EUR-Lex Access to European Union law
This document is an excerpt from the EUR-Lex website
Document 52008DC0698
Communication from the Commission to the Council, the European Parliament, the European Economic and Social Committee and the Committee of the Regions on the practical implementation of Health and Safety at Work Directives 92/57/EEC (temporary and mobile sites) and 92/58/EEC (safety signs at work)
Komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u llll-Kumitat tar-Reġjuni dwar l-implimentazzjoni prattika tad-Direttivi dwar is-Saħħa u s-Sigurtà fil-Post tax-Xogħol 92/57/KEE (siti temporanji u mobbli) u 92/58/KEE (provvista ta' sinjali ta' sigurtà fuq ix-xogħol)
Komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u llll-Kumitat tar-Reġjuni dwar l-implimentazzjoni prattika tad-Direttivi dwar is-Saħħa u s-Sigurtà fil-Post tax-Xogħol 92/57/KEE (siti temporanji u mobbli) u 92/58/KEE (provvista ta' sinjali ta' sigurtà fuq ix-xogħol)
/* KUMM/2008/0698 finali */
Komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u llll-Kumitat tar-Reġjuni dwar l-implimentazzjoni prattika tad-Direttivi dwar is-Saħħa u s-Sigurtà fil-Post tax-Xogħol 92/57/KEE (siti temporanji u mobbli) u 92/58/KEE (provvista ta' sinjali ta' sigurtà fuq ix-xogħol) /* KUMM/2008/0698 finali */
[pic] | KUMMISSJONI TAL-KOMUNITAJIET EWROPEJ | Brussel 6.11.2008 KUMM(2008) 698 finali KOMUNIKAZZJONI MILL-KUMMISSJONI LILL-KUNSILL, LILL-PARLAMENT EWROPEW, LILL-KUMITAT EKONOMIKU U SOĊJALI EWROPEW U LlLL-KUMITAT TAR-REĠJUNI dwar l-implimentazzjoni prattika tad-Direttivi dwar is-Saħħa u s-Sigurtà fil-Post tax-Xogħol 92/57/KEE (siti temporanji u mobbli) u 92/58/KEE (provvista ta' sinjali ta' sigurtà fuq ix-xogħol) KOMUNIKAZZJONI MILL-KUMMISSJONI LILL-KUNSILL, LILL-PARLAMENT EWROPEW, LILL-KUMITAT EKONOMIKU U SOĊJALI EWROPEW U LlLL-KUMITAT TAR-REĠJUNI dwar l-implimentazzjoni prattika tad-Direttivi dwar is-Saħħa u s-Sigurtà fil-Post tax-Xogħol 92/57/KEE (siti temporanji u mobbli) u 92/58/KEE (provvista ta' sinjali ta' sigurtà fuq ix-xogħol) 1. INTRODUZZJONI Din il-komunikazzjoni ssegwi impenn tal-Kummissjoni[1] biex tevalwa l-implimentazzjoni tal-qafas regolatorju bl-għan li ttejbu. Hija msejsa prinċipalment fuq ir-rapporti nazzjonali pprovduti mill-Istati Membri[2] u rapport tal-esperti indipendenti li janalizza l-implimentazzjoni taż-żewġ Direttivi fis-setturi privati u/jew pubbliċi ekonomiċi kkonċernati. Hija msejsa wkoll fuq ir-riżultati tal-kampanji Ewropej ta' spezzjoni dwar is-sigurtà fis-settur tal-kostruzzjoni mwettqa fil-15-il Stat Membru fl-2003 u l-2004, fuq statistika Ewropea ta' dan l-aħħar fir-rigward tal-inċidenti fuq ix-xogħol, u fuq il-lezzjonijiet li l-Kummissjoni kisbet mis-sorveljanza tat-traspożizzjoni u l-applikazzjoni tad-Direttivi. L-evalwazzjoni tkopri t-traspożizzjoni u l-implimentazzjoni taż-żewġ Direttivi: Id-Direttiva tal-Kunsill 92/57/KEE tal-24 ta' Ġunju 1992 dwar il-ħtiġijiet minimi ta' sigurtà u saħħa li għandhom jiġu implimentati f'postijiet ta' kostruzzjoni temporanji jew mobbli[3] u d-Direttiva tal-Kunsill 92/58/KEE tal-24 ta' Ġunju 1992 dwar il-ħtiġijiet minimi għall-provvista ta' sinjali tas-sigurtà u/jew is-saħħa fix-xogħol[4], fil-15-il pajjiż tal-UE biss. Il-Kummissjoni temmen li din l-evalwazzjoni għandha tkun għajn ta' tagħrif utli ħafna għat-12-il Stat Membru l-ġdid fl-applikazzjoni taż-żewġ Direttivi. 2. L-EFFETTI LEGALI 2.1. Id-Direttiva 92/57/KEE Ir-rapporti nazzjonali mill-Istati Membri[5] juru li l-impatt formali tad-Direttiva 92/57/KEE (is-simplifikazzjoni, ir-razzjonalizzazzjoni, il-konsolidazzjoni u l-kodifikazzjoni) ippermetta lill-Istati Membri li jgħaqdu, jikkonsolidaw u jaġġornaw il-leġiżlazzjoni nazzjonali eżistenti. Madankollu, xi wħud mill-Istati Membri jgħidu li d-Direttiva ma kellha l-ebda impatt fuq il-prinċipji legali/amministrattivi. L-impatt sostanzjali fuq il-leġiżlazzjoni nazzjonali kien konsiderevoli fl-Istati Membri kollha. Saħansitra anki dawk l-Istati Membri li qalu li diġà kellhom leġiżlazzjoni nazzjonali sofistikata introduċew emendi biex ikopru l-kunċetti bażiċi tad-Direttiva. Id-Direttiva wasslet għal żidiet sostanzjali fil-leġiżlazzjoni nazzjonali kollha dwar is-saħħa u s-sigurtà fil-post tax-xogħol, b'mod partikolari fir-rigward tad-disinn u l-koordinazzjoni tas-sit, il-pjan tas-saħħa u s-sigurtà u l-fajl dwar is-saħħa u s-sigurtà. L-istrateġija l-ġdida għall-prevenzjoni, b'mod partikolari, id-definizzjoni tal-obbligi u r-responsabbiltajiet tad-diversi partijiet fuq sit tal-kostruzzjoni, qed tidher bħala waħda li kellha impatt ewlieni. Id-Direttiva 92/58/KEE Il-parti l-kbira tal-Istati Membri sempliċement ħassru d-dispożizzjonijiet bikrin dwar sinjali ta' sigurtà li jittrasponu d-Direttiva 77/576/KEE u biddluhom b'leġiżlazzjoni ġdida li tittrasponi d-Direttiva 92/58/KEE. Xi wħud jistqarru li d-dispożizzjonijiet il-ġodda ssupplementaw, wessgħu jew aġġornaw il-qafas tagħhom legali u wasslu għall-konsolidazzjoni tad-dispożizzjonijiet nazzjonali. L-emendi sostantivi ewlenin jintroduċu regoli ġodda dwar is-sinjali, inklużi komunikazzjoni verbali u sinjali bl-idejn, sinjali relatati mas-saħħa li mhumiex koperti mid-Direttiva ta' qabel, u obbligi ġodda għal min iħaddem biex jgħarraf, iħarreġ u jikkonsulta lill-ħaddiema; huma jestendu wkoll l-ambitu tad-Direttiva għas-setturi kollha tal-attività. 3. żIEDA FL-GħARFIEN U MIżURI LI JAKKUMPANJAW GħAD-DIRETTIVI 92/57/KEE U 92/58/KEE Ladarba ż-żewġ Direttivi ġew adottati, il-Kummissjoni u l-Istati Membri ppubblikawhom u pprovdew parir dwar l-implimentazzjoni tagħhom fuq is-siti tal-kostruzzjoni u fuq il-provvista ta' sinjali fuq il-post tax-xogħol. Is-Sena Ewropea għas-Sigurtà, l-Iġjene u l-Ħarsien tas-Saħħa fix-Xogħol fl-1992, il-Ġimgħat Ewropej għas-Saħħa u s-Sigurtà u l-kampanji nazzjonali għaż-żieda tal-għarfien kienu partikolarment kruċjali fit-tixrid tat-tagħrif u f'li jagħmlu lil dawk responsabbli konxji mill-obbligi tagħhom. L-Aġenzija Ewropea għas-Sigurtà u s-Saħħa fil-Post tax-Xogħol, imwaqqfa fl-1994[6], impenjat ruħha fit-tixrid ta' tagħrif mal-Ewropa kollha u fiż-żieda fl-għarfien u min-naħa tagħha stabbiliet il-Forum Ewropew dwar is-Sigurtà fil-Kostruzzjoni biex tippromwovi l-iskambju tal-esperjenza bejn l-atturi fis-settur, u, b'mod partikolari, bejn l-intrapriżi żgħar u ta' daqs medju. Il-Kumitat tal-Ispetturi Għolja tax-Xogħol (SLIC)[7] ippropona l-idea tal-inizjattivi għall-infurzar u ż-żieda fl-għarfien (Kampanji Ewropej ta' spezzjoni). L-Istati Membri introduċew pjanijiet estensivi biex jippromwovu ħarsien attiv, iżidu l-għarfien tal-prevenzjoni integrata, u jfasslu linji ta' gwida prattiċi biex jgħinu lil min iħaddem u lill-ħaddiema jikkonformaw mal-leġiżlazzjoni l-ġdida. F'xi Stati Membri dawn l-attivitajiet kienu mmirati lejn atturi ewlenin bħal pereżempju l-Iżviluppaturi. Federazzjonijiet professjonali, tredjunjins ta' ħaddiema u assoċjazzjonijiet ta' periti u inġiniera wkoll għarrfu lill-membri tagħhom dwar il-leġiżlazzjoni l-ġdida, permezz ta' seminars, laqgħat, fuljetti u mezzi ta' xandir oħra bil-miktub. Fl-aħħar, xi kumpaniji kbar tal-kostruzzjoni fasslu t-tagħrif tagħhom stess għall-ħaddiema u għas-sotto-kuntratturi tagħhom. 