(1)

Abbażi ta’ valutazzjoni tar-riskju preliminari, ir-Regolament ta’ Implimentazzjoni tal-Kummissjoni (UE) 2018/2019 (2) jistabbilixxi lista ta’ pjanti, prodotti tal-pjanti u oġġetti oħra ta’ riskju għoli.

(2)

Ir-Regolament ta’ Implimentazzjoni tal-Kummissjoni (UE) 2018/2018 (3) jistabbilixxi regoli speċifiċi dwar il-proċedura li għandha tiġi segwita sabiex issir il-valutazzjoni tar-riskju msemmija fl-Artikolu 42(4) tar-Regolament (UE) 2016/2031 għall-pjanti, għall-prodotti tal-pjanti u għall-oġġetti oħra ta’ riskju kbir.

(3)

Wara valutazzjoni preliminari, fl-Anness tar-Regolament ta’ Implimentazzjoni (UE) 2018/2019 iddaħħlu 34 ġeneru u speċi waħda ta’ pjanti għat-tħawwil li joriġinaw minn pajjiżi terzi, bħala pjanti ta’ riskju għoli. Fosthom kien hemm ukoll il-ġeneri Lonicera L. u Malus Mill.

(4)

Fis-27 ta’ Novembru 2019, it-Turkija ressqet talba lill-Kummissjoni għall-esportazzjoni lejn l-Unjoni ta’ pjanti bl-għeruq ta’ bejn sentejn u erba’ snin biex jitħawlu fi qsari, tal-Lonicera x bella, il-Lonicera caprifolium, il-Lonicera caucasica, il-Lonicera etrusca, il-Lonicera fragrantissima, il-Lonicera hellenica, il-Lonicera japonica, il-Lonicera ligustrina, il-Lonicera sempervirens u il-Lonicera tatarica (minn hawn ’il quddiem imsejħa “l-ispeċijiet speċifikati tal-Lonicera”). Dik it-talba kienet sostnuta mid-dossier tekniku rilevanti.

(5)

Fil-25 ta’ Novembru 2021, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar il-valutazzjoni tar-riskju tal-kommoditajiet dwar il-pjanti fil-qsari tal-ispeċijiet speċifikati tal-Lonicera għat-tħawwil mit-Turkija (4). Dik l-opinjoni xjentifika tkopri l-valutazzjoni tar-riskju tal-ispeċijiet speċifikati tal-pjanti fil-qsari għat-tħawwil tal-Lonicera li għandhom età massima ta’ erba’ snin. L-Awtorità identifikat lill-Lopholeucaspis japonica, il-Meloidogyne chitwoodi u l-Bemisia tabaci (popolazzjonijiet Ewropej) bħala pesti rilevanti għal dawk il-pjanti għat-tħawwil, evalwat il-miżuri ta’ mitigazzjoni tar-riskji dwar dawk il-pesti deskritti fid-dossier, u stmat il-probabbiltà li dawn ikunu ħielsa minn dawk il-pesti. Il-Lopholeucaspis japonica u l-Meloidogyne chitwoodi huma elenkati bħala pesti ta’ kwarantina fl-Unjoni fl-Anness II tar-Regolament ta’ Implimentazzjoni tal-Kummissjoni (UE) 2019/2072 (5), filwaqt li l-Bemisia tabaci (popolazzjonijiet Ewropej) huwa pest ta’ kwarantina f’żona protetta f’konformità mal-Anness III ta’ dak ir-Regolament ta’ Implimentazzjoni.

(6)

Fl-4 ta’ Marzu 2020, il-Moldova ressqet talba lill-Kummissjoni għall-esportazzjoni lejn l-Unjoni ta’ pjanti mlaqqma ta’ bejn sena u tliet snin bl-għeruq mikxufin, lesti biex jitħawlu, tal-Malus domestica li jkunu inattivi u mingħajr weraq. Dik it-talba kienet sostnuta mid-dossier tekniku rilevanti.

