This document is an excerpt from the EUR-Lex website
Document 32021R1118
Commission Delegated Regulation (EU) 2021/1118 of 26 March 2021 supplementing Directive 2014/59/EU of the European Parliament and of the Council with regard to regulatory technical standards specifying the methodology to be used by resolution authorities to estimate the requirement referred to in Article 104a of Directive 2013/36/EU of the European Parliament and of the Council and the combined buffer requirement for resolution entities at the resolution group consolidated level where the resolution group is not subject to those requirements under that Directive (Text with EEA relevance)
Regolament Delegat tal-Kummissjoni (UE) 2021/1118 tas-26 ta’ Marzu 2021 li jissupplimenta d-Direttiva 2014/59/UE tal-Parlament Ewropew u tal-Kunsill fir-rigward ta’ standards tekniċi regolatorji li jispeċifikaw il-metodoloġija li għandha tintuża mill-awtoritajiet ta’ riżoluzzjoni biex jiġi stmat ir-rekwiżit imsemmi fl-Artikolu 104a tad-Direttiva 2013/36/UE tal-Parlament Ewropew u tal-Kunsill u r-rekwiżit ta’ riżerva kombinat għal entitajiet ta’ riżoluzzjoni fil-livell konsolidat tal-grupp ta’ riżoluzzjoni fejn il-grupp ta’ riżoluzzjoni mhuwiex soġġett għal dawk ir-rekwiżiti skont dik id-Direttiva (Test b’rilevanza għaż-ŻEE)
Regolament Delegat tal-Kummissjoni (UE) 2021/1118 tas-26 ta’ Marzu 2021 li jissupplimenta d-Direttiva 2014/59/UE tal-Parlament Ewropew u tal-Kunsill fir-rigward ta’ standards tekniċi regolatorji li jispeċifikaw il-metodoloġija li għandha tintuża mill-awtoritajiet ta’ riżoluzzjoni biex jiġi stmat ir-rekwiżit imsemmi fl-Artikolu 104a tad-Direttiva 2013/36/UE tal-Parlament Ewropew u tal-Kunsill u r-rekwiżit ta’ riżerva kombinat għal entitajiet ta’ riżoluzzjoni fil-livell konsolidat tal-grupp ta’ riżoluzzjoni fejn il-grupp ta’ riżoluzzjoni mhuwiex soġġett għal dawk ir-rekwiżiti skont dik id-Direttiva (Test b’rilevanza għaż-ŻEE)
C/2021/1794
ĠU L 241, 8.7.2021, p. 1–6
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
Relation | Act | Comment | Subdivision concerned | From | To |
---|---|---|---|---|---|
Completion | 32014L0059 | 28/07/2021 |
8.7.2021 |
MT |
Il-Ġurnal Uffiċjali tal-Unjoni Ewropea |
L 241/1 |
REGOLAMENT DELEGAT TAL-KUMMISSJONI (UE) 2021/1118
tas-26 ta’ Marzu 2021
li jissupplimenta d-Direttiva 2014/59/UE tal-Parlament Ewropew u tal-Kunsill fir-rigward ta’ standards tekniċi regolatorji li jispeċifikaw il-metodoloġija li għandha tintuża mill-awtoritajiet ta’ riżoluzzjoni biex jiġi stmat ir-rekwiżit imsemmi fl-Artikolu 104a tad-Direttiva 2013/36/UE tal-Parlament Ewropew u tal-Kunsill u r-rekwiżit ta’ riżerva kombinat għal entitajiet ta’ riżoluzzjoni fil-livell konsolidat tal-grupp ta’ riżoluzzjoni fejn il-grupp ta’ riżoluzzjoni mhuwiex soġġett għal dawk ir-rekwiżiti skont dik id-Direttiva
