(1)

Skont l-Artikolu 287 tad-Direttiva 2006/112/KE, il-Litwanja tista’ teżenta mit-taxxa fuq il-valur miżjud (“il-VAT”) lil persuni soġġetti għat-taxxa li l-fatturat annwali tagħhom ma jaqbiżx l-ekwivalenti ta’ EUR 29 000 fil-munita nazzjonali bir-rata tal-konverżjoni tal-jum tal-adeżjoni tagħha mal-Unjoni. Il-Litwanja kienet awtorizzata, permezz tad-Deċiżjoni ta’ Implimentazzjoni tal-Kunsill 2011/335/UE (2), teżenta mill-VAT lil persuni soġġetti għat-taxxa li l-fatturat annwali tagħhom ma jkunx qabeż l-ekwivalenti ta’ EUR 45 000 fil-munita nazzjonali bir-rata tal-konverżjoni tal-jum tal-adeżjoni tagħha mal-Unjoni, sal-31 ta’ Diċembru 2020.

(2)

Permezz ta’ ittra rreġistrata mal-Kummissjoni fit-18 ta’ Ġunju 2020, il-Litwanja talbet awtorizzazzjoni biex tkompli tapplika miżura speċjali li tidderoga mill- Artikolu 287 tad-Direttiva 2006/112/KE (il-“miżura ta’ deroga”) mill-1 ta’ Jannar 2021 sal-31 ta’ Diċembru 2024, u biex iżżid il-livell limitu ta’ dik l-eżenzjoni għal EUR 55 000 (iż-“żieda fil-livell limitu”). Sal-31 Diċembru 2024 l-Istati Membri għandhom jadottaw u jippubblikaw il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw mal-Artikolu 1 tad-Direttiva tal-Kunsill (UE) 2020/285 (3), li tistabbilixxi regoli tal-VAT aktar sempliċi għall-impriżi ż-żgħar u, fost l-oħrajn, tħassar l-Artikolu 287 tad-Direttiva 2006/112/KE b’effett mill-1 ta’ Jannar 2025.

(3)

Fuq il-bażi ta’ tal-miżura ta’ deroga, dawk il-persuni soġġetti għat-taxxa li l-fatturat annwali tagħhom ma jaqbiżx EUR 55 000 ser ikunu eżentati minn ċerti obbligi jew mill-obbligi kollha fir-rigward tal-VAT stabbiliti fil-Kapitoli 2 sa 6 tat-Titolu XI tad-Direttiva 2006/112/KE.

(4)

Il-livell limitu ogħla għall-iskema speċjali għall-impriżi żgħar li hemm stabbilit fl-Artikoli 281 sa 294 tad-Direttiva 2006/112/KE hu miżura ta’ simplifikazzjoni billi dan jista’ jnaqqas l-obbligi tal-VAT tal-impriżi żgħar b’mod sinifikanti. Iż-żieda fil-livell limitu mitluba hija konsistenti mal-Artikolu 284 tad-Direttiva 2006/112/KE.

(5)

F’konformità mat-tieni subparagrafu tal-Artikolu 395(2) tad-Direttiva 2006/112/KE, il-Kummissjoni bagħtet it-talba magħmula mill- Litwanja lill-Istati Membri l-oħra permezz ta’ ittri ddatati l-10 ta’ Awwissu 2020 u l-11 ta’ Awwissu 2020. Permezz ta’ ittra datata t-12 ta’ Awwissu 2020, il-Kummissjoni nnotifikat lil-Litwanja li kellha l-informazzjoni kollha li hija tqis meħtieġa biex tqis it-talba.

(6)

Il-miżura ta’ deroga hija fakultattiva għall-persuni taxxabbli li xorta ser ikunu jistgħu jagħżlu l-arranġamenti regolari tal-VAT f’konformità mal-Artikolu 290 tad-Direttiva 2006/112/KE.

(7)

Skont l-informazzjoni li pprovdiet il-Litwanja, il-miżura ta’ deroga ser ikollha biss impatt negliġibbli fuq l-ammont globali tad-dħul mill-VAT li jinġabar fl-istadju tal-konsum finali.

(8)

Il-miżura ta’ deroga mhijiex ser ikollha impatt negattiv fuq ir-riżorsi proprji tal-Unjoni li jakkumulaw mill-VAT peress li l-Litwanja ser twettaq kalkolu ta’ kumpens f’konformità mal-Artikolu 6 tar-Regolament tal-Kunsill (KEE, Euratom) Nru 1553/89 (4).

(9)

Minħabba li hu mistenni li ż-żieda fil-livell limitu ser tnaqqas l-obbligi tal-VAT u b’hekk l-ispejjeż tal-konformità għall-impriżi ż-żgħar, kif ukoll il-piż amministrattiv għall-awtoritajiet tat-taxxa, u peress li l-impatt fuq id-dħul totali mill-VAT iġġenerat huwa negliġibbli, jenħtieġ li l-Litwanja tiġi awtorizzata tkompli tapplika l-miżura ta’ deroga.

(10)

Jenħtieġ li l-awtorizzazzjoni biex tiġi applikata l-miżura ta’ deroga tkun limitata fiż-żmien. Jenħtieġ li l-limitu ta’ żmien ikun biżżejjed biex tkun tista’ ssir evalwazzjoni tal-effettività u tal-adegwatezza taż-żieda fil-livell limitu. Barra minn hekk, f’konformità mad-Direttiva (UE) 2020/285, sal-31 ta’ Diċembru 2024, l-Istati Membri jridu jadottaw u jippubblikaw il-liġijiet, ir-regolamenti u d-dispożizzjonijiet amministrattivi neċessarji biex jikkonformaw mal-Artikolu 1 ta’ dik id-Direttiva, u japplikaw dawk id-dispożizzjonijiet mill-1 ta’ Jannar 2025. Għalhekk, jixraq li l-Litwanja tiġi awtorizzata tapplika l-miżura ta’ deroga għal perijodu limitat ulterjuri sal-31 ta’ Diċembru 2024.

(11)

Minħabba d-diffikultajiet ikkawżati mill-pandemija tal-COVID-19, il-proċess għat-tiġdid tal-miżura ta’ deroga ħa aktar żmien milli kien mistenni u ma ġiex iffinalizzat sal-31 ta’ Diċembru 2020. Mingħajr l-applikazzjoni retroattiva ta’ din id-Deċiżjoni, l-impriżi ż-żgħar iġarrbu telf ekonomiku. Huwa għalhekk xieraq li din id-Deċiżjoni tiġi applikata b’mod retroattiv, mill-1 ta’ Jannar 2021, biex tiġi żgurata l-kontinwità legali tal-miżura ta’ deroga.