52011DC0639

RAPPORT MILL-KUMMISSJONI LILL-PARLAMENT EWROPEW U LILL-KUNSILL

dwar l-implimentazzjoni tal-applikazzjonijiet ta’ telerilevament u dwar l-użu tar-riżorsi finanzjarji magħmulin disponibbli għaliha skont ir-Regolament tal-Kunsill (KE) Nru 78/2008 (it-tieni rapport interim)

DAħLA

Informazzjoni dettaljata dwar l-użu tal-art agrikola u l-kundizzjonijiet tal-uċuħ hija essenzjali għall-kwalità tar-rendiment u għall-previżjonijiet tal-produzzjoni agrikola. Informazzjoni bħal din hija ta’ użu partikolari għall-monitoraġġ tas-suq u l-immaniġġjar ta’ miżuri relatati mas-suq skont l-Organizzazzjoni Komuni tas-Suq unika. F’dan il-kuntest, l-Unjoni Ewropea għamlet sforzi sostanzjali biex tiżviluppa u ttejjeb teknoloġiji u mudelli innovattivi speċifikament relatati ma’ applikazzjonijiet ta’ telerilevament. L-esperjenza miġbura wriet li t-telerilevament jipprovdi informazzjoni indipendenti ta’ kwalità għolja li ma tistax tinkiseb minn statistika agrikola tradizzjonali u minn sistemi ta’ previżjoni.

Ir-Regolament tal-Kunsill (KE) Nru 78/2008[1] jipprovdi l-qafas legali għal dawn l-attivitajiet ta’ telerilevament għall-perjodu 2008-2013.

L-applikazzjonijiet ta’ telerilevament sostnuti skont dan il-qafas jipprovdu informazzjoni utli lill-Kummissjoni Ewropea, lill-Istati Membri interessati, lill-istituti tar-riċerka u lil utenti oħra, permezz tat-tixrid ta’ prodotti differenti. Sa mill-ħolqien tagħha, is-sistema baqgħet tittejjeb kontinwament. Minbarra l-objettiv primarju li jinkisbu previżjonijiet ta’ rendiment u ħsad, is-sistema tipprovdi wkoll ħjiel utli dwar oqsma oħra rilevanti għall-agrikoltura tal-UE bħat-tibdil fil-klima.

L-Artikolu 4 tar-Regolament (KE) Nru 78/2008 jipprovdi li l-Kummissjoni għandha tissottometti rapport finali mhux aktar tard mill-31 ta’ Lulju 2013 dwar l-implimentazzjoni tal-miżuri ta’ telerilevament u dwar l-użu tar-riżorsi finanzjarji magħmulin disponibbli għaliha skont ir-Regolament. Dan it-tieni rapport interim qed isir minħabba l-kontinwazzjoni ta’ dawk il-miżuri fil-qafas tal-PAK wara l-31 ta’ Diċembru 2013.

Ir-rapport jelabora dwar il-possibbiltà ta’ xenarju għall-kontinwazzjoni tas-sistema eżistenti ta’ previżjoni ta’ rendiment tal-uċuħ għall-UE, MARS, u ta’ estensjoni ta’ kopertura globali usa’ bl-objettivi li previżjonijiet ta’ rendimenti għall-UE jitjiebu aktar u li jkun hemm kontribuzzjoni għall-inizjattivi internazzjonali mnedijin mill-ministri tal-agrikoltura tal-G20.

IS-SISTEMA TA’ PREVIżJONI TA’ RENDIMENT TAL-UċUħ, MARS

Is-Sistema ta’ Previżjoni ta’ Rendiment tal-Uċuħ, MARS (MCYFS) inbdiet fl-1988 bħala proġett pilota għal għaxar (10) snin biex tagħmel previżjonijiet ta’ rendiment u ta' ħsad tal-uċuħ. L-attività, li dak iż-żmien kienet tissejjaħ Monitoraġġ tal-Agrikoltura b’Telerilevament (mqassra MARS), kienet ikkonċentrata fuq il-valutazzjoni ta’ rendimenti tal-uċuħ u ta’ volumi ta’ produzzjoni ta’ wċuħ varji fl-UE, abbażi ta’ analiżi meteoroloġika, indikaturi ta’ tkabbir ta’ wċuħ simulati agrometeoroġikament, dejta ta’ riżoluzzjoni baxxa permezz tas-satellita u analiżi ta’ statistika.

Mill-1999 ’il quddiem din l-attività kienet titwettaq skont il-bażi legali tad-Deċiżjoni 1445/2000/KE għall-perjodu 1999-2003[2] u l-estensjoni tagħha għall-perjodu 2004-2007 bid-Deċiżjoni 2066/2003/KE[3]. Mill-2008 sal-2013, l-attività hija implimentata skont ir-Regolament tal-Kunsill (KE) Nru 78/2008. L-MCYFS titħaddem fi ħdan l-Azzjoni AGRI4CAST fl-Istitut għall-Ambjent u s-Sostenibbiltà (IES) taċ-Ċentru Konġunt Għar-Riċerka (JRC).

L-MCYFS hija għodda ta’ analiżi kumplessa, integrata li tindirizza l-objettivi stabbiliti fir-Regolament, b’mod aktar speċifiku l-monitoraġġ tal-kundizzjonijiet tal-uċuħ, tar-rendimenti u tal-produzzjoni agrikola.

