ANNESS

Dan l-Anness jakkumpanja r-Rakkomandazzjoni tal-Kummissjoni dwar l-iffaċilitar tal-finanzi għat-tranżizzjoni lejn ekonomija sostenibbli (1). Jikkomplementa r-rakkomandazzjonijiet b’kunsiderazzjonijiet u illustrazzjonijiet aktar dettaljati biex jiġi appoġġat l-użu volontarju ta’ għodod mill-qafas ta’ finanzjament sostenibbli tal-UE għall-finanzjament tat-tranżizzjoni. Jagħti diversi għażliet u suġġerimenti lill-impriżi u lill-istituzzjonijiet finanzjarji biex jistabbilixxu miri ta’ tranżizzjoni, jartikolaw u jidentifikaw il-ħtiġijiet u l-proġetti ta’ finanzjament tat-tranżizzjoni kif ukoll biex jiġbru jew jipprovdu finanzjament tat-tranżizzjoni.

Werrej

1.

Relazzjoni bejn il-finanzjament ekoloġiku u l-finanzjament tat-tranżizzjoni

35

2.

Kunsiderazzjonijiet dwar kif tipi differenti ta’ impatti, riskji u opportunitajiet ta’ impriża jistgħu jiġu riflessi fil-miri ta’ tranżizzjoni individwali

35

3.

Ħarsa ġenerali lejn l-għodod ta’ finanzjament sostenibbli biex jiġu artikolati u ddeterminati l-ħtiġijiet ta’ finanzjament tat-tranżizzjoni

38

4.

Metodoloġiji tal-parametri referenzjarji tal-klimata l-UE

38

5.

Tassonomija tal-UE

39

5.1.

Għal xiex tista’ tintuża t-Tassonomija tal-UE

39

5.2.

It-Tassonomija bħala għodda ta’ tranżizzjoni

40

5.3.

Għażliet għall-użu tat-Tassonomija biex jiġu speċifikati l-ħtiġijiet ta’ finanzjament tat-tranżizzjoni

40

6.

Strumenti ta’ finanzjament biex jiżdied il-finanzjament tat-tranżizzjoni

42

7.

Użu tal-għodod ta’ finanzjament sostenibbli tal-Unjoni Ewropea minn intermedjarji finanzjarji u investituri

43

1.   Relazzjoni bejn il-finanzjament ekoloġiku u l-finanzjament tat-tranżizzjoni

Il-finanzjament sostenibbli huwa dwar il-finanzjament, kemm ta’ dak li diġà huwa ekoloġiku kif ukoll ta’ dak li qiegħed fi tranżizzjoni lejn dawn il-livelli ta’ prestazzjoni maż-żmien.

L-Illustrazzjoni 1 hawn taħt turi kif il-finanzjament tat-tranżizzjoni huwa relatat mal-finanzjament ġenerali u mal-finanzjament ekoloġiku, u kif dawn il-forom differenti ta’ finanzjament jistgħu jevolvu fuq terminu qasir, medju u twil.

Il-finanzjament ġenerali, li ma għandux objettivi ta’ sostenibbiltà, jista’ jiġi distint mill-finanzjament ekoloġiku u mill-finanzjament għat-tranżizzjoni. Il-finanzjament ġenerali bħalissa jista’ jinkludi kemm attivitajiet b’impatt kbir kif ukoll attivitajiet b’impatt baxx. Maż-żmien, hekk kif titlesta t-tranżizzjoni tal-ekonomija, l-attivitajiet b’impatt kbir se jkollhom jgħaddu minn tranżizzjoni biex isiru attivitajiet b’impatt baxx.

Il-finanzjament tat-tranżizzjoni għandu l-għan li jiffinanzja dik it-tranżizzjoni. Jista’ jinkludi kemm il-finanzjament bl-użu tar-rikavati kif ukoll il-finanzjament bi skop ġenerali (korporattiv). Fuq terminu qasir, il-finanzjament tat-tranżizzjoni spiss mhux se jirriżulta f’titjib li jilħaq il-miri tal-prestazzjoni ekoloġika. Madankollu, fuq terminu twil, il-finanzjament tat-tranżizzjoni jeħtieġ li jiġi allinjat mal-objettivi klimatiċi u ambjentali tal-UE u għalhekk se jitqies bħala finanzjament ekoloġiku jew b’impatt baxx.

2.   Kunsiderazzjonijiet dwar kif tipi differenti ta’ impatti, riskji u opportunitajiet ta’ impriża jistgħu jiġu riflessi fil-miri ta’ tranżizzjoni individwali

Din it-taqsima hija relatata mal-punti 3 u 4 tar-Rakkomandazzjoni tal-Kummissjoni.

L-impriżi jistgħu jikkunsidraw il-ħtiġijiet ta’ finanzjament tat-tranżizzjoni tagħhom fuq il-bażi tal-impatti, ir-riskji u l-opportunitajiet tagħhom għas-sostenibbiltà. Dawn jistgħu jiġu identifikati permezz ta’ valutazzjoni tal-materjalità li ssegwi l-approċċ ta’ materjalità doppja.

Bħala parti minn din il-valutazzjoni, l-impriżi jistgħu jużaw analiżi tax-xenarji relatata mal-klima u mal-ambjent biex jintużaw fl-identifikazzjoni u l-valutazzjoni tar-riskji fiżiċi u tat-tranżizzjoni u l-opportunitajiet fuq perjodu ta’ żmien qasir, medju u twil. Fuq il-bażi tal-eżitu ta’ tali valutazzjoni tal-materjalità (2), l-impriżi jistgħu jistabbilixxu miri ta’ tranżizzjoni u jiddeterminaw il-ħtiġijiet u l-impenji ta’ finanzjament tat-tranżizzjoni, meta rilevanti.

L-Illustrazzjoni 2 tipprovdi ħarsa ġenerali lejn l-għodod li jistgħu jintużaw biex jiġi kkunsidrat kif għandhom jiġu definiti l-ħtiġijiet ta’ finanzjament tat-tranżizzjoni f’każ ta’ impatti materjali, u kif għandhom jiġu definiti l-ħtiġijiet finanzjarji biex jiġu indirizzati l-impatti baxxi jew residwi.

Meta jippjanaw it-tranżizzjoni tagħhom u jiddefinixxu l-ħtiġijiet ta’ finanzjament tat-tranżizzjoni, l-impriżi huma mħeġġa jikkunsidraw ipoġġu miri ta’ tranżizzjoni bbażati fuq perkorsi ta’ tranżizzjoni rilevanti li huma kompatibbli mat-tranżizzjoni, filwaqt li jqisu t-tip ta’ impatti u fatturi oħra bħas-severità, l-iskala, l-ambitu u l-irrimedjabbiltà ta’ dawk l-impatti. L-impriżi jistgħu jużaw l-istandards u l-gwida disponibbli skont id-Direttiva (UE) 2022/2464 u l-implimentazzjoni tagħha għal dan l-għan (id-Direttiva dwar ir-Rappurtar Korporattiv dwar is-Sostenibbiltà).

