This document is an excerpt from the EUR-Lex website
Document 32018R1670
Regulation (EU) 2018/1670 of the European Parliament and of the Council of 23 October 2018 amending Regulation (EC) No 110/2008 as regards nominal quantities for the placing on the Union market of single distilled shochu produced by pot still and bottled in Japan
Regolament (UE) 2018/1670 tal-Parlament Ewropew u tal-Kunsill tat-23 ta’ Ottubru 2018 li jemenda r-Regolament (KE) Nru 110/2008 fir-rigward ta’ kwantitajiet nominali għat-tqegħid fis-suq tal-Unjoni ta’ “shochu”, spirtu ddistillat darba biss, li jsir b’lampik tat-tip “pot still” u bbottiljat fil-Ġappun
Regolament (UE) 2018/1670 tal-Parlament Ewropew u tal-Kunsill tat-23 ta’ Ottubru 2018 li jemenda r-Regolament (KE) Nru 110/2008 fir-rigward ta’ kwantitajiet nominali għat-tqegħid fis-suq tal-Unjoni ta’ “shochu”, spirtu ddistillat darba biss, li jsir b’lampik tat-tip “pot still” u bbottiljat fil-Ġappun
PE/56/2018/REV/1
ĠU L 284, 12.11.2018, p. 1–2
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 24/05/2021; Impliċitament imħassar minn 32019R0787
Relation | Act | Comment | Subdivision concerned | From | To |
---|---|---|---|---|---|
Modifies | 32008R0110 | Żieda | artikolu 24a |
Relation | Act | Comment | Subdivision concerned | From | To |
---|---|---|---|---|---|
Implicitly repealed by | 32019R0787 | 25/05/2021 |
12.11.2018 |
MT |
Il-Ġurnal Uffiċjali tal-Unjoni Ewropea |
L 284/1 |
REGOLAMENT (UE) 2018/1670 TAL-PARLAMENT EWROPEW U TAL-KUNSILL
tat-23 ta’ Ottubru 2018
li jemenda r-Regolament (KE) Nru 110/2008 fir-rigward ta’ kwantitajiet nominali għat-tqegħid fis-suq tal-Unjoni ta’ “shochu”, spirtu ddistillat darba biss, li jsir b’lampik tat-tip “pot still” u bbottiljat fil-Ġappun
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 114(1) tiegħu,
Wara li kkunsidraw il-proposta mill-Kummissjoni Ewropea,
Wara li l-abbozz tal-att leġiżlattiv intbagħat lill-parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew (1),
Filwaqt li jaġixxu skont il-proċedura leġiżlattiva ordinarja (2),
Billi:
(1) |
Fid-29 ta’ Novembru 2012, il-Kunsill adotta Deċiżjoni li awtorizzat lill-Kummissjoni tibda negozjati mal-Ġappun għal Ftehim ta’ Kummerċ Ħieles. |
(2) |
In-negozjati dwar Ftehim bejn l-Unjoni Ewropea u l-Ġappun għal Sħubija Ekonomika (“il-Ftehim”) kienu tlestew b’suċċess u l-Ftehim ġie ffirmat fis-17 ta’ Lulju 2018. |
(3) |
L-Anness 2-D tal-Ftehim jipprevedi li l-ispirtu ddistillat darba biss imsejjaħ “shochu”, kif iddefinit fis-subparagrafu 10 tal-Artikolu 3 tal-Liġi Ġappuniża dwar it-Taxxa fuq l-Alkoħol (il-Liġi Nru 6 tal-1953), li jsir b’lampik tat-tip “pot still” u jiġi bbottiljat fil-Ġappun, għandu jitħalla jitqiegħed fis-suq tal-Unjoni fi fliexken tradizzjonali ta’ erba’ “go” (
) u ta’ “sho” wieħed ( ), li jikkorrispondu għal kwantitajiet nominali ta’ 720 ml u ta’ 1 800 ml, rispettivament, dejjem jekk jiġu ssodisfati rekwiżiti legali applikabbli oħrajn tal-Unjoni. |
(4) |
Id-Direttiva 2007/45/KE tal-Parlament Ewropew u tal-Kunsill (3) tipprevedi li l-prodotti mballati minn qabel jistgħu jitqiegħdu fis-suq tal-Unjoni biss jekk ikunu mballati minn qabel fil-kwantitajiet nominali elenkati fit-taqsima 1 tal-Anness ta’ dik id-Direttiva. Għall-ispirti, it-taqsima 1 tal-Anness tad-Direttiva 2007/45/KE tirriferi għal disa’ kwantitajiet nominali fil-medda bejn 100 ml u 2 000 ml. Dawk il-kwantitajiet nominali ma jinkludux il-kwantitajiet ta’ 720 ml u 1 800 ml, li huma l-kwantitajiet nominali li fihom jiġi bbottiljat u kkummerċjalizzat fil-Ġappun l-ispirtu ddistillat darba biss imsejjaħ “shochu”, li jsir b’lampik tat-tip “pot still”. |
