29.3.2017   

MT

Il-Ġurnal Uffiċjali tal-Unjoni Ewropea

L 83/116

(1)

Bl-ittra tat-13 ta' Novembru 2015 (“id-Deċiżjoni tal-Ftuħ”), il-Kummissjoni għarrfet lill-awtoritajiet Franċiżi bid-deċiżjoni tagħha li tibda l-proċedura prevista fl-Artikolu 108(2) tat-Trattat dwar il-Funzjonament tal-Unjoni Ewropea fir-rigward ta' din il-miżura.

(2)

L-awtoritajiet Franċiżi bagħtu l-kummenti tagħhom dwar din l-ittra permezz tal-ittra tagħhom tas-17 ta' Diċembru 2015.

(3)

Id-deċiżjoni tal-Kummissjoni li tiftaħ il-proċedura ġiet ippubblikata f'Il-Ġurnal Uffiċjali tal-Unjoni Ewropea fit-2 ta' Frar 2016 (2). Il-Kummissjoni stiednet lill-partijiet interessati biex jippreżentaw l-osservazzjonijiet tagħhom rigward il-miżura kkonċernata.

(4)

Il-Kummissjoni rċeviet kummenti mingħand il-partijiet interessati u bagħtithom lill-awtoritajiet Franċiżi filwaqt li tathom il-possibbiltà li jikkummentaw dwarhom. Il-kummenti tal-awtoritajiet Franċiżi ntbagħtu permezz tal-ittra tal-24 ta' Mejju 2016.

(5)

Fit-2 ta' Mejju 2016 il-Kummissjoni bagħtet lista ta' mistoqsijiet lill-awtoritajiet Franċiżi li min-naħa tagħhom wieġbuhom permezz tal-ittri tal-21 ta' Ġunju u tal-15 ta' Lulju 2016. Fis-27 ta' Lulju l-Kummissjoni bagħtet lista ta' mistoqsijiet oħra lill-awtoritajiet Franċiżi, li wieġbuhom fid-9 ta' Settembru 2016.

(6)

Il-mekkaniżmu huwa deskritt fid-dettall fid-Deċiżjoni tal-Ftuħ. It-taqsimiet li ġejjin jiġbru fil-qosor din il-kwistjoni.

(7)

Il-liġi Nru 2010-1488 tas-7 ta' Diċembru 2010 dwar l-Organizzazzjoni l-Ġdida tas-Swieq tal-Elettriku (il-liġi “NOME”), introduċiet obbligu fuq il-fornituri tal-elettriku, l-operaturi tan-netwerks għat-telf u l-konsumaturi għall-konsumi barra l-kuntratt ta' provvista (“il-fornituri”) li jikkontribwixxu għas-sigurtà tal-provvista tal-elettriku fi Franza skont il-konsum ta' enerġija tal-klijenti tagħhom jew tagħhom stess. Sabiex jissodisfaw dan l-obbligu, kull sena kull fornitur irid jiġġustifika ċertu volum ta' garanziji ta' kapaċità marbuta mal-konsum tal-klijenti tiegħu jew mal-konsum tiegħu stess matul il-perjodu ta' domanda massima.

(8)

Il-garanziji ta' kapaċità jinkisbu mill-fornituri jew direttament b'mezzi proprji (faċilitajiet ta' produzzjoni jew kapaċitajiet ta' ġestjoni tad-domanda), jew għandhom jinxtraw f'suq deċentralizzat mingħand dawk li jistokkjawhom (jiġifieri l-operaturi tal-kapaċità, fornituri oħra, operaturi tas-suq, konsumaturi li jfornu lilhom infushom, eċċ.).

(9)

L-operaturi tal-kapaċità ta' produzzjoni jew ta' ġestjoni tad-domanda (“l-operaturi tal-kapaċità” jew “l-operaturi”), min-naħa tagħhom għandhom l-obbligu li jiksbu ċertifikat għall-kapaċità tagħhom mingħand l-operatur tas-sistema pubblika ta' trażmissjoni tal-elettriku (“RTE”). L-operaturi ser jingħataw garanziji ta' kapaċità mingħand RTE skont il-kontribut stmat tal-faċilitajiet tagħhom għat-tnaqqis tar-riskju ta' qtugħ fil-perjodi ta' domanda massima ta' konsum.

(10)

Il-garanziji tal-kapaċità jistgħu jiġu skambjati u trasferiti. Ix-xiri ta' garanziji ta' kapaċità minn fornituri tal-elettriku mingħand l-operaturi tal-kapaċità biex jiġu ssodisfati l-obbligi legali tagħhom se jiġi organizzat permezz ta' suq deċentralizzat tal-garanziji ta' kapaċità. Il-Figura 1 turi kif jiffunzjona ġeneralment il-mekkaniżmu.

Figura 1

Il-funzjonament ġenerali tal-mekkaniżmu

Sors: Ittra tal-awtoritajiet Franċiżi tat-2 ta' Frar 2015

(11)

Il-kalkolu tal-enerġija ta' referenza ta' fornitur, jiġifieri l-obbligu ta' kapaċità tiegħu, huwa bbażat fuq il-prinċipji li ġejjin:

(12)

L-operatur tas-sistema ta' trażmissjoni jiddefinixxi kull sena l-ġranet ta' PD1 li jiddeterminaw l-obbligu tal-kapaċità tal-fornituri tat-territorju metropolitan nazzjonali, billi jibbaża fuq l-istimi tal-konsum nazzjonali ta' dak il-jum għall-għada (f'J-1). In-numru ta' jiem ta' PD1 irid ikun bejn 10 u 15 għal kull sena ta' konsenja u s-sigħat magħżula għall-kalkolu tal-obbligu ta' kapaċità huma l-meded ta' sigħat (07h00- 5h00 u 18h00-20h00) tal-ġranet ta' PD1 magħżula. Għalhekk in-numru ta' sigħat ta' domanda massima tal-PD1 huwa bejn 100 u 150 siegħa fis-sena. Il-ġranet PD1 jiġu nnotifikati lill-fornituri f'J-1 qabel l-għaxra u nofs ta' filgħodu (10h30).

(13)

L-obbligu mhuwiex iddeterminat b'mod standard minn qabel, iżda abbażi ta' dejta mkejla, biex kull konsumatur jirċievi l-kontribut reali tiegħu għar-riskju ta' qtugħ. Biex il-kontribut ta' konsumatur jiġi tradott għar-riskju ta' qtugħ minħabba t-termosensittività tiegħu, il-konsum tiegħu rreġistrat matul is-sena ta' konsenja jiġi adattat sabiex jissimula mewġa ta' kesħa li l-intensità tagħha tikkorrispondi għar-riskju li tipprova tkopri s-sistema (mewġa ta' kesħa fuq għaxar snin) u b'hekk jissodisfa l-kriterju ta' sigurtà tal-provvista stipulat mill-awtoritajiet Franċiżi. Il-kriterju ta' sigurtà tal-provvista ġie stabbilit bid-Digriet Nru 2006-1170 tal-20 ta' Settembru 2006 u jikkorrispondi għal aspettattiva ta' medja ta' qtugħ ta' tliet (3) sigħat fis-sena.

(14)

Il-parametri li ser jiddeterminaw il-ħtieġa attwali ta' garanziji ta' kapaċità fis-sena ta' konsenja ser ikunu ppubblikati erba' (4) snin qabel is-sena ta' konsenja u jibqgħu stabbli għal sena finanzjarja sħiħa, biex ikun jista' jsir kummerċ f'qafas regolatorju fiss u biex jiġi żgurat li l-valur tal-prodott ma jinbidilx minħabba intervent estern għas-suq. L-obbligu speċifiku ta' kull fornitur imbagħad jiġi kkalkulat wara s-sena ta' konsenja, billi jiġu applikati dawn il-parametri.

(15)

Il-ġestjoni tad-domanda tista' tiġi kkunsidrata skont żewġ metodi differenti: jew billi jitnaqqas l-ammont tal-obbligu tal-kapaċità ta' fornitur bi tnaqqis tal-konsum (“ġestjoni tad-domanda impliċita”), jew permezz ta' ċertifikazzjoni tal-kapaċità ta' ġestjoni tad-domanda (“ġestjoni tad-domanda espliċita”). L-obbligi għaż-żewġ tipi ta' ġestjoni tad-domanda huma differenti: il-“ġestjoni tad-domanda impliċita” trid effettivament titħaddem waqt il-ħinijiet PD1; filwaqt li l-“ġestjoni tad-domanda espliċita” trid tkun kommessa li tkun disponibbli waqt il-ħinijiet PD2.

(16)

Fl-aħħar nett, l-awtoritajiet Franċiżi pprovdew li ċerti garanziji tal-kapaċità jkunu assoċjati mal-prodott ARENH (3) għall-fornituri alternattivi, li, fil-fehma tagħhom, għandu jikkontribwixxi għat-tnaqqis tal-konċentrazzjoni tas-suq tal-garanziji tal-kapaċità.

(17)

L-operatur ta' kwalunkwe faċilità ta' produzzjoni (il-mekkaniżmu huwa teknoloġikament newtrali) konnessa mas-sistema pubblika ta' trażmissjoni jew mas-sistema pubblika ta' distribuzzjoni irid japplika għaċ-ċertifikazzjoni minn RTE. L-operatur ta' kwalunkwe faċilità ta' produzzjoni (il-mekkaniżmu huwa teknoloġikament newtrali) konnessa mas-sistema pubblika ta' trażmissjoni jew mas-sistema pubblika ta' distribuzzjoni irid japplika għaċ-ċertifikazzjoni minn RTE. Kwalunkwe faċilità ta' ġestjoni tad-domanda, tkun xi tkun is-sistema li magħha hija konnessa, tista' tiġi ċċertifikata minn RTE. Għaldaqstant huwa l-operatur tal-kapaċità li l-ewwel jagħmel stima tal-volum ta' kapaċità tiegħu li jista' jkun disponibbli matul il-perjodi ta' domanda massima ta' konsum (imsejħa “PD2”) f'sena ta' konsenja partikolari.

(18)

In-numru ta' jiem ta' PD2 għal sena ta' konsenja huwa bejn 10 u 25. Barra minn hekk, il-jiem PD1 bilfors iridu jkunu jiem ta' PD2. Il-jiem ta' PD2 li mhumiex jiem ta' PD1 jintgħażlu f'ġurnata għall-għada minn RTE abbażi ta' kriterji ta' voltaġġ imposti fuq is-sistema elettrika. Il-firxiet ta' ħinijiet ikkonċernati huma l-istess bħal dawk tal-jiem ta' PD1. In-numru ta' sigħat ta' domanda massima ta' PD2 huwa għalhekk bejn 100 u 250 siegħa fis-sena.

(19)

Il-livell iċċertifikat imbagħad jiġi kkalkulat minn RTE abbażi tad-dejta mibgħuta kif ukoll abbażi tal-metodi ta' kalkolu previsti fil-bażi legali tal-mekkaniżmu. Għaldaqstant, isiru korrezzjonijiet pereżempju sabiex jittieħed inkunsiderazzjoni n-numru possibli ta' ġranet suċċessivi ta' attivazzjoni tal-kapaċitajiet iċċertifikati jew il-kontribuzzjoni effettiva għat-tnaqqis tar-riskju ta' qtugħ ta' kapaċità li s-sors ta' enerġija primarja tagħha huwa soġġett għal perikli meteoroloġiċi.

(20)

Imbagħad, l-operatur jista' jibdel il-previżjonijiet tiegħu ta' disponibbiltà tul il-mekkaniżmu kollu, inkluż matul is-sena ta' konsenja, permezz ta' pjan ta' riekwilibriju. Ir-riekwilibriju jikkorrispondi għal “tiġdid taċ-ċertifikazzjoni” tal-kapaċità u jippermetti lill-operatur jaġġusta l-aspettattivi tiegħu kull meta tiġi rilevata informazzjoni ġdida dwar il-kapaċità tiegħu. Ir-riekwilibriju jista' jinvolvi tnaqqis jew żieda.

(21)

Din is-sistema ta' dikjarazzjoni hija akkumpanjata minn sistema ta' kontroll tal-kapaċità: il-prinċipju huwa li kull kapaċità ċertifikata trid tiġi attivata tal-inqas darba fis-sena. Dan jinvolvi testijiet każwali għal kull kapaċità mingħajr ma l-operatur ikun avżat minn qabel. Kapaċità ma tistax tiġi ttestjata aktar minn tliet darbiet f'perjodu ta' konsenja.

(22)

Ir-regoli dettaljati taċ-ċertifikazzjoni jvarjaw skont it-tip ta' kapaċità kkonċernata:

(23)

Il-persuna responsabbli miż-żona taċ-ċertifikazzjoni (“RPC”) hija l-persuna ġuridika responsabbli finanzjarjament mid-differenzi tal-operaturi tal-kapaċità fiż-żona tiegħu. L-operaturi jistgħu jkunu l-RPC tagħhom stess jew jiffirmaw kuntratt ma' xi RPC. RPC jista' “iżid” il-kapaċitajiet fiż-żona tiegħu.

(24)

Biex jitħallsu d-differenzi, RTE jikkomunika lil kull RPC id-differenza fiż-żona tiegħu sa mhux aktar tard mill-1 ta' Diċembru tas-sena ta' konsenja +2.

(25)

Il-garanziji tal-kapaċità huma kollha mdaħħla fir-Reġistru tal-garanziji tal-kapaċità, li jinżamm mill-operatur tan-netwerk RTE. Kull fornitur u kull operatur ta' kapaċità huwa obbligat li jiftaħ kont ma' RTE fuq ir-Reġistru tal-garanziji tal-kapaċità. Għalhekk l-atturi integrati vertikalment huma obbligati jżommu żewġ kontijiet f'dan ir-reġistru, wieħed għall-attività ta' produzzjoni tagħhom u l-ieħor għall-attività ta' kummerċjalizzazzjoni tagħhom.

(26)

Is-sjieda ta' garanzija tal-kapaċità tiddependi mir-reġistrazzjoni tagħha minn RTE fil-kont li jkollu d-detentur tagħha fir-Reġistru tal-garanziji tal-kapaċità. Kull garanzija tal-kapaċità li tinħareġ tingħata numru biex minn naħa jkun hemm ġestjoni tagħha u min-naħa l-oħra jkunu jistgħu jiġu rintraċċati l-iskambji. Din tkun valida għal sena ta' konsenja. Il-garanzija tal-kapaċità, li l-unità tagħha hija ta' 0,1 MW (4), tkun biss tal-proprjetarju ladarba tinħareġ: attur li jkollu garanzija tal-kapaċità ma jġorr ebda riskju relatat mal-kapaċità sottostanti li toħloqha.

(27)

It-trasferimenti tal-garanziji tal-kapaċità bejn l-atturi (ħruġ u bejgħ) isiru permezz tat-traferiment ta' dawn il-garanziji fuq ir-Reġistru tal-garanziji tal-kapaċità, wara li ssir it-talba miż-żewġ partijiet (il-parti ċedenti u l-parti riċeventi). It-trasferimenti attwali tal-proprjetà isiru permezz tar-reġistrazzjoni ta' garanzija tal-kapaċità fuq il-kont tal-attur riċeventi.

(28)

L-iskambji tal-garanziji tal-kapaċità jistgħu jseħħu fi swieq mhux irregolati jew fi swieq organizzati.

(29)

L-iskambji ta' garanziji tal-kapaċità jistgħu jsiru matul il-perjodu kollu miċ-ċertifikazzjoni sal-iskadenza tal-bejgħ tal-garanziji tal-kapaċità. Kif spjegat fil-premessa (23), RTE jinnotifika lil kull fornitur dwar l-ammont tal-obbligu ta' kapaċità tiegħu sa mhux aktar tard mill-1 ta' Diċembru tas-sena ta' konsenja +2. L-iskadenza tal-bejgħ tkun 15-il jum wara.

(30)

Il-fornituri li, fl-iskadenza tan-notifika jkollhom garanziji tal-kapaċità żejda meta mqabbla mal-obbligu tagħhom huma meħtieġa jagħmlu offerta pubblika ta' bejgħ qabel l-iskadenza tal-bejgħ tal-garanziji tal-kapaċità.

(31)

Ħamest ijiem wara l-iskadenza tal-bejgħ tal-garanziji, RTE jikkalkula, għal kull fornitur, l-iżbilanċ bejn l-ammont tal-obbligu ta' kapaċità tal-fornitur u l-ammont ta' garanziji tal-kapaċità li jidhru fil-kont tal-fornitur fir-Reġistru tal-garanziji tal-kapaċità kif ukoll is-saldu finanzjarju korrispondenti.

(32)

Il-mekkaniżmu jipprovdi l-akkontabilità fuq id-differenzi bejn ir-realizzat u l-previżjonijiet.

(33)

L-istruttura globali tas-saldi finanzjarji tikkorrispondi għal saldi tad-differenzi li jsiru b'mod simili ħafna għal dak fis-seħħ għall-enerġija (riekwilibriju jew balancing) u tassumi li l-fornituri u l-RPCs iħallsu somma f'każ ta' żbilanċ negattiv jew jirċievu somma f'każ ta' żbilanċ pożittiv. F'każ ta' żbilanċ negattiv il-konsumaturi finali jgawdu minn tnaqqis fil-prezz permezz tat-TURPE (Tarif d'Utilisation du Réseau Public d'Electricité — Prezz tal-Użu tan-Netwerk Pubbliku tal-Elettriku) (5).

(34)

Il-prezz tas-saldu applikat għal sena ta' konsenja partikolari jiddependi minn ċerti kriterji:

(35)

Ladarba d-diversi saldi tad-differenzi jiġu kkalkulati, l-RPC u l-fornituri li jkollhom differenzi negattivi jitfgħu l-ammont tas-saldu li għandhom iħallsu fil-fondi rispettivi tagħhom u l-RPC u l-fornituri li jkollhom differenzi pożittivi jirċievu l-ammont tas-saldu dovut lilhom mill-fondi rispettivi tagħhom. Madankollu, is-somma tas-saldi pożittivi ma tkunx akbar mis-somma tal-pagamenti magħmula għas-saldi finanzjarji negattivi għal sena ta' konsenja partikolari. Il-bilanċi li jista' jifdal fil-fondi għas-saldu tad-differenzi jitqassmu kollha mill-ġdid lill-utenti tas-sistema pubblika tat-trażmissjoni tal-elettriku, jiġifieri lill-klijenti finali kollha.

