EUR-Lex Access to European Union law
This document is an excerpt from the EUR-Lex website
Document 52009DC0314
Report from the Commission to the Council on the operation of the agreements concluded in the framework of the GATT Article XXVIII procedure in the rice sector
Rapport mill-Kummissjoni lill-Kunsill dwar l-operat tal-ftehimiet konklużi fil-qafas tal-proċedura tal-Artikolu XXVIII tal-GATT fis-settur tar-ross
Rapport mill-Kummissjoni lill-Kunsill dwar l-operat tal-ftehimiet konklużi fil-qafas tal-proċedura tal-Artikolu XXVIII tal-GATT fis-settur tar-ross
/* KUMM/2009/0314 finali */
Rapport mill-Kummissjoni lill-Kunsill dwar l-operat tal-ftehimiet konklużi fil-qafas tal-proċedura tal-Artikolu XXVIII tal-GATT fis-settur tar-ross /* KUMM/2009/0314 finali */
[pic] | KUMMISSJONI TAL-KOMUNITAJIET EWROPEJ | Brussel 30.6.2009 KUMM(2009) 314 finali RAPPORT MILL-KUMMISSJONI LILL-KUNSILL dwar l-operat tal-ftehimiet konklużi fil-qafas tal-proċedura tal-Artikolu XXVIII tal-GATT fis-settur tar-ross RAPPORT MILL-KUMMISSJONI LILL-KUNSILL dwar l-operat tal-ftehimiet konklużi fil-qafas tal-proċedura tal-Artikolu XXVIII tal-GATT fis-settur tar-ross GLOSSARJU Basmati | Ross indica ta' kwalità għolja li jikber biss fl-indja u l-pakistan | Imkisser | Ross abjad li saritlu l-ħsara fil-proċess tat-tħin | Imqaxxar | Ross li tneħħitlu biss l-ħliefa; ross kannella | Indica | Subspeċi ta' ross, żerriegħa twila | Japonica | Subspeċi ta' ross, normalment żerriegħa tonda jew ta' daqs medju | Bil-qoxra | Ross li għadu fil-ħliefa (mhux imqaxxar) | Mitħun jew nofsu mitħun | Ross li tneħħewlu l-ħliefa, is-saffi u ż-żerriegħa parzjalment jew kompletament; ross abjad | RAPPORT MILL-KUMMISSJONI LILL-KUNSILL dwar l-operat tal-ftehimiet konklużi fil-qafas tal-proċedura tal-Artikolu XXVIII tal-GATT fis-settur tar-ross DAħLA Wara r-riforma tal-Organizzazzjoni tas-Suq Komuni tar-ross fl-2003, il-Kummissjoni nnotifikat lill-ODS li l-Komunità Ewropea kellha l-intenzjoni timmodifika l-konċessjonijiet tal-importazzjoni tar-ross imqaxxar (kodiċi HS 1006 20) u r-ross mitħun jew nofsu mitħun (kodiċi HS 1006 30) inklużi fl-Iskeda CXL tal-Komunità Ewropea annessa mal-GATT 1994. It-tnaqqis ta' 50 % fil-prezz tal-intervent li ġie introdott bir-riforma fisser li t-tkomplija tal-amministrazzjoni tal-importazzjoni fis-seħħ dak iż-żmien[1] kienet se tirriżulta fi protezzjoni konfinali li tvarja ħafna, li tista' tilħaq ukoll livell ta' bla dazju. Minħabba li din implikat wisq inċertezzi għas-settur tar-ross, il-Komunità ddeċidiet li tneħħi l-konsolidazzjoni amministrattiva u tinnegozja l-iskambju tagħha b'waħda iżjed xierqa, applikabbli għall-imsieħba kummerċjali kollha tal-UE.