Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32022L1648

    Direttiva ta’ Implimentazzjoni tal-Kummissjoni (UE) 2022/1648 tat-23 ta’ Settembru 2022 li temenda d-Direttiva 2003/91/KE fir-rigward ta’ deroga għal varjetajiet organiċi ta’ speċijiet ta’ ħxejjex adattati għall-produzzjoni organika

    C/2022/6648

    ĠU L 248, 26.9.2022, p. 52–56 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/dir_impl/2022/1648/oj

    Date of document:
    23/09/2022; Data ta' adozzjoni
    Date of effect:
    16/10/2022; Dħul fis-seħħ Data tal-pubblikazzjoni +20 Ara Art. 3
    Date of transposition:
    30/06/2023; Adozzjoni L-aktar tard Ara Art. 2.1
    Date of transposition:
    01/07/2023; Applikazzjoni Ara Art. 2.1
    Date of end of validity:
    No end date
    Author:
    Il-Kummissjoni Ewropea, Direttorat Ġenerali għas-Saħħa u s-Sikurezza Alimentari
    Responsible body:
    Directorate-General for Health and Food Safety, SANTE
    Form:
    Direttiva implimentattiva
    Addressee:
    L-Istati Membri
    Treaty:
    Trattat dwar il-Funzjonament tal-Unjoni Ewropea
    Legal basis:
    Link
    Link
    Link
    Select all documents mentioning this document
    Modifies:
    Relation Act Comment Subdivision concerned From To
    Modifies 32003L0091 Żieda anness III
    Modifies 32003L0091 Sostituzzjoni artikolu 1 paragrafu 2
    Modified by:
    Relation Act Comment Subdivision concerned From To
    Corrected by 32022L1648R(01) (IT)
    Corrected by 32022L1648R(02) (LT)
    Link

    26.9.2022   

    MT

    Il-Ġurnal Uffiċjali tal-Unjoni Ewropea

    L 248/52

    DIRETTIVA TA’ IMPLIMENTAZZJONI TAL-KUMMISSJONI (UE) 2022/1648

    tat-23 ta’ Settembru 2022

    li temenda d-Direttiva 2003/91/KE fir-rigward ta’ deroga għal varjetajiet organiċi ta’ speċijiet ta’ ħxejjex adattati għall-produzzjoni organika

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat id-Direttiva tal-Kunsill 2002/55/KE tat-13 ta’ Ġunju 2002 dwar il-marketing ta’ żrieragħ tal-ħxejjex (1), u b’mod partikolari l-Artikolu 7(2)(a) u (b) tagħha,

    Billi:

    (1)

    Id-Direttiva tal-Kummissjoni 2003/91/KE (2) għandha l-għan li tiżgura li l-varjetajiet ta’ speċijiet ta’ ħxejjex li l-Istati Membri jinkludu fil-katalgi nazzjonali tagħhom jikkonformaw mal-protokolli stabbiliti mill-Uffiċċju Komunitarju tal-Varjetajiet tal-Pjanti (“CPVO”). B’mod partikolari, dawk il-protokolli għandhom l-għan li jiżguraw konformità mar-regoli li jikkonċernaw il-karatteristiċi li għandhom jiġu koperti bħala minimu mill-eżami u mill-kondizzjonijiet minimi għall-eżami ta’ ċerti varjetajiet ta’ speċijiet ta’ ħxejjex biex jiġu stabbiliti d-distintività, l-uniformità u l-istabbiltà (“DUS”). Għall-ispeċijiet mhux koperti mill-protokolli tas-CPVO, dik id-Direttiva għandha l-għan li tiżgura konformità mal-linji gwida tat-test tal-Unjoni Internazzjonali għall-Protezzjoni ta’ Varjetajiet Ġodda tal-Pjanti (“UPOV”).

    (2)

    Hemm bżonn li jiġi żgurat li l-produtturi jkunu jistgħu jużaw varjetajiet organiċi adattati għall-produzzjoni organika li jirriżultaw minn attivitajiet ta’ tnissil organiku. Uħud minnhom jissodisfaw il-kriterji tad-DUS tal-varjetajiet l-oħra kollha tal-istess speċi, iżda varjetajiet oħra maħsuba għall-produzzjoni organika huma kkaratterizzati minn livell għoli ta’ diversità ġenetika u fenotipika bejn l-unitajiet riproduttivi individwali.

    (3)

    Għalhekk, l-istandards għall-uniformità definiti fil-protokolli eżistenti tad-DUS u l-linji gwida tas-CPVO u tal-UPOV mhumiex adattati għal varjetajiet organiċi għall-produzzjoni organika, li huma kkaratterizzati minn livell għoli ta’ diversità ġenetika u fenotipika.

    (4)

    Għalhekk huwa meħtieġ li tiġi offruta l-possibbiltà li wieħed jiddevja mill-protokolli eżistenti ta’ eżami tad-DUS biex ikunu aktar adattati għal varjetajiet organiċi adattati għall-produzzjoni organika. Għalhekk, jenħtieġ li jkun possibbli li jiġu aġġustati l-protokolli eżistenti għall-eżami tal-varjetajiet għal ċerti speċijiet biex jiġu ssodisfati l-ħtiġijiet tal-agrikoltura organika. Għalhekk huwa xieraq li ssir deroga minn ċerti dispożizzjonijiet tal-Artikolu 1 tad-Direttiva 2003/91/KE.

