(1)

Ir-Regolament tal-Kummissjoni (KE) Nru 1881/2006 (2) jiffissa l-livelli massimi ta’ ċerti kontaminanti fl-oġġetti tal-ikel. Il-livelli massimi tat-3-monokloropropandiol (it-3-MCPD) u tal-esteri gliċidiliċi tal-aċidi grassi huma stabbiliti fl-Anness ta’ dan ir-Regolament.

(2)

Fil-21 ta’ Novembru 2017, il-Bord Xjentifiku tal-Awtorità Ewropea dwar is-Sigurtà fl-Ikel dwar il-Kontaminanti fil-Katina tal-Ikel adotta opinjoni xjentifika (3) dwar aġġornament tal-valutazzjoni tiegħu tar-riskji għas-saħħa tal-bniedem marbutin mal-preżenza tat-3-monokloropropandiol (minn hawn ’il quddiem imsejjaħ “it-3-MCPD”) u tal-esteri tiegħu tal-aċidi grassi fl-ikel li kienet ġiet ippubblikata fl-2016 (4), fid-dawl tad-diverġenza xjentifika li ġiet identifikata fir-rapport tal-Kumitat Espert Konġunt tal-FAO u tad-WHO dwar l-Addittivi tal-Ikel u l-Kontaminanti b’rabta mal-istabbiliment tad-doża tollerabbli ta’ kuljum (it-TDI) (5).

(3)

Il-Bord dwar il-Kontaminanti fil-Katina tal-Ikel stabbilixxa TDI tal-grupp aġġornata ta’ 2 mikrogrammi għal kull kilogramm ta’ piż tal-ġisem għal kull jum għat-3-MCPD u għall-esteri tiegħu tal-aċidi grassi. Huwa nnota li din id-doża tollerabbli ta’ kuljum ma tinqabiżx fil-popolazzjoni adulta. Madankollu, ġie nnutat li din tinqabeż xi ftit fil-każ tal-konsumaturi l-kbar li jiffurmaw parti mill-gruppi ta’ età iżgħar u b’mod partikulari fil-każ tat-trabi li jirċievu l-formuli biss.

(4)

It-3-MCPD u l-esteri tiegħu tal-aċidi grassi huma kontaminanti kkawżati mill-ipproċessar li jiġu ffurmati waqt ir-raffinar taż-żjut veġetali. Għalhekk huwa xieraq li jiġu stabbiliti l-livelli massimi li fihom jista’ jkun hemm it-3-MCPD u l-esteri tiegħu tal-aċidi grassi fiż-żjut veġetali u fix-xaħmijiet imqiegħda fis-suq għall-konsumatur finali jew għall-użu bħala ingredjent fl-ikel. Billi ż-żjut taż-żebbuġa verġni ma jkunx fihom l-esteri gliċidiliċi tal-aċidi grassi, it-3-MCPD u l-esteri tiegħu tal-aċidi grassi, huwa xieraq li la dawn il-livelli massimi l-ġodda tat-3-MCPD u tal-esteri tiegħu tal-aċidi grassi u lanqas il-livell massimu eżistenti tal-esteri gliċidiliċi tal-aċidi grassi ma jkunu japplikaw għaż-żjut verġni.

(5)

Madankollu, minħabba t-tħassib li jista’ jkun hemm għas-saħħa tat-trabi u tat-tfal iż-żgħar, huwa xieraq li jiġi stabbilit livell massimu iktar strett għaż-żjut veġetali u għax-xaħmijiet li jkunu maħsubin għall-produzzjoni tal-ikel tat-trabi u tal-ikel ipproċessat ibbażat fuq iċ-ċereali għat-trabi u għat-tfal iż-żgħar.