(5) |
Għalhekk hemm bżonn ta’ deroga mill-kwantitajiet nominali stabbiliti għall-ispirti fl-Anness tad-Direttiva 2007/45/KE sabiex ikun żgurat li l-ispirtu ddistillat darba biss imsejjaħ “shochu”, li jsir b’lampik tat-tip “pot still” u jiġi bbottiljat fil-Ġappun ikun jista’ jitqiegħed fis-suq tal-Unjoni, kif stabbilit fl-Anness 2-D tal-Ftehim, fi fliexken li jkunu jesgħu 720 ml u 1 800 ml, li jikkorrispondu għall-fliexken Ġappuniżi tradizzjonali tad-daqsijiet ta’ erba’ “go” (
) u ta’ “sho” wieħed ( ), rispettivament. |
(6) |
Jenħtieġ li d-deroga mid-Direttiva 2007/45/KE tiġi introdotta permezz ta’ emenda fir-Regolament (KE) Nru 110/2008 tal-Parlament Ewropew u tal-Kunsill (4), sabiex ikun żgurat li l-ispirtu ddistillat darba biss imsejjaħ “shochu”, li jsir b’lampik tat-tip “pot still” u jiġi bbottiljat fil-Ġappun ikun jista’ jitqiegħed fis-suq tal-Istati Membri kollha fl-istess ħin malli jidħol fis-seħħ il-Ftehim. |
(7) |
Għalhekk jenħtieġ li r-Regolament (KE) Nru 110/2008 jiġi emendat kif meħtieġ. |
(8) |
Sabiex tkun żgurata l-implimentazzjoni tal-Ftehim fir-rigward tat-tqegħid fis-suq tal-Unjoni tal-ispirtu ddistillat darba biss imsejjaħ “shochu”, li jsir b’lampik tat-tip “pot still” u jiġi bbottiljat fil-Ġappun, jenħtieġ li dan ir-Regolament jibda japplika mid-data tad-dħul fis-seħħ tal-Ftehim, |
ADOTTAW DAN IR-REGOLAMENT:
Artikolu 1
L-Artikolu li ġej jiddaħħal fil-Kapitolu IV tar-Regolament (KE) Nru 110/2008:
“Artikolu 24a
Deroga mir-rekwiżiti ta’ kwantitajiet nominali fid-Direttiva 2007/45/KE
B’deroga mill-Artikolu 3 tad-Direttiva 2007/45/KE tal-Parlament Ewropew u tal-Kunsill (*1), u mis-sitt ringiela tat-taqsima 1 tal-Anness ta’ dik id-Direttiva, l-ispirtu ddistillat darba biss imsejjaħ “shochu” (*2), li jsir b’lampik tat-tip “pot still” u jiġi bbottiljat fil-Ġappun, jista’ jitqiegħed fis-suq tal-Unjoni fi kwantitajiet nominali ta’ 720 ml u ta’ 1 800 ml.
Artikolu 2
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu jibda japplika mid-data tad-dħul fis-seħħ tal-Ftehim.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Strasburgu, it-23 ta’ Ottubru 2018.
Għall-Parlament Ewropew
Il-President
A. TAJANI
Għall-Kunsill
Il-President
K. EDTSTADLER
(1) ĠU C 367, 10.10.2018, p. 119.
(2) Il-Pożizzjoni tal-Parlament Ewropew tat-12 ta’ Settembru 2018 għadha mhijiex ippubblikata fil-Ġurnal Uffiċjali) u d-Deċiżjoni tal-Kunsill tad-9 ta’ Ottubru 2018.
(3) Id-Direttiva 2007/45/KE tal-Parlament Ewropew u tal-Kunsill tal-5 ta’ Settembru 2007 li tistabbilixxi regoli dwar kwantitajiet nominali għal prodotti mballati minn qabel, li tħassar id-Direttivi tal-Kunsill 75/106/KEE u 80/232/KEE, u li temenda d-Direttiva tal-Kunsill 76/211/KEE (ĠU L 247, 21.9.2007, p. 17).
(4) Ir-Regolament (KE) Nru 110/2008 tal-Parlament Ewropew u tal-Kunsill tal-15 ta’ Jannar 2008 dwar id-definizzjoni, id-deskrizzjoni, il-preżentazzjoni, l-ittikkettar, u l-protezzjoni ta’ indikazzjonijiet ġeografiċi, ta’ xorb spirituż u li jħassar ir-Regolament tal-Kunsill (KEE) Nru 1576/89 (ĠU L 39, 13.2.2008, p. 16).