4. IT-TRASPOżIZZJONI Minkejja konsultazzjoni fil-fond minn qabel tal-partijiet soċjali, u adozzjoni unanima mill-Kunsill, il-maġġoranza tal-Istati Membri naqqsu milli jilħqu d-dati tal-għeluq tat-traspożizzjoni għaż-żewġ Direttivi, li kellhom riperkussjonijiet konsiderevoli fuq il-livelli ta' implimentazzjoni prattika fil-post tax-xogħol[8]. Wara t-traspożizzjoni, il-Kummissjoni ssorveljat il-konformità u nediet diskussjonijiet mal-awtoritajiet nazzjonali biex tiċċara u ssolvi kwalunkwe problema u biex tagħmel il-korrezzjonijiet meħtieġa. Fejn meħtieġ, hija nediet proċeduri ta' ksur skont l-Artikolu 226 KE. L-ilmenti lill-Kummissjoni servew ta' tagħrif siewi waqt li setgħet tidentifika punti dgħajfa fil-leġiżlazzjoni nazzjonali. 4.1. Id-Direttiva 92/57/KEE Id-Direttiva ta' implimentazzjoni 92/57/KEE hija kwistjoni teknika u amministrattiva kumplessa; L-Istati Membri jirrevedu u jaġġornaw il-leġiżlazzjoni tagħhom b'mod regolari. Dan jispjega għalfejn, f'xi wħud mill-Istati Membri, id-Direttiva ġiet trasposta b'mod frammentat ħafna f'bosta biċċiet ta' leġiżlazzjoni (iktar minn 40 f'xi każijiet) li jikkumplikaw l-evalwazzjoni. L-evalwazzjoni żvelat differenzi fil-leġiżlazzjoni nazzjonali ġejjin mill-qafas regolatorju ta' qabel u mill-fatt li d-Direttiva tistipula rekwiżiti minimi u tħalli lill-Istati Membri liberi li jżommu jew li jistabbilixxu livelli ogħla ta' ħarsien[9]. Il-problemi ewlenin ta' konformità identifikati kienu relatati mal-ambitu tal-leġiżlazzjoni, mad-definizzjonijiet, mal-ħatra ta' koordinaturi, mat-tħejjija u t-twettiq tal-proġetti, u mar-responsabbiltajiet tal-Iżviluppaturi, mas-sorveljaturi tal-proġetti, u mal-koordinaturi u ma' min iħaddem. Madankollu, f'għadd ta' Stati Membri, il-leġiżlazzjoni marret lil hinn mir-rekwiżiti minimi tad-Direttiva 92/57/KE, iċċarat ċerti kwistjonijiet ta' koordinazzjoni u stipulat proċeduri għal konformità effettiva. Il-problemi ta' konformità identifikati u r-rata għolja immens ta' inċidenti fuq ix-xogħol fis-settur tal-kostruzzjoni jissuġġerixxu li jeżistu xi diffikultajiet li wieħed jifhem id-Direttiva 92/57/KEE, diffikultajiet li jsiru agħar minħabba fil-kumplessità tal-miżuri nazzjonali ta' implimentazzjoni. Strumenti addizzjonali li ma jorbtux f'livell Ewropew biex jgħinu lill-atturi kollha jifhmu aħjar l-obbligi u d-drittijiet tagħhom jistgħu jkunu mezzi utli għat-titjib tal-applikazzjoni nazzjonali tad-Direttiva. Il-Kummissjoni għalhekk bdiet taħdem, f'kooperazzjoni mill-qrib mal-Kumitat Konsultattiv[10] u mal-professjonisti varji fis-setturi, biex tfassal gwida li ma torbotx għall-applikazzjoni tad-Direttiva. | 4.2. Id-Direttiva 92/58/KEE Min-natura tagħha, din id-Direttiva ġiet trasposta virtwalment fl-ittra fil-maġġoranza kbira tal-Istati Membri. Il-ftit każijiet ta' traspożizzjoni potenzjalment inkompatibbli ssolvew permezz ta' kuntatti mal-awtoritajiet kompetenti, mingħajr il-ħtieġa ta' aktar azzjoni legali. 5. AZZJONI FIL-QASAM: L-IMPLIMENTAZZJONI PRATTIKA TAD-DIRETTIVA 92/57/KEE Evalwazzjoni tal-qagħda fuq is-siti turi li hemm stampa irregolari: f'xi Stati Membri, l-implimentazzjoni tad-Direttiva għenet tabilħaqq biex ittejjeb il-kundizzjonijiet tas-saħħa u s-sigurtà u biex tevita inċidenti, filwaqt li f'oħrajn għad irid isir ħafna biex jintlaħqu r-rekwiżiti u biex jinkisbu l-benefiċċji sħaħ ta' prevenzjoni effettiva. Minkejja l-isforzi kollha li saru, l-istatistika tal-inċidenti fuq ix-xogħol hija inkontestabbli: il-kostruzzjoni għadu settur b'riskju għolji, bid-doppju ta' inċidenti bħala r-rata medja għas-setturi kollha ta' attività u bi 2,5 darbiet aktar inċidenti fatali[11]. Id-Direttiva tagħti lill dawk kollha attivi fuq sit ta' kostruzzjoni rwol ewlenija fil-prevenzjoni. L-implimentazzjoni tagħha ġiet għalhekk evalwata fir-rigward tal-influwenza li kull grupp għandu fuq il-prevenzjoni ta' u l-ħarsien mir-riskji ta' fuq ix-xogħol. Il-konklużjonijiet ewlenin huma kif ġej: L-iżviluppaturi Id-Direttiva timponi obbligi varji fuq l-Iżviluppaturi biex jimplimentaw miżuri ta' ħarsien għas-saħħa u s-sigurtà. Dawn l-obbligi jikkawżawlhom xi tħassib. L-Iżviluppaturi jinqasmu f'diversi kategoriji, skont: - is-settur ikkonċernat: pubbliku jew privat; - id-daqs tas-sit: kbir, medju jew żgħir; - il-frekwenza tal-prestazzjoni tal-kostruzzjoni jew xogħlijiet tal-inġinerija ċivili: regolari jew okkażjonali; - l-entità legali: l-individwi, il-kumpaniji tal-kostruzzjoni jew l-iżviluppaturi, l-aġenziji tal-akkomodazzjoni pubblika. L-isforz li l-kategoriji differenti tal-Iżviluppaturi jpoġġu fil-prevenzjoni jvarja b'mod konsiderevoli, minħabba fid-differenzi fl-għarfien tagħhom tal-leġiżlazzjoni, fl-allokazzjoni tar-riżorsi tagħhom għall-prevenzjoni u fil-motivazzjoni tagħhom. L-individwi li jaġixxu bħala Żviluppaturi fuq siti okkażjonali, żgħar ġeneralment ma jkunux jafu dwar l-obbligi ta' prevenzjoni tagħhom, filwaqt li Żviluppaturi ewlenin li jaħdmu regolarment fuq siti kbar normalment jafu x'inhuma l-obbligi tagħhom u jkunu jistgħu jassumu rwol attiv fil-prevenzjoni ta' riskji fuq ix-xogħol. Dawn l-Iżviluppaturi tal-aħħar huma konvinti li l-prevenzjoni hija essenzjali u għandha fl-aħħar mill-aħħar tiffranka, anki jekk dawn ifittxu li jnaqqsu l-ispiża kemm jista' jkun. Il-problema ewlenija li dawn l-Iżviluppaturi jgħidu li għandhom hija ż-żieda fl-ispejjeż ikkawżata mil-leġiżlazzjoni l-ġdida u, b'mod partikolari, bil-koordinazzjoni. B'kuntrast ma' dan, l-individwi li jwettqu xogħol okkażjonali mhumiex lesti li jimpenjaw ruħhom għall-prevenzjoni, li jqisuha bħala restrizzjoni finanzjarja u burokratika, u jemmnu li r-responsabbiltà tagħhom tispiċċa hekk kif jiffirmaw kuntratt ta' kostruzzjoni. Din il-problema, madankollu, mhijiex ġejja direttament mid-Direttiva, li tippermetti lill-Istati Membri jassenjaw ir-responsabbiltà għall-prevenzjoni skont it-tip u d-daqs tal-proġett ta' kostruzzjoni. In-nuqqas ta' ippjanar u r-restrizzjoni fil-ħin issemmew diversi drabi bħala fatturi li jfixklu bil-kbir il-prevenzjoni tal-inċidenti u l-mard. L-Iżviluppaturi li jinsistu fuq skadenzi eċċessivament qosra kienu ta' spiss ikkwotati bħala l-kawża ta' dawn il-problemi. Għalkemm id-Direttiva ma twaqqafx lil persuna naturali jew legali milli twettaq bosta ħidmiet fl-istess ħin, il-kombinazzjoni tar-rwoli bħal dawk ta' żviluppatur u koordinatur tidher li toħloq problemi prattiċi. Żviluppatur ta' spiss ma jkunx fil-qagħda li jwettaq ir-rwol ta' koordinatur, pereżempju, minħabba li hu jew hi ma jkollux/jkollhiex il-ħiliet jew l-għarfien rilevanti. Il-qagħda f'xi wħud mill-Istati Membri tiżvela l-ħtieġa li wieħed jgħarraf, iħarreġ u jżid l-għarfien fost il-kategoriji differenti ta' Żviluppaturi skont id-daqs tas-sit (żgħir), l-entità legali (individwi), u n-natura tax-xogħol (okkażjonali jew regolari). Jeħtieġ li l-awtoritajiet nazzjonali u l-assoċjazzjonijiet professjonali jmexxu f'dan il-qasam. Xi wħud mill-Istati Membri diġà ħadu xi passi biex jiżguraw li standards tajba ta' sigurtà u ta' saħħa fix-xogħol jintgħarfu kif xieraq f'kuntratti ta' xiri pubbliku. Din il-prattika għandha tkun segwita minn Stati Membri oħra. L-Iżviluppaturi – bħal dawk li għandhom ir-riżorsi ekonomiċi u finanzjarji biex iwettqu x-xogħlijiet – kienu maħsuba bħala li għandhom ir-rwol ewlieni fis-sistema ta' prevenzjoni skont id-Direttiva. Madankollu, dawn ta' spiss ma jkunux mgħammra bl-għarfien u l-ħiliet meħtieġa, u għalhekk id-Direttiva tistipula li dawn jinvolvu atturi oħra, mingħajr ma tevadi r-responsabbiltà tagħhom. Is-sorveljaturi tal-proġetti Ta' spiss il-klijent jassumi wkoll ir-rwol ta' sorveljatur tal-proġett. Biex titjieb il-ġestjoni tal-prevenzjoni fejn bosta intrapriżi jaħdmu fuq sit bħala sottokuntratturi, il-kuntrattur ewlieni responsabbli għax-xogħol jista' jaġixxi bħala sorveljatur tal-proġett fi ħdan it-tifsira