(36)

Mhemm l-ebda fluss finanzjarju bejn il-fond għas-saldu tad-differenzi tal-RPC u l-fond għas-saldu tad-differenzi tal-fornituri. Għaldaqstant mhemm l-ebda fluss finanzjarju bejn l-operaturi tal-kapaċitajiet u l-fornituri kkonċernati f'dak li jirrigwarda s-saldu tad-differenzi.

(37)

RTE jipprovdi l-ġestjoni tal-amministrazzjoni, tal-kontijiet u tal-finanzi tal-fondi għas-saldi (“fond għas-saldu tad-differenzi tal-persuni responsabbli għaż-żona ta' ċertifikazzjoni” u “fond għas-saldu tar-riekwilibriju tal-kapaċità tal-fornituri”) skont ir-regoli tal-kontabilità privata. Bħala tali huwa inkarigat mill-kontijiet u l-irkupru tas-somom dovuti mill-RPC u l-fornituri, kif ukoll mill-kontroll tan-nuqqas ta' pagamenti.

(38)

Il-Kummissjoni li tirregola l-enerġija (CRE), l-awtorità regolatorja nazzjonali fil-qasam tal-enerġija, min-naħa tagħha hija responsabbli mill-kontroll tas-saldu tad-differenzi tal-fornituri (l-Artikolu 7 tad-Digriet Nru 2012-1405 kodifikat fl-Artikolu R. 335-12 tal-Kodiċi tal-Enerġija) u tista' tagħti penali amministrattiva f'każ ta' ksur tal-obbligu legali tal-ħlas tad-differenzi. Il-penali trid tkun proporzjonata u ma tistax taqbeż EUR 120 000 għal kull MW ta' kapaċità għal sena ta' konsenja (l-Artikolu L. 335-7 tal-Kodiċi tal-Enerġija).

(39)

Il-liġijiet u r-regolament li jirregolaw il-mekkaniżmu tal-kapaċità huma:

(40)

Fid-dawl tar-rimedji proposti minn Franza wara l-oġġezzjonijiet tal-Kummissjoni fid-Deċiżjoni tal-Ftuħ, dawn it-testi ser ikunu wkoll emendati jew kompluti sabiex jirriflettu r-rimedji kollha deskritti fit-Taqsima 3 ta' din id-deċiżjoni.

(41)

Il-benefiċjarji tal-mekkaniżmu huma d-detenturi tal-kapaċità, li jirċievu l-garanziji tal-kapaċità mill-Istat (permezz ta' RTE) u li għandhom il-possibbiltà li jerġgħu jbiegħuhom.

(42)

L-indikatur magħżul minn Franza sabiex tivvaluta r-riskju ta' żbilanċ bejn l-offerta u d-domanda tal-elettriku huwa l-aspettattiva ta' qtugħ minħabba żbilanċ bejn l-offerta u d-domanda (Loss Of Load Expectation (LOLE)). Għal Franza, l-awtoritajiet Franċiżi għażlu li jikkunsidraw aspettattiva ta' qtugħ medju ta' tliet (3) sigħat fis-sena.

(43)

L-awtoritajiet Franċiżi spjegaw li għal dawn l-aħħar diversi snin, Franza kien qed ikollha domanda massima ta' konsum tal-elettriku fix-xitwa. Is-sistema elettrika ta' Franza hija kkaratterizzata fil-fatt minn sensittività kbira għat-temperatura fil-konsum tal-elettriku li twassal għal konsum ogħla ta' elettriku matul il-perjodi kesħin ħafna tax-xitwa. Kif spjegat fil-Figura 2, din is-sensittività għat-temperatura kompliet tikber matul dawn l-aħħar snin, b'mod partikolari minħabba li żdied il-konsum relatat mat-tisħin bl-elettriku, iżda wkoll minħabba użi ġodda tal-elettriku li jikkoinċidu mal-konsum akbar ta' filgħaxija.

(44)

Iż-żieda fid-domanda massima hija aktar rapida minn dik tal-livell ġenerali tal-konsum ta' elettriku. Barra minn hekk, id-domanda massima ta' konsum fi Franza hija kkaratterizzata mill-volatilità qawwija tagħha u d-differenzi fil-konsum jistgħu jkunu għalhekk partikolarment sinifikanti (sa 20 GW bejn sena u oħra). Il-kontroll tad-domanda massima ta' konsum tal-elettriku huwa għalhekk tħassib ewlieni, b'mod partikolari fil-kuntest tat-trasferimenti tal-użijiet tal-enerġija lejn l-elettriku.

Figura 2

Perjodi storiċi tal-ogħla domanda ta' konsum fi Franza

Sors: RTE — Rapport Provviżorju tal-bilanċ bejn l-offerta u d-domanda tal-elettriku fi Franza 2014, p. 33

(45)

Skont RTE, min-naħa tal-offerta, l-Ewropa hija kkaratterizzata minn domanda staġnata u kapaċità żejda konsiderevoli ta' produzzjoni tal-elettriku kkawżati minn diversi fatturi. Mill-2008 'l hawn, il-kriżi ekonomika naqqset id-domanda għall-elettriku. Fl-istess waqt, l-iżvilupp tal-enerġiji rinnovabbli ssussidjati “barra mis-suq” u li jgawdu aċċess prijoritarju għan-netwerk tal-elettriku huwa mgħaġġel. Barra minn hekk, l-impjanti tal-faħam Ewropej raw żieda qawwija fl-attività minħabba l-waqgħa fil-prezz tal-fjuwil, dovuta għaż-żieda fil-gass tax-shale fl-Amerika li ġiegħlet lill-Istati Uniti jesportaw f'ammonti kbar il-produzzjoni żejda tal-faħam tagħhom lejn l-Ewropa. Fl-aħħar nett, naqas ħafna d-dħul, u allura naqset ukoll l-attività, tal-impjanti tal-gass — li saru inqas kompetittivi mill-impjanti tal-faħam.

(46)

F'dan il-kuntest, il-perikli relatati mal-kundizzjonijiet tal-klima joħolqu inċertezza fuq il-qligħ tal-kapaċitajiet intensivi meħtieġa biex ikopru din id-domanda ogħla ta' konsum. Dawn il-perjodi ta' żieda qawwija fid-domanda tal-konsum huma rari, ftit sigħat f'sena u saħansitra xejn f'xi snin oħrajn jekk it-temperaturi jkunu xi ftit għoljin.

(47)

Il-mekkaniżmu tal-kapaċità fi Franza ġie mfassal bħala waħda mis-soluzzjonijiet għal din il-problema, biex tkun garantita l-konformità mal-kriterju tas-sigurtà tal-provvista definit mill-awtoritajiet pubbliċi. Huwa jipprova jkun kemm mezz biex iġib bidla fl-imġiba tal-konsum fil-perjodi intensivi (l-approċċ tad-domanda) kif ukoll jiġġenera investimenti xierqa fil-faċilitajiet ta' produzzjoni u fil-kapaċitajiet ta' ġestjoni tad-domanda (approċċ tal-offerta).

(48)

Il-valur tal-garanziji tal-kapaċità ma jiġix stabbilit mill-amministrazzjoni: huwa s-suq li jiddeterminah. L-iskambji jiġu stabbiliti b'mod liberu mill-atturi tal-mekkaniżmu abbażi tal-aspettattivi tagħhom, tal-istrateġiji ta' hedging tagħhom u fuq it-tagħrif disponibbli.

(49)

Minkejja n-natura deċentralizzata tal-mekkaniżmu li tagħmilha diffiċli li wieħed jistma l-baġit, saret stima tal-baġit fejn ġie preżunt obbligu ta' kapaċità globali għad-domanda Franċiża ta' bejn 80 000 u 95 000 MW u fejn ġie preżunt koeffiċjent ta' sigurtà miżmum fil-valur ta' 0,93. Id-domanda ser tiddependi mill-evoluzzjoni tal-konsum fi Franza metropolitana, inklużi azzjonijiet ta' kontroll tad-domanda li ser jimplimentaw il-fornituri tal-elettriku, li jwasslu biex jonqos l-obbligu individwali li huma ser jiffaċċjaw. Abbażi ta' dan id-dħul gross tal-operaturi fis-suq tal-kapaċità jista' jvarja bejn EUR 0/kW u EUR 30/kW fil-perjodu ta' bejn l-2017 u l-2026, bl-ogħla ammonti jkunu fis-snin fejn ikun meħtieġ il-bini ta' makkinarju ġdid ta' produzzjoni.

(50)

L-ewwel sena ta' konsenja tibda fl-1 ta' Jannar 2017. B'deroga mir-regola ġenerali li tipprovdi li ċ-ċertifikazzjonijiet isiru erba' snin qabel is-sena ta' konsenja, iċ-ċertifikazzjoni għall-ewwel sena ta' konsenja (2017) bdiet fl-1 ta' April 2015. Attwalment, għalkemm l-awtoritajiet Franċiżi mhumiex qegħdin jipprovdu data ta' tmiem tal-mekkaniżmu, ser issir valutazzjoni annwali, definita mil-liġi ta' Franza, minn RTE u mir-regolatur. Jekk ikun il-każ, din tista' twassal għal reviżjoni tal-mekkaniżmu (pereżempju biex jikkonforma mal-aħħar bidliet fil-leġiżlazzjoni Ewropea), jew għal tmiem il-mekkaniżmu jekk dan ma jibqax meħtieġ (6).

(51)

Rigward il-faċilitajiet taħt kuntratt ta' obbligu ta' xiri (sorsi tal-elettriku rinnovabbli) jew eliġibbli għal kumpens addizzjonali, l-Artikoli L. 121-24 u L. 335-5 tal-Kodiċi tal-Enerġija jipprovdu li l-qligħ mill-bejgħ tal-garanziji tal-kapaċità jitnaqqas mill-ispejjeż totali tagħhom ta' servizz pubbliku, inkluża l-għajnuniet l-oħrajn mogħtija mill-Istat u li jiffinanzjaw l-iskema ta' appoġġ bl-obbligu ta' xiri. B'mod simetriku, il-produtturi mhumiex ser ikunu soġġetti għas-saldu tad-differenzi f'każ li l-kapaċità effettiva tkun inqas minn dik ċertifikata għall-perikli relatati mad-disponibbiltà tar-riżorsa primarja (7).

(52)

Fid-Deċiżjoni tal-Ftuħ, il-Kummissjoni kienet diġà kkonkludiet, fil-premessa 143, li l-miżura hija għajnuna mill-Istat fis-sens tal-Artikolu 107(1) tat-TFUE u dan għar-raġunijiet li ġejjin.

(53)

Fid-Deċiżjoni tal-Ftuħ, il-Kummissjoni kkunsidrat li wieħed seta' jikkonkludi li kien hemm trasferiment ta' riżorsi tal-Istat mhux biss jekk kien hemm trasferiment ta' flus direttament mill-baġit tal-Istat jew ta' entità pubblika, iżda wkoll jekk il-fondi insostenn tal-mekkaniżmu kienu ġejjin mill-ekwità tal-impriżi diment li (i) l-Istat jirrinunzja għall-ġbir tar-riżorsi tal-Istat li għandu jdaħħal u/jew li (ii) il-mezzi finanzjarji implimentati għall-iskema jibqgħu taħt il-kontroll pubbliku, mingħajr ma jappartjenu neċessarjament b'mod permanenti għall-patrimonju pubbliku.

(54)

Rigward l-ewwel punt, l-Istat Franċiż qed jirrinunzja għal riżorsi pubbliċi peress li jagħti bla ħlas iċ-ċertifikati tal-kapaċità lill-operaturi tal-kapaċità minflok ma jbiegħhom (bħal fil-każijiet Nox  (8) u ċertifikati ekoloġiċi Rumeni  (9)).

(55)

Rigward it-tieni punt, il-mezzi finanzjarji in sostenn tal-mekkaniżmu jibqgħu taħt il-kontroll tal-Istat (l-istess bħal fil-Każijiet Vent de Colère  (10) u Essent  (11)) peress li: (i) il-fondi huma alimentati minn kontributi obbligatorji imposti mill-Istat u għalhekk huma attribwibbli lilu; (ii) l-Istat jistabbilixxi parametri (kriterji ta' sigurtà ta' provvista u metodoloġija għall-iffissar tal-prezz ta' referenza tas-suq li jiddetermina l-prezz tas-saldu tad-differenzi) li jinfluwenzaw il-prezz tal-kapaċità u l-kwantità ta' ċertifikati globali, anki jekk mhumiex iffissati bħala tali mill-Istat; (iii) il-Kummissjoni li tirregola l-enerġija (is-CRE) għandha s-setgħa li timponi sanzjonijiet fuq il-fornituri li ma jikkonformawx mal-obbligi tagħhom f'termini ta' saldu tad-differenzi; u (iv) l-operatur tas-sistema ta' trasport — RTE — intgħażel mill-Istat biex jamministra l-fondi tas-saldu tad-differenzi.

(56)

Skont il-Kummissjoni, is-sentenza Altmark  (12) ma tapplikax f'dan il-każ peress li l-obbligu ta' servizz pubbliku mhuwiex definit b'mod ċar. L-obbligi tal-mekkaniżmu huma numerużi u differenti skont id-diversi partijiet ikkonċernati (operaturi tal-impjanti, operaturi tal-ġestjoni tad-domanda, fornituri). Min-naħa tal-obbligu fuq l-operaturi tal-kapaċità, l-obbligu ta' ċertifikazzjoni mhuwiex strettament irregolat peress li: (i) hija fakultattiva għall-kapaċitajiet ta' ġestjoni tad-domanda u (ii) l-operaturi ta' faċilitajiet ta' produzzjoni eżistenti għandhom l-għażla f'dak li jirrigwarda l-livell ta' kapaċità li jiċċertifikaw.

(57)

Għaldaqstant il-bejgħ tal-garanziji tal-kapaċità huwa vantaġġ u mhux il-korrispettiv ta' obbligu ta' servizz pubbliku. Dan il-vantaġġ huwa selettiv peress li l-mekkaniżmu jipprevedi għajnuna lill-operaturi tal-kapaċità, u mhux għal setturi oħra tal-ekonomija.

(58)

Skont il-Kummissjoni, il-mekkaniżmu tal-kapaċità jista' jaffettwa l-kompetizzjoni mal-operaturi tal-kapaċitajiet li jinsabu barra l-pajjiż (u għalhekk jaffettwa wkoll il-kummerċ bejn l-Istati Membri) diment li l-kapaċitajiet li jinsabu fi Franza jiksbu vantaġġ li l-operaturi tal-kapaċitajiet li jinsabu f'pajjiżi oħrajn ma jistgħux jiksbu peress li ma jistgħux jiġu ċċertifikati.

(59)

It-tħassib tal-awtoritajiet Franċiżi rigward l-adegwatezza tal-kapaċitajiet ta' produzzjoni huwa strettament marbut ma' żieda kbira fid-domanda li sseħħ matul perjodi relattivament qosra ta' kesħa kbira, minħabba li Franza tiddependi b'mod partikolari mit-tisħin bl-elettriku.

(60)

Id-Deċiżjoni tal-Ftuħ qajmet dubji rigward il-ħtieġa tal-miżura għar-raġunijiet li ġejjin:

(61)

Fid-Deċiżjoni tal-Ftuħ tagħha, il-Kummissjoni kkunsidrat li l-mekkaniżmu seta' joħloq diskriminazzjoni bejn id-diversi kapaċitajiet ta' ġestjoni tad-domanda. B'mod partikolari, żewġ tipi ta' ġestjoni tad-domanda tal-konsum jistgħu jipparteċipaw fil-mekkaniżmu: minn naħa, il-kapaċità ta' ġestjoni tad-domanda impliċita, li tikkonsisti fi tnaqqis tal-obbligu tal-kapaċità tal-fornituri sal-volum tal-kapaċità miksub permezz tat-tnaqqis tat-tagħbija tal-klijenti waqt is-sigħat tal-ogħla domanda bejn 10t ijiem u 15-il jum fis-sena; u min-naħa l-oħra, il-kapaċità ta' ġestjoni tad-domanda espliċita, li teħtieġ mill-konsumaturi (il-kbar) jew mill-aggregaturi li jiċċertifikaw il-potenzjal ta' tnaqqis tal-konsum tagħhom u li jagħmlu din il-kapaċità disponibbli (mingħajr ma tkun neċessarjament imnaqqsa) matul il-ħinijiet tal-ogħla domanda bejn 10t ijiem u 25 jum fis-sena.

(62)

Barra minn hekk, fid-Deċiżjoni tal-Ftuħ tagħha, il-Kummissjoni kkritikat il-fatt li l-mekkaniżmu ma kienx miftuħ għal kull teknoloġija oħra li tista' tikkontribwixxi għas-sigurtà tal-provvista, b'mod partikolari l-interkonnessjonijiet u/jew il-kapaċitajiet barranin.

(63)

Il-Kummissjoni kienet ukoll enfasizzat ir-riskju li l-kapaċitajiet il-ġodda ta' produzzjoni ma setgħux jipparteċipaw fil-mekkaniżmu, l-aktar minħabba n-nuqqas ta' sinjali ta' prezzijiet affidabbli għall-garanziji tal-kapaċità. Speċifikament, il-Kummissjoni kienet imħassba:

(64)

Fid-Deċiżjoni tal-Ftuħ tagħha l-Kummissjoni kienet identifikat riskju li l-mekkaniżmu jista' jwassal għal kumpens żejjed ta' ċerti operaturi tal-kapaċità, l-aktar minħabba:

(65)

Fid-Deċiżjoni tal-Ftuħ tagħha, il-Kummissjoni identifikat għadd ta' problemi f'termini ta' distorsjonijiet potenzjali tal-kompetizzjoni, kemm fil-livell tal-produzzjoni kif ukoll f'termini ta' provvista tal-elettriku.

(66)

Il-Kummissjoni esprimiet tħassib dwar l-eżistenza ta' diskrepanzi sinifikanti fl-informazzjoni. Il-fornituri l-kbar integrati vertikalment, b'mod partikolari dawk li huma diġà preżenti fis-suq Franċiż, jistgħu jgawdu minn vantaġġ minħabba li għandhom aktar esperjenza tas-suq, l-aktar f'dak li jirrigwarda d-disponibbiltà tal-kapaċitajiet, il-ħtiġijiet ta' provvista u l-prezzijiet. Għaldaqstant huma f'pożizzjoni li jagħmlu tbassir aktar affidabbli u jkunu aktar effiċjenti fil-konformità mal-obbligi imposti mill-mekkaniżmu.

