(1)

L-Artikolu 13(1) tar-Regolament (KE) Nru 1967/2006 jipprojbixxi l-użu ta' tagħmir irmunkat sa tliet mili nawtiċi mill-kosta jew sa livell ta' fond ta' 50 m meta dak il-fond jintlaħaq 'il ġewwa minn dik id-distanza mill-kosta.

(2)

Meta xi Stat Membru jitlobha, il-Kummissjoni tista' tippermetti deroga mill-Artikolu 13(1) tar-Regolament (KE) Nru 1967/2006, dment li jiġu ssodisfati għadd ta' kundizzjonijiet stabbiliti fl-Artikolu 13(5) u (9).

(3)

Ingħatat deroga mill-ewwel subparagrafu tal-Artikolu 13(1) ta' dak ir-Regolament sas-6 ta' Diċembru 2016 permezz tar-Regolament ta' Implimentazzjoni tal-Kummissjoni (UE) Nru 1233/2013 (2).

(4)

Fid-9 ta' Awwissu 2016, l-Awtoritajiet Spanjoli talbu lill-Kummissjoni testendi d-deroga lil hinn minn tmiem il-perjodu ta' applikazzjoni tar-Regolament (UE) Nru 1233/2013. Spanja tat informazzjoni aġġornata li tiġġustifika l-estensjoni tad-deroga.

(5)

Il-Kumitat Xjentifiku, Tekniku u Ekonomiku għas-Sajd (STECF) ivvaluta d-deroga mitluba minn Spanja u l-abbozz tal-pjan ta' ġestjoni relatat waqt it-53 sessjoni plenarja tiegħu li saret f'Ottubru 2016 (3).

(6)

L-STECF jinnota li l-abbozz tal-pjan ta' ġestjoni l-ġdid għall-2016-2019 tjieb sew meta mqabbel mal-pjan ta' ġestjoni preċedenti adottat fl-2013. Madankollu, l-STECF indika ċerti aspetti li jeħtieġu iktar ġustifikazzjoni u kjarifika, b'mod partikolari dawk dwar iż-żieda fil-flessibbiltà taċ-ċensiment għall-flotta; l-operazzjoni fuq il-qigħan tal-algi Posidonia; is-separazzjoni tal-ilmijiet madwar Mallorca f'żewġ żoni ta' ġestjoni; żieda fil-qabda totali permissibbli (TAC) staġonali u estensjoni tal-istaġun tas-sajd għall-arżnell.

(7)

Fid-dawl tal-evalwazzjoni tal-STECF, il-Kummissjoni talbet aktar data u kjarifiki, u Spanja ssottomettiethom lill-Kummissjoni fid-19 ta' Ġunju u fis-6 ta' Novembru 2017, flimkien ma' studju xjentifiku (4). Spanja rtirat żewġ proposti għal tibdil fil-pjan ta' ġestjoni: is-separazzjoni tal-ilmijiet madwar Mallorca f'żewġ żoni ta' ġestjoni u l-estensjoni tal-istaġun tas-sajd għall-arżnell.

(8)

Spanja adottat il-pjan ta' ġestjoni permezz ta' Digriet (5) skont l-Artikolu 19(2) tar-Regolament (KE) Nru 1967/2006.

(9)

L-estensjoni tad-deroga li talbet Spanja tikkonforma mal-kundizzjonijiet stabbiliti fl-Artikolu 13(5) u (9) tar-Regolament (KE) Nru 1967/2006.

(10)

Jeżistu limitazzjonijiet ġeografiċi speċifiċi meta wieħed iqis id-daqs limitat tal-blata kontinentali u d-distribuzzjoni spazjali tal-ispeċi fil-mira, li hija limitata esklussivament għal ċerti żoni fiż-żoni kostali f'fond li jkun anqas minn 50 metru.

(11)

Is-sajd bit-tartaruni ma jistax isir bi rkaptu ieħor u ma għandu l-ebda impatt sinifikanti fuq l-ambjent tal-baħar. Dan is-sajd huwa selettiv, billi t-tartaruni jinġibdu fil-kolonna tal-ilma u ma jmissux qiegħ il-baħar.

