(1)

Ir-Regolament tal-Kummissjoni (UE) 2023/915 (2) jistabbilixxi l-livelli massimi ta’ ċerti kontaminanti fl-ikel.

(2)

It-tossini T-2 u HT-2 huma mikotossini prodotti minn diversi speċijiet ta’ Fusarium. It-tossina T-2 tiġi metabolizzata malajr għal għadd kbir ta’ prodotti, u t-tossina HT-2 hija metabolit ewlieni.

(3)

Fl-2011, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar ir-riskji għas-saħħa tal-annimali u dik pubblika relatati mal-preżenza tat-tossini T-2 u HT-2 fl-għalf u fl-ikel (3). L-Awtorità stabbiliet doża tollerabbli ta’ kuljum ta’ grupp (TDI) ta’ 0,1 μg/kg tal-piż tal-ġisem (bw) għas-somma tat-tossini T-2 u HT-2. L-estimi tal-esponiment kroniku fid-dieta tal-bniedem għas-somma tat-tossini T-2 u HT-2 ibbażati fuq id-data disponibbli dwar l-okkorrenza kienu inqas mit-TDI ta’ grupp għall-popolazzjonijiet tal-gruppi tal-etajiet kollha, u għalhekk mhux ta’ tħassib immedjat dwar is-saħħa.

(4)

Filwaqt li tqiesu l-konklużjonijiet tal-opinjoni xjentifika tal-2011, ġiet adottata r-Rakkomandazzjoni tal-Kummissjoni 2013/165/UE (4) biex tinġabar aktar data dwar it-tossini T-2 u HT-2 fiċ-ċereali u l-prodotti taċ-ċereali, sabiex wieħed jifhem aħjar il-varjazzjoni minn sena għal sena fl-okkorrenza u biex tinkiseb aktar informazzjoni dwar l-influwenza tal-ipproċessar tal-ikel (eż. it-tisjir) u l-fatturi agronomiċi fuq il-preżenza tat-tossini T-2 u HT-2.

(5)

Fl-2017, l-Awtorità adottat opinjoni xjentifika dwar l-adegwatezza li jiġi stabbilit valur indikattiv ibbażat fuq is-saħħa tal-grupp għat-tossini T-2 u HT-2 u għall-forom modifikati tagħhom (5). Ġiet stabbilita doża akuta ta’ referenza tal-grupp (ARfD) ta’ 0,3 μg/kg bw għas-somma tat-tossini T-2 u HT-2 u l-forom modifikati tagħhom. Barra minn hekk, ġie stabbilit TDI tal-grupp għas-somma tat-tossini T-2 u HT-2 u l-forom modifikati tagħhom ta’ 0,02 μg/kg bw minflok it-TDI tal-grupp preċedenti ta’ 0,1 μg/kg bw.

(6)

Fl-2017 ukoll, l-Awtorità ppubblikat rapport xjentifiku dwar l-esponiment dijetetiku tal-bniedem u tal-annimali għat-tossini T-2 u HT-2 (6). L-istimi tal-esponiment dijetetiku akut f’dak ir-rapport ma indikawx qbiż tal-ARfD tal-grupp stabbilit mill-Awtorità. Madankollu, ċerti xenarji tal-esponiment dijetetiku kroniku qabżu t-TDI tal-grupp fit-trabi, fit-trabi li telqu jimxu u fi tfal oħra, u l-esponimenti kienu għoljin fl-adolexxenti wkoll, u dan jindika tħassib potenzjali għas-saħħa.

(7)

Għalhekk, sabiex jiġi żgurat livell għoli ta’ protezzjoni tas-saħħa pubblika, jixraq li jiġu stabbiliti livelli massimi li jikkonċernaw il-preżenza fl-ikel tat-tossini T-2 u HT-2 filwaqt li titqies l-aktar data riċenti dwar l-okkorrenzi. Madankollu, peress li d-data dwar l-okkorrenzi disponibbli dwar il-preżenza tal-forom modifikati tat-tossini T-2 u HT-2 hija limitata ħafna u l-ebda metodu ta’ rutina għall-analiżi tagħhom ma huwa disponibbli, il-livelli massimi huma stabbiliti f’dan iż-żmien biss għas-somma tat-tossini T-2 u HT-2.

(8)

Sabiex jiġi żgurat li jiġu applikati prattiki agrikoli tajbin biex titnaqqas il-preżenza tat-tossini T-2 u HT-2 fiċ-ċereali, huwa importanti li jiġi stabbilit livell massimu għaċ-ċereali mhux ipproċessati. Peress li l-ħafur mhux ipproċessat, qabel il-maċinazzjoni jew qabel ma jintuża fil-prodotti taċ-ċereali introdotti fis-suq għall-konsumatur finali, jiġi introdott fis-suq bil-ħliefa, il-livell massimu għat-tossini T-2 u HT-2 fil-ħbub tal-ħafur mhux ipproċessat jenħtieġ li japplika għall-ħbub tal-ħafur mhux ipproċessat bil-ħliefa inkluża, anki jekk il-ħliefa ma tkunx tista’ tittiekel.

(9)

Peress li l-livelli tal-okkorrenza tat-tossini T-2 u HT-2 huma l-ogħla fil-ħbub tal-ħafur, huwa importanti li jsiru sforzi addizzjonali biex titnaqqas aktar il-preżenza tat-tossini T-2 u HT-2 fil-ħbub tal-ħafur u li l-Kummissjoni tkun infurmata dwar il-progress li sar u dwar id-data ġdida dwar l-okkorrenzi bl-għan li fil-futur jitnaqqas il-livell massimu għat-tossini T-2 u HT-2 fil-ħbub tal-ħafur u fil-prodotti tal-ħbub tal-ħafur.

(10)

Għalhekk, jenħtieġ li r-Regolament (UE) 2023/915 jiġi emendat skont dan.

(11)

Jixraq li jiġi previst perjodu tranżitorju għall-ikel li jiġi introdott fis-suq legalment qabel id-data tal-applikazzjoni ta’ dan ir-Regolament filwaqt li jitqies li ċertu ikel kopert minn dan ir-Regolament għandu ħajja twila fuq l-ixkaffa.

(12)

Sabiex l-operaturi ekonomiċi jkunu jistgħu jippreparaw għar-regoli l-ġodda introdotti b’dan ir-Regolament, jixraq li jingħata żmien raġonevoli sakemm jibdew japplikaw il-livelli massimi l-ġodda.

(13)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

fl-Artikolu 8, jiżdied il-paragrafu 5 li ġej:

(2)

L-Anness I huwa emendat f’konformità mal-Anness ta’ dan ir-Regolament.