Is-sistema tikkonsisti f’diversi moduli indipendenti, li huma integrati biex isir monitoraġġ ta’ kif jikbru l-uċuħ u biex jinkisbu previżjonijiet ta’ rendimenti tal-uċuħ. Mil-lat tekniku, l-MCYFS tinkludi: 1) il-manutenzjoni ta’ bażi tad-dejta meteoroloġika (ara l-Artikolu 1(2)(a) tar-Regolament); 2) l-applikazzjoni ta’ mudelli agrometeoroloġiċi (ara l-Artikolu 1(2)(d)); 3) l-ipproċessar ta’ dejta ta’ riżoluzzjoni baxxa permezz tas-satellita (ara l-Artikolu 1(2)(a)); 4) analiżi tal-istatistika u previżjonijiet tar-rendimenti tal-uċuħ ewlenin f’livell nazzjonali mal-UE kollha (ara l-Artikolu 1(2)(b)), kif ukoll għodod ta’ viżwalizzazzjoni. L-MCYFS titmexxa b’mod operazzjonali billi tkopri l-Kontinent Ewropew kollu, il-pajjiżi tal-Magreb u t-Turkija. L-uċuħ koperti mill-mudelli ta’ simulazzjoni huma l-qamħ artab, il-qamħ durum, ix-xgħir tax-xitwa u tar-rebbiegħa, il-qamħirrun, iż-żerriegħa tal-kolza, il-ġirasol, il-patata, il-pitravi, il-ħaxix tal-mergħa, ir-ross u ċereali oħra.

Informazzjoni aktar dettaljata dwar is-sistema u dak li tipproduċi tista’ tinkiseb mid-Dokument ta’ Ħidma tal-Persunal tal-Kummissjoni li jakkumpanja dan id-dokument.

(1) Bażi tad-dejta meteoroloġika

Dejta meteoroloġika tinġabar minn stazzjonijiet meteoroloġiċi mal-Ewropa kollha, u mbagħad tiġi eżaminata għall-kwalità u pproċessata aktar, u fl-aħħar nett tiġi analizzata. Bħala tali din id-dejta meteoroloġika tista’ tintuża biex tagħti bidu għal twissijiet ta’ riskji (eż. individwazzjoni ta’ kundizzjonijiet anormali tat-temp matul xahar partikolari). Barra minn dan, dejta dwar tbassir tat-temp miċ-Ċentru Ewropew għat-Tbassir tat-Temp fuq Terminu ta' Żmien Medju tiġi analizzata biex jitħejjew prospetti dwar kundizzjonijiet tat-temp li jaffettwaw l-art agrikola.

(2) Mudelli agrometeoroloġiċi użati għas-simulazzjoni tat-tkabbir tal-uċuħ

Mudelli agrometeoroloġiċi jintużaw biex id-dejta meteoroloġika tinbidel fi stimi dwar il-produzzjoni tal-bijomassa tal-uċuħ. L-għodod li jintużaw huma l-mudell CGMS (Crop Growth Monitoring System) jiġifieri l-mudell WOFOST (World Food Study) adattat fuq skala Ewropea, il-mudell LINGRA għall-mergħat u l-mudell WARM għar-ross (Water Accounting Rice Model).

Biex jinħolqu s-simulazzjonijiet tintuża informazzjoni addizzjonali, bħall-parametri tal-ħamrija, il-kalendarji tal-uċuħ, il-prattiki tal-uċuħ u l-parametri tal-uċuħ. F’dan il-livell, jiġu prodotti ħafna indikaturi/predikaturi speċifiċi għall-uċuħ (eż. bijomassa potenzjali) u jiġu ttrasferiti għall-analiżi statistika għall-produzzjoni ta’ previżjonijiet ta’ rendimenti kwantitattivi. Dawn l-elementi jikkontribwixxu wkoll għall-valutazzjoni tal-kundizzjonijiet tal-uċuħ (l-Artikolu 1(1)(b) tar-Regolament). Ir-riżultati miksuba jinkludu mapep li jindikaw temperatura estrema fi stadju partikolari tal-uċuħ, simulazzjonijiet ta’ bijomassa u produzzjoni ta’ qamħ, stimi tar-riżerva attwali tal-umdità fil-ħamrija, l-istadju tal-iżvilupp tal-uċuħ f’xahar partikolari, u d-diverġenza mill-medja fuq perjodu ta' żmien twil f’deċennju partikolari jew f’perjodu fl-istaġun tat-tkabbir għal kwalunkwe indikatur agrometeoroloġiku.

(3) Dejta ta’ riżoluzzjoni baxxa permezz tas-satellita

L-applikazzjonijiet ta’ telerilevament jiddaħħlu fis-sistema fil-livelli kollha u jikkontribwixxu biex jitjiebu l-mudelli ta’ previżjoni agrikola, kif ukoll biex jiġu stabbiliti mudelli abbażi tar-reġjuni. Informazzjoni minn satelliti meteoroloġiċi tintuża b’żieda mad-dejta mwassla minn stazzjonijiet meteoroloġiċi (eż. radjazzjoni mkejla minn satelliti fil-livell ta’ riżoluzzjoni ta’ 5 km). L-informazzjoni b’telerilevament tiġi pproċessata biex jiġu prodotti indikaturi “mkejla” ta’ veġetazzjoni, li jkunu jistgħu jitqabblu mal-indikaturi agrometeoroloġiċi u jintużaw għall-analiżi statistika. Jintużaw rilevamenti bis-satellita ta’ riżoluzzjoni li tvarja minn baxxa sa medja: Veġetazzjoni SPOT/NOAA-AVHRR (riżoluzzjoni ta’ madwar 1 km) u MODIS (riżoluzzjoni ta’ madwar 300-500 m)[4].

