This document is an excerpt from the EUR-Lex website
Document 52011DC0848
REPORT FROM THE COMMISSION State Aid Scoreboard Report on state aid granted by the EU Member States- Autumn 2011 Update -
RAPPORT TAL-KUMMISSJONI Tabella ta’ Valutazzjoni dwar l-Għajnuna mill-IstatRapport dwar l-għajnuna mill-Istat mogħtija mill-Istati Membri tal-UE- Aġġornament tal-Ħarifa 2011 -
RAPPORT TAL-KUMMISSJONI Tabella ta’ Valutazzjoni dwar l-Għajnuna mill-IstatRapport dwar l-għajnuna mill-Istat mogħtija mill-Istati Membri tal-UE- Aġġornament tal-Ħarifa 2011 -
/* KUMM/2011/0848 finali */
RAPPORT TAL-KUMMISSJONI Tabella ta’ Valutazzjoni dwar l-Għajnuna mill-IstatRapport dwar l-għajnuna mill-Istat mogħtija mill-Istati Membri tal-UE- Aġġornament tal-Ħarifa 2011 - /* KUMM/2011/0848 finali */
RAPPORT TAL-KUMMISSJONI Tabella ta’ Valutazzjoni dwar l-Għajnuna
mill-Istat
Rapport dwar l-għajnuna mill-Istat mogħtija mill-Istati Membri tal-UE
- Aġġornament tal-Ħarifa 2011 - WERREJ Għajnuna mill-Istat fil-kuntest
tal-kriżi ekonomika.......................................................................... 5 1........... Għajnuna mill-Istat fl-2010.............................................................................................. 5 2........... Tendenzi u mudelli ta’ infiq ta'
għajnuna mill-Istat għal għajnuna mhux għall-kriżi
fl-Istati Membri 6 2.1........ It-tendenza tal-livelli ta'
għajnuna mhux għall-kriżi mill-Istat lill-industrija u
s-servizzi.......... 7 2.2........ Għajnuna mhux
għall-kriżi mill-Istat allokata għal għanijiet orizzontali
ta’ interess komuni... 8 3........... Għajnuna mill-Istat
fil-kuntest tal-kriżi finanzjarja u ekonomika......................................... 9 3.1........ Tendenzi fl-approvazzjoni u
l-użu ta' miżuri ta’ għajnuna mill-Istat għas-settur
finanzjarju... 9 3.2........ L-ammonti approvati u l-ammonti li
jintużaw taħt il-qafas temporanju............................... 9 4........... It-tendenzi tal-infiq
għall-għajnuna mill-Istat skont it-tip ta’ miżuri ta’
għajnuna................ 11 4.1........ Numru ta’ miżuri ta’
għajnuna........................................................................................ 11 4.2........ Il-volumi ta’ għajnuna - madwar
21% tal-għajnuna lill-industrija u s-servizzi hija eżentata
bħala kategorija 11 5........... L-infurzar tar-regoli
tal-għajnuna mill-Istat..................................................................... 11 ANNESS................................................................................................................................... 13 Sommarju
tal-konklużjonijiet tar-Rapport Fl-2010,
in-nefqa totali fuq għajnuna mhux għall-kriżi kienet
relattivament stabbli fl-UE meta mqabbla ma’ tas-sena ta’ qabel. L-Istati
Membri komplew bl-isforzi tagħhom sabiex inaqqsu l-livelli ta’
għajnuna globali tagħhom u xi wħud kienu kapaċi li jnaqqsu
sostanzjalment l-infiq tagħhom ta’ għajnuna mill-Istat. Globalment,
it-tendenza fuq il-perjodu 2005-2010 turi tnaqqis fuq l-infiq ta’ għajnuna
mhux għall-kriżi. L-għajnuna
allokata għal għanijiet orizzontali ta’ interess komuni baqgħet
għolja filwaqt li xi Stati Membri kienu kapaċi jnaqqsu aktar
l-għajnuna mogħtija għall-iżvilupp settorjali.
L-għajnuna mogħtija taħt eżenzjoni ta’ kategorija
żdiedet ukoll meta kkumparata mas-snin preċedenti. Globalment,
l-ammont ta’ għajnuna li ġiet mogħtija jew taħt
eżenzjoni ta’ kategorija jew permezz ta' skemi, kienet fuq livell
għoli, filwaqt li l-livell ta’ għajnuna mogħtija individwalment,
awtorizzata minn deċiżjoni tal-Kummissjoni, baqa' f'volum baxx. L-attivitajiet
biex tiġi rkuprata għajnuna mill-Istat illegali komplew u aktar
għajnuna mogħtija illegalment ġie rkuprata mingħand
il-benefiċjarji, filwaqt li xi każijiet ulterjuri tressqu l-qorti. Fl-2010
n-numru ta’ miżuri ta’ sostenn għall-kriżi finanzjarja approvat
mill-Kummissjoni naqas sostanzjalment meta mqabbel mas-sentejn preċedenti.
