52011PC0570

MEMORANDUM TA’ SPJEGAZZJONI

1.           Sfond

Il-proposta mehmuża tikkostitwixxi strument legali għall-awtorizzazzjoni tal-iffirmar ta' ftehim kummerċjali bejn l-Unjoni Ewropea u l-Kolombja u l-Perù:

Proposta għal Deċiżjoni tal-Kunsill dwar il-firma tal-ftehim kummerċjali.

In-negozjati bejn l-UE u l-Komunità Andina tan-Nazzjonijiet (minn hawn ’il quddiem il-Komunità Andina) għal ftehim ta' assoċjazzjoni minn reġjun għal reġjun, inkluż id-djalogu politiku, il-kooperazzjoni u l-kummerċ, ġew varati f'Ġunju 2007 wara deċiżjoni tal-Kunsill biex ikunu awtorizzati dawn in-negozjati f'April tal-istess sena. Sfortunatament, in-nuqqas ta' ftehim bejn il-pajjiżi Andini dwar l-approċċi għal għadd ta' kwistjonijiet ewlenin dwar il-kummerċ skont il-ftehim previst waslu għas-sospensjoni tat-taħditiet f'Ġunju 2008. F'dawn iċ-ċirkostanzi, il-Kummissjoni ressqet rakkomandazzjoni lill-Kunsill fis-17 ta' Diċembru 2008 bil-għan li tiġi modifikata l-awtorizzazzjoni eżistenti hekk li jkomplu għaddejjin in-negozjati ta' ftehim kummerċjali ma' dawk il-pajjiżi tal-Komunità Andina li huma lesti li jibqgħu għaddejjin.

Fid-19 ta' Jannar 2009, il-Kunsill awtorizza l-Kummissjoni biex tinnegozja ftehim kummerċjali multipartitiku ma' dawk il-pajjiżi li għandhom l-istess objettiv ġenerali bħal tagħna, dak ta' ftehim bilanċjat, ambizzjuż, komprensiv u kompatibbli mad-WTO. Il-Presidenti tal-Kolombja, l-Ekwador u l-Perù kkonfermaw l-impenn tagħhom biex jinnegozjaw permezz ta' ittri lill-President Barroso f'Jannar 2009. II-Bolivja kienet ikkritikat bil-qawwa l-format il-ġdid, u ma kinitx uriet interess li tipparteċipa. Għaldaqstant, f'Jannar 2009 kienu ġew varati negozjati ġodda għal ftehim kummerċjali multipartitiku bejn l-UE u l-Kolombja, l-Ekwador u l-Perù. Wara erba' (4) sessjonijiet, l-Ekwador issospenda l-parteċipazzjoni tiegħu fit-taħditiet u n-negozjati għalhekk dawn komplew għaddejjin mal-Kolombja u l-Perù biss. In-negozjati ntemmew b'suċċess f'Mejju 2010 u — wara fażi ta' reviżjoni legali — it-test tal-ftehim kummerċjali kien inizjalat mal-Kolombja u l-Perù fit-23 ta' Marzu 2011.

Kif stipulat fid-direttivi tan-negozjati, il-Kummissjoni laħqet l-objettivi li jiġu eliminati tariffi għoljin, li jiġu indirizzati l-ostakli tekniċi għall-kummerċ, li jiġu liberalizzati s-swieq tas-servizzi, li jitħarsu l-indikazzjonijiet ġeografiċi Ewropej importanti (il-GIs), li jinfetħu s-swieq tal-akkwisti pubbliċi, li jiġu inklużi impenji dwar l-infurzar tal-istandards tax-xogħol u dawk ambjentali u jiġu offruti proċeduri għas-soluzzjoni għat-tilwim li jkunu effettivi u li ma jiħdux ħafna żmien. B'hekk jintlaħaq ukoll l-għan li mmorru lil hinn sew mill-impenji tad-WTO u li niżguraw livell ekwu mal-kompetituri fir-reġjun, bħalma hi l-Istati Uniti.

Fuq kollox, il-ftehim huwa opportunità għall-UE biex tirfed ir-riformi tal-Kolombja u l-Perù għall-integrazzjoni tal-ekonomija globali, biex jitkattar il-ġid soċjali u jiġi kkonsolidat it-tkabbir tagħhom bil-għan li jtejbu l-kundizzjonijiet tal-għajxien tal-popli tagħhom. Il-Membri l-oħra tal-Komunità Andina huma inkoraġġuti wkoll permezz ta' klawżola ta' adeżjoni biex jipparteċipaw fil-ftehim kummerċjali meta jidhrilhom li hu ż-żmien li jsir dan.