tad-Direttiva 92/57/KEE. Bħala regola, is-sorveljaturi ta' proġett huma familjari mal-koordinazzjoni ta' kwistjonijiet ta' sigurtà u saħħa matul l-eżekuzzjoni ta' proġett iżda b'dispjaċir jgħarrfu li s-sigurtà ma titqiesx biżżejjed kif suppost fit-tfassil u t-tħejjija, u jħossu li r-responsabbiltajiet tas-sorveljatur u l-klijent għandhom ikunu definiti b'mod aktar ċar. Xi intrapriżi japprezzaw il-valur tal-koordinazzjoni iżda mhux il-formalitajiet amministrattivi li fiha, u jiġbdu l-attenzjoni lejn il-konfużjoni bejn il-ħidmiet tal-koordinaturi u dawk tas-servizzi ta' prevenzjoni. L-intrapriżi l-kbar li saritilhom żjara jafu r-rekwiżiti sew. Huma ta' spiss jużaw is-servizzi ta' prevenzjoni, u l-assoċjazzjonijiet professjonali tagħhom jipprovduhom b'tagħrif regolari. L-intrapriżi ż-żgħar u dawk mikro għandhom tendenza li ma tantx ikunu jafu daqstant ir-regoli, waqt li dawk li jafuhom ma tantx huma mħeġġa li jieħdu taħt idejhom il-prevenzjoni b'mod ġenerali u l-koordinazzjoni b'mod partikolari. L-intrapriżi ż-żgħar u ta' daqs medju li mhumiex membri ta' assoċjazzjonijiet professjonali huma limitati fit-tagħrif, fatt li jirristrinġi l-għarfien tagħhom dwar is-sigurtà u s-saħħa fix-xogħol. Barra minn hekk, aktar ma tkun twila l-katina sotto-kuntrattwali, aktar ikun kbir in-nuqqas ta' tagħrif. Fl-għajnejn tal-Iżviluppaturi u s-sorveljaturi tal-proġetti, il-ktajjen twal sotto-kuntrattwali jdgħajfu r-responsabbiltà. L-intrapriżi ż-żgħar biss fil-bidu tal-katina sotto-kuntrattwali jistgħu jibbenefikaw mill-esperjenza ewlenija tal-kuntrattur u minn prattika tajba. Il-prevenzjoni hija ta' spiss żviluppata ħafna fil-kumpaniji sotto-kuntrattwali li jispeċjalizzaw f'ħidmiet partikolari (eż. l-istallazzjoni tal-gass jew il-manutenzjoni tal-lift). Il-kollaborazzjoni b'saħħitha tul il-katina tal-provvista tirrifletti l-fatt li l-proġetti ppjanati, ġestiti u kkoordinati b'mod effettiv għandhom possibbiltà akbar li jkunu b'saħħithom u sikuri. X'aktarx li huma wkoll ikollhom il-possibbiltà li jgawdu mill-benefiċċji kummerċjali fir-rigward ta' inqas ħin mitluf minħabba fi ġranet barra mix-xogħol, inqas ħela u inqas ċans li wieħed jonqos li jilħaq il-baġit. Kulħadd fil-katina tal-provvista – l-Iżviluppaturi kif ukoll il-kuntratturi – għandhom jiftakru dan u jaġixxu skont dan. Minħabba fid-diffikultajiet li jintlaħqu l-intrapriżi li huma l-aktar 'il bogħod mill-kuntrattur ewlieni, is-sotto-kuntrattar jibqa' kwistjoni li għandha tiġi ttrattata fil-fond. Dan jeffettwa wkoll l-infurzar tad-dispożizzjonijiet ta' saħħa u sigurtà. Bħala parti mill-istrateġija Komunitarja għall-2007-12 il-Kummissjoni għandha tqis din il-problema. | Periti, inġiniera u ditti ta' konsultazzjoni Filwaqt li din id-Direttiva ma tirreferix b'mod espliċitu għall-periti, l-inġiniera jew għad-ditti ta' konsultazzjoni, dan il-grupp ġie vvalutat minħabba li min ifassal għandu rwol ewlieni fl-istadju tat-tħejjija tal-proġett u huwa importanti ħafna fil-prevenzjoni tar-riskji fuq ix-xogħol fuq is-siti tal-kostruzzjoni. Il-periti u l-inġiniera li jfasslu l-proġetti għamluha ċara li jafu r-rekwiżiti iżda li ma jaqblux mija fil-mija mal-miżuri ġodda imposti. Xi wħud ma jaqblux mal-fatt li l-klijent jaħtar koordinatur għall-istadju tat-tfassil, billi, dan, fil-fehma tagħhom, ixekkel il-libertà kreattiva tagħhom. F'xi whud mill-Istati Membri, madankollu, il-periti u l-inġiniera ta' spiss jaġixxu ta' koordinaturi fl-istadju tat-tfassil. Dan tejjeb bil-kbir il-kundizzjonijiet tax-xogħol fuq is-siti, permezz tal-provvediment ta' ħarsien kollettiv u l-provvista ta' sinjali. Il-maġġoranza ta' diżenjaturi ta' proġetti jaċċettaw il-filosofija wara l-koordinazzjoni iżda ma tantx huma lesti li jerfgħu responsabbiltajiet addizzjonali. Xi wħud jirrapportaw problemi f'li jikkonvinċu l-Iżviluppaturi u s-sorveljaturi tal-proġetti biex jieħdu l-miżuri meħtieġa ta' ħarsien. Il-periti wkoll jikkritikaw il-formalitajiet ta' ċerti liġijiet nazzjonali fuq siti żgħar u l-interpretazzjonijiet differenti li dawn jistgħu jwasslu. Il-prevenzjoni fir-rigward tas-saħħa u s-sigurtà ta' spiss ma tkunx integrata fil-proġett fl-istadju tat-tfassil minħabba li l-kundizzjonijiet ta' sigurtà matul l-eżekuzzjoni u l-użu u l-manutenzjoni sussegwenti mhumiex fattur ewlieni fl-għażliet ta' tfassil/arkitettoniċi. Għad hemm ħafna xi jsir fl-Istati Membri kollha qabel mal-kultura ta' prevenzjoni trabbi l-għeruq b'mod effettiv fl-istadju tat-tfassil. Biex jinkiseb dan, l-awtoritajiet nazzjonali kompetenti għandhom jagħmlu sforz biex iħarrġu d-disinjaturi tal-proġetti fl-iskejjel vokazzjonali u fl-università, waqt li jagħmlu l-prevenzjoni parti ewlenija mill-kurrikulu. | Il-koordinaturi Ir-rwol tal-koordinatur skont id-Direttiva 92/57/KEE huwa li jikkoordina l-implimentazzjoni tad-diversi dispożizzjonijiet għas-saħħa u s-sigurtà ta' dawk involuti fit-tħejjija tal-proġetti u l-istadji ta' eżekuzzjoni tal-proġett. Id-Direttiva ma tiddefinixxix il-kompetenzi meħtieġa biex wieħed jaġixxi ta' koordinatur matul it-tħejjija tal-proġetti u l-istadji tal-eżekuzzjoni. Jeżistu differenzi kbar minn Stat Membru għall-ieħor. Xi wħud iddefinixxu l-kompetenzi u/jew il-ħiliet tal-koordinatur f'ħafna dettall, xi kultant kienu anki jeħtieġu li jkollhom taħriġ speċifiku jew kombinazzjoni ta' taħriġ u esperjenza. Oħrajn jeħtieġu biss li jkun hemm koordinaturi, li formalment ma jeħtieġu l-ebda livell speċifiku ta' kompetenza. Il-kompetenzi meħtieġa għall-koordinaturi mill-Istati Membri fit-twettiq ta' xogħolhom huma differenti ħafna, u għalhekk l-istandard fil-koordinazzjoni jvarja minn Stat Membru għal ieħor. L-evalwazzjoni mwettqa fil-qasam tissuġġerixxi li l-implimentazzjoni għandha tibbenefika jekk l-Istati Membri jintroduċu xi kriterji minimi għall-kompetenza skont id-daqs u/jew it-tip/in-natura tar-riskji fuq is-sit. Kriterji tal-qalba għall-evalwazzjoni u t-turija tal-kompetenza tal-koordinaturi huma essenzjali. Il-Kummissjoni għandha, f'kooperazzjoni mal-Istati Membri, tinkoraġġixxi l-iżvilupp ta' kriterji bħal dawn. | L-atturi kollha fis-settur tal-kostruzzjoni jindikaw li l-koordinatur jinħatar fi stadju wisq tard fil-proċedimenti. Ir-rappreżentanti tal-ħaddiema ġibdu l-attenzjoni lejn nuqqas serju ta' koordinazzjoni fl-istadju tat-tfassil. L-evalwazzjoni turi wkoll li fl-fażi ta' tħejjija tal-proġett hemm nuqqas kbir ta' koordinazzjoni (u ta' kontroll); il-koordinazzjoni hija effettiva biss fl-istadju tal-eżekuzzjoni. Minħabba li t-tħejjija tal-proġetti ma tqisx il-prevenzjoni tar-riskji fuq ix-xogħol qabel il-finalizzazzjoni tat-tfassil, in-nuqqas ta' ppjanar għall-prevenzjoni jkollu jiġi rimedjat fl-istadju tal-eżekuzzjoni. Din tista' tkun waħda mir-raġunijiet għar-rati ferm għolja ta' inċidenti f'dan is-settur meta mqabbla ma' oħra. Din il-qagħda xxekkel ukoll il-prevenzjoni ta' riskji fuq ix-xogħol tul l-eżistenza ta' sit, b'mod partikolari fir-rigward tal-operazzjoni, iż-żamma, il-manutenzjoni u anki t-twaqqigħ. Jekk il-leġiżlazzjoni nazzjonali tagħmilha rekwiżit għall-miżuri ta' prevenzjoni marbuta mas-suġġett tal-kuntratt li jkunu inkorporati b'mod sistematiku fl-ispeċifikazzjonijiet tekniċi għall-ħruġ ta' offerti u fil-klawżoli tal-prestazzjoni tal-kuntratti u l-ġestjoni tal-kwalità tal-kuntratti mill-awtoritjiet kuntrattwali, dan jista' jgħin fil-bidla tal-attitudni f'dan il-qasam. Jeżistu bosta xenarji fl-istadju tal-eżekuzzjoni tal-proġett. Xi Stati Membri jistabbilixxu li l-koordinatur għandu jkun il-perit jew l-inġinier li fassal il-bini