(6)

Sabiex jiġi eskluż kull tħassib li jista’ jkun hemm b’rabta mas-saħħa tat-trabi u tat-tfal iż-żgħar, b’mod partikulari meta wieħed iqis l-esponiment li t-trabi li jintemgħu l-formuli tat-trabi biss jista’ jkollhom għat-3-MCPD u għall-esteri tiegħu tal-aċidi grassi, huwa xieraq li jiġu stabbiliti livelli massimi stretti speċifiċi għall-formuli tat-trabi, għall-formuli tal-prosegwiment u għall-ikel għal raġunijiet mediċi speċjali maħsub għat-trabi u għat-tfal iż-żgħar, skont jekk dawn jinbiegħux fil-forma ta’ trab jew f’forma likwida.

(7)

Minħabba li ġie nnutat li d-doża tollerabbli ta’ kuljum tinqabeż xi ftit fil-każ tal-konsumaturi l-kbar li jiffurmaw parti mill-gruppi ta’ età iżgħar u mhux biss fil-każ tat-trabi li jirċievu l-formuli biss, huwa xieraq li jiġi applikat l-istess livell strett għall-formuli maħsubin għat-tfal iż-żgħar peress li dawn il-formuli jingħataw ukoll lit-tfal ta’ inqas minn tliet snin. Barra minn hekk, huwa xieraq li jiġi stabbilit il-livell massimu eżistenti tal-esteri gliċidiliċi tal-aċidi grassi għall-formuli tat-trabi u għall-formuli tal-prosegwiment għall-formuli maħsubin għat-tfal iż-żgħar ukoll.

(8)

Barra minn hekk, mill-pubblikazzjonijiet xjentifiċi u mid-data dwar l-okkorrenza li waslet, dan l-aħħar ħareġ li ż-żejt tal-ħuta u ż-żjut minn organiżmi tal-baħar oħrajn jista’ jkun fihom livelli għoljin tal-esteri gliċidiliċi tal-aċidi grassi u tat-3-MCPD u tal-esteri tiegħu tal-aċidi grassi. Sabiex jiġi żgurat livell għoli ta’ protezzjoni għas-saħħa tal-bniedem, huwa xieraq li jiġi stabbilit livell massimu tal-esteri gliċidiliċi tal-aċidi grassi u tat-3-MCPD u tal-esteri tiegħu tal-aċidi grassi fiż-żejt tal-ħuta u fiż-żjut minn organiżmi tal-baħar oħrajn.

(9)

Jenħtieġ li l-operaturi tan-negozji tal-ikel jingħataw biżżejjed żmien biex jadattaw il-proċessi tal-produzzjoni tagħhom u, għalhekk, huwa xieraq li l-livelli massimi tat-3-MCPD u tal-esteri tiegħu tal-aċidi grassi u l-livelli massimi l-ġodda tal-esteri gliċidiliċi fil-formuli maħsubin għat-tfal iż-żgħar u fiż-żejt tal-ħuta u fiż-żjut minn organiżmi tal-baħar oħrajn jibdew japplikaw biss mill-1 ta’ Jannar 2021 ’il quddiem. Barra minn hekk, huwa xieraq li l-prodotti li ma jkunux jikkonformaw mal-livelli massimi tat-3-MCPD u tal-esteri tiegħu tal-aċidi grassi li jkunu tqiegħdu fis-suq qabel dik id-data jitħallew jibqgħu fis-suq sad-data sa meta jżommu l-aħjar jew sad-data tal-iskadenza tagħhom. Madankollu, minħabba li l-esteri gliċidiliċi tal-aċidi grassi huma karċinoġeni ġenotossiċi u b’hekk il-preżenza tagħhom tirrappreżenta riskju ogħla għas-saħħa pubblika, jenħtieġ li l-prodotti li ma jkunux jikkonformaw mal-livelli massimi l-ġodda tal-esteri gliċidiliċi tal-aċidi grassi li jkunu tqiegħdu fis-suq qabel l-1 ta’ Jannar 2021 jitħallew jibqgħu fis-suq biss għal perjodu limitat taż-żmien.

(10)

Għalhekk jenħtieġ li r-Regolament (KE) Nru 1881/2006 jiġi emendat kif xieraq.

(11)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,