, waqt il-perjodu tal-implimentazzjoni tal-pakkett personalizzat ta' miżuri tal-FEG, isibu impjieg full-time huma nnifishom. L-ammont ivarja skont it-tul tal-kuntratt offrut, u jista' jiżdied jekk il-post tax-xogħol ikun aktar minn 100 km 'il bogħod mill-post fejn joqgħod il-ħaddiem.

– Inċentiv għar-reklutaġġ: Sabiex jiġi stimulat il-ħolqien ta' impjiegi ġodda, jista' jiġi allokat appoġġ finanzjarju lill-entitajiet li jħaddmu li jiffirmaw kuntratti full-time ma' ħaddiem benefiċjarju tal-FEG. It-tul minimu tal-kuntratt għandu jkun ta' 12-il xahar, u jingħata inċentiv akbar lil dawk li jimpjegaw ħaddiema b'kuntratti ta' tul indefinit.

– Appoġġ imprenditorjali: Għal dawk il-ħaddiema li jixtiequ joħolqu n-negozji tagħhom, se jiġi organizzat taħriġ fl-għarfien u l-kompetenzi speċifiċi għall-ħolqien u l-ġestjoni ta' negozji żgħar. L-attendenza għat-taħriġ hija obbligatorja qabel tinħareġ id-deċiżjoni għall-appoġġ tal-ħolqien tan-negozju, ħlief f'każijiet fejn ikun hemm diġà taħriġ jew esperjenza rilevanti kkonfermata. L-appoġġ tekniku lill-proġett jinkludi attivitajiet ta' appoġġ għall-iżvilupp tal-innovazzjoni kummerċjali, it-tħejjija tal-pjan tan-negozju, it-twaqqif tal-kumpanija u s-segwitu tal-proġett matul l-ewwel sena tat-tħaddim tagħha. Se tingħata assigurazzjoni personali kontra l-inċidenti kif ukoll konċessjonijiet għall-ikel u t-trasport b'limiti u kundizzjonijiet stretti.

– Appoġġ għall-ħolqien tan-negozji: Mat-tlestija tat-taħriġ u t-tħejjija tal-intraprenditorija, il-ħaddiema se jiġu megħjuna b'sussidju mhux rimborsabbli ta' EUR 20 000 għal kull impjieg maħluq, inkluż dak tal-promotur, sa massimu ta' tlieta. L-impjiegi maħluqa għandhom jimtlew minn benefiċjarji oħra tal-FEG, jew minn persuni qiegħda rreġistrati fiċ-ċentri tal-impjiegi tar-reġjun, u għandhom ikunu full-time b'tul minimu ta' sentejn.

– Pjan ta' integrazzjoni: Dan se jipprovdi lill-ħaddiema esperjenza tax-xogħol ta' mill-inqas 30 siegħa kull ġimgħa matul perjodu ta' minn sitta sa tnax-il xahar. L-għan ta' din il-miżura huwa li jkun żgurat li dawn il-ħaddiema ma jitilfux il-kuntatt mal-ħaddiema l-oħra, ma jsofrux minn iżolament u nuqqas ta' motivazzjoni billi jingħataw l-opportunità li jakkwistaw għarfien u ħiliet ġodda u għalhekk itejbu l-impjegabbiltà tagħhom wara l-perjodu ta' integrazzjoni. Il-ħaddiema se jitqiegħdu ma' entitajiet li jħaddmu u li ma jagħmlux profitt għal perjodu limitat; dan jintitolahom għal konċessjonijiet għall-ikel u t-trasport, l-assigurazzjoni u sussidju kull xahar minflok il-paga.

23. In-nefqa għall-implimentazzjoni tal-FEG, li hija inkluża fl-applikazzjoni, skont l-Artikolu 3 tar-Regolament (KE) Nru 1927/2006, tkopri attivitajiet ta’ tħejjija, ġestjoni u kontroll kif ukoll ta' tagħrif u pubbliċità.