L-impriżi huma mħeġġa jagħmlu l-kunsiderazzjonijiet li ġejjin dwar kif l-impatti, ir-riskji u l-opportunitajiet differenti jistgħu jiġu riflessi fil-miri ta’ tranżizzjoni u l-ħtiġijiet ta’ finanzjament tat-tranżizzjoni relatati.

Tabella 1.

Kunsiderazzjonijiet ġenerali għall-iffissar tal-miri klimatiċi u ambjentali f’każ ta’ impatti materjali

1) Jiġu kkunsidrati oqfsa ta’ referenza kredibbli biex tintgħażel il-metodoloġija użata għal dan il-proċess, inkluż: — Analiżi tax-xenarji bbażata fuq ix-xjenza u perkorsi settorjali globali, tal-UE jew nazzjonali ta’ 1,5 °C mingħajr qbiż fil-valur jew bi qbiż limitat b’referenza għall-IPCC, l-AIE jew inizjattivi privati, kredibbli u bbażati fuq ix-xjenza oħrajn. Jiġu kkunsidrati xenarji li jirriflettu l-kuntest speċifiku tal-impriża f’termini ta’ lokazzjoni ġeografika u attivitajiet ekonomiċi. — Il-qafas regolatorju tal-Unjoni għall-finanzi sostenibbli, inkluż ir-Regolament dwar it-Tassonomija u l-metodoloġija għall-parametri referenzjarji tal-klima tal-UE (ara t-taqsimiet 3 sa 5 ta’ dan l-Anness). — Il-Pjanijiet ta’ Azzjoni Strateġiċi dwar l-Ekonomija Ċirkolari tal-Unjoni (3), il-Bijodiversità (4) u t-Tniġġis Żero (5). — Ikkonsulta l-Perkorsi ta’ Tranżizzjoni tal-UE kwalitattivi tal-Kummissjoni (6) għal aspetti relatati mal-klima meta tevalwa l-isfidi tat-tranżizzjoni u l-aqwa t-teknoloġiji disponibbli f’settur rilevanti. 2) Ikkunsidra l-istabbiliment ta’ miri ta’ tranżizzjoni li huma marbuta biż-żmien, ibbażati fuq ix-xjenza u azzjonabbli biex tiżgura l-kredibbiltà tagħhom. 3) Ikkunsidra li tqasam dawn il-miri fil-livell tal-attività u tal-prodott u identifika lievi ewlenin fil-livell tal-attività, inklużi r-riżorsi finanzjarji, biex jiżguraw l-operazzjonalizzazzjoni ta’ dawn il-miri. 4) Meta rilevanti, b’referenza għall-punt 3), ikkunsidra li tispeċifika l-lievi tad-dekarbonizzazzjoni mistennija u l-kontributi kwantitattivi kumplessivi tagħhom biex jintlaħqu l-miri tat-tnaqqis tal-emissjonijiet tal-gassijiet serra kif ukoll l-azzjonijiet ewlenin ippjanati, inklużi l-bidliet fil-portafoll tal-prodotti u tas-servizzi tal-impriża u l-adozzjoni tagħha ta’ teknoloġiji ġodda 5) Ikkunsidra l-metriċi li magħhom se tkejjel u timmonitorja l-implimentazzjoni tal-miri ta’ tranżizzjoni, bħall-effettività tal-azzjonijiet, il-progress li jkun sar maż-żmien u l-involviment tal-partijiet ikkonċernati. 6) Ikkunsidra li tispeċifika kif l-ippjanar tan-negozju u l-proċessi tal-ippjanar finanzjarju u l-qafas tal-ġestjoni tar-riskju jqisu l-miri ta’ tranżizzjoni. 7) Ikkunsidra l-integrità ambjentali kumplessiva tal-miri ta’ tranżizzjoni, tibdilx mira ma’ oħra u kkunsidra l-użu tal-prinċipju “la tagħmilx ħsara sinifikanti”, f’konformità mar-Regolament dwar it-Tassonomija għal dan il-għan. Ikkunsidra wkoll li tirrispetta s-salvagwardji minimi dwar id-drittijiet tal-bniedem u tax-xogħol. 8) Ikkunsidra li tieħu miżuri biex tiżgura t-trasparenza tal-miri u l-bażi li fuqha ġew stabbiliti biex tinkoraġġixxi lill-investituri u lill-intermedjarji finanzjarji jikkunsidrawhom meta jipprovdu finanzjament tat-tranżizzjoni. Pereżempju, ikkunsidra li tartikola l-miri bħala parti minn pjan ta’ tranżizzjoni kredibbli biex iżżid il-kredibbiltà dwar il-kisba tagħhom liema pjan jirrifletti d-dipendenzi esterni (7) fis-siti kollha minn fejn topera l-impriża. 9) Ikkunsidra li tiżgura li jkun hemm fis-seħħ proċess ta’ governanza robust biex jappoġġa l-implimentazzjoni u s-sorveljanza tal-miri ta’ tranżizzjoni, inklużi: (a) Approvazzjoni tal-miri ta’ tranżizzjoni mill-korpi amministrattivi, maniġerjali u superviżorji tal-impriża. (b) L-istabbiliment ta’ kontrolli interni tajbin inkluża allokazzjoni ċara tar-rwoli u tar-responsabbiltajiet tas-sorveljanza u l-implimentazzjoni tal-azzjonijiet relatati li jappoġġaw l-implimentazzjoni ta’ dawn il-miri ta’ tranżizzjoni. (c) Rappurtar regolari lill-korpi maniġerjali dwar l-implimentazzjoni tal-miri ta’ tranżizzjoni. 10) Ikkunsidra meta rilevanti l-użu ta’ verifika u assigurazzjoni minn terza persuna biex tipprovdi kredibbiltà addizzjonali tal-miri ta’ tranżizzjoni u tal-proċess relatat mal-iffissar tal-miri u tas-segwitu tagħhom.

Tabella 2.

Kunsiderazzjonijiet għal miri sempliċi ta’ titjib f’każ ta’ impatti mhux materjali

1) Fil-każ ta’ impriżi fejn l-attività ekonomika ewlenija jkollha impatti baxxi, jista’ jkun possibbli li jitnaqqsu l-impatti residwi li jista’ jkun hemm, pereżempju fil-funzjonijiet ta’ appoġġ ta’ dik l-impriża (pereż. l-effiċjenza enerġetika tal-bini tal-uffiċċji, l-emissjonijiet tat-trasport jew tal-mobilità, ix-xiri tal-enerġija rinnovabbli, l-ekoloġizzazzjoni tal-provvista tal-ikel, eċċ.). 2) Meta rilevanti, ikkunsidra: (a) miri sempliċi ta’ titjib biex tinvesti fl-effiċjenza enerġetika tal-bini u b’hekk jitnaqqsu b’mod sinifikanti l-emissjonijiet mill-użu tal-elettriku jew tat-tisħin, u investimenti simili, speċjalment permezz ta’ attivitajiet ta’ abilitazzjoni koperti mill-Atti Delegati adottati skont ir-Regolament (UE) 2020/852 (ir-Regolament dwar it-Tassonomija); (b) politika ta’ akkwist b’enfasi fuq kunsiderazzjonijiet ta’ sostenibbiltà.

