52010PC0167

[pic] | IL-KUMMISSJONI EWROPEA |

Brussel 23.4.2010

KUMM(2010)167 finali

2010/0091 (NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tieħu l-Unjoni Ewropea fi ħdan il-Kunsill ta' Assoċjazzjoni stabbilit permezz tal-Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom fuq naħa, u r-Renju Ħaxemita tal-Ġordan, fuq in-naħa l-oħra, fejn tidħol l-emenda tal-Artikolu 15(7) tal-Protokoll Nru 3 ta' dak il-Ftehim, dwar id-definizzjoni tal-kunċett ta' "prodotti ta' oriġini" u metodi ta' kooperazzjoni amministrattiva

MEMORANDUM TA’ SPJEGAZZJONI

IL-KUNTEST TAL-PROPOSTA

Il-projbizzjoni tar-restituzzjoni tad-dazji doganali hija stipulata fl-Artikolu 15 tal-Protokoll Nru 3, anness mal-Ftehim ta' Assoċjazzjoni bejn il-KE u l-Ġordan. Fil-paragrafu 7 hemm stipulat perjodu ta' tranżizzjoni marbut mal-applikazzjoni sħiħa tal-projbizzjoni ta' restituzzjoni ta' dazji mill-Ġordan, u dan il-pajjiż sieħeb huwa mogħti l-possibbiltà li jirrestitwixxi d-dazji lill-esportaturi jew operaturi ekonomiċi tiegħu matul dan il-perjodu.

Dan il-perjodu ta' tranżizzjoni jiskadi fil-31 ta' Diċembru 2009. Għaldaqstant, l-Artikolu 15(7) jistipula l-possibbiltà li l-applikazzjoni tiegħu tiġi estiża bi "ftehim komuni".

Waqt il-11-il laqgħa tal-Grupp ta' Ħidma Pan-Ewro-Mediterran, li saret fi Brussell fid-29 ta' Ottubru 2009, il-Ġordan ressaq talba bil-ħsieb li tittawwal l-applikazzjoni tad-dispożizzjoni dwar ir-refużjonijiet tad-dazji u għal reviżjoni tar-rati ta' dazji doganali applikabbli.

Skont l-Artikolu 39 il-Protokoll 3 jista' jiġi emendat permezz ta' deċiżjoni tal-Kunsill ta' Assoċjazzjoni.

It-test tad-deċiżjoni jieħu post id-dispożizzjoni li hemm fl-Artikolu 15(7).

Huwa jinkludi, min-naħa, l-emenda fil-validità ta' din id-dispożizzjoni fejn tidħol ir-refużjoni tad-dazji doganali u, min-naħa l-oħra, ir-reviżjoni tar-rati ta' dazji doganali applikabbli.

Sabiex ikun hemm żgur iċ-ċarezza, il-previdibbiltà ekonimika għat-tul kif ukoll is-sigurtà ġuridika għall-operaturi ekonomiċi, il-partijiet tal-ftehim aċċettaw li jestendu bi tliet snin l-applikazzjoni tal-Artikolu 15(7), b'seħħ mill-1 ta' Jannar 2010.

Barra minn dan, għandu jkun hemm aġġustament tad-dazji applikabbli fil-Ġordan abbażi tad-dazji attwali applikabbli fl-UE.

Bil-għan li tiġi formalment adottata din id-deċiżjoni, intlaħaq qbil, permezz ta' skambju ta' korrispondenza bejn il-Kummissjoni Ewropea u l-awtoritajiet kompetenti tal-Ġordan, li l-kontenut ta' dan it-test għandu japplika mill-1 ta' Jannar 2010.

IL-KONSULTAZZJONI MAL-PARTIJIET INTERESSATI U L-ANALIżI TAL-IMPATT

Il-partijiet interessati ġew ikkonsultati fil-qafas tal-grupp ta' ħidma Pan-Euro-Med, u tas-sezzjoni tal-oriġini tal-Kumitat tal-Kodiċi Doganali.

Ma kien hemm l-ebda ħtieġa ta’ għarfien espert estern.

Mhux meħtieġ li ssir analiżi tal-impatt peress li l-emendi li qed jiġu proposti huma ta' natura purament teknika u ma jibdlux il-bażi tal-Protokoll attwali dwar ir-regoli tal-oriġini.

L-ELEMENTI ġURIDIċI TAL-PROPOSTA

Meta wieħed iqis in-natura tal-tibdiliet li għandhom isiru fl-Artikolu 15(7) tal-Protokoll Nru 3, u minħabba r-raġunijiet ta' sigurtà ġuridika, hemm bżonn li jinbidel il-paragrafu kollu.

Ikun xieraq li d-dispożizzjoni emendata dwar ir-refużjonijiet tad-dazji doganali tkun tapplika retroattivament mill-1 ta' Jannar 2010.