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2014/59/UE tal-Parlament Ewropew u tal-Kunsill tal-15 ta’ Mejju 2014 li tistabbilixxi qafas għall-irkupru u r-riżoluzzjoni ta’ istituzzjonijiet ta’ kreditu u ditti ta’ investiment u li temenda d-Direttiva tal-Kunsill 82/891/KEE u d-Direttivi 2001/24/KE, 2002/47/KE, 2004/25/KE, 2005/56/KE, 2007/36/KE, 2011/35/UE, 2012/30/UE u 2013/36/UE, u r-Regolamenti (UE) Nru 1093/2010 u (UE) Nru 648/2012 (1), u b’mod partikolari l-Artikolu 45c(4) tagħha,
Billi:
(1) |
Ir-rekwiżit ta’ fondi proprji addizzjonali msemmi fl-Artikolu 104a tad-Direttiva 2013/36/UE tal-Parlament Ewropew u tal-Kunsill (2) u r-rekwiżit ta’ riżerva kombinat definit fl-Artikolu 128, l-ewwel subparagrafu, il-punt (6) ta’ dik id-Direttiva huma inputs għall-kalkolu tal-ammonti ta’ assorbiment tat-telf u ta’ rikapitalizzazzjoni stabbiliti fl-Artikolu 45c(3) tad-Direttiva 2014/59/UE. Dawk ir-rekwiżiti għandhom jintużaw mill-awtoritajiet ta’ riżoluzzjoni biex jistabbilixxu r-rekwiżit minimu għal fondi proprji u obbligazzjonijiet eliġibbli (MREL) imsemmi fl-Artikolu 45(1) ta’ dik id-Direttiva. |
(2) |
Skont l-Artikolu 45e(1) tad-Direttiva 2014/59/UE, l-entitajiet ta’ riżoluzzjoni għandhom jikkonformaw mal-MREL fuq bażi konsolidata fil-livell tal-grupp ta’ riżoluzzjoni. Grupp ta’ riżoluzzjoni kif definit fl-Artikolu 2(1), (83b) tad-Direttiva 2014/59/UE jista’ jkun li mhux dejjem ikun identiku għal grupp kif definit fl-Artikolu 2(1), il-punt (26) ta’ din id-Direttiva, b’mod partikolari meta tali grupp ikun magħmul minn aktar minn grupp ta’ riżoluzzjoni wieħed. Skont l-Artikolu 11 tar-Regolament (UE) Nru 575/2013 tal-Parlament Ewropew u tal-Kunsill (3), ir-rekwiżit ta’ fondi proprji addizzjonali u r-rekwiżit ta’ riżerva kombinat japplikaw għall-istituzzjoni prinċipali tal-UE fil-livell konsolidat tal-grupp. Madankollu, jista’ jkun li dawn ir-rekwiżiti ma japplikawx għall-entità ta’ riżoluzzjoni fil-livell konsolidat tal-grupp ta’ riżoluzzjoni minħabba li l-grupp ta’ riżoluzzjoni jista’ jkun ma jkoprix il-grupp kollu. Għaldaqstant, huwa meħtieġ li tiġi speċifikata metodoloġija biex jiġu stmati r-rekwiżiti għal dik is-sitwazzjoni. |
(3) |
Fiċ-ċirkostanza li l-iskopertura totali għar-riskju ta’ grupp ta’ riżoluzzjoni tkun kważi tirrappreżenta l-ammont totali ta’ skopertura għar-riskju ta’ grupp, dan ikun jindika li r-riskji jew l-elementi ta’ riskju preżenti f’dak il-grupp ta’ riżoluzzjoni ma jkunux materjalment differenti minn dawk li hemm fil-grupp. F’dak il-każ, jenħtieġ li l-awtorità ta’ riżoluzzjoni tuża r-rekwiżit ta’ fondi proprji addizzjonali li japplika għall-istituzzjoni prinċipali tal-UE fil-livell konsolidat tal-grupp bħala stima tar-rekwiżit ta’ fondi proprji addizzjonali meta tiddetermina l-MREL li japplika għall-entità ta’ riżoluzzjoni fil-livell konsolidat tal-grupp ta’ riżoluzzjoni. |
(4) |