3.   Ħarsa ġenerali lejn l-għodod ta’ finanzjament sostenibbli biex jiġu artikolati u ddeterminati l-ħtiġijiet ta’ finanzjament tat-tranżizzjoni

L-għodod ta’ finanzjament sostenibbli, b’mod partikolari t-Tassonomija, jew il-parametri referenzjarji tal-klima tal-UE kif ukoll pjanijiet ta’ tranżizzjoni kredibbli jistgħu jintużaw biex jgħinu fl-għażla tal-miri ta’ tranżizzjoni u fl-artikolazzjoni tal-ħtiġijiet speċifiċi ta’ finanzjament tat-tranżizzjoni fil-livell tal-impriża u fil-livell tal-attivitajiet ekonomiċi. Il-finanzjament tat-tranżizzjoni mbagħad jista’ jinġabar permezz ta’ bonds ekoloġiċi jew marbuta mas-sostenibbiltà, self, finanzjament ta’ ekwità jew self speċjalizzat.

L-Illustrazzjoni 3 hawn taħt tagħti ħarsa ġenerali lejn l-għodod li jistgħu jintużaw biex jiġi artikolat u jinġabar il-finanzjament tat-tranżizzjoni.

4.   Metodoloġiji tal-parametri referenzjarji tal-klimata l-UE

Din it-taqsima hija relatata mal-punt 5 tar-Rakkomandazzjoni tal-Kummissjoni.

Meta ma jeżistux perkorsi jew pjanijiet direzzjonali bbażati fuq ix-xjenza speċifiċi għas-settur, l-impriżi jistgħu jikkunsidraw il-metodoloġiji tal-parametri referenzjarji tal-klima tal-UE u jużawhom b’mod li jiżgura allinjament max-xenarju ta’ 1,5 C tal-AIE jew tal-IPCC.

Meta jeżistu xenarji u perkorsi bbażati fuq ix-xjenza speċifiċi għas-settur, l-impriżi jistgħu jikkunsidraw jekk l-użu tagħhom jippermettilhomx jissodisfaw ukoll l-istandards minimi tal-parametri referenzjarji tal-klima tal-UE.

Il-ħruġ fis-suq kapitali ta’ impriżi li jissodisfaw l-istandards minimi tal-metodoloġiji tal-parametri referenzjarji tal-klima u li juru dan (pereżempju permezz ta’ pjan ta’ tranżizzjoni kredibbli li jqis l-istandards u l-gwida disponibbli fid-Direttiva (UE) 2022/2464 u l-implimentazzjoni tiegħu), huwa aktar probabbli li jiġi inkluż f’portafolli li jsegwu l-parametri referenzjarji tal-klima tal-UE.

Standards minimi tal-parametri referenzjarji tal-klima

Il-parametri referenzjarji tal-klima tal-UE huma bbażati fuq sett ta’ kriterji li għandhom l-għan li jiżguraw perkors ta’ tranżizzjoni għal portafolli li jkun kompatibbli mat-tranżizzjoni lejn ekonomija sostenibbli (8). L-istandards minimi tal-mira u t-trajettorja tad-dekarbonizzazzjoni tal-parametri referenzjarji tal-klima jirrikjedu minimu annwali ta’ tnaqqis ta’ 7 % fl-intensità tal-gassijiet serra mira assoluta tal-emissjonijiet tal-gassijiet serra (9).

Għal kull sena li fiha l-miri ma jintlaħqux, il-miri li ma jintlaħqux jenħtieġ li jiġu kkumpensati, billi jiġu aġġustati ’l fuqil-miri fit-trajettorja tad-dekarbonizzazzjoni għas-sena ta’ wara.

Fejn possibbli, ikkunsidra li turi emissjonijiet medji aktar baxxi meta mqabbla mal-pari u li tevita fatturi speċifiċi ta’ esklużjoni elenkati fl-Artikoli 9 sa 12 tar-Regolament Delegat tal-Kummissjoni (UE) 2020/1818 tas-17 ta’ Lulju 2020.

Ponderazzjoni żejda tal-impriżi li jistabbilixxu u jippubblikaw miri għat-tnaqqis tal-emissjonijiet tal-gassijiet serra

Il-ħruġ fis-suq kapitali tal-impriżi jista’ jingħata piż akbar f’parametru referenzjarju li jsegwi l-parametri referenzjarji tal-klima tal-UE, jekk l-impriża emittenti tkun tista’ turi li stabbiliet u ppubblikat miri għat-tnaqqis tal-emissjonijiet tal-gassijiet serra, fejn jiġu ssodisfati l-kundizzjonijiet li ġejjin:

(a)	l-emittent tat-titoli kostitwenti jippubblika b’mod konsistenti u preċiż l-emissjonijiet ta’ gassijiet serra tal-Ambitu 1, 2 u 3 tagħhom;

(b)

l-emittent tat-titoli kostitwenti jkun naqqas l-intensità tal-gassijiet serra tagħhom jew, fejn applikabbli, l-emissjonijiet tal-gassijiet serra assoluti tagħhom, inklużi l-emissjonijiet tal-gassijiet serra tal-Ambiti 1, 2 u 3, b’medja ta’ mill-inqas 7 % fis-sena għal mill-inqas tliet snin konsekuttivi.

5.   Tassonomija tal-UE

Din it-taqsima hija relatata mal-punt 6 tar-Rakkomandazzjoni tal-Kummissjoni.

5.1.   Għal xiex tista’ tintuża t-Tassonomija tal-UE

L-impriżi jistgħu jużaw it-Tassonomija bħala għodda ta’ finanzjament tat-tranżizzjoni, għall-ippjanar tat-tranżizzjoni tal-attivitajiet ekonomiċi tagħhom u għall-allokazzjoni tal-investimenti meħtieġa għat-tranżizzjoni. Bħala tali, tista’ tintuża għall-klassifikazzjoni ta’ investimenti sostenibbli, għall-kejl tal-prestazzjoni klimatika jew ambjentali attwali u ppjanata, għall-istabbiliment tal-miri u għall-komunikazzjoni, inkluża l-artikolazzjoni ta’ miri marbuta mat-Tassonomija fil-pjanijiet ta’ tranżizzjoni.

5.2.   It-Tassonomija bħala għodda ta’ tranżizzjoni

It-Tassonomija tippermetti lill-impriżi jagħmlu tranżizzjoni billi gradwalment iżidu s-sehem tagħhom ta’ attivitajiet ambjentalment sostenibbli minħabba li tiddefinixxi l-attivitajiet ekonomiċi ambjentalment sostenibbli, u mhux l-impriżi.