(67)

Minħabba wkoll id-diskrepanza fl-informazzjoni, aktarx li jkun aktar diffiċli għall-parteċipanti l-ġodda li jagħmlu stima tal-portafoll ta' klijenti futuri tagħhom, meta din l-istima hija essenzjali biex jikkalkulaw kemm jeħtieġu garanziji tal-kapaċità.

(68)

Il-Kummissjoni qajmet ukoll tħassib rigward il-possibbiltà li operatur diġà stabbilit u dominanti jżomm il-kapaċitajiet.

(69)

Il-Kummissjoni kienet ukoll semmiet ir-riskju li operatur stabbilit u dominanti jkollu l-possibbiltà li jżomm il-garanziji tal-kapaċità.

(70)

Barra minn hekk, il-Kummissjoni kienet indikat riskju ta' prattiki ta' esklużjoni mill-prezzijiet (kompressjoni tal-marġni jew kompressjoni tat-tariffi, prezzijiet predatorji) mill-operatur stabbilit u dominanti.

(71)

Il-Kummissjoni enfasizzat li n-nuqqas ta' sinjali ta' prezzijiet fit-tul f'dak li jirrigwarda l-kapaċità jista' joħloq jew iżid l-ostakli għad-dħul għall-produtturi l-ġodda. L-investimenti fit-tul li jagħmlu l-parteċipanti l-ġodda jistgħu jeħtieġu ċertu grad ta' prevedibbiltà tal-prezzijiet għal ċertu numru ta' snin, li ma tinkisibx mill-garanziji ċertifikati għal sena.

(72)

Il-Kummissjoni kienet tenniet ukoll il-pożizzjoni tagħha rigward kompetizzjoni mnaqqsa fil-mekkaniżmu minħabba l-esklużjoni ta' ċerti tipi ta' operaturi tal-kapaċità mill-mekkaniżmu (kapaċitajiet transkonfinali, diskriminazzjoni bejn l-operaturi tal-kapaċitajiet ta' ġestjoni tad-domanda).

(73)

Il-Kummissjoni rċeviet 18-il tweġiba mingħand il-partijiet interessati minbarra l-Istat Franċiż, RTE u s-CRE, matul il-perjodu ta' konsultazzjoni dwar id-Deċiżjoni tal-Ftuħ. Parti minnhom wieġbet biss wara l-perjodu rilevanti.

(74)

Id-diversi kummenti nġabru skont is-suġġett kif ġej. Dawn ser jiġu indirizzati waqt il-valutazzjoni tal-miżura, mingħajr ma ssir referenza espliċita għalihom.

(75)

Dawk li wieġbu għandhom opinjoni differenti dwar il-kwalifika tal-mekkaniżmu bħala għajnuna. Nofshom jaħsbu li l-miżura hija għajnuna mill-Istat, kemm b'mod espliċitu kif ukoll b'mod impliċitu u ma jirreaġixxux għar-raġunament tal-Kummissjoni f'dan ir-rigward; in-nofs l-ieħor iqis li l-mekkaniżmu mhuwiex għajnuna mill-Istat għar-raġunijiet li ġejjin.

(76)

Tnejn minn dawk li wieġbu jagħmlu referenza espliċita għad-Deċiżjoni Nru 369417 tad-9 ta' Ottubru 2015 tal-Kunsill tal-Istat Franċiż (appell mill-Association Nationale des Opérateurs Détaillants en Énergie jew A.N.O.D.E (14).), fejn il-Kunsill tal-Istat ikkunsidra li l-mekkaniżmu tal-kapaċità propost ma kellux il-karatteristiċi ta' għajnuna mill-Istat. L-awtoritajiet Franċiżi wkoll irreferew għall-konklużjonijiet tal-Kunsill tal-Istat f'din l-istess kawża (15).

(77)

L-argumenti tal-awtoritajiet Franċiżi rigward il-kwalifika tal-miżura bħala għajnuna mill-Istat għandhom jinqraw flimien ma' dawk diġà msemmija fid-Deċiżjoni tal-Ftuħ.

(78)

L-awtoritajiet Franċiżi għażlu li jidħlu fl-investigazzjoni fil-fond mal-Kummissjoni Ewropea billi ma reġgħux ikkunsidraw dawn l-elementi u ffukaw fuq il-proposta ta' miżuri li jiżguraw il-kompatibbiltà tal-mekkaniżmu tal-kapaċità mas-suq intern, irrispettivament mill-kwistjoni tal-kwalifika ta' għajnuna mill-Istat. Għall-kompletezza, l-argumenti ta' Franza rigward il-kwalifika ta' għajnuna mill-Istat huma xorta waħda elenkati hawn taħt.

(79)

Żewġ aggregaturi tal-ġestjoni tad-domanda, żewġ kumpaniji tal-elettriku vertikalment integrati u l-Unjoni Franċiża tal-elettriku jikkunsidraw li l-miżura mhijiex iffinanzjata permezz ta' riżorsi tal-Istat. B'mod aktar partikolari, dawn li wieġbu jikkunsidraw li l-fondi inkwistjoni jgħaddu direttament u esklussivament bejn l-operaturi privati; RTE la għandu u lanqas juża l-fond tas-saldu tad-differenzi.

(80)

Barra minn hekk, skont dan il-grupp, ir-regoli applikabbli għall-ġestjoni ta' dawn ir-riżorsi jistgħu jitqabblu ma' dawk li jiddefinixxu l-ġestjoni tad-“differenzi-aġġustamenti” fil-kuntest tal-miżura ta' responsabbiltà tal-bilanċ fis-suq tal-enerġija.

(81)

EDF jiddikjara wkoll li r-rwol tal-Istat Franċiż fil-mekkaniżmu huwa limitat għad-definizzjoni ta' qafas regolatorju speċifiku li fih ikunu attivi biss operaturi privati. Skont EDF, bl-introduzzjoni ta' mekkaniżmu tal-kapaċità, l-Istat Franċiż fil-fatt qed juża l-prerogattivi tiegħu ta' setgħa pubblika u jaġixxi bħala regolatur tas-suq.

(82)

Skont EDF hemm distinzjoni ċara bejn il-mekkaniżmu tal-kapaċità u s-sistema inkwistjoni fil-Kawża Il-Kummissjoni/In-Netherlands (“NOx”) (16), fejn l-Istat tan-Netherlands kien ta “drittijiet ta' ħsara” veri u proprji li kienu jippermettu li wieħed jevita l-ħlas ta' multi u li kellhom valur tas-suq minn meta jingħataw mill-Istat. Għalhekk iċ-ċertifikati ma għandhom ebda valur fir-relazzjoni bejn l-Istat Franċiż u l-operaturi tal-kapaċità.

(83)

Skont l-awtoritajiet Franċiżi, il-prezz tal-garanziji tal-kapaċità, u għalhekk id-dħul li jistgħu jagħmlu l-operaturi tal-kapaċità mill-bejgħ taċ-ċertifikati tagħhom, mhuwiex stabbilit mill-Istat. L-Istat lanqas ma jintervjeni fuq l-ammont ta' prodotti offruti fis-suq. Iżda f'mekkaniżmu deċentralizzat, huwa s-suq li jiddetermina l-prezz u l-kwantità ta' ċertifikati. Il-flussi finanzjarji relatati mal-mekkaniżmu tal-kapaċità jseħħu għalhekk bejn atturi privati u mingħajr il-kontroll tal-Istat.

(84)

Barra minn hekk, l-awtoritajiet Franċiżi jikkunsidraw li l-flussi finanzjarji relatati mal-ħlas tas-saldu tad-differenzi, min-naħa tagħhom, għandhom ikunu marġinali ħafna fl-iskema (minħabba l-inċentivi għar-riekwilibriju fis-suq upstream) u ma jistgħux jitqiesu bħala riżorsi tal-Istat jew taħt il-kontroll tal-Istat. Is-saldu tad-differenzi previst għall-mekkaniżmu tal-kapaċità jsegwi l-istess mudell bħal dak attwalment fis-seħħ fl-Ewropa għas-saldu tad-differenzi fis-suq tal-enerġija (electricity balancing settlement mechanisms — mekkaniżmi ta' saldu għall-bilanċ tal-elettriku).

(85)

L-awtoritajiet Franċiżi jsostnu wkoll li l-mekkaniżmu jixbah aktar dak trattat fil-Kawża PreussenElektra  (17) milli dawk diskussi fil-Kawżi Vent de Colère  (18) u Essent  (19). Bħal fil-każ ta' PreussenElektra u għall-kuntrarju ta' dak li kien previst f'Vent de Colère, il-mekkaniżmu tal-kapaċità ma jipprovdix mekkaniżmu ta' kumpens għall-fornituri. Barra minn hekk, b'differenza minn Essent (i) il-flussi finanzjarji jibqgħu kontinwament il-proprjetà ta' atturi privati (fornituri u operaturi tal-kapaċità); (ii) il-flussi finanzjarji mhumiex ġejjin minn taxxa. Il-preżenza ta' riżorsi tal-Istat hija saħansitra aktar dubjuża meta, għall-kuntrarju tal-ġurisprudenza PreussenElektra, ma ġie stabbilit ebda prezz minimu ta' xiri għall-garanziji tal-kapaċità.

(86)

Barra minn hekk, skont l-awtoritajiet, il-bejgħ tal-garanziji ta' kapaċità ma jistax jitqies bħala rinunzja għal riżorsa pubblika. Fil-fatt, l-Istat ma qiegħed jirrinunzja għal ebda riżorsa peress li l-valur tas-suq taċ-ċertifikati ta' garanzija jista' jiġi (i) kemm mill-valur intrinsiku tas-sottostanti li jkopru, (ii) kif ukoll mill-iskarsezza tagħhom meta jinħarġu. Dawn iż-żewġ elementi huma barra mill-poter tal-Istat u jiddistingwu dan il-każ mill-Kawżi NOx u ċertifikati Rumeni ekoloġiċi, li fihom iċ-ċertifikati setgħu rispettivament jinbiegħu bl-irkant jew kellhom valur minimu.

(87)

Fl-aħħar nett, fil-każ Rumen, il-liġi tobbliga b'mod espliċitu lill-fornituri sabiex jgħaddu l-ispejjeż tax-xiri taċ-ċertifikati ekoloġiċi fuq il-konsumaturi. Il-Qorti tal-Ġustizzja tal-Unjoni Ewropea (QtĠ) kienet għamlet raġunament simili fil-kawża Vent de Colère, fejn il-fornituri kienu jservu biss bħala intermedjarji finanzjarji (peress li l-kontribuzzjoni għas-servizz pubbliku tal-elettriku (20) kienet tipprovdi l-kumpens għall-ispejjeż żejda tagħhom). Għall-kuntrarju, fil-każ tal-mekkaniżmu Franċiż, il-fornituri huma kompletament liberi li jagħżlu l-mod kif jgħaddu l-ispejjeż fuq il-konsumaturi tagħhom. Ebda mekkaniżmu ma jipprovdi lill-fornituri l-kumpens għall-ispejjeż żejda relatati max-xiri tal-garanziji tal-kapaċità.

(88)

Flimkien ma' EDF, kumpanija attiva l-aktar fi Franza fil-bejgħ bl-ingrossa tikkunsidra li l-mekkaniżmu huwa obbligu ta' servizz pubbliku, u din il-kumpanija tirreferi għad-deċiżjoni tal-Kummissjoni fil-Kawża N475/2003 dwar sejħa għall-offerti għal kapaċità ġdida fl-Irlanda (21).

(89)

Skont EDF, ladarba l-proċess ta' ċertifikazzjoni jfisser impenn ta' disponibbiltà, huwa jirrappreżenta l-korrispettiv għal servizz mogħti mill-operaturi tal-kapaċità u mhux vantaġġ allegat mogħti bla ħlas.

(90)

Barra minn hekk, EDF u kumpanija oħra tal-elettriku integrata vertikalment jikkunsidraw li l-mekkaniżmu tal-kapaċità ma jagħti ebda vantaġġ selettiv lill-operaturi tal-kapaċità. Fil-fehma tagħhom, id-diversi atturi fil-mekkaniżmu jinsabu fl-istess sitwazzjoni fattwali u ġuridika u jgawdu minn trattament kompletament ugwali: huma kkumpensati bl-istess mod, irrispettivament mit-teknoloġija implimentata. L-ebda operatur ma jista' għalhekk ikun vantaġġjat minħabba l-ispeċifiċità tal-faċilitajiet ta' produzzjoni tiegħu.

(91)

Skont EDF, huwa żbaljat li wieħed jgħid li dan l-hekk imsejjaħ vantaġġ huwa selettiv għax il-mekkaniżmu tal-kapaċità “jipprevedi għajnuna lill-operaturi tal-kapaċità, u mhux lil setturi oħra tal-ekonomija”. Meta tagħmel dan, il-Kummissjoni tinjora l-karatteristiċi tal-mekkaniżmu tal-kapaċità (“market-wide” u “technology neutral”), bħall-ġurisprudenza tal-QtĠ li tivvaluta s-selettività ta' miżura fil-konfront ta' impriżi oħrajn li jkunu f'sitwazzjoni fattwali u ġuridika komparabbli.

(92)

L-ewwel nett, skont l-awtoritajiet, l-għoti ta' ċertifikati bħala parti mill-mekkaniżmu tal-kapaċità huwa fil-fatt il-korrispettiv ta' impenn ta' disponibbiltà waqt il-ħinijiet tal-ogħla domanda ta' konsum jew ta' voltaġġ qawwi fuq is-sistema tal-elettriku.

(93)

It-tieni, l-awtoritajiet Franċiżi jqisu li l-obbligu ta' servizz pubbliku huwa definit b'mod ċar. Rigward il-kapaċitajiet ta' ġestjoni tad-domanda, l-opzjonalità taċ-ċertifikazzjoni tagħhom tiffaċilita l-parteċipazzjoni tagħhom fil-mekkaniżmu tal-kapaċità. Fir-rigward tal-faċilitajiet ta' produzzjoni, il-komponent ta' dikjarazzjoni tal-proċess ta' ċertifikazzjoni ma jaffettwax il-karattru speċifiku tal-obbligu ta' servizz pubbliku: is-CRE tkun tista' tieħu s-sanzjonijiet meħtieġa f'każ ta' tentattiv ta' manipulazzjoni tas-suq, b'mod partikolari jekk attur kellu jivvaluta l-kapaċitajiet tiegħu inqas biex jgħolli l-prezz ta' dawn il-garanziji tal-kapaċità.

(94)

Peress li l-mekkaniżmu tal-kapaċità huwa teknoloġikament newtrali, l-awtoritajiet iqisu li ma jagħti l-ebda vantaġġ selettiv lil xi teknoloġija ta' produzzjoni jew ta' ġestjoni tad-domanda partikolari.

(95)

Skont Franza, il-perspettiva tal-Kummissjoni, li tidher li tqis li l-mekkaniżmu tal-kapaċità huwa selettiv għax huwa indirizzat biss lill-operaturi tal-kapaċità (u mhux lil setturi oħrajn tal-ekonomija), tfisser li kwalunkwe miżura settorjali hija ta' natura selettiva.

(96)

Ebda wieħed minn dawk li wieġbu ma kellu reazzjoni dwar dan il-punt.

(97)

L-awtoritajiet Franċiżi jqisu li l-mekkaniżmu tal-kapaċità mhux ser ikollu impatt fuq is-suq tal-elettriku — kemm fil-livell nazzjonali, kif ukoll fl-interazzjonijiet mal-pajjiżi ġirien — li ser ikompli jaħdem bl-istess mod. B'mod aktar speċifiku, huma jemmnu li s-suq tal-kapaċità mhuwiex ser jibdel il-prezz tal-elettriku fis-swieq spot.

(98)

Dawk li wieġbu huma ġeneralment tal-opinjoni li l-mekkaniżmu huwa meħtieġ u li għandu jkun parti integrali mill-organizzazzjoni tas-suq. Tlieta biss minn dawk li wieġbu jikkontestaw il-ħtieġa tal-miżura, minħabba li:

(99)

Skont l-awtoritajiet, fil-fatt ġie stabbilit indikatur ta' sigurtà tal-provvista u ġie identifikat riskju ta' qtugħ fl-aħħar studji ta' RTE: fl-aħħar Rapport provviżorju ta' RTE li sar qabel id-dħul fis-seħħ tal-mekkaniżmu (fl-2014) jidher defiċit ta' marġni ta' 2 GW f'dan l-istudju għax-xitwa 2016-2017 fix-xenarju ta' referenza. Dan il-marġni kien imnaqqas għal 200 MW fir-Rapport provviżorju 2015 għax-xitwa 2017-2018, iżda dan seħħ minħabba s-sinjal mogħti mill-ħolqien tal-mekkaniżmu. Dawn l-analiżijiet huma allegatament ikkonfermati mill-analiżijiet tal-Pentalateral Energy Forum.

(100)

Madankollu, l-istudju tal-adegwatezza li sar minn REGRT-E (ir-rapport Scenario Outlook and Adequacy Forecast) kien ibbażat fuq metodoloġija deterministika: fil-valutazzjoni ma ngħatax mudell tad-domanda massima ta' konsum dovuta għall-kesħa kbira u għas-sensittività għat-temp. Huma d-differenzi fil-metodoloġija li jwasslu għal dawn id-differenzi fir-riżultati. L-applikazzjoni tal-metodoloġija fil-mira li tipprova tistabbilixxi REGRT-E twassal biex jonqsu d-differenzi bejn dawn id-diversi eżerċizzji provviżorji. F'dan ir-rigward, il-Mid-Term Adequacy Forecast ippubblikat fl-2016 minn REGRT-E (22), li huwa l-ewwel (1) verżjoni bbażata fuq metodoloġija probabilistika, huwa konsistenti mar-riżultati tal-istudju tal-PLEF u ta' RTE.

(101)

Kuntrarjament għal dak li l-Kummissjoni tidher li tissuġġerixxi, il-mekkaniżmu tal-kapaċità fi Franza ma tfassalx biex isolvi l-problema eventwali ta' missing money iżda biex tkun garantita s-sigurtà tal-provvista tas-sistema elettrika Franċiża (l-aktar waqt id-domanda massima), billi jikkumpensa d-disponibbiltà ta' riżorsi li ma jistgħux jiġu kkumpensati b'mod sodisfaċenti biss fis-suq tal-enerġija.

