(1)

Ir-Regolament ta’ Implimentazzjoni tal-Kummissjoni (UE) 2019/1793 (3) jistabbilixxi regoli dwar iż-żieda temporanja tal-kontrolli uffiċjali mad-dħul fl-Unjoni, imposti fuq ċertu ikel u għalf, li mhuwiex ġej mill-annimali, importat minn ċerti pajjiżi terzi u dwar il-kundizzjonijiet speċjali li jirregolaw id-dħul fl-Unjoni ta’ ċertu ikel u għalf minn ċerti pajjiżi terzi minħabba r-riskju ta’ kontaminazzjoni bil-mikotossini, inkluż l-aflatossini, bir-residwi tal-pestiċidi, bil-pentachlorophenol u bid-diossini u l-kontaminazzjoni mikrobijoloġika, elenkati fl-Anness II ta’ dak ir-Regolament ta’ Implimentazzjoni.

(2)

L-okkorrenza reċenti ta’ inċidenti relatati mas-sikurezza tal-ikel li ġew notifikati permezz tas-Sistema ta’ Twissija Rapida għall-Ikel u l-Għalf (RASFF), kif stabbilita bir-Regolament (KE) Nru 178/2002, u l-informazzjoni dwar il-kontrolli uffiċjali mwettqa mill-Istati Membri fuq iż-żrieragħ tal-ġulġlien li joriġinaw mill-Indja jeħtieġu li jiġi emendat l-Anness II tar-Regolament ta’ Implimentazzjoni (UE) 2019/1793.

(3)

F’Settembru 2020, permezz tal-RASFF ġew notifikati livelli għoljin ħafna ta’ ossidu tal-etilen fir-rigward ta’ ċerti lottijiet ta’ żrieragħ tal-ġulġlien li oriġinaw jew li ntbagħtu mill-Indja u li daħlu fl-Unjoni. Dawk il-livelli jaqbżu, b’aktar minn 1 000 darba, il-livell massimu ta’ residwi ta’ 0,05 mg/kg applikabbli għall-ossidu tal-etilen f’konformità mar-Regolament (KE) Nru 396/2005 tal-Parlament Ewropew u tal-Kunsill (4).

(4)

Kontaminazzjoni ta’ dan it-tip tikkostitwixxi riskju serju għas-saħħa tal-bniedem fl-Unjoni, peress li l-ossidu tal-etilen huwa kklassifikat bħala mutaġenu, kategorija 1B, karċinoġenu, kategorija 1 B, u sustanza tossika għar-riproduzzjoni, kategorija 1B, f’konformità mar-Regolament (KE) Nru 1272/2008 tal-Parlament Ewropew u tal-Kunsill (5). Barra minn hekk, l-ossidu tal-etilen mhuwiex approvat bħala sustanza attiva għall-użu fi prodotti għall-protezzjoni tal-pjanti fl-Unjoni.

(5)

Sabiex tiġi protetta s-saħħa tal-bniedem fl-Unjoni, huwa għalhekk meħtieġ li jiġu previsti kundizzjonijiet speċjali fir-rigward tar-residwi tal-pestiċidi b’rabta maż-żrieragħ tal-ġulġlien mill-Indja. B’mod partikolari, iċ-ċertifikat uffiċjali li, f’konformità mal-Artikolu 11(1) tar-Regolament (UE) 2019/1793 flimkien mal-Anness II tiegħu, irid jakkumpanja l-kunsinni kollha taż-żrieragħ tal-ġulġlien mill-Indja, jenħtieġ jiddikjara wkoll li ttieħdu kampjuni tal-prodotti u li dawn ikunu ġew analizzati għar-residwi tal-pestiċidi li jridu jiġu mmonitorjati fi/fuq il-prodotti li joriġinaw mill-pjanti, u li r-riżultati kollha tal-kampjunar u tal-analiżi juru konformità mal-leġiżlazzjoni tal-Unjoni dwar il-livelli massimi ta’ residwi tal-pestiċidi. Ir-riżultati tal-kampjunar u tal-analiżi jenħtieġ jinhemżu ma’ dak iċ-ċertifikat.

(6)

Fid-dawl tal-kummerċ li għadu għaddej, il-kunsinni taż-żrieragħ tal-ġulġlien li joriġinaw mill-Indja li jkunu telqu mill-pajjiż tal-oriġini jew mill-pajjiż ta’ spedizzjoni, jekk dak il-pajjiż ikun differenti mill-pajjiż tal-oriġini, qabel id-data tad-dħul fis-seħħ ta’ dan ir-Regolament, jenħtieġ ikomplu jkunu soġġetti għar-rekwiżiti applikabbli qabel dik id-data.

(7)

Barra minn hekk, u sabiex tiġi mħarsa s-saħħa tal-bniedem fl-Unjoni, il-frekwenza tal-kontrolli fiżiċi u tal-identità għall-preżenza ta’ residwi ta’ pestiċidi li għandhom jitwettqu fuq iż-żrieragħ tal-ġulġlien li joriġinaw mill-Indja fil-fruntieri tal-Unjoni jenħtieġ tiġi stabbilita għal 50 %.

(8)

Għalhekk jenħtieġ li r-Regolament ta’ Implimentazzjoni (UE) 2019/1793 jiġi emendat skont dan.

(9)

Fid-dawl tar-riskju serju għas-saħħa tal-bniedem li jirriżulta minn kunsinni kontaminati ta’ żrieragħ tal-ġulġlien li joriġinaw mill-Indja u fid-dawl tal-ħtieġa li tittieħed azzjoni rapida, jenħtieġ li dan ir-Regolament jidħol fis-seħħ fit-tielet jum wara dak tal-pubblikazzjoni tiegħu.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,