jew il-kuntrattur prinċipali fuq is-sit (is-sorveljatur). Fi Stati Membri oħra, il-koordinaturi jistgħu jkunu persuni indipendenti naturali jew legali jew jistgħu jkunu ta' organizzazzjonijiet ta' Żviluppaturi jew ta' kumpaniji. Anki meta hemm koordinazzjoni fuq is-sit, ta' sikwit din tkun minima. Nuqqas ta' koordinazzjoni fit-tfassil teffettwa l-kwalità tal-ħidma tal-koordinatur fl-istadju tal-eżekuzzjoni. Koordinaturi maħtura fuq siti partikolari ta' spiss jaffaċċjaw problemi ta' saħħa u sigurtà li huma diffiċli li wieħed isolvi minħabba li ma kinux tqiesu matul it-tħejjija tal-proġett. Dan huwa kkumplikat bi problemi tal-awtoritajiet. Xi drabi atturi oħra ma jifhmux x'inhu xogħol il-koordinatur, u l-impjegati għal rashom u s-sotto-kuntratturi fuq is-sit huma wisq inqas inklinati li jgħarrfu l-awtorità tal-koordinatur. B'kuntrast ma' dan, ir-relazzjonijiet bejn il-koordinatur u l-ħaddiema huma tajbin ħafna meta l-koordinatur huwa indipendenti (jiġifieri ma jkun marbut la mas-sorveljatur tal-proġett u lanqas mal-perit jew mal-inġiniera, eċċ.), li jagħmilha aktar faċli għall-ħaddiema li jgħidulu jew jgħidulha dwar kwalunkwe problema ta' prevenzjoni li għandu mnejn ma jkunux jixtiequ jirrappurtaw lill-persuna inkarigata mis-sit. Huwa aktar faċli li wieħed jibni din il-fiduċja jekk il-koordinatur iżur is-sit b'mod regolari. Fuq siti kbar is-sitwazzjoni b'mod ġenerali hija aċċettata, u hemm koordinazzjoni effettiva u effiċjenti. Madankollu, fuq is-siti żgħar u ta' daqs medju s-sitwazzjoni hija differenti ħafna, u d-Direttiva rari hija implimentata. Fuq siti żgħar privati, il-koordinazzjoni hija kważi injorata b'mod invarjat u hija limitata għall-'konformità amministrattiva'; il-koordinatur huwa ta' spiss maħtur tard u l-intrapriżi ż-żgħar ġeneralment iħarsu lejn il-koordinazzjoni bħala ‘fakoltattiva’. Id-diffikultajiet għall-koordinazzjoni effettiva fuq is-siti ż-żgħar għandhom jiġu ttrattati meta jiġu żviluppati l-istrumenti li ma jorbtux, biex il-ħidmiet essenzjali ta' prevenzjoni jitwettqu b'mod sempliċi u proporzjonali mad-daqs u r-riskji tas-sit. | Il-ħaddiema F'ħafna Stati Membri, il-ħaddiema fis-settur tal-kostruzzjoni huma ta' diversi nazzjonalitajiet, li jwassal għal problemi ta' komunikazzjoni u komprensjoni. Ostakoli minħabba fil-lingwa jagħmluha aktar diffiċli għall-ħaddiema li jsegwu l-istruzzjonijiet ta' sigurtà u saħħa għall-użu ta' makkinarju u sustanzi kimiċi. Il-ħaddiema migranti jidhru li huma inqas imħarrġa u mgħarrfa minn oħrajn fir-rigward tal-prevenzjoni tar-riskji ta' fuq ix-xogħol. Ta' sikwit in-nuqqas ta' kultura ta' prevenzjoni u l-mod differenti kif wieħed iħares lejn il-valuri fundamentali jistgħu jwasslu li l-ħaddiema jieħdu riskji inaċċettabbli. It-taħriġ u l-edukazzjoni dwar il-prevenzjoni fil-qasam tas-saħħa u s-sigurtà huma fundamentali biex itejbu din is-sitwazzjoni. Ir-rappreżentanti tal-ħaddiema tal-kostruzzjoni ta' kuljum għandhom rwol ewlieni fil-konformità mal-prattika tajba ta' prevenzjoni, b'mod partikolari fuq siti żgħar fejn is-sorveljatur tal-proġett u l-koordinatur ma jkunux dejjem preżenti. Ir-rappreżentanti tal-ħaddiema qed jaraw progress ġenwin fil-miżuri tal-iġjene (kmamar fejn wieħed ibiddel, canteens, faċilitajiet sanitarji) u fl-aċċess għas-siti, bis-saħħa tad-Direttiva. Il-ħaddiema jirrappurtaw li ma jifhmux ir-rwol tal-koordiatur jew l-obbligi fl-istadju tat-tfassil, iżda li huma aktar familjari max-xogħol tal-koordinatur fl-istadju tal-eżekuzzjoni. L-iżviluppaturi jgħidu li l-ħaddiema ma jadottawx attitudni proattiva għall-prevenzjoni, iżda huma sodisfatti li jaqdu dmirijiethom mingħajr ma jinkwetaw dwar l-effetti fuq is-saħħa u s-sigurtà tagħhom. L-evalwazzjoni fuq is-sit turi li, flimkien ma' nuqqas ġenerali ta' taħriġ, hemm problemi kbar ta' komunikazzjoni u komprensjoni, li jmorru għall-agħar meta ħaddiema migranti jkunu qed jaħdmu fuq is-sit. Il-programmi ta' taħriġ tat-tip tas-‘Safe Pass’[12] jista' jservi ta' eżempju li wieħed jista' jsegwi. Il-fatt li jkun hemm ir-rappreżentanti tal-ħaddiema fuq is-sit jista' jtejjeb il-kundizzjonijiet tax-xogħol. Il-ħaddiema ta' sikwit iħarsu lejn l-ispezzjonijiet fuq is-sit bħala parti mid-dmirijiet tal-koordinaturi, b'mod partikolari fir-rigward tal-użu ta' tagħmir personali protettiv. | Il-ħaddiema għal rashom In-numru ta' ħaddiema għal rashom fuq is-siti qiegħed dejjem jiżdied fl-Istati Membri kollha b'riżultat ta' xejra li qed tikber lejn is-sotto-kuntrattar. Din is-sitwazzjoni hija indirizzata fl-Artikolu 10 tad-Direttiva 92/57/KEE, li titlob li l-ħaddiema għal rashom fuq is-siti jirrispettaw ċerti obbligi u jsegwu l-istruzzjonijiet tal-koordinaturi. Ħaddiema għal rashom impenjati fir-rinnovazzjoni għall-Iżviluppaturi privati qed joħolqu problema prinċipali minħabba li dawn huma persuni li qed jipprovdu s-servizz, u mhux sotto-kuntratturi; dawn is-soltu jaħdmu mingħajr l-ebda superviżjoni teknika u ta' sikwit lanqas biss ikunu familjari mal-leġiżlazzjoni. L-awtoritjiet kompetenti għandhom joħolqu kampanji speċifiċi ta' żieda fl-għarfien li jimmiraw lejn il-ħaddiema għal rashom. L-Iżviluppaturi jew kumpaniji li jikru lill-ħaddiema li jaħdmu għal rashom iridu jassumu r-responsabbiltà għas-saħħa u s-sigurtà tagħhom u għall-impatt tal-azzjonijiet tagħhom fuq ħaddiema oħra. | Is-servizzi ta' ħarsien B'mod ġenerali, il-leġiżlazzjoni l-ġdida inkoraġġiet żieda fl-għadd ta' konsulenti għas-sigurtà u s-saħħa fix-xogħol, iżda dawn huma involuti biss fil-fażi tal-eżekuzzjoni tal-proġett, mhux fil-fażijiet tat-tfassil u tat-tħejjija. F'xi wħud mill-Istati Membri, is-servizzi ta' ħarsien kienu attivi ħafna f'li jipprovdu t-taħriġ u t-tagħrif, b'mod partikolari għall-koordinaturi u għall-Iżviluppaturi. Madankollu, huma jistqarru li ma għandhomx ir-riżorsi meħtieġa biex jintervjenu fl-istadju tat-tfassil. Is-servizzi ta' ħarsien għandhom jingħataw rwol aktar attiv fit-taħriġ u t-tagħrif fuq is-sit ta' kostruzzjoni għall-ħaddiema. 5.1. Dokumenti meħtieġa: prevenzjoni ta' veru jew burokrazija biss? Waħda mill-kritiki ewlenin immirati lejn id-Direttiva 92/57/KEE hija ż-żieda fil-piż amministrattiv u l-ispejjeż sproporzjonati li dan jinvolvi għall-intrapriżi, b'mod partikolari għall-intrapriżi ż-żgħar u ta' daqs medju. Id-Direttiva tistipula tliet tipi ta' dokumenti mfassla biex iqisu bis-sħiħ il-kwistjonijiet ta' saħħa u sigurtà fil-fażijiet kollha tal-kostruzzjoni: mit-tfassil għall-eżekuzzjoni, matul l-użu u l-manutenzjoni, matul ir-rinnovazzjoni u l-immontar u, fejn xieraq, sat-twaqqigħ. In-notifika minn qabel Skont l-Artikolu 3 tad-Direttiva 92/57/KEE, f'ċerti każijiet għandha titfassal notifika minn qabel mill-iżviluppatur jew mis-sorveljatur li tagħti tagħrif amministrattiv dwar is-sit ta' kostruzzjoni tal-proġett u tiġi esposta fuq is-sit ta' kostruzzjoni. Fil-maġġoranza l-kbira tal-każijiet, din in-notifika għandha tingħata lill-awtoritjiet kompetenti minn qabel fil-limitu ta' żmien stipulat mil-leġiżlazzjoni nazzjonali. Huwa ta' sikwit il-koordinatur, li jinħatar meta l-proġett ikun diġà wasal fi stadju avvanzat, li jħeġġeġ lill-iżviluppatur biex jikkonforma ma' dan ir-rekwiżit. Il-mod kif din in-notifika minn qabel titfassal u tintbagħat lill-awtoritjiet kompetenti huwa differenti minn Stat Membru għal ieħor. Ta' sikwit, huwa l-koordinatur li jagħmel dan ix-xogħol anki jekk id-Direttiva tistipula li dan huwa xogħol l-iżviluppatur jew is-sorveljatur tal-proġett. Skont id-Direttiva, in-notifika minn qabel hija maħsuba biex tagħti tagħrif