Bl-istess mod, iċ-ċirkostanza li l-iskopertura totali għar-riskju ta’ grupp ta’ riżoluzzjoni tista’ tkun attribwita kważi kollha kemm hi lil entità waħda ta’ dak il-grupp ta’ riżoluzzjoni hija indikazzjoni li r-riskji jew l-elementi ta’ riskju preżenti f’dak il-grupp ta’ riżoluzzjoni mhumiex materjalment differenti minn dawk preżenti f’dik l-entità tal-grupp ta’ riżoluzzjoni. Għaldaqstant, meta l-iskopertura totali għar-riskju tal-grupp ta’ riżoluzzjoni ma tvarjax b’mod sinifikanti minn dak tal-akbar entità ta’ dak il-grupp ta’ riżoluzzjoni, jenħtieġ li l-awtorità ta’ riżoluzzjoni tuża r-rekwiżit ta’ fondi proprji addizzjonali ta’ dik l-akbar entità bħala stima tar-rekwiżit ta’ fondi proprji addizzjonali meta tiddetermina l-MREL għall-entità ta’ riżoluzzjoni fil-livell konsolidat tal-grupp ta’ riżoluzzjoni. |
(5) |
Meta grupp ta’ riżoluzzjoni jkun aktar kumpless u l-ispeċifiċitajiet tiegħu ma jkunux jistgħu jinqabdu għalkollox billi jiġi kkupjat ir-rekwiżit ta’ fondi proprji addizzjonali li japplika jew għall-istituzzjoni prinċipali tal-UE fil-livell konsolidat tal-grupp jew għall-akbar entità fil-grupp ta’ riżoluzzjoni, jenħtieġ li l-awtoritajiet ta’ riżoluzzjoni jużaw stimi differenti għar-rekwiżit ta’ fondi proprji addizzjonali tal-entità ta’ riżoluzzjoni fil-livell konsolidat tal-grupp ta’ riżoluzzjoni. Meta r-rekwiżit ta’ fondi proprji addizzjonali li japplika għall-istituzzjoni prinċipali tal-UE fil-livell konsolidat tal-grupp ikun ogħla mir-rekwiżit ta’ fondi proprji addizzjonali ta’ kull entità tal-grupp ta’ riżoluzzjoni, ir-rekwiżit ta’ fondi proprji addizzjonali li japplika għall-istituzzjoni prinċipali tal-UE fil-livell konsolidat tal-grupp jenħtieġ li jservi bħala bażi għall-istima tar-rekwiżit ta’ fondi proprji addizzjonali tal-entità ta’ riżoluzzjoni fil-livell konsolidat tal-grupp ta’ riżoluzzjoni. F’dak il-każ, jenħtieġ li l-awtoritajiet ta’ riżoluzzjoni, abbażi tal-informazzjoni pprovduta mill-awtorità kompetenti, ifittxu li jaġġustaw dik l-istima biex tirrifletti r-riskji speċifiċi tal-grupp ta’ riżoluzzjoni meta mqabbla mar-riskji tal-istituzzjoni prinċipali tal-UE fil-livell konsolidat tal-grupp. Dan l-aġġustament jenħtieġ li jqis li jista’ jkun li xi riskji tal-grupp ta’ riżoluzzjoni ma jkunux preżenti f’entitajiet oħra tal-grupp li mhumiex parti mill-grupp ta’ riżoluzzjoni jew li xi riskji li jkunu preżenti f’dawk l-entitajiet tal-grupp ma jkunux preżenti fil-grupp ta’ riżoluzzjoni nnifsu. |
(6) |
Iċ-ċirkostanza li rekwiżit individwali wieħed jew aktar fi ħdan il-grupp ta’ riżoluzzjoni jkunu ogħla mir-rekwiżit ta’ fondi proprji addizzjonali li japplika għall-istituzzjoni prinċipali tal-UE fil-livell konsolidat tal-grupp hija indikazzjoni ta’ riskji jew elementi ta’ riskju idjosinkratiċi fi ħdan il-grupp ta’ riżoluzzjoni. Dawk ir-riskji jew elementi ta’ riskju idjosinkratiċi jistgħu jkunu inqas importanti meta jitqiesu fil-grupp f’livell konsolidat, pereżempju minħabba li jistgħu jiġu kkumpensati minn fatturi ta’ riskju kumpensatorji barra mill-grupp ta’ riżoluzzjoni. Sabiex jiġi stmat ir-rekwiżit ta’ fondi proprji addizzjonali tal-entità