Il-bażi ġuridika tal-modifika ta' din id-dispożizzjoni hija l-Artikolu 207(4), flimkien mal-Artikolu 218(9) tat-Trattat dwar il-Funzjonament tal-Unjoni Ewropea.

Il-proposta taqa’ taħt il-kompetenza esklussiva tal-Unjoni. Għalhekk il-prinċipju tas-sussidjarjetà ma japplikax.

Strument propost: Deċiżjoni tal-Kunsill

L-IMPLIKAZZJONI GħALL-BAġIT

Il-proposta m'għandha l-ebda implikazzjoni għall-baġit tal-Unjoni.

TAGħRIF ADDIZZJONALI

Mhux previst li tiddaħħal klawżola ta' analiżi, reviżjoni jew ta' estinzjoni awtomatika.

2010/0091 (NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tieħu l-Unjoni Ewropea fi ħdan il-Kunsill ta' Assoċjazzjoni stabbilit permezz tal-Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom fuq naħa, u r-Renju Ħaxemita tal-Ġordan, fuq in-naħa l-oħra, fejn tidħol l-emenda tal-Artikolu 15(7) tal-Protokoll Nru 3 ta' dak il-Ftehim, dwar id-definizzjoni tal-kunċett ta' "prodotti ta' oriġini" u metodi ta' kooperazzjoni amministrattiva

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4) l-ewwel subparagrafu, flimkien mal-Artikolu 218(9) tiegħu,

wara li kkunsidra l-proposta tal-Kummissjoni Ewropea,

Billi:

1. Il-Protokoll Nru 3[1] tal-Ftehim Ewro-Mediterranju jistabbilixxi assoċjazzjoni bejn il-Komunitajiet Ewropei u l-Istati Membri tagħhom, min-naħa, u r-Renju Ħaxemmita tal-Ġordan, min-naħa l-oħra, minn issa 'l quddiem "il-ftehim", kif emendat bid-Deċiżjoni Nru 1/2006 tal-Kunsill ta' Assoċjazzjoni bejn l-UE u l-Ġordan tas-17 ta' Frar 2006[2], dwar id-definizzjoni tal-kunċett ta' "prodotti ta' oriġini" u metodi ta' kooperazzjoni amministrattiva.

2. L-Artikolu 15 tal-Protokoll 3 fih projbizzjoni ġenerali tar-restituzzjoni ta', jew ta' eżenzjoni minn, dazji doganali għal materjali mhux ta' oriġini li jintużaw fil-manifattura ta' prodotti ta' oriġini. Madankollu, il-paragrafu 7 ta' dan l-Artikolu jistipula li restituzzjoni jew eżenzjoni tista' tiġi applikata sal-31 ta' Diċembru 2009 taħt ċerti kundizzjonijiet.

3. Sabiex ikun hemm żgur iċ-ċarezza, il-previdibbiltà ekonimika għat-tul kif ukoll is-sigurtà ġuridika għall-operaturi ekonomiċi, il-partijiet tal-ftehim aċċettaw li jestendu bi tliet snin l-applikazzjoni tal-Artikolu 15(7), b'seħħ mill-1 ta' Jannar 2010.

4. Barra minn dan, għandu jkun hemm aġġustament tad-dazji applikabbli fil-Ġordan abbażi tad-dazji attwali applikabbli fl-UE.

5. F'konformità mal-Artikolu 39 tal-Protokoll Nru 3 ikun jixraq li l-Kunsill ta' Assoċjazzjoni stabbilit permezz tal-ftehim għandu jiddeċiedi li jemenda d-dispożizzjonijiet ta' dan il-Protokoll.

6. Ikun jixraq, għalhekk, li l-Unjoni Ewropea tadotta fi ħdan il-Kunsill ta' Assoċjazzjoni l-pożizzjoni kif imfissra fl-abbozz ta' deċiżjoni mehmuża.

ADOTTA DIN ID-DECIZJONI:

Artikolu 1

Il-pożizzjoni li għandha tieħu l-Unjoni Ewropea fi ħdan il-Kunsill ta' Assoċjazzjoni stabbilit permezz tal-Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom fuq naħa, u r-Renju Ħaxemita tal-Ġordan, fuq in-naħa l-oħra, fejn tidħol l-emenda tal-Artikolu 15(7) tal-Protokoll Nru 3, dwar id-definizzjoni tal-kunċett ta' "prodotti ta' oriġini" u metodi ta' kooperazzjoni amministrattiva, bil-ħsieb li tittawwal l-applikazzjoni tal-imsemmija dispożizzjoni dwar ir-refużjonijiet u l-eżenzjonijiet tad-dażji doganali, hija mfissra fl-abbozz ta' deċiżjoni tal-Kunsill ta' Assoċjazzjoni, mehmuż ma' din id-deċiżjoni.

Artikolu 2

Id-Deċiżjoni tal-Kunsill ta' Assoċjazzjoni hija ppubblikata fil-Ġurnal Uffiċjali tal-Unjoni Ewropea.

