Artikolu Uniku

Id-dokument uniku u r-referenza għall-pubblikazzjoni tal-ispeċifikazzjoni tal-prodott li hemm referenza għalihom fl-Artikolu 50(2)(a) tar-Regolament (UE) Nru 1151/2012 għall-isem “The Vale of Clwyd Denbigh Plum” (DOP) jinsabu fl-Anness ta’ din id-Deċiżjoni.

Skont l-Artikolu 51 tar-Regolament (UE) Nru 1151/2012, il-pubblikazzjoni ta’ din id-Deċiżjoni għandha tagħti d-dritt li wieħed jopponi għar-reġistrazzjoni tal-isem li hemm referenza għalih fl-ewwel paragrafu ta’ dan l-Artikolu fi żmien tliet xhur mid-data tal-pubblikazzjoni ta’ din id-Deċiżjoni f’Il-Ġurnal Uffiċjali tal-Unjoni Ewropea.

ANNESS

DOKUMENT UNIKU

“THE VALE OF CLWYD DENBIGH PLUM”

Nru tal-UE: PDO-GB-02287 – 8.2.2017

DOP ( X ) IĠP ( )

1.   Isem

“The Vale of Clwyd Denbigh Plum”

2.   Stat Membru jew Pajjiż Terz

Ir-Renju Unit

3.   Deskrizzjoni tal-prodott agrikolu jew tal-oġġett tal-ikel

3.1.   Tip ta' prodott

Klassi 1.6 Frott, ħaxix u ċereali, friski jew ipproċessati

3.2.   Deskrizzjoni tal-prodott li għalih japplika l-isem f'(1)

“The Vale of Clwyd Denbigh Plum”Prunus domestica Linnaeus“Denbigh Plum” huwa l-isem mogħti lill-għanbaqra ta' Denbigh li tikber fiż-żona indikata tal-Wied ta' Clwyd f'Denbighshire fit-Tramuntana ta' Wales fejn toriġina l-għanbaqra. L-għanbaqra ta' Denbigh hija l-unika varjetà ta' għanbaqra nattiva f'Wales.

“The Vale of Clwyd Denbigh Plum” għandha l-karatteristiċi li ġejjin, li jiddependu minn jekk l-għanbaqra tkunx meħtieġa għal finijiet kulinari u tinħasad f'nofs Awwissu qabel tkun misjura, jew tkunx meħtieġa bħala għanbaqra għal mal-ħelu meta l-għanbaqra titħalla ssir fuq is-siġra u tinħasad tard f'Awwissu jew fil-bidu ta' Settembru.

Kulinari

—	L-għanbaqra soda meta tmissha

—	Lewn oranġjo ħamrani bi rqajja' sofor meta l-għanbaqra tibda ssir.

—	In-nwar tax-xema' jibda jidher

—	Il-laħam huwa sod u ta' lewn safrani bi sfumatura ħadranija ambra

—	Il-laħam imqabbad mal-għadma

—	Daqs ta' bejn 45 mm u 65 mm mit-tarf taz-zokk sat-tarf l-ieħor

—	Dijametru ta' bejn 40 mm u 55 mm minn naħa għall-oħra

Ħelu

—	L-għanbaqra li tibda tirtab meta tingħafas ġentilment

—	Daqs ta' bejn 45 mm u 65 mm mit-tarf taz-zokk sat-tarf l-ieħor

—	Dijametru ta' bejn 40 mm u 55 mm minn naħa għall-oħra

—	Forma sferika jew ħarira ellittika.

—	Lewn aħmar rikk li jisfuma fil-vjola, bi tbajja' dehbiena mifruxa. B'mod naturali, il-frotta ssir aktar skura meta tibda ssir.

—	Għanbaqar miksijin bi nwar tax-xama' (nwar bajdani viżibbli) li jiżviluppa aktar ma jdumu fuq is-siġra.

—	Laħam artab u mmerraq b'mod naturali ta' lewn safrani bi sfumatura ħadranija ambra

—	Laħam iżomm mal-għadma parzjalment biss.

—	L-għadd medju ta' frott għal kull kg 9-15 (medja ta' 12)

—	Test Brix (kejl tal-ħlewwa) 16-19.

Fil-każ tal-għanbaqar għal mal-ħelu, il-qoxra ratba u delikata u m'għandux ikollha daqqiet. Dan jeħtieġ li l-frotta matura tiġi trattata b'attenzjoni kbira.

L-għanbaqar għal mal-ħelu għandhom staġun ta' tkabbir twil li jagħti lill-għanbaqra aktar żmien biex tiżviluppa b'mod sħiħ il-profondità tat-togħma tagħha li hija subaċiduża u ħelwa. Hija din il-profondità tat-togħma u l-ħlewwa li tagħmel l-għanbaqra “The Vale of Clwyd Denbigh Plum” waħda distintiva.