    (5)

    L-Istati Membri jenħtieġ li jirrappurtaw, lill-Kummissjoni u lill-Istati Membri l-oħra, sal-31 ta’ Diċembru ta’ kull sena u sal-31 ta’ Diċembru 2030, dwar l-għadd ta’ applikazzjonijiet u riżultati tal-eżamijiet tad-DUS, sabiex jiġi żgurat rieżami regolari ta’ dawk ir-rekwiżiti u tiġi vvalutata aktar il-ħtieġa li jiġu emendati, jitneħħew jew jiġu applikati wkoll għal speċijiet oħra.

    (6)

    Għalhekk jenħtieġ li d-Direttiva 2003/91/KE tiġi emendata skont dan.

    (7)

    L-awtoritajiet kompetenti u l-operaturi professjonisti kkonċernati jenħtieġ li jkollhom biżżejjed żmien biex iħejju ruħhom b’mod adegwat qabel ma jibdew japplikaw id-dispożizzjonijiet nazzjonali li jittrasponu din id-Direttiva.

    (8)

    Il-miżuri previsti f’din id-Direttiva huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

    ADOTTAT DIN ID-DIRETTIVA:

    Artikolu 1

    Emendi għad-Direttiva 2003/91/KE

    Id-Direttiva 2003/91/KE hija emendata kif ġej:

    (1)

    L-Artikolu 1, il-paragrafu 2 huwa sostitwit b’dan li ġej:

    “2.   Fir-rigward tad-distintività, l-uniformità u l-istabbiltà:

    (a)

    l-ispeċijiet imniżżlin fl-Anness I għandhom jikkonformaw mal-kondizzjonijiet stabbiliti fil-‘Protokoll għall-provi għal distintività, uniformità u stabbilità’ tal-Kunsill Amministrattiv tal-Uffiċċju Komunitarju tal-Varjetajiet tal-Pjanti (CPVO) imniżżlin f’dak l-Anness;

    (b)

    l-ispeċijiet imniżżlin fl-Anness II għandhom jikkonformaw mal-linji gwida tal-test għat-twettiq ta’ testijiet għad-distintività, l-uniformità u l-istabbilità tal-Unjoni Internazzjonali għall-Protezzjoni ta’ Varjetajiet Ġodda tal-Pjanti (UPOV) imniżżlin f’dak l-Anness.

    B’deroga mill-ewwel subparagrafu, fir-rigward tal-uniformità, il-varjetajiet organiċi adattati għall-produzzjoni organika, li jappartjenu għall-ispeċijiet imniżżlin fl-Anness III, Parti A, jistgħu minflok jikkonformaw mal-kondizzjonijiet imniżżlin fil-Parti B ta’ dak l-Anness.

    L-Istati Membri għandhom jirrappurtaw, lill-Kummissjoni u lill-Istati Membri l-oħra, sal-31 ta’ Diċembru ta’ kull sena u sal-31 ta’ Diċembru 2030, dwar l-għadd ta’ applikazzjonijiet għar-reġistrazzjonijiet tal-varjetajiet u r-riżultati tal-eżamijiet għad-distintività, l-uniformità u l-istabbiltà (DUS) li jikkonċernaw dawk il-varjetajiet organiċi”;

    (2)

    It-test stipulat fl-Anness ta’ din id-Direttiva jiżdied bħala l-Anness III.

    Artikolu 2

    Traspożizzjoni

    1.   L-Istati Membri għandhom jadottaw u jippubblikaw il-liġijiet, ir-regolamenti u d-dispożizzjonijiet amministrattivi meħtieġa sabiex ikunu konformi ma’ din id-Direttiva sa mhux aktar tard mit-30 ta’ Ġunju 2023. Huma għandhom jikkomunikaw it-test ta’ dawk id-dispożizzjonijiet lill-Kummissjoni minnufih.

    Huma għandhom japplikaw dawk id-dispożizzjonijiet mill-1 ta’ Lulju 2023.

    Meta l-Istati Membri jadottaw dawk id-dispożizzjonijiet, fihom għandu jkun hemm referenza għal din id-Direttiva jew għandhom ikunu akkumpanjati minn dik ir-referenza meta ssir il-pubblikazzjoni uffiċjali tagħhom. L-Istati Membri għandhom jiddeterminaw kif issir dik ir-referenza.

    2.   L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li huma jadottaw fil-qasam kopert minn din id-Direttiva.

    Artikolu 3

    Dħul fis-seħħ

    Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

    Artikolu 4

    Destinatarji

    Din id-Direttiva hija indirizzata lill-Istati Membri.

    Magħmul fi Brussell, it-23 ta’ Settembru 2022.

    Għall-Kummissjoni

    Stella KYRIAKIDES

    Membru tal-Kummissjoni

    (1)  ĠU L 193, 20.7.2002, p. 33.