ta’ riżoluzzjoni fil-livell konsolidat tal-grupp ta’ riżoluzzjoni, jenħtieġ għalhekk li kull meta din iċ-ċirkostanza sseħħ, l-awtorità ta’ riżoluzzjoni tqabbel stima bbażata fuq l-aġġustamenti għar-rekwiżit ta’ fondi proprji addizzjonali li japplikaw għall-istituzzjoni prinċipali tal-UE fil-livell konsolidat tal-grupp ma’ stima bbażata fuq medja ponderata tar-rekwiżiti ta’ fondi proprji addizzjonali tal-entitajiet kollha tal-grupp ta’ riżoluzzjoni. Jenħtieġ li l-awtorità ta’ riżoluzzjoni tuża l-istima li tagħti l-ogħla rekwiżit bħala input biex jiġi ddeterminat l-MREL għall-entità ta’ riżoluzzjoni fil-livell konsolidat tal-grupp ta’ riżoluzzjoni. |
(7) |
Sabiex jiġi stmat ir-rekwiżit ta’ fondi proprji addizzjonali tal-entità ta’ riżoluzzjoni fil-livell konsolidat tal-grupp ta’ riżoluzzjoni għal gruppi aktar kumplessi, jenħtieġ li l-awtoritajiet ta’ riżoluzzjoni, fejn possibbli, skont l-informazzjoni pprovduta mill-awtorità kompetenti, jaġġustaw ir-rekwiżit ta’ fondi proprji addizzjonali tal-istituzzjoni prinċipali tal-UE fil-livell konsolidat tal-grupp biex jirriflettu li xi riskji jew elementi ta’ riskju koperti minn dak ir-rekwiżit ta’ fondi proprji addizzjonali mhumiex rilevanti għall-grupp ta’ riżoluzzjoni kkonċernat, pereżempju minħabba n-natura jew il-pożizzjoni ġeografika tagħhom. Jenħtieġ ukoll li l-awtoritajiet ta’ riżoluzzjoni, fejn possibbli, u skont l-informazzjoni pprovduta mill-awtorità kompetenti, jagħmlu aġġustamenti għal dak ir-rekwiżit biex jitqies li xi riskji jew elementi ta’ riskju tal-grupp ta’ riżoluzzjoni ma jkunux riflessi għalkollox f’dak ir-rekwiżit jew li jkunu nnettjati fih, iżda li xorta waħda jkunu rilevanti għall-grupp ta’ riżoluzzjoni. Jenħtieġ li l-aġġustamenti kollha jkunu bbażati fuq informazzjoni pprovduta mill-awtoritajiet kompetenti rilevanti, fejn disponibbli, minħabba li dawn l-awtoritajiet huma responsabbli biex jistmaw ir-riskji kontinwi li l-entitajiet ta’ grupp ikunu esposti għalihom. Meta tali aġġustamenti ma jkunux possibbli, jenħtieġ li l-awtorità ta’ riżoluzzjoni tuża r-rekwiżit ta’ fondi proprji addizzjonali mhux aġġustat tal-istituzzjoni prinċipali tal-UE fil-livell konsolidat tal-grupp biex tistma r-rekwiżit ta’ fondi proprji addizzjonali tal-entità ta’ riżoluzzjoni fil-livell konsolidat tal-grupp ta’ riżoluzzjoni. |
(8) |
Ir-rata tar-riżerva ta’ konservazzjoni tal-kapital ma tvarjax bejn l-istituzzjonijiet. Għaldaqstant jenħtieġ li tintuża din ir-rata bħala stima tar-riżerva ta’ konservazzjoni tal-kapital tal-entità ta’ riżoluzzjoni fil-livell konsolidat tal-grupp ta’ riżoluzzjoni. |
(9) |
Sabiex tiġi riflessa l-istruttura ppjanata tal-grupp wara l-implimentazzjoni tal-istrateġija ta’ riżoluzzjoni ppreferuta, ir-rekwiżiti ta’ riżerva mmirati biex jindirizzaw ir-riskju sistemiku, jiġifieri, ir-riżerva ta’ istituzzjoni globali sistemikament importanti, ir-riżerva ta’ istituzzjoni oħra sistematikament importanti u r-riżerva għal riskju sistemiku, jentħieġ li awtomatikament jitqiesu identiċi għar-rekwiżiti stabbiliti għall-entità li hija l-eqreb, f’termini tal-iskopertura totali għar-riskju, għall-grupp ta’ riżoluzzjoni. |