basiku li jidentifika s-sit ta' kostruzzjoni u l-atturi ewlenin, flimkien ma' l-għadd ta' ħaddiema, intrapriżi u persuni li jaħdmu għal rashom fuq is-sit, iżda din hija meħtieġa biss għal ċerti kategoriji ta' siti. Mill-angolu tal-ħarsien, dan id-dokument jiġbed l-attenzjoni tal-iżviluppatur u/jew tas-sorveljatur tal-proġett lejn id-dmirijiet tagħhom u jippermetti lill-awtoritajiet kompetenti li jiżguraw li dawn id-dmirijiet qed jitwettqu mill-istadju tat-tfassil 'il quddiem, qabel ma jinbeda x-xogħol. Il-maġġoranza tal-Istati Membri jeħtieġu sistematikament notifika minn qabel, għalkemm skont id-Direttiva din hija biss meħtieġa għal ċerti siti. Biex tonqos il-burokrazija, l-Istati Membri jistgħu jikkunsidraw li jgħaqqdu n-notifika minn qabel ma' proċeduri amministrattivi oħra, bħall-għoti ta' permess ta' kostruzzjoni. | Il-pjan għas-sigurtà u s-saħħa L-Artikolu 3(2) tad-Direttiva 92/57/KEE jistipula li l-iżviluppatur jew is-sorveljatur tal-proġett jiżgura li jitfassal pjan għas-sigurtà u s-saħħa qabel ma jitwaqqaf is-sit ta' kostruzzjoni. Huwa l-koordinatur li jfassal il-pjan, waqt li jispeċifika r-regoli li japplikaw fuq is-sit. L-evalwazzjoni turi li l-pjanijiet ivarjaw fil-kwalità minn dawk eċċellenti għal dawk bilkemm aċċettabbli. F'xi każijiet, il-koordinatur għall-istadju ta' tħejjija jistieden lill-koordinatur għall-istadju ta' eżekuzzjoni biex jgħin fid-definizzjoni ta' miżuri ta' ħarsien li għandhom jiġu applikati. Il-pjan għas-sigurtà u s-saħħa għandu jkopri metodi siguri ta' ħidma li għandhom jintużaw fuq is-sit tal-kostruzzjoni u għandu jkun aġġornat jekk meħtieġ. Dan hu b'mod speċjali importanti jekk ammont kbir ta' xogħol ikun qed jiġi sotto-kuntrattat. Il-pjan huwa ta' sikwit imsejjes fuq dokumenti standard, b'mod partikolari fil-każi ta' siti żgħar u intrapriżi żgħar, u għalhekk isir formalità amministrattiva aktar milli wieħed li jirrifletti miżuri speċifiċi meħtieġa għal sit partikolari. F'każijiet oħra, mhuwiex aktar minn lista ta' prattika ġenerali tajba ta' ħarsien, indipendentement mis-sit. L-intrapriżi li jadottaw din l-attitudni jargumentaw li sit ta' kostruzzjoni jinbidel il-ħin kollu u dan ma jiġġustifikax ippjanar iddettaljat ħafna billi dan malajr jista' ma jibqax jgħodd. Madankollu, għadd kbir ta' inċidenti fis-settur iseħħu minħabba f'ippjanar fqir u nuqqas ta' previżjoni. Dan japprova li l-pjan għas-sigurtà u s-saħħa mhuwiex biss rekwiżit burokratiku iżda huwa kruċjali biex itejjeb il-kundizzjonijiet ta' xogħol, fejn il-pjan jevolvi f'konformità ma' bidliet fil-qagħda tas-sit ta' kostruzzjoni. Barra minn hekk, fil-prattika, l-Istati Membri rari użaw il-possibilità mogħtija mid-Direttiva għall-eżenzjoni tal-intrapriżi mit-tfassil ta' pjan ta' sigurtà u saħħa, għalkemm din hija għażla fil-każijiet kollha għajr dawk speċifikati fid-Direttiva (xogħol i jinvolvi riskji partikolari u xogħol li għalih teħtieġ notifika minn qabel). Dan huwa aktar impressjonanti billi m'hemm l-ebda għarfien ta' jew referenza għal din il-possibilità meta l-piżijiet amministrattiva tad-Direttiva jiġu diskussi. Biex jitħaffu l-ħidmiet tal-Iżviluppaturi u s-sorveljaturi tal-proġetti, gwida li ma torbotx għandha tkopri l-aspetti varji tal-pjan għas-sigurtà u s-saħħa u l-possibilitajiet mogħtija mid-Direttiva għall-eżenzjoni ta' intrapriżi mill-obbligu li jfasslu ċerti dokumenti fil-każijiet fejn ir-riskji ma jiġġustifikawx dan. | Il-fajl għas-sigurtà u s-saħħa Skont l-Artikolu 5 tad-Direttiva, il-koordinatur tal-proġett għandu jħejji fajl li jkun fih tagħrif rilevanti dwar is-sigurtà u s-saħħa li għandu jitqies matul kwalunkwe xogħol sussegwenti fuq il-proġett. Huwa każ rari li dan jitressaq fi tmiem il-fażi tat-tfassil. Ta' sikwit huwa l-koordinatur għall-istadju tal-eżekuzzjoni li jfasslu u li jagħtih lill-iżviluppatur meta x-xogħol ikun tlesta. Dan il-fajl ta' spiss jiġi mfixkel mal-pjan għas-sigurtà u s-saħħa, u x'aktarx li jitfassal bħala operazzjoni ta' rutina. Fil-każ ta' siti żgħar, madankollu, il-fajl għas-sigurtà u s-saħħa għandu jkun jixraq mat-tip ta' proġett, għandu jinżamm sempliċi u jkun fih biss tagħrif rilevanti dwar is-sigurtà u s-saħħa meħtieġ għall-użu sussegwenti. Id-Direttiva tippermetti b'mod espliċitu li l-kontenut tal-fajl jiġi mibdul biex ikun adattat għall-proġett. Xi atturi jħarsu lejn il-pjan għas-sigurtà u s-saħħa u l-fajl għas-sigurtà u s-saħħa bħala formalitajiet amministrattivi li ma jżidu l-ebda valur għas-saħħa u s-sigurtà fuq is-sit ta' kostruzzjoni. Huwa ċara li l-għan u l-importanza tal-fajl għas-sigurtà u s-saħħa biex jipprevjeni r-riskji ta' fuq ix-xogħol matul ħidma sussegwenti mhux qed jinftiehem kif suppost. Għal siti żgħar, id-dokumenti huma ta' sikwit kopji ta' mudelli standard li ma jirriflettux il-kundizzjonijiet attwali fuq is-sit u ma jżidu l-ebda valur fir-rigward tat-titjib tal-kundizzjonijiet ta' fuq ix-xogħol. Gwida li ma torbotx għandha tindirizza din il-problema bl-għan li tħaffef il-piż amministrattiv tal-intrapriżi mingħajr ma tnaqqas il-ħarsien, u li ttejjeb l-impenn lejn u s-sjieda tad-dokumenti tas-saħħa u s-sigurtà. | 5.2. Ir-responsabbiltà tad-diversi atturi fuq is-sit L-Artikolu 7 tad-Direttiva 92/57/KEE jistipula r-responsabbiltajiet tal-Iżviluppaturi, tas-sorveljaturi tal-proġetti u ta' min iħaddem. F'xi każijiet, il-liġijiet nazzjonali li jittrasponu d-Direttiva ma jiddeskrivux b'mod ċar l-impenji u r-responsabbiltajiet tal-Iżviluppaturi, tas-sorveljaturi tal-proġetti u ta' min iħaddem. Fil-prattika, dan ifisser li kull attur jinterpreta r-responsabbiltajiet tiegħu jew tagħha b'mod suġġettiv, u l-ħidmiet u r-responsabbiltajiet jistgħu għalhekk jiġu ddelegati minn attur wieħed għal ieħor: min ifassal jgħaddi r-responsabbiltajiet tiegħu lill-intrapriżi, li mbagħad jgħadduhom lis-sotto-kuntratturi; il-koordinatur fil-fażi ta' tħejjija jirtira hekk kif il-pjanijiet u l-ispeċifikazzjonijiet ikunu tlestew, anki jekk it-tfassil dettaljat ikun għadu ma tħejjiex. Evalwazzjoni fuq is-sit turi li l-Iżviluppaturi ta' sikwit jaħsbu li jistgħu jiddelegaw ir-responsabbiltà fir-rigward tas-sigurtà u s-saħħa fix-xogħol lill-perit jew lis-sorveljatur tal-proġett. Dan mhuwiex permess fl-Istati Membri fejn il-leġiżlazzjoni ta' traspożizzjoni tistipula li l-iżviluppatur u mhux is-sorveljatur tal-proġett huwa responsabbli għall-prevenzjoni. L-iżviluppaturi għadhom jemmnu li s-sorveljaturi tal-proġetti biss huma responsabbli għas-saħħa u s-sigurtà fis-sit. Dan il-fenomenu huwa b'mod partikolari mifrux fuq siti żgħar privati. 5.3. L-infurzar L-infurzar ta' leġiżlazzjoni nazzjonali li tittrasponi d-Direttiva 92/57/KEE huwa ġeneralment ir-responsabbiltà tal-ispettorati tax-xogħol fl-Istati Membri. Fl-2001, il-Kumitat tal-Ispetturi Għolja tax-Xogħol (SLIC) iddeċieda li jwettaq kampanja ta' infurzar mifruxa mal-UE kollha fis-settur tal-kostruzzjoni. L-ewwel kampanja saret fl-2003 f'dawk li kienu l-15-il-Stat Membru. Kienet kampanja ta' spezzjoni u ta' tagħrif dwar l-implimentazzjoni tad-Direttiva 92/57/KEE, b'enfasi partikolari fuq il-prevenzjoni ta' waqgħat mill-għoli. Il-kampanja ta' spezzjoni tal-2003 irrepetiet ruħha fl-2004 u twessgħet biex tinkludi t-trasport fuq il-post tax-xogħol, oġġetti li jaqgħu u l-irfigħ. Ir-riżultati tal-kampanja tal-2003 indikat li, fir-rigward tal-koordinazzjoni, tal-pjan ta' sigurtà u saħħa, tan-notifika minn qabel u tal-fajl tal-proġett, hemm korrelazzjoni pożittiva bejn id-daqs tas-sit u l-ammont ta' konformità mad-Direttiva, b'siti kbar (ta' 'l fuq minn 50 ħaddiem) jiksbu punti ferm aħjar minn siti żgħar. Għalkemm is-siti kbar huma aktar siguri minn dawk żgħar fil-prattika, l-ammont ta' konformità xorta għadu mhux sodisfaċenti (20-30 % tas-siti l-kbar mhumiex konformi, kontra 40-50 % tas-siti ż-żgħar). Ir-riżultati tal-kampanja tal-2004 ma kinux aħjar. Għall-kuntrarju, hemm evidenza li l-qagħda fis-siti ż-żgħar għandha mnejn marret kemxejn għall-agħar, li tikkonferma l-konklużjoni tal-2003 li huwa kruċjali għas-settur tal-kostruzzjoni li jagħti attenzjoni akbar fi kwistjonijet ta' sigurtà u saħħa u fit-titjib tal-kundizzjonijiet tax-xogħol. 