L-Illustrazzjoni 5 turi kif impriża tista’ gradwalment tagħmel it-tranżizzjoni tal-attivitajiet tagħha, hawnhekk l-attivitajiet imwettqa fil-fabbriki, u tinvesti fit-titjib tagħhom biex iżżid is-sehem ta’ attivitajiet ekoloġiċi fil-futur. Pjanijiet ta’ tranżizzjoni bbażati fuq l-attività jistgħu jkunu l-parti ewlenija ta’ strateġija ta’ tranżizzjoni fil-livell tal-entità.

5.3.   Għażliet għall-użu tat-Tassonomija biex jiġu speċifikati l-ħtiġijiet ta’ finanzjament tat-tranżizzjoni

L-impriżi jistgħu jużaw it-Tassonomija biex jiddefinixxu l-ħtiġijiet ta’ finanzjament tat-tranżizzjoni tagħhom fil-livell tal-attività.

It-Tassonomija ma tippreskrivi l-iskeda ta’ żmien sa meta impriża jenħtieġ li tallinja l-attivitajiet tagħha mal-ebda wieħed mill-kriterji tagħha. Minflok, tħalli flessibbiltà lill-atturi tas-suq biex jużaw l-iskedi ta’ żmien tal-perkorsi ta’ tranżizzjoni bbażati fuq ix-xjenza tagħhom stess. L-impriżi jistgħu jagħmlu referenza għall-kriterji tat-tassonomija fl-istabbiliment tal-miri klimatiċi u ambjentali tagħhom u meta dawk il-miri jkunu allinjati mat-tranżizzjoni, u l-kisba tagħhom tkun kredibbli, ikunu jistgħu jiġbru finanzjament ta’ tranżizzjoni għall-implimentazzjoni tagħhom.

L-Illustrazzjoni 6 turi kif it-Tassonomija tista’ tintuża għal dan l-għan, billi tipprovdi għażliet li jistgħu jiġu kkunsidrati f’sekwenza partikolari, meta titqies l-ewwel il-fattibbiltà tal-għażliet l-aktar ambizzjużi.

1)   Il-finanzjament ta’ attivitajiet ekonomiċi diġà allinjati mat-Tassonomija

Meta attività ekonomika tkun diġà allinjata mat-Tassonomija, l-impriżi jistgħu jikkunsidraw kull ħtieġa ta’ finanzjament attwali u futura għaż-żamma tal-allinjament mat-Tassonomija anke fil-futur.

2)   Investimenti allinjati mat-Tassonomija

Meta attività ekonomika tkun eliġibbli iżda tkun għadha mhijiex allinjata mat-Tassonomija, l-impriżi jistgħu jikkunsidraw li jallinjawha mal-kriterji tekniċi ta’ skrinjar tat-Tassonomija fi żmien ħames (eċċezzjonalment 10) snin (10). Speċifikazzjoni tal-investiment għal tranżizzjoni meħtieġ biex jintlaħqu dawn il-miri fi pjan tan-nefqa kapitali. Tali nefqa kapitali titqies bħala investiment allinjat mat-Tassonomija.

3)   Investiment li jallinja ruħu mat-Tassonomija fuq perjodu ta’ żmien itwal

Meta ma jkunx fattibbli l-allinjament mat-Tassonomija f’ħames (eċċezzjonalment 10) snin, ikun possibbli li jiġi kkunsidrat l-allinjament ta’ assi jew ta’ attività ekonomika mal-kriterji assoċjati ta’ prestazzjoni tat-Tassonomija fuq perjodu ta’ żmien itwal li jkun għadu kompatibbli mat-tranżizzjoni. Investimenti għal tranżizzjoni li se jilħqu biss l-allinjament mat-Tassonomija fuq perjodu ta’ żmien itwal mill-ħames (eċċezzjonalment 10) snin rikonoxxuti skont ir-Regolament Delegat (UE) 2021/2178, jistgħu jkunu akkumpanjati minn pjan ta’ tranżizzjoni speċifiku għal attività li jkun kompatibbli mat-tranżizzjoni, li jiġġustifika l-perjodu ta’ żmien itwal biex jintlaħqu l-miri (11) u li juri kif l-allinjament mat-Tassonomija se jintlaħaq fi stadju sussegwenti.

Għall-aspetti ambjentali, il-miri jistgħu jiġu allinjati mal-objettivi u l-miri tal-politika ambjentali internazzjonali u tal-Unjoni, inklużi dawk relatati mal-protezzjoni u r-restawr sostenibbli tar-riżorsi tal-ilma u tal-baħar, l-ekonomija ċirkolari, il-prevenzjoni u l-kontroll tat-tniġġis, u l-protezzjoni u r-restawr tal-bijodiversità u tal-ekosistemi.

4)   Investimenti għal tranżizzjoni lil hinn mil-livelli tal-mitigazzjoni tat-tibdil fil-klima la tagħmilx ħsara sinifikanti fl-ewwel pass

L-impriżi b’attivitajiet li bħalissa ma jissodisfawx il-kriterji DNSH (do no significant harm, la tagħmilx ħsara sinifikanti) tat-Tassonomija, li fihom l-investimenti biex jintlaħqu l-kriterji ta’ kontribuzzjoni sostanzjali f’ħames (eċċezzjonalment 10) snin bħalissa mhumiex fattibbli, jistgħu jikkunsidraw li jtejbu l-prestazzjoni ambjentali ta’ dawk l-attivitajiet lil hinn mil-livelli ta’ prestazzjoni definiti mill-kriterji “la tagħmilx ħsara sinifikanti” f’perjodu ta’ żmien li jkun qasir biżżejjed biex ikun kompatibbli mat-tranżizzjoni (12). Għal tali investimenti għal tranżizzjoni li jtejbu l-prestazzjoni lil hinn mill-kriterji ta’ la tagħmilx ħsara sinifikanti tat-Tassonomija bħala l-ewwel pass fit-tranżizzjoni, l-impriżi jistgħu jikkunsidraw li jakkumpanjawhom bi pjan ta’ tranżizzjoni speċifiku għal attività li jkun kompatibbli mat-tranżizzjoni, li jiġġustifika għaliex dan il-pass interim huwa meħtieġ u kif l-allinjament mat-Tassonomija se jintlaħaq fi stadju sussegwenti.

Il-pjan jista’ juri (i) kif l-attività se tagħmel it-tranżizzjoni b’titjib sinifikanti fil-prestazzjoni lil hinn mil-livell tal-kriterji DNSH u lejn il-livell tal-kriterji ta’ kontribuzzjoni sostanzjali, u (ii) kif it-titjib kontinwu fil-prestazzjoni klimatika jew ambjentali se jiżgura li jiġi evitat li tiġi kkawżata ħsara sinifikanti fil-futur, hekk kif l-ekonomija tqarreb in-newtralità klimatika, u l-livelli ta’ tolleranza għall-ħsara li jitqiesu sinifikanti se jinbidlu wkoll maż-żmien.

