(1)

Fl-20 ta’ Settembru 2019, ir-Renju Unit innotifika lill-Kummissjoni, lill-Aġenzija tal-Unjoni Ewropea għas-Sikurezza tal-Avjazzjoni (“l-Aġenzija”) u lill-Istati Membri l-oħra, li kien ta eżenzjoni, skont l-Artikolu 71(1) tar-Regolament (UE) 2018/1139, lill-operaturi kollha tal-inġenji tal-ajru li jittajru fir-Renju Unit f’għoli ta’ 3 000 pied jew inqas ’il fuq mil-livell medju tal-baħar u fl-ispazju tal-ajru tal-Klassi D, mir-rekwiżiti stabbiliti fil-punt SERA.5005(a) (regoli tat-titjir viżwali (VFR)) tal-Anness tar-Regolament ta’ Implimentazzjoni tal-Kummissjoni (UE) Nru 923/2012 (2). L-eżenzjoni kif innotifikata tispeċifika fost affarijiet oħra li l-eżenzjoni identika preċedenti, li kienet ġiet innotifikata lill-Kummissjoni fis-17 ta’ April 2019, hija rrevokata b’effett mit-12 ta’ Settembru.

(2)

L-eżenzjoni ta’ hawn fuq hija permessa meta inġenju tal-ajru jtir fil-kundizzjonijiet kumulattivi li ġejjin: (i) binhar biss, (ii) b’veloċità li, skont l-indikatur tal-veloċità fl-ajru tiegħu, hija ta’ 140 knots jew inqas, biex ikollu opportunità adegwata li josserva fil-ħin traffiku ieħor u kwalunkwe ostaklu sabiex tiġi evitata kolliżjoni, (iii) mingħajr sħab u bis-superfiċe tidher, u jekk l-inġenju tal-ajru mhuwiex ħelikopter, f’viżibbiltà tat-titjir ta’ mill-inqas ħames (5) km, jew jekk l-inġenju tal-ajru huwa ħelikopter, f’viżibbiltà tat-titjir ta’ mill-inqas 1 500 m.

(3)

Ir-Renju Unit ta din l-eżenzjoni biex jiffaċilita t-tranżizzjoni sikura lejn ir-rekwiżiti futuri tal-ispazju tal-ajru kif ifformulati fil-pjan ta’ azzjoni ta’ livell għoli revedut tiegħu u b’mod partikolari sabiex jagħti ż-żmien biex jiġu implimentati l-bidliet proċedurali fis-servizz tat-traffiku tal-ajru li huma meħtieġa biex jiġu applikati b’mod sikur ir-rekwiżiti SERA rilevanti u biex tiġi kkunsidrata l-modernizzazzjoni tal-ispazju tal-ajru. Fl-aħħar nett, ir-Renju Unit ipprovda deskrizzjoni ta’ diversi miżuri ta’ mitigazzjoni li jakkumpanjaw lil dik l-eżenzjoni.

(4)

L-eżenzjoni ngħatat għall-perjodu mit-12 ta’ Settembru 2019 sal-25 ta’ Marzu 2020. Mill-2014 ’l hawn, ir-Renju Unit ta tmien eżenzjonijiet mill-punt SERA.5005(a) tal-Anness tar-Regolament ta’ Implimentazzjoni (UE) Nru 923/2012 b’durata kumulattiva ta’ wieħed u sittin xahar (3). Abbażi tal-prinċipju li skontu regoli ġodda japplikaw immedjatament għall-effetti futuri ta’ sitwazzjoni li tkun feġġet taħt ir-regoli l-antiki, il-perjodi ta’ tmien xhur imsemmija fl-Artikolu 71(2) tar-Regolament (UE) 2018/1139 iridu jiġu kkalkulati billi jiġu inklużi perjodi qabel id-dħul fis-seħħ ta’ dak ir-Regolament. Filwaqt li kkunsidrat dan, l-Aġenzija vvalutat jekk il-kundizzjonijiet stabbiliti fl-Artikolu 71(1) ta’ dak ir-Regolament ġewx issodisfati u kkonkludiet li xi wħud minnhom ma ġewx issodisfati.