(102)

Franza timplimenta divesi miżuri li jikkumplimentaw il-mekkaniżmu tal-kapaċità: proġetti ta' interkonnessjoni; reviżjonijiet tat-tariffi rregolati u tat-tariffi għall-użu tas-sistemi pubbliċi tat-trażmissjoni u ta' distribuzzjoni tal-elettriku biex jirriflettu aħjar l-iskarsezzi; l-iżvilupp tal-kapaċitajiet ta' ġestjoni tad-domanda (pereżempju permezz tal-iżvilupp tal-qafas regolatorju tas-swieq tal-elettriku biex dawk l-operaturi tal-ġestjoni tad-domanda jkunu jistgħu jipparteċipaw fil-mekkaniżmi kollha, it-tneħħija tal-ostakli tekniċi u kompetittivi għall-aggregazzjoni tal-kapaċitajiet, l-użu ta' arloġġi intelliġenti); it-tnedija tas-sorsi rinnovabbli, eċċ.

(103)

Sadanittant, RTE ippubblika l-valutazzjoni tiegħu dwar l-adegwatezza tal-kapaċitajiet ta' produzzjoni għall-2016. Skont l-awtoritajiet, l-aħħar Rapport provviżorju ta' RTE ma jibdilx l-analiżi tal-awtoritajiet Franċiżi. Għall-kuntrarju, dan isaħħaħha billi jispjega għal darb'oħra li s-sigurtà tal-provvista ta' Franza tiddependi mid-destin ta' ċerti impjanti tas-sħana (b'mod partikolari dawk ikkombinati bil-gass) u mill-ġestjoni tad-domanda ta' konsum, jiġifieri l-aktar setturi sensittivi għall-implimentazzjoni tal-mekkaniżmu tal-kapaċità.

Figura 3

Indikaturi ta' qtugħ f'xenarji ta' “sħana kbira” u ta' “nuqqas ta' sħana”

(104)

Skont RTE, fost ix-xenarji ta' sħana ppreżentati fir-Rapport provviżorju 2016 (ara l-Figura 3), huwa x-xenarju ta' “nuqqas ta' sħana” li għandu jintgħażel fl-assenza ta' mekkaniżmu tal-kapaċità. Ix-xenarju ta' “nuqqas ta' sħana” jinkludi l-għeluq ta' ċerti faċilitajiet, speċjalment dawk li l-operaturi attwalment ipposponew l-għeluq tagħhom sakemm jiġi implimentat il-mekkaniżmu tal-kapaċità. Ix-xenarju “sħana kbira”, għall-kuntrarju, ifisser iż-żamma tal-impjanti kollha eżistenti, irrispettivament minn kwalunkwe kunsiderazzjoni ekonomika: skont l-awtoritajiet għalhekk ftit hemm possibbiltà li dan ix-xenarju jseħħ.

(105)

B'hekk, fix-xenarju ta' “nuqqas ta' sħana” is-sigurtà tal-provvista hija mhedda sa mix-xitwa 2017-2018 jekk wieħed jieħu bħala referenza xitwa medja. Barra minn hekk, dejjem b'kunsiderazzjoni ta' xenarju ta' “nuqqas ta' sħana”, RTE ikkalkula l-aspettattiva ta' qtugħ billi ssimula xitwa estrema, b'kesħa kbira, għall-ħames xtiewi li ġejjin. Ir-riżultati tal-kalkolu huma mogħtija fil-Figura 4.

Figura 4

Aspettattiva ta' qtugħ f'xitwa estrema (f'sigħat)

(106)

Il-kalkolu juri li l-aspettattiva ta' qtugħ taqbeż kull darba l-kriterju ta' qtugħ adottat minn Franza, jiġifieri aspettattiva ta' qtugħ ta' medja ta' tliet (3) sigħat fis-sena. Ta' min ifakkar li huwa proprju għal dawn ix-xtiewi estremi li l-mekkaniżmu tal-kapaċità fi Franza qed jipprova jilqa'.

(107)

Fil-premessa 164 tad-Deċiżjoni tal-Ftuħ, il-Kummissjoni kienet fakkret li l-Awtorità tal-Kompetizzjoni kienet issuġġeriet l-implimentazzjoni ta' tariffa għall-użu tas-sistemi pubbliċi ta' trażmissjoni u ta' distribuzzjoni tal-elettriku (TURPE) skont il-ħin u l-istaġuni, b'mod partikolari b'distinzjoni bejn l-aktar ħinijiet intensivi u s-sigħat inqas intensivi, sabiex tħeġġeġ it-tnaqqis tad-domanda tal-konsumaturi industrijali waqt il-perjodu tad-domanda massima. Franza kkonfermat li t-TURPE hija diġà skont il-ħinijiet u l-istaġuni, bi prezzijiet differenti skont l-istaġuni, il-ġranet tal-ġimgħa u/jew is-sigħat tal-ġurnata.

(108)

Fl-aħħar nett, fil-premessa 153 tad-Deċiżjoni tal-Ftuħ, il-Kummissjoni kkunsidrat li l-fatturi ta' de-rating (fl-iskema ta' ċertifikazzjoni normattiva fakultattiva) ma kinux ċari biżżejjed. Franza spjegat li, f'din l-iskema ta' ċertifikazzjoni normattiva fakultattiva, il-livell ta' kapaċità ċċertifikata (LKĊ) jikkorrispondi għall-medja tal-qawwa pprovduta mill-impjant fis-sigħat ta' PD2 fuq is-snin storiċi mmultiplikati bil-koeffiċjent tal-kontribuzzjoni tas-settur (jew fattur ta' de-rating). Dawn il-koeffiċjenti ta' kontribuzzjoni (85 % għall-idrawlika fil-ħin reali, 70 % għall-enerġija tar-riħ u 25 % għal tax-xemx) jirriflettu l-fatt li, għall-faċilitajiet tas-setturi inevitabbli, id-disponibbiltà medja fis-sigħat ta' PD2 ma tirriflettix eżatt il-kontribut ta' dawn il-faċilitajiet għat-tnaqqis tar-riskju ta' qtugħ minħabba: (i) il-korrelazzjoni bejn id-disponibbiltà tal-faċilità u l-waqtiet ta' tħaddim tas-sistema (li mhuwiex il-każ ta' kapaċità kontrollabbli) u (ii) profil ta' disponibbiltà mhux kostanti fis-sigħat ta' PD2 (il-kapaċitajiet kontrollabbli għandhom profil ta' disponibbiltà fiss) li għandu impatt peress li l-funzjoni tal-probabbiltà ta' qtugħ fis-sigħat ta' PD2 mhijiex uniformi. Il-koeffiċjenti ta' kontribuzzjoni għas-snin ta' konsenja 2017, 2018 u 2019 ġew ikkalkulati skont ix-xenarji tar-Rapport Provviżorju ta' RTE, ibbażati fuq ammont kbir ta' statistika.

(109)

Il-parti l-kbira ta' dawk li wieġbu tirreferi għad-diskriminazzjoni bejn il-ġestjoni tad-domanda impliċita u l-ġestjoni tad-domanda espliċita. Ħafna minnhom (5) iqisu li l-mekkaniżmu jiffavorixxi aktar lill-operaturi tad-domanda espliċita, minħabba l-obbligu ta' attivazzjoni impost fuq l-operaturi tad-domanda impliċita, li huwa meqjus pjuttost restrittiv. Tnejn minn dawk li wieġbu nnutaw li skont il-kriterju tas-sigurtà tal-provvista magħżul, kapaċità ta' ġestjoni espliċita għandha tkun attivata biss darba kull għaxar snin (peress li l-mekkaniżmu huwa mfassal għal xitwa qalila kull għaxar snin). Huma jqisu, għalhekk, li l-volum ta' sigħat ta' PD2 (disponibbiltà ta' ġestjoni tad-domanda espliċita) għandu jkun għaxar (10) darbiet ogħla mill-volum ta' sigħat ta' PD1 (tnaqqis effettiv tal-ġestjoni tad-domanda impliċita). Tnejn oħra ta' opinjoni opposta jinnutaw li fil-fehma tagħhom, il-kundizzjonijiet tal-operaturi tad-domanda impliċita huma aktar vantaġġjużi, peress li l-operaturi tad-domanda espliċita jridu jġorru l-ispejjeż taċ-ċertifikazzjoni. Tnejn li wieġbu jikkunsidraw li l-awtoritajiet Franċiżi sabu bilanċ tajjeb bejn l-obbligi taż-żewġ tipi ta' operaturi ta' ġestjoni tad-domanda.

(110)

Franza ddefendiet lilha nfisha billi enfasizzat id-diversi obbligi taż-żewġ tipi ta' operaturi ta' ġestjoni tad-domanda. Hija ssostni li l-kundizzjonijiet differenti huma meħtieġa proprju biex iż-żewġ tipi ta' kapaċitajiet ikunu jistgħu jipparteċipaw fil-mekkaniżmu. B'mod partikolari, peress li l-korrispettiv meħtieġ minn operatur ta' ġestjoni tad-domanda impliċita huwa akbar (attivazzjoni kontra disponibbiltà), huwa loġiku li n-numru ta' ġranet attribwiti lilu (ġranet ta' PD1) ikun inqas min-numru ta' ġranet li fihom operatur ta' ġestjoni tad-domanda espliċita jrid ikun disponibbli.

(111)

Xi partijiet interessati kienu mħassba li t-tul tal-perjodu PD2, għalkemm iktar minn dak ta' PD1, jista' jkun qasir wisq. Skont Franza, il-kejl tal-perjodi PD1 u PD2 huwa kwistjoni kumplessa, li s-soluzzjoni għaliha bilfors teħtieġ kompromess. RTE għamel studji biex jasal għal kompromess sodisfaċenti, li r-riżultati tagħhom ġew ippreżentati fir-Rapport li jakkumpanja l-proposta tar-regoli tal-mekkaniżmu tal-kapaċità (2014).

(112)

Fil-qosor, biex jiġu koperti l-ħinijiet tal-ogħla konsum (ara l-Figura 5 hawn taħt) għalkemm setgħu jsibu l-parteċipazzjoni tal-konsumaturi ġestibbli għat-tnaqqis tar-riskju ta' qtugħ, l-awtoritajiet Franċiżi għażlu li jżommu volum ta' bejn 100 u 150 siegħa għall-perjodu PD1.

Figura 5

Rabtiet bejn qtugħ u sigħat tal-ogħla konsum

Sors: RTE, Rapport li jakkumpanja l-proposta tar-regoli tal-mekkaniżmu tal-kapaċità (2014), p. 139

(113)

Skont Franza, il-PD2 għandu ċertament ikun itwal mill-PD1 (peress li l-kunċett ta' attivazzjoni huwa aktar eżiġenti minn dak ta' disponibbiltà), iżda l-PD2 lanqas ma għandu jkun twil wisq biex ma jkunx ta' żvantaġġ għal ċerti setturi, b'mod partikolari dawk tal-ġestjoni tad-domanda. Mill-istess studju ta' RTE irriżulta li 99 % tas-sigħat ta' qtugħ seħħew fit-300 siegħa tal-ogħla konsum u li, għaldaqstant, perjodu ta' PD2 immirat, li jkun fih bejn 100 u 300 siegħa ta' konsum għoli kien għażla konsistenti biex issir stima xierqa tal-kontribuzzjoni għat-tnaqqis tar-riskju ta' qtugħ tal-kapaċitajiet ta' ġestjoni tad-domanda espliċita.

(114)

F'din il-firxa ta' bejn 100 u 300 siegħa, l-awtoritajiet Franċiżi għażlu ċ-ċifra ta' 250 siegħa. Fil-fatt, din iċ-ċifra tippermetti (i) li jiġu koperti kważi 99 % tas-sigħat ta' qtugħ (ara l-Figura 5) u għalhekk ma twassalx għal tnaqqis fil-kopertura tar-riskju ta' qtugħ meta mqabbla mal-għażla massima ta' 300 siegħa, (ii) li tiżdied id-disponibbiltà tal-operaturi ta' ġestjoni tad-domanda espliċita meta mqabblin ma' setturi oħrajn (23). B'hekk, biex jiġi żgurat l-istess livell ta' sigurtà ta' provvista, l-awtoritajiet Franċiżi għażlu li jżommu massimu ta' 250 siegħa għall-perjodu PD2 sabiex jimmassimizzaw il-kontribuzzjoni tal-operaturi ta' ġestjoni tad-domanda espliċita għall-istess livell ta' kopertura tar-riskju ta' qtugħ.

(115)

Il-fatt li wieħed jipprovdi perjodu PD2 għaxar (10) darbiet itwal mill-perjodu PD1 ikun ifisser li wieħed irid ikejjel id-disponibbiltà tal-mezzi ta' produzzjoni u ta' ġestjoni tad-domanda fuq 1 000 sa 1 500 siegħa. Minħabba r-restrizzjonijiet ta' disponibbiltà tal-kapaċitajiet ta' ġestjoni tad-domanda fuq perjodi twal, l-estensjoni tal-obbligu ta' disponibbiltà tista' twassal biex dawn il-kapaċitajiet ikollhom inaqqsu l-potenzjal tagħhom ta' valorizzazzjoni fuq il-mekkaniżmu tal-kapaċità. Għalhekk, 100 MW ta' ġestjoni tad-domanda industrijali kapaċi li jkunu disponibbli għal madwar mitt siegħa, iżda mhux għal madwar elf siegħa, jingħataw valur ta' 20 MW ta' produzzjoni ta' sħana, meta l-istudji juru li l-kontribuzzjoni tagħhom għat-tnaqqis tar-riskju ta' qtugħ huwa komparabbli għal 90 MW ta' produzzjoni ta' sħana. Għalhekk, u biex tiġi żgurata kompetizzjoni ġusta bejn l-operaturi ta' ġestjoni tad-domanda u l-produtturi, l-awtoritajiet Franċiżi għażlu li ma jagħżlux perjodu PD2 għaxar (10) darbiet itwal mill-perjodu PD1 u li jużaw perjodu PD2 immirat.

(116)

Barra minn hekk, l-awtoritajiet Franċiżi jfakkru li l-mekkaniżmu tal-kapaċità jipprovdi monitoraġġ tad-disponibbiltà tal-kapaċitajiet (fin-nuqqas ta' attivazzjoni spontanja), li jgħin biex ikun żgurat li ma jkunx hemm effett ta' deadweight bejn impenn ta' disponibbiltà u impenn ta' attivazzjoni.

(117)

L-awtoritajiet Franċiżi huma madankollu miftuħa għall-iffissar ta' valuri oħrajn minn dawk magħżulin attwalment fir-regoli iżda jqisu li l-qafas attwalment fis-seħħ huwa bilanċ ġust bejn l-operaturi ta' ġestjoni tad-domanda indipendenti u l-fornituri. Għaldaqstant huma jemmnu li l-proporzjon bejn PD1 u PD2 għandu jinżamm kif inhu għall-ewwel snin ta' konsenja. Il-valur tiegħu mbagħad ikun jista' jiġi rivedut jekk is-sinjali mibgħuta ma jkunux rilevanti biżżejjed u din il-valutazzjoni tkun tista' tiġi integrata fil-valutazzjoni tal-funzjonament tas-suq tal-kapaċità.

(118)

Il-kummenti li waslu b'reazzjoni għad-Deċiżjoni tal-Ftuħ juru kunsens wiesa' fost l-atturi tas-suq biex il-mekkaniżmu Franċiż jinfetaħ gradwalment (jiġifieri mingħajr ma jipperikola t-tnedija tal-mekkaniżmu f'Jannar 2017) għall-kapaċitajiet transkonfinali.

(119)

B'reazzjoni, Franza pproponiet kunsiderazzjoni espliċita tal-kapaċitajiet barranin fuq mudell ibridu, li tikkumpensa kemm l-interkonnessjonijiet kif ukoll il-kapaċitajiet ta' produzzjoni u ta' ġestjoni tad-domanda barranin. F'din il-proposta, l-akbar kumpens jingħata kemm lill-interkonnessjonijiet kif ukoll lill-kapaċitajiet barranin skont l-iskarsezza.

(120)

F'din il-proposta, il-kapaċitajiet ta' produzzjoni u ta' ġestjoni tad-domanda jkollhom jakkwistaw biljetti ta' interkonnessjoni biex ikunu jistgħu jiġu ċċertifikati mbagħad joffru l-garanziji ta' kapaċità tagħhom fis-suq tal-kapaċità Franċiż.

(121)

Il-biljetti jingħataw lil kull fruntiera abbażi tal-kontribuzzjoni tal-Istati Membri transkonfinali għas-sigurtà tal-provvista fi Franza. Dawn il-biljetti mbagħad jinbiegħu f'irkant “fruntiera wara fruntiera”. Il-kapaċitajiet kollha ta' produzzjoni u ta' ġestjoni tad-domanda tal-pajjiż transkonfinali interkonness ma' Franza permezz ta' interkonnessjoni partikolari jingħataw il-possibbiltà li jipparteċipaw fl-irkant tal-biljetti ta' interkonnessjoni korrispondenti għal din l-interkonnessjoni. L-irkanti jsiru fis-sena ta' konsenja -1 (minn hawn 'il quddiem SK-1). L-iskema mhijiex kontra li kapaċitajiet b'kuntratt taħt il-mekkaniżmu Franċiż jipparteċipaw fl-istess waqt f'mekkaniżmi ta' kapaċità oħrajn fl-Unjoni Ewropea. F'dan il-kuntest, ikun jenħtieġ għalhekk li jiġu stabbiliti l-metodi ta' monitoraġġ u ta' valutazzjoni tas-servizz ipprovdut, bi sħab mal-Istati kkonċernati.

(122)

Ladarba l-kapaċitajiet ta' produzzjoni jew ta' ġestjoni tad-domanda barranin ikunu kisbu biljetti ta' interkonnessjoni, huma jkunu jistgħu jiġu ċċertifikati u jiksbu garanziji ta' kapaċità. Imbagħad ikunu jistgħu jbiegħu dawn il-garanziji tal-kapaċità fis-suq tal-kapaċità Franċiż.

(123)

L-awtoritajiet Franċiżi jintrabtu li jimplimentaw b'mod unilaterali s-soluzzjoni “ibrida pragmatika” msemmija hawn fuq, jiġifieri li jintegraw fil-qafas regolatorju tagħhom il-possibbiltà li l-faċilitajiet li jinsabu fl-Istati Membri ġirien jipparteċipaw b'mod espliċitu fil-mekkaniżmu tal-kapaċità Franċiż diment li jkun hemm kapaċità ta' tranżitu suffiċjenti għall-interkonnessjonijiet. Dan il-qafas regolatorju ser ikun jeħtieġ madankollu l-qbil tal-operaturi tas-sistemi ta' trażmissjoni (24) (TSO) tal-Istati Membri kkonċernati, fil-forma ta' protokoll ta' kooperazzjoni li jistabbilixxi l-proċess ta' ċertifikazzjoni u ta' kontrolli meħtieġa għall-implimentazzjoni tal-mekkaniżmu.

