(1)

Il-komunikazzjoni tal-11 ta’ Diċembru 2019 bit-titolu “Patt Ekoloġiku Ewropew” tikkostitwixxi l-istrateġija tal-Ewropa li tiżgura, sal-2050, ekonomija newtrali għall-klima, nadifa u ċirkolari, l-ottimizzazzjoni tal-użu, l-użu mill-ġdid u l-ġestjoni tar-riżorsi, it-tnaqqis tat-tniġġis filwaqt li tirrikonoxxi l-ħtieġa ta’ politiki trasformattivi fil-fond kif ukoll il-ħtieġa li jiġu protetti s-saħħa u l-benesseri taċ-ċittadini minn riskji u impatti relatati mal-ambjent. Għandha wkoll l-għan li jiżgura li tali tranżizzjoni tkun ġusta u inklużiva, u ma tħalli lil ħadd jibqa’ lura. L-Unjoni hija impenjata wkoll favur il-Ftehim ta’ Pariġi (4), l-Aġenda 2030 għall-Iżvilupp Sostenibbli u l-Għanijiet ta’ Żvilupp Sostenibbli tagħha kif ukoll l-involviment tagħha fl-Organizzazzjoni Dinjija tas-Saħħa. L-Istrateġija tal-Unjoni dwar is-Sustanzi Kimiċi għas-Sostenibbiltà ta’ Ottubru 2020 u l-Pjan ta’ Azzjoni għal Tniġġis Żero adottati f’Mejju 2021 jindirizzaw speċifikament l-aspetti tat-tniġġis tal-Patt Ekoloġiku Ewropew. B’mod parallel, l-Istrateġija Industrijali l-Ġdida għall-Ewropa tkompli tenfasizza r-rwol potenzjali tat-teknoloġiji trasformattivi. Politiki oħra partikolarment rilevanti relatati mar-reviżjoni tad-Direttiva 2010/75/UE tal-Parlament Ewropew u tal-Kunsill (5) jinkludu l-liġi Ewropea dwar il-Klima (6), il-pakkett “lesti għall-mira ta’ 55 %”, l-Istrateġija tal-Metan u l-wegħda ta’ Glasgow b’rabta mal-metan, l-Istrateġija tal-Adattament għall-Klima, l-Istrateġija tal-Bijodiversità, l-istrateġija mill-Għalqa sal-Platt, l-Istrateġija dwar il-Ħamrija u l-Inizjattiva dwar il-Prodotti Sostenibbli. Barra minn hekk, bħala parti mir-rispons tal-UE għall-gwerra ta’ aggressjoni Russa kontra l-Ukrajna, ir-REPowerEU tipproponi Azzjoni Ewropea Konġunta biex tappoġġa d-diversifikazzjoni tal-provvisti tal-enerġija, taċċellera t-tranżizzjoni għall-enerġija rinnovabbli u ttejjeb l-effiċjenza enerġetika.

(2)

Fil-Patt Ekoloġiku Ewropew il-Kumissjoni ħabbret reviżjoni tal-miżuri tal-Unjoni biex jiġi indirizzat it-tniġġis minn installazzjonijiet industrijali kbar, inkluża reviżjoni tal-kamp ta’ applikazzjoni settorjali tal-leġiżlazzjoni u kif dan isir kompletament konsistenti mal-politiki dwar il-klima, l-enerġija u l-ekonomija ċirkolari. Barra minn hekk, il-Pjan ta’ Azzjoni għal Tniġġis Żero, il-Pjan ta’ Azzjoni għall-Ekonomija Ċirkolari u l-Istrateġija mill-Għalqa sal-Platt jitolbu wkoll għat-titjib tal-effiċjenza tar-riżorsi u l-użu mill-ġdid filwaqt li jitnaqqsu l-emissjonijiet ta’ sustanzi niġġiesa fis-sors, inklużi sorsi li bħalissa mhumiex fil-kamp ta’ applikazzjoni tad-Direttiva 2010/75/UE. Għalhekk, l-indirizzar tat-tniġġis minn ċerti attivitajiet agroindustrijali, filwaqt li jiġu promossi prattiki agrikoli sostenibbli li għandhom kobenefiċċji multipli għall-objettivi ambjentali u klimatiċi tal-Patt Ekoloġiku Ewropew jeħtieġ l-inklużjoni tagħhom fil-kamp ta’ applikazzjoni ta’ dik id-Direttiva.

(3)

L-industrija estrattiva tal-Unjoni hija kruċjali biex jintlaħqu l-objettivi tal-Patt Ekoloġiku Ewropew u tal-istrateġija industrijali tal-Unjoni, inkluż kwalunkwe aġġornament għal dik l-istrateġija. Il-metalli huma ta’ importanza strateġika għat-tranżizzjoni diġitali u ekoloġika, għall-enerġija, għall-materjali u għat-trasformazzjoni tal-ekonomija ċirkolari kif ukoll għat-tisħiħ tar-reżiljenza ekonomika u l-awtonomija tal-Unjoni. Sabiex jintlaħqu dawn l-objettivi, il-kapaċitajiet u l-provvista domestiċi sostenibbli jeħtieġ li jiġu żviluppati aktar, speċjalment fid-dawl tad-domanda globali dejjem tikber, il-vulnerabbiltà tal-ktajjen tal-provvista u t-tensjonijiet ġeopolitiċi. Dan jeħtieġ miżuri effettivi, adattati u armonizzati biex jiġi żgurat li jiġu stabbiliti u li jintużaw l-aħjar metodi tekniċi disponibbli, u b’hekk jiġu applikati proċessi li huma kemm l-aktar effiċjenti kif ukoll li għandhom l-anqas impatti possibbli fuq is-saħħa tal-bniedem u l-ambjent. Il-mekkaniżmi ta’ governanza tad-Direttiva 2010/75/UE li jassoċjaw mill-qrib l-esperti tal-industrija mal-iżvilupp ta’ rekwiżiti ambjentali konsenswali u mfassla apposta se jappoġġaw it-tkabbir sostenibbli ta’ dawk l-attivitajiet fl-Unjoni. L-iżvilupp u d-disponibbiltà ta’ standards maqbula b’mod komuni se jwasslu għal kundizzjonijiet ekwi tal-Unjoni filwaqt li jiżguraw livell għoli ta’ protezzjoni tas-saħħa tal-bniedem u tal-ambjent. Għalhekk huwa xieraq li dawk l-attivitajiet jiġu inklużi fil-kamp ta’ applikazzjoni tad-Direttiva 2010/75/UE, mingħajr preġudizzju għar-Regolament (UE) 2024/1252 tal-Parlament Ewropew u tal-Kunsill (7). Id-Direttiva dwar l-Emissjonijiet Industrijali se tappoġġja l-industrija fl-Unjoni fl-iżvilupp ta’ proġetti u tiffaċilita tkabbir sostenibbli u kunsenswali tal-attivitajiet tal-estrazzjoni fl-Unjoni f’konformità mal-punti ta’ riferiment tal-2030 tal-Att dwar il-Materja Prima Kritika. Id-Direttiva dwar l-Emissjonijiet Industrijali se tgħin biex jintlaħqu l-miri għall-proċess simplifikat tal-għoti tal-permessi tal-Att dwar il-Materja Prima Kritika billi tappoġġa lill-Istati Membri fir-rigward tal-iffissar tal-kundizzjonijiet għal permess tal-operat u l-għoti rapidu tal-permessi.

(4)

Jenħtieġ li dan l-att emendatorju jiċċara li t-tniġġis tax-xamm jitqies fid-definizzjoni tal-aħjar metodi tekniċi disponibbli (BAT) u fl-għoti jew ir-rieżami tal-permessi.

(5)

L-aggravament potenzjali tal-impatt tal-iskariki industrijali fuq l-istat tal-korpi tal-ilma minħabba varjazzjonijiet fid-dinamika tal-fluss tal-ilma jenħtieġ li jiġi kkunsidrat b’mod espliċitu meta jitqies bħala parti mill-għoti u r-rieżami tal-permessi.

(6)

It-trobbija tal-bhejjem tikkawża r-rilaxx ta’ emissjonijiet sinifikanti ta’ sustanzi niġġiesa fl-arja u fl-ilma. Sabiex jitnaqqsu dawk l-emissjonijiet, inklużi l-ammonijaka, il-metan, in-nitrati u l-gassijiet serra u b’hekk tittejjeb il-kwalità tal-arja, tal-ilma u tal-ħamrija, huwa meħtieġ li jitnaqqas il-limitu li ’l fuq minnu l-installazzjonijiet tal-majjali u tat-tjur huma inklużi fil-kamp ta’ applikazzjoni tad-Direttiva 2010/75/UE. Għalhekk, jenħtieġ li l-Kummissjoni tivvaluta, u tirrapporta lill-Parlament Ewropew u lill-Kunsill dwar il-ħtieġa ta’ azzjoni tal-Unjoni biex tindirizza b’mod komprensiv l-emissjonijiet mit-trobbija tal-bhejjem, b’mod partikolari l-baqar, filwaqt li tqis il-firxa ta’ strumenti disponibbli u l-ispeċifiċitajiet tas-settur. B’mod parallel, jenħtieġ li l-Kummissjoni tivvaluta u tirrapporta wkoll lill-Parlament Ewropew u lill-Kunsill, abbażi tal-evidenza, dwar il-ħtieġa ta’ azzjoni tal-Unjoni biex jintlaħaq l-objettiv ta’ protezzjoni ambjentali globali fir-rigward tal-prodotti mqiegħda fis-suq intern permezz tal-prevenzjoni u l-kontroll tal-emissjonijiet mit-trobbija tal-bhejjem, b’mod konsistenti mal-obbligi internazzjonali tal-Unjoni.

(7)

Ir-rekwiżiti tal-BAT rilevanti għat-tip ta’ installazzjonijietiqisu n-natura, id-daqs, id-densità ta’ stokkjar u l-kumplessità ta’ dawk l-installazzjonijiet, inklużi l-ispeċifiċitajiet tas-sistemi tat-trobbija tal-bhejjem u l-firxa ta’ impatti ambjentali li jista’ jkollhom. Ir-rekwiżiti tal-proporzjonalità fil-BATs għandhom l-għan li jinċentivaw lill-bdiewa jimplimentaw it-tranżizzjoni neċessarja lejn prattiki agrikoli dejjem aktar ekoloġiċi.

(8)

It-trobbija tal-majjali f’installazzjonijiet li joperaw taħt reġimi organiċi jew ta’ produzzjoni b’densità baxxa ta’ stokkjar jenħtieġ li tiġi eżentata mill-kamp ta’ applikazzjoni tad-Direttiva 2010/75/UE, peress li dan jikkontribwixxi b’mod pożittiv għall-preservazzjoni tal-pajsaġġi, għall-prevenzjoni tan-nirien fil-foresti u għall-protezzjoni tad-diversità bijoloġika u tal-ħabitats. L-eżenzjoni jenħtieġ li tkopri installazzjonijiet b’trobbija tal-majjali bbażata fuq il-mergħat b’densità baxxa ta’ stokkjar, fejn l-annimali jitrabbew barra għal ammont sinifikanti ta’ żmien fis-sena, b’mod partikolari matul il-jum, u fejn il-kundizzjonijiet tat-temp u tas-sikurezza jiżguraw it-trattament xieraq tal-annimali, jew fejn l-annimali jitrabbew staġjonalment barra. Iż-żona użata għall-kalkolu tad-densità ta’ stokkjar jenħtieġ li tintuża għar-ragħa mill-annimali fl-installazzjoni jew għat-tkabbir ta’ foraġġ jew foraġġ użat għat-tmigħ tal-annimali fl-installazzjoni.