(5)

Il-Kummissjoni taqbel mar-rakkomandazzjoni tal-Aġenzija.

(6)

Skont l-Artikolu 71(1) tar-Regolament (UE) 2018/1139, Stat Membru jista’ jagħti eżenzjoni biss jekk din tingħata lil kwalunkwe persuna fiżika jew ġuridika soġġetta għal dan ir-Regolament “f’każ ta’ ċirkostanzi urġenti mhux prevedibbli li jkunu qed jaffettwaw lil dawk il-persuni jew fil-każ tal-ħtiġijiet operazzjonali urġenti ta’ dawk il-persuni”, u sakemm jiġu ssodisfati l-kundizzjonijiet kollha stipulati fil-punti (a) sa (d) ta’ dak l-Artikolu.

(7)

Il-Kummissjoni tikkunsidra li l-eżenzjoni ma tissodisfax il-kundizzjoni ta’ “ħtiġijiet operazzjonali urġenti”. Din il-konklużjoni hija kkonfermata mill-għoti ripetittiv tal-istess tip ta’ eżenzjoni mit-13 ta’ Novembru 2014’l hawn. Ir-ripetizzjoni kontinwa tal-eżenzjoni tindika li d-durata tagħha mhijiex limitata u turi li l-objettiv reali huwa li tinżamm deroga fit-tul mill-punt SERA.5005(a) minflok tiġi indirizzata ħtieġa operazzjonali urġenti speċifika ta’ persuna li għaliha japplikaw dawk id-dispożizzjonijiet. Barra minn hekk, il-fatt li r-Renju Unit iddikjara fin-notifika tiegħu li ma imponiex id-distanza minima mis-sħab fl-ispazju tal-ajru tal-Klassi D u li kien iddikjara li kien se jieħu azzjoni biex jikkonforma mar-Regolament ta’ Implimentazzjoni (UE) Nru 923/2012 fit-tul ma jbiddilx din il-konklużjoni.

(8)

Fid-dawl tal-kunsiderazzjonijiet ta’ hawn fuq, ma hemm l-ebda ħtieġa li l-Kummissjoni tivvaluta jekk il-kundizzjonijiet tal-punti (a) sa (d) tal-Artikolu 71(1) tar-Regolament (UE) 2018/1139 ġewx issodisfati. Madankollu, il-Kummissjoni tosserva dan li ġej.

(9)

Il-Kummissjoni tikkunsidra li l-eżenzjoni ma tissodisfax il-kundizzjoni tal-punt (a) tal-Artikolu 71 (1) tar-Regolament (UE) 2018/1139, minħabba li l-ħtiġijiet li wasslu għal dik l-eżenzjoni jistgħu jiġu indirizzati b’mod adegwat b’mezzi oħra li jikkonformaw mar-Regolament. Fil-fatt, minkejja dak li ġie ddikjarat mir-Renju Unit, ir-Regolament ta’ Implimentazzjoni (UE) Nru 923/2012 jippermetti li l-ħtiġijiet jiġu ssodisfati b’mod adegwat mingħajr ma tingħata l-eżenzjoni. Skont dak ir-Regolament, it-titjiriet jistgħu jsiru bħala “titjiriet VFR speċjali” kif previst fil-punt SERA.5010 (VFR speċjali f’żoni ta’ kontroll) bl-approvazzjoni mill-kontroll tat-traffiku tal-ajru biex joperaw f’żona ta’ kontroll f’kundizzjonijiet meteoroloġiċi inferjuri mill-kundizzjonijiet meteoroloġiċi viżwali. Alternattivament, kull fejn ikun hemm il-ħtieġa li fi spazju tal-ajru partikolari jiġu akkomodati operazzjonijiet ta’ klassi kompatibbli ma’ klassi inqas restrittiva, jistgħu jiġu kkunsidrati soluzzjonijiet bħal pereżempju: ir-riklassifikazzjoni tal-ispazju tal-ajru kkonċernat, jew id-disinn mill-ġdid tal-volum tal-ispazju tal-ajru kkonċernat billi jiġu ddefiniti restrizzjonijiet jew riżervi tal-ispazju tal-ajru, jew sottovolumi ta’ klassijiet inqas restrittivi tal-ispazju tal-ajru (eż. kurituri), kif previst fil-punt SERA.6001(a).