Madankollu, il-biċċa l-kbira tal-miżuri approvati
fl-imgħoddi għadhom operattivi. L-ammont
effettivament użat fl-2010 għal rikapitalizzazzjoni u miżuri ta’
salvataġġ tal-assi huwa ferm ikkonċentrat fi ftit Stati Membri,
filwaqt li parti kbira tal-ammont użat fil-forma ta' garanziji u
miżuri ta’ likwidità għadha pendenti. Fl-2010, kienu
ftit il-miżuri ta’ għajnuna ġodda li ngħataw taħt
il-Qafas Temporanju tal-Unjoni. Il-maġġoranza tal-miżuri ta’
għajnuna kienu diġà ġew approvati fl-2009 u l-Istati Membri taw
b’mod sinifikanti anqas għajnuna taħt il-Qafas Temporanju tal-Unjoni
fl-2010 meta mqabbel mal-2009. Barra minn hekk, l-ammont ta’ għajnuna
użata baqa’ b’mod sinifikanti taħt l-ammont ta’ għajnuna
approvata, prinċipalment għaliex l-iżvilupp tas-sitwazzjoni
ekonomika ma kienx daqshekk prevedibbli u Stati Membri kienu kawti meta taw
l-għajnuna taħt il-Qafas Temporanju tal-Unjoni billi applikaw
kundizzjonijiet stretti. L-aġġornament tat-Tabella ta’
Valutazzjoni tal-Għajnuna mill-Istat (“it-Tabella ta’ Valutazzjoni”)
tal-ħarifa 2011 jipprovdi sinopsi tal-informazzjoni li l-Istati
Membri ressqu din is-sena fir-rapport annwali tagħhom dwar l-infiq
għall-għajnuna mill-istat fl-2010. Għal raġunijiet ta’
metodoloġija[1] u
biex ma tinħoloqx stampa magħwġa tat-tendenzi fl-infiq
għall-għajnuna mill-Istat, it-Tabella ta’ Valutazzjoni tiddistingwi
bejn għajnuna mhux għall-kriżi min-naħa l-waħda
(jiġifieri l-għajnuna kollha mogħtija taħt ir-regoli
normali tal-UE dwar l-għajnuna mill-istat) u għajnuna
għall-kriżi min-naħa l-oħra (jiġifieri l-għajnuna
kollha mogħtija lil istituzzjonijiet finanzjarji u l-ekonomija reali
taħt il-miżuri temporanji ta' għajnuna mill-Istat b’reazzjoni
għall-kriżi finanzjarja u ekonomika) [2]. Fir-rigward ta’ għajnuna mhux
għall-kriżi, it-Tabella ta’ Valutazzjoni, minbarra sinopsi dwar
l-infiq fl-2010, tipprovdi ħarsa ġenerali tat-tendenzi tal-infiq
f’għajnuna mill-Istat, għall-industrija u s-servizzi (bil-perjodu 2005-2007
ikkumparat mal-perjodu 2008-2010) u t-tip ta' miżuri ta’ għajnuna,
jiġifieri, għajnuna ta’ eżenzjoni ta’ kategorija, skemi u
miżuri individwali (kemm jekk applikazzjonijiet individwali ta’ skemi jew
deċiżjonijiet ad hoc). Fir-rigward ta’ għajnuna
għall-kriżijiet, it-Tabella ta’ Valutazzjoni tipprovdi ħarsa
ġenerali dwar l-ammonti approvati (mill-1 ta’ Ottubru 2008
sal-1 ta’ Ottubru 2011) u l-ammonti użati (mill-1 ta' Ottubru 2008
sal-31 ta’ Diċembru 2010) skont it-tip ta’ strument
(rikapitalizzazzjoni, garanzija, assi danneġġati, miżuri ta’
likwidità). Barra minn hekk, ir-rapport jipprovdi informazzjoni dwar
għajnuna mogħtija taħt il-Qafas Temporanju tal-Komunità
għall-miżuri ta’ għajnuna mill-Istat biex isostnu
l-aċċess għall-finanzjament fil-kriżi finanzjarja u
ekonomika attwali ("il-qafas temporanju")[3] fil-forma ta’ ammont approvat
għall-għajnuna u ta’ ammont użat. It-Tabella ta’ Valutazzjoni
tipprovdi wkoll aġġornament dwar il-kisbiet fil-qasam tal-infurzar
tar-regoli dwar l-għajnuna mill-istat. It-Tabella ta’ Valutazzjoni tikkonsisti
f’żewġ partijiet: l-ewwel, rapport ta’ sinteżi, adottat
mill-Kulleġġ tal-Kummissarji, li jiffoka fuq fatti ewlenin,
konklużjonijiet, tendenzi u żviluppi rigward l-għajnuna
mill-Istat li tingħata mill-Istati Membri u, it-tieni, Dokument ta’
Ħidma tal-Persunal, mehmuż mar-Rapport, "Fatti u ċifri dwar
għajnuna millIistat fl-Istati Membri tal-UE" ("SWD"), li
jipprovdi l-isfond fattwali. Wieħed jinnota li l-Awtorità
tas-Sorveljanza tal-EFTA tippubblika wkoll tabella ta’ valutazzjoni[4] annwali li tippubblika
aġġornamenti dwar il-volum ta’ għajnuna mill-Istat mogħtija
fl-Islanda, il-Liechtenstein u n-Norveġja. Għajnuna
mill-Istat fil-kuntest tal-kriżi ekonomika Fl-2010, il-PDG tal-UE kiber mil-livell
negattiv tiegħu tal-2009 għal riżultat li għalkemm
relattivament ta’ livell baxx, bħala medja taħt il-1%, huwa
pożittiv. Fid-dawl tas-sitwazzjoni ta’ kriżi li
għaddej minnha bħalissa s-settur finanzjarju, l-Istati Membri komplew
jipprovdu għajnuna lill-banek sabiex jintroduċu aktar kunfidenza
fis-settur u jippermettu b’mod partikolari lill-banek biex ikomplu jipprovdu
kreditu lill-ekonomija reali. Is-sitwazzjoni ekonomika ta’ ħafna
negozji gradwalment tjiebet tul l-2010, u għalhekk l-Istati Membri kellhom
bżonn jagħtu anqas għajnuna għall-kriżi lill-ekonomija
reali. Globalment, il-politika ta’ kontroll ta’
għajnuna mill-Istat tal-Kummissjoni, kienet waħda mill-fatturi
ewlenin li żgurat li l-implimentazzjoni ta’ miżuri ta'
salvataġġ mingħajr preċedent twettqet f'manjiera
kkordinata, mingħajr ma’ ħolqot tagħwiġ żejjed
fil-kompetizzjoni fis-suq intern. 1. Għajnuna mill-Istat fl-2010 Fl-2010, l-Istati Membri taw it-total
approssimattiv ta’ EUR 73,7 biljun fis-sura ta’ għajnuna mhux
għall-kriżi, jew f’termini relattivi 0,6% tal-PDG[5] tal-UE[6].