6. AZZJONI FIL-QASAM: L-IMPLIMENTAZZJONI PRATTIKA TAD-DIRETTIVA 92/58/KEE Fil-maġġoranza tal-Istati Membri, l-atturi huma familjari mas-sinjali dwar is-sigurtà u s-saħħa, billi dawn diġà kienu qed jintużaw għall-adozzjoni tad-Direttiva 92/58/KEE. Kien hemm ftit li xejn bidliet fil-forma, fil-logos, fil-kuluri, eċċ., tas-sinjali li kienu jintużaw qabel, l-unika eċċezzjoni kienet ta' dawk li jindikaw il-post tal-ħruġ ta' emerġenzi fil-każ ta' nar. Fil-parti l-kbira tal-Istati Membri, min iħaddem jitlob parir qabel isir ix-xiri ta' ċerti tipi ta' sinjali. Ġeneralment, huma jistaqsu dwar it-tip ta' sinjali li għandhom jintużaw u l-aħjar post fejn dawn għandhom jitqiegħdu. Filwaqt li l-intrapriżi fil-parti l-kbira tal-Istati Membri kienu konxji sew mill-leġiżlazzjoni, ma kinux dejjem konformi magħha minħabba fl-assunzjoni ġenerali li l-leġiżlazzjoni kienet marġinali u supplementari. Bħala regola, l-intrapriżi kienu aktar familjari mas-sinjali ta' nar u ta' evakwazzjoni, billi dawn huma r-riskji l-aktar enfasizzati mill-awtoritajiet kompetenti u mill-kumpaniji tal-assikurazzjoni. Filwaqt li l-parti l-kbira tal-intrapriżi kienu jafu li għandhom ipoġġu s-sinjali għar-riskji, l-intrapriżi ż-żgħar kienu inqas mgħarrfa mill-intrapriżi l-kbar, u f'xi setturi, (eż. ażjendi agrikoli, restoranti u lukandi, siti ta' kostruzzjoni), il-konformità ma kinitx daqshekk mifruxa. Ir-riskji marbuta direttament mal-attività ewlenija tal-intrapriża (pereżempju, riskji kimiċi fil-kumpaniji tal-kimika) huma mmarkati aktar minn riskji oħra (bħal dawk tat-traffiku fit-toroq jew tat-trasportazzjoni ta' tagħbijiet tqal). | Il-leġiżlazzjoni hija applikata b'mod aktar konsistenti f'intrapriżi ġodda milli f'dawk aktar antiki . Madankollu, anki f'każijiet fejn il-leġiżlazzjoni l-ġdida dwar is-sinjali qed tiġi rispettata, jiġu nnutati ħafna nuqqasijiet fil-prattika. Ta' sikwit is-sinjali mhumiex imġedda. Il-konsegwenzi tan-nuqqas ta' konformità jistgħu jkunu serji ħafna. Nuqqas ta' sinjali li jindikaw vetturi fuq il-post tax-xogħol, tagħbija mdendla, drenaġġi miftuħa, riskji tal-elettriku, eċċ. ta' sikwit jistgħu jkunu l-kawża ta' inċidenti serji. | It-taħriġ speċifiku dwar it-tifsir tas-sinjali u tagħrif ieħor viżwali għall-ħaddiema ma jidhirx li huwa disponibbli b'mod ġenerali fil-maġġoranza tal-Istati Membri. F'bosta każijiet il-ħaddiema jirċievu taħriġ ġenerali u tagħrif dwar kwistjonijiet ta' sigurtà u saħħa, b'parti żgħira wisq iddedikata għas-sinjali. Il-każ speċifiku ta' ħaddiema migranti jeħtieġ li jiġi studjat, biex jiġi stabbilit il-limitu safejn dawn jifhmu s-sinjali. Ċerti problemi jinqalgħu ukoll fir-rigward tal-interpretazzjoni tas-sinjali tal-‘Ħruġ ta' emerġenza’ u tat-‘Telefon għas-salvataġġ u għall-ewwel għajnuna’, meta mqabbla ma' sinjali ta' ‘Tagħmir tat-tifi tan-nar’ u tat-‘Telefon f'każ ta' nar’. L-unika differenza bejn dawn iż-żewġ gruppi ta' sinjali hija l-kulur tal-isfond. 7. EVALWAZZJONI ġENERALI 7.1. L-effetti ewlenin pożittivi taż-żewġ Direttivi Id-Direttiva 92/57/KEE Fir-rapporti tagħhom nazzjonali l-Istati Membri jindikaw li d-Direttiva ta' implimentazzjoni 92/57/KEE qajmet l-għarfien dwar kwistjonijiet ta' sigurtà ta' saħħa fuq skala kbira u ġegħelithom jaġġornaw il-leġiżlazzjoni nazzjonali tagħhom. L-Istati Membri jħarsu lejn l-adozzjoni ta' din il-leġiżlazzjoni l-ġdida bħala indispensabbli, żvilupp pożittiv, utli, rilevanti, ġġustifikat u sodisfaċenti. Id-Direttiva 92/57/KEE kienet ta' benefiċċju kbir fir-rigward tat-titjib tal-kundizzjonijiet tax-xogħol fis-siti ta' kostruzzjoni. B'mod partikolari, hija tagħat spinta lill-kultura ta' prevenzjoni f'dan il-qasam, li huwa ‘punt iswed’ fl-inċidenti fuq il-post tax-xogħol u l-mard ikkaġunat mix-xogħol. Ħafna Stati Membri jgħidu li l-kwalità ta' faċilitajiet fuq is-siti tjiebet b'mod konsiderevoli (iġjene, postijiet fejn isir it-taħriġ, canteens, faċilitajiet sanitarji u uffiċċji) u li d-Direttiva tejbet id-djalogu u l-komunikazzjoni bejn id-diversi atturi fuq is-siti fi stadji differenti. L-innovazzjoni ewlenija tad-Direttiva, li qed titqies bħala pass 'il quddiem mil-lati kollha, hija li żżomm l-atturi kollha, u prinċipalment l-iżviluppaturi, risponsabbli. L-introduzzjoni tal-koordinazzjoni fl-istadji ta' tħejjija u tal-eżekuzzjoni titqies ukoll bħala benefiċjali ħafna, kif ukoll l-obbligu li jitfassal pjan ta' sigurtà u saħħa u fajl dwar is-sigurtà u s-saħħa. Skont xi wħud mill-Istati Membri, l-intrapriżi qegħdin dejjem aktar jirrikonoxxu r-rilevanza tal-ħarsien tas-sigurtà u s-saħħa fuq il-post tax-xogħol. Il-miżuri tas-sigurtà u s-saħħa ma għadhomx aktar jitqiesu bħala spejjeż biss, iżda wkoll bħala benefiċċji ekonomiċi, billi dawn jistgħu jnaqqsu l-assenzi u fl-aħħar mill-aħħar iżidu l-produttività. Id-Direttiva 92/58/KEE Il-leġiżlazzjoni l-ġdida ddefinixxiet is-sinjali f'termini prattiċi u eżawrjenti, waqt li ppermettiet li s-sinjali li jintużaw fuq il-postijiet tax-xogħol jiġu armonizzati madwar l-Istati Membri kollha. Il-fatt li d-Direttiva inkludiet u rregolat sinjali oħra barra dawk viżwali – bħas-sinjali luminużi, tal-akustika, u sinjali verbali u bl-idejn – intlaqa' b'approvazzjoni. Ir-rapporti nazzjonali juru li d-Direttiva pprovdiet l-opportunità li ġġedded u żżid mal-leġiżlazzjoni nazzjonali eżistenti. Hija għenet biex tirrendi l-leġiżlazzjoni nazzjonali konsistenti u biex tintroduċi sensiela koerenti ta' dispożizzjonijiet dwar is-sigurtà u s-saħħa fl-UE. 7.2. Il-problemi ewlenin tal-implimentazzjoni Id-Direttiva 92/57/KEE Il-problemi ewlenin rappurtati mill-Istati Membri ġejjin mill-ħtieġa li jitfassal pjan ta' sigurtà u saħħa u li jinħatru koordinaturi minn kmieni sa mill-istadju ta' tħejjija tal-proġett. Fil-parti l-kbira tal-leġiżlazzjoni nazzjonali, l-iżviluppatur huwa responsabbli għall-politika ta' prevenzjoni. L-iżviluppaturi jħabbtu wiċċhom ma' diffikultajiet fit-twettiq tar-resonsabbiltajiet tagħhom li qed jiżdiedu. Il-ħatra ta' koordinaturi għadha mhijiex sodisfaċenti jew qed tasal tard fl-istadju ta' tħejjija, billi din ukoll titqies bħala piż amministrattiv. Jekk il-pjan tas-sigurtà u s-saħħa għadu ma tfassalx jew jekk il-koordinatur għadu ma nħatarx qabel l-istadju ta' eżekuzzjoni tal-proġett, l-obbligu li l-prinċipji ta' prevenzjoni jiġu inkorporati fit-tħejjija tal-proġett għadu ma twettaqx. Barra minn hekk, id-diversi dispożizzjonijiet nazzjonali dwar il-pjan tas-sigurtà u s-saħħa huma vagi u ġenerali wisq biex jippermettu lill-dawk responsabbli li jkunu jafu x'għandhom jinkludu fil-pjan. L-ispettorati tax-xogħol żvelaw problema oħra serja, notevolment li xi intrapriżi jistrieħu fuq mudelli standard ta' pjanijiet ta' sigurtà li ma jippermettux l-ispezzjoni tal-kundizzjonijet speċifiċi ta' xogħol fuq sit speċifiku. L-Istati Membri jirrappurtaw li l-intrapriżi ma jaslux biex jifhmu r-rwol li l-fajl tas-sigurtà u s-saħħa għandu fis-sistema ta' prevenzjoni. Problema oħra msemmija hija dik tar-rata baxxa ta' parteċipazzjoni ta' ħaddiema tal-kostruzzjoni fil-prevenzjoni tar-riskji fil-post tax-xogħol permezz tar-rappreżentanti tagħhom. Instab li hemm nuqqas ta' taħriġ għall-ħaddiema, għas-sotto-kuntratturi, għal dawk li jaħdmu għal rashom u għall-Intrapriżi Żgħar u ta' daqs Medju. Barra minn hekk, l-Intrapriżi Żgħar u ta' daqs Medju jbatu minn eċċess ta' burokrazija u nuqqas ta' flessibbiltà fil-leġiżlazzjoni nazzjonali. Fl-aħħar, f'bosta Stati Membri l-kompetenzi tal-koordinatur mhumiex definiti mil-leġiżlazzjoni. Dan joħloq sitwazzjonijiet fejn il-koordinazzjoni ma tistax tkun effettiva billi dawk li jassumu r-rwol ma għandhomx l-għarfien meħtieġ. Id-Direttiva 92/58/KEE Ir-rapporti tal-Istati Membri u l-valutazzjoni tal-esperti jindikaw li l-problema ewlenija ġejja minn nuqqas ta' taħriġ għall-ħaddiema. F'bosta każijiet il-ħaddiema jirċievu taħriġ ġenerali dwar is-saħħa u s-sigurtà, b'parti żgħira wisq iddedikata għas-sinjali. F'termini aktar ġenerali, in-nuqqas ta' interess li juru l-intrapriżi u l-amministraturi fl-implimentazzjoni tad-Direttiva ġie wkoll definit bħala problema. 