(124)

Jekk dan il-protokoll ma jiġix iffirmat minn ċerti TSO tal-Istati Membri kkonċernati, l-awtoritajiet Franċiżi jintrabtu li jimplimentaw proċedura ta' salvagwardja li tippermetti li l-kapaċitajiet barranin ikollhom parteċipazzjoni espliċita fil-mekkaniżmu tal-kapaċità u b'hekk li joħorġu b'mod definittiv mill-mudell ibbażat fuq parteċipazzjoni impliċita. Din il-proċedura ta' salvagwardja se tikkonsisti f'parteċipazzjoni espliċita tal-interkonnessjonijiet (soluzzjoni li tista' tiġi implimentata mingħajr l-appoġġ tal-Istati Membri l-oħrajn u li tgħin biex ikun rifless il-valur miġjub mill-kapaċitajiet tal-interkonnessjonijiet għas-sigurtà tal-provvista ta' Franza).

(125)

L-implimentazzjoni ta' dawn l-impenji teħtieġ reviżjoni tad-Digriet tal-2012, maħruġ mill-Kunsill tal-Istat wara l-parir tal-Kunsill Superjuri tal-Enerġija, tal-Kunsill Nazzjonali tal-valutazzjoni tal-istandards, tal-Kummissjoni li tirregola l-enerġija u tal-Awtorità tal-Kompetizzjoni. L-awtoritajiet Franċiżi jikkunsidraw li mhux maħsub li jiġi adottat id-digriet qabel l-aħħar tal-2017 imbagħad reviżjoni tar-regoli adottati għall-applikazzjoni tiegħu. L-awtoritajiet Franċiżi jikkunsidraw li din il-fażi tista' tieħu madwar sitt (6) xhur. Il-kalendarju ppreżentat mill-awtoritajiet Franċiżi huwa bbażat għalhekk fuq varjazzjoni fil-qafas regolatorju fl-2018 għal implimentazzjoni effettiva għas-sena ta' konsenja 2019.

(126)

Il-Kummissjoni rċeviet għadd ta' tweġibiet dwar dan is-suġġett u l-opinjonijiet espressi kienu jvarjaw ħafna.

(127)

Il-parti l-kbira (7) ta' dawk li wieġbu taqbel li l-mekkaniżmu ma jistax, fil-forma inizjali tiegħu, jinkoraġġixxi investimenti ġodda f'impjanti ta' produzzjoni. Ir-raġunijiet li l-aktar ġew ikkwotati huma fost l-oħrajn in-nuqqas ta' sinjal ta' prezz rappreżentattiv kmieni biżżejjed qabel is-sena ta' konsenja, il-limitu massimu tal-prezz tal-kapaċità stabbilit għal EUR 40 000/MW (li jirriżulta mil-limitu massimu applikabbli għall-mekkaniżmu tas-saldu tad-differenzi) u n-nuqqas ta' kuntratti fit-tul.

(128)

Fil-fatt, fil-parti l-kbira tagħhom, dawk li wieġbu kkonfermaw jew li l-mekkaniżmu kien ikkumplikat ħafna, jew li kien tassew diffiċli għall-fornituri, u b'mod speċjali għall-parteċipanti l-ġodda, li jbassru l-portafolli futuri tagħhom. Wieħed minn dawk li wieġbu qal li mekkaniżmu tal-kapaċità ċentralizzat jista' jevita dan it-tip ta' problemi.

(129)

Żewġ produtturi (stabbiliti) mhumiex ta' din il-fehma u jaħsbu li l-mekkaniżmu ser jattira investimenti ġodda, l-aktar minħabba l-iskadenza ta' erba' (4) snin qabel is-sena ta' konsenja, il-possibbiltà għas-suq li jiżviluppa prodotti forward u s-sinjal tal-prezz, li huma jqisu affidabbli. Barra minn hekk huma jqisu li l-mekkaniżmu jipprovdi salvagwardji suffiċjenti biex tiġi żgurata t-trasparenza tal-obbligi tal-kapaċità, b'mod partikolari permezz tal-pubblikazzjoni regolari, minn RTE, tal-previżjonijiet dwar il-livell globali tal-garanziji tal-kapaċità meħtieġa għal kull sena ta' konsenja.

(130)

Tnejn oħrajn minn dawk li wieġbu (produtturi alternattivi) jinnutaw li l-għan ewlieni tal-mekkaniżmu huwa li jkompli l-operat tal-kapaċitajiet eżistenti minflok li jħeġġeġ investimenti ġodda.

(131)

Wara r-reazzjonijiet tal-partijiet terzi, l-awtoritajiet Franċiżi ntrabtu li jimplimentaw skema ta' kuntratti pluriennali biex jinkoraġġixxu l-investiment f'kapaċitajiet ġodda. Il-kapaċitajiet il-ġodda kollha (25) ser ikunu eliġibbli għall-iskema jekk mgħandhomx diġà mekkaniżmu ta' appoġġ.

(132)

Biex ikun permess perjodu ta' implimentazzjoni suffiċjenti għall-proġetti ġodda, l-ewwel irkant ta' garanziji tal-kapaċità ser jiġi organizzat fuq il-pjattaforma EPEX fis-SK-4. Il-kapaċitajiet il-ġodda potenzjali jkollhom jippreżentaw l-offerti tagħhom lil RTE fl-aħħar kwart tas-SK-4. L-offerti jridu joffru primarjament prezz u volum.

(133)

Il-kompetittività tal-prezz imbagħad titqabbel ma' “prezz ta' referenza inizjali” u l-offerti ogħla minnu ma jiġux aċċettati. Il-prezz ta' referenza inizjali ser ikun prezz ippeżat (26) tal-kapaċità li tirriżulta mhux biss mill-irkant organizzat fis-SK-4 għas-sena ta' konsenja SK, iżda wkoll mill-irkantijiet organizzati matul din l-istess sena għas-snin ta' konsenja SK-2 u SK-1, kif indikat fil-Figura 6.

Figura 6

Proposta għall-kompożizzjoni tal-prezz ta' referenza inizjali

Sors: L-ittra tal-awtoritajiet Franċiżi tad-9 ta' Settembru 2016

(134)

Għaldaqstant l-atturi tas-suq mhumiex se jkunu jafu minn qabel il-prezz ta' referenza inizjali u huma r-riżultati tas-suq li se jippermettu li jiġi ddeterminat dan il-prezz ta' referenza inizjali.

(135)

F'dak li jirrigwarda l-volumi li jridu jiġu kkuntrattati, l-awtoritajiet Franċiżi se japplikaw kurva tad-domanda li tillimita dawn il-volumi għall-offerti li huma tassew kompetittivi fit-tul. Il-kurva tad-domanda se tkun imfassla kull sena minn RTE u approvata mis-CRE, u ser ikollha tirrifletti l-valur tal-kapaċità l-ġdida għall-komunità. Dan sabiex jiġi żgurat li l-mekkaniżmu tal-kuntratti pluriennali ser ikollu effettivament impatt pożittiv għall-konsumaturi.

(136)

Il-kapaċitajiet magħżulin ser igawdu minn kuntratt għal differenza għal 7 snin komparabbli, fl-operat tiegħu, għal kumpens addizzjonali (“feed-in premium”), li jfisser li kwalunkwe differenza bejn il-prezz tal-offerta u l-prezz ta' referenza tas-suq jew ser tagħti lok għal rimborż tad-differenza (jekk il-PRS ikun ogħla mill-prezz tal-offerta) jew għal inkass (jekk il-PRS ikun aktar baxx mill-prezz tal-offerta). Madankollu, biex l-operaturi tas-suq jiġu mħeġġa jimmassimizzaw id-dħul tagħhom, kwalunkwe dħul iġġenerat mill-bejgħ tal-garanziji bi prezz ogħla mill-prezz tal-offerta ma jagħtix lok għal rimborż tad-differenza (prezz tal-bejgħ — prezz tal-offerta) mill-investitur.

(137)

L-awtoritajiet Franċiżi jikkunsidraw, barra minn hekk, l-introduzzjoni ta' kriterji ambjentali li jagħtu preferenza lill-produtturi li b'emissjonijiet ta' karbonju baxxi, fil-forma (i) ta' preċedenza ambjentali, b'karatteristiċi tekniċi u ekonomiċi identiċi, u (ii) limitu massimu fuq l-emissjonijiet li jistgħu jkunu ġġenerati minn assi li jista' jibbenefika mill-qafas speċifiku għall-kapaċitajiet il-ġodda. Il-kriterji ambjentali, bħal-livell ta' emissjoni ta' gassijiet b'effett ta' serra, se jiġu definiti fir-regoli u l-aħjar offerta f'termini ambjentali tista' tintgħażel jekk ikun meħtieġ. Barra minn hekk, il-faċilitajiet eżistenti se jibqgħu soġġetti għar-regolamenti ambjentali Ewropej u Franċiżi fis-seħħ, li għal dawn il-faċilitajiet jista' jkun ifisser il-ħtieġa ta' investimenti ta' konformità.

(138)

L-awtoritajiet Franċiżi jintrabtu li jimplimentaw l-iskema għall-għażla tal-kapaċitajiet fl-2019 flimkien ma' parteċipazzjoni inizjali effettiva tal-kapaċitajiet magħżula għas-sena ta' konsenja 2023. Barra minn hekk, huma jintrabtu li mill-2019 jibdew jimplimentaw skema tranżitorja ta' kuntratti pluriennali, li jkopru l-perjodu ta' bejn l-2020 u l-2023. Dan ikun ifisser, pereżempju, li fl-2019, tiġi mnedija skema “perenni” għas-sena ta' konsenja 2023 iżda tiġi mnedija wkoll skema tranżitorja għas-snin ta' konsenja 2020, 2021 u 2022.

(139)

L-awtoritajiet Franċiżi jqisu li l-previżjonijiet regolari ta' RTE għandhom ikunu ta' għajnuna biżżejjed lill-fornituri biex ikunu jistgħu jbassru l-livell finali tal-obbligu ta' kapaċità tagħhom. L-awtoritajiet iżidu li l-fornituri għandhom il-possibbiltà, tal-anqas matul l-ewwel snin tal-mekkaniżmu, li jaġġustaw il-kapaċitajiet tagħhom mingħajr ħlas sal-aħħar tas-sena tal-konsenja.

(140)

Minkejja dan li ntqal, u minbarra din is-salvagwardja, l-awtoritajiet Franċiżi jipproponu li jdaħħlu dispożizzjonijiet dwar l-appoġġ lill-fornituri alternattivi fir-regoli tal-mekkaniżmu tal-kapaċità f'dak li jirrigwarda l-kalkolu tal-obbligu tal-kapaċità tagħhom. Fil-preżent, ir-regoli jipprovdu li RTE għandu jinnotifika lil kull fornitur livell ta' obbligu provviżorju sena wara s-sena ta' konsenja, imbagħad livell ta' obbligu finali sentejn wara s-sena ta' konsenja. Barra minn hekk, RTE żviluppa għodod ta' akkumpanjament biex jinforma lill-atturi dwar il-livell tal-obbligu tagħhom qabel dawn l-iskadenzi. Franza tipproponi li tifformalizza l-obbligu ta' RTE li jappoġġja lill-fornituri fil-kalkolu tal-obbligu tagħhom, b'mod partikolari billi joffri għodod li jgħinu lill-fornituri alternattivi jantiċipaw aħjar l-obbligu ta' kapaċità tagħhom u bl-inklużjoni ta' punti ta' kuntatt regolari li fihom il-fornituri jużaw dawn l-għodod biex ibassru l-obbligu tagħhom. Il-fornituri se jkollhom ukoll il-possibbiltà li jużaw dawn l-għodod meta jridu minbarra dawn il-punti ta' kuntatt inklużi fir-regoli.

(141)

Barra minn hekk, l-awtoritajiet Franċiżi ntrabtu li jirrevedu t-termini tar-riekwilibriju, sabiex jinkoraġġixxu lill-operaturi tal-kapaċità jiksbu ċertifikat bl-akbar preċiżjoni possibbli. Speċifikament, l-ispejjeż tar-riekwilibriji mgħoddija fuq l-atturi jiġu kkalkulati skont il-volum ta' riekwilibriju ta' kull attur:

(142)

Il-mod kif jiżdiedu l-ispejjeż tar-riekwilibriju, skont il-każ, jidhru fil-Figura 7 li ġejja (sena ta' konsenja: 2020), bi prezz ta' unità dejjem akbar aktar ma toqrob is-sena ta' konsenja.

Figura 7

Deskrizzjoni tal-qafas il-ġdid propost għar-riekwilibriji għas-sena 2020 b'k = 0,2

Sors: L-ittra tal-awtoritajiet Franċiżi tad-9 ta' Settembru 2016

(143)

Issal-operaturi tal-kapaċità jkollhom jirriekwilibraw ruħhom fi żmien qasir u stabbilit fir-regoli f'avvenimenti kbar (jiġifieri li jikkawżaw nuqqas ta' disponibbiltà tal-mezzi meta mqabbla mat-tbassir tad-disponibbiltà tagħhom, bħad-diżattivazzjoni temporanja, l-għeluq definittiv, ħsara li twassal għal tnaqqis tad-disponibbiltà għal perjodu twil, eċċ) (27).

(144)

L-awtoritajiet Franċiżi jipproponu wkoll modifika fil-mekkaniżmu tas-saldu tad-differenzi biex jiskoraġġixu aktar lill-atturi tas-suq milli jippreżentaw differenzi negattivi jew pożittivi fi kwalunkwe ħin. B'mod partikolari, il-koeffiċjent ta' inċentiv “k”, applikat għall-iżbilanċi, ser ikun irduppjat (kien iffissat għal 0,1 fid-Digriet tat-22 ta' Jannar 2015 iżda hekk ser jiżdied għal 0,2) u ser jiżdied ukoll aktar għall-iżbilanċi negattivi li jaqbżu limitu massimu ta' 1 GW u saħansitra ser irodd anqas għall-iżbilanċi pożittivi li wkoll jaqbżu limitu massimu ta' 1 GW (il-livell preċiż tal-limiti massimi għadu jrid jiġi stabbilit mill-awtoritajiet abbażi ta' dħul mis-suq iżda xorta mhux ser jaqbeż il-1 GW). Dawn l-emendi huma spjegati fil-Figura 8.

Figura 8

Deskrizzjoni tal-proposta tas-saldu tad-differenzi bl-effett tal-limitu ta' 1 GW u b'k = 0,2

Sors: L-ittra tal-awtoritajiet Franċiżi tad-9 ta' Settembru 2016

(145)

Barra minn hekk, l-awtoritajiet Franċiżi ntrabtu li jżidu gradwalment il-prezz amministrat (li huwa limitu massimu fuq il-prezz tad-differenzi u, għalhekk, indirettament fuq il-prezz tal-garanziji tal-kapaċità), skont l-iskeda li ġejja:

(146)

Barra minn hekk, l-awtoritajiet Franċiżi jintrabtu għas-snin ta' konsenja 2021 u dawk sussegwenti, li jaġġornaw kull sena l-prezz amministrat biex iġibuh għal valur korrispondenti għall-CONE, b'mod partikolari għall-ispejjeż ta' impjant li jaħdem bil-gass tat-tip GCC jew b'ċiklu miftuħ, kif ikkalkulat mill-operatur tas-sistema pubblika ta' trażmissjoni tal-elettriku u approvat mir-regolatur. Dan l-aġġornament mhux bilfors isir permezz ta' proċedura ta' reviżjoni sħiħa tar-regoli tal-mekkaniżmu tal-kapaċità.

(147)

Din l-iskeda tippermetti (i) li żieda eventwali fil-prezz amministrat tikkoinċidi mad-dħul fis-seħħ tal-iskema tal-kuntratti pluriennali għall-kapaċitajiet ġodda u (ii) li l-atturi tas-suq jiġu eżaminati kemm dwar iż-żieda fil-prezz amministrat kif ukoll dwar l-introduzzjoni tal-iskema tal-kuntratti pluriennali għal-kapaċitajiet il-ġodda (28).

(148)

Minbarra dan li ntqal u dak li kien indikat fid-Deċiżjoni tal-Ftuħ, il-Kummissjoni kienet uriet fid-diskussjonijiet mal-awtoritajiet Franċiżi l-biża' tagħha li l-firxa bejn l-ARENH u l-prezz tal-elettriku fis-suq tal-enerġija seta' jkun ukoll limitu impliċitu fuq il-prezzijiet tal-kapaċità, minħabba li l-prodott ARENH jinkludi l-garanziji tal-kapaċitajiet.

(149)

L-awtoritajiet Franċiżi wieġbu li:

(150)

Madankollu, l-awtoritajiet Franċiżi jintrabtu, bħala parti minn valutazzjoni futura tal-funzjonament tas-suq, li jistudjaw l-opportunità li “jiffinanzjalizzaw” is-sehem tal-kapaċità tal-prodott ARENH, (30) sabiex jevitaw li dan il-prodott ifixkel il-formazzjoni libera tal-prezzijiet fis-suq tal-kapaċità.

(151)

Fil-premessa (182) tad-Deċiżjoni tal-Ftuħ, il-Kummissjoni kienet qalet li Franza kellha tiċċara għala xi proposti ta' titjib tal-mekkaniżmu li għamlet l-Awtorità tal-Kompetizzjoni fl-Opinjoni tagħha Nru 12-A-09 tat-12 ta' April 2012 ma kinux ġew ikkunsidrati.

(152)

L-awtoritajiet Franċiżi spjegaw li, meta jitqiesu l-emendi proposti (jiġifieri l-obbligu fuq il-produtturi li jiddikjaraw id-disponibbiltà provviżorja tal-faċilitajiet ta' produzzjoni tagħhom abbażi tad-disponibbiltà storika tagħhom u l-implimentazzjoni ta' mekkaniżmu għall-parteċipazzjoni espliċita tal-kapaċitajiet transkonfinali), kien hemm biss żewġ proposti tal-Awtorità tal-Kompetizzjoni li ma ntgħażlux:

(153)

Rigward l-ewwel proposta li ma ġietx adottata, l-awtoritajiet spjegaw li kienu għażlu ċ-ċertifikazzjoni tal-faċilitajiet taħt obbligu ta' xiri sabiex jirrispettaw il-karattru “market-wide” tal-mekkaniżmu tal-kapaċità. Għall-kuntrarju, biex tkun evitata l-possibbiltà ta' akkumulazzjoni ta' kumpensi għall-faċilitajiet taħt obbligu ta' xiri, ġie deċiż li x-xerrejja obbligati jkunu responsabbli miċ-ċertifikazzjoni ta' dawn il-faċilitajiet, u detenturi ta' garanziji tal-kapaċitajiet relatati, u d-dħul mill-bejgħ tal-kapaċitajiet jitnaqqas mill-kumpens tax-xerrejja obbligati.