Il-miżuri relatati mal-kriżi, jiġifieri għajnuna
mogħtija lis-settur finanzjarju permezz ta’ miżuri ta’
rikapitalizzazzjoni u għal assi indeboliti, ammontaw għal EUR 121,3
biljun (1% tal-PDG tal-UE) filwaqt li l-volum globali tal-garanziji pendenti
medji u tal-likwidità jammonta għal EUR 983,9 biljun (8% tal-PDG
tal-UE). Fir-rigward ta’ għajnuna mogħtija taħt il-qafas
temporanju, l-ammont użat kien madwar EUR 11,7 biljun fl-2010 jew 0,9%
tal-PDG tal-UE. Fl-1 ta’ Ottubru 2011[7], l-Istati Membri kollha tal-UE-15[8] flimkien ma' Ċipru, l-Ungerija,
il-Latvja, il-Litwanja, il-Polonja, is-Slovakkja u s-Slovenja, kellhom
miżuri għall-kriżi finanzjarja approvati mill-Kummissjoni, u
l-Istati Membri kollha, ħlief għal Ċipru, kellhom miżuri
ta' għajnuna approvati skont il-qafas temporanju. L-għajnuna mhux għall-kriżi
tista’ terġa’ tinqasam f'għajnuna għall-industrija u s-servizzi,
li ammontat għal total ta’ madwar EUR 61 biljun jew 0,5% tal-PDG[9] tal-UE fl-2010, u għajnuna
għall-agrikoltura, li ammontat għal madwar EUR 10,3 biljun jew 0,08%
tal-PDG tal-UE, għas-sajd li ammontat għal madwar EUR 0,18-il
biljun jew 0,001% tal-PDG tal-UE, u għat-trasport li ammontat għal
għal madwar EUR 3,2 biljun jew 0,02% tal-PDG tal-UE. L-Istati Membri
rrapportaw li l-għajnuna lill-ferroviji[10] ammontat għal
EUR 27,2 biljun jew 0,2%[11] tal-PDG tal-UE fl-2010[12]. L-aktar ħames pajjiżi li taw
għajnuna mhux għall-kriżi ħarġu madwar EUR 45,7
biljun, li jirrappreżenta madwar żewġ terzi tat-total
tal-għajnuna mhux għall-kriżi. Il-Ġermanja tat ammont ta’
madwar EUR 15,9 biljun, jew 21,6% mit-total tal-għajnuna mhux
għall-kriżi, segwita minn Franza (madwar EUR 15,4 biljun jew 20,8%),
Spanja (EUR 5 biljun jew 6,8%), ir-Renju Unit (EUR 4,8 biljun jew 6,5%)
u l-Italja (EUR 4,6 biljun jew 6,2%). Madankollu, toħroġ stampa
differenti meta l-volum tal-għajnuna huwa rrappurtat bħala
persentaġġ tal-PDG. L-Ungerija tat għajnuna li
tirrappreżenta kważi 2,3% tal-PDG nazzjonali tagħha, Malta 1,4%,
il-Finlandja 1,1%, is-Slovenja 1,1% u l-Irlanda 1,0%. 2. Tendenzi u mudelli ta’
infiq ta' għajnuna mill-Istat għal għajnuna mhux
għall-kriżi fl-Istati Membri Il-figura 1[13]: It-total tal-għajnuna mill-Istat
(għajnuna mhux għall-kriżi) bħala % tal-PDG (fl-UE-27;
dejta mill-1992) Il-livell
ġenerali tal-għajnuna mill-Istat, meta wieħed jarah minn
perspettiva fit-tul, ilu li qabad tendenza 'l isfel sa mit-tmeninijiet. Minn
madwar 2% tal-PDG tal-UE matul it-tmeninijiet, niżel għal madwar 1%
tal-PDG tal-UE fid-disgħinijiet u reġa’ naqas għal madwar 0,5%
sa 0,6% tal-PDG tal-UE bejn is-snin 2004 – 2008, bl-eċċezzjoni tal-2006,
fejn għola. Sa mill-2008, il-livell ta’ għajnuna beda juri żieda
moderata, u kien ta’ madwar 0.6% tal-PDG tal-UE fl-2010. Dwar
ir-raġunijiet għall-aħħar tnaqqis fl-infiq
għall-għajnuna mill-Istat, issir referenza għar-Rapporti ta’
Valutazzjoni preċedenti[14]. Fuq terminu ta’ żmien qasir, il-livell
tal-infiq għall-għajnuna mill-Istat kien bejn wieħed u
ieħor stabbli sa mill-2008, li jidher ukoll mit-tendenza sottostanti,
jiġifieri minn madwar 0,062%[15] sa
0,60%[16]
tal-PDG tal-UE. Jidher li jindika li, filwaqt li l-Istati Membri
ġeneralment kienu ddixxiplinati fl-għajnuna tagħhom mill-Istat,
it-tweġiba tagħhom għall-kriżi finanzjarja u ekonomika
kkontribwiet għal livell ta’ għajnuna kemmxejn ogħla fir-rigward
tal-għajnuna mhux għall-kriżi fl-2010. Barra minn hekk, dan juri
wkoll li l-Istati Membri żammew politika mmirata u bbilanċjata sew
dwar l-għajnuna mill-Istat fir-rigward ta’ miżuri li mhumiex relatati
mal-kriżi. Minħabba l-elementi partikolari
assoċjati mal-għajnuna għall-agrikoltura, is-sajd u t-trasport,
it-taqsimiet li ġejjin dwar il-livelli u l-orjentazzjoni tal-għajnuna
mhux għall-kriżi (2.1
u 2.2), jittrattaw biss
l-għajnuna lill-industrija u s-servizzi. 2.1. It-tendenza
tal-livelli ta' għajnuna mhux għall-kriżi mill-Istat
lill-industrija u s-servizzi Miżuri ta’ għajnuna
għall-kriżi, li huma diskussi separatament fil-kapitolu 3, ma
ġewx ikkunsidrati meta ġiet analizzata l-għajnuna mogħtija
lill-industrija u s-servizzi; dan sar sabiex tiġi evitata stampa deformata
ħafna dwar in-nefqa fl-għajnuna lill-industrija u s-servizzi. Barra
minn hekk, il-metodoloġija differenti għall-kalkolu tal-ammont
tal-għajnuna mogħti lill-istituzzjonijiet finanzjarji,
ġġustifika din l-esklużjoni. It-tendenza fin-nefqa
għall-għajnuna lill-industrija u s-servizzi fl-UE wriet żieda
moderata fil-perjodu 2008-2010 meta mqabbla mal-perjodu preċedenti 2005-2007.