5)   Investimenti speċifikati permezz ta’ mezzi oħra fi pjan ta’ tranżizzjoni bbażat fuq l-attività

Għal attivitajiet ekonomiċi b’impatt kbir li għadhom mhumiex koperti mill-Atti Delegati dwar it-Tassonomija u meta ma hemm l-ebda alternattiva b’impatt baxx koperta mir-Regolament dwar it-Tassonomija, l-impriżi jistgħu jikkunsidraw li jużaw mezzi oħra bħal perkorsi bbażati fuq ix-xjenza biex jispeċifikaw il-miri u l-ħtiġijiet ta’ finanzjament.

6)   Investimenti għal attivitajiet ta’ tranżizzjoni b’impatti ambjentali baxxi

Għal attivitajiet ekonomiċi b’impatt baxx, li għalhekk mhumiex koperti mit-Tassonomija, l-impriżi jistgħu jikkunsidraw li jużaw il-kriterji rilevanti tat-Tassonomija biex jindirizzaw l-impatti residwi pereż. permezz ta’ investimenti fl-effiċjenza enerġetika tal-bini, mobilità b’emissjonijiet baxxi, teknoloġiji abilitanti, eċċ.

6.   Strumenti ta’ finanzjament biex jiżdied il-finanzjament tat-tranżizzjoni

Din it-taqsima hija relatata mal-punt 8 tar-Rakkomandazzjoni tal-Kummissjoni.

L-impriżi jistgħu jikkunsidraw li jużaw wieħed, jew taħlita ta’ diversi, strumenti ta’ finanzjament relatati mat-tranżizzjoni biex jiġbru l-finanzjament tat-tranżizzjoni, bħal tipi speċifiċi ta’ self jew ħruġ ta’ swieq kapitali b’karatteristiċi speċifiċi. It-Tabella 3 hawn taħt tipprovdi illustrazzjonijiet għal dan il-għan.

Tabella 3

Eżempji ta’ self jew strumenti ta’ finanzjament tas-suq kapitali għall-ġbir ta’ finanzjament tat-tranżizzjoni

Self ekoloġiku u self ieħor tas-sostenibbiltà	1) Iffinanzja proġetti jew investimenti permezz ta’ self bi skop ta’ tranżizzjoni dedikata (użu tar-rikavati) bħal self biex jittejbu l-assi jew biex isiru investimenti ġodda li jippermettu produzzjoni b’livell baxx ta’ emissjonijiet tal-karbonju jew prestazzjoni ambjentali mtejba b’mod sinifikanti. Pereżempju: — self għall-finanzjament ta’ proġetti ta’ tranżizzjoni li għandhom pjan kredibbli ta’ tranżizzjoni bbażat fuq l-attività jew li huma parti minn pjan ta’ tranżizzjoni kredibbli fil-livell ta’ entità (13); — self għall-finanzjament ta’ attivitajiet ekonomiċi eliġibbli skont it-Tassonomija u l-ilħuq tal-allinjament mat-Tassonomija fuq perjodu ta’ żmien ta’ ħames (eċċezzjonalment 10) snin; — miri kredibbli bbażati fuq ix-xjenza, meta proporzjonati, li huma appoġġati minn informazzjoni li tiżgura l-integrità, it-trasparenza u l-akkontabbiltà; — self għall-finanzjament ta’ investimenti oħra għal tranżizzjoni fl-attivitajiet imsemmija fil-Punt 2.2. ta’ din ir-Rakkomandazzjoni. — iddefinixxi indikaturi tal-prestazzjoni ambjentali robusti biex tiffinanzja investimenti korporattivi li huma inklużi fi pjan ta’ tranżizzjoni. 2) Fittex self bi skop ġenerali (korporattiv) marbut ma’ titjib fil-prestazzjoni mil-lat ta’ sostenibbiltà ġenerali f’konformità mat-tranżizzjoni kif definita taħt il-punt 2.1. Pereżempju: — self b’miri ewlenin tal-prestazzjoni biex jiġu ffinanzjati investimenti għal tranżizzjoni li huma f’konformità ma’ perkorsi ta’ tranżizzjoni bbażati fuq ix-xjenza; — self b’miri ewlenin tal-prestazzjoni biex jiġu ffinanzjati investimenti għal tranżizzjoni li huma bbażati fuq is-sehem ġenerali tal-allinjament mat-Tassonomija li għandu jinkiseb; — self għall-finanzjament ta’ investimenti għal tranżizzjoni li huma bbażati fuq pjan ta’ tranżizzjoni kredibbli b’miri ewlenin tal-prestazzjoni.
Bonds ekoloġiċi u bonds oħra tas-sostenibbiltà	1) Ikkunsidra l-ħruġ ta’ bonds għal skop ta’ tranżizzjoni speċifiku billi turi l-użu tar-rikavati. Pereżempju, il-ħruġ ta’ bond f’konformità mar-Regolament dwar il-bonds ekoloġiċi Ewropej biex jiġu ffinanzjati investimenti għal tranżizzjoni fl-attivitajiet ekonomiċi eliġibbli skont it-Tassonomija u biex jintlaħaq l-allinjament mat-Tassonomija fi żmien ħames (eċċezzjonalment 10) snin. 2) Ikkunsidra l-ħruġ ta’ bond marbut ma’ mira tal-prestazzjoni ta’ tranżizzjoni tal-impriża (pereż. bond marbut mas-sostenibbiltà) billi jtuża t-Tassonomija, pjanijiet kredibbli ta’ tranżizzjoni fil-livell tal-entità (14) u fil-livell tal-attività, jew miri kredibbli bbażati fuq ix-xjenza meta proporzjonati, u: — iddefinixxi miri ewlenin tal-prestazzjoni biex tiffinanzja investimenti korporattivi materjali li huma inklużi fi pjan ta’ tranżizzjoni; — l-impriżi huma mistiedna jehmżu r-rekwiżiti ta’ sostenibbiltà tagħhom skont bond marbut mas-sostenibbiltà mat-Tassonomija - jew mira relatata mal-parametri referenzjarji tal-klima tal-UE; — dan jista’ jinkludi l-finanzjament ta’ investimenti għal tranżizzjoni definit permezz ta’ miri bbażati fuq it-Tassonomija. 3) Ikkunsidra l-użu tal-mudell ta’ divulgazzjoni volontarja skont ir-Regolament dwar il-bonds ekoloġiċi Ewropej biex tagħti informazzjoni standardizzata lill-investituri u lill-intermedjarji finanzjarji għall-ħruġ ta’ bonds li ma jsegwux l-istandard Ewropew għall-bonds ekoloġiċi;
Finanzjament mill-bejgħ ta’ ishma	Meta l-ħruġ ta’ finanzjament mill-bejgħ ta’ ishma jkun strument ta’ finanzjament adegwat, jikkunsidraw li jużaw kriterji ta’ tranżizzjoni simili għal dawk imsemmija hawn fuq biex jispeċifikaw il-miri ewlenin tal-prestazzjoni mil-lat ta’ sostenibbiltà.
Finanzjament speċjalizzat	Ikkunsidra finanzjament speċjalizzat bħal lokazzjoni, soluzzjonijiet finanzjarji strutturati, il-finanzjament ta’ proġetti u strumenti ta’ finanzjament imħallat billi jintużaw kriterji ta’ tranżizzjoni simili għal dawk imsemmija hawn fuq biex tispeċifika l-miri ewlenin tal-prestazzjoni mil-lat ta’ sostenibbiltà.