[2]. Għalhekk, skont l-Artikolu XXVIII tal-GATT, in-negozjati saru mal-erba' pajjiżi li minnhom joriġinaw l-ikbar importazzjonijiet ta' ross fl-UE: - l-Indja u l-Pakistan, kull wieħed b'interess sostanzjali fil-provvista tar-ross Basmati imqaxxar, - l-Istati Uniti tal-Amerika li kellha interess prinċipali fil-provvista tar-ross imqaxxar u interess sostanzjali fil-provvista tar-ross mitħun, u - it-Tajlandja, li kellha interess prinċipali fil-provvista tar-ross mitħun u interess sostanzjali fil-provvista tar-ross imqaxxar. Meta ġie ffirmat il-ftehim mat-Tajlandja, il-Kummissjoni ħadet ir-responsabbiltà sabiex tibgħat rapport lill-Kunsill dwar l-operat tal-ftehimiet konklużi, la darba kienet disponibbli d-dejta għall-ewwel snin tat-tqegħid fis-suq. L-iskop ikun biex wieħed jgħin l-valutazzjoni tal-impatt tal-flussi tal-importazzjoni ta' tipi differenti ta' ross fuq is-suq tal-Komunità, f'dak li jikkonċerna kemm il-produzzjoni tal-Komunità u l-kwantitajiet ipproċessati.[3] Barra minn hekk, ir-rapport jagħmel reviżjoni tal-importazzjonijiet tar-ross mitħun f'pakketti żgħar. Xi Stati Membri esprimew tħassib dwar il-konsekwenzi għas-settur tar-ross tal-UE biż-żieda kbira possibbli f'dawn it-tipi ta' importazzjonijiet wara d-dħul fis-seħħ tal-Ftehimiet. Il-Kummissjoni ħadet ir-responsabbiltà sabiex tidħol f'konsultazzjonijiet ma' kwalunkwe pajjiż tal-esportazzjoni li l-importazzjonijiet mingħandu ġewwa l-UE żdiedu b'iktar minn 25 % f'sena tas-suq partikolari. IL-FTEHIMIET Ħarsa ġenerali Il-ftehimiet mal-Indja u l-Pakistan ġew approvati mill-Kunsill fil-11 ta' Awwissu 2004[4]. Dawn stabbilixxew li r- ross Basmati mqaxxar jista' jiġi importat fl-UE bla dazju mill-1 ta' Settembru 2004. Il-ftehim mal-Istati Uniti ġie approvat mill-Kunsill fil-21 ta' Ġunju 2005[5] u japplika b’mod retroattiv, b'effett mill-1 ta' Marzu 2005, jiġifieri f'nofs is-sena tas-suq. Dan jistabbilixxi metodu ta' kalkolu għad-dazju tal-importazzjoni tan-Nazzjon l-Iktar Favorit (MFN) applikabbli għar- ross imqaxxar . Fl-aħħar, il-ftehim mat-Tajlandja, approvat mill-Kunsill fl-20 ta' Diċembru 2005[6], primarjament jikkonċerna il-mekkaniżmu ta' kalkolu tad-dazju tal-importazzjoni tal-MFN applikabbli għar- ross mitħun jew nofsu mitħun . Dan ġie applikat ukoll retroattiv, mill-1 ta' Settembru 2005. Għalkemm il-ftehim mal-Istati Uniti ma ffinalizzax in-negozjati dwar l-Artikolu XXVIII, se jkun eżaminat ukoll f'dan ir-rapport għax kien konkluż fl-istess qafas bħall-ftehimiet l-oħrajn. It-tabella li ġejja turi d-dazji applikabbli issa għall-importazzjonijiet tar-ross, wara d-dħul fis-seħħ tal-ftehimiet rispettivi. Tabella 1: Dazji marbuta u applikati għar-ross Tip ta’ ross: | Dazju marbut (€/t) | Dazju applikat (€/t) | Bil-qoxra (ma għandux x'jaqsam mal-ftehimiet) | 211 | 211 | Imqaxxar Li minnu basmati | 65 -- | 30 – 42.5 - 65 0 | Mitħun jew nofsu mitħun | 175 | 145 - 175 | Imkisser | 128 | 65 | Ross Basmati mqaxxar – ftehimiet mal-Indja u l-Pakistan Il-ftehimiet mal-Indja u l-Pakistan stabbilixxew il-kundizzjonijiet li ġejjin għall-importazzjoni ta' bla dazju u mingħajr kwota tar-ross Basmati mqaxxar: - 9 varjanti speċifiċi huma eliġibbli (4 Pakistani u 8 Indjani, fejn 3 minnhom huma komuni għaż-żewġ pajjiżi) - il-Basmati importat irid ikollu ċertifikat ta' awtentiċità maħruġ mill-awtoritajiet relevanti Indjani jew Pakistani. Ross imqaxxar - il-ftehim mal-Istati Uniti tal-Amerika Il-ftehim mal-Istati Uniti stabbilixxa livell ta' referenza annwali ta' 431 678 t għall-importazzjonijiet