17.6.2009

MT

Il-Ġurnal Uffiċjali tal-Unjoni Ewropea

C 137/19

---

Pubblikazzjoni ta′ applikazzjoni għal reġistrazzjoni skont l-Artikolu 8(2) tar-Regolament tal-Kunsill (KE) Nru 509/2006 dwar prodotti agrikoli u oġġetti tal-ikel bħala speċjalitajiet tradizzjonali ggarantiti

2009/C 137/10

Din il-pubblikazzjoni tikkonferixxi d-dritt li wieħed joġġezzjona għall-applikazzjoni skont l-Artikolu 9 tar-Regolament tal-Kunsill (KE) Nru 509/2006. Id-dikjarazzjonijiet ta' oġġezzjoni għandhom jaslu għand il-Kummissjoni fi żmien sitt xhur mid-data ta' din il-pubblikazzjoni.

APPLIKAZZJONI GĦAL REĠISTRAZZJONI TA’ STG

IR-REGOLAMENT TAL-KUNSILL (KE) Nru 509/2006

“BELOKRANJSKA POGAČA”

KE Nru.: SI-TSG-007-0029-29.10.2004

1.   L-isem u l-indirizz tal-grupp applikant:

Isem:	Društvo kmečkih žena Metlika (assoċjazzjoni tan-nisa tal-bdiewa ta′ Metlika)
Indirizz:	Mestni trg 24 8330 Metlika SLOVENJA
Nru tat-telefown	+386 73059002
Nru tal-feks	—

2.   L-istat membru jew il-pajjiż terz:

Is-Slovenja

3.   Speċifikazzjoni tal-prodott:

3.1.   L-isem li għandu jiġi rreġistrat:

“Belokranjska pogača”

Ir-reġistrazzjoni tal-isem għandha ssir fl-ilsien Sloven. Il-frażi li se tinqaleb għall-ilsna barranin hija “prodott bil-mod tradizzjonali Sloven”.

3.2.   Jekk jogħġbok indika jekk l-isem:

	huwiex speċifiku fih innifsu
	jesprimix in-natura speċifika tal-prodott agrikolu jew tal-oġġett tal-ikel

L-isem “Belokranjska pogača” ma jesprimix in-natura speċifika tal-prodott, imma jintuża tradizzjonalment sabiex jiddeskrivi dan il-prodott, kif jidher mid-diversi sorsi msemmija fil-punt 3.8.

3.3.   L-isem qed jiġi rriżervat skont l-Artikolu 13(2) tar-Regolament (KE) Nru 509/2006?

	Reġistrazzjoni flimkien mar-riżerva tal-isem
	Reġistrazzjoni mingħajr ir-riżerva tal-isem

3.4.   It-tip ta′ prodott:

2.3.	Ħlewwiet, ħobż, għaġina, prodotti magħmulin mill-għaġina, gallettini u prodotti oħrajn moħmijin

3.5.   Deskrizzjoni tal-prodott agrikolu jew tal-oġġett tal-ikel li għalih japplika l-isem skont il-punt 3.1:

Il-“Belokranjska pogača” hija għamla ta' ħobż ċatt b′forma tonda li jsir skont riċetta partikolari. Fit-tħejjija ta′ dan il-ħobż jintużaw id-dqiq abjad fin tat-tip 500 u l-ilma fietel miżjudin bil-melħ u b′aġent li jtella′. Il-“Belokranjska pogača” huwa ħobż tond b′dijametru ta′ madwar 30 ċm. Fin-nofs ikun oħxon bejn 3 u 4 ċm, filwaqt li fit-truf jirqaq għal bejn ċentimetru u 2 ċm. Il-wiċċ huwa mmarkat bi gradilja magħmula minn linji angulati li jkunu bejn wieħed u ieħor 4 ċm ′l bogħod minn xulxin, u huwa miksi b′bajda mħabbta u jkollu l-karwi u l-melħ oħxon imraxxax fil-wiċċ. Il-ħobż għandu qoxra uniformi mingħajr bżieżaq u għandu riħa u togħma qawwijin ta′ karwi u melħ li jikkaratterizzawh.

Il-ħobż ikun l-itjeb meta jkun għadu sħun, u jinqata' bl-idejn mal-linji maqtugħin u angulati minflok ma jinqata' b’sikkina.

3.6.   Deskrizzjoni tal-metodu tal-produzzjoni tal-prodott agrikolu jew tal-oġġett tal-ikel li għalih japplika l-isem skont il-punt 3.1:

3.6.