(10) |
Skont l-Artikolu 45c(3), l-ewwel subparagrafu, il-punt (a), il-punt (ii), tad-Direttiva 2014/59/UE, l-ammont ta’ rikapitalizzazzjoni huwa l-ammont li jippermetti lill-grupp ta’ riżoluzzjoni li jirriżulta minn riżoluzzjoni biex terġa’ tinkiseb il-konformità, fost rekwiżiti oħra, mar-rekwiżit ta’ fondi proprji addizzjonali fil-livell konsolidat tal-grupp ta’ riżoluzzjoni wara l-implimentazzjoni tal-istrateġija ta’ riżoluzzjoni ppreferuta. Skont l-Artikolu 45c(3), is-seba’ subparagrafu, tad-Direttiva 2014/59/UE, l-ammont neċessarju biex jiġi żgurat li, wara r-riżoluzzjoni, l-entità ta’ riżoluzzjoni tkun kapaċi ssostni biżżejjed fiduċja tas-suq għal perjodu xieraq għandu jkun ugwali għar-rekwiżit ta’ riżerva kombinat li jkun applikabbli wara l-applikazzjoni tal-għodod ta’ riżoluzzjoni, nieqes ir-riżerva ta’ kapital kontroċiklika. L-ammont ta’ rikapitalizzazzjoni, inkluż l-ammont meħtieġ biex tiġi sostnuta l-fiduċja tas-suq, hija parti mill-MREL, u jista’ jiġi aġġustat ’l isfel jew ’il fuq skont il-paragrafi 3 u 7 tal-Artikolu 45c tad-Direttiva 2014/59/UE biex jirrifletti t-tibdil għall-grupp ta’ riżoluzzjoni wara l-applikazzjoni tal-għodod ta’ riżoluzzjoni. Għaldaqstant, jenħtieġ li jiġu stmati biss ir-rekwiżit ta’ fondi proprji addizzjonali u r-rekwiżit ta’ riżerva kombinat applikati għall-entità ta’ riżoluzzjoni fil-livell konsolidat tal-grupp ta’ riżoluzzjoni li jintużaw biex jiġi kkalibrat l-MREL. Madankollu, jenħtieġ li dik l-istima tkun mingħajr preġudizzju għal kwalunkwe aġġustament fl-ammont ta’ rikapitalizzazzjoni, inkluż l-ammont meħtieġ biex tinżamm il-fiduċja tas-suq, meta jiġi stabbilit l-MREL skont id-Direttiva 2014/59/UE. |
(11) |
Dan ir-Regolament hu bbażat fuq l-abbozz tal-istandards tekniċi regolatorji ppreżentati mill-Awtorità Bankarja Ewropea lill-Kummissjoni. |
(12) |
L-Awtorità Bankarja Ewropea għamlet konsultazzjonijiet pubbliċi miftuħin dwar l-abbozz tal-istandards tekniċi regolatorji li fuqu huwa bbażat dan ir-Regolament, analizzat l-ispejjeż u l-benefiċċji potenzjali relatati u talbet il-parir tal-Grupp tal-Partijiet Bankarji Interessati stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (4), |
ADOTTAT DAN IR-REGOLAMENT:
Artikolu 1
Stima tar-rekwiżit ta’ fondi proprji addizzjonali
1. Meta entità ta’ riżoluzzjoni ma kinitx soġġetta għal rekwiżit ta’ fondi proprji addizzjonali kif imsemmi fl-Artikolu 104a tad-Direttiva 2013/36/UE fil-livell konsolidat tal-grupp ta’ riżoluzzjoni, l-awtoritajiet ta’ riżoluzzjoni għandhom jistmaw dak ir-rekwiżit f’konformità mal-paragrafi minn 2 sa 7 biex jiddeterminaw ir-rekwiżit minimu għal fondi proprji u obbligazzjonijiet eliġibbli (MREL) tal-entità ta’ riżoluzzjoni fil-livell konsolidat tal-grupp ta’ riżoluzzjoni.