(12)

It-talba tkopri bastimenti rreġistrati f'ċensiment marittimu ġestit mid-Direttorat Ġenerali għas-Sajd u l-Ambjent tal-Baħar tal-Gżejjer Baleariċi li għandhom esperjenza ta' aktar minn ħames snin fis-sajd u li jaħdmu skont il-pjan ta' ġestjoni li jirregola s-sajd bit-tartaruni għall-makku (Aphia minuta), għall-makku ferreri (Pseudaphia ferreri) u għall-arżnell (Spicara smaris). Dawk il-bastimenti jinsabu fil-lista li ntbagħtet lill-Kummissjoni skont ir-rekwiżiti tal-Artikolu 13(9) tar-Regolament (KE) Nru 1967/2006.

(13)

Id-deroga li talbet Spanja tolqot għadd limitat ta' 55 bastiment.

(14)

Il-pjan ta' ġestjoni jiggarantixxi li fil-ġejjieni mhux se jiżdied l-isforz tas-sajd, billi l-awtorizzazzjonijiet tas-sajd se jinħarġu biss lil 55 bastiment speċifiku u se jiġi stabbilit limitu massimu totali għat-tunnellaġġ u għall-potenza.

(15)

L-attivitajiet tas-sajd ikkonċernati jitwettqu f'distanza qasira ħafna mill-kosta u għaldaqstant ma jfixklux l-attivitajiet ta' bastimenti oħra.

(16)

L-attivitajiet tas-sajd ikkonċernati jissodisfaw ir-rekwiżiti tal-Artikolu 4(1) tar-Regolament (KE) Nru 1967/2006 li, permezz ta' deroga, jippermetti s-sajd 'il fuq mill-ħabitats protetti jekk is-sajd isir mingħajr ma jintmess il-qiegħ tal-algi skont ċerti kundizzjonijiet.

(17)

Billi l-attivitajiet tas-sajd ikkonċernati huma selettivi, għandhom effett negliġibbli fuq l-ambjent, u mhumiex affettwati mid-dispożizzjonijiet fl-Artikolu 4(5) tar-Regolament (KE) Nru 1967/2006, dawn huma eleġibbli għad-deroga għall-qies minimu tal-malji msemmi fl-Artikolu 9(7) tar-Regolament (KE) Nru 1967/2006. Għaldaqstant, ir-regoli dwar il-qies minimu tal-malji stipulati fl-Artikolu 9(3) ma japplikawx.

(18)

Ir-rekwiżiti tal-Artikolu 8(1)(h) tar-Regolament (KE) Nru 1967/2006 ma japplikawx minħabba li dawn għandhom x'jaqsmu mal-bastimenti tat-tkarkir.

(19)

L-attività tat-tartaruni hija rregolata fil-pjan ta' ġestjoni Spanjol biex jiġi żgurat li l-qbid tal-ispeċijiet imsemmija fl-Anness III tar-Regolament (KE) Nru 1967/2006 ikun minimu u li l-attivitajiet tas-sajd ma jkollhomx fil-mira ċ-ċefalopodi.

(20)

Il-pjan ta' ġestjoni Spanjol jinkludi miżuri għall-monitoraġġ tal-attivitajiet tas-sajd, f'konformità mat-tielet subparagrafu tal-Artikolu 13(9) tar-Regolament (KE) Nru 1967/2006 u mal-Artikoli 14 u 15 tar-Regolament tal-Kunsill (KE) Nru 1224/2009 (6)

(21)

Għaldaqstant, l-estensjoni tad-deroga li ntalbet jenħtieġ li tingħata.

(22)

Spanja jenħtieġ li tirrapporta lill-Kummissjoni fi żmien xieraq u skont il-pjan ta' monitoraġġ previst fil-pjan ta' ġestjoni Spanjol.

(23)

It-tul tal-estensjoni tad-deroga jenħtieġ li jkun limitat biex ikunu jistgħu jittieħdu miżuri ta' ġestjoni korrettivi fil-pront f'każ li r-rapport lill-Kummissjoni juri qagħda ħażina ta' konservazzjoni tal-istokk sfruttat, filwaqt li jkun hemm l-opportunità biex titjieb il-bażi xjentifika għal pjan ta' ġestjoni mtejjeb.

(24)

Billi d-deroga li ngħatat permezz tar-Regolament ta' Implimentazzjoni (UE) Nru 1233/2013 skadiet fis-6 ta' Diċembru 2016, dan ir-Regolament jenħtieġ li japplika mis-6 ta' Diċembru 2016.

(25)

Il-miżuri previsti f'dan ir-Regolament huma skont l-opinjoni tal-Kumitat għas-Sajd u l-Akkwakultura,