Meta tissajjar, il-profondità tat-togħma tintensifika u l-ħlewwa naturali tal-għanbaqra tiżdied. Il-konsistenza tal-frotta ddub fil-ħalq jekk tittiekel meta sħuna.

Ħafna mill-għanbaqar “The Vale of Clwyd Denbigh Plum” jinbiegħ bħala għanbaqar frisk għal mal-ħelu fis-swieq lokali.

3.3.   Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

“The Vale of Clwyd Denbigh Plum” trid titkabbar fiż-żona ddefinita indikata mis-siġar miksuba minn tilqim jew rimi minn mixtliet ta' siġar kummerċjali minn kampjuni magħrufa jew minn siġar individwali li jkunu jinsabu fiż-żona ddefinita. “The Vale of Clwyd Denbigh Plum” MA TRIDX tkun derivata minn siġar imkabbra miż-żerriegħa. Minħabba li d-dakkir ma jistax jiġi kkontrollat, is-siġar imkabbra miż-żerriegħa fihom varjazzjoni ġenetika u għalhekk ma jistax jiġi ggarantit li jikbru skont it-“tip”.

3.4.   Passi speċifiċi tal-produzzjoni li jridu jsiru fiż-żona ġeografika ddefinita

Tkabbir

Żbir (jekk meħtieġ)

Ġestjoni tal-organiżmi ta' ħsara u ta' mard/tidmil u sprejjar

Ħsad

Ħżin (jekk meħtieġ)

3.5.   Regoli speċifiċi dwar it-tfettit, it-taħkik, l-ippakkjar, eċċ. tal-prodott li għalih jirreferi l-isem reġistrat

—

3.6.   Regoli speċifiċi dwar it-tikkettar tal-prodott li għalih jirreferi l-isem reġistrat

—

4.   Definizzjoni konċiża taż-żona ġeografika

L-Għanbaqra “The Vale of Clwyd Denbigh Plum” tikber fiż-żona ġeografika ddefinita tal-Wied ta' Clwyd f'Denbighshire fit-Tramuntana ta' Wales li tkopri ż-żoni li ġejjin;-

—	Aberwheeler,

—

Bodfari,

—	Cefn Meiriadog,

—	Clocaenog,

—	Cyffylliog,

—

Denbigh,

—	Efenechtyd,

—

Henllan,

—	Llanbedr Dyffryn Clwyd,

—	Llandyrnog,

—	Llanelidan,

—	Llanfair Dyffryn Clwyd,

—	Llangynhafal,

—	Llanrhaeadr yng Nghinmeirch,

—

Llanynys,

—

Nantglyn,

—

Rhuddlan

—

Ruthin,

—

St Asaph,

—

Trefnant,

—	Tremeirchion Cwm

—

Waen.

U ż-żona ta' Llansannan

5.   Rabta maż-żona ġeografika

L-għanbaqra ta' Denbigh toriġina fil-Wied ta' Clwyd u hija l-unika varjetà ta' għanbaqra nattiva f'Wales. L-ambjent speċifiku u l-karatteristiċi ġeografiċi fil-Wied ta' Clwyd jipprovdu l-kundizzjonijiet perfetti biex jitkabbru dawn l-għanbaqar nattivi, u jikkontribwixxu għall-karatteristiċi speċifiċi tal-frotta.

Il-Wied ta' Clwyd huwa reġjun ta' wied ta' xmara fit-Tramuntana ta' Wales, fil-biċċa l-kbira protett mill-għoljiet tal-madwar li jinkludu l-medda ta' Clwydian fuq in-naħa tal-Lvant li hija preżenti fid-direzzjoni trażversali mix-Xlokk għall-Majjistral u huwa espost biss għar-riħ tat-Tramuntana fejn jiftaħ 'il barra lejn il-kosta. L-għoljiet jipprovdu kenn mill-irwiefen prevalenti tal-Punent u spiss kesħin tal-Lvant. Dan l-ambjent relattivament kenni hu essenzjali għall-produzzjoni tal-għanbaqra għax jgħin sabiex titnaqqas il-ħsara kemm tal-inwara kif ukoll tal-għanbaqra li qed tiżviluppa.