(9)

L-Unjoni għandha r-responsabbiltà li tkompli taqdi rwol ewlieni fl-azzjoni klimatika globali, inkluż billi tilħaq l-objettiv ta’ Unjoni newtrali għall-klima sa mhux aktar tard mill-2050 f’konformità mal-Ftehim ta’ Pariġi. L-indirizzar fuq livell gobali tal-emissjonijiet tal-metan mill-bhejjem se jikkontribwixxi għat-tnaqqis tal-emissjonijiet ta’ gassijiet serra. Dak it-tnaqqis huwa meħtieġ b’mod urġenti jekk id-dinja għandha żżomm iż-żieda fit-temperatura medja globali sew taħt iż-2 oC ’il fuq mil-livelli preindustrijali u li jkomplu l-isforzi biex tiġi limitata ż-żieda fit-temperatura għal 1,5 oC ’il fuq mil-livelli preindustrijali.

(10)

L-istrateġija “Mill-Għalqa sal-Platt” (F2F) stabbiliet l-impenn li tiġi promossa t-tranżizzjoni globali lejn sistemi tal-ikel sostenibbli f’korpi li jistabbilixxu l-istandards u tmexxi l-ħidma fuq l-istandards internazzjonali ta’ sostenibbiltà. L-Unjoni se tkompli tistinka biex tippromwovi standards internazzjonali fil-korpi internazzjonali rilevanti u tinkoraġġixxi l-produzzjoni ta’ prodotti agroalimentari li jikkonformaw ma’ standards għoljin ta’ sikurezza u sostenibbiltà. Barra minn hekk, kif iddikjarat fir-rapport tal-Kummissjoni “L-applikazzjoni ta’ standards tas-saħħa u ambjentali tal-UE għal prodotti agrikoli u agroalimentari importati”, standards u objettivi ambizzjużi tas-saħħa, ambjentali u ta’ sostenibbiltà oħra jikkontribwixxu għall-kisba ta’ objettivi leġittimi dwar il-kwistjonijiet ta’ tħassib globali, f’konformità wkoll mal-approċċ Saħħa Waħda. L-Unjoni se tkompli bl-isforzi tagħha fil-livell multilaterali lejn kunsens globali dwar il-ħtieġa għal azzjoni u standards internazzjonalment li jkun intlaħaq qbil dwarhom.

(11)

Jenħtieġ li l-Unjoni tkun minn ta’ quddiem fil-kooperazzjoni internazzjonali biex toħloq sistema multilaterali miftuħa u ġusta fejn il-kummerċ sostenibbli jaġixxi bħala faċilitatur ewlieni tat-tranżizzjoni ekoloġika. F’konformità mar-rieżami tal-politika tal-Unjoni dwar il-Kummerċ u l-Iżvilupp Sostenibbli u l-Komunikazzjoni tal-Kummissjoni “Is-setgħa tas-sħubijiet kummerċjali: flimkien għal tkabbir ekonomiku ekoloġiku u ġust”, huwa essenzjali li jkun hemm involviment mas-sħab fi proċess kooperattiv biex jitrawmu l-governanza ambjentali internazzjonali u l-konformità mal-istandards ambjentali internazzjonali.

(12)

Għall-prevenzjoni tal-qsim artifiċjali tal-azjendi agrikoli, li jista’ jirriżulta fit-tnaqqis tal-kapaċità tal-unità tal-bhejjem tal-azjenda agrikola għal livell taħt il-limitu stabbilit fl-Anness Ia għall-applikazzjoni ta’ din id-Direttiva, jenħtieġ li l-Istati Membri jadottaw miżuri biex jiżguraw li jekk żewġ installazzjonijiet jew aktar ikunu jinsabu qrib xulxin u jekk l-operatur tagħhom ikun l-istess jew jekk l-installazzjonijiet ikunu taħt il-kontroll ta’ operaturi li huma involuti f’relazzjoni ekonomika jew legali, l-awtorità kompetenti tista’ tikkunsidra dawk l-installazzjonijiet bħala unità waħda għall-fini tal-kalkolu tal-kapaċità tal-bhejjem. Jenħtieġ li l-limitu għall-biedja mħallta ma jintużax għaċ-ċirkomvenzjoni tal-limitu relatat ma’ kull unità ta’ bhejjem individwali.

(13)

Sal-2030 u wara, fl-Unjoni x’aktarx li sseħħ żieda sinifikanti fl-għadd ta’ installazzjonijiet fuq skala kbira għall-produzzjoni ta’ batteriji għall-vetturi elettriċi, li żżid is-sehem tal-Unjoni tal-produzzjoni globali tal-batteriji. Bosta mill-attivitajiet fil-katina tal-valur tal-batteriji huma diġà regolati bid-Direttiva 2010/75/UE u l-batteriji huma regolati bħala prodotti mir-Regolament (UE) 2023/1542 tal-Parlament Ewropew u tal-Kunsill (8). Madankollu, għadu meħtieġ li fil-kamp ta’ applikazzjoni tad-Direttiva 2010/75/UE jiġu inklużi installazzjonijiet kbar li jimmanifatturaw il-batteriji, biex jiġi żgurat li dawn ikunu koperti wkoll mir-rekwiżiti stabbiliti fid-Direttiva 2010/75/UE. L-inklużjoni ta’ installazzjonijiet kbar li jimmanifatturaw il-batteriji, għall-kuntrarju ta’ installazzjonijiet li jassemblaw biss il-batteriji, fil-kamp ta’ applikazzjoni tad-Direttiva 2010/75/UE se ttejjeb b’mod olistiku s-sostenibbiltà tal-batteriji u se timminimizza l-impatt tagħhom fuq l-ambjent matul iċ-ċiklu tal-ħajja tagħhom. Dan se jikkontribwixxi għal tkabbir fil-manifattura tal-batteriji li huwa iktar sostenibbli.

(14)

Bil-għan li jkompli jissaħħaħ l-aċċess pubbliku għall-informazzjoni ambjentali, huwa meħtieġ li jiġi ċċarat li l-permessi għall-installazzjonijiet mogħtija skont id-Direttiva 2010/75/UE jkunu disponibbli għall-pubbliku fuq l-internet, mingħajr ħlas u mingħajr ma jiġi ristrett l-aċċess għall-utenti rreġistrati, filwaqt li jiġi żgurat li l-informazzjoni kummerċjali kunfidenzjali tiġi ssalvagwardjata.

(15)

L-Istati Membri jenħtieġ li jiżviluppaw sistemi għal permessi elettroniċi li jnaqqsu l-piż amministrattiv għall-operaturi u għall-awtoritajiet kompetenti, itejbu l-aċċess pubbliku għall-informazzjoni u jiffaċilitaw il-parteċipazzjoni pubblika fil-proċeduri għall-permessi elettroniċi. Jenħtieġ li l-Kummissjoni tappoġġa l-Istati Membri fl-iżvilupp tal-permessi elettroniċi billi torganizza l-iskambju ta’ informazzjoni bejn l-Istati Membri u tipprovdi gwida dwar l-aħjar prattiki.

(16)

L-impatt tat-tniġġis, inkluż meta kkawżat minn inċidenti jew aċċidenti, jista’ jestendi lil hinn mit-territorju ta’ Stat Membru. F’każijiet bħal dawn, mingħajr preġudizzju għad-Direttiva 2012/18/UE tal-Parlament Ewropew u tal-Kunsill (9), il-limitazzjoni tal-konsegwenzi għas-saħħa tal-bniedem u għall-ambjent ta’ inċidenti jew aċċidenti u l-prevenzjoni ta’ aktar inċidenti jew aċċidenti possibbli jeħtieġu skambju ta’ informazzjoni fil-pront u koordinazzjoni mill-qrib bejn l-awtoritajiet kompetenti tal-Istati Membri li huma jew li jistgħu jiġu affettwati minn tali avvenimenti. Għalhekk, fil-każ ta’ kwalunkwe inċident jew aċċident li jaffettwa b’mod sinifikanti l-ambjent jew is-saħħa tal-bniedem fi Stat Membru ieħor, l-iskambju ta’ informazzjoni u l-kooperazzjoni transkonfinali u multidixxiplinari bejn l-Istati Membri affettwati jenħtieġ li jitrawmu biex jiġu limitati l-konsegwenzi għall-ambjent u s-saħħa tal-bniedem u biex jiġu evitati aktar inċidenti jew aċċidenti possibbli.

(17)

L-Istati Membri jenħtieġ li jadottaw ukoll miżuri ta’ assigurazzjoni tal-konformità biex jippromwovu, jimmonitorjaw u jinfurzaw il-konformità mal-obbligi mqiegħda fuq persuni fiżiċi jew ġuridiċi skont id-Direttiva 2010/75/UE. Bħala parti mill-miżuri ta’ assigurazzjoni tal-konformità, jenħtieġ li l-Istati Membri jiżguraw li l-awtoritajiet nazzjonali inkarigati mill-implimentazzjoni u l-infurzar ta’ din id-Direttiva jkollhom għadd suffiċjenti ta’ persunal kwalifikat u riżorsi finanzjarji, tekniċi u teknoloġiċi suffiċjenti għat-twettiq effettiv tal-funzjonijiet tagħhom relatati mal-implimentazzjoni ta’ din id-Direttiva.

(18)

Ukoll, bħala parti mill-miżuri ta’ assigurazzjoni tal-konformità, l-awtoritajiet kompetenti jenħtieġ li jkunu jistgħu jissospendu l-operat ta’ installazzjoni fejn ksur kontinwu tal-kundizzjonijiet għal permess u n-nuqqas ta’ implimentazzjoni tas-sejbiet tar-rapport ta’ spezzjoni joħolqu periklu għas-saħħa tal-bniedem jew jirriskjaw li jikkawżaw effett negattiv sinifikanti fuq l-ambjent, sabiex jitneħħa dak il-periklu.

(19)

Fil-każ ta’ tniġġis li jaffettwa r-riżorsi tal-ilma tax-xorb, inkluż ir-riżorsi transkonfinali, jew li jaffettwa l-infrastruttura tal-ilma mormi, jenħtieġ li l-awtorità kompetenti tinforma lill-operaturi tal-ilma tax-xorb u l-ilma mormi affettwati dwar il-miżuri meħuda biex jipprevjenu jew jirrimedjaw il-ħsara kkawżata minn dak it-tniġġis għas-saħħa tal-bniedem jew għall-ambjent.

(20)

L-evalwazzjoni tad-Direttiva 2010/75/UE kkonkludiet li hemm bżonn li jissaħħu r-rabtiet bejn dik id-Direttiva u r-Regolament (KE) Nru 1907/2006 tal-Parlament Ewropew u tal-Kunsill (10) biex jiġu indirizzati aħjar ir-riskji tal-użu tas-sustanzi kimiċi f’installazzjonijiet li jaqgħu fil-kamp ta’ applikazzjoni tad-Direttiva 2010/75/UE. Sabiex jiġu żviluppati sinerġiji bejn il-ħidma mwettqa mill-Aġenzija Ewropea għas-Sustanzi Kimiċi (ECHA) dwar is-sustanzi kimiċi u t-tħejjija tad-dokumenti ta’ referenza tal-BAT skont id-Direttiva 2010/75/UE, l-ECHA jenħtieġ li tingħata rwol formali fit-tali tħejjija tad-dokumenti ta’ referenza tal-BAT.