24. Is-servizzi personalizzati ppreżentati mill-awtoritajiet Portugiżi huma miżuri attivi tas-suq tax-xogħol fi ħdan l-azzjonijiet eliġibbli kif definiti bl-Artikolu 3 tar-Regolament (KE) Nru 1927/2006. L-awtoritajiet Portugiżi jistmaw li l-ispejjeż totali ta’ dawn is-servizzi huma ta’ EUR 2 241 100 u li n-nefqa għall-implimentazzjoni tal-FEG hija ta' EUR 95 000 (4,24 % tal-ammont totali). Il-kontribuzzjoni totali mitluba mill-FEG hija ta’ EUR 1,518,465 (65 % tal-kosti totali).

Azzjonijiet || Għadd stmat ta’ ħaddiema identifikati || Kost stmat għal kull ħaddiem identifikat (EUR) || Kosti totali (l-EGF u l-kofinanzjament nazzjonali) (EUR)

Servizzi personalizzati (l-ewwel paragrafu tal-Artikolu 3 tar-Regolament (KE) Nru 1927/2006)

Tagħrif, profil u gwida [10](Orientação profissional) || 100 || 165 || 16 500

Ir-rikonoxximent, il-validazzjoni u ċ-ċertifikazzjoni tal-kompetenzi (RVCC) || 40 || 640 || 25 600

It-Taħriġ Vokazzjonali (Formação profissional) || 100 || 6 000 || 600 000

Għotja għat-taħriġ fuq inizjattiva personali (Subsidio à formação por iniciativa individual) || 75 || 4 000 || 300 000

Appoġġ għas-sejba ta' impjieg mill-persuna nnifisha (Apoio à auto-colocação) || 100 || 1 100 || 110 000

Inċentiv għar-reklutaġġ (Apoio à contratação) || 60 || 2 400 || 144 000

Appoġġ imprenditorjali (Apoio à criação do proprio emprego ou empresa - formação e apoio técnico ao projecto) || 50 || 2 100 || 105 000

Appoġġ għall-ħolqien tan-negozji (Apoio à criação da empresa) || 35 || 20 000 || 700 000

Pjan ta' integrazzjoni (Planos de integração) || 75 || 3 200 || 240 000

Subtotal tas-servizzi personalizzati || || 2 241 100

Nefqa għall-implimentazzjoni tal-FEG (it-tielet paragrafu tal-Artikolu 3 tar-Regolament (KE) Nru 1927/2006)

Attivitajiet ta' tħejjija || || 2 000

Maniġment || || 90 000

Tagħrif u pubbliċità || || 2 000

Attivitajiet ta’ kontroll || || 1 000

Subtotal tan-nefqa għall-implimentazzjoni tal-FEG || || 95 000

Total tal-ispejjeż stmati || || 2 336 100

Kontribuzzjoni tal-FEG (65 % tal-ispejjeż totali) || || 1 518 465

25. Il-Portugall jikkonferma li l-miżuri deskritti hawn fuq huma komplementarji mal-azzjonijiet iffinanzjati mill-Fondi Strutturali. Il-Portugall se jiżgura wkoll intraċċjar ċar ta' verifika għall-attivitajiet iffinanzjati mill-FEG, u jikkonferma li mhux se jintalab jew jintuża finanzjament ieħor tal-UE għal dawn l-attivitajiet.

Id-data/dati meta bdew jew meta huwa maħsub li jibdew is-servizzi personalizzati lill-ħaddiema affettwati

26. Fl-1 ta’ Lulju 2010, il-Portugall beda s-servizzi personalizzati għall-ħaddiema affettwati inklużi fil-pakkett koordinat propost għall-kofinanzjament mill-FEG . Din id-data, għalhekk, tirrappreżenta l-bidu tal-perjodu ta' eliġibbiltà għal kwalunkwe għajnuna li tista' tingħata mill-FEG.

Proċeduri għall-konsultazzjoni mal-imsieħba soċjali

27. L-applikazzjoni tal-FEG tressqet fil-laqgħa tal-Bord tad-Diretturi tal-IEFP, I.P. Il-Bord tad-Diretturi fil-21 ta' Ġunju 2011 l-IEFP, I.P. li huwa l-Awtorità tal-Ġestjoni u tal-Ħlas għall-FEG fil-Portugall, huwa korp magħmul minn tliet entitajiet (il-gvern, rappreżentanti ta' min iħaddem u tal-ħaddiema).