2. Meta l-iskopertura totali għar-riskju tal-entità ta’ riżoluzzjoni fil-livell konsolidat tal-grupp ta’ riżoluzzjoni jvarja b’5 % jew inqas mill-iskopertura totali għar-riskju tal-istituzzjoni prinċipali tal-UE fil-livell konsolidat tal-grupp, l-awtoritajiet ta’ riżoluzzjoni għandhom jużaw ir-rekwiżit ta’ fondi proprji addizzjonali impost fuq l-istituzzjoni prinċipali tal-Unjoni fil-livell konsolidat tal-grupp bħala stima ta’ dak ir-rekwiżit biex jiddeterminaw l-MREL tal-entità ta’ riżoluzzjoni fil-livell konsolidat tal-grupp ta’ riżoluzzjoni.
3. Bħala stima tar-rekwiżit ta’ fondi proprji addizzjonali tal-entità ta’ riżoluzzjoni fil-livell konsolidat tal-grupp ta’ riżoluzzjoni, l-awtoritajiet ta’ riżoluzzjoni għandhom jużaw ir-rekwiżit ta’ fondi proprji addizzjonali tal-entità li tirrappreżenta l-akbar proporzjon tal-iskopertura totali għar-riskju konsolidata tal-grupp ta’ riżoluzzjoni meta japplika dan kollu li ġej:
(a) |
l-iskopertura totali għar-riskju tal-entità ta’ riżoluzzjoni fil-livell konsolidat tal-grupp ta’ riżoluzzjoni jvarja b’aktar minn 5 % mill-iskopertura totali għar-riskju tal-istituzzjoni prinċipali tal-UE fil-livell konsolidat tal-grupp; |
(b) |
l-iskopertura totali għar-riskju tal-entità ta’ riżoluzzjoni fil-livell konsolidat tal-grupp ta’ riżoluzzjoni hija daqs, jew tvarja b’anqas minn 5 % mill-iskopertura totali għar-riskju individwali tal-entità li tirrappreżenta l-akbar proporzjon tal-iskopertura totali għar-riskju konsolidata tal-grupp ta’ riżoluzzjoni; |
(c) |
ir-rekwiżit ta’ fondi proprji addizzjonali tal-entità li tirrappreżenta l-akbar proporzjon tal-iskopertura totali għar-riskju konsolidata tal-grupp ta’ riżoluzzjoni jkun akbar minn żero. |
4. Meta l-paragrafi 2 u 3 ma japplikawx u l-ebda waħda mill-entitajiet li huma parti mill-grupp ta’ riżoluzzjoni ma tkun soġġetta għal rekwiżit ta’ fondi proprji addizzjonali ogħla mir-rekwiżit ta’ fondi proprji addizzjonali impost fuq l-istituzzjoni prinċipali tal-UE fil-livell konsolidat tal-grupp, bħala stima tar-rekwiżit ta’ fondi proprji addizzjonali tal-entità ta’ riżoluzzjoni fil-livell konsolidat tal-grupp ta’ riżoluzzjoni, l-awtoritajiet ta’ riżoluzzjoni għandhom jużaw ir-rekwiżit ta’ fondi proprji addizzjonali impost fuq l-istituzzjoni prinċipali tal-UE fil-livell konsolidat tal-grupp, soġġett għall-aġġustamenti msemmija fl-Artikolu 2.
5. Meta l-paragrafi 2 u 3 ma japplikawx, u entità waħda jew aktar li jkunu parti mill-grupp ta’ riżoluzzjoni jkunu soġġetti għal rekwiżit ta’ fondi proprji addizzjonali ogħla mir-rekwiżit ta’ fondi proprji addizzjonali impost fuq l-istituzzjoni prinċipali tal-UE fil-livell konsolidat tal-grupp, l-awtoritajiet ta’ riżoluzzjoni għandhom jużaw l-ogħla minn dawn li ġejjin bħala stima tar-rekwiżit ta’ fondi proprji addizzjonali tal-entità ta’ riżoluzzjoni fil-livell konsolidat tal-grupp ta’ riżoluzzjoni:
(a) |
ir-rekwiżit ta’ fondi proprji addizzjonali impost fuq l-istituzzjoni prinċipali tal-UE fil-livell konsolidat tal-grupp soġġett għall-aġġustamenti msemmija fl-Artikolu 2; |
(b) |
is-somma tal-prodotti tar-rekwiżiti ta’ fondi proprji addizzjonali tal-entitajiet tal-grupp ta’ riżoluzzjoni u l-iskoperturi totali għar-riskju individwali rispettivi ta’ dawk l-entitajiet, diviża bis-somma tal-iskoperturi totali għar-riskju individwali ta’ dawk l-entitajiet. |
6. Għall-finijiet tal-paragrafu 5, il-punt (b), fejn ma jkun ġie impost l-ebda rekwiżit ta’ fondi proprji addizzjonali fuq entità fuq bażi individwali, ir-rekwiżit ta’ fondi proprji addizzjonali ta’ dik l-entità għandu jkun żero.