Magħmul fi Brussell,

Għall-Kunsill

Il-President

Proposta għal

DEĊIŻJONI Nru [...] TAL-KUNSILL TA’ ASSOĊJAZZJONI UE-ĠORDAN

ta’ [...]

li temenda l-Artikolu 15(7) tal-Protokoll Nru 3 tal-Ftehim Ewro-Mediterranju bejn il-Komunitajiet Ewropej u l-Istati Membri tagħhom, min-naħa, u r-Renju Ħaxemita tal-Ġordan, min-naħa l-oħra, dwar id-definizzjoni tal-kunċett ta' "prodotti ta' oriġini" u għal metodi ta' kooperazzjoni amministrattiva

Il-Kunsill ta’ Assoċjazzjoni,

Wara li kkunsidra l-Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom, minn naħa, u r-Renju Ħaxemita tal-Ġordan, min-naħa l-oħra, u b’mod partikolari l-Artikolu 39 tal-Protokoll 3 li hemm miegħu,

Billi:

7. L-Artikolu 15(7) tal-Protokoll Nru 3 tal-Ftehim Ewro-Mediterranju bejn il-Komunitajiet Ewropej u l-Istati Membri tagħhom, min-naħa, u r-Renju Ħaxemita tal-Ġordan, min-naħa l-oħra, minn issa 'l quddiem "il-ftehim", jippermetti, taħt ċerti kundizzjonijiet, ir-restituzzjoni ta' jew l-eżenzjoni minn, id-dazji doganali jew it-taxxi b'effett ekwivalenti sal-31 ta' Diċembru 2009.

8. Sabiex ikun hemm żgur iċ-ċarezza, il-previdibbiltà ekonimika għat-tul kif ukoll is-sigurtà ġuridika għall-operaturi ekonomiċi, il-partijiet tal-ftehim aċċettaw li jestendu bi tliet snin l-applikazzjoni tal-Artikolu 15(7), b'seħħ mill-1 ta' Jannar 2010.

9. Barra minn dan, għandu jkun hemm aġġustament tad-dazji applikabbli fil-Ġordan abbażi tad-dazji attwali applikabbli fl-UE.

10. Ikun xieraq għalhekk li jiġi emendat il-Protokoll 3 tal-ftehim.

11. Peress li l-validità tal-applikazzjoni tal-Artikolu 15(7) tiskadi fil-31 ta' Diċembru 2009, ikun xieraq li d-deċiżjoni preżenti tibda' tapplika mill-1 ta' Jannar 2010.

IDDEĊIEDA KIF ĠEJ:

Artikolu 1

L-Artikolu 15(7) tal-Protokoll Nru 3 tal-Ftehim Ewro-Mediterranju bejn il-Komunitajiet Ewropej u l-Istati Membri tagħhom, min-naħa, u r-Renju Ħaxemitsa tal-Ġordan, min-naħa l-oħra, dwar id-definizzjoni tal-kunċett ta' "prodotti ta' oriġini" u għal metodi ta' kooperazzjoni amministrattiva, għandu jinbidel b'dan li ġej:

«7. Minkejja l-paragrafu 1, il-Ġordan jista', ħlief għal prodotti li jaqgħu fi ħdan il-Kapitoli 1 sa 24 tas-Sistema Armonizzata, japplika arranġamenti għal rifużjoni ta' dazji doganali jew ħlasijiet li għandhom effett ekwivalenti jew eżenzjoni minnhom, applikabbli għal materjali mhux oriġinarji użati fil-manifattura ta' prodotti oriġinarji, suġġett għad-dispożizzjonijiet li ġejjin:

(a) għandha tibqa' rata ta' 4 % ta' ħlas doganali fir-rigward tal-prodotti li jaqgħu fi ħdan il-Kapitoli 25 sa 49 u 64 sa 97 tas-Sistema Armonizzata, jew kwalunkwe rata inferjuri li tkun fis-seħħ fil-Ġordan;

(b) rata ta' 8 % ta' ħlas doganali għandha tibqa' fir-rigward tal-prodotti li jaqgħu fi ħdan il-Kapitoli 50 sa 63 tas-Sistema Armonizzata, jew rata inferjuri li tkun fis-seħħ fil-Ġordan.

Il-paragrafu preżenti għandu japplika sal-31 ta' Diċembru 2012 u jista' jiġi rivedut bi qbil komuni."

Artikolu 2

Din id-Deċiżjoni għandha tidħol fis-seħħ fil-ġurnata tal-adozzjoni tagħha.

Hija applikabbli mill-1 ta' Jannar 2010.

Magħmul fi

Għall-Kunsill ta' Assoċjazzjoni

Il-President

[1] ĠU L 129, 15.5.2002, p. 3.

[2] ĠU L 209, 31.7.2006, p. 30.