28. L-awtoritajiet Portugiżi kkonfermaw li r-rekwiżiti stipulati fil-leġiżlazzjoni nazzjonali u tal-UE li jikkonċernaw is-sensji kollettivi ġew issodisfati.

Tagħrif dwar azzjonijiet li huma obbligatorji skont il-liġi nazzjonali jew skont il-ftehimiet kollettivi

29. Fir-rigward tal-kriterji li jinsabu fl-Artikolu 6 tar-Regolament (KE) Nru 1927/2006, l-awtoritajiet Portugiżi fl-applikazzjoni tagħhom:

· ikkonfermaw li l-kontribut finanzjarju mill-FEG ma jieħux post il-miżuri li huma r-responsabbiltà tal-kumpaniji skont il-liġi nazzjonali jew il-ftehimiet kollettivi;

· urew li l-azzjonijiet jipprovdu appoġġ għall-ħaddiema individwali u ma għandhomx jintużaw għar-ristrutturazzjoni ta' kumpaniji jew setturi;

· ikkonfermaw li l-azzjonijiet eliġibbli ma jirċevux assistenza minn strumenti finanzjarji oħra tal-UE.

Sistemi ta’ ġestjoni u ta’ kontroll

30. Il-Portugall innotifika lill-Kummissjoni li l-kontribut finanzjarju se jitmexxa u jiġi kkontrollat mill-Instituto do Emprego e Formação Profissional, I.P. (IEFP, I.P.), is-servizz għall-impjiegi pubbliċi. Il-ġestjoni ġenerali se titmexxa mid-Dipartiment tax-Xogħlijiet, waqt li l-ġestjoni operazzjonali se titmexxa mid-Delegazzjonijiet reġjonali ta' Norte u Centro tal-IEFP, I.P. Il-ġestjoni finanzjarja ġenerali se tkun f'idejn id-Dipartiment tal-Kontroll Finanzjarju u Amministrattiv. L-approvazzjoni u l-ħlas tal-għajnuna huma r-responsabbiltà tad-Delegazzjonijiet Reġjonali tar-reġjuni Norte u Centro. Iċ-ċentri ta' taħriġ u entitajiet imsieħba, l-aktar iċ-ċentri tat-taħriġ vokazzjonali konġunti se jieħdu ħsieb il-parti l-kbira tal-miżuri attivi. Il-Portugall ikkonferma li l-prinċipju tas-separazzjoni tal-funzjonijiet fost l-entitajiet rilevanti u fi ħdanhom se jiġi rispettat.

31. L-Instituto de Gestão do Fundo Social Europeu (IGFSE, I.P.), l-Istitut tal-Ġestjoni tal-Fond Soċjali Ewropew, se jkun responsabbli għall-verifika u l-kontroll fir-rigward ta' din l-applikazzjoni tal-FEG.

Finanzjament

32. Abbażi tal-applikazzjoni mill-Portugall, il-kontribut propost mill-FEG għall-pakkett ikkoordinat ta' servizzi personalizzati (inkluża n-nefqa biex jiġi implimentat il-FEG) huwa ta' EUR 1 518 465, li jirrappreżenta 65 % tal-kost totali. L-allokazzjoni proposta tal-Kummissjoni minn dan il-Fond hija bbażata fuq it-tagħrif li ngħatat mill-Portugall.

33. B'kunsiderazzjoni tal-ammont massimu possibbli ta' kontribuzzjoni finanzjarja mill-FEG skont l-Artikolu 10(1) tar-Regolament (KE) Nru 1927/2006, kif ukoll tal-kamp ta' applikazzkjoni tal-allokazzjoni mill-ġdid ta' approprjazzjonijiet, il-Kummissjoni tipproponi li timmobilizza l-FEG għall-ammont totali msemmi hawn fuq, li għandu jiġi allokat skont l-intestatura 1a tal-qafas finanzjarju.

34. L-ammont propost ta' kontribut finanzjarju jippermetti li aktar minn 25 % tal-ammont annwali massimu allokat għall-FEG jibqa' disponibbli biex ikun allokat matul l-aħħar erba' xhur tas-sena, kif stipulat fl-Artikolu 12(6) tar-Regolament (KE) Nru 1927/2006.