(21)

Jenħtieġ li l-Kummissjoni tinkoraġġixxi l-parteċipazzjoni fil-forum għall-iskambju ta’ informazzjoni minn partijiet ikkonċernati u rappreżentanti tas-soċjetà ċivili, inklużi l-NGOs involuti fil-promozzjoni tal-protezzjoni tas-saħħa tal-bniedem jew tal-ambjent. Jenħtieġ li l-Kummissjoni tiżgura li l-Aġenzija Ewropea għall-Ambjent tipparteċipa fl-iskambju ta’ informazzjoni, fejn l-iskambju ta’ informazzjoni jibbenefika mill-għarfien espert tal-Aġenzija. Minħabba l-estensjoni tal-kamp ta’ applikazzjoni u ż-żieda fl-ammont ta’ xogħol tal-forum għall-iskambju u tal-grupp ta’ ħidma tekniku, jenħtieġ li l-Kummissjoni timpenja riżorsi adegwati u tadotta l-bidliet meħtieġa, inkluż billi temenda d-Deċiżjoni ta’ Implimentazzjoni tal-Kummissjoni 2012/119/UE (11), biex tiżgura l-funzjonament tal-forum u tal-grupp ta’ ħidma tekniku.

(22)

Sabiex jiġi ffaċilitat l-iskambju ta’ informazzjoni li tappoġġa d-determinazzjoni tal-livelli ta’ emissjonijiet u tal-livelli ta’ prestazzjoni ambjentali assoċjati mal-aħjar metodi tekniċi disponibbli, filwaqt li tinżamm l-integrità ta’ informazzjoni kummerċjali kunfidenzjali, il-proċeduri għall-immaniġġjar ta’ informazzjoni li tikkwalifika bħala informazzjoni kummerċjali kunfidenzjali jew informazzjoni kummerċjalment sensittiva, inklużi kundizzjonijiet fir-rigward tal-anonimizzazzjoni għal ċerti kategoriji ta’ partijiet ikkonċernati, u informazzjoni miġbura mill-industrija fil-kuntest tal-iskambju ta’ informazzjoni organizzat mill-Kummissjoni għall-fini tal-abbozzar, ir-rieżami jew l-aġġornament tad-dokumenti ta’ referenza tal-BAT jenħtieġ li jiġu speċifikati. Jenħtieġ li jiġi żgurat li l-individwi li jipparteċipaw fl-iskambju ta’ informazzjoni ma jikkondividux informazzjoni li tikkwalifika bħala informazzjoni kummerċjali kunfidenzjali jew informazzjoni kummerċjalment sensittiva ma’ kwalunkwe rappreżentant ta’ impriżi jew ta’ assoċjazzjonijiet kummerċjali li jkollhom interess ekonomiku fl-attivitajiet industrijali kkonċernati u fis-swieq relatati. Tali skambju ta’ informazzjoni huwa mingħajr preġudizzju għal-liġi tal-kompetizzjoni tal-Unjoni, b’mod partikolari l-Artikolu 101 tat-Trattat dwar il-Funzjonament tal-Unjoni Ewropea (TFUE).

(23)

Din id-Direttiva ma toħloq l-ebda obbligi għall-iżvelar lill-pubbliku ta’ informazzjoni kummerċjali kunfidenzjali li huma addizzjonali għal dawk diġà stabbiliti fid-Direttiva 2003/4/KE tal-Parlament Ewropew u tal-Kunsill (12) u d-Direttiva (UE) 2016/943 tal-Parlament Ewropew u tal-Kunsill (13).

(24)

Sabiex tiġi żgurata l-protezzjoni tas-saħħa tal-bniedem u tal-ambjent b’mod ġenerali, huma meħtieġa sinerġiji u koordinazzjoni ma’ leġiżlazzjoni ambjentali rilevanti oħra tal-Unjoni, fl-istadji kollha tal-implimentazzjoni tad-Direttiva 2010/75/UE. Għalhekk, l-awtoritajiet kompetenti rilevanti kollha b’responsabbiltà fir-rigward tal-konformità mal-leġiżlazzjoni ambjentali rilevanti tal-Unjoni jenħtieġ li jiġu kkonsultati kif xieraq qabel l-għoti ta’ permess skont dik id-Direttiva.

(25)

Bil-ħsieb li jittejbu kontinwament il-prestazzjoni ambjentali u s-sikurezza tal-installazzjonijiet, inkluż billi tiġi evitata l-ġenerazzjoni tal-iskart, jiġi ottimizzat l-użu tar-riżorsi u l-użu mill-ġdid tal-ilma, u l-prevenzjoni jew it-tnaqqis tar-riskji assoċjati mal-użu ta’ sustanzi perikolużi, jenħtieġ li l-operaturi tal-installazzjonijiet jistabbilixxu u jimplimentaw sistema ta’ ġestjoni ambjentali (EMS) f’konformità ma’ din id-Direttiva u l-konklużjonijiet rilevanti tal-BAT, u jenħtieġ li jagħmlu il-partijiet rilevanti disponibbli għall-pubbliku. Qabel ma jagħmlu l-partijiet rilevanti tal-EMS tagħhom disponibbli għall-pubbliku, l-operatur jenħtieġ li jkollu l-possibbiltà li jirrediġi jew jeskludi informazzjoni kummerċjali kunfidenzjali. Tali possibilità jenħtieġ li tapplika b’mod restrittiv, b’kont meħud tal-każ partikolari tal-interess pubbliku moqdi bid-divulgazzjoni. L-EMS jenħtieġ li tkopri wkoll il-ġestjoni tar-riskji relatati mal-użu tas-sustanzi perikolużi u analiżi tas-sostituzzjoni possibbli ta’ sustanzi perikolużi b’alternattivi aktar sikuri.

(26)

Sabiex jiġi żgurat li l-EMS tkun f’konformità mar-rekwiżiti tad-Direttiva 2010/75/UE, l-EMS jenħtieġ li tiġi rieżaminata mill-operatur u awditjata minn awditur estern ikkuntrattat mill-operatur. Jenħtieġ li l-awditur ikun jew korp ta’ valutazzjoni tal-konformità akkreditat skont ir-Regolament (KE) Nru 765/2008 tal-Parlament Ewropew u tal-Kunsill (14), kif meħtieġ skont l-ISO 17021, jew kwalunkwe persuna fiżika jew ġuridika li tkun kisbet liċenzja bħala verifikatur ambjentali skont l-Artikolu 2(20) tar-Regolament (KE) Nru 1221/2009 tal-Parlament Ewropew u tal-Kunsill (15).

(27)

Sabiex jiġu appoġġati d-dekarbonizzazzjoni, l-effiċjenza fir-riżorsi u ekonomija ċirkolari, il-konklużjonijiet tal-BAT jenħtieġ li jinkludu livelli vinkolanti ta’ prestazzjoni ambjentali assoċjati mal-BAT, u livelli indikattivi tal-prestazzjoni ambjentali assoċjati ma’ metodi tekniċi emerġenti, għal proċessi individwali li għandhom karatteristiċi simili bħal vetturi tal-enerġija, materja prima, unitajiet ta’ produzzjoni u prodotti finali u grad għoli ta’ omoġeneità madwar l-Unjoni, f’każijiet fejn id-data magħmula disponibbli fl-iskambju ta’ informazzjoni li tappoġġa d-determinazzjoni tal-BAT tkun robusta biżżejjed. Jenħtieġ li l-konklużjonijiet tal-BAT jinkludu wkoll parametri referenzjarji indikattivi għal każijiet oħra li għandhom jiġu inklużi mill-operaturi fl-EMS tagħhom, f’każijiet fejn il-prestazzjoni ambjentali tiddependi ħafna fuq ċirkostanzi speċifiċi tal-proċessi. Il-livelli ta’ prestazzjoni ambjentali assoċjati mal-BAT u l-parametri referenzjarji jistgħu jinkludu livelli ta’ konsum, il-livelli tal-effiċjenza fir-riżorsi u l-livelli ta’ użu mill-ġdid li jkopru r-riżorsi ta’ materjali, ilma u enerġija u skart u livelli oħra miksuba f’kundizzjonijiet ta’ referenza speċifikati. Il-livelli ta’ prestazzjoni ambjentali u l-parametri referenzjarji jenħtieġ li jkunu stabbiliti b’kont meħud tar-riżorsi meħtieġa għat-trasformazzjoni tal-installazzjonijiet li għandhom l-għan li jnaqqsu l-emissjonijiet tal-gassijiet serra, kif ukoll il-varjazzjonijiet xprunati mid-domanda tal-ħtiġijiet tar-riżorsi għal prodotti speċifiċi, bħall-varjazzjonijiet fil-konsum tal-ilma. L-awtorità kompetenti jenħtieġ li tistabbilixxi fil-permess, firxiet vinkolanti għall-prestazzjoni ambjentali kif stabbilit fil-konklużjonijiet tal-BAT, kif ukoll valuri limitu vinkolanti tal-prestazzjoni ambjentali li jikkonċernaw l-ilma u livelli indikattivi ta’ prestazzjoni ambjentali li jikkonċernaw l-iskart u r-riżorsi minbarra l-ilma, li mhumiex ambjentalment anqas stretti mill-firxiet vinkolanti, dment li jiġi żgurat it-tarf bi prestazzjoni aktar baxxa tal-firxa obbligatorja. Jenħtieġ li l-operatur jinkludi l-parametri referenzjarji fl-EMS.

(28)

Huwa meħtieġ li jiġu speċifikati ulterjorment il-kundizzjonijiet li taħthom l-awtorità kompetenti, meta tistabbilixxi valuri limitu tal-emissjonijiet applikabbli għar-rilaxxi ta’ sustanzi niġġiesa fl-ilma f’permess mogħti skont id-Direttiva 2010/75/UE, tista’ tqis il-proċessi ta’ trattament downstream f’impjant tat-trattament tal-ilma mormi. Il-valuri ta’ limitu tal-emissjonijiet jenħtieġ li jiġu speċifikati b’mod li jiżgura li tali rilaxxi ma jwasslux għal żieda fit-tagħbija ta’ sustanzi niġġiesa fl-ilmijiet riċeventi u lanqas ma jinpedixxu l-kapaċità jew il-potenzjal li jiġu rkuprati riżorsi mill-fluss ta’ trattament tal-ilma mormi, meta mqabbla ma’ sitwazzjoni fejn l-installazzjoni tapplika l-BAT u tissodisfa l-livelli ta’ emissjonijiet assoċjati mal-aħjar metodi tekniċi disponibbli għar-rilaxxi diretti.