(4) Analiżi statistika

L-indikaturi miksubin mill-bażi tad-dejta meteoroloġika, mill-bażi tad-dejta agrometeoroloġika u mill-bażi tad-dejta ta’ telerilevament jitqabblu mas-serje kronoloġika tar-rendimenti u jiġu analizzati b’metodi statistiċi (eż. regressjoni jew analiżi ta’ xenarju). Ir-riżultati finali jkunu previżjonijiet kwantitattivi ta’ rendimenti li, flimkien mal-analiżi ta’ dak li jirriżulta kif imsemmi hawn fuq, jiġu ppubblikati fil-bullettini MARS. Dejta disponibbli fis-sistema tkopri perjodu twil ta’ żmien, li jibda mill-1975.

(5) Għodod ta’ viżwalizzazzjoni u ta' tixrid tar-riżultati

Il-bażijiet tad-dejta (informazzjoni meteoroloġika, informazzjoni agrometeoroloġika, informazzjoni ta’ telerilevament) jistgħu jkunu esplorati minn min jużahom permezz tal-mezzi ta’ informazzjoni. AGRI4CAST iżżomm portal fuq l-internet fejn dejta ta’ telerilevament tista’ tintwera fuq skrin u titniżżel, u portal fejn wieħed jista’ jara u jniżżel l-informazzjoni meteoroloġika u agrometeoroloġika fil-forma ta’ mapep elettroniċi. Huwa possibbli wkoll li titniżżel l-analiżi dwar il-kundizzjonijiet tal-uċuħ u l-istimi tar-rendimenti. L-elementi kollha elenkati hawn fuq jintużaw għat-tħejjija ta’ bullettini u għal studji speċifiċi dwar kundizzjonijiet klimatiċi (ara l-Artikolu 1(2)(c)). Dawn jipprovdu l-analiżi tal-qagħda tal-uċuħ f’reġjuni differenti tal-UE, mapep tat-temp u indikaturi tal-uċuħ u aspettattivi ta’ rendimenti. Il-Bullettin MARS jiġi ppubblikat regolarment fuq il-karta u fuq l-internet matul l-istaġun ewlieni ta’ tkabbir.

IMPLIMENTAZZJONI

Implimentazzjoni ġenerali

Għall-kontinwazzjoni tas-servizzi operazzjonali mill-2008 sal-2013 skont ir-Regolament tal-Kunsill (KE) Nru 78/2008, tnieda proġett ġdid, imsejjaħ MARSOP3. Dan jiffoka fuq il-provvediment ta’ prodotti operazzjonali kważi f’ħin reali lill-JRC għall-monitoraġġ tal-produzzjoni u r-rendiment agrikolu fl-Ewropa. F’Awwissu 2007 kienet ippubblikata sejħa għall-offerti (Attivitajiet operazzjonali għal azzjonijiet MARS -MARSOP3- 2008-2013, Avviż tal-Kuntratt Nru 2007/S 154-191094) fis-suppliment ta' Il-Ġurnal Uffiċjali tal-Unjoni Ewropea . Wara l-evalwazzjoni tal-offerta għal-Lott I (dejta meteoroloġika) u għal-Lott II (akkwiżizzjoni u pproċessar ta’ dejta permezz tas-satellita) u wara l-opinjoni favorevoli tal-Grupp Konsultattiv dwar l-Akkwist Pubbliku, ġie ffirmat kuntratt ma’ konsorzju mmexxi minn Alterra BV. Abbażi tal-prodotti operazzjonali kkonsenjati skont dan il-kuntratt, il-JRC janalizza l-kundizzjonijiet tal-uċuħ tar-raba’ u jħejji stimi ta’ rendimenti u produzzjoni. Din l-informazzjoni ssir disponibbli lill-Kummissjoni Ewropea, lill-Istati Membri u liċ-ċittadini tal-UE.

Implimentazzjoni fir-rigward tal-Artikolu 1 tar-Regolament tal-Kunsill (KE) Nru 78/2008

L-Artikolu 1 tar-Regolament tal-Kunsill (KE) Nru 78/2008 jistabbilixxi l-objettivi għall-implimentazzjoni ta’ miżuri ta’ telerilevament (l-Artikolu 1(1)) u jagħti dettalji dwar il-miżuri li għandhom jittieħdu (l-Artikolu 1(2)). Għal referenza aktar faċli, id-deskrizzjoni tal-implimentazzjoni tal-miżuri ssegwi l-istruttura tal-Artikolu 1.