7. Għall-finijiet ta’ dan l-Artikolu, l-iskopertura totali għar-riskju għandha tiġi kkalkulata f’konformità mal-paragrafi 3 u 4 tal-Artikolu 92 tar-Regolament (UE) Nru 575/2013 u fuq bażi individwali jew konsolidata, kif applikabbli.
Artikolu 2
Aġġustamenti għall-istima tar-rekwiżit ta’ fondi proprji addizzjonali
1. Għall-finijiet tal-Artikolu 1(4) u tal-Artikolu 1(5), il-punt (a), l-awtoritajiet ta’ riżoluzzjoni għandhom, abbażi tal-informazzjoni pprovduta mill-awtorità kompetenti rilevanti, jaġġustaw l-istima tagħhom tar-rekwiżit ta’ fondi proprji addizzjonali tal-entità ta’ riżoluzzjoni fil-livell konsolidat tal-grupp ta’ riżoluzzjoni fi kwalunkwe każ minn dawn li ġejjin:
(a) |
xi riskji jew elementi ta’ riskju li biex jiġu koperti ġie impost ir-rekwiżit ta’ fondi proprji addizzjonali fuq l-istituzzjoni prinċipali tal-UE fil-livell konsolidat tal-grupp mill-awtorità kompetenti f’konformità mal-Artikolu 104a tad-Direttiva 2013/36/UE mhumiex preżenti fil-grupp ta’ riżoluzzjoni kkonċernat; |
(b) |
xi riskji jew elementi ta’ riskju li biex jiġu koperti ma ġie impost l-ebda rekwiżit ta’ fondi proprji addizzjonali fuq l-istituzzjoni prinċipali tal-UE fil-livell konsolidat tal-grupp mill-awtorità kompetenti f’konformità mal-Artikolu 104a tad-Direttiva 2013/36/UE huma preżenti f’dak il-grupp ta’ riżoluzzjoni. |
2. L-aġġustamenti msemmija fil-paragrafu 1 ma għandhomx isiru meta l-awtorità ta’ riżoluzzjoni, wara li tkun ikkonsultat mal-awtorità kompetenti u wara li tkun qieset l-informazzjoni pprovduta minn dik l-awtorità kompetenti, tkun ivvalutat li ma hemm l-ebda riskju sinifikanti relatat ma’ entitajiet jew attivitajiet tal-grupp li mhumiex parti mill-grupp ta’ riżoluzzjoni.
Artikolu 3
Metodoloġija għall-istima tar-rekwiżit ta’ riżerva kombinat tal-entitajiet ta’ riżoluzzjoni
1. L-istima tar-rekwiżit ta’ riżerva kombinat tal-entità ta’ riżoluzzjoni fil-livell konsolidat tal-grupp ta’ riżoluzzjoni għandha tkun is-somma tar-rekwiżiti ta’ riżerva msemmija fl-Artikolu 129(1), il-paragrafi 4 u 5 tal-Artikolu 131 u l-Artikolu 133(4) tad-Direttiva 2013/36/UE, kif applikabbli, kif stmata f’konformità mal-paragrafi minn 2 sa 4 ta’ dan l-Artikolu.