8. SUġġERIMENTI GħAL TITJIB Id-Direttiva 92/57/KEE Xi Stati Membri jgħidu li huwa diffiċli li tapplika d-Direttiva billi t-termini tagħha huma ġenerali ħafna. Xi wħud staqsew lill-Kummissjoni biex tħejji tagħrif li ma jorbotx li jindirizza mistoqsijiet u dubji possibbli, li jista' jgħin fl-implimentazzjoni. B'mod ġenerali, ir-rapporti nazzjonali juru li t-tħassib ewlieni tal-Istati Membri huwa n-nuqqas fl-iżvilupp ta' koordinazzjoni tas-sigurtà fl-istadju tat-tħejjija. Xi wħud għalhekk jixtiequ li l-Kummissjoni tkopri l-koordinazzjoni fl-istadju tat-tħejjija bi strumenti li ma jorbtux. Oħrajn jixtiequ li l-leġiżlazzjoni nazzjonali tagħhom tiċċara l-interazzjoni bejn il-koordinatur tal-proġett, dawk li jfasslu l-proġetti u l-iżviluppatur, u bejn il-koordinatur tal-proġett, is-sorveljaturi tal-proġett, dawk li jaħdmu għal rashom u l-iżviluppatur. Id-Direttiva 92/58/KEE Saru għadd ta' suġġerimenti biex titjieb il-leġiżlazzjoni jew il-mod ta' kif din tiġi applikata. Wieħed mis-suġġeriment għat-titjib tal-leġiżlazzjoni kien li jiġi inkluż għall-ħaddiema taħriġ bażiku obbligatorju dwar is-sinjali ta' sigurtà, għalkemm it-taħriġ ipprovdut ikollu jkun proporzjonat mar-riskji involuti. Suġġeriment ieħor kien ir-reviżjoni tar-regoli dwar is-sinjali bl-idejn, biex titjieb l-implimentazzjoni. Għandhom isiru sforzi biex jarmonizzaw id-Direttiva ma' standards internazzjonali. 9. L-EVALWAZZJONI DWAR L-EFFIKAċJA TAL-LEġIżLAZZJONI Id-Direttiva 92/57/KEE Huwa diffiċli ħafna li wieħed juri b'mod oġġettiv ir-rabta bejn l-implimentazzjoni tad-Direttiva u t-titjib tas-sitwazzjoni fir-rigward ta' tnaqqis ta' inċidenti fuq ix-xogħol u mard ikkaġunat mix-xogħol fis-settur tal-kostruzzjoni. It-tkabbir tas-settur tal-kostruzzjoni mindu d-Direttiva daħlet fis-seħħ; l-introduzzjoni ta’ teknoloġiji ġodda; il-kumplessità tal-introduzzjoni ta' sistema ta' ħarsien fuq is-sit u l-multipliċità tal-atturi; il-varjazzjonijiet skont l-istaġuni; u l-mod kif id-Direttiva fiha xi dispożizzjonijiet ġodda u oħrajn li huma mnaqqxa fir-regolamenti nazzjonali eżistenti kollha jikkumplikaw evalwazzjoni tal-effikaċja tagħha. Is-settur tal-kostruzzjoni jissokta bl-ifqar rekords fir-rigward tal-inċidenti fil-post tax-xogħol meta mqabbla ma' setturi oħra ta' attività ekonomika. Filwaqt li l-implimentazzjoni tad-Direttiva wasslet għal waqgħa fir-rati tal-inċidenti fis-settur tal-kostruzzjoni matul is-snin, it-tnaqqis għadu mhux kbir daqskemm mistenni. (a) L-effetti fuq l-inċidenti fil-post tax-xogħol u fuq il-mard ikkaġunat mix-xogħol L-istatistika Ewropea l-aktar reċenti disponibbli dwar l-inċidenti fil-post tax-xogħol fuq siti ta' kostruzzjoni fl-UE-15 hija għas-sena 2005. Mill-1996, ġie osservat titjib fir-rata ta' inċidenża[13] kemm fil-każ ta' inċidenti fatali (1996: 13.3; 2005: 8.8) kif ukoll fil-każ ta' inċidenti li jinvolvu aktar minn tlitt ijiem assenza mix-xogħol (1996: 8,023; 2005: 6,069). Madankollu, għandu jiġi nnutat li r-rata ta' inċidenti fatali fil-kostruzzjoni hija kważi 2.5 darbiet aktar mir-rata medja għall-attivitajiet kollha, inkluża l-kostruzzjoni, u r-rata ta' inċidenti li jinvolvu assenza mix-xogħol ta' aktar minn tlitt ijiem hija għolja d-doppju. (b) L-impatt fuq il-produttività, l-impjiegi u l-kompetittività Il-parti l-kbira mill-Istati Membri ma jipprovdu l-ebda tagħrif dwar l-impatt li l-leġiżlazzjoni l-ġdida qed ikollha fuq il-produttività, l-impjiegi u l-kompetittività. Bħala regola, dawn il-miżuri l-ġodda jidhru bħala benefiċjali f'xi Stati membri fir-rigward ta' produttività u kompetittività, b'mod partikolari fit-tul. Skont dawn l-Istati Membri, l-implimentazzjoni tad-Direttiva tinkoraġġixxi l-modernizzazzjoni u s-simplifikazzjoni tal-proċessi tal-produzzjoni, li b'mod loġiku jwasslu għal titjib fil-produttività billi jiżguraw li l-organizzazzjoni fix-xogħol hija ppjanata u riveduta. Id-Direttiva 92/58/KEE (a) L-effetti fuq l-inċidenti fuq il-post tax-xogħol u fuq il-mard ikkaġunat mix-xogħol L-ebda dejta speċifika m'hi disponibbli dwar dan is-suġġett, billi l-istatistika ġeneralment ma tikkunsidrax l-inċidenti kkawżati minħabba nuqqas ta' sinjali. In-nuqqas ta' sinjali, b'mod partikolari, ma jitqiesx ġeneralment bħala fattur materjali f'inċident. Konsegwentement, in-nuqqas ta' sinjali mhuwiex inkluż fil-lista ta' aġenti materjali marbuta mal-istatistika tal-inċidenti. Hija għal din ir-raġuni li n-nuqqas ta' sinjali fir-rigward ta' sigurtà u saħħa ma jidhirx fl-istudji li twettqu biex jindikaw il-kawża tal-inċidenti fuq ix-xogħol. (b) L-impatt fuq il-produttività, l-impjiegi u l-kompetittività L-Istati Membri sabuha diffiċli ħafna li jkejlu l-impatt tad-Direttiva fuq il-produttività, l-impjiegi u l-kompetittività. Stat Membru wieħed qal li, bħala strument ta' ġestjoni, id-Direttiva kkontribwiet għall-produttività; Stat Membru ieħor stqarr li din kellha effetti benefiċjarji fuq l-għadd ta' assenzi mix-xogħol minħabba mard u fuq il-kundizzjonijiet tax-xogħol b'mod ġenerali. 10. KONKLUżJONIJIET Id-Direttiva 92/57/KEE Filwaqt li l-rata ta' inċidenza u l-għadd ta' inċidenti fil-post tax-xogħol niżlu kemm fir-rigward tal-inċidenti fatali kif ukoll fir-rigward tal-inċidenti li jinvolvu nuqqas ta' aktar minn tlett ijiem mix-xogħol (li fiha nnifisha tagħti prova tal-impatt pożittiv tad-Direttiva fir-rigward tas-sigurtà u s-saħħa tal-ħaddiema fl-UE), iċ-ċifri għadhom mhumiex aċċettabbli: il-kostruzzjoni għadu s-settur fejn il-ħaddiema huma esposti għall-akbar riskji. L-evalwazzjoni turi biċ-ċar, kif juru ċ-ċifri ta' hawn fuq, li t-titjib fis-saħħa u s-sigurtà tal-ħaddiema fis-siti tal-kostruzzjoni jista' jintlaħaq biss jekk id-Direttiva 92/57/KEE tiġi implimentata b'mod aktar effettiv fil-prattika. Issa ma jidhirx li huwa l-waqt adattat li wieħed jidħol fi proċess li jemenda d-Direttiva mingħajr ma l-ewwel wieħed jieħu l-azzjoni alternattiva f'livell nazzjonali u/jew Ewropew biex id-Direttiva tkun tista' tieħu l-effett sħiħ tagħha, u biex tkun żgurata l-konformità magħha. Fl-iżvilupp tal-istrateġiji nazzjonali għas-saħħa u s-sigurtà, l-Istati Membri jistgħu jieħdu azzjoni biex japplikaw id-Direttiva 92/57/KEE b'mod iżjed effettiv, l-ewwel nett permezz tal-ġeneralizzazzjoni u s-simplifikazzjoni tal-oqfsa legali nazzjonali eżistenti filwaqt li jimxu fuq il-prinċipji ta' leġiżlazzjoni konsistenti u effettiva. L-eżerċizzju biex jonqos il-piż amministrattiv fl-Unjoni