Deskrizzjoni tal-metodu tal-produzzjoni tal-prodott agrikolu jew tal-oġġett tal-ikel li għalih japplika l-isem skont il-punt 3.1 (l-Artikolu 3(2) tar-Regolament tal-Kummissjoni (KE) Nru 1216/2007) L-ingredjenti:   500 gm. dqiq abjad fin (tat-tip 500)   3 dl. ilma fietel   2 kuċċarini melħ   20 gm. ħmira   nofs mgħarfa zokkor   bajda sħiħa   niskata karwi   niskata melħ oħxon It-tħejjija tal-għaġina għall-“Belokranjska pogača”   L-aġent li jtella′: Ħabbat flimkien 20 gm. ħmira, 3 imgħaref dqiq abjad fin, ½ dl ilma fietel u z-zokkor. Ħawwadhom sakemm tifforma sustanza li ddellek u ħalliha toqgħod sakemm togħla d-doppju u iżjed fil-volum.   It-taħlit tal-għaġina: It-taħlita titħejja billi jintużaw id-dqiq abjad fin (tat-tip 500), l-ilma fietel u l-aġent li jtella′. Agħġen għal 8 sa 10 minuti sakemm l-għaġina tiġi taħlita fina (mingħajr biċċiet) u mhux iebsa żżejjed. Ma għandhiex teħel mal-idejn. L-għaġina titħalla mgħottija fl-iskutella tat-taħlit sakemm togħla d-doppju u iżjed fil-volum.   L-iffurmar tal-għaġina għall-“Belokranjska pogača”: L-għaġina li tkun għoliet titpoġġa f′dixx imdellek bil-butir u tinħadem bl-idejn sa ma jkollha dijametru ta′ 30 cm u ħxuna ta′ bejn ċentimetru u 2 ċm., filwaqt li tirqaq fit-truf. L-għaġina m′għandhiex tmiss mat-truf tad-dixx u għandha tkun iktar baxxa lejn it-truf milli fin-nofs.   Il-kisi, t-traxxix u l-qtugħ tal-wiċċ: L-għaġina tinqata′ sal-qiegħ tad-dixx min-naħa għall-oħra tal-ħobża, bl-użu ta′ qatgħat immejlin li jkunu bejn wieħed u ieħor 4 ċm. ′l bogħod minn xulxin. L-għaġina imbagħad tinkesa b′bajda mħabbta li magħha tkun żdieded niskata karwi u jitraxxilha l-melħ oħxon fil-wiċċ.   Il-ħami: L-għaġina tinħema f′forn li jkun imsaħħan minn qabel f′temperatura ta′ 220 °C għal madwar 20 sa 25 minuta. Il-“Belokranjska pogača” għandha tinħema sakemm issir ta′ lewn kannella ċar. Il-qoxra għandha tkun uniformi fil-lewn u tqarmeċ u mingħajr bżieżaq. In-nofs għandu jkun poruż b′mod uniformi, mingħajr ċrieki tal-ilma, ċapep ta′ melħ jew dqiq u m'għandux ikun iwaħħal meta wieħed imissu. Il-parti tan-nofs għandha tkun għolja minn 3 sa 4 ċentimetri, filwaqt li t-truf għandhom ikunu ta′ bejn ċentimetru u 2 ċm. għoli. Il-karwi u l-melħ għandhom ikunu traxxu kullimkien indaqs. Għandu jkun hemm ir-riħa u t-togħma tipika tal-karwi u tal-melħ tal-“Belokranjska pogača”.

3.7.   In-natura speċifika tal-prodott agrikolu jew tal-oġġett tal-ikel:

Il-“Belokranjska pogača” hija kklassifikata bħala speċjalità tal-kċina Slovena. Tinstab l-iktar fil-muniċipalità ta′ Metlika. Il-karatteristika tagħha tinsab fir-riċetta tagħha u fil-mod ta′ kif titħejja u tiġi ppreżentata. Il-wiċċ tal-“Belokranjska pogača” fih qatgħat magħmulin bi gradilja ta’ linji angulati li jkunu madwar 4 ċm. ′l bogħod minn xulxin. Ladarba tinħema, il-“Belokranjska pogača” tinqata′ bl-idejn mal-linji maqtugħin u angulati, minflok ma tinqata′ b′sikkina. Karatteristika oħra tal-“Belokranjska pogača” hija li l-ħobż huwa miksi b′bajda mħabbta u jkollu l-karwi u l-melħ oħxon imraxxax fil-wiċċ sabiex jagħtuh ir-riħa u t-togħma qawwija tradizzjonali tal-karwi meta jinħema.

3.8.   In-natura speċifika tradizzjonali tal-prodott agrikolu jew tal-oġġett tal-ikel:

Il-“Belokranjska pogača” intirtet minn ġenerazzjoni għall-oħra, u b′hekk inżammet bħala speċjalità tradizzjonali tal-Bela Krajina. Wisq probabbli nġiebet lejn ir-reġjun mill-Uskoki li bdew joqogħdu fiż-żoni li jinsabu iktar fil-għoli fil-ġnub tal-muntanji ta′ Gorjanci fuq in-naħa ta′ Bela Krajina.

Hemm evidenza bil-miktub u bil-fomm dwar l-oriġini ta′ dan il-ħobż ċatt imma s-sorsi miktubin x′aktarx mhumiex kompluti għal kollox.

Il-kollettur tat-tradizzjonijiet folkloristiċi ta′ Doljenska, l-awtur u l-vjaġġatur magħruf Sloven Janez Trdina ħa gost jivvjaġġa fiż-żona msemmija hawn fuq u kien jaf u kiteb dwar in-nies li jgħixu fuq in-naħa xemxija tal-muntanji ta′ Gorjanci. B′hekk, il-“Belokranjska pogača” tissemma fil-ktieb tiegħu “Bajke in povesti o Gorjancih” tal-1882.