L-Istati Membri tal-Unjoni kienu infurmati bil-fomm u bil-kitba dwar il-proċess tan-negozjati mal-Kolombja, il-Perù u — sakemm kien qed jipparteċipa, l-Ekwador — permezz tal-Kumitat dwar il-Politika Kummerċjali tal-Kunsill. Il-Parlament Ewropew kien qiegħed jiġi wkoll infurmat regolarment bl-iżviluppi permezz tal-Kumitat tal-Kummerċ Internazzjonali (l-INTA). Tul il-proċess, it-test sħiħ li ħareġ min-negozjati ġie ċċirkolat liż-żewġ istituzzjonijiet. F'Ottubru 2009 saret Stima dettaljata tal-Impatt dwar is-Sostenibbiltà Kummerċjali (SIA) li tanalizza l-effetti potenzjali — ta' natura ekonomika, soċjali u ambjentali — tal-Ftehim.

2.           In-Natura U L-Firxa Tal-Ftehim

Il-ftehim kummerċjali bejn l-UE, il-Kolombja u l-Perù jistabbilixxi l-kundizzjonijiet biex l-operaturi ekonomiċi tal-UE jkunu jistgħu jisfruttaw kull vantaġġ mill-opportunitajiet u l-komplementaritajiet li qed jixirfu bejn l-ekonomiji rispettivi tagħna. Lill-esportaturi tal-UE ta' prodotti industrijali u tas-sajd, tul l-implimentazzjoni tiegħu l-Ftehim se jkun qed jiffrankalhom il-ħlas kollu taz-dazji doganali. Il-Ftehim jissodisfa l-kriterji fl-artikolu XXIV tal-GATT (biex jiġu eliminati d-dazji u regolamenti restrittivi oħra tal-kummerċ fir-rigward ta', sostanzjalment, il-kummerċ kollu bejn il-partijiet), jiġifieri: li huma koperti 99% tal-esportazzjonijiet mill-UE (100% tal-kummerċ tagħna fi prodotti industrijali f'10 snin; u c.85% tal-agrikoltura wara 17-il sena). Barra minn dan, dan jippermetti li jiġu eliminati wħud mill-ostakli mhux tariffarji diffiċli. Il-Perù u l-Kolombja, min-naħa tagħhom, se jibbenefikaw minn aċċess sostanzjali u ġdid lejn is-suq tal-UE b'mod partikolari għall-esportazzjonijiet agrikoli ewlenin tagħhom: il-banana, iz-zokkor u r-rum, filwaqt li l-UE se tagħti kopertura 100% mingħajr dazju għall-prodotti industrijali u tas-sajd ta' oriġini Kolombjana u Peruvjana, u dan appena l-Ftehim jidħol fis-seħħ.

Fejn tidħol il-kopertura tas-servizzi u l-istabbiliment, kif ukoll dik tal-akkwisti pubbliċi, il-ftehim huwa wieħed mill-aktar ambizzjużi li l-Kummissjoni qatt innegozjat. Dan jinkludi impenji sostanzjali fis-setturi ewlenin kollha (jiġifieri s-servizzi finanzjarji, it-telekomunikazzjoni, it-trasport) għall-provvisti u l-istabbiliment transkonfinali, b'mod partikolari, filwaqt li ġie indirizzat b'mod sodisfaċenti t-tħassib tal-UE fejn tidħol il-preżenza temporanja ta' persuni fiżiċi għall-finijiet ta' negozju (il-mode 4). Fejn jidħlu l-akkwisti, l-UE kisbet impenn mill-istituzzjonijiet kemm fil-livell ċentrali kif ukoll dak subċentrali b'limiti pjuttost baxxi.