Għanijiet tal-miżuri implimentati (l-Artikolu 1(1))

L-Artikolu 1(1)(a): mmaniġġjar ta’ swieq agrikoli

L-attività twassal previżjonijiet ta’ rendimenti tal-uċuħ b’mod indipendenti, f’waqthom, xjentifiċi u traċċabbli għall-Istati Membri kollha u għall-pajjiżi ġirien tal-UE għall-uċuħ li jinħadmu magħżulin. Din l-informazzjoni tintuża mis-servizzi tal-Kummissjoni għall-finijiet ewlenin li ġejjin: 1) aġġornament tal-karti tal-bilanċi tal-provvista tal-uċuħ; 2) valutazzjoni ta’ kundizzjonijiet klimatiċi u impatti potenzjali ta’ avvenimenti partikolari tat-temp fl-Istati Membri jew fir-reġjuni (eż. l-impatt ta’ ġlata li tasal tard); 3) monitoraġġ tal-kundizzjonijiet tal-uċuħ f’pajjiżi terzi. Jiġu pprovduti wkoll previżjonijiet ta’ rendimenti tal-AGRI4CAST lis-Sistema ta’ Stima Bikrija tal-Eurostat. L-indipendenza u l-affidabbiltà tar-riżultati kif imħejjijin minn AGRI4CAST jitqiesu bħala assi importanti mis-servizzi tal-Kummissjoni. L-analiżi statistika mwettqa bl-indikaturi tat-tkabbir tal-uċuħ hija trasparenti, traċċabbli u maħżuna għas-simulazzjonijiet kollha tal-uċuħ u għas-snin kollha. Hemm ipprovdut sett ta’ indikaturi statistiċi (eż. valur kwadratiku medju tal-iżball għal intervalli differenti ta’ kunfidenza, devjazzjoni standard) għal kull wieħed mill-mudelli. Fi tmiem il-kampanja ta’ previżjoni, analiżi tal-iżbalji tqabbel il-previżjonijiet ta’ rendimenti tal-uċuħ mar-rendimenti attwalment osservati biex jiġi kkwantifikat l-iżball fil-previżjonijiet u biex tiġi evalwata l-prestazzjoni tal-previżjonijiet.

Għall-informazzjoni, l-iżball globali, imkejjel bħala l-iżball perċentwali assolut medju tal-previzjoni fi tmiem il-kampanja għall-UE-27 għax-xhur kollha u għaċ-ċereali kollha flimkien, kien ta’ 1.6 % għall-2007, -3.3 % għall-2008, -1.2 % għall-2009 u 1.2 % għall-2010, rispettivament, b’valuri negattivi li jindikaw sottostima, u b’valuri pożittivi li jindikaw sovrastima ta’ rendimenti rrapportati (rendimenti rrapportati tal-2009 u tal-2010 għadhom preliminari).

L-Artikolu 1(1)(b): monitoraġġ tal-kundizzjonijiet tal-uċuħ u stimi

Minbarra l-previżjonijiet ta’ rendimenti, jiġu mmonitorjati mill-qrib il-kundizzjonijiet tal-uċuħ matul l-istaġun tat-tkabbir. Informazzjoni meteoroloġika u ta’ telerilevament tiġi analizzata u relatata ma’ informazzjoni rilevanti dwar l-uċuħ abbażi tar-riżultati ta’ mmudellar bijofiżiku (eż. l-impatt ta’ mewġa tas-sħana, perjodu ta’ nixfa jew ta' kesħa f’ċerti stadji tal-iżvilupp tal-uċuħ). Barra minn dan, ir-riżultati mill-mudell tat-tkabbir tal-uċuħ jintużaw direttament biex ikunu vvalutati kundizzjonijiet tal-uċuħ (eż. simulazzjoni tal-indiċi tal-erja tal-weraq jew tal-bijomassa). Dan il-monitoraġġ ikopri lill-UE u japplika għall-uċuħ inklużi kollha.

L-Artikolu 1(1)(c): promozzjoni tal-aċċess għall-istimi

Aċċess miftuħ għall-prodotti varji kollha huwa ggarantit mill-JRC u mill-konsorzju tal-MARSOP3. Il-websajt tal-MARSOP toffri firxa wiesgħa ta’ informazzjoni (riżultati mill-miżuri applikati tat-telerilevament, prodotti tal-mudelli tat-tkabbir tal-uċuħ, konnessjonijiet mal-bullettini). Dejta u immaġnijiet mis-satellita jinġabru f’server ta’ immaġnijiet fejn wieħed ikun jista' jara u jniżżel id-dejta. Huwa possibbli wkoll li tintalab u titniżżel dejta meteoroloġika mill-websajt tal-MARSOP.

L-Artikolu 1(1)(d): l-iżgurar ta' segwitu teknoloġiku tas-sistema agrometeoroloġika

Il-JRC iwettaq segwitu tekniku kostanti biex jiżgura l-kontinwazzjoni tas-sistema u biex jiggarantixxi li l-metodoloġiji applikati jkunu robusti xjentifikament. Dawn il-metodoloġiji jinkludu l-interpolazzjoni tad-dejta meteoroloġika għal fuq raster, id-derivazzjoni tal-miżuri tat-telerilevament biex jiġi deskritt kif jikbru l-uċuħ jew l-analiżi statistika mwettqa biex jinkisbu l-istimi tar-rendimenti tal-uċuħ.