7.   Użu tal-għodod ta’ finanzjament sostenibbli tal-Unjoni Ewropea minn intermedjarji finanzjarji u investituri

Din it-taqsima hija relatata mal-punt 9 tar-Rakkomandazzjoni tal-Kummissjoni.

L-intermedjarji finanzjarji u l-investituri li jkunu lesti jipprovdu finanzjament tat-tranżizzjoni biex jappoġġaw it-tranżizzjoni tal-ekonomija reali jistgħu jużaw għodod ta’ finanzjament sostenibbli biex jistabbilixxu miri tal-portafoll u jidentifikaw proġetti jew impriżi biex jiffinanzjaw it-tranżizzjoni. It-Tabella 4 hawn taħt tipprovdi aktar illustrazzjonijiet f’dan ir-rigward.

Tabella 4

kif jintużaw l-għodod ta’ finanzjament sostenibbli biex jiġu stabbiliti miri tal-portafoll u jiġu identifikati proġetti jew impriżi għall-finanzjament tat-tranżizzjoni

Ikkunsidra l-użu ta’ metodoloġiji tad-dekarbonizzazzjoni tal-parametri referenzjarji tal-klima tal-UE biex tistabbilixxi miri ta’ tranżizzjoni tal-portafoll u tidentifika l-kumpaniji rilevanti:	L-użu ta’ metodoloġiji tad-dekarbonizzazzjoni tal-parametri referenzjarji tal-klima tal-UE biex jiġu stabbiliti miri ta’ dekarbonizzazzjoni: Ikkunsidra l-użu tl-parametri referenzjarji tal-klima tal-UE biex issegwi strateġiji tad-dekarbonizzazzjoni u tinvesti f’portafoll ta’ impriżi b’miri klimatiċi u ħtiġijiet ta’ finanzjament tat-tranżizzjoni differenti. Oħloq prodotti finanzjarji li jirreplikaw il-metodoloġiji tal-parametri referenzjarji ta’ hawn fuq (15); L-amministraturi tal-parametri referenzjarji huma mħeġġa jikkunsidraw li jagħtu ponderazzjoni żejda lill-kumpaniji bbażat fuq il-miri ta’ dekarbonizzazzjoni stabbiliti mill-kumpaniji; Ikkunsidra l-użu tal-metodoloġiji tal-parametri referenzjarji biex tivvaluta b’mod sistematiku l-istrumenti u l-portafolli ta’ finanzjament, u tfassal perkorsi tal-portafoll lejn in-newtralità klimatika bi standards minimi għad-dekarbonizzazzjoni minn sena għal sena. L-użu ta’ metodoloġiji tal-parametri referenzjarji tal-klima tal-UE biex jiġu identifikati l-impriżi għas-self jew għall-investiment: Ikkunsidra l-użu tal-parametri referenzjarji tal-klima tal-UE jew parametri referenzjarji oħra tal-ESG ibbażati fuq ix-xjenza biex tidentifika l-kumpaniji li jagħmlu t-tranżizzjoni b’mod li huwa kompatibbli mat-tranżizzjoni lejn ekonomija sostenibbli; Ikkunsidra l-użu ta’ parametri referenzjarji li jippermettu lill-amministraturi jagħtu ponderazzjoni żejda lill-impriżi b’perkors u pjan ta’ tranżizzjoni bbażati fuq ix-xjenza; L-intermedjarji finanzjarji u l-investituri jistgħu jużaw kriterji ta’ esklużjoni mill-metodoloġiji tal-parametri referenzjarji tal-klima tal-UE, fejn xieraq, biex jeskludu attivitajiet ekonomiċi jew metodi tal-produzzjoni li jagħmlu ħsara lill-ambjent jew lis-soċjetà, u dawk li mod ieħor jikkawżaw ħsara sinifikanti lil kull objettiv ambjentali jew tal-klima.
Ikkunsidra l-użu tat-Tassonomija biex tistabbilixxi miri fil-livell tal-portafoll u tidentifika l-impriżi rilevanti:	L-użu ta’ kriterji tat-Tassonomija biex jiġu stabbiliti miri klimatiċi u ambjentali tal-portafoll Ikkunsidra l-użu tal-kriterji u d-divulgazzjonijiet tat-Tassonomija biex tistabbilixxi miri u ssegwi l-progress maż-żmien fil-livell tal-portafoll u, fil-każ tas-sidien tal-assi, għall-allokazzjoni ġenerali tal-assi. Ikkunsdira d-divulgazzjonijiet tat-Tassonomija biex issegwi l-proporzjon ta’ investimenti eliġibbli skont it-Tassonomija, il-proporzjon ta’ investimenti allinjati mat-Tassonomija, u l-progress lejn l-allinjament mal-kriterji tat-Tassonomija. Soġġett għad-disponibbiltà tad-data, ikkunsidra l-użu tal-proporzjon tal-assi ekoloġiċi u l-proporzjon ta’ investimenti ekoloġiċi bbażati fuq it-Tassonomija biex tistabbilixxi miri speċifiċi għas-settur fil-livell tal-portafoll li magħhom tista’ tikkonverġi l-medja tal-portafoll matul it-tranżizzjoni. Pereżempju, il-banek jistgħu jużaw il-proporzjon tal-assi ekoloġiċi u l-emissjonijiet assoluti tal-karbonju fil-portafolli rilevanti jew l-effiċjenza enerġetika medja ta’ portafoll ipotekarju biex jiżviluppaw miri għat-tnaqqis tal-emissjonijiet jew mira tal-effiċjenza enerġetika u stadji importanti bejniethom. Ikkunsidra l-użu tal-proporzjon tad-dħul ippjanat, in-nefqa kapitali jew in-nefqa operattiva relatata mat-tranżizzjoni ta’ impriżi li se jkunu allinjati mat-Tassonomija fi żmien ħames (eċċezzjonalment 10) snin (iżda ma jissodisfawx il-kundizzjonijiet tar-Regolament Delegat (UE) 2021/2178 biex jiġu rikonoxxuti immedjatament bħala nefqa kapitali allinjata mat-Tassonomija) bħala proporzjon tal-assi ekoloġiċi futuri jew ippjanati, meta jkunu appoġġati minn pjan ta’ tranżizzjoni kredibbli. Metrika simili tista’ titfassal ukoll għal attivitajiet eliġibbli mhux tat-Tassonomija li huma koperti minn pjan ta’ tranżizzjoni kredibbli. L-użu tad-divulgazzjonijiet tat-Tassonomija biex jiġu identifikati l-impriżi għas-self jew għall-investiment: Ikkunsidra l-użu tad-divulgazzjonijiet tat-Tassonomija minn impriżi dwar id-dħul eliġibbli għat-Tassonomija u dak allinjat mat-Tassonomija, in-nefqa kapitali u meta rilevanti in-nefqa operatorja, biex tikkumplementa data korporattiva oħra biex tidentifika proġetti ta’ tranżizzjoni Fil-każ ta’ proġetti eliġibbli għat-Tassonomija, ikkunsidra l-użu ta’ divulgazzjonijiet obbligatorji - u meta disponibbli volontarji - relatati