(1)

Ir-Regolament ta’ Implimentazzjoni tal-Kummissjoni (UE) Nru 409/2013 (2) jistabbilixxi l-qafas għall-mobilizzazzjoni tar-Riċerka dwar il-Ġestjoni tat-Traffiku tal-Ajru Uniku Ewropew (SESAR). Dan jistabbilixxi r-rekwiżiti għall-kontenut ta’ proġetti komuni, għall-istabbiliment, l-adozzjoni, l-implimentazzjoni u l-monitoraġġ tagħhom.

(2)

Il-Proġett Komuni Wieħed (CP1), stabbilit bir-Regolament ta’ Implimentazzjoni tal-Kummissjoni (UE) 2021/116 (3), jistabbilixxi sitt funzjonalitajiet tal-ġestjoni tat-traffiku tal-ajru (“ATM”) u s-sottofunzjonalitajiet rispettivi tagħhom, inkluża l-funzjonalità tal-ATM dwar il-fażi inizjali tal-kondiviżjoni tal-informazzjoni dwar it-trajettorja (“AF6”).

(3)

Skont l-Artikolu 4(1) tar-Regolament ta’ Implimentazzjoni (UE) Nru 409/2013, il-funzjonalitajiet u s-sottofunzjonalitajiet tagħhom identifikati fi proġett komuni, għandhom ikunu lesti għall-implimentazzjoni u jeħtieġu implimentazzjoni sinkronizzata. It-tħejjija għall-implimentazzjoni għandha tiġi vvalutata, fost affarijiet oħra, abbażi tar-riżultati tal-validazzjoni mwettqa matul il-fażi tal-iżvilupp tas-SESAR, l-istatus tal-industrijalizzazzjoni u valutazzjoni tal-interoperabbiltà, kif ukoll fir-rigward tal-Pjan Globali tan-Navigazzjoni bl-Ajru tal-Organizzazzjoni tal-Avjazzjoni Ċivili Internazzjonali (“ICAO”) u tal-materjal rilevanti tal-ICAO.

(4)

Skont l-Artikolu 4(3) tar-Regolament ta’ Implimentazzjoni (UE) Nru 409/2013, proġett komuni jista’ jinkludi wkoll funzjonalitajiet jew sottofunzjonalitajiet tal-ATM li, fiż-żmien tad-dħul fis-seħħ tal-proġett komuni, ma jkunux lesti għall-implimentazzjoni iżda jikkostitwixxu komponent essenzjali tal-proġett komuni, dment li l-industrijalizzazzjoni tagħhom titqies li ġiet iffinalizzata b’data fil-mira għall-industrijalizzazzjoni stabbilita fi żmien tliet snin mill-adozzjoni tal-proġett komuni kkonċernat.

(5)

L-AF6, għalkemm ma tqisitx lesta għall-implimentazzjoni fiż-żmien tad-dħul fis-seħħ tar-Regolament ta’ Implimentazzjoni (UE) 2021/116, tqieset bħala komponent essenzjali tal-CP1 u ġiet inkluża b’data fil-mira għall-industrijalizzazzjoni stabbilita għall-31 ta’ Diċembru 2023 u data fil-mira għall-implimentazzjoni stabbilita għall-31 ta’ Diċembru 2027.

(6)

Skont l-Artikolu 4(4) tar-Regolament ta’ Implimentazzjoni (UE) Nru 409/2013, mal-iskadenza tad-data fil-mira għall-industrijalizzazzjoni tal-AF6, il-Kummissjoni, bl-appoġġ tal-Aġenzija tas-Sikurezza tal-Avjazzjoni tal-Unjoni Ewropea (“l-Aġenzija”), ivverifikat li l-AF6 kienet ġiet standardizzata u li kienet lesta għall-implimentazzjoni.