tar-ross imqaxxar li mhuwiex Basmati. Dan kien ir-riżultat tal-kalkolu li ġej, ibbażat fuq id-dejta medja għall-1999 sal-2002: - importazzjonijiet ta' ross imqaxxar fl-UE-25 mill-pajjiżi kollha - bit-tnaqqis tal-importazzjonijiet tal-Basmati fl-UE-25 - miżjuda b'10 % - u esportazzjonijiet ta' ross mitħun skont l-Ipproċessar Attiv mill-UE-15 lejn 10 Stati Membri li ngħaqdu mal-UE fl-2004. Iż-żidiet annwali ta' dan il-livell ta' referenza kienu iffissati għall-6 000 t għal kull sena tas-suq 2005/06, 2006/07 u 2007/08. Għas-snin sussegwenti, il-ftehim jipprovdi li l-partijiet ifittxu qbil sal-31 ta' Awwissu 2008. Madankollu, il-konsultazzjonijiet bejn il-Komunità u l-Istati Uniti għadhom għaddejin. Skont it-termini tal-ftehim, jekk l-importazzjonijiet tar-ross imqaxxar huma iktar minn 15 % inqas mil-livell ta' referenza f'sena tas-suq partikolari, il-KE se tapplika rata ta' tariffa ta' 30 €/t għall-perjodu tas-6 xhur ta' wara. Jekk l-importazzjonijiet huma iktar minn 15 % 'l fuq mil-livell ta' referenza, id-dazju għall-perjodu sussegwenti jiġi ffissat għal 65 €/t. Jekk l-importazzjonijiet qegħdin fil-medda ta' -15% u +15 %, id-dazju għall-perjodu sussegwenti jkun 42.5 €/t. Il-Kummissjoni teżamina darbtejn fis-sena l-ħtieġa ta' bidla fid-dazju tal-importazzjoni u, jekk ħemm bżonn, tiffissa dazju ġdid minn Settembru sa Marzu. Il-kalkolu li jsir f'nofs is-sena tas-suq huwa bbażat fuq il-kwantitajiet importati matul l-ewwel 6 xhur tas-sena tas-suq u nofs il-livell annwali ta' referenza. Ir-raġunament għal dan il-qbil huwa li jkun hemm provediment għal żieda fid-dazju tad-dħul meta l-importazzjonijiet jiżdiedu u vice versa , sabiex tingħata protezzjoni adegwata lis-settur tar-ross Ewropew, filwaqt li, fl-istess ħin, jinfetaħ is-suq għall-pajjiżi terzi. L-importazzjonijiet tar-ross imqaxxar kollu li mhuwiex Basmati fl-UE mill-pajjiżi kollha, kemm jekk huma preferuti jew le, jitqiesu għall-iskop tal-kalkolu tal-kwantitajiet importati. Id-dejta hija bbażata fuq il-liċenzji tad-dħul matul il-perjodu kkonċernat. Ross mitħun jew nofsu mitħun - ftehim mat-Tajlandja Il-ftehim konkluż mat-Tajlandja dwar ross mitħun jew nofsu mitħun jipprovdi mekkaniżmu simili imma iktar sempliċi bħal dak tar-ross imqaxxar. Il-livell ta' referenza tal-importazzjoni annwali qiegħed iffissat għal 337 168 t, li jirrapreżenta l-medja tal-importazzjonijiet tar-ross mitħun jew nofsu mitħun fl-UE-25 mill-pajjiżi kollha fl-2001/2002 u l-2003/2004, miżjud b'10 %. Ma sarx provediment għaż-żidiet annwali f'dan il-livell ta' referenza. Skont it-termini ta' dan il-ftehim, normalment japplika dazju ta' 145 €/t. Madankollu, jekk l-importazzjonijiet tar-ross mitħun jew nofsu mitħun huma iktar minn 15 % 'l fuq mil-livell ta' referenza annwali f'sena tas-suq partikolari, il-KE tapplika rata ta' tariffa ta' 175 €/t matul il-perjodu ta' 6 xhur sussegwenti. Inkella, id-dazju għall-perjodu sussegwenti jibqa 145 €/t. Bħal fil-każ tar-ross imqaxxar, dan l-eżerċizzju jiġi repetut f'nofs is-sena tas-suq, abbażi tal-kwantitajiet importati matul l-ewwel 6 xhur tas-sena tas-suq u 47 % tal-livell