Miżuri li għandhom jiġu implimentati (L-Artikolu 1(2))

L-Artikolu 1(2)(a): ġbir u xiri ta’ dejta meteoroloġika u dejta mis-satellita

Il-ġbir u x-xiri ta’ dejta meteoroloġika jinkludu aktar minn 3500 stazzjon li jwasslu informazzjoni dwar parametri tat-temp, li jiddaħħlu fl-MCYFS kuljum. Dan is-servizz jinżamm b’mod permanenti. Barra minn hekk dejta ta’ telerilevament disponibbli mingħajr ħlas minn satelliti ta’ riżoluzzjoni baxxa u medja (riżoluzzjoni ta’ pixels minn 1 km sa 300 m) biex tintuża għall-monitoraġġ tal-veġetazzjoni, tinkiseb, tinħażen u tiġi pproċessata u analizzata ulterjorment.

L-Artikolu 1(2)(b): infrastruttura u websajt tad-dejta spazjali

L-infrastruttura tad-dejta spazjali tinkludi t-teknoloġija, l-istandards, ir-riżorsi umani u l-attivitajiet relatati meħtieġa biex tinkiseb, tiġi pproċessata, titqassam, tintuża, tinżamm u tinħażen id-dejta spazjali. Din l-infrastruttura tlestiet flimkien mal-MCYFS, u kienet tinvolvi timijiet mill-JRC u kienet skont il-kuntratt tal-MARSOP3. Din tkopri settijiet ta' dejta spazjali għall-Ewropa kollha fi skali differenti. Id-dejta tiġi pproċessata biex taqdi l-ħtiġijiet ta’ monitoraġġ tal-kundizzjonijiet tal-uċuħ u ta’ previżjoni tal-produzzjoni tal-uċuħ. Ir-riżultati u l-informazzjoni mis-sorsi differenti (eż. it-telerilevament) ikunu disponibbli permezz ta’ websajts u portals differenti fuq l-internet.

L-infrastruttura hija konformi mal-qafas stabbilit mid-Direttiva dwar l-Infrastruttura għall-Informazzjoni Ġeografika fil-Komunità Ewropea (INSPIRE)[5]: Id-dejta spazjali tingħata referenza ġeografika skont il-projezzjoni tal-INSPIRE, id-deskrizzjoni tal-metadejta ssegwi l-prinċipji tal-INSPIRE u se tiġi armonizzata aktar.

L-Artikolu 1(2)(c): studji speċifiċi dwar kundizzjonijiet klimatiċi

Is-sistema tippermetti t-tħejjija ta’ studji speċifiċi dwar il-kundizzjonijiet klimatiċi permezz ta’ serje kbira ta’ informazzjoni disponibbli li tkopri l-aspetti rilevanti kollha. L-istudji speċifiċi li ġejjin tħejjew minn meta daħal fis-seħħ ir-Regolament tal-Kunsill (KE) Nru 78/2008:

- Analiżi tal-impatt tan-nixfa fir-rebbiegħa u s-sajf u tax-xita abbundanti f’Awwissu 2008 fuq il-produzzjoni taċ-ċereali tax-xitwa fil-Latvja

- Analiżi tal-impatt fuq l-agrikoltura ta’ kundizzjonijiet estremi tat-temp matul diversi jiem f’Lulju u f’Awwissu 2008 fis-Slovenja

- Disponibbiltà ta' ilma għat-tkabbir tar-ross fi Spanja fl-2008 (analiżi ta’ nżul akkumulat ta’ xita)

- Analiżi tal-impatt tal-ġlata li seħħet fix-xitwa tal-2009 fuq ċereali tax-xitwa fl-Ewropa

- Analiżi tal-kundizzjonijiet tat-temp matul ir-rebbiegħa u s-sajf tal-2010 u tal-impatt li seta’ kellhom fuq il-produzzjoni agrikola fil-Belġju

- Analiżi tal-kundizzjonijiet tat-temp matul il-ħarifa u x-xitwa tal-2009/10 u tal-impatt li seta’ kellhom fuq il-produzzjoni agrikola fi Spanja

- Analiżi tal-kundizzjonijiet tat-temp matul ir-rebbiegħa u s-sajf tal-2010 u tal-impatt li seta’ kellhom fuq il-produzzjoni agrikola fl-Ungerija

- Analiżi tal-kundizzjonijiet tat-temp tal-ħarifa u x-xitwa tal-2009/10 u tal-impatt li seta’ kellhom fuq il-produzzjoni agrikola fl-Italja

- Analiżi tal-kundizzjonijiet tat-temp matul ix-xitwa u r-rebbiegħa tal-2010 u tal-effett li seta’ kellhom fuq il-produzzjoni agrikola fil-Litwanja

- Analiżi tal-kundizzjonijiet ta’ nżul ta’ xita fl-2010 u tal-impatt li seta’ kellhom fuq il-produzzjoni agrikola fir-Rumanija

- Analiżi tal-kundizzjonijiet tat-temp matul l-istaġun tal-uċuħ fl-2009/2010 u tal-impatt li seta’ kellhom fuq l-agrikoltura fil-Lussemburgu

L-Artikolu 1(2)(d): aġġornament ta’ mudelli agrometeoroloġiċi u ekonomiċi

Minbarra t-tmexxija operazzjonali tas-sistema, mudelli u bażijiet tad-dejta relatati jiġu aġġornati kontinwament. Il-bażi tad-dejta bħalissa fiha tliet terra bytes ta’ informazzjoni. Minn meta r-Regolament tal-Kunsill daħal fis-seħħ, kien hemm titjib kbir: In-netwerk tal-istazzjon meteoroloġiku ġie ddensifikat biex tiġi żgurata sistema ta’ monitoraġġ aħjar; ir-riżoluzzjoni tal-grilja ta’ 50 km x 50 km li kien hemm qabel għall-analiżi spazjali ttejbet għal 25 km x 25 km; twettqu kalibrazzjonijiet ġodda tal-uċuħ; u ġew irrilaxxati verżjonijiet ġodda tal-bażi tad-dejta u tas-softwer.