Bħala medja, l-infiq għall-għajnuna ammonta għal madwar
EUR 59,9 biljun jew 0,49% tal-PDG tal-UE, filwaqt li kien ta’ EUR 52,8
biljun jew 0,43% tal-PDG tal-UE fil-perjodu preċedenti. Dan l-ewwel juri
li apparentement, il-kriżi finanzjarja u ekonomika kellha xi impatt fuq
l-infiq għall-għajnuna għal miżuri ta’ għajnuna mhux
għall-kriżi li permezz tagħhom l-Istati Membri taw aktar
appoġġ partikolarment għall-iżvilupp reġjonali, u
r-riċerka u l-iżvilupp u l-innovazzjoni (“R&D&I”). F’dan
l-istadju, ikun kmieni wisq biex jiġi konkluż li ż-żieda
fit-tendenza, li tidher l-ewwel wara li l-livelli ta’ għajnuna niżlu,
hija parti minn tendenza fit-tul li għadha fil-bidu, jew li tirrifletti
s-sitwazzjoni partikolari tal-kriżi finanzjarja u ekonomika li matulha
livelli ogħla ta’għajnuna jistgħu jkunu mistennija għal
perjodu qasir. Meta jingħad li l-Istati Membri
setgħu ġeneralment ikomplu bl-isforzi tagħhom sabiex iżommu
l-livelli ta’ għajnuna taħt kontroll, dan jista’ jiġi sostnut
bil-fatt li 11-il Stat Membru naqqsu l-livelli ta' għajnuna tagħhom
meta kkumparati mat-tendenza medja tal-UE[17].
Fir-rigward tal-Istati Membri l-oħra għal-liema kienet identifikata
żieda fil-livell ta’ għajnuna, il-parti l-kbira taż-żidiet
tista' tiġi ġġustifikata bħala għajuna allokata
għal għanijiet orizzontali, filwaqt li l-għajnuna settorjali
naqset aktar fl-2010. Iċ-ċaqliqa żgħira ’l isfel
fin-nefqa tal-għajnuna mill-Istat għall-industrija u s-servizzi, li
naqset b’madwar 0,01% bejn l-2009 u l-2010, tista’ tiġi prinċipalment
spjegata permezz taż-żieda fin-nefqa għall-iżvilupp
reġjonali u għanijiet orizzontali oħra. Pereżempju,
il-Greċja, il-Litwanja u r-Rumanija taw aktar għajnuna reġjonali.
Franza, il-Lussemburgu u r-Renju Unit allokaw aktar għajnuna għal
għanijiet orizzontali oħra. F’dan l-istadju madankollu, għadu
kmieni wisq biex ikun magħruf jekk din iċ-ċaqliqa ’l isfel fuq
żmien qasir tan-nefqa għall-għajnuna mill-Istat
għall-industrija u s-servizzi tirrappreżentax il-bidu ta’ bidla
fit-tendenza fit-tul. Madankollu, din tindika li l-Istati Membri kienu
kapaċi jwieġbu b'mod flessibbli għall-ħtiġijiet
ekonomiċi li qed jinbidlu. Aktar żieda fl-għajnuna mogħtija
taħt l-eżenzjoni ta’ kategorija[18]
u l-użu kontinwat ta’ skemi minn Stati Membri jindikaw li dawn
l-għodod ippermettew lill-Istati Membri jagħtu għajnuna lil
għadd kbir ta' impriżi mingħajr aktar notifiki individwali
lill-Kummissjoni. 2.2. Għajnuna
mhux għall-kriżi mill-Istat allokata għal għanijiet
orizzontali ta’ interess komuni Ta’ min ifakkar li l-kunċett ta’
għajnuna orizzontali, li jkopri għajnuna li mhix mogħtija lil
setturi speċifiċi tal-ekonomija, ġej mit-Trattat[19]; dan iħalli spazju lill-Kummissjoni
biex l-għażliet ta' politika tagħmilhom skont liema
għajnuna mill-Istat tista’ tiġi kkunsidrata kompatibbli mas-suq
intern sabiex tipprovdi appoġġ effettiv għal għanijiet ta’
politika komuni. L-aktar prominenti hija l-għajnuna allokata
għar-riċerka, l-iżvilupp u l-innovazzjoni ("R&D&I"),
għall-ħarsien tal-ambjent u t-trawwim tal-konservazzjoni
tal-enerġija, u għall-promozzjoni tal-użu tal-enerġiji
rinnovabbli; u warajha hemm l-żvilupp reġjonali, l-għajnuna
lill-SMEs, il-ħolqien tal-impjiegi u l-promozzjoni tat-taħriġ. Fl-2010, total ta’ madwar EUR 51,9
biljun, jew 0,42% tal-PDG tal-UE, ngħata fil-forma ta’ għajnuna
allokata taħt l-għanijiet orizzontali, li kien jirrappreżenta 85%
tal-għajnuna totali għall-industrija u s-servizzi. L-aktar tliet
għanijiet prominenti, l-iżvilupp reġjonali (24,3%
tal-għajnuna totali għall-industrija u s-servizzi), il-ħarsien
ambjentali (23,7%) u l-R&D&I (17,4%) flimkien ammontaw għal madwar
żewġ terzi tal-għajnuna totali għall-industrija u
s-servizzi. Dan il-volum għoli ta’ għajnuna allokata
għall-għajnuna orizzontali huwa wkoll konsistenti mat-tendenza
ġenerali, li żdiedet b’madwar 2,2% bejn il-perjodi 2005-2007 u 2008-2010.