Il-ftehim jistabbilixxi wkoll sett ta' dixxiplini li jmorru lil hinn minn dawn miftiehma fil-qafas multilaterali, notevolment dwar il-proprjetà intellettwali (eż. 205 indikazzjoni ġeografika protetta fl-UE, kundizzjonijiet iċċarati dwar il-protezzjoni tad-dejta); l-iżvilupp sostenibbli (il-ftehim, fejn jidħlu kwistjonijiet dwar ix-xogħol u dawk ambjentali, huwa ekwivalenti għall-GSP+, jew ogħla minn hekk, u jinkludi impenji speċifiċi dwar is-sajd sostenibbli); il-kompetizzjoni (dixxiplini fuq il-monopolji u l-intrapriżi tal-Istat – obbligi marbuta mat-trasparenza dwar is-sussidji); l-ostakli tekniċi għall-kummerċ (elementi WTO+ dwar is-sorveljanza tas-swieq, it-trasparenza fil-proċeduri ta' regolazzjoni u d-dixxiplini dwar it-tikkettar u l-immarkar); il-miżuri sanitarji u fitosanitarji (miżuri WTO+ dwar il-benesseri tal-annimali, ir-reġjonalizzazzjoni, l-approvazzjoni ta' stabbilimenti tal-esportazzjoni, l-ispezzjonijiet fuq il-post u l-kontrolli fuq l-importazzjonijiet), fost l-oħrajn. Barra minn dan, il-ftehim jistabbilixxi Kumitat tal-Kummerċ kif ukoll sett ta' subkumitati b'mod li jkun possibbli li jsiru konsultazzjonijiet dwar kwistjonijiet speċifiċi dwar il-kummerċ skont it-titoli differenti tiegħu. Għaldaqstant, valur addizzjonali prinċipali tal-ftehim huwa dak li jiffissa u jippromwovi – lil hinn minn dawk ir-regoli mnissla mill-qafas tad-WTO, kif ukoll f'livell ogħla minnhom – politiki ta' ftuħ u rispett lejn l-aqwa prassi maqbula internazzjonalment fil-livell domestiku filwaqt li jiġi garantit ambjent trasparenti, mhux diskriminatorju u prevedibbli għall-operaturi u l-investituri tal-UE fir-reġjun — partikolarment permezz ta' mekkaniżmu bilaterali għas-soluzzjoni tat-tilwim previst fil-ftehim.

Il-ftehim jinkludi wkoll Titolu dwar l-asistenza teknika u dwar il-bini tal-kapaċità kummerċjali hekk li jiġu promossi l-kompetittività, l-innovazzjoni, kif ukoll jiġu ffaċilitati t-trasferimenti tal-kummerċ u tat-teknoloġija bejn il-paritjiet.

L-oqsma kollha koperti mill-ftehim kummerċjali jaqgħu fil-kompetenza tal-UE, speċifikament fl-ambitu tal-Artikoli 91, 100(2) u 207 TFUE. Għalhekk, l-Unjoni Ewropea se tikkonkludi l-ftehim skont id-deċiżjoni tal-Kunsill abbażi tal-Artikolu 218(5) TFUE, wara li jingħata l-kunsens mill-Parlament Ewropew.

3.           Proċeduri

Il-Kummissjoni kienet sodisfatta bir-riżultati tan-negozjati u titlob lill-Kunsill:

– biex jawtorizza, f'isem l-Unjoni Ewropea, l-iffirmar tal-Ftehim Kummerċjali bejn l-Unjoni Ewropea u l-Kolombja u l-Perù.

2011/0245 (NLE)

Proposta għal

DEĊIŻJONI TAL-KUNSILL

dwar l-iffirmar, f'isem l-Unjoni Ewropea, tal-Ftehim Kummerċjali bejn l-Unjoni Ewropea u l-Kolombja u l-Perù

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u partikolarment l-Artikoli 91, 100(2), u 207(4), l-ewwel subparagrafu, flimkien mal-Artikolu 218(5) tiegħu,

Wara li kkunsidra l-proposta mill-Kummissjoni[1],

Billi:

(1)       Fid-19 ta' Jannar 2009, il-Kunsill awtorizza l-Kummissjoni biex tinnegozja ftehim dwar il-kummerċ multipartitiku f'isem l-Unjoni Ewropea mal-Pajjiżi Membri tal-Komunità Andina li kellhom l-istess objettiv ta' ftehim ambizzjuż, komprensiv u bilanċjat.

(2)       Dawk in-negozjati ġew konklużi u l-Ftehim Kummerċjali bejn l-Unjoni Ewropea u l-Kolombja u l-Perù (minn issa ’l quddiem "il-Ftehim") kien inizjalat fit-23 ta' Marzu 2011.

(3)       Il-Ftehim għandu jiġi ffirmat f'isem l-Unjoni Ewropea,

ADOTTA DIN ID-DEĊIŻJONI:

Artikolu 1

L-iffirmar tal-Ftehim Kummerċjali bejn l-Unjoni Ewropea u l-Kolombja u l-Perù huwa b'dan approvat f'isem l-unjoni Ewropea, suġġett għall-konklużjoni tal-imsemmi ftehim.