annwali ta' referenza (158 469 t). L-importazzjonijiet fl-UE mill-pajjiżi kollha, kemm jekk huma preferuti jew le, jitqiesu għall-iskopijiet tal-kalkolu tal-kwantitajiet importati. Id-dazju li jirriżulta huwa MFN, u huwa applikabbli għall-importazzjonijiet kollha tar-ross mitħun jew nofsu mitħun mill-pajjiżi kollha bl-eċċezzjoni ta' dawk li saru taħt arranġamenti preferenzjali jew kwoti tad-dħul. Barra minn hekk, il-ftehim tat-Tajlandja ipprovda għall-Kwota ta' Rata Tariffarja (TRQ) ta' 13 500 tunnellata ta' ross mitħun jew nofsu mitħun bla dazju. Ross imkisser - ftehim mat-Tajlandja Il-ftehim mat-Tajlandja ikkonkluda wkoll id-dazju tad-dħul applikat għar-ross imkisser, li ġie ffissat għal 65 €/t minn Settembru 2005 (tnaqqis minn 128 €/t matul is-sena preċedenti). Barra minn hekk, it-80 000 tunnellata TRQ ta' qabel żdiedu għall-100 000 tunnellata. L-IMPATT FUQ IS-SUQ TAL-UE Id-dejta Sabiex issir valutazzjoni tal-impatt tal-ftehimiet, dan ir-rapport jeżamina l-implimentazzjoni tagħhom mill-2004/05 sal-2007/08, l-aħħar sena tas-suq kompluta li għaliha d-dejta hija disponibbli. F'dak li jikkonċerna l-volumi tal-importazzjoni, ir-rapport jikseb it-tagħrif minn żewġ sorsi kumplimentarji: - il-bażi tad-dejta tal-liċenzji tad-dħul, li tagħti lok li ssir distinzjoni bejn l-importazzjonijiet preferenzjali u dawk li mhumiex preferenzjali. - Il-bażi tad-dejta Comext, li tagħti l-kwantitajiet attwalment importati, kif innotifikati mill-Istati Membri lill-Eurostat. Filwaqt li l-Comext jagħmel distinzjoni bejn l-importazzjonijiet skont il-pajjiż tal-oriġini tagħhom, ma jagħmilx distinzjoni bejn l-importazzjonijiet preferenzjali u dawk li mhumiex preferenzjali. Għad-dejta tal-karta tal-bilanċ u sabiex jiġu analizzati t-tendenzi tas-suq, tintuża d-dejta tal-Eurostat u notifikazzjonijiet oħrajn tal-Istati Membri. Id-dejta li tikkonċerna l-importazzjoni tar-ross mitħun f'pakketi żgħar tinġib mis-sistema ta' sorveljanza tat-TAXUD tal-Kummissjoni, li daħlet fis-seħħ fi Frar tal-2006. Id-dejta hija għalhekk disponibbli biss għal sentejn tas-suq kompluti, 2006/07 u 2007/08, u tirreferi għall-kwantitajiet attwalment importati. Il-flussi tad-dħul abbażi tal-liċenzji maħruġa Ross Basmati mqaxxar Bejn l-2004/05 u l-2005/06 l-importazzjonijiet tal-Basmati baqgħu stabbli għall-270 000 t, u żdiedu għall-324 000 t fl-2006/07 u għall-368 000 t sena wara. Sar-raba' sena tas-suq tal-applikazzjoni tal-ftehim tal-Basmati, l-importazzjonijiet kienu għalhekk żdiedu b'xi 100 000 t (+36 %). Tabella 2: Importazzjonijiet tar-ross Basmati mqaxxar - liċenzji maħruġa (f'tunnellati) Sena tas-suq | l-Indja | il-Pakistan | Total | 2004/05 | 203 896 | 66 933 | 270 829 | 2005/06 | 217 630 | 53 196 | 270 826 | 2006/07 | 285 037 | 38 567 | 323 604 | 2007/08 | 269 087 | 99 073 | 368 160 | Ross imqaxxar Mid-dħul fis-seħħ tal-importazzjonijiet, il-kwantità ta' ross imqaxxar apparti l-Basmati li għalih inħarġu l-liċenzji tad-dħul żdiedet minn 398 121 t fl-2004/05 għal 550 741 t fl-2007/08. Parti sostanzjali ta' din iż-żieda ta' 37 % (148 778 t) irriżultat mit-tkabbir għar-Rumanija