35. Bil-preżentazzjoni ta' din il-proposta sabiex timmobilizza l-FEG, il-Kummissjoni qiegħda tniedi l-proċedura ssimplifikata ta' trijalogu, kif mitlub mill-Punt 28 tal-Ftehim Interistituzzjonali tas-17 ta' Mejju 2006, sabiex tikseb il-qbil taż-żewġ fergħat tal-awtorità baġitarja dwar il-ħtieġa li jintuża l-FEG u l-ammont meħtieġ. Il-Kummissjoni tistieden lill-ewwel waħda miż-żewġ fergħat tal-awtorità baġitarja li tilħaq ftehim dwar l-abbozz tal-proposta għall-mobilizzazzjoni biex, f'livell politiku xieraq, tgħarraf lill-fergħa l-oħra u lill-Kummissjoni bl-intenzjonijiet tagħha. F'każ ta' nuqqas ta' qbil minn xi waħda miż-żewġ fergħat tal-awtorità baġitarja, għandha tissejjaħ laqgħa formali ta' trijalogu.

36. B’mod separat, il-Kummissjoni tippreżenta talba ta' trasferiment sabiex fil-baġit għall-2011 iddaħħal approprjazzjonijiet speċifiċi għall-impenji, kif mitlub mill-Punt 28 tal-Ftehim Interistituzzjonali tas-17 ta' Mejju 2006.

Sors tal-approprjazzjonijiet għall-ħlas

37. Se jkun mitlub tisħiħ tal-approprjazzjonijiet ta' ħlas fuq il-linja baġitarja tal-FEG permezz tat-Trasferiment Globali. Approprjazzjonijiet minn din il-linja baġitarja se jintużaw biex ikopru l-ammont ta' EUR 1 518 465 meħtieġa għal din l-applikazzjoni.

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond Ewropew ta' Aġġustament għall-Globalizzazzjoni skont il-punt 28 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja soda (applikazzjoni EGF/2011/005 PT/Norte-Centro Automotive mill-Portugall)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

Wara li kkunsidraw il-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja soda[11], u b'mod partikolari l-punt 28 tiegħu,

Wara li kkunsidraw ir-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni[12], u b'mod partikolari l-Artikolu 12(3) tiegħu,

Wara li kkunsidraw il-proposta mill-Kummissjoni Ewropea[13],

Billi:

(1)       Il-Fond Ewropew ta’ Aġġustament għall-Globalizzazzjoni (FEG) twaqqaf biex jipprovdi appoġġ addizzjonali għall-ħaddiema li ngħataw is-sensja b’riżultat ta’ bidliet strutturali maġġuri fix-xejriet kummerċjali dinjijin minħabba l-globalizzazzjoni u biex jgħinhom fl-integrazzjoni mill-ġdid tagħhom fis-suq tax-xogħol.

(2)       Il-kamp ta' applikazzjoni tal-FEG twessa’ għall-applikazzjonijiet ippreżentati mill-1 ta’ Mejju 2009 biex jinkludi appoġġ għall-ħaddiema li ngħataw is-sensja b’riżultat dirett tal-kriżi finanzjarja u ekonomika globali.

(3)       Il-Ftehim Interistituzzjonali tas-17 ta’ Mejju 2006 jippermetti l-mobilizzazzjoni tal-FEG fi ħdan il-limitu massimu annwali ta’ EUR 500 miljun.

(4)       Il-Portugall ressaq applikazzjoni biex jimmobilizza l-FEG, fir-rigward tas-sensji fi tliet (3) intrapriżi li joperaw fid-Diviżjoni 29 tan-NACE Reviżjoni 2 ("Manifattura ta' vetturi bil-mutur, trejlers u semitrejlers") fir-reġjuni NUTS II ta' Norte (PT11) u Centro (PT16), fis-6 ta' Ġunju 2011, u ssupplimentha b'tagħrif addizzjonali sat-18 ta' Lulju 2011. Din l-applikazzjoni tikkonforma mar-rekwiżiti għad-determinazzjoni tal-kontribuzzjonijiet finanzjarji kif stabbilit fl-Artikolu 10 tar-Regolament (KE) Nru 1927/2006. Il-Kummissjoni għalhekk ressqet proposta biex timmobilizza l-ammont ta' EUR 1,518,465.