It-test tal-Ftehim huwa mehmuż ma’ din id-Deċiżjoni.

Artikolu 2

Is-Segretarjat Ġenerali tal-Kunsill għandu jagħti s-setgħat lill-persuna jew persuni indikati min-negozjatur tal-Ftehim biex jiffirmaw il-Ftehim f'isem l-Unjoni Ewropea, suġġett għall-konklużjonijiet tiegħu.

Artikolu 3

Din id-Deċiżjoni għandha tidħol fis-seħħ dakinhar li tiġi adottata.

Magħmul fi Brussell, […]

                                                                       Għall-Kunsill

                                                                       Il-President

DIKJARAZZJONI LEGIŻLATTIVA FINANZJARJA GĦAL PROPOSTI LI JKOLLHOM IMPATT BAĠITARJU LIMITAT ESKLUŻIVAMENT GĦAN-NAĦA TAD-DĦUL

1.           ISEM IL-PROPOSTA:

DEĊIŻJONI TAL-KUNSILL dwar l-iffirmar, f'isem l-Unjoni Ewropea, tal-Ftehim Kummerċjali bejn l-Unjoni Ewropea u l-Kolombja u l-Perù

2.           LINJI BAĠITARJI:

Kapitolu u Artikolu: 12 0

Ammont ibbaġitjat għal tmiem il-perjodu ta' implimentazzjoni

3.           IMPATT FINANZJARJU

¨      Il-proposta ma għandhiex implikazzjonijiet finanzjarji

x     Il-proposta ma għandhiex impatt finanzjarju fuq in-nefqa iżda għandha impatt finanzjarju fuq id-dħul – l-effett hu dan li ġej:

(miljuni EUR imqarrba lejn post deċimali wieħed)

|| ||

Linja baġitarja || Dħul[2] || perjodu fuq 12-il xahar li jibda mill-jj/xx/ssss || [Sena n]

Artikolu … || Impatt fuq ir-riżorsi proprji || || 137.5

Artikolu … || Impatt fuq ir-riżorsi proprji || ||

Is-sitwazzjoni wara l-azzjoni

|| [n+1] || [n+2] || [n+3] || [n+4] || [n+5]

Artikolu … || || || || ||

Artikolu … || || || || ||

4.           MIŻURI KONTRA L-FRODI

Il-leġiżlazzjoni tal-UE dwar id-dwana hija mfassla biex tiżgura l-applikazzjoni tajba tal-miżuri kollha tal-UE dwar id-dwana, inklużi l-preferenzi tariffarji stabbiliti f'dan il-ftehim kummerċjali, li jinkludi wkoll id-dispożizzjonijiet neċessarji dwar l-applikazzjoni tar-regoli preferenzjali tal-oriġini u tal-kooperazzjoni amministrattiva (l-Anness II), l-assistenza fit-talbiet għall-għajnuna (l-Anness V), u l-possibbiltà, wara l-konsultazzjonijiet, tal-irtirar temporanju tal-preferenzi tat-tariffi fil-każ ta' frodi u irregolaritajiet li jinvolvu trattament preferenzjali (l-Anness III).

5.           RIMARKI OĦRAJN

Din l-istima hija bbażata fuq il-medja ta' importazzjonijiet għall-perjodu 2007-2009 u tirrappreżenta t-telf annwali mid-dħul kawża (1) tal-implimentazzjoni sħiħa tal-preferenzi tariffarji negozjati tal-Ftehim Kummerċjali, jiġifieri: 10 snin wara li jidħol fis-seħħ u (2) il-livelli inizjali tal-kwoti tar-rati tariffarji konċessi. Tul is-snin preċedenti, it-telf fid-dħul se jkun inferjuri anki minħabba l-probabbiltà ta' żieda fl-importazzjonijiet ta' prodotti li d-dazji fuqhom se jitnaqqsu fi stadji u dak se jkun qed jikkumpensa, parzjalment, għat-telf.

[1]               ĠU C , , p. .

[2]               Dwar ir-riżorsi proprji tradizzjonali (dazji agrikoli, imposti fuq iz-zokkor, dazji doganali) l-ammonti indikati jridu jkunu ammonti netti, i.e. ammonti gross wara t-tnaqqis ta' 25 % tal-ispjejjeż tal-ġbir