(29)

L-għoti ta’ livell għoli ta’ protezzjoni tas-saħħa tal-bniedem u tal-ambjent b’mod ġenerali jirrikjedi fost l-oħrajn l-istabbiliment fil-permessi tal-valuri limitu tal-emissjonijiet f’livell li jiżgura l-konformità mal-livelli ta’ emissjonijiet applikabbli assoċjati mal-aħjar metodi tekniċi disponibbli stabbiliti fil-konklużjonijiet tal-BAT. Il-livelli ta’ emissjonijiet assoċjati mal-aħjar metodi tekniċi disponibbli (BAT-AELs) normalment jiġu espressi bħala firxiet, aktar milli bħala valuri uniċi, biex jirriflettu d-differenzi fi ħdan tip partikolari ta’ installazzjonijiet li jirriżultaw f’varjazzjonijiet fil-prestazzjonijiet ambjentali miksuba meta tiġi applikata l-BAT. Pereżempju, BAT partikolari ma tipprovdix l-istess prestazzjoni għal installazzjonijiet differenti, xi BATs jistgħu ma jkunux adattati għall-użu f’ċerti installazzjonijiet, jew taħlita ta’ BATs tista’ tkun aktar effettiva għal xi sustanzi niġġiesa jew fuq xi setturi ambjentali minn oħrajn. Il-kisba ta’ livell għoli ta’ protezzjoni tas-saħħa tal-bniedem u tal-ambjent b’mod ġenerali ġiet ipperikolata mill-prattika li jiġu stabbiliti valuri limitu tal-emissjonijiet fl-aktar tarf baxx tal-firxa ta’ livelli ta’ emissjonijiet assoċjati mal-aħjar metodi tekniċi disponibbli, mingħajr ma jitqies il-potenzjal ta’ installazzjoni partikolari li tikseb livelli ta’ emissjonijiet aktar baxxi permezz tal-applikazzjoni tal-aħjar metodi tekniċi disponibbli. Tali prattika tiskoraġġixxi lil dawk li jinsabu quddiem nett milli jimplimentaw metodi tekniċi aktar effettivi, u xxekkel il-kisba ta’ kundizzjonijiet ekwi li tiżgura livell għoli ta’ protezzjoni tas-saħħa tal-bniedem u tal-ambjent. Sabiex jitnaqqsu l-emissjonijiet, jenħtieġ li l-awtorità kompetenti tistabbilixxi valuri limitu tal-emissjonijiet fl-aktar livell strett li jista’ jinkiseb għall-installazzjoni speċifika, filwaqt li tqis il-firxa sħiħa tal-BAT-AELs kif ukoll l-effetti transmedjali. Jenħtieġ li l-valuri limitu tal-emissjonijiet ikunu bbażati fuq valutazzjoni mill-operatur li tanalizza l-fattibbiltà li jintlaħaq it-tarf l-aktar strett tal-firxa tal-BAT-AEL u jimmiraw lejn l-aħjar prestazzjoni ambjentali possibbli għall-installazzjonijiet speċifiċi; sakemm l-operatur ma jurix li l-applikazzjoni tal-aħjar metodi tekniċi disponibbli kif deskritt fil-konklużjonijiet tal-BAT tippermetti biss lill-installazzjoni kkonċernata li tilħaq valuri limitu tal-emissjonijiet anqas stretti. Sabiex jiġi appoġġat l-istabbiliment tal-valuri limitu tal-emissjonijiet fil-permessi u l-adozzjoni ta’ regoli ġenerali vinkolanti, jenħtieġ li l-Konklużjonijiet tal-BAT ikun fihom informazzjoni dwar iċ-ċirkostanzi li jippermettu l-kisba ta’ livelli aktar baxxi ta’ emissjonijiet fi ħdan il-firxa tal-BAT-AELs stabbiliti għall-kategoriji ta’ installazzjonijiet li għandhom karatteristiċi simili. Meta jiġu stabbiliti l-valuri limitu tal-emissjonijiet fil-firxa tal-BAT-AELs, il-proċedura ta’ deroga jenħtieġ li ma tkunx applikabbli.

(30)

Jenħtieġ li l-konklużjonijiet tal-BAT jidentifikaw metodi tekniċi emerġenti u l-aħjar metodi tekniċi disponibbli li l-operaturi industrijali jistgħu jimplimentaw biex jittrasformaw l-installazzjonijiet biex ikunu konsistenti mal-objettiv tal-Unjoni ta’ ekonomija sostenibbli, nadifa, ċirkolari u newtrali għall-klima. L-awtoritajiet kompetenti jenħtieġ li jitħallew jagħtu lill-operaturi industrijali biżżejjed żmien biex jimplimentaw trasformazzjoni industrijali profonda li tirrikjedi investiment sostanzjali permezz ta’ BATs jew metodi tekniċi emerġenti li jinvolvu bidla kbira fid-disinn jew fit-teknoloġija, jew biex tissostitwixxi installazzjoni eżistenti, kif deskritt fil-konklużjonijiet tal-BAT u stabbilit fi pjan ta’ trasformazzjoni.

(31)

Fis-snin reċenti, sitwazzjonijiet ta’ kriżi eċċezzjonali li affettwaw lill-Unjoni u l-Istati Membri tagħha, bħall-pandemija tal-COVID-19 u l-gwerra ta’ aggressjoni tar-Russja kontra l-Ukrajna. Dawn il-kriżijiet affettwaw f’daqqa u direttament il-provvista tal-enerġija u ta’ riżorsi, materjali jew tagħmir kruċjali għas-soċjetà, u dan wassal għal nuqqas u tfixkil serju li fir-rigward tagħhom jenħtieġ li ssir reazzjoni rapida. Fejn il-kriżijiet jenħtieġu tali reazzjoni, jista’ jkun meħtieġ li jiġu stabbiliti valuri limitu tal-emissjonijiet u valuri limitu tal-prestazzjoni ambjentali li huma anqas stretti mil-livelli fil-konklużjonijiet tal-BAT, sabiex tinżamm il-produzzjoni tal-enerġija jew il-produzzjoni ta’ tagħmir ieħor ta’ importanza kruċjali jew sabiex ikunu jistgħu jitkomplew l-operazzjonijiet tal-installazzjonijiet kruċjali. Il-ħtieġa li jiġu stabbiliti valuri limitu tal-emissjonijiet jew valuri limitu tal-prestazzjoni ambjentali anqas stretti jenħtieġ li tiġi bbilanċjata mal-ħtieġa li jiġu protetti l-ambjent u s-saħħa tal-bniedem, kif ukoll li jiġu żgurati kundizzjonijiet ekwivalenti u l-integrità tas-suq intern. Konsegwentement, limiti anqas stretti jistgħu jiġu stabbiliti biss bħala l-aħħar alternattiva, meta l-miżuri kollha li jirriżultaw f’inqas tniġġis jkunu ġew eżawriti. Jenħtieġ li l-awtorità kompetenti tiżgura li ma jiġi kkawżat l-ebda tniġġis sinifikanti minħabba emissjonijiet mill-installazzjoni. Sabiex jiġi ssorveljat l-impatt fuq l-ambjent u s-saħħa pubblika, jenħtieġ li l-emissjonijiet jiġu mmonitorjati. Sabiex jiġi żgurat li jkun hemm kundizzjonijiet ekwivalenti u jiġi protett is-suq intern, jenħtieġ li l-Kummissjoni tkun tista’ tipprovdi gwida stretta dwar is-sitwazzjonijiet ta’ kriżi eċċezzjonali u ċ-ċirkostanzi tagħhom li jistgħu jitqiesu. Jenħtieġ li l-Kummissjoni tivverifika li tali derogi mogħtija mill-Istati Membri jkunu ġustifikati u tifformula oġġezzjonijiet fejn tikkonkludi li deroga mhijiex ġustifikata, f’liema każ l-Istat Membru jenħtieġ li jirrevedi d-deroga mingħajr dewmien.

(32)

Jenħtieġ li l-Istati Membri jagħżlu li jeżentaw ċertu unitajiet ta’ kombustjoni jew unitajiet li jemettu d-diossidu tal-karbonju elenkati fl-Anness I tad-Direttiva 2003/87/KE tal-Parlament Ewropew u tal-Kunsill (16) mir-rekwiżiti dwar l-effiċjenza enerġetika fil-kundizzjonijiet tal-permess.

(33)

Bil-għan li tiġi prevenuta jew minimizzata l-emissjoni ta’ sustanzi niġġiesa minn installazzjonijiet fil-kamp ta’ applikazzjoni tad-Direttiva 2010/75/UE u biex ikun hemm kundizzjonijiet ekwi madwar l-Unjoni, il-kundizzjonijiet li taħthom jistgħu jingħataw derogi mill-valuri limitu tal-emissjonijiet jenħtieġ li jitfasslu aħjar permezz ta’ prinċipji ġenerali, inkluż rekwiżit għall-valutazzjoni mill-ġdid tagħhom, sabiex jiġi żgurat li l-implimentazzjoni ta’ tali derogi madwar l-Unjoni tkun aktar armonizzata. Barra minn hekk, id-derogi mill-valuri limitu tal-emissjonijiet jenħtieġ li ma jingħatawx meta jkunu jistgħu jqiegħdu f’riskju l-konformità mal-istandards ta’ kwalità ambjentali.

(34)

L-evalwazzjoni tad-Direttiva 2010/75/UE kkonkludiet li kien hemm xi disparità fl-approċċi ta’ valutazzjoni tal-konformità għall-installazzjonijiet koperti mill-Kapitolu II ta’ dik id-Direttiva. Sabiex jinkiseb livell għoli ta’ protezzjoni tal-ambjent kollu kemm hu, tiġi żgurata implimentazzjoni konsistenti tad-dritt tal-Unjoni u kundizzjonijiet ekwi madwar l-Unjoni, filwaqt li jiġi minimizzat il-piż amministrattiv fuq in-negozji u l-awtoritajiet pubbliċi, il-Kummissjoni jenħtieġ li tistabbilixxi regoli komuni għall-valutazzjoni tal-konformità mal-valuri limitu tal-emissjonijiet u l-validazzjoni tal-livelli mkejla kemm għall-emissjonijiet fl-arja kif ukoll għall-emissjonijiet fl-ilma abbażi tal-aħjar metodi tekniċi disponibbli. Dawk ir-regoli ta’ valutazzjoni tal-konformità jenħtieġ li jieħdu preċedenza fuq ir-regoli stabbiliti fil-Kapitoli III u IV dwar il-valutazzjoni tal-konformità mal-valuri limitu tal-emissjonijiet li jinsabu fl-Annessi V u VI tad-Direttiva 2010/75/UE.

(35)

L-istandards ta’ kwalità ambjentali jenħtieġ li jinftiehmu li jirreferu għar-rekwiżiti kollha stabbiliti fid-dritt tal-Unjoni, bħal-leġiżlazzjoni tal-Unjoni dwar l-arja u l-ilma; li jridu jiġu ssodisfati fi żmien partikolari minn ambjent partikolari jew minn parti partikolari tiegħu. Għalhekk huwa xieraq li jiġi ċċarat li meta jagħtu permess lil installazzjoni, l-awtoritajiet kompetenti jenħtieġ li ma jistabbilixxux biss kundizzjonijiet biex jiżguraw il-konformità tal-operazzjonijiet tal-installazzjoni mal-konklużjonijiet tal-BAT, iżda jenħtieġ ukoll, fejn xieraq, bil-ħsieb li jitnaqqas il-kontribut speċifiku tal-installazzjoni għat-tniġġis li jseħħ fiż-żona rilevanti, u filwaqt li titqies il-konċentrazzjoni tas-sustanzi niġġiesa kkonċernati fl-ambjent riċeventi, li jinkludu kundizzjonijiet addizzjonali speċifiċi fil-permess li jkunu aktar stretti minn dawk stabbiliti fil-konklużjonijiet rilevanti tal-BAT, sabiex tiġi żgurata l-konformità tal-installazzjoni mal-istandards ta’ kwalità ambjentali. Tali kundizzjonijiet jistgħu jikkonsistu fl-istabbiliment ta’ valuri limitu tal-emissjonijiet aktar stretti, limiti tat-tagħbija tal-emissjonijiet niġġiesa jew fil-limitazzjoni tat-tħaddim jew tal-kapaċità tal-installazzjoni.