(154)

Rigward it-tieni proposta mhux adottata, l-awtoritajiet spjegaw li ġie deċiż li s-sejħa tranżitorja għall-proġetti ma tiġix implimentata; għalhekk il-fornituri alternattivi ma kellhom ebda spiża xi jħallsu. Madankollu fil-futur se jħallsu spejjeż għal din l-iskema, peress li l-iskema ta' sigurtà attwali se titħassar u se tiġi sostitwita mill-iskema tal-kuntratti pluriennali wara li jinbidel id-digriet.

(155)

Il-kummenti tal-partijiet interessati dwar dan il-punt huma inklużi fit-Taqsima 4.3.3.1 aktar 'il fuq.

(156)

Il-kummenti ta' Franza dwar dan il-punt huma inklużi fil-premessa 139 aktar 'il fuq.

(157)

Minkejja dawn il-kummenti, l-awtoritajiet qegħdin jipproponu li jobbligaw lil RTE jassisti lill-fornituri alternattivi fil-kalkolu tal-obbligu ta' kapaċità tagħhom, kif spjegat fil-premessa (140).

(158)

Il-maġġoranza ta' dawk li wieġbu (13) jilmentaw min-nuqqas ta' viżibbiltà tat-tranżazzjonijiet mhux irregolati, u b'mod aktar partikolari tat-tranżazzjonijiet intragrupp, meta ħafna minnhom jemmnu li l-parti l-kbira tat-tranżazzjonijiet għandha ssir f'din il-forma. Wieħed minn dawk li wieġbu reġa' saħaq li mekkaniżmu tal-kapaċità ċentralizzat jista' jevita dan it-tip ta' problemi.

(159)

Min-naħa tiegħu l-operatur stabbilit iqis li l-mekkaniżmu, fil-forma attwali tiegħu, joffri salvagwardji suffiċjenti biex jiżgura t-trasparenza tal-kummerċ (inkluż intragrupp), fosthom:

(160)

L-awtoritajiet Franċiżi jsemmu wkoll is-salvagwardji identifikati mill-operatur stabbilit (imsemmija fil-premessa 160). Huma jiddikjaraw ukoll li, minħabba li l-fornituri jridu jadattaw għat-tibdil fil-klijentela tagħhom, huwa xieraq li tinżamm il-possibbiltà tal-kummerċ mhux irregolat bejn l-atturi tas-suq apparti l-irkantijiet minn żmien għal żmien. Mekkaniżmu ta' kummerċ kontinwu jiżgura din il-flessibbiltà, kif ukoll il-viżibbiltà tat-tranżazzjonijiet u tal-prezzijiet, u jgħin biex tittaffa d-diskrepanza fl-informazzjoni bejn l-atturi tas-suq. Madankollu, il-parteċipazzjoni f'mekkaniżmu bħal dan hija għalja, b'mod partikolari għall-fornituri relattivament żgħar. Għaldaqstant l-awtoritajiet Franċiżi jipproponu li jżommu t-tranżazzjonijiet mhux irregolati flimkien ma' suq organizzat, fejn il-prezz ta' kull tranżazzjoni jkun ippubblikat.

(161)

Madankollu, huma jipproponu wkoll li jipprovdu salvagwardji addizzjonali biex tikber it-trasparenza u r-rappreżentanza tal-kummerċ tal-kapaċità.

(162)

Il-mekkaniżmu diġà jipprovdi li l-prezzijiet tal-irkantijiet fuq il-pjattaforma li ser jistabbilixxi EPEX Spot ikunu ppubblikati. Biex jiġi żgurat livell ta' trasparenza bħal dak ta' pjattaforma ta' negozjar għat-tranżazzjonijiet mhux irregolati, l-awtoritajiet Franċiżi qegħdin jipproponu li jagħtu lill-atturi kollha aċċess għar-reġistru tat-tranżazzjonijiet mhux irregolati (anonimizzati), u b'hekk jiżguraw il-viżibbiltà tal-volumi u tal-prezzijiet, waqt li jiggarantixxu l-anonimità tal-operaturi. Il-partijiet interessati mbagħad ikunu jistgħu jieħdu din l-informazzjoni inkunsiderazzjoni fl-istrateġija tax-xiri u tal-bejgħ tagħhom fl-irkantijiet organizzati.

(163)

Barra minn hekk, l-irkantijiet ser jissaħħu. L-awtoritajiet Franċiżi ntrabtu li jżidu l-likwidità tal-irkantijiet organizzati, billi tellgħu n-numru ta' irkantijiet matul l-erba' (4) snin ta' qabel l-ewwel sena ta' konsenja għal 15, jiġifieri rkant wieħed (1) ġdid fis-sena ta' konsenja SK-4, erbgħa fis-SK-3, erbgħa (4) oħra fis-SK-2 u fl-aħħar sitta (6) fis-SK-1 (fl-ewwel verżjoni tal-mekkaniżmu, l-awtoritajiet Franċiżi kienu pprovdew biss għaxar (10) irkantijiet, mifruxa fuq it-tliet (3) snin ta' qabel is-sena ta' konsenja).

(164)

Barra minn hekk, l-awtoritajiet Franċiżi jintrabtu li jġiegħlu, fil-qafas regolatorju, lil ċerti operaturi tal-kapaċità joffru ċ-ċertifikati tagħhom fis-suq abbażi tal-iskema li ġejja:

(165)

Din ir-restrizzjoni se tapplika għal dawk responsabbli miż-żona ta' ċertifikazzjoni li jkollhom volum ta' kapaċità li jaqbeż limitu ta' 3 GW.

(166)

Il-kummenti tal-partijiet terzi u l-kummenti tal-awtoritajiet Franċiżi rigward id-diskriminazzjoni potenzjali bejn id-diversi tipi ta' kapaċità ta' ġestjoni tad-domanda huma diskussi fit-Taqsima 4.3.1.

(167)

Il-kummenti tal-partijiet interessati u l-proposti tal-awtoritajiet Franċiżi sabiex jirrimedjaw għall-esklużjoni b'mod partikolari tal-kapaċitajiet transkonfinali u tal-investimenti ġodda huma deskritti fit-Taqsima 4.3.3.

(168)

Tliet kwarti tal-partijiet li rreaġixxew għad-Deċiżjoni tal-Ftuħ jirreferu speċifikament għar-riskju taż-żamma tal-kapaċitajiet fil-mekkaniżmu Franċiż.

(169)

Assoċjazzjoni ta' konsumaturi industrijali Franċiżi tibża' li EDF għandu interess li jtella' l-prezz ta' referenza tas-suq (MRP) u li jbiegħ il-kapaċità żejda wara s-sena ta' konsenja, peress li:

(170)

Fornitur alternattiv innota li minbarra l-fatt li l-irkantijiet organizzati aktarx mhumiex ser jirrappreżentaw il-kummerċ li jsir bħala parti mill-mekkaniżmu (il-fornituri ser ikollhom it-tentazzjoni li jagħżlu tranżazzjonijiet bilaterali sabiex jevitaw il-ħlasijiet bil-quddiem), il-fatt li l-MRP mhux se jieħu inkunsiderazzjoni t-tranżazzjonijiet magħmulin tul jew wara s-sena ta' konsenja jista' jkompli jdgħajjef l-effett dissważiv tal-mekkaniżmu tas-saldu tad-differenzi u b'hekk jinkoraġġixxi l-istrateġiji ta' żamma tad-detenturi tal-kapaċitajiet.

(171)

Biex iħeġġeġ aktar lill-operaturi tal-kapaċità ma jżommux il-kapaċitajiet, dan il-fornitur alternattiv jipproponi tliet miżuri korrettivi:

(172)

L-Assoċjazzjoni tal-Fornituri u l-Produtturi Alternattivi AFIEG tikkritika l-għażla ta' riekwilibriju tal-kapaċitajiet mingħajr ħlas qabel is-sena ta' konsenja, għax tippermetti, fil-fehma tagħha, li jittieħdu riskji bid-disponibbiltà tal-flotta nukleari, u b'hekk li jinħolqu nuqqasijiet jew kapaċitajiet żejda artifiċjali.

(173)

Minħabba dawn ir-reazzjonijiet tal-atturi tas-suq għad-Deċiżjoni tal-Ftuħ, l-awtoritajiet Franċiżi wrew ix-xewqa li jtejbu l-iskema sabiex inaqqsu kemm jista' jkun kwalunkwe riskju ta' abbuż tal-qawwa fis-suq.

(174)

B'mod partikolari, huma jintrabtu li jġiegħlu lill-operaturi tal-kapaċità jiċċertifikaw minn qabel bi preċiżjoni l-kapaċitajiet kollha disponibbli tagħhom u illimitaw il-possibbiltajiet tagħhom ta' ċertifikazzjoni għal proċedura stabbilita fuq valuri ta' referenza storika (ara l-Figura 9). Kwalunkwe differenza minn din il-firxa trid tkun iġġustifikata ma' RTE u mar-regolatur.

Figura 9

Illustrazzjoni tal-proċedura ta' ċertifikazzjoni

Sors: L-ittra tal-awtoritajiet Franċiżi tad-9 ta' Settembru 2016

(175)

Barra minn hekk, l-awtoritajiet Franċiżi ntrabtu li jirrevedu t-termini tar-riekwilibriju, sabiex jinkoraġġixxu lill-operaturi tal-kapaċità jiksbu ċertifikat bl-akbar preċiżjoni possibbli. Huma jipproponu li kull riekwilibriju sinifikanti akkumulat (li jaqbeż limitu ta'massimu 1 GW; il-livell preċiż tal-limitu jrid ikun definit mill-awtoritajiet abbażi ta' dħul mis-suq iżda fl-ebda każ mhu ser jaqbeż 1GW) li jseħħ qabel is-sena ta' konsenja, joħloq penali. Il-penali, li tiskoraġġixxi lill-operaturi tal-kapaċità milli jiċċertifikaw inqas jew aktar il-kapaċitajiet tagħhom, tiżdied gradwalment sas-saldu tad-differenzi. L-operaturi tal-kapaċità jridu wkoll jirriekwilibraw malli jkunu jafu b'xi avveniment li jwassal għan-nuqqas ta' disponibbiltà tal-mezzi (diżattivazzjoni temporanja, għeluq definittiv, ħsara li twassal għal tnaqqis tad-disponibbiltà fit-tul, eċċ.) meta mqabbla mat-tbassir tad-disponibbiltà tagħhom.

(176)

L-awtoritajiet jipproponu wkoll modifika fil-mekkaniżmu tas-saldu tad-differenzi sabiex ikomplu jiskoraġġixxu lill-atturi tas-suq milli jippreżentaw differenzi negattivi jew pożittivi fi kwalunkwe mument. B'mod partikolari, il-koeffiċjent ta' inċentiv “k”, applikat għall-iżbilanċi, ser ikun irduppjat u barra minn hekk ser jiżdied ukoll aktar għall-iżbilanċi negattivi li jaqbżu limitu ta' massimu 1 GW u ser irendi inqas għall-iżbilanċi pożittivi li wkoll jaqbżu limitu massimu ta' 1 GW (il-livell preċiż tal-limiti għad irid jiġi definit mill-awtoritajiet abbażi ta' dħul mis-suq iżda xorta waħda mhux ser jaqbeż 1 GW).

(177)

Bi tweġiba għall-ilment ta' fornitur alternattiv li l-iskema ta' sigurtà jista' jinkoraġġixxi lill-operaturi jadottaw strateġija ta' żamma, l-awtoritajiet Franċiżi kkonfermaw li din l-iskema ta' sigurtà se titħassar u se tiġi sostitwita mill-iskema ta' kuntratti pluriennali (deskritta fil-premessi 131 sa 138 ta' dan id-dokument).

(178)

Fl-aħħar nett, kif spjegat fil-premessi 146 sa 147 ta' dan id-dokument, l-awtoritajiet Franċiżi jipproponu li jżidu l-ammont massimu ta' kumpens tad-differenzi tal-prezzijiet applikat f'każ ta' theddida serja għas-sigurtà tal-provvista (jiġifieri żbilanċ globali negattiv ta' aktar minn 2 GW). Huwa propost li dan il-limitu (il-prezz amministrat jew Padmin) jissaħħaħ gradwalment minn EUR 20 000/MW fl-2017 għal EUR 40 000/MW fl-2018 u fl-2019, u finalment għal EUR 60 000/MW fl-2020. Mis-sena ta' konsenja 2021 l-awtoritajiet Franċiżi se jaġġornaw il-prezz amministrat kull sena sabiex itellgħuh għal valur li jikkorrispondi għall-ispejjeż ta' parteċipant ġdid (CONE), b'mod partikolari għall-ispejjeż ta' impjant tal-gass tat-tip GCC jew b'ċiklu miftuħ, kif ikkalkulat mill-operatur tas-sistema pubblika ta' trażmissjoni tal-elettriku u approvat mir-regolatur.

(179)

Erbgħa minn dawk li wieġbu huma partikolarment imħassba dwar ir-riskju li jinżammu l-garanziji tal-kapaċità jew, fi kwalunkwe każ, li tonqos il-likwidità fis-suq tal-garanziji.

(180)

L-Assoċjazzjoni tal-Fornituri u l-Produtturi Alternattivi AFIEG innutat li l-mekkaniżmu li jobbliga lill-atturi tas-suq li jkollhom garanziji żejda wara s-sena ta' konsenja (iżda qabel is-saldu tad-differenzi) li jbiegħu dan l-eċċess fl-irkantijiet mhux ser ikun biżżejjed biex jipprevjeni ż-żamma tal-garanziji qabel is-sena ta' konsenja (il-perjodu kkunsidrat għad-determinazzjoni tal-MRP).

(181)

Minbarra s-suġġerimenti maħsuba biex iżidu l-inċentivi biex wieħed jirriekwilibrija ruħu qabel is-sena ta' konsenja (reviżjoni tal-bażi tat-taxxa tal-MRP u tisħiħ tal-effett dissważif tal-mekkaniżmu tas-saldu tad-differenzi), dawk li wieġbu pproponew żewġ miżuri biex jittejjeb l-aċċess għall-garanziji tal-kapaċità:

(182)

Minħabba dan it-tħassib, l-awtoritajiet Franċiżi ntrabtu li jirrevedu l-mekkaniżmu b'mod li jobbligaw lill-operaturi tal-kapaċità joffru ċerti volumi minimi ta' garanziji waqt kull irkant organizzat qabel is-sena ta' konsenja, kif spjegat fil-premessi 165 u 166. Barra minn hekk, se jiġu organizzati rkanti oħrajn, kif spjegat fil-premessa 164.

(183)

B'referenza għal avviż maħruġ mill-Awtorità tal-Kompetizzjoni fl-2012, tnejn minn dawk li wieġbu wrew tħassib dwar sussidji trażversali bejn is-settur tal-produzzjoni u s-settur tal-kummerċjalizzazzjoni tal-operatur stabbilit (jiġifieri l-bejgħ tal-garanziji tal-kapaċità lill-kompetituri bi prezz ogħla mill-prezz tal-bejgħ intern bejn is-settur tal-produzzjoni u s-settur tal-kummerċjalizzazzjoni tiegħu, bil-konsegwenza li jiġu esklużi kompetituri mis-suq tal-provvista tal-elettriku). Dan is-sussidju trażversali jista', fil-fehma tagħhom, iwassal għal “kompressjoni tat-tariffi” għal fornitur alternattiv mingħajr assi ta' produzzjoni, peress li jkollu jixtri garanziji fis-suq biex jissodisfa l-obbligi ta' kapaċità tiegħu.

(184)

Rigward il-possibbiltà ta' prattiki ta' esklużjoni mill-prezzijiet (kompressjoni tal-marġnijiet jew kompressjoni tat-tariffi, prezzijiet predatorji), l-awtoritajiet Franċiżi fakkru li prattiki antikompetittivi bħal dawn diġà huma soġġetti għal kontroll u sanzjonijiet mill-Awtorità tal-Kompetizzjoni.

(185)

Madankollu, sabiex jiffaċilitaw id-detezzjoni ta' prattiki bħal dawn, l-awtoritajiet sejrin isaħħu r-regoli billi jġiegħlu lill-atturi integrati vertikalment jikkomunikaw lill-Kummissjoni li tirregola l-enerġija l-metodu tagħhom ta' kif jikkunsidraw il-prezz tal-garanziji tal-kapaċità fl-offerti tagħhom.

(186)

Huma se jispeċifikaw ukoll b'mod aktar ċar fir-regoli li l-atturi integrati vertikalment huma meħtieġa li jiddikjaraw prezz għal kwalunkwe tranżazzjoni interna li tirrigwarda garanziji tal-kapaċità. B'hekk lakuna fil-leġiżlazzjoni li tippermetti t-trasferiment bla ħlas tal-garanziji ser tiġi kkoreġuta.

(187)

Fl-aħħar nett, l-awtoritajiet Franċiżi ntrabtu li jagħtu lill-atturi tas-suq aċċess sħiħ għar-reġistru tal-garanziji tal-kapaċità, li fih se jkunu rreġistrati t-tranżazzjonijiet mhux irregolati, waqt li tiġi ggarantita l-anonimità tal-operaturi ta' kull tranżazzjoni.

(188)

Il-kummenti tal-partijiet terzi u l-kummenti tal-awtoritajiet Franċiżi rigward id-diskriminazzjoni potenzjali bejn id-diversi tipi ta' kapaċità ta' ġestjoni tad-domanda huma diskussi fit-Taqsima 4.3.3.

(189)

Fit-tweġiba tagħhom għad-Deċiżjoni tal-Ftuħ tas-17 ta' Diċembru 2015, l-awtoritajiet Franċiżi indikaw li l-mekkaniżmu propost mhuwiex neċessarjament mistenni li jiġġenera investimenti kbar ġodda li jżidu l-kapaċità totali ta' produzzjoni, iżda pjuttost li jiżgura d-disponibbiltà tal-kapaċitajiet meħtieġa, pereżempju biex jilqgħu kontra mewġa ta' kesħa xitwija.