u l-Bulgarija, li flimkien impurtaw 78 985 t ta' ross imqaxxar fl-2004/05, qabel daħlu fl-UE. Iż-żieda netta fl-importazzjonijiet tal-UE bejn l-2004/05 u l-2007/08 kienet, għalhekk, mhux iktar minn 70 000 t. L-aġġustament għad-dazju tad-dħul ta' nofs is-sena (f'Settembru u Marzu) effetwa r-rata li fiha n-negozjanti applikaw għal-liċenzji tad-dħul matul perjodi differenti tas-sena. Per eżempju, jekk kienet antiċipata żieda fid-dazju wara Marzu, l-applikazzjonijiet żdiedu fi Frar, sabiex jieħdu vantaġġ mir-rata iżjed baxxa tad-dħul, u vice versa . B'riżultat, fl-ewwel nofs tas-snin tas-suq tal-2005/06 u l-2006/07, meta d-dazju kien baxx, fil-medja inħarġu l-liċenzji għall-67 % tal-kwantitajiet annwali. Għalkemm kienu viċin ta' jew 'il fuq mil-livell ta' referenza ta' nofs is-sena matul l-ewwel nofs ta' kull sena tas-suq, l-importazzjonijiet għas-sena tas-suq kompluta kienu inqas mil-livell ta' referenza fl-2004/05 u l-2005/06[7]. Mill-aħħar tal-2007 l-impożizzjoni fuq ir-restrizzjonijiet tal-esportazzjoni minn uħud mill-esportaturi tar-ross prinċipali tad-dinja influwenzat ukoll iż-żmien tal-importazzjonijiet, għaliex in-negozjanti Ewropej fittxew li jevitaw kwalunkwe disturb possibbli fl-istokkijiet. Fl-2004/05 u l-2005/06, madwar kwart tal-importazzjonijiet tal-UE tar-ross imqaxxar ġew mill-Istati Uniti. L-importazzjonijiet niżlu f'daqqa wara l-iskoperta tal-LL Rice 601, varjetà modifikata ġenetikament (MĠ) li mhijiex approvata fl-UE[8], fil-kunsinji tar-ross mill-Istati Uniti f'Awwissu tal-2006. L-importaturi tal-UE sussegwentament qalbu għal pajjiżi oħra, bħat-Tajlandja u l-Urugwaj (rispettivament 22 % u 13 % tat-total fl-2007/08). Tabella 3: Importazzjonijiet tar-ross mqaxxar - liċenzji maħruġa (f'tunnellati) Sena tas-suq | L-ewwel nofs tas-sena | It-tieni nofs tas-sena | Total | 2004/05 | 212 335 | 185 787 | 398 121 | 2005/06 | 288 203 | 128 679 | 416 882 | 2006/07 | 352 615 | 171 533 | 524 149 | 2007/08 | 307 448 | 243 293 | 550 741 | Ross mitħun jew nofsu mitħun L-importazzjonijiet tar-ross mitħun jew nofsu mitħun żdiedu gradwalment sal-2007/08, meta kien hemm żieda f'daqqa ta' 50% (+150,000 t) fuq is-sena preċedenti. B'riżultat, f'Marzu tal-2008 id-dazju żdied għal 175 €/t minn 145 €/t, li kien il-livell tiegħu mill-ftehim li daħal fis-seħħ f'Settembru tal-2005[9]. Tabella 4: Importazzjonijiet tar-ross mitħun jew nofsu mitħun - liċenzji maħruġa (f'tunnellati) Sena tas-suq | L-ewwel nofs tas-sena | It-tieni nofs tas-sena | Total | 2004/05 | 94 228 | 99 909 | 194 137 | 2005/06 | 123 923 | 122 081 | 246 005 | 2006/07 | 140 766 | 142 891 | 283 657 | 2007/08 | 203 597 | 227 842 | 431 438 | Ross imkisser L-importazzjonijiet tar-ross imkisser żdiedu minn 185 000 t fl-2005/06 għall-ammont stabbli ta' 240 000 t fl-2006/07 u l-2007/08[10]. Minħabba l-kwalità għolja tar-ross prodott fl-UE, hemm defiċit kbir fir-ross imkisser fuq is-suq tal-UE. Barra minn hekk, parti sostanzjali tal-importazzjonijiet tar-ross imkisser (iktar minn 55 % tal-medja) issir bla dazju jew b’dazju mnaqqas taħt ftehimiet preferenzjali u t-TRQs. Tabella 5: Importazzjonijiet tar-ross imkisser - liċenzji maħruġa (f'tunnellati) Sena tas-suq | Total | 2004/05 | 123 191 | 2005/06 | 185 701 | 2006/07 | 240 365 | 2007/08 | 236 320 | Importazzjonijiet f'pakketi żgħar L-importazzjonijiet tar-ross mitħun jew nofsu mitħun f'pakketti żgħar naqas b'7 %, minn 35 812 t għall-33 275 t, bejn l-2006/07 u l-2007/08. Jekk ma jitqiesux il-kwantitajiet tal-importazzjonijiet li huma inqas minn 500 t fis-sena, l-importazzjonijiet f'pakketti żgħar tal-Pakistan biss żdiedu b'iktar minn 25 %. Mill-2006/07 sal-2007/08 raw żieda ta' 62 %, minn 3 915 t għall-6 326 t. Dan huwa konformi maż-żieda ta' 58 % tal-importazzjonijiet totali tar-ross mitħun jew nofsu mitħun mill-Pakistan fl-istess perjodu: minn 26 235 t fl-2006/07 għall-41 378 t fl-2007/08. Is-suq tar-ross tal-UE Il-produzzjoni Mill-2004/05 sal-2007/08 iż-żoni tar-ross tal-UE kienu relattivament stabbli bejn 413 000 ettaru u 428 000 ettaru. Raw xi tibdil mill-Indica għall-Japonica, minħabba għadd ta' konsiderazzjonijiet strutturali u ta' żmien qasir. Iż-żoni tal-Indica raw tnaqqis temporanju meta uħud ġew effetwati ħażin mill-kundizzjonijiet estremi tat-temp[11]. Fl-2004/05 il-produzzjoni tal-UE-25 tar-ross mitħun ekwivalenti laħqet rekord ta' 1.68 miljun t, li reġgħat naqset għall-1.54 miljun t fl-2005/06, u 1.59 miljun t fl-2006/07. Meta l-UE kellha 27 Stat Membru, il-produzzjoni kienet diġà laħqet 1.68 miljun t fl-2007/08. Matul il-perjodu tal-2004/05 sal-2007/08 il-produzzjoni tar-ross Indica tal-UE naqset b'178 000 t f'ekwivalenti mitħun. Dan in-nuqqas fil-provvista tal-UE ġie kumpensat bl-importazzjonijiet tal-Indica. Matul l-istess perjodu, il-produzzjoni tal-Japonica żdiedet b'ammont simili, parzjalment minħabba il-kontribuzzjoni taż-żewġ Stati Membri l-ġodda. L-istokkijiet ta' intervent tar-ross bil-qoxra, li kien 600 000 tunnellata fil-bidu tal-2004/05, kienu spiċċaw sal-2007/08. Il-konsum Qabel l-aħħar tkabbir, l-UE-25 ikkunsmat bejn 2.3 u 2.4 miljun tunnellata ross (f'ekwivalenti mitħun) kull sena. Id-dħul tal-Bulgarija u r-Rumanija ġab żieda ta' 100-120 000t. Il-konsum tal-UE-27 issa qiegħed madwar 2.5 miljun tunnellata fis-sena, bħala medja. Il-kwantitajiet ipproċessati Il-kwantitajiet ipproċessati mill-industrija Ewropea jistgħu jkunu kkalkulati bħala s-somma tar-ross li għadu fil-ħliefa tal-UE flimkien mal-kummerċ bażiku tar-ross bil-qoxra u dak imqaxxar, aġġustati bl-evoluzzjoni tal-istokkijiet, kollha espressi f'ekwivalenti mitħun. Il-kwantitajiet ipproċessati baqgħu fil-medda ta' 2.22 sa 2.34 miljun tunnellata u jiddependu l-iktar mir-ross prodott fl-UE. Dan jissuġerixxi li l-industrija żammet il-livell tagħha u ma kinetx affetwata ħażin ħafna mill-MFN differenti u l-ftehimiet tal-kummerċ preferenzjali. Partikolarment, iż-żieda sostanzjali fl-importazzjonijiet tar-ross mitħun jew nofsu mitħun fl-2007/08 tidher li ma kelliex impatt negattiv fuq l-industrija. Il-prezzijiet tas-suq Il-prezzijiet mondjali Filwaqt li l-prezz tat-Thai 100 % B, li huwa kkunsidrat bħala l-prezz mondjali uffiċjali għar-ross Indica, evolva f'medda ta' 250 $/t sa 350 $/t mill-2004, f'Novembru tal-2007 beda juri xejra 'l fuq li laħqet il-quċċata b'1050 $/t f'Mejju tal-2008. Għandu jkun innutat li jsir biss kummerċ internazzjonali ta' xi 6 % sa 8 % tal-produzzjoni dinjija tar-ross. Għal din ir-raġuni l-prezzijiet mondjali jirreaġixxu wisq anke għall-bidliet żgħar fil-bilanċ tas-suq u d-deċiżjonijiet tal-politika. Apparti mill-influwenza tal-prezzijiet dejjem jiżdiedu għall-prodotti oħrajn, it-talba ikbar minħabba d-determinazzjoni ta' xi swieq Asjatiċi sabiex iżommu stokkijiet ikbar ta' ross, flimkien mal-miżuri restrittivi tal-esportazzjoni li ttieħdu minn uħud mill-esportaturi prinċipali (il-Vjetnam, l-Indja, ...) sabiex jevitaw l-inflazzjoni tal-prezz tal-ikel, kienu biżżejjed sabiex jipprovokaw eskalazzjoni tal-prezz. Wara li laħqu l-quċċata f'Mejju tal-2008, il-prezzijiet tat-Thai 100 % B niżlu bil-mod, imma għadhom ma niżlux wisq taħt il-500 $/t. Għall-pajjiżi oħra, bħall-Vjetnam, il-prezzijiet reġgħu lura għal-livelli ta' qabel iż-żieda tagħhom. Ir-ross Japonica ra żieda simili fl-istess perjodu. Madankollu, minħabba l-assenza riċenti mis-suq ta' uħud mill-parteċipanti prinċipali (ċaħda tal-esportazzjoni fl-Eġittu, nixfa fl-Awstralja) il-kwotazzjonijiet tal-California Japonica baqgħu f'livelli għolja ħafna, madwar 1 150 $/t. Prezzijiet tal-UE Mir-riforma tal-2003, il-prezzijiet tar-ross bil-qoxra tal-UE kienu sew 'il fuq mill-prezz tal-intervent (li huwa ffissat għal 150 €/t) u globalment segwew xejra 'l fuq. Matul is-sena tas-suq 2004/05, il-prezzijiet kienu relattivament stabbli f'medda ta' 160 €/t sa 240 €/t, skont il-pajjiż tal-oriġini u t-tip tar-ross. Madankollu, fis-snin sussegwenti wieħed seta’ jara xi żidiet drammatiċi. Fl-2006, il-prezzijiet medji tal-Japonica Taljan qabżu għal 293 €/t, primarjament minħabba l-produzzjoni iktar baxxa tal-Japonica flimkien mat-talba ikbar tal-UE wara t-tkabbir tal-2004. L-Indica Taljan telgħa wkoll għal 235 €/t, filwaqt li l-prezzijiet Spanjoli baqgħu prattikament l-istess bħas-sena preċedenti. Fl-2007, filwaqt li l-prezzijiet Taljani raw varjazzjonijiet sostanzjali, il-prezzijiet Spanjoli żdiedu matul is-sena, speċjalment għall-Indica, li għalih l-prezzijiet żdiedu għal 240 €/t, primarjament minħabba l-kundizzjonijiet estremament ħżiena f'Andalusia, li hija waħda mill-produtturi primarji tal-Indica. L-ikbar qabża fil-prezzijiet tar-ross bil-qoxra tal-UE, madankollu dehret fl-2008, fil-kuntest tal-prezzijiet mondjali esaġerati. F'Mejju tal-2008 l-Indica u l-Japonica Taljani laħqu l-480 €/t, jiġifieri iktar minn 3 darbiet il-prezz tal-intervent[12]. Fi Stati Membri oħra li huma produtturi (il-Greċja, Franza u l-Portugall) għalkemm ma laħqux l-istess livelli għolja, il-prezzijiet tar-ross bil-qoxra kienu sew 'il fuq mill-prezz tal-intervent tal-2004/05. Ilhom ma jinxtraw il-kwantitajiet mill-aġenziji tal-intervent mill-2004. Il-provvista tar-ross tal-UE Filwaqt li fuq kollox, il-produzzjoni tar-ross tal-UE baqgħet stabbli mill-2004/05, f'termini relattivi l-importazzjonijiet żdiedu fl-importanza. Iż-żieda fl-importazzjonijiet tar-ross mitħun jew nofsu