Il-Wied ta' Clwyd jirrappreżenta l-aktar żona estensiva ta' art ta' Grad 1 u Grad 2 f'Wales skont il-Klassifikazzjoni tal-Art Agrikola (ALC - Agricultural Land Classification). L-ALC tqis il-karatteristiċi bħall-klima, is-sit u l-ħamrija. Bħala art ta' Grad 1 u 2, l-art agrikola tal-Wied ta' Clwyd hija ddefinita jew bħala “ta' kwalità eċċellenti” jew inkella “tajba ħafna”. L-art kapaċi tipproduċi b'mod konsistenti rendimenti għoljin ta' Għanbaqar tal-Wied Clwyd Denbigh.

L-art fil-Wied ta' Clwyd hija waħda mill-aktar ħamrija fertili naturali fir-Renju Unit u tipprovdi n-nutrijenti kollha li s-siġar u l-għanbaqar jeħtieġu. Il-ħamrija preżenti fil-Wied kapaċi żżomm in-nutrijenti bħall-potassju, il-manjeżju u l-kalċju li huma l-esigenzi nutrittivi ewlenin għal dawn l-għanbaqar.

Il-ħamrija fonda b'konsistenza medja li tiskula b'mod liberu (li hija preżenti b'mod naturali fil-Wied ta' Clwyd) tħeġġeġ l-iżvilupp ta' arkitettura ta' għeruq b'saħħithom, li hija vitali għas-siġar tal-għanbaqar u għall-produzzjoni ta' kwalità tal-Għanbaqar tal-Wied Clwyd Denbigh.

Il-ġeoloġija tal-ġebla tal-franka ta' taħt il-ħamrija ħamra ġdida, il-ġebla tal-ħamrija Trijassika, fiż-żona tipproduċi ħamrija rikka fil-ġir b'pH għoli. Il-biċċa l-kbira tal-frott bħall-frawli u l-lampun imorru aħjar fuq ħamrija kemxejn aċiduża, madankollu, dawn l-għanbaqar jikbru l-aħjar fuq il-ħamrija derivata mill-ġebla tal-franka b'pH għoli li hija prevalenti fiż-żona.

L-Għanbaqra “The Vale of Clwyd Denbigh Plum” tiffjorixxi f'April u hija suxxettibbli ħafna għal ġlatiet ta' radjazzjoni tar-rebbiegħa li jista' jkollhom effett ta' ħsara fuq in-nwara. L-influwenza tal-fluss tal-golf fil-qrib tipprovdi mikroklima għall-Wied ta' Clwyd li tipprovdi influwenza ta' moderazzjoni u tnaqqas ir-riskji mill-ġlatiet. Barra minn hekk, it-temperaturi friski moderati mill-fluss tal-golf jestendu l-perjodu tal-fjoritura li jippermetti dakkir aqwa, u kif ukoll jippermettu li l-għanbaqra timmatura bil-mod matul perjodu mtawwal li jipprovdi aktar żmien biex it-togħma tagħha tiżviluppa u tintensifika b'mod sħiħ.

Storikament, dan ir-reġjun, bil-ħamrija fertili tiegħu, kellu tradizzjoni u reputazzjoni għall-produzzjoni ta' għadd ta' frott artab inkluż l-għanbaqar li kollha kemm huma kienu jintwerew fil-wirjiet ortikulturali tal-Wied Clwyd, avvenimenti annwali famużi li ilhom isiru mill-1850. Sa tmiem l-1890, Denbighshire (li hija l-kontea prinċipali fil-Wied ta' Clwyd) kienet l-akbar żona ta' kultivazzjoni tal-frott artab f'Wales. L-istorja tal-produzzjoni tal-għanbaqra mmarkat iż-żona lokali, b'toroq u djar f'Denbigh imsemmijin wara “The Vale of Clwyd Denbigh Plum”. Proprjetà lokali li ilha għand l-istess familja għal aktar minn mitt sena għandha masġar li għadu jipproduċi l-għanbaqar “The Vale of Clwyd Denbigh Plum” għas-suq kummerċjali.

L-għarfien u l-ħila meħtieġa għat-tkabbir tal-għanbaqar “The Vale of Clwyd Denbigh Plum” fiż-żona indikata żviluppaw maż-żmien. Ħiliet umani speċifiċi assoċjati mat-tkabbir ta' din il-frotta li għaddew minn ġenerazzjoni għal oħra, fosthom: it-tħawwil u l-istabbiliment tas-siġar tal-għanbaqar, iż-żbir u l-ġestjoni tas-siġar, meta jsir il-ħsad, u t-trattament tal-frotta.

Il-qoxra tal-għanbaqar “The Vale of Clwyd Denbigh Plum” hija ratba ħafna u delikata meta mqabbla ma' għanbaqar prodott kummerċjalment; dan jeħtieġ li l-frotta tiġi ttrattata b'attenzjoni kbira biex tiġi evitata ħsara u tħassir. Il-persuni li jiġbru l-frott huma mħarrġa biex jimmaniġġaw il-frotta mill-inqas possibbli u biex jiġbru l-frott b'idejhom miz-zokk tagħhom. B'hekk, spiss l-għanbaqar miġbura friski ikollhom inwar bajdani (li jipproteġi lill-frotta) viżibbli fuq il-frotta.