(7)

Fit-22 ta’ Frar 2022, l-Awtorità adottat opinjoni xjentifika dwar il-valutazzjoni tar-riskji ta’ komodità ta’ pjanti għat-tħawwil imlaqqma tal-Malus domestica mill-Moldova (6). L-Awtorità identifikat ix-Xiphinema rivesi (popolazzjonijiet mhux tal-UE) bħala pest rilevanti għal dawk il-pjanti għat-tħawwil, evalwat il-miżuri ta’ mitigazzjoni tar-riskji deskritti fid-dossier għal dak il-pest u stmat il-probabbiltà li dawn ikunu ħielsa minn dak il-pest. Ix-Xiphinema rivesi (popolazzjonijiet mhux tal-UE) huwa pest ta’ kwarantina fl-Unjoni f’konformità mal-Anness II tar-Regolament ta’ Implimentazzjoni (UE) 2019/2072.

(8)

Abbażi ta’ dawn l-opinjonijiet, ir-riskju ta’ pesti mill-introduzzjoni fl-Unjoni ta’ pjanti bl-għeruq ta’ mhux aktar minn erba’ snin għat-tħawwil f’materjal għat-tkabbir tal-Lonicera x bella, il-Lonicera caprifolium, il-Lonicera caucasica, il-Lonicera etrusca, il-Lonicera fragrantissima, il-Lonicera hellenica, il-Lonicera ligustrina, il-Lonicera sempervirens u l-Lonicera tatarica, li joriġinaw mit-Turkija u ta’ pjanti inattivi, mingħajr weraq, imlaqqmin, bl-għeruq mikxufin, ta’ mhux aktar minn tliet snin għat-tħawwil tal-Malus domestica, li joriġinaw mill-Moldova, huwa kkunsidrat aċċettabbli suġġett għall-konformità mar-rekwiżiti speċjali tal-importazzjoni korrispondenti kif stipulati fl-Anness VII tar-Regolament ta’ Implimentazzjoni (UE) 2019/2072.

(9)

B’konsegwenza ta’ dan, jenħtieġ li dawk il-pjanti għat-tħawwil ma jibqgħux jitqiesu bħala pjanti ta’ riskju għoli u jenħtieġ li jitneħħew mil-lista ta’ pjanti, prodotti mill-pjanti u oġġetti oħra ta’ riskju għoli fl-Anness tar-Regolament ta’ Implimentazzjoni (UE) 2018/2019.

(10)

Għalhekk jenħtieġ li r-Regolament ta’ Implimentazzjoni (UE) 2018/2019 jiġi emendat skont dan.

(11)

Meta titqies in-natura invażiva tal-Lonicera japonica, jeħtieġ li ssir valutazzjoni tar-riskju oħra biex jiġi ddeterminat l-impatt tagħha fuq il-bijodiversità fl-Unjoni. Għalhekk, l-importazzjoni ta’ pjanti tal-Lonicera japonica għat-tħawwil fl-Unjoni mill-pajjiżi terzi kollha jenħtieġ li tibqa’ pprojbita sakemm titwettaq dik il-valutazzjoni tar-riskju.

(12)

Jenħtieġ li sabiex ikun hemm konformità mal-obbligi tal-Unjoni li jirriżultaw mill-ftehim tal-Organizzazzjoni Dinjija tal-Kummerċ dwar l-applikazzjoni ta’ miżuri sanitarji u fitosanitarji (7), l-importazzjoni tal-ispeċijiet speċifikati tal-Lonicera L.għajr il-Lonicera japonica, li joriġinaw mit-Turkija u l-pjanti inattivi, mingħajr weraq, bl-għeruq mikxufin, imlaqqma ta’ mhux aktar minn tliet snin għat-tħawwil tal-Malus domestica, li joriġinaw mill-Moldova, għandhom jissoktaw kemm jista’ jkun malajr. Għalhekk jenħtieġ li dan ir-Regolament jidħol fis-seħħ fit-tielet jum wara dak tal-pubblikazzjoni tiegħu.

(13)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,