(1)

Wara l-aggressjoni militari Russa kontra l-Ukrajna u fid-dawl tal-possibbiltà ta’ interruzzjoni fit-tul jew saħansitra waqfien tal-provvisti tal-gass mir-Russja, l-Unjoni Ewropea ħadet inizjattivi biex iżżid it-tħejjija tagħha kontra tali interruzzjonijiet sabiex tipproteġi liċ-ċittadini u lill-ekonomija tagħha.

(2)

F’dan il-kuntest, ir-Regolament (UE) 2022/1032 ġie adottat bil-ħsieb li jiġi żgurat il-mili tal-faċilitajiet tal-ħżin tal-gass taħt l-art tal-Istati Membri għall-perjodu tax-xitwa tal-2022–2023 u lil hinn.

(3)

Għall-2023 u lil hinn, l-ewwel subparagrafu tal-Artikolu 6a(7) tar-Regolament (UE) 2017/1938 jipprevedi li kull Stat Membru b’faċilitajiet tal-ħżin tal-gass taħt l-art irid jibgħat lill-Kummissjoni, sal-15 ta’ Settembru tas-sena ta’ qabel, abbozz ta’ trajettorja għall-mili b’miri intermedjarji għal Frar, Mejju, Lulju u Settembru, inkluż informazzjoni teknika, għal tali faċilitajiet fit-territorju tiegħu u interkonnessi direttament maż-żona tas-suq tiegħu f’forma aggregata. It-trajettorja għall-mili u l-miri intermedji għandhom ikunu bbażati fuq ir-rata medja tal-mili matul il-ħames snin preċedenti.

(4)

It-tielet subparagrafu tal-Artikolu 6a(7) tar-Regolament (UE) 2017/1938 jistipula li, abbażi tal-informazzjoni teknika pprovduta minn kull Stat Membru u filwaqt li titqies il-valutazzjoni tal-Grupp ta’ Koordinazzjoni dwar il-Gass (il-“GCG”), il-Kummissjoni trid tadotta atti ta’ implimentazzjoni li jistabbilixxu t-trajettorja għall-mili għal kull Stat Membru sal-15 ta’ Novembru tas-sena ta’ qabel f’konformità mal-proċedura ta’ eżami msemmija fl-Artikolu 18a(2) tar-Regolament imsemmi hawn fuq. Il-Kummissjoni hija assistita minn kumitat tal-komitoloġija msemmi fl-Artikolu 18a(1) tar-Regolament (UE) 2017/1938, il-“Kumitat għall-Ħżin tal-Gass”.

(5)

Sal-15 ta’ Novembru 2023 il-Kummissjoni għandha tadotta atti ta’ implimentazzjoni li jistabbilixxu t-trajettorji għall-mili għal kull Stat Membru b’faċilitajiet tal-ħżin tal-gass taħt l-art għall-2024. Minħabba l-limiti ta’ żmien għall-adozzjoni ta’ dawk l-atti ta’ implimentazzjoni, jenħtieġ li jiġi adottat att ta’ implimentazzjoni uniku għall-Istati Membri kollha kkonċernati.

(6)

Fid-dawl tal-inċertezza kbira fir-rigward tas-sitwazzjoni ġenerali tas-sigurtà tal-provvista tal-gass u l-iżvilupp tad-domanda u tal-provvista tal-gass fl-Unjoni u fl-Istati Membri individwali, ix-xenarji ta’ konsum differenti skont it-temperaturi tax-xitwa, u l-livell ta’ miżuri volontarji għal tnaqqis fid-domanda implimentati mill-Istati Membri abbażi tal-Artikolu 3 tar-Regolament tal-Kunsill (UE) 2022/1369 (3), kif imbagħad ġew estiżi bir-Regolament tal-Kunsill (UE) 2023/706 (4), it-trajettorji għall-mili stabbiliti f’dan ir-Regolament ta’ Implimentazzjoni jinkludu miri intermedji minimi teknikament fattibbli li jippermettu li l-Istati Membri jilħqu l-mira għall-mili ta’ 90 % sal-1 ta’ Novembru 2024.

(7)

It-trajettorji għall-mili jenħtieġ li jqisu, sa fejn ikun possibbli, dawk ippreżentati mill-Istati Membri u jenħtieġ li jqisu r-rata medja tal-mili tal-Istati Membri matul il-ħames snin ta’ qabel. Il-fattibbiltà teknika tal-miri intermedji stabbiliti f’dan ir-Regolament ta’ Implimentazzjoni jenħtieġ li tqis ukoll il-kurva tal-kapaċità ta’ injezzjoni aggregata tas-siti tal-ħżin ta’ kull Stat Membru. Dawk il-miri jenħtieġ li jiġu stabbiliti b’mod li jissalvagwardja s-sigurtà tal-provvista tal-gass fil-livell tal-Unjoni, filwaqt li jiġu evitati piżijiet bla bżonn fuq l-Istati Membri, il-parteċipanti fis-suq tal-gass, l-operaturi jew il-klijenti tas-sistema tal-ħżin, u mingħajr distorsjoni bla bżonn tal-kompetizzjoni bejn il-faċilitajiet tal-ħżin li jinsabu fl-Istati Membri ġirien.