Ivan Navratil, lingwista u kollettur tat-tradizzjonijiet folkloristiċi ta′ Metlika kiteb li hemm kanzunetta folkloristika li tgħid “agħtih” il-pogača “sabiex ikun jista′ jaqbeż …”, li jkantaw it-tfal huma u jħabbtu bieb bieb isaqsu għal “Zeleni Jurij” (“Ġorġ l-aħdar”). Fil-ktieb li ħareġ Navratil fl-1849 imsejjaħ “Kresovanje v Metliki”, huwa jsemmi ħobża bajda ċatta li n-nies tal-lokal isejħulha “pogača”.

Il-kittieb L. Simeonovič isemmi wkoll il-“pogača” fl-“Enciklopedija jugoslovanske kuhinje” (l-Enċiklopedija dwar il-Kċina Jugoslava) (tal-1967).

Hemm referenza għall-“Belokranjska pogača” fl-“Etnološka topografija slovenskega etničnega ozemlja – 20. stoletje” (it-Topografija etnoloġika tat-territorju etniku Sloven fis-seklu 20) (tal-1994) li nġabret mill-etimoloġista M. Balkovec, li ħadem fil-Mużew ta′ Bela Krajina f′Metlika.

Ksenja Vitkovič Khalil, fil-ktieb tagħha msejjaħ “Nerajska prehrana” (tal-1999) tuża t-terminu rustiku sabiex tiddeskrivi l-“Belokranjska pogača”. Il-“Belokranjska pogača” tissemma wkoll fil-“Leksikon Cankarjeve založbe” (tal-1973), u fil-ktieb imsejjaħ “Dobra kuharica” [Kok Tajjeb] ta′ Minka Vasičeva (tal-1902).

Il-“pogača” għandha tradizzjoni twila f′Bela Krajina, u ntirtet minn ġenerazzjoni għall-oħra, minħabba li hija tassew speċjalità tar-reġjun. In-nisa tad-dar li jaħmu l-ħobż li jkun se jintuża fid-djar fil-forn tal-furnara dejjem jaħmu l-“pogača” għat-tfal sabiex dawn ikunu jistgħu jikluh sħun waqt li l-ħobż jitberred kif meħtieġ qabel ma jkun jista′ jittiekel.

Din id-drawwa għadha ssir saħansitra llum, bin-nisa tad-dar iħejjuh u joffruh lill-mistednin li jkunu stiednu fi djarhom sabiex jilqgħuhom, imma joffruh ukoll lill-mistednin li jkunu qed iqattgħu il-btajjel tagħhom fl-irziezet. Dan il-ħobż jinstab fejn jinbiegħ l-inbid, u l-anzjani jemmnu li dan jassorbi l-inbid u b′hekk jevita li wieħed jisker.

3.9.   Ir-rekwiżiti minimi u l-proċeduri għall-kontroll tan-natura speċifika:

—

Il-“Belokranjska pogača” għandu jkollha n-natura speċifika kollha stipulata fl-ispeċifikazzjonijiet (għandhom jintużaw l-ingredjenti msemmija hawn fuq, għandha tkun prodotta bil-mod spjegat hawn fuq, u l-prodott finali għandu jkollu l-forma, id-dehra, ir-riħa, it-togħma u l-konsistenza spjegati hawn fuq).

—	Il-produtturi tal-“Belokranjska pogača” għandhom iżommu kont tal-materja prima li jirċievu u li jużaw u tal-kwantità ta′ “Belokranjska pogača” prodott u mibjugħ.

—

Kontrolli dwar il-konformità mal-ispeċifikazzjonijiet imsejsa fuq l-użu tal-ingredjenti, il-proċess tal-produzzjoni u d-dehra u l-karatteristiċi organolettiċi tal-prodott finali msemmija hawn fuq għandhom isiru mill-produtturi individwali u/jew mill-assoċjazzjonijiet tal-produtturi, u għall-anqas darba fis-sena minn entità li tiċċertifika l-konformità mal-istandard Ewropew EN 45011 ukoll.

3.10.   Il-lowgo:

—

4.   L-awtoritajiet jew l-entitajiet li jivverifikaw il-konformità mal-ispeċifikazzjoni tal-prodott:

4.1.   L-isem u l-indirizz:

Isem:	Bureau Veritas d.o.o.
Indirizz:	Linhartova 49a
Nru. tat-telefown	+386 14757670
Nru. tal-feks	—
Indirizz tal-posta elettronika:	info@bureauveritas.com

 Pubbliku Privat

4.2.   Il-kompiti speċifiċi tal-awtorità jew tal-entità:

Il-Bureau Veritas d.o.o. hija l-entità tal-monitoraġġ responsabbli għall-kontrolli tal-istadji kollha tal-produzzjoni spjegati hawn fuq fl-ispeċifikazzjoni tal-“Belokranjska pogača”.

---