(1)

Ir-Regolament tal-Kummissjoni (UE) 2023/915 (2) jistabbilixxi livelli massimi għal ċerti kontaminanti, inkluż id-deossinivalenol (DON) fl-ikel.

(2)

Fl-2017, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar ir-riskji għas-saħħa tal-bniedem u tal-annimali relatati mal-preżenza tad-deossinivalenol u tal-forom aċetilati u modifikati tiegħu fl-ikel u fl-għalf (3). F’dik l-opinjoni l-Awtorità kkonkludiet li d-doża tollerabbli ta’ kuljum (TDI) ta’ 1 μg/kg tal-piż tal-ġisem (bw) kuljum għad-DON, kellha titqies bħala TDI għall-grupp għas-somma ta’ DON, 3-aċetil-deossinivalenol (3-Ac-DON), 15-aċetil-deossinivalenol (15-Ac-DON) u deossinivalenol-3-glukosid (DON-3-glukosid). Sabiex jiġi vvalutat ir-riskju akut għas-saħħa tal-bniedem, ġiet ikkalkulata doża akuta ta’ referenza għall-grupp (ADfD) ta’ 8 μg/kg bw għal kull okkażjoni tal-ikel. L-istimi tal-esponimenti akuti mid-dieta kienu taħt din id-doża u ma qajmux tħassib dwar is-saħħa fil-bnedmin. Madankollu, l-esponimenti djetetiċi kroniċi medji stmati kienu ogħla mit-TDI għall-grupp fit-trabi, fit-trabi li telqu jimxu u fi tfal oħra, u l-esponimenti kienu għoljin fl-adolexxenti u fl-adulti wkoll, u dan jindika tħassib potenzjali għas-saħħa.

(3)

Fid-dawl tal-opinjoni tal-Awtorità, il-Kummissjoni kkunsidrat il-possibbiltà li tistabbilixxi livelli massimi għas-somma ta’ DON, 3-Ac-DON, 15-Ac-Don u DON-3-glukosid. Madankollu minħabba l-ammont limitat ta’ data dwar l-okkorrenzi għas-somma ta’ DON, 3-Ac-DON, 15-Ac-Don u DON-3-glukosid u minħabba li t-3-Ac-DON, il-15-Ac-Don u b’mod partikolari d-DON-3-glukosid għadhom mhumiex analizzati fuq bażi ta’ rutina, ma hemmx biżżejjed informazzjoni f’dan iż-żmien biex jiġu stabbiliti tali livelli massimi sakemm il-metodu ta’ analiżi għall-analiżi ta’ rutina tal-forom aċetilati u modifikati tad-DON jiġi żviluppat aktar u l-preżenza tas-somma ta’ DON u tal-forom aċetilati u modifikati tiġi mmonitorjata. Sadanittant, sabiex jiġi żgurat livell għoli ta’ protezzjoni tas-saħħa pubblika, jixraq li jitbaxxew ċerti livelli massimi eżistenti għal għad-DON skont il-prinċipju li l-livelli massimi jridu jiġu stabbiliti f’livell l-aktar baxx li jista’ raġonevolment jintlaħaq bl-applikazzjoni ta’ prattiki tajba biex tiġi minimizzata l-kontaminazzjoni u b’hekk titqies id-data reċenti dwar l-okkorrenzi.

(4)

Sabiex jiġi żgurat li jiġu applikati prattiki agrikoli tajbin biex titnaqqas il-preżenza tad-DON fiċ-ċereali, huwa importanti li jiġi stabbilit livell massimu għaċ-ċereali mhux ipproċessati. Peress li l-ħafur mhux ipproċessat, qabel il-maċinazzjoni jew qabel ma jintuża fil-prodotti taċ-ċereali introdotti fis-suq għall-konsumatur finali, jiġi introdott fis-suq bil-ħliefa, il-livell massimu għad-DON fil-ħbub tal-ħafur mhux ipproċessat jenħtieġ li japplika għall-ħbub tal-ħafur mhux ipproċessat bil-ħliefa inkluża, anki jekk il-ħliefa ma tkunx tista’ tittiekel.

(5)

Għalhekk, jenħtieġ li r-Regolament (UE) 2023/915 jiġi emendat skont dan.

(6)

Jixraq li jiġi previst perjodu tranżitorju għall-ikel li jiġi introdott fis-suq legalment qabel id-data tal-applikazzjoni ta’ dan ir-Regolament filwaqt li jitqies li ċertu ikel kopert minn dan ir-Regolament għandu ħajja twila fuq l-ixkaffa.

(7)

Sabiex l-operaturi ekonomiċi jkunu jistgħu jippreparaw għar-regoli l-ġodda introdotti b’dan ir-Regolament, jixraq li jingħata żmien raġonevoli sakemm jibdew japplikaw il-livelli massimi l-ġodda.

(8)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,