(190)

Madankollu, l-awtoritajiet Franċiżi rrikonoxxew il-ħtieġa li l-mekkaniżmu jippermetti lill-kapaċitajiet ta' produzzjoni ġodda li jikkompetu mal-kapaċità ta' produzzjoni eżistenti kif ukoll il-ħtieġa ta' qafas aktar stabbli għall-parteċipanti l-ġodda li jiffaċilita din il-kompetizzjoni. Żewġ elementi ġodda ġew proposti bħala rimedju għal din il-problema:

(191)

Il-kummenti tal-partijiet terzi u l-kummenti tal-awtoritajiet Franċiżi dwar dan il-punt ġew diskussi/żviluppati fit-Taqsima 4.3.1.

(192)

Il-kummenti tal-partijiet terzi u l-kummenti tal-awtoritajiet Franċiżi rigward id-diskriminazzjoni potenzjali bejn id-diversi tipi ta' kapaċità ta' ġestjoni tad-domanda huma diskussi fit-Taqsima 4.3.2.

(193)

Kif indikat fil-premessi 119 sa 125, bi tweġiba għat-tħassib tal-Kummissjoni u tal-partijiet terzi, l-awtoritajiet Franċiżi pproponew mudell ibridu, li jipprovdi l-għoti ta' biljetti ta' interkonnessjoni li b'mod definittiv jippermettu l-parteċipazzjoni tal-kapaċitajiet ta' produzzjoni u ta' ġestjoni tad-domanda li jinsabu fl-Istati Membri ġirien ta' Franza. L-opinjoni tagħhom hija li dan l-approċċ huwa konformi mal-prinċipji bażiċi msemmija fl-Anness 2 għad-Dokument ta' Ħidma tas-servizzi anness għall-inkjesta settorjali dwar il-mekkaniżmi tal-kapaċità tal-Kummissjoni Ewropea.

(194)

Il-kummenti tal-partijiet interessati dwar dan il-punt huma inklużi fit-Taqsima 4.3.3.1 aktar 'il fuq.

(195)

Il-kummenti ta' Franza dwar dan il-punt huma inklużi fil-premessa 139 aktar 'il fuq.

(196)

Kif spjegat fil-premessa 140 aktar 'il fuq, l-aħħar proposta tal-awtoritajiet Franċiżi hija li jgħinu lill-fornituri biex jikkalkulaw aħjar il-portafolli tal-klijenti futuri tagħhom u li jirregolaw dan l-appoġġ b'mod espliċitu fir-regoli.

(197)

Il-kummenti tal-partijiet interessati dwar dan il-punt huma inklużi fil-premessi 159 u 160 aktar 'il fuq.

(198)

Kif spjegat fit-Taqsima 4.4.2 aktar 'il fuq, l-aħħar proposta dwar dan il-punt hija li l-fornituri jkollhom il-flessibbiltà billi jkunu permessi tranżazzjonijiet mhux irregolati, waqt li tiġi żgurata l-likwidità fuq il-pjattaforma tal-kummerċ organizzat kif ukoll it-trasparenza tal-kummerċ mhux irregolat.

(199)

Fil-premessa 143 tad-Deċiżjoni tal-Ftuħ il-Kummissjoni kienet diġà kkonkludiet li l-mekkaniżmu jikkostitwixxi għajnuna mill-Istat fit-tifsira tal-Artikolu 107(1) tat-TFUE.

(200)

Rigward l-eżistenza ta' riżorsi tal-Istat fil-mekkaniżmu tal-kapaċità Franċiż, l-awtoritajiet Franċiżi jagħtu l-garanziji tal-kapaċità lill-operaturi tal-kapaċità mingħajr ħlas. Fl-istess ħin, huma joħolqu suq għal dawn il-garanziji, bl-impożizzjoni ta' obbligu ta' kwota minn fornituri tal-elettriku, billi jorbtu dawn il-kwoti mal-perjodi ta' domanda għolja tal-klijenti tagħhom. Għalhekk, huma joħolqu talba għaċ-ċertifikati u valur korrispondenti. Barra minn hekk, minflok ma jbiegħ iċ-ċertifikati lill-operaturi ta' kapaċità jew jagħmilhom irkant, l-Istat jagħtihomlom mingħajr ħlas u, allura, jirrinunzja għal riżorsi pubbliċi.

(201)

La l-awtoritajiet Franċiżi, u lanqas il-partijiet terzi ma ressqu argumenti li jikkontestaw din l-analiżi.

(202)

Iżda sadanittant, il-Kummissjoni adottat deċiżjoni oħra li tikkonferma l-kwalifika ta' għajnuna mill-Istat ta' sistema ta' sussidju permezz ta' ċertifikati ta' faċilitajiet ta' produzzjoni tal-enerġija minn riżorsi rinnovabbli (31). Ta' min jinnota li f'dan il-każ, ma kien garantit ebda prezz minimu għal dawn iċ-ċertifikati ekoloġiċi.

(203)

Barra minn hekk, mhuwiex korrett li ssir distinzjoni bejn dan il-każ u l-każ taċ-ċertifikati ekoloġiċi Rumeni bl-argument li fil-mekkaniżmu Franċiż il-fornituri għandhom l-għażla li jgħaddu jew ma jgħaddux l-ispejjeż tal-akkwist tal-garanziji tal-kapaċitajiet fuq il-konsumaturi. Fil-fatt, għall-inqas it-tariffi rregolati tal-bejgħ jintegraw b'mod obbligatorju l-prezz għall-garanziji tal-kapaċità, skont l-Artikolu R 337-19 tad-Digriet Nru 2015-1823 tat-30 ta' Diċembru 2015 dwar il-kodifikazzjoni tal-parti regolatorja tal-Kodiċi tal-Enerġija. Barra minn hekk, l-awtoritajiet Franċiżi sostnew li l-prezz tas-suq (l-MRP, użat għas-saldu tad-differenzi) għandu jkun medja tal-prezzijiet li joħorġu mid-diversi rkantijiet organizzati (u għaldaqstant mgħandux jieħu inkunsiderazzjoni l-prezzijiet tat-tranżazzjonijiet mhux irregolati), preċiżament biex jiġi żgurat li l-MRP ikun jista' jiġi rreplikat. Dan ifisser li l-MRP ikun jista' jiġi rreplikat fil-kuntratti tal-bejgħ tal-fornituri fil-konfront tal-klijenti tagħhom u, skont l-awtoritajiet Franċiżi, huwa mixtieq ħafna mill-parti l-kbira tal-atturi. Dan jikkonferma li l-parti l-kbira tal-fornituri, jekk mhux kollha, se jgħaddu l-ispejjeż iġġenerati mix-xiri tal-garanziji tal-kapaċità fuq il-klijenti tagħhom.

(204)

Barra minn hekk, il-mekkaniżmu tal-kapaċità kif imfassal inizjalment mill-awtoritajiet Franċiżi kien jipprovdi “skema loopback”, jiġifieri proċedura ta' sejħa għall-offerti li sservi bħala għażla alternattiva għall-awtoritajiet pubbliċi, li tintuża f'każ li, jekk ikunu meħtieġa kapaċitajiet ġodda, is-suq tal-kapaċità ma jinkoraġġixxix il-bini tagħhom. Din il-possibbiltà ta' intervent dirett fis-suq mill-Istat tikkonferma aktar il-kwalifika tal-mekkaniżmu tal-kapaċità bħala għajnuna mill-Istat.

(205)

Barra minn hekk, ċerti bidliet li Franza għamlet fil-mekkaniżmu tal-kapaċità wara l-kummenti tal-partijiet interessati dwar id-dubji li esprimiet il-Kummissjoni fid-Deċiżjoni tal-Ftuħ, għandhom fihom infushom ikunu kwalifikati bħala għajnuna mill-Istat. Dan huwa l-każ tal-kuntratti pluriennali, li permezz tagħhom l-Istat jiggarantixxi dħul ċert mill-kapaċitajiet għall-benefiċjarji tagħhom għal perjodu ta' seba' (7) snin. L-Istat għandu rwol primarju f'dan il-mekkaniżmu: huwa l-Istat li jobbliga lill-RTE jiffirma kuntratti mal-kapaċitajiet il-ġodda sakemm ikunu kompetittivi u huwa permezz ta' dawn il-kuntratti li dawn il-kapaċitajiet il-ġodda jkunu ċerti li ser jirċievu prezz fiss għall-kapaċità tagħhom għal seba' (7) snin.

(206)

Rigward l-argument li ressaq l-EDF kif ukoll kumpanija attiva prinċipalment fi Franza fis-segment tal-bejgħ bl-ingrossa, li jqis li l-mekkaniżmu huwa obbligu ta' servizz pubbliku peress li l-kumpens tal-kapaċità huwa l-korrispettiv ta' servizz mogħti mill-operaturi tal-kapaċità, il-Kummissjoni tqis li dan l-argument diġà kien ġie ttrattat fid-Deċiżjoni tal-Ftuħ. Biex infakkru, il-Kummissjoni kkunsidrat li s-servizz la jista' jkun ipprovdut u lanqas valorizzat mis-suq. Fil-fatt, l-awtoritajiet Franċiżi kellhom joħolqu suq billi imponew obbligi ta' disponibbiltà u ta' żamma tal-garanziji tal-kapaċità fuq id-diversi atturi tas-suq tal-elettriku biex id-disponibbiltà tkun valorizzata. Fil-fatt, permezz tal-introduzzjoni ta' dan is-suq tal-kapaċità, l-operaturi tal-kapaċità se jiksbu fondi li ma kinux se jirċievu b'mod ieħor, u għalhekk se jirċievu vantaġġ li ma kinux jiksbu mingħajr is-suq maħluq mill-awtoritajiet.

(207)

Barra minn hekk, l-argument imressaq mill-EDF u minn kumpanija oħra tal-elettriku vertikalment integrata li jgħid li l-mekkaniżmu tal-kapaċità ma jagħti ebda vantaġġ selettiv lill-operaturi tal-kapaċità peress li l-atturi kollha fil-mekkaniżmu huma fl-istess sitwazzjoni fattwali u ġuridika u huma ttrattati l-istess, diġà ġie diskuss fl-imsemmija Deċiżjoni tal-Ftuħ. Biex infakkru, il-Kummissjoni tqis li l-vantaġġ huwa selettiv, peress li l-mekkaniżmu jipprovdi għajnuna lill-operaturi ta' kapaċità, u mhux għal setturi oħra tal-ekonomija.

(208)

Peress li Franza ma qajmet ebda argument ġdid, il-Kummissjoni għadha ssostni l-istess valutazzjoni u konklużjonijiet tad-Deċiżjoni tal-Ftuħ (li għaliha tirreferi din id-Deċiżjoni) li l-mekkaniżmu jagħti vantaġġ selettiv lill-operaturi tal-kapaċità.

(209)

L-awtoritajiet Franċiżi tennew l-argument tagħhom li l-mekkaniżmu tal-kapaċità mhux ser ikollu impatt fuq is-suq tal-elettriku, li ġie kkunsidrat mill-Kummissjoni fid-Deċiżjoni tal-Ftuħ tagħha. Biex infakkru, il-Kummissjoni kienet ikkonludiet li l-mekkaniżmu seta' jaffettwa l-kummerċ bejn l-Istati Membri u joħloq distorsjoni fil-kompetizzjoni peress li l-operaturi tal-kapaċità Franċiżi jiksbu vantaġġ li l-kompetituri tagħhom ma jistgħux jiksbu, peress li ma għandhom ebda dritt li jipparteċipaw fil-kapaċità tas-suq Franċiż.

(210)

Ta' min jinnota li wieħed mir-rimedji proposti minn Franza jikkonsisti proprju fil-parteċipazzjoni espliċita tal-kapaċitajiet transkonfinali fil-mekkaniżmu Franċiż. Madankollu din il-parteċipazzjoni hija limitata għall-kapaċità ta' interkonnessjoni utli (jiġifieri wara l-applikazzjoni ta' fatturi ta' de-rating) ta' Franza mal-pajjiżi ġirien tagħha. Barra minn hekk, mhemmx garanzija li dawn il-kapaċitajiet transkonfinali se jirċievu l-istess kumpens tal-kapaċitajiet Franċiżi għas-servizz ipprovdut, minħabba l-ispiża addizzjonali mġarrba biex jipparteċipaw fil-mekkaniżmu Franċiż, relatata mal-kisba u x-xiri tal-biljetti ta' interkonnessjoni.

(211)

Minn dan isegwi li l-valutazzjoni u l-konklużjoni tal-Kummissjoni fid-Deċiżjoni tal-Ftuħ (li għalihom tirreferi din id-Deċiżjoni), li jgħidu li l-vantaġġ f'termini ta' kumpens tal-kapaċità, mogħti lill-operaturi tal-kapaċità Franċiżi, jista' jaffettwa l-kummerċ bejn l-Istati Membri u joħloq distorsjoni fil-kompetizzjoni, huma kkonfermati.

(212)

Għar-raġunijiet imsemmija hawn fuq, il-Kummissjoni ssostni li l-mekkaniżmu tal-kapaċità Franċiż huwa għajnuna mill-Istat fit-tifsira tal-Artikolu 107(1) tat-TFUE.

(213)

Billi l-ewwel ċertifikazzjoni ta' fornituri ta' kapaċità bdiet mill-1 ta' April 2015, l-awtoritajiet Franċiżi bdew iċ-ċessjoni ta' assi intanġibbli lill-benefiċjarji. Għaldaqstant, il-Kummissjoni tqis li l-awtoritajiet Franċiżi bdew jimplimentaw il-miżura ta' għajnuna inkwistjoni fis-sens tal-Artikolu 108(3) TFUE.

(214)

Barra minn hekk, l-awtoritajiet Franċiżi ma ssospendewx it-tranżazzjonijiet ta' garanziji tal-kapaċità eventwali wara d-Deċiżjoni tal-Ftuħ.

(215)

Peress li l-Kummissjoni ma kienet ħadet ebda deċiżjoni finali dwar il-miżura qabel id-data li fiha l-awtoritajiet Franċiżi bdew jimplimentaw il-mekkaniżmu, Franza aġixxiet bi ksur tal-obbligu tagħha taħt l-Artikolu 108(3) tat-TFUE.

(216)

Sabiex tivvaluta jekk miżura ta' għajnuna tistax titqies bħala kompatibbli mas-suq intern, il-Kummissjoni ġeneralment tanalizza jekk l-għajnuna hijiex imfassla biex l-impatt pożittiv tagħha lejn objettiv ta' interess komuni jaqbiżx l-effetti negattivi potenzjali fuq il-kummerċ u l-kompetizzjoni.

(217)

L-objettiv prinċipali tal-miżura huwa s-sigurtà tal-provvista tal-elettriku. Għalhekk, il-Kummissjoni analizzat il-miżura abbażi tat-Taqsima 3.9 tal-Linji Gwida dwar l-għajnuna mill-Istat għall-protezzjoni ambjentali u l-enerġija 2014-2020 (“GLSEE”), li tirrigwarda l-għajnuna għall-adegwatezza tal-ġenerazzjoni.

(218)

L-analiżi tal-Kummissjoni f'din id-Deċiżjoni se tkun strettament limitata għall-punti li fuqhom il-Kummissjoni kienet esprimiet dubji fid-Deċiżjoni tal-Ftuħ.

(219)

Kif kien spjegat fil-premessa 149 tad-Deċiżjoni tal-Ftuħ, Franza spjegat li, minn xi snin 'l hawn, il-perjodu tad-domanda massima għall-elettriku fi Franza kompliet tiżdied (minn 79 590 MW fl-2001 għal 102 100 MW fl-2012), filwaqt li d-domanda medja għall-elettriku baqgħet stabbli. Dan huwa ġeneralment dovut għas-sensittività qawwija għas-sħana tas-sistema elettrika Franċiża: użu kbir ta' tisħin bl-elettriku fil-bini residenzjali u kummerċjali.

(220)

Barra minn hekk, skont Franza, il-faċilitajiet ta' produzzjoni avvanzati (normalment l-impjanti tal-gass), saru inqas kompetittivi f'dawn l-aħħar snin għal numru ta' raġunijiet (ara l-premessa 45). Minkejja dan, dawn il-faċilitajiet, u speċjalment dawk avvanzati, huma meħtieġa biex ikopru l-waqtiet ta' konsum massimu estrem deskritt fit-Taqsima 5.3.1.1. Minkejja dan, l-okkorrenza rari u imprevedibbli ta' dawn il-waqtiet iżomm lill-atturi tas-suq milli jinvestu f'kapaċitajiet ġodda ta' produzzjoni.

(221)

Għal dawn ir-raġunijiet, u kif juru l-kalkoli tal-RTE murija fil-premessa 105, il-kriterju ta' qtugħ fi Franza ta' medja ta' tliet (3) sigħat fis-sena jista' ma jintlaħaqsx f'każ ta' mewġa ta' kesħa (darba kull għaxar (10) snin fi Franza).

(222)

B'referenza għall-premessa 154 tad-Deċiżjoni tal-Ftuħ, Franza wriet li l-istudji tal-adegwatezza tal-RTE kienu aktar reċenti u dettaljati mill-istudji preċedenti deterministiċi ta' REGRT-E. Huma jieħdu inkunsiderazzjoni pereżempju s-sitwazzjoni prekarja ta' ċerti impjanti eżistenti u r-riskju li jgħalqu (xenarju ta' “nuqqas ta' sħana”; ara l-Figura 3). Għal dawn ir-raġunijiet, jista' jkun hemm xi differenzi bejn l-istudji preċedenti dwar l-adegwatezza li għamel RTE u dawk li għamel REGRT-E.

(223)

F'dan ir-rigward, Franza ħadet ukoll inkunsiderazzjoni l-konklużjonijiet talMid-Term Adequacy Forecast ippubblikat fl-2016 minn REGRT-E, li huwa l-ewwel (1) verżjoni li tibbaża fuq metodoloġija probabilistika (ara l-premessa 100). Fil-każ bażi tas-sena 2020, l-aspettattiva ta' qtugħ fi Franza hija ftit inqas mill-objettiv ta' sigurtà tal-provvista stipulat mill-gvern. Madankollu dan mhuwiex il-każ fl-istudju li sar ma' GRARE, ibbażat fuq l-akbar numru ta' simulazzjonijiet Monte-Carlo (2 100), li jivvaluta l-aspettattiva ta' qtugħ fi Franza bejn ħames (5) sigħat u 20 siegħa (P95). Barra minn hekk, ta' min jinnota li l-istudji kollha li saru għas-sena 2020 huma bbażati fuq is-suppożizzjonijiet li ġejjin: (i) disponibbiltà sħiħa tal-impjanti diżattivati temporanjament, li hija suppożizzjoni ottimista skont REGRT-E, u (ii) il-mekkaniżmu tal-kapaċità huwa attiv fis-snin 2017 sa 2020. Minn dan jista' jiġi dedott li l-istudji l-aktar reċenti ta' REGRT-E ma jikkontradixxux u saħansitra jikkonfermaw il-konklużjonijiet tal-awtoritajiet Franċiżi rigward il-ħtieġa tal-mekkaniżmu.