mitħun hija iżjed (minn 177 000 t fl-2004/05 għall-394 000 t fl-2007/08) minn dik għar-ross li mhux proċessat (minn 537 000 t għall-683 000 t fl-istess perjodu). L-importazzjonijiet totali tar-ross, f'ekwivalenti mitħun, żdiedu minn 715 000 t fl-2004/05 għall-1 077 000 t fl-2007/08. Dan kien parzjalment minħabba t-tkabbir tal-UE bil-Bulgarija u r-Rumanija. Tabella 6: Tqassim tal-provvista tar-ross fl-UE-27 (f'000 tunnellata tal-ekwivalenti mitħun) [pic] (1) L-importazzjonijiet tar-ross mitħun jew nofsu mitħun(2) L-importazzjonijiet tar-ross bil-qoxra u dak imqaxxar(3) Produzzjoni tal-UE RIMARKI TAL-EGħLUQ F'termini ġenerali, il-ftehimiet konklużi ssodisfaw l-iskop tagħhom, f'dak li jikkonċerna li l-protezzjoni tas-suq tal-UE żdiedet fejn l-importazzjonijiet kibru u vice versa . Mill-2004, il-varjazzjonijiet fil-produzzjoni tar-ross tal-UE kienu relatati mat-tibdil fil-klima u l-għażliet tal-produtturi iktar milli mill-flussi tal-importazzjoni. L-importazzjonijiet żdiedu sabiex iwieġbu għall-konsum tal-UE li żdied. Il-kwantitajiet ipproċessati mill-industrija tar-ross tal-UE baqgħu stabbli. Matul l-istess perjodu li qed jiġi eżaminat, il-ftehimiet ma kellhomx effett ħażin fuq l-industrija tat-tħin tar-ross tal-UE. Madankollu, fl-2008 il-prezzijiet mondjali tar-ross – flimkien ma' prezzijiet oħra taċ-ċereali – laħqu quċċati li qatt ma ntlaħqu qabel, li ġew riflessi fil-prezzijiet tas-suq intern tal-UE. [1] Nota ta' fuq 7 tal-Iskeda tal-KE. [2] Bl-eċċezzjoni tal-importazzjonijijet koperti bi ftehimiet preferenzjali eż. EBA, jew il-kwoti tal-importazzjoni eż. l-Eġittu. [3] Għal aktar tagħrif dettaljat dwar is-settur tar-ross tal-UE ara: http://ec.europa.eu/agriculture/markets/rice/index_en.htm [4] Id-Deċiżjonijiet tal-Kunsill 2004/617/KE u 2004/618/KE (ĠU L 279, 28.8.2004, p. 17 u 23). [5] Deċiżjoni tal-Kunsill 2005/476/KE (ĠU L 170, 1.7.2005, p. 67). [6] Deċiżjoni tal-Kunsill 2005/953/KE (ĠU L 346, 29.12.2005, p. 24). [7] Is-sitwazzjoni hija differenti fl-2008/09: l-importazzjonijiet fl-ewwel nofs tas-sena (Settembru 2008 sa Frar 2009) kienu tant inqas mill-perjodu preċedenti li d-dazju tnaqqas għal 42.5 €/MT minn Marzu 2009. L-istokkijiet tal-aħħar tal-UE li kienu iktar għoljin fis-sena tas-suq 2007/08 rendew il-flussi tad-dħul iktar bil-mod, li setgħu kienu effetwati wkoll mill-kriżi finanzjarja. [8] Id-Deċiżjonijiet tal-Kummissjoni 2006/578/KE u 2006/601/KE taw struzzjonijiet lill-Istati Membri sabiex jieħdu l-miżuri neċessarji sabiex jiżguraw li l-prodotti li jinstab li fihom ir-ross ġenetikament modifikat LL RICE 601 ma jitqiegħdux fis-suq tal-UE. [9] Fl-2008/09 l-importazzjonijiet tar-ross naqsu u d-dazju għar-ross mitħun reġa ġie ffissat għal-livell iktar baxx ta' 145 €/t minn Marzu tal-2009. [10] Fl-2008/09 il-pass tal-importazzjonijiet s'issa kien 33 % 'l fuq mir-rata tas-snin ta' qabel. [11] Fl-2008/09 iż-żoni tal-Indica żdiedu b'20 %. [12] Mill-bidu tas-sena tas-suq tal-2008/09, il-prezzijiet kollha tar-ross bil-qoxra fl-Italja u Spanja kienu b'mod stabbli 'l fuq minn 300 €/t, u f'ċerti każijiet laħqu iktar minn 500 €/t.