Barra minn hekk, f’19-il Stat Membru l-livell ta’ għajnuna allokata
għall-għanijiet orizzontali qabeż il-medja tal-UE, filwaqt li
kien taħt il-50% f’żewġ Stati Membri biss. Dwar l-għajnuna
settorjali tal-2010, li tinkludi għajnuna għas-salvataġġ u
għar-ristrutturar, il-volum tal-għajnuna rrappreżenta 15%
tal-għajnuna totali għall-industrija u s-servizzi; dan kompla jonqos
għal EUR 9,1 biljun jew 0,07% tal-PDG tal-UE. Ir-raġuni ewlenija
għal dan l-iżvilupp hija li qed tiġi mogħtija anqas
għajnuna kemm lis-setturi tal-manifattura kif ukoll dawk mhux
tal-manifattura. Globalment, din it-tendenza fit-tul turi li
l-Istati Membri komplew bl-isforzi tagħhom biex l-għajnuna jimmirawha
lejn għanijiet orizzontali ta’ interess komuni. 3. Għajnuna mill-Istat
fil-kuntest tal-kriżi finanzjarja u ekonomika 3.1. Tendenzi
fl-approvazzjoni u l-użu ta' miżuri ta’ għajnuna mill-Istat
għas-settur finanzjarju It-taqlib fis-swieq finanzjarji li ġie
kkawżat mill-kriżi finanzjarja tal-2008 sejjaħ għal
intervent estensiv mill-gvernijiet Ewropej sabiex jitrażżnu l-effetti
negattivi tax-xokk. L-għajnuna mill-Istat lill-istituzzjonijiet
finanzjarji kienet kruċjali bħala mezz li jerġa’ jqajjem
kunfidenza fis-settur finanzjarju bl-għan li tiġi evitata kriżi
sistemika. Fil-perjodu ta’ bejn l-1 ta’ Ottubru 2008[20] u l-1 ta’ Ottubru 2011
il-Kummissjoni approvat għajnuna għas-settur finanzjarju
għall-ammont globali ta’ EUR 4506,5 biljun (36,7% tal-PDG tal-UE).
Il-parti l-kbira tal-għajnuna ġiet awtorizzata fl-2008, meta
EUR 3457 biljun (27,7% tal-PDG tal-UE) ġew approvati,
prinċipalment taħt forma ta’ garanziji fuq bonds tal-banek u
obbligazzjonijiet għal perjodu qasir. Sa mill-2008 in-numru ta’ interventi
mill-Istat sottomessi għall-approvazzjoni tal-Kummissjoni gradwalment
naqas, filwaqt li safejn l-istrumenti kienu kkonċernati, l-għajnuna
approvata wara l-2008 aktar iffokat fuq ir-rikapitalizzazzjoni tal-banek u
s-salvataġġ tal-assi indeboliti milli fuq il-garanziji. Fil-perjodu 2008-2010[21], il-volum ta’ għajnuna effettivament
użata mill-Istati Membri kien ta’ EUR 1608 biljun[22], li jammonta għal 13,1% tal-PDG
tal-UE. Il-garanziji u l-miżuri ta’ likwidità jammontaw għal
EUR 1199 biljun jew 9,8% tal-PDG tal-UE. Il-bqija tal-għajnuna
użata tirreferi għar-rikapitalizzazzjoni u għall-miżuri
dwar l-assi indeboliti li jammontaw għal EUR 409 biljun (3,3% tal-PDG
tal-UE). L-għajnuna għall-kriżi
finanzjarja approvata/użata fl-2010 Fl-2010, il-Kummissjoni awtorizzat
għajnuna għall-ammont globali ta’ EUR 383,8 biljun, li
jirrappreżenta 3,1% tal-PDG tal-UE. L-għajnuna l-ġdida approvata
hija kkonċentrata fi ftit pajjiżi u tinvolvi r-rikapitalizzazzjoni
ta’ EUR 183,9 biljun, garanziji għal EUR 55,4 biljun,
is-salvataġġ tal-assi indeboliti għal EUR 77,9 biljun u
miżuri ta’ likwidità għal EUR 66,7 biljun. Il-volum
totali ta’ għajnuna użata fl-2010 għar-rikapitalizzazzjoni u
għall-assi indeboliti kien ta' EUR 121,3 biljun (1% tal-PDG tal-UE).
Injezzjonijiet ta’ kapital ġdid ammontaw għal EUR 87,8 biljun (0.7%
tal-PDG tal-UE) filwaqt li miżuri ta’ salvataġġ għall-assi
indeboliti ammontaw għal EUR 33,6 biljun (0.3% tal-PDG tal-UE).
Fir-rigward ta’ garanziji u miżuri ta’ likwidità l-medja tal-ammont
pendenti għas-sena 2010 kien ta’ EUR 983,9 biljun (8% tal-PDG) li
minnhom EUR 922 biljun (7.5% tal-PDG tal-UE) jirrigwardaw il-garanziji
filwaqt li EUR 61,9 biljun (0.5% tal-PDG tal-UE) jirrigwardaw miżuri
ta’ likwidità. 3.2. L-ammonti
approvati u l-ammonti li jintużaw taħt il-qafas temporanju Il-kuntest u l-ambitu Fis-17 ta’ Diċembru 2008,
il-Kummissjoni adottat il-Qafas Temporanju bħala tweġiba
għall-issikkar fl-aċċess għall-kreditu li l-kumpaniji
ffaċċjaw bħala riżultat tal-kriżi finanzjarja.
Għamlet enfasi, l-ewwel, fuq li l-kumpaniji jibqa’ jkollhom
aċċess għall-finanzjament u, it-tieni, fuq il-preparazzjoni ta’
bażi għal tkabbir sostenibbli fit-tul billi jkunu
mħeġġa l-investimenti. Barra minn hekk, uħud mir-regoli
tal-linji gwida eżistenti ġew ssimplifikati, pereżempju billi
ġew introdotti limiti ogħla għal investimenti fil-kapital ta’
riskju. Il-qafas temporanju hu miftuħ biex jappoġġja lis-setturi
kollha tal-ekonomija, iżda jeskludi l-għajnuna li tirrimedja
l-problemi strutturali diġà eżistenti u b’hekk ma japplikax għall-kumpaniji
li kienu f'diffikultà qabel il-kriżi. Il-qafas temporanju għandu jitqies
bħala parti mit-tweġiba usa’ tal-Kummissjoni għall-kriżi
ekonomika, jiġifieri l-Pjan Ewropew ta' Rkupru Ekonomiku[23]. Quddiem il-volatilità qawwija tas-swieq
finanzjarji, flimkien mal-inċertezza fuq il-perspettiva ekonomika,
il-Kummissjoni ddeċidiet fi tmiem l-2010 li testendi ċerti
miżuri stipulati fil-qafas temporanju għal sena, filwaqt li
tneħħi gradwalment il-possibbiltà li tingħata għajnuna
kumpatibbli limitata fl-ammont ta’ EUR 500,000 għal kull kumpanija, u
tissikka l-kundizzjonijiet li fuqhom l-Istati Membri jistgħu jagħtu
għajnuna taħt il-Qafas Tempornaju[24].