Ewropea[14], li fih il-Kummissjoni hija attwalment involuta, huwa kruċjali f'dan ir-rigward. Huwa jinkludi evalwazzjoni tad-Direttiva 92/57/KEE u għandu jkun kapaċi jidentifika piżijiet amministrattivi żejda kkawżati kemm mil-leġiżlazzjoni nazzjonali kif ukoll mil-leġiżlazzjoni tal-UE. L-Istati Membri jaqblu kollha, u l-evalwazzjoni f'dan il-qasam jikkonferma dan, li jeħtieġu strumenti li ma jorbtux f'livell Ewropew u/jew nazzjonali biex jagħmluha eħfef li tiġi applikata d-Direttiva 92/57/KEE fil-prattika. Speċifikament, il-maġġoranza tal-Istati Membri jenfasizzaw il-problemi fil-fehma u t-tfassil tal-pjan tas-saħħa u s-sigurtà u fl-identifikazzjoni tal-persuni responsabbli li jagħmlu dan. Ir-rwol tal-fajl dwar is-sigurtà u s-saħħa jeħtieġ ukoll li jiġi spjegat. B'mod ġenerali, l-Istati Membri jirrappurtaw problemi ġejjin min-nuqqas ta' tagħrif ċar dwar id-definizzjoni, ir-rwol, il-ħidmiet u l-kwalifiki tal-koordinaturi skont it-tip ta' proġett. Jeħtieġ li jiżdiedu l-isforzi, permezz tat-taħriġ u tat-tagħrif, biex l-għarfien tal-Iżviluppaturi jiżdied fir-rigward tar-responsabbiltajiet tagħhom u biex dawn ikunu konvinti li l-koordinazzjoni mhijiex spiża addizzjonali iżda mezz effettiv għat-tnaqqis tal-ispejjez matul il-proġett. Il-periti u l-inġiniera involuti fit-tfassil għandhom ukoll jingħataw taħriġ dwar il-prevenzjoni tar-riskji fuq ix-xogħol, preferibbilment bħala parti mill-istudji universitarji tagħhom. Għandhom jiġu żviluppati r-rekwiżiti bażiċi tat-taħriġ għall-koordinaturi. Fl-aħħar nett, l-intrapriżi ż-żgħar u l-ħaddiema, speċjalment il-ħaddiema migranti u dawk għal rashom, għandhom ikunu mgħarrfa u mħarrġa kif xieraq fil-leġiżlazzjoni u r-responsabbiltajiet tagħhom. Aspett kruċjali huwa l-infurzar tad-Direttiva b'mod ekwivalenti mal-UE kollha. Flimkien mal-iffukar fuq il-fażi tal-eżekuzzjoni tal-kostruzzjoni, l-infurzar għandu jagħti aktar kas li jiżgura li l-Iżviluppaturi u dawk li jfasslu jaqblu mal-obbligi tagħhom fl-istadju tat-tfassil. Is-siti għandhom jiġu spezzjonati aktar ta' spiss, u l-pjanijiet ta' sigurtà u ta' saħħa u l-fajl dwar is-sigurtà u s-saħħa għandhom ukoll jiġu vverifikati kemm għall-forma kif ukoll għas-sustanza tagħhom. Għandhom jiġu imposti pieni effettivi, proporzjonati u disswasivi kemm fuq l-Iżviluppaturi kif ukoll fuq is-sorveljaturi tal-proġetti fejn huma jonqsu milli jwettqu r-responsabbiltajiet tagħhom. F'dan il-kuntest, l-SLIC għandu rwol fundamentali u għandu jindirizza s-sitwazzjoni partikolari fis-settur tal-kostruzzjoni bħala prijorità fil-ħidma futura tagħha. Fil-qosor, l-azzjoni segwenti jeħtieġ li tiġi żviluppata jew f'livell nazzjonali jew f'dak tal-UE: - it-tfassil ta' strumenti li ma jorbtux (linji ta' gwida); - l-integrazzjoni ta' kwistjonijiet speċifiċi ta' sigurtà u saħħa fil-programmi tal-iskola vokazzjonali u tal-edukazzjoni terzjarja f'livell nazzjonali għal professjonisti li għandhom rwol ewlieni fl-implimentazzjoni tad-direttiva; - l-introduzzjoni ta' rekwiżiti tal-kompetenza nazzjonali għall-koordinaturi; - l-inkorporazzjoni sistematika ta' miżuri ta' ħarsien marbuta mas-suġġett tal-kuntratt fl-ispeċifikazzjonijiet tekniċi għas-sejħa għall-offerti fil-klawżoli ta' prestazzjoni fil-kuntratt u fit-treġija tal-kwalità tal-kuntratt mill-awtoritajiet kontraenti; - it-titjib tal-edukazzjoni t-taħriġ għall-ħaddiema u l-komunikazzjoni li għandha ssir magħhom tul il-programmi ta' taħriġ (bħala pereżempju s-'Safe Pass'); - l-organizzazzjoni ta' kampanji nazzjonali għaż-żieda fl-għarfien immirati lejn il-ħaddiema għal rashom; - il-kombinazzjoni tat-tħejjija tan-notifika minn qabel ma' proċeduri amministrattivi nazzjonali oħra rilevanti (bħall-applikazzjoni għall-permess tal-kostruzzjoni); - l-ispezzjoni tas-siti aktar ta' sikwit; - l-introduzzjoni ta' pieni effettivi, proporzjonali u disswasivi. Il-kostruzzjoni tibqa' settur partikolarment perikoluż li jeħtieġ sforz akbar mill-atturi kollha jekk l-implimentazzjoni tad-Direttiva 92/57/KEE għandha titjieb b'mod sinifikanti. Il-Kummissjoni se tikkontribwixxi għal dan l-għan, inter alia billi tfassal gwida prattika, li ma torbotx biex tiċċara ċerti kunċetti ewlenin u biex tgħin lill-atturi kollha jwettqu l-obbligi tagħhom. Id-Direttiva 92/58/KEE L-Istati Membri kollha jemmnu li d-Direttiva 92/58/KEE kellha impatt pożittiv ħafna fir-rigward tal-ħarsien tas-sigurtà u s-saħħa tal-ħaddiema u tal-partijiet terzi. Hija ppermettiet li s-sitwazzjonijiet ta' riskji jiġu identifikati b'mod ċar, indipendentement mill-għarfien tal-lingwa, u tat kontribut deċiżiv biex timplimenta prinċipju ewlieni fil-liġi Komunitarja: il-moviment liberu tal-ħaddiema. Id-Direttiva se tiġi affettwata bl-introduzzjoni tas-Sistema Globali ta' Armonizzazzjoni tal-Klassifika u l-Ittikkettjar tal-Kimiki (GHS) – li temenda l-kriterji, ir-rappreżentazzjoni bl-istampi u s-simboli għat-tossiċità, il-fjammabilità u riskji oħra kimiċi – u għalhekk se jkollha tiġi aġġornata. [1] Fil-komunikazzjoni Intejbu l-kwalità u l-produttività fuq il-post tax-xogħol : Strateġija Komunitarja 2007-2012 għas-saħħa u s-siġurtà fil-post tax-xogħol , COM(2007) 62 finali, 21.2.2007. [2] Mibgħut lill-Kummissjoni skont l-Artkoli 14 u 11 taż-żewġ Direttivi. Dawk l-Artikoli tħassru sussegwentement bid-Direttiva 2007/30/KE. [3] ĠU L 245, 26.8.1992, p. 6. [4] ĠU L 245, 26.8.1992, p. 23. [5] Żewġ Stati Membri, li kellhom ħeġġa kbira li jiżguraw li d-Direttiva kienet evalwata oġġettivament, użaw stħarriġ/studju li sar minn konsulenti esterni indipendenti; fi kważi l-Istati Membri kollha l-imsieħba soċjali kellhom rwol importanti ħafna fit-tfassil tar-rapport. [6] Ir-Regolament tal-Kunsill (KE) Nru 2062/94 tat-18 ta' Lulju 1994 li jistabbilixxi Aġenzija Ewropea għas-Sigurtà u s-Saħħa fix-Xogħol (ĠU L 216, 20.8.1994, p. 1). Kif emendat l-aħħar bir-Regolament (KE) Nru 1112/2005 (ĠU L 184, 15.7.2005, p. 5). [7] Id-Deċiżjoni tal-Kummissjoni tat-12 ta' Lulju 1995 li stabbiliet Kumitat tal-Ispetturi Għolja tax-Xogħol (ĠU L 188, 9.8.1995, p. 11). [8] Fil-parti l-kbira tal-Istati Membri r-rappreżentanti kollha tas-settur tal-kostruzzjoni (l-imsieħba soċjali, il-periti, l-iżviluppaturi, is-sorveljaturi tal-proġett, eċċ.) ġew ikkonsultati minn qabel u mogħtija l-opportunità li jieħdu sehem fit-traspożizzjoni tad-Direttiva. [9] Ara l-paragrafu 17 tas-sentenza tal-Qorti tal-Ġustizzja fil-Każ C-84/94 Ir-Renju Unit v. il-Kunsill [1996] ECR I-5755 [10] Id-Deċiżjoni tal-Kunsill tat-22 ta’ Lulju 2003 li tistabbilixxi Kumitat Konsultattiv dwar is-Sigurtà u s-Saħħa fil-Post tax-Xogħol (ĠU C 218, 13.9.2003, p. 1). [11] Sors : Dejta tal-Eurostat ESAW 2005. [12] Is-Safe Pass tal-Programm dwar l-Għarfien tas-Saħħa u s-Sigurtà huwa programm ta' jum wieħed immexxi mill-awtorità tat-taħriġ u l-impjiegi tal-Irlanda. Is-Safe Pass jimmira li jiżgura li l-ħaddiema kollha tal-kostruzzjoni fl-Irlanda jkollhom tagħrif bażiku dwar is-saħħa u s-sigurtà, biex ikunu jistgħu jaħdmu fuq is-siti ta' kostruzzjoni mingħajr ma jkunu ta' riskju għalihom infushom jew għal oħrajn li jistgħu jiġu affettwati mill-azzjonijiet tagħhom. [13] Ir-rata tal-inċidenza ddefinita permezz tal-metodoloġija ESAW hija l-għadd ta' inċidenti fuq ix-xogħol għal kull 100 000 ħaddiem li jinsabu fl-impjieg. [14] COM(2007) 23 tal-24.1.2007, Komunikazzjoni mill-Kummissjoni lill-Kunsill, il-Parlament Ewropew, il-Kumitat Ekonomiku u Soċjali u l-Kumitat tar-Reġjuni - Programm ta' azzjoni għat-tnaqqis tal-piżijiet amministrattivi fl-Unjoni Ewropea (SEC(2007) 84) (SEC(2007) 85).