PRODOTTI MISTENNIJA U RIżULTATI

Il-Kummissjoni Ewropea, l-Istati Membri u partijiet interessati oħra jirċievu l-prodotti differenti mistennija (deliverables); ir-rapporti u l-bullettini minn naħa waħda u s-servizzi ta’ informazzjoni u dejta min-naħa l-oħra. Il-prodotti kollha huma disponibbli b’mod elettroniku (l-Artikolu 2 tar-Regolament) u parzjalment f’format fuq il-karta.

Rapporti u Bullettini

Il-bullettin ta’ monitoraġġ tal-uċuħ għall-Ewropa joffri, kważi f’ħin reali u f’kuntest operazzjonali, informazzjoni u analiżi dwar monitoraġġ ta’ tkabbir tal-uċuħ u previżjoni ta’ rendiment. Il-pajjiżi koperti huma dawk tal-UE u r-reġjuni fil-qrib (il-Magreb, iż-żona tal-Baħar l-Iswed). L-uċuħ koperti huma l-qamħ artab, il-qamħ durum, ix-xgħir tax-xitwa, ix-xgħir tar-rebbiegħa, il-qamħirrun, iż-żrieragħ tal-kolza, il-ġirasol, il-pitravu u l-patata. Analiżi sħiħa tiġi ppubblikata fuq l-internet sitt darbiet fis-sena u ssupplimentata bi stimi aġġornati ta’ rendimenti darbtejn jew tliet darbiet fis-sena. Għall-mergħat u r-ross fl-UE jitħejjew bullettini speċjali. Aġġornamenti u analiżi ta’ kundizzjonijiet agrometeoroloġiċi jiġu pprovduti bejn il-bullettini sħaħ ta’ analiżi (minn għaxar (10) darbiet sa 12-il darba fis-sena). Dawn il-pubblikazzjonijiet kollha huma disponibbli fuq l-internet jew f’format fuq il-karta meta jintalbu.

Servizzi ta’ informazzjoni u dejta

Varjetà kbira ta’ informazzjoni dwar l-istaġun kurrenti ta’ produzzjoni agrikola fl-Ewropa u f’żoni agrikoli oħra importanti fid-dinja tiġi offruta fuq il-web viewer u fuq il-paġni elettroniċi tal-MARSOP. Il-prodotti disponibbli jinkludu graffijiet u mapep ta’ indikaturi tat-temp ibbażati fuq osservazzjonijiet u mudelli numeriċi tat-temp, graffijiet u mapep ta’ indikaturi tal-uċuħ ibbażati fuq mudelli agrometeoroloġiċi u graffijiet u mapep ta’ indiċijiet ta’ veġetazzjoni ta’ materja niexfa akkumulata bbażati fuq immaġnijiet ta’ telerilevament.

UżU TAR-RIżORSI TAL-BAġIT

Tabella 1. Użu tar-riżorsi finanzjarji skont ir-Regolament tal-Kunsill (KE) Nru 78/2008 fl-2008, l-2009, l-2010 u l-2011 (krediti ta' pagamenti, f'EUR; * = impenjati, ** = mħallsin sal-mument tal-kitba)

|2008 | |2009 | |2010 | |2011 (preliminari) | | | |Ammont |Deskrizzjoni qasira |Ammont |Deskrizzjoni qasira |Ammont |Deskrizzjoni qasira |Ammont |Deskrizzjoni qasira | |LOTT 1 / fażi 1 | | | 1 016 084 |Pagament interim u finali | | | | | |LOTT 1 / fażi 2 | | | 283 185 |Pagament interim

| 424 777 | Pagament finali | | | |LOTT I / fażi 3 | | | | | 288 707 | Pagament interim | 433 061 | Pagament finali | |LOTT 1/ l-ewwel fażi ta' tiġdid 3 | | | | | | | 302 544* | Pagament interim | |Stazzjonijiet meteoroloġiċi addizzjonali għall-LOTT 1 | | | 67 800 |Stazzjonijiet kważi f’ħin reali (aktar minn 250) | 0 | NRT u stazzjonijiet tal-arkivji | 21 600** | Stazzjonijiet tal-arkivji | |LOTT 2 / fażi 1 | | | 387 720 |Pagament interim u finali | | | | | |Lott 2 / fażi 2 | | | 137 989 |Pagament interim | 206 984 | Pagament finali | | | |Lott 2 / fażi 3 | | | | | 135 143 | Pagament interim | 202 715 | Pagament finali | |Lott 2 / l-ewwel fażi ta' tiġdid 3 | | | | | | | 141 620* | Pagament interim | |Bażi tad-dejta MARS u appoġġ b’teknoloġija tal-informazzjoni (IT) | 97 298 |Bażi tad-dejta MARS u manutenzjoni u żvilupp ta’ sistemi ta’ informazzjoni | 477 562 |Bażi tad-dejta MARS u manutenzjoni u żvilupp ta’ sistemi ta’ informazzjoni | 359 239

|Bażi tad-dejta MARS u manutenzjoni u żvilupp ta’ sistemi ta’ informazzjoni | 333 196* | Bażi tad-dejta MARS u manutenzjoni u żvilupp ta’ sistemi ta’ informazzjoni | | TOTAL |97 298 | |2 370 340 | |1 414 851 | |1 443 608* | | |