(7)

Għal dak l-għan, l-Aġenzija wettqet valutazzjoni preliminari tal-industrijalizzazzjoni u l-istat ta’ tħejjija tal-AF6 u sussegwentement waqqfet u kkoordinat il-forum tal-industrijalizzazzjoni tas-CP1 magħmul minn rappreżentanti tal-maniġer tal-mobilizzazzjoni, l-Impriża Konġunta SESAR 3, Eurocae, il-Maniġer tan-Network, il-manifatturi tal-inġenji tal-ajru u l-manifatturi tat-tagħmir fuq l-art tal-avjazzjoni, irrappreżentati mill-Assoċjazzjoni tal-Industriji Ajruspazjali, tas-Sigurtà u tad-Difiża tal-Ewropa (ASD). L-objettiv tal-forum kien li jiddefinixxi u jiżgura l-implimentazzjoni tal-azzjonijiet koordinati meħtieġa biex tintlaħaq id-data fil-mira għall-industrijalizzazzjoni tal-AF6 tal-31 ta’ Diċembru 2023.

(8)

Il-forum tal-industrijalizzazzjoni tas-CP1 ħadem matul l-2023 u qabel dwar l-azzjonijiet li għandhom jittieħdu minn kull grupp ta’ partijiet ikkonċernati biex jinkisbu l-istandardizzazzjoni u t-tħejjija għall-implimentazzjoni tal-AF6.

(9)

Fit-12 ta’ Diċembru 2023, l-Aġenzija kkonsultat lir-rappreżentanti tal-operaturi tal-inġenji tal-ajru dwar l-implimentazzjoni tal-avjonika rilevanti tal-AF6. Bl-eċċezzjoni tal-assoċjazzjoni li tirrappreżenta l-operaturi tal-inġenji tal-ajru kummerċjali (EBAA), l-operaturi kollha tal-inġenji tal-ajru kummerċjali rrappreżentati fil-forum tal-industrijalizzazzjoni kkonfermaw ir-rieda għall-implimentazzjoni tal-AF6.

(10)

Fl-1 ta’ Diċembru 2023, il-maniġer tal-mobilizzazzjoni, il-Maniġer tan-Network, il-grupp “A4 Airline” (Air France, easyJet, il-Lufthansa Group u Ryanair), u l-Impriża Konġunta SESAR 3 ikkonfermaw lill-Kummissjoni l-impenn tagħhom li jiżguraw l-implimentazzjoni tal-AF6 sal-31 ta’ Diċembru 2027.

(11)

Fis-26 ta’ Jannar 2024, l-Aġenzija ppreżentat is-sejbiet tagħha lill-Kummissjoni. Abbażi tal-informazzjoni miġbura u tal-investigazzjonijiet imwettqa, l-Aġenzija kkonkludiet li l-AF6 kienet lesta għall-implimentazzjoni. Filwaqt li tirrikonoxxi l-isforzi li saru mill-membri tal-forum tal-industrijalizzazzjoni tas-CP1 u l-impenji bil-miktub tagħhom biex jimplimentaw l-AF6, l-Aġenzija rrakkomandat ukoll miżuri ta’ akkumpanjament mhux vinkolanti li għandhom jitwettqu minn korpi ta’ standardizzazzjoni u partijiet ikkonċernati operazzjonali biex jappoġġaw l-implimentazzjoni tal-AF6. L-Aġenzija ddikjarat ukoll li hija lesta tappoġġa lill-Kummissjoni fil-monitoraġġ u s-sorveljanza ta’ dawk il-miżuri ta’ akkumpanjament.

(12)

Fid-dawl tal-konklużjonijiet tal-Aġenzija u tal-opinjonijiet u l-impenji tal-partijiet ikkonċernati interessati, il-Kummissjoni tqis li l-AF6 hija lesta għall-implimentazzjoni.

(13)

Fil-valutazzjoni tal-konformità mad-data fil-mira għall-implimentazzjoni tal-AF6 tal-31 ta’ Diċembru 2027, il-Kummissjoni se tikkunsidra jekk il-partijiet ikkonċernati rikjesti biex jimplimentaw l-AF6 kinux ippjanaw l-investimenti rilevanti tal-AF6 u li kienu ħadu l-miżuri meħtieġa biex jakkwistaw it-tagħmir, is-software jew is-servizzi rilevanti li għandhom jiġu implimentati fi żmien xieraq.

(14)

Il-miżuri previsti f’din id-Deċiżjoni huma skont l-opinjoni tal-Kumitat dwar l-Ajru Uniku.