Miżuri approvati taħt il-qafas
temporanju Fl-2010, il-Kummissjoni awtorizzat 6 skemi
ġodda u miżura ġdida ta’ għajnuna ad hoc, u
estendiet 10 skemi taħt il-qafas temporanju[25], li ammontaw għall-volum totali
approvat ta’ għajnuna ta’ EUR 1,6 biljun (0.01% tal-PDG tal-UE). Hija
awtorizzat skema waħda għal għajnuna sa EUR 500,000
għal kull kumpanija (Stat Membru wieħed), skema waħda ta’
garanzija ssussidjata (Stat Membru wieħed), skema waħda ta’ kapital
ta’ riskju (Stat Membru wieħed) u tliet Stati Membri ffaċilitaw
l-attivitajiet tal-esportazzjoni permezz ta’ tliet skemi ta’ kreditu
għall-esportazzjoni. Barra minn hekk, għaxar miżuri ġodda
ta’ għajnuna ngħataw taħt il-qafas temporanju lill-bdiewa.
Fir-rigward tal-iskemi estiżi, hija awtorizzat tliet skemi (tliet Stati
Membri), żewġ miżuri ta’ garanzija sussidjata (żewġ
Stati Membri), żewġ skemi ta’ sussidji fuq imgħaxijiet tas-self
(żewġ Stati Membri) u tliet skemi li jiffaċilitaw l-attivitajiet
ta’ esportazzjoni. Sa mid-dħul fis-seħħ tal-qafas
temporanju, il-volum totali approvat li l-Kummissjoni awtorizzat taħt
id-dispożizzjonijiet tagħha ammonta għal madwar EUR 82,9
biljun[26]. L-ammont ta’ għajnuna użata fl-2010 Fl-2010, l-ammont ta’ għajnuna użata
taħt il-qafas temporanju kien ta’ madwar EUR 11,8 biljun, jew 0.09%
tal-PDG tal-UE. Il-parti l-kbira tal-Istati Membri ppreferew
li jużaw l-għodda tal-ammont limitat ta' għajnuna (madwar
EUR 5,3 biljun), segwita mill-garanziji ssussidjati (EUR 2,9 biljun),
mis-self b’rata tal-imgħax issussidjata (EUR 2,7 biljun) u
mill-għajnuna għal kapital ta’ riskju (EUR 0,77 biljun). Self
b’rata tal-imgħax issussidjata ma kienx użat għall-produzzjoni
ta’ prodotti ekoloġiċi. L-ammont totali tal-għajnuna użata taħt il-qafas
temporanju minn mindu daħal fis-seħħ huwa ta’ madwar EUR 32,8
biljun. Għal aktar dettall dwar l-għajnuna
mogħtija taħt il-qafas temporanju, ara l-kapitolu 3.2 tal-SWD. 4. It-tendenzi tal-infiq
għall-għajnuna mill-Istat
skont it-tip ta’ miżuri ta’ għajnuna 4.1. Numru
ta’ miżuri ta’ għajnuna Fl-2010, l-għadd ta’ miżuri
ġodda ta’ għajnuna eżentati bħala kategorija introdotti
mill-Istati Membri waqa’ b’mod sinifikanti, bi kważi n-nofs meta mqabbel
mal-2009. Madankollu, il-proporzjon ta’ għajnuna mogħtija permezz ta’
skemi ta’ eżenzjoni ta’ kategorija u ta’ għajnuna individwali
baqgħet stabbli. Ir-raġuni ewlenija l-għala n-numri naqsu huwa
l-fatt li l-Istati Membri ħolqu miżuri ġodda ta’ għajnuna
taħt ir-Regolament għal Eżenzjoni Ġenerali Sħiħa
("GBER"), li daħal fis-seħħ f’Settembru 2008, u
fil-biċċa l-kbira ssostitwixxa miżuri ta’ għajnuna
eżistenti li kienu parti mit-tneħħija gradwali tar-regolamenti
preċedenti għall-eżenzjoni ta’ kategorija tal-għajnuna
għall-impjiegi, tal-għajnuna għat-taħriġ u
tal-għajnuna lill-SMEs u parzjalment anki l-għajnuna reġjonali.