Il- Lott 1 ikopri l-akkwist ta’ dejta ta’ tbassir meteoroloġiku u tat-temp (inkluża d-densifikazzjoni ta’ netwerk ta’ stazzjonijiet meteoroloġiċi). Ikopri t-tmexxija operazzjonali u ż-żamma tal-mudelli ta’ tkabbir tal-uċuħ mħaddmin fl-MCYFS. Riżultati fl-għamla ta’ aġġornamenti ta’ bażijiet tad-dejta u mapep jitwasslu fil-bażi tad-dejta fil-JRC kuljum jew kull għaxart ijiem. Jinżammu u jiġu żviluppati għodod adattati għall-isfruttament tar-riżultati. Iż-żamma u t-titjib tal-websajt tal-MARSOP jagħmlu parti wkoll minn dan il-lott flimkien ma’ koordinazzjoni u mmaniġġjar globali.

Il- Lott 2 ikopri l-ipproċessar tad-dejta ta’ telerilevament. Il-ħidma li ssir tkopri l-passi kollha ta’ tisħiħ tad-dejta minn meta jinkisbu l-immaġnijiet mhux ipproċessati sal-konsenja tal-immaġnijiet komposti kull għaxart (10) ijiem (tidħil tad-dejta, kalibrazzjoni, eċċ.).

Bażi tad-dejta Mars u appoġġ tal-IT : L-MCYFS titlob il-provvediment ta’ servizzi tal-IT biex tiġi żgurata l-produzzjoni f’waqtha tal-bullettini. il-ħidma li ssir tkopri l-immaniġġjar u l-manutenzjoni tal-bażi tad-dejta bid-dejta kollha tat-telerilevament, id-dejta meteoroloġika u l-indikaturi agrometeoroloġiċi. L-iżvilupp u l-manutenzjoni tal-għodod tal-analiżi u l-websajts jagħmlu parti minn dan il-komponent.

RIMARKI KONKLUSSIVI U L-ġEJJIENI TAL-ATTIVITÀ

Is-Sistema MARS ipprovdiet informazzjoni effettiva u f'waqtha u dejta oġġettiva b’appoġġ għall-proċess tat-teħid tad-deċiżjonijiet biex il-Politika Agrikola Komuni (PAK) tiġi mobilizzata. Lil hinn mill-objettiv primarju li jsiru previżjonijiet dwar rendiment ta’ ħsad u produzzjoni, is-sistema tagħti ħjiel utli wkoll lil oqsma oħra rilevanti għall-agrikoltura tal-UE bħall-kwistjonijiet ta’ tibdil fil-klima. Barra dan, is-sistema agrometeoroloġika MARS u l-applikazzjonijiet ta’ telerilevament ipprovdew informazzjoni utli mhux biss lill-Kummissjoni Ewropea iżda wkoll lill-Istati Membri interessati, lill-istituti tar-riċerka u lill-utenti l-oħra, permezz tat-tixrid tal-prodotti.

Il-possibbiltà ta’ kontinwazzjoni tas-Sistema ta’ Previżjoni ta’ Rendimenti tal-Uċuħ, MARS tista’ tinkludi attivitajiet ġodda biex isegwu l-ħtiġijiet tal-PAK, li tevolvi u tadatta għal ambjent ekonomiku globali li qed jinbidel. F’dan il-kuntest, informazzjoni indipendenti u ta’ min joqgħod fuqha f’livell dinji hija rekwiżit bażiku biex jiġi żgurat il-proċess korrett u effettiv tat-teħid tad-deċiżjonijiet fl-UE. L-attivitajiet il-ġodda jkunu jinkludu:

1. MCYFS mkabbra għal żoni oħra ewlenin ta’ produzzjoni fid-dinja u għal uċuħ rilevanti addizzjonali;

2. Għodda ta’ mudellar estiża għal uċuħ tal-UE minbarra dawk diġà koperti (eż. għas-segala, il-ħafur, il-qamħ tas-segala ( Triticosecale );

3. Mudellar aktar komplet ta’ sistemi ta’ mergħat li jkun jista’ jipprovdi stimi kwantitattivi ta’ produzzjoni tal-bijomassa.

Fir-rigward tal-punt 1, fl-2011 id-DĠ AGRI nieda proġett imsejjaħ GLOBCAST (GLOBal Crop Monitoring and ForeCASTing) permezz ta’ Arranġament Amministrattiv mal-JRC li għandu jintemm fl-2013. L-għan tal-proġett GLOBCAST huwa li jiġi studjat it-tkabbir tal-MCYFS għal żoni oħra fid-dinja (ir-Russja u l-pajjiżi tas-CIS, l-Arġentina, il-Brażil, iċ-Ċina, l-Indja, l-Awstralja, il-Kanada u l-Istati Uniti tal-Amerika) u għal uċuħ oħra ta’ interess, bħall-fażola tas-sojja u l-kannamiela. Fl-ewwel sena l-JRC għandu jerġa’ jagħti ħarsa lejn id-dejta eżistenti u għandu jadatta s-softwer u l-għodod ta’ mmudellar biex jorganizza u jimplimenta s-sistema preoperazzjonali għall-ġejjieni fis-snin 2012 u 2013. Skont il-valutazzjoni tal-proġett GLOBCAST, l-attivitajiet li jirriżultaw, wara jkunu jistgħu jiġu inklużi fil-programm MARS għall-previżjonijiet tar-rendimenti.