2. Bħala stima tar-rekwiżit ta’ riżerva ta’ konservazzjoni ta’ kapital imsemmija fl-Artikolu 129(1) tad-Direttiva 2013/36/UE għall-entità ta’ riżoluzzjoni fil-livell konsolidat tal-grupp ta’ riżoluzzjoni, l-awtoritajiet ta’ riżoluzzjoni għandhom jużaw ir-rekwiżit ta’ riżerva ta’ konservazzjoni ta’ kapital impost fuq l-istituzzjoni prinċipali tal-UE fil-livell konsolidat tal-grupp.
3. Meta l-entità ta’ riżoluzzjoni tkun ukoll l-impriża prinċipali tal-UE, bħala stima tar-rekwiżit ta’ riżerva ta’ istituzzjoni globali sistemikament importanti (G-SII) imsemmi fl-Artikolu 131(4) tad-Direttiva 2013/36/UE għall-entità ta’ riżoluzzjoni fil-livell konsolidat tal-grupp ta’ riżoluzzjoni, l-awtoritajiet ta’ riżoluzzjoni għandhom jużaw ir-rekwiżit ta’ riżerva ta’ G-SII impost fuq l-istituzzjoni prinċipali tal-UE fil-livell konsolidat tal-grupp.
4. Bħala stima tar-rekwiżit ta’ riżerva tal-istituzzjoni sistematikament importanti oħra (O-SII) imsemmi fl-Artikolu 131(5) tad-Direttiva 2013/36/UE għall-entità ta’ riżoluzzjoni fil-livell konsolidat tal-grupp ta’ riżoluzzjoni, l-awtoritajiet ta’ riżoluzzjoni għandhom jużaw ir-rekwiżit ta’ riżerva ta’ O-SII impost fuq l-istituzzjoni prinċipali tal-UE fil-livell konsolidat tal-grupp. Meta r-rekwiżit ta’ riżerva ta’ O-SII jkun ġie stabbilit ukoll f’livell ta’ konsolidazzjoni differenti minn dak fil-livell tal-grupp, biex jistmaw dak ir-rekwiżit, l-awtoritajiet ta’ riżoluzzjoni nazzjonali għandhom jużaw ir-rekwiżit ta’ riżerva ta’ O-SII stabbilit fil-livell tal-konsolidazzjoni li huwa l-eqreb, f’termini tal-iskopertura totali għar-riskju, għall-grupp ta’ riżoluzzjoni.
5. Bħala stima tar-rekwiżit ta’ riżerva għal riskju sistemiku msemmi fl-Artikolu 133(4) tad-Direttiva 2013/36/UE għall-entità ta’ riżoluzzjoni fil-livell konsolidat tal-grupp ta’ riżoluzzjoni, l-awtoritajiet ta’ riżoluzzjoni għandhom jużaw ir-rekwiżit ta’ riżerva għal riskju sistemiku impost fuq l-istituzzjoni prinċipali tal-UE fil-livell konsolidat tal-grupp. Meta tkun ġiet stabbilita riżerva għar-riskju sistemiku wkoll f’livell ieħor ta’ konsolidazzjoni milli fil-livell tal-grupp, bħala stima ta’ dak ir-rekwiżit l-awtoritajiet ta’ riżoluzzjoni għandhom jużaw ir-rekwiżit ta’ riżerva għal riskju sistemiku stabbilit fil-livell ta’ konsolidazzjoni li jkun l-eqreb, f’termini tal-iskopertura totali għar-riskju, għall-grupp ta’ riżoluzzjoni.
Artikolu 4
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, is-26 ta’ Marzu 2021.
Għall-Kummissjoni
Il-President
Ursula VON DER LEYEN
(1) ĠU L 173, 12.6.2014, p. 190.
(2) Id-Direttiva 2013/36/UE tal-Parlament Ewropew u tal-Kunsill tas-26 ta’ Ġunju 2013 dwar l-aċċess għall-attività tal-istituzzjonijiet ta’ kreditu u s-superviżjoni prudenzjali tal-istituzzjonijiet ta’ kreditu u tad-ditti tal-investiment, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE (ĠU L 176, 27.6.2013, p. 338).
(3) Ir-Regolament (UE) Nru 575/2013 tal-Parlament Ewropew u tal-Kunsill tas-26 ta’ Ġunju 2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (ĠU L 176, 27.6.2013, p. 1).
(4) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Bankarja Ewropea) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).