Restrizzjonijiet baġitarji nazzjonali fl-2010 setgħu kienu fattur
ulterjuri fir-riluttanza tal-Istati Membri biex joħolqu miżuri ta’
għajnuna ġodda taħt l-eżenzjoni ta’ kategorija. 4.2. Il-volumi
ta’ għajnuna - madwar 21% tal-għajnuna lill-industrija u s-servizzi
hija eżentata bħala kategorija L-għajnuna eżentata bħala
kategorija kompliet tiżdied b’madwar EUR 1 biljun biex waslet
għal madwar EUR 12,6 biljun, jew 0,1% tal-PDG tal-UE, li
jirrappreżenta 21% tal-għajnuna totali għall-industrija u
s-servizzi fl-2010. Il-kontributuri ewlenin għaż-żieda
fl-għajnuna eżentata bħala kategorija fl-2010 kienu
l-għajnuna reġjonali, l-R&D&I u l-għajnuna
għall-impjiegi, filwaqt li l-għajnuna eżentata bħala
kategorija allokata għall-SMEs u t-taħriġ kienet qiegħda
tonqos, iżda madankollu ma kinitx qed tikkumpensa
għaż-żieda totali fl-għajnuna eżentata bħala
kategorija. Ta’ min ifakkar li l-Istati Membri komplew ineħħu gradwalment
il-miżuri ta’ għajnuna li kienu mogħtija qabel taħt
ir-regolamenti għal eżenzjoni settorjali sħiħa, u
ssostitwewhom bil-miżuri korrispondenti GBER, fejn l-ambitu l-ġdid
tal-miżura kien spiss estiż kif issa huwa permess skont ir-regoli
tal-GBER. 5. L-infurzar tar-regoli
tal-għajnuna mill-Istat Għajnuna mhux skont il-liġi[27] Fil-perjodu 2000-2010, il-Kummissjoni
ħadet 980 deċiżjoni dwar għajnuna li ma kinitx skont
il-liġi. F'madwar 22% tal-każijiet tal-għajnuna li ma kinitx
skont il-liġi[28],
il-Kummissjoni interveniet billi ħadet deċiżjoni negattiva dwar
miżura ta' għajnuna mhux kompatibbli. Dawn id-deċiżjonijiet
negattivi normalment jitolbu lill-Istat Membru kkonċernat biex jirkupra
l-għajnuna li jkun ta kontra l-liġi. Fi 3% ta’ każijiet
oħra ta’ għajnuna mhux skont il-liġi[29], il-Kummissjoni rabtet kundizzjonijiet
mad-deċiżjonijiet. Din ir-rata ta' intervent ta' madwar 25%
għall-għajnuna mhux skont il-liġi hi madwar għaxar darbiet
ogħla mir-rata ta' deċiżjonijiet negattivi u kondizzjonali
f'każijiet debitament notifikati. Aktar min-nofs tal-interventi saru
fis-settur tal-industrija u s-servizzi, ftit inqas minn kwart saru
fl-agrikoltura, u l-kumplament fis-sajd, fit-trasport u fil-faħam. L-irkupru tal-għajnuna Sar aktar progress fit-twettiq ta'
deċiżjonijiet dwar l-irkupru pendenti. L-ammont totali ta’
każijiet pendenti ta’ rkupru kien ta’ 55 każ (meta mqabbel ma’ 94
każ fl-aħħar tal-2004). L-ammont ta’ għajnuna illegali u li
mhix kompatibbli rkuprata sa mis-sena 2000 kompla jiżdied u kien ta'
EUR 11,5 biljun fit-30 ta' Ġunju 2011. Dan ifisser li
l-perċentwal tal-għajnuna illegali u li mhix kompatibbli li għad
trid tkun irkuprata niżel minn 75% fi tmiem l-2004 għal madwar 18,6%
fit-30 ta' Ġunju 2011. L-infurzar tal-Liġi dwar
l-Għajnuna mill-Istat: Kooperazzjoni mal-qrati nazzjonali Fis-segwitu għall-Avviż dwar
l-Infurzar tal-Liġi dwar l-Għajnuna mill-Istat mill-Qrati Nazzjonali
tal-2009[30],
l-isforzi ta’ appoġġ ġew intensifikati: pakkett ta’
informazzjoni ġie ppubblikat fil-websajt tad-DĠ Kompetizzjoni[31], u ktejjeb[32]
ġie mqassam fuq medda wiesgħa sabiex jassisti lill-imħallfin
fix-xogħol tagħhom ta’ kuljum. Taħriġ speċifiku
għall-imħallfin nazzjonali ġie wkoll organizzat[33]. Monitoraġġ ex post Bid-dħul fis-seħħ tal-GBER,
għadd ferm akbar ta' miżuri ta' għajnuna mhumiex aktar
suġġetti għall-obbligu ta' notifika. Ir-riżultati wrew li
b’mod ġenerali, il-parti tal-arkitettura eżistenti tal-għajnuna
mill-Istat li tippermetti l-approvazzjoni tal-iskemi ta' għajnuna u li
tawtorizza lill-Istati Membri li jimplimentaw il-miżuri ta' għajnuna
taħt il-GBER u l-BERs għadha taħdem b'mod raġonevoli.
Madankollu, numru ta’ kwistjonijiet individwali u orizzontali li għandhom
jiġu segwiti mal-Istati Membri kienu identifikati. ANNESS Dokument ta' Ħidma tal-Persunal
tal-Kummissjoni "Fatti u ċifri dwar l-għajnuna mill-Istat
fl-Istati Membri tal-UE" [1] Filwaqt li f'edizzjonijiet preċedenti tat-Tabella
tal-Ħarifa ċifra waħda wriet il-volum ta’ għajnuna f'valur
assolut u f'valur relattiv (% tal-PDG), ir-rapport ta’ din is-sena jiddistingwi
bejn għajnuna mhux għall-kriżi, għajnuna
għall-kriżi lis-settur finanzjarju u għajnuna mogħtija
taħt il-Qafas tal-Komunità Temporanju u tipprovdi ċifri separati
(f'termini assoluti kif ukoll relattivi) skont il-ħtieġa. Għal
aktar dettall dwar il-metodoloġija fin-nota korrispondenti tad-Dokument
ta’ Ħidma tal-Persunal mehmuż ma' dan ir-Rapport. [2] Biex tiġi kkalkulata l-għajnuna għall-kriżi, din
it-Tabella ta’ Valutazzjoni, skont id-Dokument ta’ Ħidma tal-Persunal
tal-Kummissjoni dwar l-effetti tar-regoli temporanji għall-għajnuna
mill-Istat adottati fil-kuntest tal-kriżi finanzjarja u ekonomika
(http://ec.europa.eu/competition/publications/reports/temporary_stateaid_rules_en.html), tuża biss żwġ kunċetti: l-ammont impenjat għall-għajnuna u l-ammont użat
għall-għajnuna. L-ammont
impenjat (il-volum ta’ għajnuna mirhuna) jirrappreżenta l-ammont
massimu globali ta' miżuri għall-għajnuna mill-Istat mwaqqfa
