(1)

Minħabba l-kriżi attwali kkawżata mill-invażjoni tal-Ukrajna mir-Russja fl-24 ta’ Frar 2022, li bdiet ftit wara l-kriżi tal-COVID-19, il-bdiewa fl-Istati Membri kollha qed jiffaċċjaw diffikultajiet eċċezzjonali. Il-problemi loġistiċi għamlu lill-bdiewa fl-UE vulnerabbli għat-tfixkil ekonomiku tal-ktajjen tal-provvista kkawżat minn din il-kriżi, u bħalissa qed jiffaċċjaw diffikultajiet finanzjarji u problemi ta’ likwidità. Fid-dawl tat-tfixkil kontinwu fis-suq u l-kombinazzjoni bla preċedent ta’ ċirkostanzi, il-bdiewa fl-Istati Membri kollha ltaqgħu ma’ diffikultajiet eċċezzjonali fl-ippjanar, l-implimentazzjoni u l-eżekuzzjoni tal-iskemi ta’ għajnuna stabbiliti fir-Regolament (UE) Nru 1308/2013. Huwa għalhekk meħtieġ li jittaffew dawk id-diffikultajiet billi jidderogaw minn ċerti dispożizzjonijiet tar-Regolament (UE) Nru 1308/2013.

(2)

L-organizzazzjonijiet tal-produtturi u l-assoċjazzjonijiet tal-organizzazzjonijiet tal-produtturi rikonoxxuti jistgħu jimplimentaw, bħala parti mill-programmi operazzjonali approvati tagħhom, miżuri ta’ prevenzjoni u mmaniġġjar ta’ kriżijiet, kif previst fl-ewwel subparagrafu tal-Artikolu 33(3) ta’ dak ir-Regolament, li huma maħsuba biex iżidu r-reżiljenza tagħhom għat-tfixkil fis-suq. Madankollu, skont ir-raba’ subparagrafu tal-Artikolu 33(3) ta’ dak ir-Regolament, dawn il-miżuri ta’ prevenzjoni u ta’ mmaniġġjar tal-kriżijiet ma għandhomx jammontaw għal iżjed minn terz tan-nefqa taħt il-programm operazzjonali. Sabiex tingħata aktar flessibbiltà lil dawk l-organizzazzjonijiet tal-produtturi u assoċjazzjoni ta' organizzazzjonijiet tal-produtturi sabiex ikunu jistgħu jidderieġu r-riżorsi disponibbli tagħhom taħt il-programmi operazzjonali tagħhom lejn l-indirizzar tat-tfixkil fis-suq, dik ir-regola jenħtieġ li ma tapplikax fis-sena 2022.

(3)

Huma meħtieġa miżuri speċifiċi biex l-organizzazzjonijiet tal-produtturi u l-assoċjazzjonijiet tal-organizzazzjonijiet tal-produtturi rikonoxxuti jkunu jistgħu jimmaniġġjaw il-fondi operazzjonali tagħhom billi jippermettulhom jidderieġu mill-ġdid il-fondi, inkluża l-assistenza finanzjarja tal-Unjoni fi ħdan il-fond operazzjonali, lejn l-azzjonijiet u l-miżuri li huma meħtieġa biex ikunu indirizzati l-konsegwenzi tal-invażjoni tal-Ukrajna mir-Russja. Biex ikun żgurat li l-organizzazzjonijiet tal-produtturi u l-assoċjazzjonijiet tal-organizzazzjonijiet tal-produtturi rikonoxxuti jkunu jistgħu jagħmlu dan, huwa meħtieġ li, fis-sena 2022, ikun hemm żieda fil-limitu tal-għajnuna finanzjarja tal-Unjoni stipulata fl-Artikolu 34(1) tar-Regolament (UE) Nru 1308/2013 minn 50 % għal 70 % tan-nefqa reali mġarrba.

(4)

Għal raġunijiet imperattivi ta’ urġenza, b’mod partikolari meta wieħed iqis it-tfixkil kontinwu fis-suq, l-effetti tagħhom fuq is-settur tal-frott u l-ħxejjex u l-fatt li dan se jissokta u jmur għall-agħar, hemm bżonn tittieħed azzjoni immedjata u jiġu adottati miżuri urġenti li jtaffu l-effetti negattivi tagħhom. Id-dewmien ta’ azzjoni immedjata biex jiġi indirizzat dan it-tfixkil fis-suq jirriskja li jaggravahom, u dan ikun ta’ detriment għall-kundizzjonijiet tal-produzzjoni u tas-suq fis-settur tal-frott u l-ħxejjex.

(5)

Fid-dawl tal-ħtieġa li tittieħed azzjoni immedjata, jenħtieġ li dan ir-Regolament jidħol fis-seħħ dakinhar tal-pubblikazzjoni tiegħu f’Il-Ġurnal Uffiċjali tal-Unjoni Ewropea,