(36)

Il-kundizzjonijiet għall-permessi jenħtieġ li jiġu riveduti regolarment u, fejn meħtieġ, aġġornati mill-awtorità kompetenti biex tiġi żgurata l-konformità mal-leġiżlazzjoni rilevanti. Tali rieżamijiet jew aġġornamenti jenħtieġ li jsiru wkoll fejn ikun meħtieġ li l-installazzjoni tikkonforma ma’ standard ta’ kwalità ambjentali, inkluż fil-każ ta’ standard ta’ kwalità ambjentali ġdid jew rivedut jew fejn l-istatus tal-ambjent riċeventi jeħtieġ reviżjoni tal-permess sabiex tinkiseb konformità mal-pjanijiet u mal-programmi stabbiliti skont il-leġiżlazzjoni tal-Unjoni, bħall-pjanijiet ta’ ġestjoni tal-baċir tax-xmara skont id-Direttiva 2000/60/KE tal-Parlament Ewropew u tal-Kunsill (17).

(37)

Il-Partijiet għall-Konvenzjoni ta’ Aarhus dwar l-Aċċess għall-Informazzjoni, il-Parteċipazzjoni Pubblika fit-Teħid tad-Deċiżjonijiet u l-Aċċess għall-Ġustizzja fi Kwistjonijiet Ambjentali, fis-seba’ sessjoni tal-Laqgħa tagħhom, approvaw is-sejbiet tal-Kumitat ta’ Konformità tal-Konvenzjoni fil-Kawża ACCC/C/2014/121, li skontha, billi tistabbilixxi qafas legali li ma jipprevedi l-ebda possibbiltà għall-parteċipazzjoni pubblika fir-rigward ta’ kunsiderazzjonijiet mill-ġdid u aġġornamenti skont l-Artikolu 21(3), (4) u (5)(b) u (c) tad-Direttiva 2010/75/UE, l-Unjoni Ewropea tonqos milli tikkonforma mal-Artikolu 6(10) tal-Konvenzjoni. Dawk is-sejbiet ġew approvati mill-Unjoni u mill-Istati Membri tagħha, u bil-ħsieb li tintlaħaq konformità sħiħa mal-Konvenzjoni ta’ Aarhus, huwa meħtieġ li jiġi speċifikat li l-membri tal-pubbliku kkonċernati jenħtieġ li jingħataw opportunitajiet bikrija u effettivi biex jipparteċipaw fl-għoti jew fl-aġġornament tal-kundizzjonijiet għal permessi stabbiliti mill-awtorità kompetenti wkoll meta l-kundizzjonijiet għal permessi jiġu kkunsidrati mill-ġdid wara l-pubblikazzjoni ta’ deċiżjonijiet dwar il-konklużjonijiet tal-BAT relatati mal-attività prinċipali tal-installazzjoni meta l-iżviluppi fl-aħjar metodi tekniċi disponibbli jippermettu t-tnaqqis sinifikanti tal-emissjonijiet, meta s-sikurezza fit-tħaddim tirrikjedi li jintużaw metodi tekniċi oħra u fejn ikun meħtieġ li jkun hemm konformità ma’ standard ta’ kwalità ambjentali ġdid jew rivedut.

(38)

Kif iċċarat mill-ġurisprudenza tal-Qorti tal-Ġustizzja (18), l-Istati Membri ma jistgħux jirrestrinġu dritt legali għall-kontestazzjoni ta’ deċiżjoni ta’ awtorità pubblika għal dawk il-membri tal-pubbliku kkonċernat li jkunu intervenew fil-proċedura amministrattiva preċedenti għall-adozzjoni ta’ tali id-deċiżjoni. Kif iċċarat ukoll mill-ġurisprudenza tal-Qorti tal-Ġustizzja (19), l-aċċess effettiv għall-ġustizzja fi kwistjonijiet ambjentali u rimedji effettivi jirrikjedu fost l-oħrajn li l-membri tal-pubbliku kkonċernat jenħtieġ li jkollhom id-dritt li jitolbu lill-qorti jew lil korp indipendenti u imparzjali kompetenti sabiex jordnaw miżuri interim biex jipprevjenu każ partikolari ta’ tniġġis, inkluż, fejn meħtieġ, permezz tas-sospensjoni temporanja tal-permess ikkontestat. Għalhekk, jenħtieġ li jiġi speċifikat li l-locus standi jenħtieġ li ma ssirx kundizzjonali fuq ir-rwol li kellu l-membru tal-pubbliku kkonċernat matul fażi parteċipattiva tal-proċeduri tat-teħid ta’ deċiżjonijiet, speċjalment fir-rigward tal-għoti ta’ permessi u l-għeluq ta’ siti, skont din id-Direttiva. Barra minn hekk, kwalunkwe proċedura ta’ rieżami jenħtieġ li tkun ġusta, ekwa, f’waqtha u mhux għalja b’mod projbittiv, u tipprevedi rimedji adegwati u effettivi, inkluż rimedju b’mandat ta’ inibizzjoni kif xieraq. Fir-rigward tal-azjendi agrikoli tat-trobbija tal-bhejjem, jenħtieġ li sospensjoni tal-operazzjonijiet tkun strettament mingħajr preġudizzju għall-kontinwazzjoni tal-attivitajiet li huma meħtieġa għat-trattament xieraq tal-bhejjem.

(39)

Il-kooperazzjoni transkonfinali jenħtieġ li sseħħ qabel l-għoti ta’ permessi fejn aktar minn Stat Membru wieħed jista’ jiġi affettwat mill-operat ta’ installazzjoni, u jenħtieġ li tinkludi informazzjoni u konsultazzjoni minn qabel tal-membri tal-pubbliku kkonċernati u tal-awtoritajiet kompetenti fl-Istati Membri l-oħra li jistgħu jiġu affettwati.

(40)

L-evalwazzjoni tad-Direttiva 2010/75/UE sabet li, anke jekk hi maħsuba biex trawwem it-trasformazzjoni tal-industrija Ewropea, din mhijiex dinamika biżżejjed u ma tappoġġax biżżejjed l-użu ta’ proċessi u teknoloġiji innovattivi, inklużi dawk li huma essenzjali għat-tranżizzjoni doppja ekoloġika u diġitali u għall-kisba tal-objettivi tal-Liġi Ewropea dwar il-Klima. Mingħajr ma preskritt l-użu ta’ kwalunkwe metodu tekniku jew teknoloġija speċifika, huwa għalhekk xieraq li jiġu ffaċilitati l-ittestjar u l-użu ta’ metodi tekniċi emerġenti bi prestazzjoni ambjentali mtejba, biex tiġi ffaċilitata l-kooperazzjoni mar-riċerkaturi u l-industriji fi proġetti ta’ riċerka ffinanzjati pubblikament soġġetti għall-kundizzjonijiet previsti fl-istrumenti ta’ finanzjament Ewropej u nazzjonali rilevanti, kif ukoll li jiġi stabbilit ċentru ddedikat biex jappoġġa l-innovazzjoni billi jiġbor u janalizza informazzjoni dwar metodi tekniċi innovattivi, inklużi metodi tekniċi emerġenti, rilevanti għal attivitajiet fil-kamp ta’ applikazzjoni ta’ dik id-Direttiva, inkluża t-trobbija tat-tjur u tal-majjali, u biex jiġi kkaratterizzat il-livell ta’ żvilupp tagħhom mir-riċerka sal-implimentazzjoni bl-użu tal-iskala tal-livell ta’ tħejjija teknoloġika (“TRL”) u biex jiġi vvalutat il-livell tal-prestazzjoni ambjentali ta’ dawk il-metodi tekniċi, filwaqt li jitqies kwalunkwe limitu potenzjali fir-rigward tad-disponibbiltà ta’ data u r-robustezza tagħha. Dan se jinforma wkoll l-iskambju ta’ informazzjoni dwar it-tfassil, ir-rieżami u l-aġġornament tad-dokumenti ta’ referenza tal-BAT. Il-metodi tekniċi emerġenti li għandhom jiġu analizzati miċ-ċentru jenħtieġ li tal-anqas ikunu fil-livell ta’ TRL 6-7, jiġifieri teknoloġija murija fl-ambjent rilevanti (ambjent industrijalment rilevanti fil-każ ta’ teknoloġiji abilitanti ewlenin) jew dimostrazzjoni tal-prototipi tas-sistema fl-ambjent operattiv.

(41)

L-ilħuq tal-objettivi tal-Unjoni rigward ekonomija nadifa, ċirkolari u newtrali għall-klima sal-2050 jitlob trasformazzjoni profonda tal-ekonomija tal-Unjoni. B’mod konsistenti mat-Tmien Programm ta’ Azzjoni Ambjentali, l-operaturi tal-installazzjonijiet koperti mid-Direttiva 2010/75/UE jenħtieġ li jinkludu pjanijiet ta’ trasformazzjoni fis-sistemi ta’ ġestjoni ambjentali tagħhom. Tali pjanijiet ta’ trasformazzjoni se jikkomplementaw ukoll ir-rekwiżiti ta’ Rapportar tas-Sostenibbiltà Korporattiva skont id-Direttiva 2013/34/UE tal-Parlament Ewropew u tal-Kunsill (20) billi jipprovdu mezz għall-implimentazzjoni ta’ dawk ir-rekwiżiti fil-livell tal-installazzjoni. L-ewwel prijorità jenħtieġ li tkun it-trasformazzjoni tal-attivitajiet intensivi fl-enerġija elenkati fl-Anness I. Għalhekk, l-operaturi ta’ installazzjonijiet intensivi fl-enerġija jenħtieġ li jipproduċu pjanijiet ta’ trasformazzjoni sat-30 ta’ Ġunju 2030. L-operaturi tal-installazzjonijiet li jwettqu attivitajiet oħra elenkati fl-Anness I jenħtieġ li jkunu meħtieġa jipproduċu pjanijiet ta’ trasformazzjoni bħala parti mir-rikunsiderazzjoni u l-aġġornament tal-permessi wara l-pubblikazzjoni tad-deċiżjonijiet dwar il-konklużjonijiet tal-BAT ippubblikati wara l-1 ta’ Jannar 2030. L-operaturi jenħtieġ li jitħallew jipproduċu pjan ta’ trasformazzjoni uniku li jkopri l-installazzjonijiet kollha taħt il-kontroll tagħhom fi Stat Membru u, fejn l-elementi tal-pjanijiet ta’ trasformazzjoni jkunu diġà ġew żviluppati f’dokumenti oħra u jkunu konformi mar-rekwiżiti tad-Direttiva 2010/75/UE, l-operaturi jenħtieġ li jitħallew jinkludu fil-pjan ta’ trasformazzjoni referenza għad-dokumenti rilevanti. Filwaqt li l-pjanijiet ta’ trasformazzjoni jenħtieġ li jibqgħu dokumenti indikattivi mħejjija taħt ir-responsabbiltà tal-operaturi, il-korp ta’ valutazzjoni tal-konformità jew il-verifikatur ambjentali ikkuntrattati mill-operaturi bħala parti mis-sistemi ta’ ġestjoni ambjentali tagħhom jenħtieġ li jivverifikaw li jkun fihom l-informazzjoni minima meħtieġa skont att delegat li għandu jiġi adottat mill-Kummissjoni, u l-operaturi jenħtieġ li jagħmlu l-pjanijiet ta’ trasformazzjoni pubbliċi.