mill-Istati Membri u approvati mill-Kummissjoni. L-ammont tal-għajnuna użat jesprimi l-volum effettiv
tal-miżura ta’ għajnuna li Stati Membri implimentaw. Il-metodoloġija użata
għall-kalkolu tal-għajnuna għall-kriżi hija spjegata aktar
fid-Dokument ta’ Ħidma tal-Persunal tal-Kummissjoni. Għal kull għajnuna oħra, b’żieda mal-ammonti
approvati u l-ammonti użati, l-Istati Membri, bħal f’Tabelli ta’
Valutazzjoni preċedenti, irrapportaw ukoll l-element ta’ għajnuna u
n-nefqa totali espressi kif xieraq, kemm f’volum assolut u kemm f’% tal-PDG,
sabiex jippreżentaw sett komparabbli ta’ informazzjoni. [3] It-test konsolidat tal-Komunikazzjoni mill-Kummissjoni — Qafas
Temporanju tal-Komunità għal miżuri ta' għajnuna mill-Istat biex
isostnu l-aċċess għall-finanzjament fil-kriżi finanzjarja u
ekonomika attwali ; ĠU C 83, 7.4.2009,
p. 1; kif emendat fil-ĠU C 261, 31.10.2009,
p. 1 u l-ĠU C 303,
tal-15.12.2009, p. 6. [4] Ara http://www.eftasurv.int/press--publications/tabelli/state-aid-scoreboards/ [5] It-total ikopri għajnuna għall-manifattura,
għas-servizzi, għall-faħam, għall-agrikoltura,
għas-sajd u parti mis-settur tat-trasport, iżda jeskludi,
minħabba n-nuqqas ta’ dejta paragunabbli, għajnuna għas-settur
ferrovjarju u għajnuna għall-kumpens ta’ servizzi ta’ interess
ekonomiku ġenerali. L-ammonti
ta’ għajnuna jirreferu għall-element ta’ għajnuna (jew
l-ekwivalenti għas-sussidju gross fil-każ ta' garanziji jew self) li
jinsab f’miżura ta’ għajnuna mill-Istat sakemm ma jingħadx mod
ieħor (għal aktar dettalji ara n-nota metodoloġika tal-SWD). [6] L-UE tfisser l-Istati Membri kollha tal-UE. [7] Sabiex tingħata stampa sħiħa tal-għajnuna
għall-kriżi, il-perjodu sħiħ li jibda mid-data
tal-adozzjoni tal-miżuri tal-Kummissjoni għall-kriżi sad-data
tal-għeluq tal-1 Ottubru 2011, huwa użat bħala
l-perjodu ta’ referenza għal din il-parti tar-rapport. [8] L-UE-15 tikkonsisti fl-Istati Membri li ssieħbu fl-UE qabel l-2004. [9] Il-faħam, bħala parti mill-għajnuna settorjali, u
għaldaqstant inkluż fl-għajnuna għall-industrija u
s-servizzi, ammonta għal EUR 2,9 biljun li rrappreżenta 4,9%
mill-għajnuna totali lill-industrija u s-servizzi. [10] Filwaqt li informazzjoni dwar l-għajnuna lill-industrija u
s-servizzi hija miġbura mill-Istati Membri skont l-Anness III A
tar-Regolament tal-Kummissjoni (KE) Nru 794/2004 (ĠU L 140, 30.4.2004,
p. 1), l-informazzjoni dwar l-għajnuna lill-ferroviji hija miġbura
skont kunċett differenti li għalhekk ma jippermettix li din id-dejta
tingħaqad ma’ xi totali oħra. [11] Waqt l-abbozzar ta’ dan ir-rapport, informazzjoni dwar sussidji
lill-ferroviji ġiet sottomessa mill-Awstrija, il-Belġju d-Danimarka,
l-Estonja, Spanja, il-Finlandja, Franza, l-Italja, il-Lussemburgu, il-Litwanja,
il-Latvja, il-Portugall u l-Isvezja. [12] Għal aktar dettall dwar l-għajnuna lis-settur tat-trasport
ara l-paragrafu 2.3.5 tal-SWD. [13] Sors: DĠ Kompetizzjoni; Ċifri tal-PDG: Eurostat. [14] Aġġornament tal-Ħarifa 2010, COM (2010) 701; Aġġornament tal-Ħarifa 2009, COM (2009)
661 finali. Kopja tista’
titniżżel mill-websajt tad-DĠ Kompetizzjoni:
http://ec.europa.eu/competition/state_aid/studies_reports/archive/scoreboard_arch.html.
[15] Il-perjodu 2005-2007. [16] Il-perjodu 2008-2010. [17] Ara l-figura 6 fl-SWD. [18] Għal aktar dettall ara l-kapitolu 4. [19] Pereżempju, l-Artikolu 107(3)(a) fir-rigward
tal-għajnuna reġjonali, l-Artikolu 107(3)(b) dwar l-eżekuzzjoni
ta’ proġett importanti ta' interess komuni Ewropew. [20] Iċ-ċifri tal-2008 fihom il-baġit approvat
għar-rikapitalizzazzjoni tan-Northern Rock fl-2007. [21] Iċ-ċifri tal-2008 fihom il-baġit użat
għar-rikapitalizzazzjoni tan-Northern Rock fl-2007. [22] Inkluża l-għajnuna ġdida kif ukoll il-medja ta’ ammonti
dovuti. [23] Adottat f’Novembru 2008. [24] Komunikazzjoni tal-Kummissjoni — Qafas temporanju tal-Unjoni għal
miżuri ta' għajnuna mill-Istat biex isostnu l-aċċess
għall-finanzjament fil-kriżi finanzjarja u ekonomika attwali; ĠU C 6, 11.1.2011, p.5. [25] Għal aktar dettall ara l-Kapitolu 3.2 tal-SWD. [26] Id-data tal-għeluq hija l-1 ta’ Ottubru 2011. [27] L-Artikolu 108(3) tat-TFUE jobbliga lill-Istati
Membri mhux biss li jinnotifikaw il-miżuri tal-għajnuna mill-Istat
lill-Kummissjoni qabel l-implimentazzjoni tagħhom, iżda wkoll li
jistennew ir-riżultati tal-investigazzjoni tal-Kummissjoni qabel ma
jimplimentaw il-miżuri nnotifikati. Meta wieħed minn dawn l-obbligi
ma jiġix irrispettat, il-miżura tal-għajnuna mill-Istat titqies
bħala mhux awtorizzata. [28] 217-il każ. [29] 31 każ. [30] Avviż tal-Kummissjoni dwar l-infurzar tal-liġi
dwar l-għajnuna mill-Istat mill-qrati Nazzjonali (ĠU C 85, 9.4.2009,
p. 1). [31] http://ec.europa.eu/competition/court/state_aid.html [32] http://ec.europa.eu/competition/publications/state_aid/national_courts_booklet_en.pdf [33] Permezz tal-punt ta’ kuntatt, ec-amicus-state-aid@ec.europa.eu
ġew trattati bosta talbiet minn imħallfin nazzjonali għal
informazzjoni u pariri.