EUR-Lex Access to European Union law
This document is an excerpt from the EUR-Lex website
Document 32024D1259
Council Decision (EU) 2024/1259 of 22 April 2024 on the position to be taken on behalf of the European Union within the International Grains Council concerning the accession of the Republic of Senegal to the Grains Trade Convention, 1995
Deċiżjoni tal-Kunsill (UE) 2024/1259 tat-22 ta’ April 2024 dwar il-pożizzjoni li għandha tittieħed f’isem l-Unjoni Ewropea fil-Kunsill Internazzjonali taċ-Ċereali rigward l-adeżjoni tar-Repubblika tas-Senegal mal-Konvenzjoni dwar il-Kummerċ taċ-Ċereali tal-1995
Deċiżjoni tal-Kunsill (UE) 2024/1259 tat-22 ta’ April 2024 dwar il-pożizzjoni li għandha tittieħed f’isem l-Unjoni Ewropea fil-Kunsill Internazzjonali taċ-Ċereali rigward l-adeżjoni tar-Repubblika tas-Senegal mal-Konvenzjoni dwar il-Kummerċ taċ-Ċereali tal-1995
ST/8057/2024/INIT
ĠU L, 2024/1259, 30.4.2024, ELI: http://data.europa.eu/eli/dec/2024/1259/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
Il-Ġurnal Uffiċjali |
MT Is-serje L |
2024/1259 |
30.4.2024 |
DEĊIŻJONI TAL-KUNSILL (UE) 2024/1259
tat-22 ta’ April 2024
dwar il-pożizzjoni li għandha tittieħed f’isem l-Unjoni Ewropea fil-Kunsill Internazzjonali taċ-Ċereali rigward l-adeżjoni tar-Repubblika tas-Senegal mal-Konvenzjoni dwar il-Kummerċ taċ-Ċereali tal-1995
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4), l-ewwel subparagrafu, flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1) |
Il-Konvenzjoni dwar il-Kummerċ taċ-Ċereali tal-1995 (“il-Konvenzjoni”) ġiet konkluża mill-Unjoni permezz tad-Deċiżjoni tal-Kunsill 96/88/KE (1) u daħlet fis-seħħ fl-1 ta’ Lulju 1995. Il-Konvenzjoni ġiet konkluża għal perjodu ta’ 3 snin. |
(2) |
Skont l-Artikolu 33 tal-Konvenzjoni, il-Kunsill Internazzjonali taċ-Ċereali jista’ jestendi l-Konvenzjoni għal perjodi suċċessivi ta’ mhux aktar minn sentejn kull darba. Mill-konklużjoni tagħha, il-Konvenzjoni ġiet estiża regolarment għal perjodi oħra ta’ sentejn. Il-Konvenzjoni ġiet estiża l-aħħar permezz tad-deċiżjoni tal-Kunsill Internazzjonali taċ-Ċereali fl-14 ta’ Ġunju 2023 (2), u se tibqa’ fis-seħħ sat-30 ta’ Ġunju 2025. |
(3) |
Skont l-Artikolu 27(2) tal-Konvenzjoni, hi miftuħa għall-adeżjoni tal-Gvernijiet tal-Istati kollha bil-kundizzjonijiet li l-Kunsill Internazzjonali taċ-Ċereali jqis xierqa. |
(4) |
Fit-22 ta’ Diċembru 2023, ir-Repubblika tas-Senegal applikat formalment għall-adeżjoni mal-Konvenzjoni. Jekk l-applikazzjoni għall-adeżjoni tiġi approvata, ir-Repubblika tas-Senegal issir membru fl-1 ta’ Mejju 2024. |
(5) |
Is-Senegal huwa produttur importanti tar-ross u tal-ħbub ħoxnin. Madankollu, mhuwiex awtosuffiċjenti u ma jistax ikopri kompletament il-konsum domestiku u għalhekk ikollu jimporta kwantitajiet addizzjonali ta’ diversi ċereali. |
(6) |
Jekk tiġi approvata l-applikazzjoni tar-Repubblika tas-Senegal biex taderixxi mal-Konvenzjoni u konsegwentement biex tipparteċipa fil-Kunsill Internazzjonali taċ-Ċereali, ir-Repubblika tas-Senegal tkun membru importatriċi f’konformità mal-Artikolu 12 tal-Konvenzjoni. Peress li l-Unjoni hija membru esportatur, l-adeżjoni tar-Repubblika tas-Senegal mhix se taffettwa n-numru ta’ voti allokati lill-Unjoni għall-finijiet tal-votazzjoni skont l-Artikolu 12 tal-Konvenzjoni. Mis-sena kontabilistika tal-2024-2025, l-adeżjoni tar-Repubblika tas-Senegal madankollu tista’ tnaqqas in-numru ta’ voti allokati lill-Unjoni skont l-Artikolu 11 tal-Konvenzjoni, li jintuża biex tiġi ddeterminata l-kontribuzzjoni finanzjarja tal-membri. |
(7) |
Jixraq li tiġi stabbilita l-pożizzjoni li għandha tittieħed f’isem l-Unjoni fil-Kunsill Internazzjonali taċ-Ċereali u li tiġi approvata l-adeżjoni tar-Repubblika tas-Senegal mal-Konvenzjoni, |
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fil-Kunsill Internazzjonali taċ-Ċereali għandha tkun li tapprova l-adeżjoni tar-Repubblika tas-Senegal mal-Konvenzjoni dwar il-Kummerċ taċ-Ċereali tal-1995.
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fil-Lussemburgu, it-22 ta’ April 2024.
Għall-Kunsill
Il-President
J. BORRELL FONTELLES
(1) Id-Deċiżjoni tal-Kunsill 96/88/KE tad-19 ta’ Diċembru 1995 rigward l-approvazzjoni mill-Komunità Ewropea tal-Konvenzjoni dwar il-Kummerċ taċ-Ċereali u l-Konvenzjoni tal-Għajnuna Alimentari, li tikkostitwixxi l-Ftehim dwar iċ-Ċereali Internazzjonali tal-1995 (ĠU L 21, 27.1.1996, p. 47).
(2) Id-Deċiżjoni tal-Kunsill (UE) 2023/991 tal-15 ta’ Mejju 2023 dwar il-pożizzjoni li għandha tittieħed f’isem l-Unjoni Ewropea fil-Kunsill Internazzjonali taċ-Ċereali fir-rigward tal-estensjoni tal-Konvenzjoni dwar il-Kummerċ taċ-Ċereali tal-1995 (ĠU L 135, 23.5.2023, p. 114).
ELI: http://data.europa.eu/eli/dec/2024/1259/oj
ISSN 1977-074X (electronic edition)