(42)

Għodod diġitali bħal sistemi ta’ ġestjoni diġitalizzati jafu jgħinu biex jiġu vvalutati u mmaniġġjati b’mod kwantitattiv u kwalitattiv ir-riskji relatati mat-tniġġis u l-operaturi jiġu megħjuna fit-trasformazzjoni tal-installazzjonijiet tagħhom.

(43)

Hija meħtieġa aktar ċarezza fir-rigward tal-kriterji biex jiġi vvalutat jekk il-gassijiet jew il-likwidi mnaddfa li jirriżultaw mill-gassifikazzjoni u mill-pirolisi tal-iskart humiex ippurifikati biżżejjed sa tali punt li ma għadhomx skart qabel l-inċinerazzjoni tagħhom.

(44)

Fid-dawl tal-għadd kbir ta’ installazzjonijiet tat-trobbija li jenħtieġ li jiġu inklużi fil-kamp ta’ applikazzjoni tad-Direttiva 2010/75/UE, u s-sempliċità relattiva tal-proċessi u x-xejriet tal-emissjonijiet ta’ tali installazzjonijiet, huwa xieraq li jiġu stabbiliti proċeduri amministrattivi speċifiċi għall-ħruġ ta’ permessi u għall-operat tal-attivitajiet rilevanti li huma adattati għas-settur, mingħajr preġudizzju għar-rekwiżiti relatati mal-informazzjoni pubblika u l-parteċipazzjoni, il-monitoraġġ u l-konformità. Jenħtieġ li dan jippermetti l-adozzjoni ta’ regoli ġenerali vinkolanti fil-livell nazzjonali u r-reġistrazzjoni tal-azjendi agrikoli minflok ma jinħarġu permessi individwali lill-azjendi agrikoli. Meta jiġu adottati regoli ġenerali vinkolanti, l-Istati Membri jenħtieġ li jiżguraw approċċ integrat u livell għoli ta’ protezzjoni għall-ambjent kollu kemm hu ekwivalenti għal dak li jista’ jinkiseb b’kundizzjonijiet għal permess individwali.

(45)

Il-metodi tekniċi innovattivi li jidħlu fis-suq huma mistennija li jnaqqsu dejjem aktar kemm l-emissjonijiet ta’ sustanzi niġġiesa kif ukoll tal-gassijiet serra minn installazzjonijiet fil-kamp ta’ applikazzjoni kemm tad-Direttiva 2003/87/KE u d-Direttiva 2010/75/UE. Filwaqt li dan se jippermetti li jinħolqu sinerġiji ulterjuri bejn dawk id-Direttivi, dan jista’ jaffettwa t-tħaddim tagħhom, inkluż fis-suq tal-karbonju. F’dan ir-rigward, id-Direttiva 2003/87/KE fiha dispożizzjoni għar-rieżami tal-effettività tas-sinerġiji mad-Direttiva 2010/75/UE, u li titlob li l-permessi rilevanti ambjentali u klimatiċi jiġu kkoordinati sabiex tiġi żgurata l-eżekuzzjoni effiċjenti u aktar mgħaġġla tal-miżuri meħtieġa biex jikkonformaw mal-objettivi tal-Unjoni dwar il-klima u l-enerġija. Sabiex titqies id-dinamika tal-innovazzjoni f’dan ir-rigward u r-rieżami msemmi fl-Artikolu 8 tad-Direttiva 2003/87/KE, il-Kummissjoni jenħtieġ li tippreżenta rapport li jirrevedi l-implimentazzjoni tad-Direttiva 2010/75/UE lill-Parlament Ewropew u lill-Kunsill sal-2028 u kull ħames snin wara dan.

(46)

Filwaqt li tibni fuq is-simplifikazzjoni tar-rappurtar imwettaq skont id-Direttiva 2010/75/UE, jenħtieġ li l-Kummissjoni tkompli tissimplifika kif l-informazzjoni ssir disponibbli għaliha mill-Istati Membri skont dik id-Direttiva ma’ rekwiżiti rilevanti oħra tad-dritt tal-Unjoni, u b’mod partikolari r-Regolament (UE) 2024/1244 tal-Parlament Ewropew u tal-Kunsill (21). Jenħtieġ li l-informazzjoni rrappurtata tippermetti rieżami sinifikattiv tal-implimentazzjoni u r-riżultati miksuba fir-rigward tal-emissjonijiet u forom oħra ta’ tniġġis, il-valuri limitu tal-emissjonijiet, l-applikazzjoni tal-BAT, l-għoti ta’ derogi u l-istatus tat-tħaddim tal-installazzjonijiet. Għal dak il-fini, jenħtieġ li l-Kummissjoni taġġorna sal-5 ta’ Awwissu 2026 id-deċiżjoni ta’ implimentazzjoni li tistabbilixxi t-tip, il-format u l-frekwenza għar-rappurtar ta’ informazzjoni mill-Istati Membri.

(47)

Sabiex jiġi żgurat li d-Direttiva 2010/75/UE tkompli tilħaq l-objettivi tagħha li tipprevjeni jew tnaqqas l-emissjonijiet ta’ sustanzi niġġiesa u tikseb livell għoli ta’ protezzjoni tas-saħħa tal-bniedem u tal-ambjent, jenħtieġ li jiġu stabbiliti regoli operattivi għal attivitajiet relatati mat-trobbija ta’ majjali u tjur, filwaqt li titqies l-ispeċifiċità ta’ kull settur ta’ attività. Jenħtieġ li jingħataw setgħat ta’ implimentazzjoni lill-Kummissjoni biex tistabbilixxi kundizzjonijiet uniformi. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (22). Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti.

(48)

Jenħtieġ li l-Kummissjoni tirrieżamina l-ħtieġa li jiġu kkontrollati l-emissjonijiet mill-esplorazzjoni u l-produzzjoni fuq l-art u lil hinn mill-kosta taż-żejt u tal-gass minerali, filwaqt li jitqies il-qafas leġiżlattiv eżistenti tal-Unjoni, inkluż ir-Regolament (UE) 2024/1787 tal-Parlament Ewropew u tal-Kunsill (23) u d-Direttiva 2013/30/UE tal-Parlament Ewropew u tal-Kunsill (24), il-ħtieġa li jiġu kkontrollati l-emissjonijiet mit-trattament fuq il-post u l-estrazzjoni ta’ minerali industrijali mhux tal-enerġija użati f’industrija għajr dik għall-kostruzzjoni, kif ukoll il-ħtieġa li jiġu kkontrollati l-emissjonijiet mit-trattament fuq il-post u l-estrazzjoni ta’ minerali li jkunu għadhom kif bdew jitwettqu fl-Unjoni, u l-ħtieġa li jiġi rivedut il-limitu tal-attività fl-Anness I għall-produzzjoni tal-idroġenu permezz tal-elettroliżi tal-ilma.

(49)

Sabiex ikunu żgurati kundizzjonijiet uniformi għall-implimentazzjoni tad-Direttiva 2010/75/UE, jenħtieġ li jingħataw setgħat ta’ implimentazzjoni lill-Kummissjoni fir-rigward tal-istabbiliment ta’ (i) metodoloġija standardizzata għall-valutazzjoni tad-disproporzjonalità bejn il-kostijiet tal-implimentazzjoni tal-konklużjonijiet tal-BAT u l-benefiċċji ambjentali potenzjali f’konformità mal-Artikolu 15(4) filwaqt li jiġu kkunsidrati metodi bħal “Valur tal-Ħajja Statistika” (VSL) jew il-metodi “Value of Life Year” (VOLY), jekk ikun xieraq, (ii) metodoloġija standardizzata biex issir il-valutazzjoni msemmija fl-Artikolu 15(6), (iii) il-metodu ta’ kejl għall-valutazzjoni tal-konformità mal-valuri limitu tal-emissjonijiet stabbiliti fil-permess fir-rigward tal-emissjonijiet fl-arja u fl-ilma, (iv) l-arranġamenti dettaljati meħtieġa għall-istabbiliment u għall-funzjonament taċ-ċentru tal-innovazzjoni għat-trasformazzjoni u l-emissjonijiet industrijali, u (v) il-format li għandu jintuża għall-pjanijiet ta’ trasformazzjoni u (vi) liema informazzjoni mill-EMS hija rilevanti għall-pubblikazzjoni, li jenħtieġ li tinkludi informazzjoni mill-inqas dwar l-indikaturi u l-objettivi tal-prestazzjoni ambjentali, kif ukoll fuq il-progress lejn l-objettivi ambjentali. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011.

(50)

Sabiex jiġu żgurati l-implimentazzjoni u l-infurzar effettivi tal-obbligi stabbiliti fid-Direttiva 2010/75/UE, huwa meħtieġ li jiġi speċifikat il-kontenut minimu ta’ penali effettivi, proporzjonati u dissważivi. Id-disparitajiet fir-reġimi tal-penali, il-fatt li l-penali imposti jitqiesu f’ħafna każijiet baxxi wisq biex verament ikollhom effett ta’ deterrent fuq l-imġiba illegali, u n-nuqqas ta’ implimentazzjoni uniformi madwar l-Istati Membri, jimminaw il-kundizzjonijiet ekwi dwar l-emissjonijiet industrijali madwar l-Unjoni.

(51)

Jenħtieġ li l-Istati Membri jistabbilixxu r-regoli dwar penali applikabbli għall-ksur ta’ dispożizzjonijiet nazzjonali adottati skont din id-Direttiva u jiżguraw li jiġu implimentati. L-Istati Membri jistgħu jistabbilixxu regoli għal penali amministrattivi kif ukoll kriminali. Fi kwalunkwe każ, jenħtieġ li l-impożizzjoni ta’ penali kriminali u amministrattivi ma twassalx għal ksur tad-dritt li wieħed ma jiġix iġġudikat jew ikkastigat darbtejn fi proċedimenti kriminali għall-istess reat kriminali (il-prinċipju ne bis in idem) kif interpretat mill-Qorti tal-Ġustizzja. Għall-aktar ksur serju mwettaq minn persuna ġuridika, bħal dak ta’ livell għoli ta’ gravità minħabba n-natura, il-firxa u r-ripetizzjoni tiegħu, jew fejn dan il-ksur joħloq riskju sinifikanti għas-saħħa tal-bniedem jew għall-ambjent, jenħtieġ li l-Istati Membri jiżguraw li s-sistema nazzjonali tagħhom ta’ penali tinkludi multi li l-ammont massimu tagħhom jenħtieġ li jkun mill-inqas 3 % tal-fatturat annwali tal-operatur fl-Unjoni fis-sena finanzjarja ta’ qabel is-sena li fiha tiġi imposta l-multa. Għal dawk il-każijiet ta’ ksur, mingħajr preġudizzju għall-obbligi tal-Istati Membri skont id-Direttiva 2008/99/KE tal-Parlament Ewropew u tal-Kunsill (25), l-Istati Membri jistgħu wkoll jew alternattivament jadottaw penali kriminali, dment li dawn ikunu effettivi, proporzjonati u dissważivi.