    (2)  Id-Direttiva tal-Kummissjoni 2003/91/KE tas-6 ta’ Ottubru 2003 li twaqqaf il-miżuri ta’ implimentazzjoni għall-għanijiet ta’ Artikolu 7 tad-Direttiva tal-Kunsill 2002/55/KE rigward il-karatteristiċi li għandhom jiġu inklużi bħala minimu ottenut mill-eżami u l-kondizzjonijiet minimi għall-eżami ta’ ċerti varjetajiet ta’ speċi ta’ ħaxix (ĠU L 254, 8.10.2003, p. 11).

    ANNESS

    “ANNESS III

    PARTI A

    Lista ta’ speċijiet imsemmija fit-tieni subparagrafu tal-Artikolu 1(2)

    Zunnarija

    Ġidra

    PARTI B

    Dispożizzjonijiet speċifiċi dwar testijiet għad-distintività, l-uniformità u l-istabbiltà għal varjetajiet organiċi ta’ speċijiet ta’ ħxejjex adattati għall-produzzjoni organika

    1.   Regola ġenerali

    Dan li ġej għandu japplika għal varjetajiet organiċi ta’ speċijiet ta’ ħxejjex adattati għall-produzzjoni organika

    1.1.

    		 Fir-rigward tad-distintività u l-istabbiltà, il-karatteristiċi kollha tal-protokolli u l-linji gwida msemmija fl-Annessi I u II għandhom jiġu osservati u deskritti.

    1.2.

    		 Fir-rigward tal-uniformità, il-karatteristiċi kollha tal-protokolli u l-linji gwida msemmija fl-Annessi I u II għandhom jiġu osservati u deskritti u dan li ġej għandu japplika għall-karatteristiċi mniżżlin skont il-punt 2:

    (a)

    dawk il-karatteristiċi jistgħu jiġu vvalutati b’mod inqas strett;

    (b)

    fejn għal dawk il-karatteristiċi tkun prevista deroga mill-protokoll tekniku rispettiv f’dak il-punt 2, il-livell ta’ uniformità fil-varjetà għandu jkun simili għal-livell ta’ uniformità ta’ varjetajiet komparabbli ta’ għarfien komuni fl-Unjoni.

    2.   Deroga mill-protokolli tekniċi

    2.1.   Zunnarija

    Għall-varjetajiet li jappartjenu għall-ispeċi zunnarija (Daucus carota L.) il-karatteristiċi tad-DUS li ġejjin tal-protokoll CPVO-TP/049/3 tas-CPVO tal-varjetà ttestjata jistgħu għall-uniformità jiddevjaw mir-rekwiżiti tad-DUS li ġejjin:

    CPVO Nru 4

    –

    Werqa: it-tqassim

    CPVO Nru 5

    –

    Werqa: l-intensità ta’ kulur aħdar

    CPVO Nru 19

    –

    Għerq: id-dijametru tal-qalba relattiv għad-dijametru totali

    CPVO Nru 20

    –

    Għerq: il-kulur tal-qalba

    CPVO Nru 21

    –

    Minbarra varjetajiet b’qalba bajda; Għerq: l-intensità tal-kulur tal-qalba

    CPVO Nru 28

    –

    Għerq: il-ħin ta’ kolorazzjoni tat-tarf

    CPVO Nru 29

    –

    Pjanta: l-għoli tal-umbella primarja fiż-żmien tal-fjoritura tagħha

    2.2.   Ġidra

    Għall-varjetajiet li jappartjenu għall-ispeċi ġidra (Brassica oleracea L.) il-karatteristiċi DUS li ġejjin tal-protokoll tas-CPVO CPVO-TP/065/1 Rev. tal-varjetà ttestjata jistgħu għall-uniformità jiddevjaw mir-rekwiżiti tad-DUS li ġejjin tal-protokoll tekniku tas-CPVO rispettiv:

    CPVO Nru 2

    –

    Nibbiet: l-intensità tal-kulur aħdar tal-kotiledoni

    CPVO Nru 6

    –

    Zokk irqiq tal-werqa: l-orjentazzjoni

    CPVO Nru 8

    –

    Werqa mingħajr iz-zokk: it-tul

    CPVO Nru 9

    –

    Werqa mingħajr iz-zokk: il-wisa’

    CPVO Nru 10

    –

    Werqa mingħajr iz-zokk: il-forma tal-ponta

    CPVO Nru 11

    –

    Werqa mingħajr iz-zokk: it-tqassim għal nofs il-werqa (fil-parti t’isfel tal-werqa)

    CPVO Nru 12

    –

    Werqa mingħajr iz-zokk: in-numru ta’ inċiżjonijiet tal-marġni (fil-parti ta’ fuq tal-werqa)

    CPVO Nru 13

    –

    Werqa mingħajr iz-zokk: il-fond tal-inċiżjoni tal-marġni (fil-parti ta’ fuq tal-werqa)

    CPVO Nru 14

    –

    Werqa mingħajr iz-zokk: il-forma f’sezzjoni trasversali

    CPVO Nru 19

    –

    Ġidra: l-għadd ta’ weraq ta’ ġewwa.
    ”
    Top