Il-proġett GLOBCAST għandu l-għan li jipprovdi kontribuzzjoni kbira tal-UE għall-inizjattiva reċenti tal-G-20 dwar is-sigurtà alimentari u l-volatilità tal-prezzijiet tal-ikel, b’mod partikolari għas-Sistema ta’ Informazzjoni dwar is-Suq Agrikolu (AMIS), inkluża fil-"Pjan ta’ Azzjoni dwar il-Volatilità tal-Prezzijiet tal-Ikel u l-Agrikoltura"[6] adottat mill-Ministri tal-Agrikoltura tal-G-20. Sistema ta’ Previżjoni ta’ Rendimenti tal-Uċuħ, MARS, li tkun estiża għandha tikkontribwixxi għall-AMIS permezz tal-Grupp għall-Osservazzjoni tad-Dinja (GEO), li għandu bħala objettiv ir-rinforz tal-kapaċità li jsiru u jinxterdu f’waqthom u b’mod preċiż previżjonijiet ta’ produzzjoni tal-uċuħ fuq skala nazzjonali, reġjonali u globali. Il-KE hija impenjata li tipparteċipa f’dawk l-inizjattivi b’dejta u informazzjoni dwar swieq, stokkijiet u produzzjonijiet. Prodotti mistennija tal-MCYFS eżistenti implimentata skont ir-Regolament tal-Kunsill (KE) Nru 78/2008 u riżultati tal-proġett GLOBCAST huma diġà u jistgħu jibqgħu kontribuzzjonijiet għas-sistema AMIS.

Hemm rabtiet mill-qrib bejn l-attivitajiet tas-Sistema ta’ Previżjoni ta’ Rendimenti tal-Uċuħ, MARS u l-Programm ta’ Monitoraġġ Globali tal-Ambjent u s-Sigurtà (GMES). Il-possibiltajiet ta’ tisħiħ ta’ sinerġiji bejn attivitajiet tal-GMES u tas-Sistema ta’ Previżjoni ta’ Rendimenti tal-Uċuħ, MARS qed jiġu diskussi, b’mod partikolari fir-rigward tal-akkwist u l-ipproċessar minn qabel ta’ dejta permezz tas-satellita li tista’ tibbenefika mid-dejta u l-informazzjoni tal-GMES.

[1] Ir-Regolament tal-Kunsill (KE) Nru 78/2008 tal-21 ta’ Jannar 2008 dwar il-miżuri li l-Kummissjoni għandha twettaq għall-perjodu 2008-2013 bl-użu tal-applikazzjonijiet ta' telerilevament implimentati fil-qafas tal-politika agrikola komuni, Ġurnal Uffiċjali tal-Unjoni Ewropea , L 25 tat-30 ta’ Jannar 2008, p. 1.

[2] Id-Deċiżjoni 1445/2000/KE tal-Parlament Ewropew u tal-Kunsill tat-22 ta’ Mejju 2000 dwar l-appplikazzjoni ta’ stħarriġ mill-ajru u metodi ta’ teknika ta’ remote-sensing għal statistiċi agrikoli għal 1999 sa 2003, Il-Ġurnal Uffiċjali tal-Komunitajiet Ewropej L 163 tal-4 ta’ Lulju 2000, p. 1.

[3] Id-Deċiżjoni 2066/2003/KE tal-Parlament Ewropew u tal-Kunsill tal-10 ta’ Novembru 2003 dwar it-tkomplija tal-applikazzjoni fl-istatistiċi agrikoli mill-2004 sal-2007 ta' tekniċi ta' stħarriġ għal żoni u ta' remote sensing u li temenda d-Deċiżjoni 1445/2000/KE, Il-Ġurnal Uffiċjali tal-Unjoni Ewropea L 309 tas-26 ta’ Novembru 2003, p. 9.

[4] It-taqsira SPOT hija għal "Satellite Pour l'Observation de la Terre" [Satellita għall-Osservazzjoni tad-Dinja], NOAA hija għal National Oceanic and Atmospheric Administration [Amministrazzjoni Nazzjonali għall-Oċeani u l-Atmosfera] u AVHRR għal Advanced very high Resolution Radiometer [Radjometru Avvanzat ta’ Riżoluzzjoni għolja ħafna]; MODIS hija għal Moderate Resolution Imaging Spectroradiometer [Spettroradjometru ta' Immaġnijiet ta' Riżoluzzjoni Moderata].

[5] Id-Direttiva 2007/2/KE tal-Parlament Ewropew u tal-Kunsill tal-14 ta’ Marzu 2007 li tistabbilixxi Infrastruttura għall-Informazzjoni Ġeografika fil-Komunità Ewropea (Inspire), Ġurnal Uffiċjali tal-Unjoni Ewropea L 108 tal-25 ta’ April 2007, p. 1.

[6] http://agriculture.gouv.fr/IMG/pdf/2011-06-23_-_Action_Plan_-_VFinale.pdf