(52)

Fejn ikun seħħ dannu għas-saħħa tal-bniedem bħala riżultat ta’ ksur tal-miżuri nazzjonali adottati skont id-Direttiva 2010/75/UE, l-Istati Membri jenħtieġ li jiżguraw li l-individwi affettwati jkunu jistgħu jitolbu u jiksbu kumpens għal dak id-dannu mill-persuni fiżiċi jew ġuridiċi rilevanti. Tali regoli dwar il-kumpens jikkontribwixxu biex jintlaħqu l-objettivi tal-preservazzjoni, il-protezzjoni u t-titjib tal-kwalità tal-ambjent u l-protezzjoni tas-saħħa tal-bniedem kif stabbilit fl-Artikolu 191 tat-TFUE. Huma jirfdu wkoll id-dritt għall-ħajja, l-integrità tal-persuna u l-kura tas-saħħa stabbiliti fl-Artikoli 2, 3 u 35 tal-Karta tad-Drittijiet Fundamentali tal-Unjoni Ewropea u d-dritt għal rimedju effettiv kif stabbilit fl-Artikolu 47 tal-Karta. Barra minn hekk, id-Direttiva 2004/35/KE tal-Parlament Ewropew u tal-Kunsill (26) ma tagħtix lill-partijiet privati dritt ta’ kumpens bħala konsegwenza ta’ dannu ambjentali jew ta’ theddida imminenti ta’ tali dannu.

(53)

Għalhekk huwa xieraq li d-Direttiva 2010/75/UE tindirizza d-dritt għal kumpens għad-danni mġarrba minn individwi u sabiex jiġi żgurat li l-individwi jkunu jistgħu jiddefendu d-drittijiet tagħhom kontra d-danni għas-saħħa kkawżati minn ksur tad-Direttiva 2010/75/UE u b’hekk jiġi żgurat infurzar aktar effiċjenti ta’ dik id-Direttiva. Jenħtieġ li l-proċeduri relatati mat-talbiet għal kumpens jitfasslu u jiġu applikati b’tali mod li ma jagħmlux l-eżerċizzju tad-dritt għal kumpens għal dannu impossibli jew eċċessivament diffiċli.

(54)

L-impatt tad-Direttiva 2010/75/UE fuq l-awtonomija proċedurali tal-Istati Membri jenħtieġ li jkun limitat għal dak li huwa meħtieġ biex jiġu żgurati l-objettivi tal-protezzjoni tas-saħħa tal-bniedem permezz ta’ ambjent sikur segwit minnha u jenħtieġ li ma jaffettwax regoli proċedurali nazzjonali oħra li jistabbilixxu d-dritt li jintalab kumpens għal ksur ta’ dik id-Direttiva. Madankollu, tali regoli nazzjonali jenħtieġ li ma jfixklux il-funzjonament effettiv tal-mekkaniżmu għat-tiftix ta’ kumpens meħtieġ mid-Direttiva 2010/75/UE.

(55)

Id-Direttiva 2010/75/UE ġiet implimentata b’mod diverġenti madwar l-Istati Membri fir-rigward tal-kopertura ta’ installazzjonijiet għall-manifattura ta’ prodotti taċ-ċeramika permezz tal-ħami, minħabba li l-formulazzjoni tad-definizzjoni ta’ din l-attività ppermettiet lill-Istati Membri jiddeċiedu jekk japplikawx iż-żewġ kriterji jew wieħed minnhom biss dwar il-kapaċità tal-produzzjoni u l-kapaċità tal-forn. Bil-ħsieb li tiġi żgurata implimentazzjoni aktar konsistenti ta’ dik id-Direttiva u li jiġu żgurati kundizzjonijiet ekwi madwar l-Unjoni, tali installazzjonijiet jenħtieġ li jiġu inklużi fil-kamp ta’ applikazzjoni ta’ dik id-Direttiva kull meta tiġi ssodisfata waħda minn dawk iż-żewġ kriterji.

(56)

Meta tistabbilixxi valuri limitu tal-emissjonijiet għal sustanzi niġġiesa, l-awtorità kompetenti jenħtieġ li tikkunsidra s-sustanzi kollha, inklużi s-sustanzi ta’ tħassib emerġenti, li jistgħu jiġu rilaxxati mill-installazzjoni kkonċernata u li jista’ jkollhom impatt sinifikanti fuq l-ambjent jew fuq is-saħħa tal-bniedem. B’dan il-mod, jenħtieġ li jiġu kkunsidrati l-karatteristiċi tal-periklu, il-kwantità u n-natura tas-sustanzi emessi u l-potenzjal tagħhom li jniġġsu kwalunkwe settur ambjentali. Il-konklużjonijiet tal-BAT, fejn rilevanti, huma l-punt ta’ referenza għall-għażla tas-sustanzi li għalihom iridu jiġu stabbiliti l-valuri limitu tal-emissjonijiet, għalkemm l-awtorità kompetenti tista’ tiddeċiedi li tagħżel sustanzi addizzjonali. Bħalissa, is-sustanzi niġġiesa individwali huma elenkati b’mod mhux eżawrjenti fl-Anness II tad-Direttiva 2010/75/UE; li mhuwiex kompatibbli mal-approċċ olistiku ta’ dik id-Direttiva u ma jirriflettix il-ħtieġa li l-awtoritajiet kompetenti jqisu s-sustanzi niġġiesa rilevanti kollha, inklużi dawk ta’ tħassib emerġenti. Għalhekk, jenħtieġ li titħassar il-lista mhux eżawrjenti ta’ sustanzi niġġiesa. Minflok, jenħtieġ li ssir referenza għal-lista ta’ sustanzi li jniġġsu fl-Anness II tar-Regolament (KE) Nru 166/2006 tal-Parlament Ewropew u tal-Kunsill (27).

(57)

Għalkemm il-landfills huma inklużi fil-kamp ta’ applikazzjoni tad-Direttiva 2010/75/UE, ma teżisti l-ebda konklużjoni tal-BAT għal-landfills peress li dik l-attività taqa’ fil-kamp ta’ applikazzjoni tad-Direttiva tal-Kunsill 1999/31/KE (28) u r-rekwiżiti ta’ din l-aħħar Direttiva jitqiesu li jikkostitwixxu l-BAT. Minħabba l-iżviluppi tekniċi u l-innovazzjoni li seħħew mill-adozzjoni tad-Direttiva 1999/31/KE, issa hemm disponibbli metodi tekniċi aktar effettivi għall-protezzjoni tas-saħħa tal-bniedem u tal-ambjent. L-adozzjoni tal-konklużjonijiet tal-BAT skont id-Direttiva 2010/75/UE tippermetti li jiġu indirizzati l-kwistjonijiet ambjentali ewlenin relatati mal-operat tal-landfills tal-iskart, inklużi l-emissjonijiet sinifikanti tal-metan. Għalhekk, jenħtieġ li d-Direttiva 1999/31/KE tippermetti l-adozzjoni tal-konklużjonijiet tal-BAT dwar il-landfills skont id-Direttiva 2010/75/UE.

(58)

Minħabba li l-objettivi ta’ din id-Direttiva, jiġifieri li jiġi żgurat livell għoli ta’ protezzjoni ambjentali u t-titjib tal-kwalità ambjentali ma jistgħux jinkisbu b’mod suffiċjenti mill-Istati Membri, iżda jistgħu pjuttost, minħabba n-natura transkonfinali tat-tniġġis mill-attivitajiet industrijali, jinkisbu aħjar fil-livell tal-Unjoni, l-Unjoni tista’ tadotta miżuri, f'konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkisbu dawk l-objettivi.

(59)

F’konformità mal-prinċipju ta’ proporzjonalità, għall-ilħuq tal-objettiv bażiku li jiġi żgurat livell għoli ta’ protezzjoni ambjentali u għat-titjib tal-kwalità ambjentali, huwa meħtieġ u xieraq li jiġu stabbiliti regoli dwar il-prevenzjoni u l-kontroll integrati tat-tniġġis li jirriżulta minn attivitajiet industrijali u minn attivitajiet ta’ trobbija tal-bhejjem. Din id-Direttiva ma tmurx lil hinn minn dak li hu meħtieġ biex jintlaħqu l-objettivi maħsuba, skont l-Artikolu 5(4) tat-Trattat dwar l-Unjoni Ewropea.

(60)

F’konformità mad-Dikjarazzjoni Politika Konġunta tat-28 ta’ Settembru 2011 tal-Istati Membri u tal-Kummissjoni dwar id-dokumenti ta’ spjegazzjoni (29), l-Istati Membri impenjaw ruħhom li jżidu man-notifika tal-miżuri ta’ traspożizzjoni tagħhom, f’każijiet ġustifikati, dokument wieħed jew aktar li jispjegaw ir-relazzjoni bejn il-komponenti ta’ direttiva u l-partijiet ekwivalenti tal-istrumenti nazzjonali ta’ traspożizzjoni. Fir-rigward ta’ din id-Direttiva, il-leġiżlatur iqis li t-trażmissjoni ta’ dokumenti ta’ dak it-tip hija ġustifikata.

(61)

L-impjanti tal-kombustjoni li huma parti minn sistemi iżolati żgħar jistgħu, minħabba l-pożizzjoni ġeografika tagħhom u n-nuqqas ta’ interkonnessjoni mal-grilja kontinentali tal-Istati Membri jew mal-grilja ta’ Stat Membru ieħor, jiffaċċaw sfidi speċjali li jirrikjedu aktar żmien biex jikkonformaw mal-valuri limitu tal-emissjonijiet. Jenħtieġ li l-Istati Membri kkonċernati jistabbilixxu pjan għall-konformità li jkopri l-impjanti tal-kombustjoni li jkunu parti minn sistema iżolata żgħira li jistipula l-miżuri biex tiġi żgurata konformità mal-valuri limitu tal-emissjonijiet sa mhux aktar tard mill-31 ta’ Diċembru 2029. Il-pjan jenħtieġ li jiddeskrivi l-miżuri biex tiġi żgurata l-konformità ma’ din id-Direttiva, u l-miżuri biex jiġu mminimizzati d-daqs u t-tul ta’ żmien tal-emissjonijiet tas-sustanzi niġġiesa matul il-perjodu kopert mill-pjan, u jinkludi informazzjoni dwar miżuri għall-ġestjoni tad-domanda u l-possibbiltajiet tal-bidla għal karburant alternattiv jew alternattivi aktar nodfa, bħall-użu ta’ sorsi tal-enerġija rinnovabbli u interkonnessjoni mal-grilji kontinentali jew ma’ grilja ta’ Stat Membru ieħor. Jenħtieġ li l-Istati Membri kkonċernati jikkomunikaw il-Pjan ta’ Konformità tagħhom lill-Kummissjoni. Jenħtieġ li l-Istati Membri jaġġornaw il-pjan f’każ li l-Kummissjoni tqajjem oġġezzjonijiet. Jenħtieġ li l-Istati Membri kkonċernati jirrappurtaw kull sena dwar il-progress lejn il-konformità.

(62)

Sabiex l-Istati Membri, l-awtoritajiet kompetenti u l-installazzjonijiet jingħataw żmien biex jikkonformaw mad-dispożizzjonijiet ġodda, u wkoll biex jingħata żmien lill-Kumissjoni biex taddotta konklużjonijiet ġodda tal-BAT li jqisu d-dispożizzjonijiet ġodda, jenħtieġ li jiġu preskritti dispożizzjonijiet tranżitorji. Sabiex tiġi żgurata ċ-ċertezza legali, jeħtieġ li jkun hemm data fissa ta’ limitu assolut sa meta jenħtieġ li jkun hemm konformità mad-dispożizzjonijiet. Fir-rigward tal-proċess ta’ Sevilla u l-għadd ta’ dokumenti ta’ referenza tal-BAT li jeħtieġ li jiġu riveduti, din id-data jenħtieġ li tiġi stabbilita għal 12-il sena għall-attivitajiet eżistenti u 10 snin għal attivitajiet ġodda. Dan ma jipprevjenix li l-konklużjonijiet tal-BAT jiġu adottati u implimentati aktar kmieni, ħaġa li hija mistennija għall-biċċa l-kbira tal-attivitajiet koperti minn din id-Direttiva. Installazzjonijiet eżistenti jenħtieġ li jikkonformaw mad-dispożizzjonijiet fid-Direttiva 2010/75/UE fil-verżjoni li tinsab fis-seħħ fit-3 ta’ Awwissu 2024, sakemm ikun hemm konklużjonijiet ġodda tal-BAT jew ikun hemm aġġornament tal-permess.