mat-Tassonomija, f’divulgazzjonijiet korporattivi jew pjanijiet ta’ tranżizzjoni fil-livell tal-entità jew speċifiċi għall-attività, biex tidentifika proġetti b’objettivi ta’ finanzjament tat-tranżizzjoni li jistabbilixxu miri marbuta ma’: — l-allinjament tat-tassonomija, bl-għan li jiġu ssodisfati l-kriterji tat-Tassonomija fi stadji jew fuq perjodu ta’ żmien definit; — elementi tal-kriterji tat-tassonomija, bħal la tagħmilx ħsara sinifikanti, li jiżguraw titjib sinifikanti fil-prestazzjoni; — ivverifika jekk hemmx fis-seħħ pjanijiet ta’ tranżizzjoni speċifiċi għall-attività, biex tiżgura li l-miri ta’ tali proġetti jkunu allinjati mat-tranżizzjoni lejn ekonomija sostenibbli; — fil-każ ta’ attivitajiet ekonomiċi mhux koperti minn atti delegati adottati skont ir-Regolament dwar it-Tassonomija, jużaw il-prinċipji stabbiliti fl-Artikolu 10(2) tar-Regolament dwar it-Tassonomija bħala gwida tal-kundizzjonijiet minimi biex attività titqies għall-finanzjament tat-tranżizzjoni.
Ikkunsidra l-użu ta’ divulgazzjonijiet korporattivi skont id-Direttiva dwar ir-Rappurtar Korporattiv dwar is-Sostenibbiltà biex tagħżel impriżi b’objettivi u ħtiġijiet speċifiċi ta’ tranżizzjoni:	Ikkunsidra l-użu ta’ metrika komuni fil-pjanijiet ta’ tranżizzjoni, kemm fil-livell tal-entità kif ukoll f’dak tal-attività, biex jidentifikaw b’mod sistematiku l-ħtiġijiet ta’ finanzjament tat-tranżizzjoni f’ċerti setturi, fuq il-bażi tal-metriċi finanzjarji u l-pjanijiet ta’ investiment li jirrapportaw il-korporazzjonijiet, pereżempju: — Il-miri għat-tnaqqis tal-emissjonijiet ta’ gassijiet serra, għall-emissjonijiet tal-Ambitu 1, tal-Ambitu 2, u sa fejn ikun possibbli anki l-emissjonijiet materjali tal-Ambitu 3; — L-allinjament mat-Tassonomija u l-pjanijiet ta’ allinjament għall-attivitajiet ekonomiċi f’setturi b’impatt għoli; — In-nefqa kapitali għall-finanzjament tal-passi ta’ tranżizzjoni b’referenzi għall-metrika ta’ sostenibbiltà ewlenija użata (pereż. in-nefqa kapitali bbażata fuq it-tassonomija); — Il-kredibbiltà tal-miri ta’ tranżizzjoni bbażati fuq l-azzjonijiet u l-lievi li l-impriżi jippjanaw li jużaw biex jilħqu l-miri, u d-dipendenza tagħhom fuq fatturi esterni, (16) u l-ispejjeż mistennija tat-tranżizzjoni; — Ir-riskji ta’ tranżizzjoni u kif il-miri ta’ tranżizzjoni potenzjali jistgħu jnaqqsu tali riskji maż-żmien; — Esponiment għall-opportunitajiet finanzjarji relatati mal-klima (pereż. bħala % tal-attività ġenerali tal-portafoll/sottoskrizzjoni) — L-emissjonijiet iffinanzjati attwali u ppjanati fis-setturi, fiż-żoni ġeografiċi u fil-perjodi ta’ żmien kollha; — Metriċi ta’ allinjament tal-portafoll (pereż. l-intensità medja ponderata tal-karbonju, iż-żieda implikata fit-temperatura, emissjonijiet iffinanzjati relattivi ma’ parametru referenzjarju bbażat fuq ix-xjenza użat b’mod komuni). Ikkunsidra l-użu ta’ divulgazzjonijiet dwar il-pjanijiet ta’ tranżizzjoni biex tidentifika impriżi jew proġetti speċifiċi b’miri ċari tad-dekarbonizzazzjoni li bħalissa joperaw b’emissjonijiet għoljin iżda li għandhom pjanijiet ta’ tranżizzjoni kredibbli biex inaqqsuhom maż-żmien, li jippermetti lill-portafoll jiddekarbonizza bl-istess pass bħall-impriżi destinatarji ta’ investiment. Ikkunsidra l-użu tal-istandards u l-gwida skont id-Direttiva (UE) 2022/2464 u l-implimentazzjoni tagħha (Corporate Sustainability Reporting Directive, CSRD), meta disponibbli, biex tikkunsidra l-prestazzjoni klimatika u ambjentali ta’ impriża, il-punt tat-tluq tagħha u l-perkors ta’ tranżizzjoni individwali, biex tikkumplementa d-divulgazzjonijiet dwar il-miri ta’ tranżizzjoni, il-pjanijiet ta’ tranżizzjoni u d-data tar-rapportar finanzjarju.
Ikkunsidra l-użu tad-divulgazzjonijiet u l-prospetti li jakkumpanjaw il-ħruġ ta’ bonds ekoloġiċi, ta’ tranżizzjoni u dawk marbuta mas-sostenibbiltà jew ta’ ekwità:	Ikkunsidra l-użu ta’ informazzjoni pprovduta mill-emittenti ta’ bonds ekoloġiċi, bonds marbuta mas-sostenibbiltà jew bonds oħra b’karatteristiċi ta’ finanzjament tat-tranżizzjoni biex tagħżel investimenti b’integrità ambjentali u l-livell ta’ ambizzjoni li jkun qed ifittex investitur. Ikkunsidra l-użu tal-livell għoli ta’ trasparenza pprovdut mir-Regolament dwar il-bonds ekoloġiċi Ewropej biex tagħżel proġetti għall-finanzjament tat-tranżizzjoni meta l-integrità ambjentali hija żgurata mit-Tassonomija. It-trasparenza mtejba fl-użu tar-rikavat iżżid il-kredibbiltà u l-affidabbiltà ta’ tali investimenti, b’mod partikolari jekk ikunu konnessi ma’ limiti massimi jew miri tas-sostenibbiltà stabbiliti mill-impriża u divulgati fid-divulgazzjonijiet korporattivi tagħha. Ikkunsidraw l-użu tal-grad għoli ta’ trasparenza pprovdut mill-emittenti bl-użu ta’ formoli ta’ divulgazzjoni volontarja għall-emittenti li jużaw standards oħra għajr dawk ipprovduti mir-Regolament dwar il-bonds ekoloġiċi Ewropej biex jagħżlu proġetti għall-finanzjament ta’ tranżizzjoni li huma allinjati mat-tranżizzjoni lejn ekonomija sostenibbli. Ikkunsidra l-użu tal-informazzjoni dwar l-objettivi ta’ tranżizzjoni jew il-ħtiġijiet ta’ finanzjament tat-tranżizzjoni inklużi fil-prospetti għall-ħruġ minn impriżi fi tranżizzjoni biex tivvaluta r-riskji u l-karatteristiċi tas-sostenibbiltà ta’ ħruġ flimkien ma’ riskji u benefiċċji finanzjarji oħra tal-proġett (17).