(10)

Fl-aħħar nett, l-eżenzjoni ma tissodisfax ir-rekwiżiti għas-sikurezza u mhijiex konformi mar-rekwiżiti essenzjali tar-Regolament (UE) 2018/1139. F’dan ir-rigward, il-Kummissjoni tirreferi għad-Deċiżjoni preċedenti tagħha (il-premessi 11-13) li tikkonċerna eżenzjoni mill-punt SERA.5005(a) tal-Anness tar-Regolament ta’ Implimentazzjoni (UE) Nru 923/2012 (4).

(11)

Minħabba f’hekk, l-implimentazzjoni tal-eżenzjoni nnotifikata fis-17 ta’ April 2019 taffettwa ħażin il-livell ta’ sikurezza, u l-eżenzjoni ma tikkonformax mal-objettivi ġenerali tas-sikurezza tar-Regolament (UE) 2018/1139.

(12)

Il-Kummissjoni tinnota wkoll li, skont id-Deċiżjoni preċedenti tal-Kummissjoni li tikkonċerna eżenzjoni mill-punt SERA.5005(a) tal-Anness tar-Regolament ta’ Implimentazzjoni (UE) Nru 923/2012 (5), ir-Renju Unit kellu jirrevoka l-eżenzjoni, u mhux jestendi ż-żmien għall-applikazzjoni tagħha kif għamel.

(13)

Fid-29 ta’ Marzu 2017, ir-Renju Unit ippreżenta n-notifika tal-intenzjoni tiegħu li joħroġ mill-Unjoni skont l-Artikolu 50 tat-Trattat dwar l-Unjoni Ewropea (TUE). F’konformità mal-Artikolu 50(3) tat-TUE, it-Trattati għandhom jieqfu milli japplikaw għall-Istat li ħiereġ mid-data tad-dħul fis-seħħ tal-ftehim dwar il-ħruġ jew, fin-nuqqas ta’ dan, sentejn wara n-notifika, sakemm il-Kunsill Ewropew, bi qbil mal-Istat Membru kkonċernat, ma jiddeċidix unanimament li jestendi dan il-perjodu. Il-perjodu ġie estiż tliet darbiet, l-aħħar darba bid-Deċiżjoni tal-Kunsill Ewropew (UE) 2019/1810 (6), li estendietu sa mhux iktar tard mill-31 ta’ Jannar 2020.

(14)

Fil-11 ta’ Jannar 2019, permezz tad-Deċiżjoni (UE) 2019/274 (7) , il-Kunsill awtorizza l-iffirmar tal-ftehim dwar il-ħruġ miftiehem fil-livell tan-negozjaturi fl-14 ta’ Novembru 2018. L-Unjoni kkonfermat li lesta li tipproċedi malajr bl-iffirmar u bil-konklużjoni tiegħu fil-każ li l-Parlament tar-Renju Unit japprova l-ftehim dwar il-ħruġ. Ir-Raba’ Parti tal-ftehim dwar il-ħruġ (8) tipprevedi perjodu ta’ tranżizzjoni li jibda mid-data tad-dħul fis-seħħ tal-ftehim, li matulu d-dritt tal-Unjoni jkompli japplika għar-Renju Unit u fih kif stabbilit fil-ftehim.

(15)

Fi kwalunkwe każ, din id-Deċiżjoni tapplika biss sakemm id-dritt tal-Unjoni japplika għar-Renju Unit u fih,