(63)

Jenħtieġ għalhekk li d-Direttivi 2010/75/UE u 1999/31/KE jiġu emendati kif xieraq.

(1)

it-titolu huwa sostitwit b’dan li ġej:

“Id-Direttiva 2010/75/UE tal-Parlament Ewropew u tal-Kunsill tal-24 ta’ Novembru 2010 dwar l-emissjonijiet industrijali u l-emissjonijiet mit-trobbija tal-bhejjem (il-prevenzjoni u l-kontroll integrati tat-tniġġis)”

(2)

fl-Artikolu 1, it-tieni paragrafu huwa sostitwit b’dan li ġej:

“Tippreskrivi wkoll regoli maħsuba għall-prevenzjoni jew, meta dan ma jkunx prattikabbli, għat-tnaqqis kontinwu ta’ emissjonijiet fl-arja, fl-ilma u fl-art, għall-prevenzjoni tal-ġenerazzjoni tal-iskart, għat-titjib tal-effiċjenza tar-riżorsi, u għall-promozzjoni tal-ekonomija ċirkolari u d-dekarbonizzazzjoni, sabiex jinkiseb livell għoli ta’ protezzjoni tas-saħħa tal-bniedem u tal-ambjent kollu kemm hu.”

(3)

fl-Artikolu 2, il-paragrafu 1 huwa sostitwit b’dan li ġej:

(4)

L-Artikolu 3 huwa emendat kif ġej:

(5)

fl-Artikolu 4(1), it-tieni subparagrafu huwa sostitwit b’dan li ġej:

“B’deroga mill-ewwel subparagrafu, l-Istati Membri jistgħu jistabbilixxu proċedura għar-reġistrazzjoni tal-installazzjonijiet koperti biss mill-Kapitolu V jew mill-Kapitolu VIa.”

(6)

fl-Artikolu 5, jiżdied il-paragrafu li ġej:

(7)

l-Artikoli 7 u 8 huma sostitwiti b’dan li ġej:

(*3)  Id-Direttiva 2004/35/KE tal-Parlament Ewropew u tal-Kunsill tal-21 ta' April 2004 dwar ir-responsabbiltà ambjentali f'dak li għandu x'jaqsam mal-prevenzjoni u r-rimedju għal danni ambjentali (ĠU L 143, 30.4.2004, p. 56).”;"

(8)

fl-Artikolu 9, il-paragrafu 2 huwa sostitwit b’dan li ġej:

(9)

fl-Artikolu 11, il-punt (f) huwa emendat kif ġej:

;

(10)

fl-Artikolu 11, jiżdiedu l-punti li ġejjin:

;

(11)

fl-Artikolu 12, il-paragrafu 1, il-punti (b), (c) u (f) huma sostitwiti b’dan li ġej:

;

(12)

l-Artikolu 13 huwa emendat kif ġej:

(13)

L-Artikolu 14 huwa emendat kif ġej:

(14)

jiddaħħal l-artikolu li ġej:

(*4)  Id-Direttiva (UE) 2024/1785 tal-Parlament Ewropew u tal-Kunsill tal-24 ta’ April 2024 li temenda d-Direttiva 2010/75/UE tal-Parlament Ewropew u tal-Kunsill dwar l-emissjonijiet industrijali (il-prevenzjoni u l-kontroll integrati tat-tniġġis) u d-Direttiva tal-Kunsill 1999/31/KE dwar ir-rimi ta’ skart f’terraferma (ĠU L, 2024/1785, 15.7.2024, ELI: http://data.europa.eu/eli/dir/2024/1785/oj).”;"

(15)

L-Artikolu 15 huwa sostitwit b’dan li ġej:

(16)

jiddaħħal l-artikolu li ġej:

(17)

fl-Artikolu 16, il-paragrafu 2 huwa sostitwit b’dan li ġej:

(18)

fl-Artikolu 16, jiżdied il-paragrafu li ġej:

(19)

fl-Artikolu 16, jiżdied il-paragrafu li ġej:

(20)

l-Artikolu 18 huwa sostitwit b’dan li ġej:

(21)

fl-Artikolu 20, il-paragrafu 1 huwa sostitwit b’dan li ġej:

(22)

fl-Artikolu 21(3), l-ewwel subparagrafu, il-punt (a) huwa sostitwit b’dan li ġej:

;

(23)

fl-Artikolu 21(5), il-punt (c) huwa sostitwit b’dan li ġej:

;

(24)

fl-Artikolu 21(5), jiżdied il-punt li ġej:

;

(25)

fl-Artikolu 23(4), il-ħames subparagrafu huwa sostitwit b’dan li ġej:

“Il-Kummissjoni għandha tadotta u, meta xieraq, taġġorna b’mod regolari gwida dwar il-kriterji għall-valutazzjoni tar-riskji ambjentali.”

(26)

L-Artikolu 24 huwa emendat kif ġej:

(27)

fl-Artikolu 25(1), jiżdiedu s-subparagrafi li ġejjin:

“Preżenza fil-proċedura ta’ rieżami ma għandhiex tkun kundizzjonali fuq ir-rwol li kellu l-membru tal-pubbliku kkonċernat matul fażi parteċipattiva tal-proċeduri tat-teħid ta’ deċiżjonijiet skont din id-Direttiva.

Il-proċedura ta’ rieżami għandha tkun ġusta, ekwa, f’waqtha u mhux għalja b’mod projbittiv, u għandha tipprevedi rimedji adegwati u effettivi, inkluż rimedju b’mandat ta’ inibizzjoni kif xieraq.”

(28)

fl-Artikolu 26, il-paragrafi 1 u 2 huma sostitwiti b’dan li ġej:

(29)

l-intestatura li ġejja tiddaħħal wara l-Artikolu 26:

“KAPITOLU IIA

L-IFFAĊILITAR U L-PROMOZZJONI TAL-INNOVAZZJONI”

(30)

L-Artikolu 27 huwa sostitwit b’dan li ġej:

(31)

jiddaħħlu l-artikoli li ġejjin:

(32)

fl-Artikolu 30, il-paragrafu 5 huwa sostitwit b’dan li ġej:

(33)

fl-Artikolu 30(6), it-tielet subparagrafu huwa sostitwit b’dan li ġej:

“L-Istati Membri għandhom jinfurmaw minnufih lill-Kummissjoni bi kwalunkwe deroga mogħtija skont l-ewwel subparagrafu, inklużi r-raġunijiet li jiġġustifikaw id-deroga u l-kundizzjonijiet imposti.”

(34)

jiddaħħal l-artikolu li ġej:

(35)

fl-Artikolu 42(1), it-tieni subparagrafu huwa sostitwit b’dan li ġej:

“Dan il-Kapitolu ma għandux japplika għall-impjanti tal-gassifikazzjoni jew tal-pirolisi, jekk il-gassijiet jew il-likwidi li jirriżultaw minn tali trattament termali tal-iskart jiġu ttrattati qabel l-inċinerazzjoni tagħhom sa tali punt li:

(36)

fl-Artikolu 48, il-paragrafu 1 huwa sostitwit b’dan li ġej:

(37)

fl-Artikolu 63, il-paragrafu 2 huwa sostitwit b’dan li ġej:

(38)

fl-Artikolu 70, il-paragrafu 3 huwa sostitwit b’dan li ġej:

(39)

l-intestatura li ġejja tiddaħħal wara l-Artikolu 70:

“KAPITOLU VIA

DISPOŻIZZJONIJIET SPEĊJALI GĦAT-TROBBIJA TA’ TJUR U MAJJALI”

(40)

l-artikoli li ġejjin jiddaħħlu wara l-intestatura “KAPITOLU VIa”:

(41)

fl-Artikolu 72, il-paragrafu 2 huwa sostitwit b’dan li ġej:

(42)

fl-Artikolu 73(1), l-ewwel u t-tieni subparagrafi huma sostitwiti b’dan li ġej:

“Sat-30 ta’ Ġunju 2028 u kull ħames snin wara dan, il-Kummissjoni għandha tippreżenta rapport lill-Parlament Ewropew u lill-Kunsill li jirrieżamina l-implimentazzjoni ta’ din id-Direttiva. Ir-rapport għandu jinkludi informazzjoni dwar attivitajiet li għalihom ġew adottati jew ma ġewx adottati konklużjonijiet tal-BAT skont l-Artikolu 13(5) ta’ din id-Direttiva, filwaqt li titqies id-dinamika tal-innovazzjoni, inklużi metodi tekniċi emerġenti, il-ħtieġa għal aktar miżuri ta’ prevenzjoni tat-tniġġis u r-rieżami msemmi fl-Artikolu 8 tad-Direttiva 2003/87/KE.

Dak ir-rapport għandu jinkludi valutazzjoni tal-ħtieġa ta’ azzjoni tal-Unjoni permezz tal-istabbiliment jew l-aġġornar tar-rekwiżiti minimi madwar l-Unjoni għall-valuri limitu tal-emissjonijiet u għar-regoli dwar il-monitoraġġ u l-konformità għall-attivitajiet li jaqgħu fil-kamp ta’ applikazzjoni tal-konklużjonijiet tal-BAT adottati matul il-perjodu preċedenti ta’ ħames snin, abbażi tal-kriterji li ġejjin:

(43)

l-Artikolu 73 huwa emendat kif ġej:

(44)

l-Artikolu 74 huwa sostitwit b’dan li ġej:

(45)

l-Artikolu 75 huwa sostitwit b’dan li ġej:

(46)

l-Artikolu 76 huwa sostitwit b’dan li ġej:

(47)

l-Artikoli 77 u 78 huma mħassra;

(48)

l-Artikolu 79 huwa sostitwit b’dan li ġej:

(*5)  Id-Direttiva 2008/99/KE tal-Parlament Ewropew u tal-Kunsill tad-19 ta’ Novembru 2008 dwar il-protezzjoni tal-ambjent permezz tal-liġi kriminali (ĠU L 328, 6.12.2008, p. 28).”;"

(49)

jiddaħħal l-artikolu li ġej:

(50)

l-Anness I huwa emendat skont l-Anness I ta’ din id-Direttiva;

(51)

jiddaħħal l-Anness Ia kif stabbilit fl-Anness II ta’ din id-Direttiva;

(52)

l-Anness II huwa sostitwit bit-test stabbilit fl-Anness III ta’ din id-Direttiva;

(53)

l-Anness III huwa emendat skont l-Anness IV ta’ din id-Direttiva;

(54)

l-Anness IV huwa emendat skont l-Anness V ta’ din id-Direttiva;

(55)

l-Anness V huwa emendat skont l-Anness VI ta’ din id-Direttiva;

(56)

l-Anness VI huwa emendat skont l-Anness VII ta’ din id-Direttiva.