(5)       L-FEG għandu, għalhekk, jiġi mmobilizzat sabiex jipprovdi kontribut finanzjarju għall-applikazzjoni mressqa mill-Portugall.

ADOTTAW DIN ID-DEĊIŻJONI:

Artikolu 1

Għall-baġit ġenerali tal-Unjoni Ewropea għas-sena finanzjarja 2011, il-Fond Ewropew ta' Aġġustament għall-Globalizzazzjoni (FEG) għandu jiġi mmobilizzat biex jipprovdi s-somma ta' EUR 1 518 465 f'approprjazzjonijiet ta' impenn u ta' ħlas.

Artikolu 2

Din id-Deċiżjoni għandha tiġi ppubblikata f'Il-Ġurnal Uffiċjali tal-Unjoni Ewropea.

Magħmul fi [Brussell/Strasburgu],

Għall-Parlament Ewropew,                          Għall-Kunsill,

Il-President                                                    Il-President

[1]               ĠU C 139, 14.6.2006, p. 1.

[2]               ĠU L 406, 30.12.2006, p. 1.

[3]               Ir-Regolament (KE) Nru 1893/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-klassifikazzjoni tal-istatistika ta’ attivitajiet ekonomiċi tan-NACE Reviżjoni 2 u li jemenda r-Regolament tal-Kunsill (KEE) Nru 3037/90 kif ukoll ċerti Regolamenti tal-KE dwar setturi speċifiċi tal-istatistika (ĠU L 393, 30.12.2006, p. 1).

[4]               Skont it-tielet paragrafu tal-Artikolu 3 tar-Regolament (KE) Nru 1927/2006.

[5]               EGF/2010/002 Cataluña Automoción, COM(2010)453 finali, EGF/2010/004 Wielkopolskie, COM(2010)616 finali, EGF/2010/031 GM Belgium, COM(2011)212 finali, u EGF/2011/003 Arnsberg and Düsseldorf, COM(2011)447 finali.

[6]               Ir-Regolament (KE) Nru 1893/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-klassifikazzjoni tal-istatistika ta’ attivitajiet ekonomiċi tan-NACE Reviżjoni 2 u li jemenda r-Regolament tal-Kunsill (KEE) Nru 3037/90 kif ukoll ċerti Regolamenti tal-KE dwar setturi speċifiċi tal-istatistika (ĠU L 393, 30.12.2006, p. 1).

[7]               22,6 % (25 sa 34 sena), 55 % (35 sa 44 sena) u 20,1 % (45 sa 54 sena).

[8]               Fil-Portugall, l-edukazzjoni bażika/edukazzjoni obbligatorja llum tieħu disa' snin. Madankollu, in-numru ta' snin ta' edukazzjoni formali obbligatorja huwa determinat skont id-data tat-twelid (dawk imwielda sal-31 ta' Diċembru 1966 – erba' snin; dawk imwielda bejn l-1 ta' Jannar 1967 u l-31 ta' Diċembru 1980 = sitt snin u dawk imwielda wara l-1 ta' Jannar 1981 = disa' snin)

[9]               'Instituto do Emprego e Formação Profissional-IEFP, IP' (L-Istitut tal-Impjiegi u t-Taħriġ Vokazzjonali) huwa s-servizz nazzjonali għall-impjiegi pubbliċi u għandu l-għan li jippromwovi l-kreazzjoni u l-kwalità tal-impjiegi u jsolvi l-problema tal-qgħad permezz tal-implimentazzjoni ta' politiki dwar l-impjiegi attivi u t-taħriġ.

[10]             Il-miżura se tkun offruta lis-726 ħaddiema qiegħda kollha. Madankollu l-partijiet tal-profil u tat-tagħrif tal-miżura se jitwettqu miċ-Ċentri tal-Impjiegi u mhumiex kofinanzjati mill-FEG. Il-100 parteċipant ibbaġitjati huma dawk li se jirċievu konċessjonijiet għall-ikel u t-trasport jew li jipparteċipaw f'sessjonijiet ta' gwida aktar speċjalizzati.

[11]             ĠU C 139, 14.6.2006, p. 1.

[12]             ĠU L 406, 30.12.2006, p. 1.

[13]             ĠU C […], […], p. […].