Il-Wied ta' Clwyd jibbenifika mill-mikroklima tiegħu stess li hija affettwata mill-influwenza tal-moderazzjoni tal-Fluss tal-Golf u tiffavorixxi t-tkabbir ta' dawn l-għanbaqar. L-għanbaqar huma fost l-aktar frott li jipproduċi kmieni u sit ħieles mill-ġlata huwa essenzjali biex jinkiseb ħsad regolari minħabba li l-ġlata tippreżenta theddida serja lis-siġar li jkunu biż-żahar.

L-Għanbaqra ta' Denbigh, għall-kuntrarju tal-biċċa l-kbira ta' għanbaqar ieħor, għandha reżistenza naturali għal mard fungali li jippermettilha li tibqa' konsiderevolment ħielsa mill-mard minkejja l-klima sħuna/umduża. Il-klima tal-Wied hija wkoll iktar friska meta mqabbla ma' żoni oħrajn ta' tkabbir tal-għanbaqar. Dan jipprovdi lill-għanbaqar “The Vale of Clwyd Denbigh Plum” bi staġun ta' tkabbir twil li jagħti lill-għanbaqra aktar żmien biex tiżviluppa b'mod sħiħ fit-togħma tagħha. Bis-saħħa ta' din il-qawwa tat-togħma u l-ħlewwa li l-għanbaqar “The Vale of Clwyd Denbigh Plum” huwa daqshekk distintiv.

Il-prossimità tal-baħar u tax-xmara Clwyd li tgħaddi tul il-wied mhux biss timmodera t-temperaturi estremi iżda tipprovdi wkoll sors ta' irrigazzjoni naturali li flimkien mal-wiċċ tas-sukkursu naturali għoli fil-Wied ta' Clwyd, jissodisfa r-rekwiżiti ta' umdità kbira tas-siġar tal-għanbaqar ta' għeruq fondi, u dan jipprevjeni l-bżonn għal irrigazzjoni artifiċjali.

L-għanbaqar “The Vale of Clwyd Denbigh Plum” irnexxielhom mhux biss jissopravvivu iżda wkoll jikbru fil-kundizzjonijiet naturali li jinsabu f'din iż-żona b'intervent uman minimu. Din il-mikroklima ta' żona kennija, ċatta, fertili u rikka fil-ġir, b'sistema ta' irrigazzjoni naturali b'temperaturi medji u bi probabbiltà ta' ġranet ħielsa mill-ġlata matul il-perjodu li jipproduċi l-għanbaqar, tipprovdi l-kundizzjonijiet ideali għat-tkabbir tal-għanbaqar “The Vale of Clwyd Denbigh Plum” u tikkontribwixxi għall-karatteristiċi speċifiċi u uniċi tagħhom.

Sa ftit ilu, il-produzzjoni tal-għanbaqar “The Vale of Clwyd Denbigh Plum” kienet intilfet fil-biċċa l-kbira tagħha. Madanakollu, tul dawn l-aħħar snin esperjenzat qawmien mill-ġdid, li laqqgħet flimkien komunitajiet fiż-żona iddefinita, u rriżultat fil-Festa annwali tal-għanbaqar “The Vale of Clwyd Denbigh Plum” li jattendu għaliha “l fuq minn 2 000 viżitatur. F'dan il-festival jintwera l-frott frisk, u firxa ta' prodotti li jista” jintuża fihom.

Il-Kok ċelebri famuż minn Wales, Bryan Williams, sar il-patrun tal-għanbaqar “The Vale of Clwyd Denbigh Plum” u jissemmew fil-ktieb tar-riċetti tiegħu, “the Love of Veg.”“The Vale of Clwyd Denbigh Plum” hija magħrufa madwar Wales kollu u madwar il-bqija tar-Renju Unit għall-eċċellenza tagħha, u hija attivament imfittxija minn stabbilimenti tal-ikel lokali, u kienet ukoll nominata mis-Slow Food Movement (mill-Moviment tal-Ikel Bil-Mod) għall-premju ta' Ark of Taste.

Referenza għall-pubblikazzjoni tal-ispeċifikazzjoni

(it-tieni subparagrafu tal-Artikolu 6(1) ta' dan ir-Regolament)

https://www.gov.uk/government/uploads/system/uploads/attachment_data/file/676695/pfn-vale-clwyd-denbigh-plum.pdf