(8)

Il-miri intermedji tal-1 ta’ Frar u l-1 ta’ Mejju 2024 huma miri importanti għas-sigurtà tal-provvista tal-gass matul is-sena li ġejja. L-iffissar tal-mira ta’ Frar biex il-medja minima tal-Unjoni tkun 45 % huwa maħsub biex isaħħaħ is-sigurtà tal-provvista tal-gass billi jiżgura kapaċità għolja tat-twassil mill-ħażniet f’Diċembru 2023 u f’Jannar 2024 meta d-domanda għall-gass tkun għolja, filwaqt li jiġi evitat l-eżawriment tal-ħżin fi Frar u f’Marzu 2024. B’mod partikolari, jenħtieġ li tiġi pprovduta flessibbiltà fix-xhur bikrin tax-xitwa f’każ ta’ xitwa li tkun iktar kiesħa mill-medja. Madankollu, meta titqies il-Prospettiva tal-Provvista għax-xitwa ta’ ENTSOG, l-Istati Membri jenħtieġ li jagħmlu ħilithom biex kollettivament jilħqu l-mili ta’ 55 % tal-kapaċità tal-faċilitajiet tal-ħżin tal-gass taħt l-art fl-Unjoni biex jipprevjenu sitwazzjoni ta’ sigurtà tal-provvista li tista’ twassal biex tiġi ddikjarata Twissija tal-UE skont ir-Regolament (UE) 2023/706 u b’konsegwenza jiġu adottati miżuri marbuta mad-domanda. Il-mira intermedjarja li l-livell tal-ħżin tal-UE jkun 45 % fl-1 ta’ Mejju 2024 hija ġġustifikata biex tiffaċilita l-mili mill-ġdid tal-ħżin f’każ ta’ domanda ogħla u/jew tnaqqis fil-provvista matul is-sajf tal-2024 u jekk din ma tintlaħaqx tista’ toħloq riskju serju li l-mira tal-ħżin ta’ 90 % tal-1 ta’ Novembru 2024 ma tintlaħaqx. F’konformità mar-Regolament (UE) 2017/1938, il-livelli tal-mili li jibqgħu sa ħames punti perċentwali taħt il-mira, jitqiesu bħala konformi mal-miri tar-Regolament (UE) 2017/1938. Meta l-livell tal-mili ta’ Stat Membru jkun aktar minn ħames punti perċentwali taħt il-livell tat-trajettorja għall-mili tiegħu, jenħtieġ li l-awtorità kompetenti tieħu miżuri effettivi minnufih biex iżżidu. Jenħtieġ li l-Istati Membri jinfurmaw lill-Kummissjoni u lill-GCG b’tali miżuri.

(9)

It-trajettorji għall-mili ppreżentati mill-Istati Membri jistgħu jvarjaw minn xulxin peress li dawn jirriflettu sitwazzjonijiet speċifiċi għall-pajjiż. Barra minn hekk, il-miri tal-ħżin għall-1 ta’ Mejju huma ġeneralment aktar baxxi mill-miri tal-1 ta’ Frar peress li l-irtirar tal-ħażna huwa marbut mad-domanda għat-tisħin u l-ħażniet jilħqu l-minimu tagħhom fil-livell tal-UE madwar April ta’ kull sena.

(10)

Għall-Istati Membri li jaqgħu taħt l-Artikolu 6a(3) tar-Regolament (UE) 2017/1938, jenħtieġ li l-mira għall-mili titnaqqas bil-volum li ġie pprovdut lil pajjiżi terzi matul il-perjodu ta’ referenza mill-2016 sal-2021 jekk il-volum medju ipprovdut kien iktar minn 15 TWh fis-sena matul il-perjodu tal-irtirar mill-ħażna tal-gass (Ottubru – April).

(11)

Jenħtieġ li l-Istati Membri jilħqu l-mira għall-mili ta’ 90 % tal-faċilitajiet tal-ħżin tagħhom imsemmija fil-paragrafu 1 tal-Artikolu 6a tar-Regolament (UE) 2017/1938, inkluż, b’mod partikolari, billi jaggregaw id-domanda u jieħdu sehem fil-mekkaniżmu ta’ xiri konġunt, kif stabbilit fil-Komunikazzjoni tal-Kummissjoni tat-18 ta’ Ottubru 2022 (5) u fir-Regolament tal-Kunsill (UE) 2022/2576 (6) relatat, jekk jiġi estiż.

(12)

Fil-mili tal-ħżin, u fid-dawl tal-isfidi għall-istaġun tal-mili fl-2024, jenħtieġ li l-Istati Membri jagħmlu l-aqwa użu mill-għodod ta’ koordinazzjoni kollha disponibbli fil-livell tal-UE. Jekk l-użu tal-Pjattaforma tal-UE għax-Xiri tal-Enerġija għall-aggregazzjoni tad-domanda bil-ħsieb ta’ xiri konġunt tal-gass jiġi estiż, jista’ jikkontribwixxi għal koordinazzjoni aħjar tal-mili tal-ħżin. Pereżempju, l-Istati Membri jenħtieġ li jkunu lesti jipparteċipaw fl-aggregazzjoni tad-domanda b’volumi sostanzjali biex jgħinu fil-kisba tal-mira ta’ 90 %.

(13)

It-trajettorji għall-mili jqisu wkoll il-valutazzjoni tal-GCG, li ġie kkonsultat matul il-laqgħat tiegħu tal-20 ta’ Settembru 2023 u fl-20 ta’ Ottubru 2023.

(14)

Dan ir-Regolament qed jirrifletti t-trajettorji tal-ħżin tal-Istati Membri b’faċilitajiet tal-ħżin taħt l-art, filwaqt li l-Artikolu 6c tar-Regolament (UE) 2017/1938 jipprevedi obbligi oħra għall-Istati Membri li ma għandhomx faċilitajiet tal-ħżin tal-gass taħt l-art.

(15)

Meta titqies il-ħtieġa li sal-15 ta’ Novembru 2023 jiġu stabbiliti t-trajettorji għall-mili għall-2024, jenħtieġ li dan ir-Regolament jidħol fis-seħħ l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(16)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Ħżin tal-Gass.