---

(1)  Ir-Rakkomandazzjoni tal-Kummissjoni dwar l-iffaċilitar tal-finanzi għat-tranżizzjoni lejn ekonomija sostenibbli (C(2023) 3844).

(2)  Kwistjoni ta’ sostenibbiltà hija materjali minn perspettiva tal-impatt meta tappartjeni għall-impatti materjali reali jew potenzjali, pożittivi jew negattivi tal-impriża fuq in-nies jew fuq l-ambjent fuq l-orizzonti ta’ żmien qosra, medji u twal. Kwistjoni ta’ sostenibbiltà materjali minn perspettiva tal-impatt tinkludi l-impatti kkawżati mill-impriża, jew li l-impriża kkontribwiet għalihom u l-impatti li huma direttament marbuta mal-operazzjonijiet, il-prodotti u s-servizzi tal-impriża permezz tar-relazzjonijiet kummerċjali tagħha. Sostenibbiltà materjali tista’ tkun importanti wkoll minn perspettiva finanzjarja, pereżempju jekk ir-riskju għas-sostenibbiltà jimmaterjalizza permezz ta’ assi mhux rekuperabbli.

(3)  Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar Pjan ta’ Azzjoni ġdid dwar l-Ekonomija Ċirkolari: Għal Ewropea aktar nadifa u kompetittiva. COM/2020/98 final.

(4)  Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni Strateġija tal-UE għall-bijodiversità għall-2030 li ġġib in-natura lura f’ħajjitna. COM/2020/380 final.

(5)  Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni, Perkors għal Pjaneta b’Saħħitha għal Kulħadd Pjan ta’ Azzjoni tal-UE: “Lejn Tniġġis Żero għall-Arja, għall-Ilma u għall-Ħamrija”: COM/2021/400 final.

(6)  Il-Perkorsi ta’ Tranżizzjoni tal-UE tal-Kummissjoni jinsabu fuq: https://single-market-economy.ec.europa.eu/industry/transition-pathways_mt

(7)  Id-dipendenza tal-impriża fuq fatturi esterni f’postijiet differenti biex timplimenta l-pjan ta’ tranżizzjoni fil-livell tal-entità, pereż. politika futura possibbli, tħejjija teknoloġika, aċċettabbiltà soċjali, disponibbiltà tar-riżorsi u impatti klimatiċi fiżiċi fis-siti fejn topera

(8)  Ir-Regolament Delegat tal-Kummissjoni (UE) 2020/1818 tas-17 ta’ Lulju 2020 li jissupplimenta r-Regolament (UE) 2016/1011 tal-Parlament Ewropew u tal-Kunsill fir-rigward tal-istandards minimi għall-Parametri Referenzjarji tat-Tranżizzjoni Klimatika tal-UE u l-Parametri Referenzjarji tal-UE allinjati mal-Ftehim ta’ Pariġi, l-Artikoli 6-12.

(9)  Ir-rekwiżiti minimi huma stabbiliti fl-Artikoli 7 sa 9 tar-Regolament Delegat tal-Kummissjoni (UE) 2020/1818 tas-17 ta’ Lulju 2020.

(10)  Skont l-Att Delegat dwar id-Divulgazzjonijiet Tassonomiċi, il-perjodu biex jintlaħaq l-allinjament mat-Tassonomija jista’ jaqbeż il-ħames snin biss meta perjodu itwal ikun oġġettivament iġġustifikat minn karatteristiċi speċifiċi tal-attività ekonomika u l-aġġornament ikkonċernat, b’massimu ta’ 10 snin.

(11)  In-nefqa kapitali relatata ma titqiesx bħala allinjata mat-Tassonomija, iżda tista’ tkun pass sinifikanti fit-triq ta’ tranżizzjoni lejn livelli ogħla ta’ prestazzjoni mil-lat ta’ sostenibbiltà.

(12)  In-nefqa kapitali relatata ma titqiesx bħala allinjata mat-tassonomija, iżda tista’ tkun pass sinifikanti fit-triq ta’ tranżizzjoni lejn livelli ogħla ta’ prestazzjoni mil-lat ta’ sostenibbiltà.

(13)  Skont id-Direttiva (UE) 2022/2464 u l-implimentazzjoni tagħha (id-Direttiva dwar ir-Rappurtar Korporattiv dwar is-Sostenibbiltà).

(14)  Skont id-Direttiva (UE) 2022/2464 u l-implimentazzjoni tagħha (id-Direttiva dwar ir-Rappurtar Korporattiv dwar is-Sostenibbiltà).

(15)  Il-parametri referenzjarji jirrikjedu rekwiżit ta’ xenarju ta’ referenza tad-dekarbonizzazzjoni ta’ 30 % għall-Parametri Referenzjarji tat-Tranżizzjoni Klimatika tal-UE u ta’ 50 % għall-Parametru Referenzjarju tal-UE allinjat mal-Ftehim ta’ Pariġi, rekwiżit tad-dekarbonizzazzjoni ta’ 7 % sena wara sena, l-inklużjoni tal-emissjonijiet tal-Ambitu 3, ir-restrizzjonijiet tal-allokazzjoni tal-ekwità biex tiġi żgurata li r-rappreżentanza tal-industriji tikkorrispondi għal dik tal-parametru referenzjarju prinċipali (tiġi evitata l-preġudizzju tal-industrija);

(16)  Pereż. politika futura possibbli, livell ta’ tħejjija teknoloġika, aċċettabbiltà soċjali, disponibbiltà tar-riżorsi u impatti klimatiċi fiżiċi fis-siti kollha li fihom joperaw

(17)  Il-Proposta għal Regolament tal-Parlament Ewropew u tal-Kunsill li jemenda r-Regolamenti (UE) 2017/1129, (UE) Nru 596/2014 u (UE) Nru 600/2014 sabiex is-swieq kapitali pubbliċi fl-Unjoni jsiru aktar attraenti għall-kumpaniji u sabiex jiġi ffaċilitat l-aċċess għall-kapital għall-intrapriżi żgħar u medji, (COM/2022/762 final), tikkontribwixxi għat-trasparenza billi tirrikjedi l-inklużjoni ta’ informazzjoni dwar is-sostenibbiltà fil-prospetti għall-ħruġ b’asserzjonijiet dwar is-sostenibbiltà.