(224)

L-istudji ta' RTE jieħdu inkunsiderazzjoni wkoll id-dejta l-aktar reċenti dwar id-domanda massima tal-konsum u għalhekk l-impatt tal-miżuri alternattivi li ttieħdu biex jiżdiedu l-kapaċitajiet ta' ġestjoni tad-domanda (kif talbet il-Kummissjoni fil-premessa 163 tad-Deċiżjoni tal-Ftuħ). Madankollu huma juru b'mod ċar li l-livell massimu ta' qtugħ stabbilit fi Franza jista' jinqabeż fis-snin li ġejjin, mingħajr l-intervent tal-Istat.

(225)

Il-parti l-kbira tal-partijiet interessati wkoll jaqblu dwar il-ħtieġa (kif ukoll l-urġenza) li jiġi implimentat mekkaniżmu tal-kapaċità fi Franza. Uħud minnhom ippreżentaw il-pjanijiet finanzjarji tagħhom biex juru li teżisti problema ta' “missing money” fi Franza, għall-kuntrarju ta' dak li stmat l-Awtorità tal-Kompetizzjoni fl-Opinjoni tagħha tal-2012 (referenza fil-premessa 158 tad-Deċiżjoni tal-Ftuħ).

(226)

Huwa minnu li l-analiżi ta' RTE dwar l-adegwatezza tal-kapaċitajiet fir-Rapport Provviżorju tiegħu tal-2015 kienet aktar ottimista minn dik li għamel fl-2014 (is-sena li fiha daħal fis-seħħ il-mekkaniżmu tal-kapaċità), iżda Franza spjegat li dan it-titjib kien dovut għas-sinjal mogħti mill-introduzzjoni tal-mekkaniżmu (permezz tal-mekkaniżmu, ċerti impjanti kienu bidlu l-ħsieb tagħhom li jgħalqu).

(227)

Barra minn hekk, għalkemm Franza ma tikkontestax li attwalment hemm kapaċità żejda fi Franza, dan ma jeskludix li s-sigurtà tal-provvista tkun mhedda fil-futur, speċifikament f'każ fejn ħafna mill-impjanti ta' produzzjoni jkollhom jgħalqu għax din tonqos. L-istudji ta' RTE jikkonfermaw li teżisti problema ta' “missing money” u jindikaw li dan ir-riskju ta' għeluq tal-impjanti huwa reali, fatt sostnut ukoll fil-premessi 43, 44 u 46.

(228)

Rigward il-proposta li jiġu applikati prezzijiet differenzjati ta' użu tas-sistemi skont l-istaġuni, il-ġranet tal-ġimgħa u/jew is-sigħat tal-ġurnata, Franza kkonfermat li t-“TURPE” diġà huwa bbażat fuq il-ħinijiet u l-istaġuni.

(229)

Franza spjegat ukoll b'mod sodisfaċenti l-fatturi ta' de-rating applikati għall-enerġiji rinnovabbli, kif talbet il-Kummissjoni fil-premessa 153 tad-Deċiżjoni tal-Ftuħ. Huma jidhru pjuttost ottimisti rigward il-kontribut tal-enerġiji rinnovabbli għas-sigurtà tal-provvista u għalhekk ma jqajmux aktar tħassib ta' sottovalutazzjoni tal-kapaċitajiet disponibbli. Fi kwalunkwe każ, l-enerġiji rinnovabbli ser ikollhom il-possibbiltà li jagħżlu skema ġenerika, ibbażata fuq l-awtoċertifikazzjoni kkontrollata.

(230)

Għal dawn ir-raġunijiet, il-Kummissjoni tqis li l-mekkaniżmu, li jservi l-objettiv ta' interess komuni li jiżgura l-provvista tal-elettriku, huwa tabilħaqq meħtieġ fi Franza. Barra minn hekk dan ma jmurx kontra l-objettiv allokat mil-GLAEE ta' tneħħija gradwali tas-sussidji ta' ħsara għall-ambjent, pereżempju bl-iffaċilitar tal-ġestjoni tad-domanda 232, biż-żieda tal-kapaċitajiet ta' interkonnessjoni 194, bl-inklużjoni tal-kontribuzzjoni tal-enerġiji rinnovabbli fil-mekkaniżmu 230 u billi tingħata preferenza lill-produtturi b'emissjonijiet ta' karbonju baxxi 137.

(231)

Franza ma tikkontestax id-differenza fit-trattament bejn l-operaturi tal-ġestjoni tad-domanda espliċita u l-operaturi tal-ġestjoni tad-domanda impliċita. Għall-kuntrarju, hija tqis li dawn il-kundizzjonijiet differenti huma meħtieġa preċiżament sabiex iż-żewġ tipi ta' operaturi tal-ġestjoni tad-domanda jkunu jistgħu jipparteċipaw fil-mekkaniżmu fuq l-istess livell. Franza kellha ssib bilanċ tajjeb bejn l-obbligi ta' attivazzjoni u ta' disponibbiltà taż-żewġ tipi ta' kapaċità, mingħajr madankollu ma tillimita l-possibbiltajiet ta' parteċipazzjoni fil-mekkaniżmu tal-kapaċità.

(232)

Bi qbil ma' Franza, il-Kummissjoni tqis b'mod partikolari li huwa konsistenti li n-numru ta' ġranet li jaqgħu fl-obbligu ta' operatur ta' ġestjoni tad-domanda impliċita (ġranet PD1) ikun inqas min-numru ta' ġranet li fihom operatur tal-ġestjoni tad-domanda espliċita jrid ikun disponibbli, peress li l-korrispettiv meħtieġ minn operatur ta' ġestjoni tad-domanda impliċita huwa akbar (attivazzjoni minflok disponibbiltà).

(233)

Il-Kummissjoni taċċetta li n-numru ta' sigħat PD2 għandu jibqa' mmirat, sabiex il-kapaċitajiet espliċiti ma jiġux esklużi mill-mekkaniżmu, jew biex il-parteċipazzjoni tagħhom ma tiġix limitata aktar minn kemm hu meħtieġ.

(234)

Kif spjegat fil-premessi 111 sa 115, RTE għamel studju dettaljat biex ikejjel in-numru ta' sigħat PD1 u PD2, sabiex jibbaża dan il-kejl fuq l-impatt li jistgħu jkollhom l-operaturi tal-ġestjoni tad-domanda biex jindirizzaw il-qtugħ. Irriżulta li 94 % tas-sigħat ta' qtugħ setgħu jkunu indirizzati fil-100 siegħa annwali tad-domanda massima ta' konsum (għal din ir-raġuni, il-perjodu ta' PD1 jirrappreżenta l-100-150 siegħa tad-domanda massima ta' konsum) u li 99 % tas-sigħat ta' qtugħ huma inklużi fit-300 siegħa tad-domanda massima ta' konsum (huwa għalhekk li PD2 jkopri bejn 100 u 300 siegħa (32) tad-domanda massima).

(235)

Barra minn hekk, l-argument ta' ċerti partijiet terzi li l-kapaċitajiet ta' ġestjoni tad-domanda espliċita mgħandhomx ikunu attivati ħlief fil-perjodu ta' kesħa kbira (jiġifieri darba kull għaxar snin), fil-fehma tagħna mhuwiex ġustifikat peress li l-kapaċitajiet kollha ser ikunu effettivament attivati tal-inqas darba fis-sena ta' konsenja skont it-test ta' kontroll.

(236)

Għal dawn ir-raġunijiet, il-Kummissjoni tqis li Franza sabet bilanċ tajjeb bejn id-diversi obbligi tal-kapaċitajiet ta' ġestjoni tad-domanda mingħajr ma llimitat il-parteċipazzjoni tagħhom fil-mekkaniżmu. Il-Kummissjoni tinnota l-proposta ta' Franza li fil-futur tivvaluta l-proporzjon PD1/PD2, u li tirrevedih jekk ikun hemm bżonn.

(237)

Għaldaqstant il-miżura hija flessibbli biżżejjed u tipprovdi inċentivi adegwati u xierqa lid-diversi kapaċitajiet ta' ġestjoni tad-domanda kif mitlub fil-punt 226 tal-GLAEE.

(238)

Biex ineħħu d-dubji tal-Kummissjoni dwar dan il-punt, l-awtoritajiet Franċiżi pproponew mekkaniżmu li jippermetti l-parteċipazzjoni “espliċita” tal-kapaċitajiet ta' produzzjoni u ta' ġestjoni tad-domanda transkonfinali fil-mekkaniżmu Franċiż. Din il-proposta hija kondizzjonali għal ftehimiet ta' kooperazzjoni mat-TSO tal-pajjiżi ġirien fejn huma stabbiliti l-kapaċitajiet parteċipanti. Biex jevitaw li jmorru lura għal parteċipazzjoni impliċita tal-kapaċitajiet transkonfinali fin-nuqqas ta' ftehim, l-awtoritajiet Franċiżi pproponew iċ-ċertifikazzjoni tal-interkonnessjonijiet sabiex dawn ikunu jistgħu jipparteċipaw direttament fil-mekkaniżmu (33).

(239)

Ir-rimedju li pproponiet Franza, deskritt fil-premessi 119 sa 124 ta' din id-Deċiżjoni, huwa għalhekk konformi mal-punt 226 tal-GLAEE. Il-Kummissjoni tinsisti fuq il-fatt li l-iskeda ta' implimentazzjoni ta' dan ir-rimedju, kif proposta fil-premessa 125, hija meqjusa bħala skeda stretta u li Franza se jkollha tinforma lill-Kummissjoni dwar id-diversi stadji tal-implimentazzjoni tar-rimedju msemmi.

(240)

Wara d-dubji li esprimiet il-Kummissjoni dwar dan il-punt fid-Deċiżjoni tal-Ftuħ, Franza pproponiet mekkaniżmu li jippermetti l-parteċipazzjoni effettiva tal-kapaċitajiet il-ġodda fil-mekkaniżmu tal-kapaċità, deskritt fil-premessi 131 sa 138 ta' din id-deċiżjoni. Dan il-mekkaniżmu jikkonsisti f'sistema ta' kuntratti pluriennali mal-kapaċitajiet kompetittivi ġodda.

(241)

Il-Kummissjoni diġà kkonkludiet li kuntratti itwal jistgħu jkunu ġġustifikati biex jattiraw investimenti ġodda, b'mod partikolari minn parteċipanti ġodda, sabiex l-aċċess tagħhom għall-finanzjament jiġi ffaċilitat (34).

(242)

Franza spjegat li terminu kuntrattwali ta' seba' (7) snin għall-investimenti l-ġodda huwa mmirat sabiex jiggarantixxi madwar 50 % tal-ispejjeż tal-investiment tal-kapaċitajiet il-ġodda. B'hekk din il-miżura tgħin biex tonqos ir-rata ta' redditu meħtieġ mill-promoturi u l-finanzjaturi ta' dawn il-proġetti ta' investimenti u tiffaċilita l-finanzjament estern tagħhom. Ta' min jinnota wkoll li t-terminu tal-kuntratt huwa iqsar mit-terminu ta' 20 sena magħżul għall-proġett Landivisiau fil-Brittanja u ta' 15-il sena fil-mekkaniżmu tal-kapaċità fil-Gran Brittanja. Għalkemm huwa diffiċli li wieħed jistabbilixxi referenza tajba u ġusta għat-terminu tal-kuntratti tal-kapaċitajiet, ta' min jinnota li termini kuntrattwali iqsar għandhom il-vantaġġ ta' spazju akbar ta' manuvra għas-suq fit-tul u li jevitaw imblokk fl-għażla tat-teknoloġiji (lock-in effect).

(243)

Il-Kummissjoni tqis li Franza stabbiliet bilanċ tajjeb bejn il-vantaġġi u l-iżvantaġġi tad-diversi termini tal-kuntratti possibbli, u li t-terminu magħżul joffri minn naħa sigurtà sodisfaċenti tal-investimenti fit-tul waqt li jevita r-riskju ta' “imblokk” tat-teknoloġiji li jista' jinħoloq minn termini itwali.

(244)

Fid-Deċiżjoni tal-Ftuħ, il-Kummissjoni kienet esprimiet dubji dwar il-possibbiltà tal-fornituri, u l-aktar tal-parteċipanti l-ġodda, li jbassru eżatt u ferm qabel l-iżvilupp tal-portafolli tal-klijenti tagħhom, u b'hekk, li jagħtu sinjal ta' prezz affidabbli lis-suq tal-ħtiġijiet tal-kapaċità tas-sistema.

(245)

Dawn id-dubji, ikkonfermati wkoll minn diversi partijiet terzi, tneħħew fuq tliet livelli. L-ewwel nett Franza pproponiet li tobbliga lil RTE jgħin lill-fornituri alternattivi biex ibassru aħjar il-livell definittiv tal-obbligi ta' kapaċità tagħhom. It-tieni, il-mekkaniżmu jipprovdi aktar trasparenza u likwidità tas-suq taċ-ċertifikati. It-tielet, dan il-mekkaniżmu jippermetti aġġustament tal-portafoll taċ-ċertifikati tal-fornituri ż-żgħar biex jirriekwilibraw dawn il-portafolli kemm matul is-sena ta' konsenja, kif ukoll ex post.

(246)

Dan ir-rimedju ser jgħin lill-fornituri alternattivi biex jistmaw aħjar minn qabel l-obbligi preċiżi tagħhom ta' garanziji tal-kapaċità. Meta jgħin lill-fornituri biex jistmaw aħjar il-ħtiġijiet ta' kapaċitajiet tagħhom, dan ir-rimedju ser jiżgura prezz tal-kapaċità aktar preċiż u, f'każ ta' bżonn, jinkoraġġixxi l-investiment f'kapaċitajiet ġodda.

(247)

Wara r-riżerva magħmula mill-Kummissjoni fuq l-inċentivi potenzjali insuffiċjenti biex l-atturi jkunu f'ekwilibriju qabel is-sena ta' konsenja (SK), l-awtoritajiet Franċiżi pproponew li kwalunkwe riekwilibriju kumulattiv sinifikanti li jseħħ qabel is-sena ta' konsenja, joħloq sanzjoni. Barra minn hekk, l-awtoritajiet jipproponu li jirduppjaw il-koeffiċjent tal-inċentiv “k”, applikat għall-iżbilanċi, u li jkomplu jżidu l-penali tas-saldu tad-differenzi (vis-à-vis tranżazzjoni fis-suq) għall-iżbilanċi li jaqbżu limitu massimu ta' 1 GW (ara l-premessi 141 u 143). Ma' dan hemm ir-regola preċedenti li mill-bidu tas-SK kull riekwilibriju jrid jitħallas.

(248)

Ir-rimedji proposti minn Franza għandhom objettiv komuni: jinċentivaw lill-atturi tal-mekkaniżmu biex ikunu f'ekwilibriju qabel ma tibda s-SK, u fi kwalunkwe każ qabel is-saldu tad-differenzi. Dan ser jinċentiva lill-atturi biex jagħmlu l-parti l-kbira tat-tranżazzjonijiet meħtieġa qabel is-SK u se jżid ukoll ir-rappreżentanza tal-MRP (użat għas-saldu tad-differenzi u għar-rifatturar fuq il-konsumaturi). B'hekk, is-sinjal tal-prezz li jirriżulta mill-kummerċ tal-garanziji tal-kapaċità ser ikun fil-fehma tagħna aktar rappreżentattiv u affidabbli, u l-mekkaniżmu jkun aktar kredibbli biex iħeġġeġ investimenti ġodda f'każ li jkun hemm bżonn.

(249)

B'reazzjoni għall-kritika tal-Kummissjoni li l-limitu fuq il-prezz tas-saldu tad-differenzi ma jirriflettix is-CONE, l-awtoritajiet Franċiżi ntrabtu li jżidu gradwalment il-prezz amministrat (ara l-premessi 146 u 147), biex finalment jittella', mis-SK 2021, għal valur korrispondenti għall-ispejjeż ta' parteċipant ġdid (CONE).

(250)

Dan ir-rimedju jikkorrispondi għat-talbiet tas-suq u tal-Kummissjoni, li jiġi allinjat il-limitu indirett fuq il-prezz tal-kapaċità, li huwa l-prezz amministrat, fuq l-ispejjeż ta' parteċipant ġdid. B'hekk, f'każ ta' bżonn, jistgħu jsiru investimenti ġodda.

(251)

Barra minn hekk l-awtoritajiet assiguraw lill-Kummissjoni li l-firxa bejn l-ARENH u l-prezz tal-elettriku tas-suq mhuwiex limitu massimu indirett fuq il-prezzijiet tal-kapaċità (ara l-premessi 149 sa 151). B'mod aktar partikolari, huma spjegaw li l-volum tal-garanziji tal-kapaċità relatat mal-prodott ARENH huwa affidabbli biżżejjed meta mqabbel mas-suq tal-kapaċità kollu u, għaldaqstant, ma jistax jinfluwenza l-prezz tal-garanziji tal-kapaċità l-oħrajn. Barra minn hekk, il-firxa attwali tassigura li l-ARENH mhuwiex prodott kompetittiv attwalment. Il-Kummissjoni tinnota madankollu li l-awtoritajiet Franċiżi se jikkunsidraw, meta jagħmlu valutazzjoni tal-mekkaniżmu, l-opportunità ta' “finanzjalizzazzjoni” tas-sehem tal-kapaċità tal-prodott ARENH, sabiex jevitaw li dan il-prodott ifixkel il-formazzjoni libera tal-prezzijiet fis-suq tal-kapaċità, jekk ikun il-każ.

(252)

Id-diversi rimedji proposti minn Franza biex tinċentiva aktar investimenti ġodda, huma għalhekk konformi mal-punt 226 tal-GLAEE. B'mod partikolari, Franza se timplimenta miżuri sabiex tassigura l-parteċipazzjoni tal-kapaċitajiet transkonfinali u sabiex tagħti inċentivi lill-investimenti ġodda li jiżguraw il-ftuħ tal-mekkaniżmu għal numru akbar ta' operaturi potenzjali tal-kapaċità.

(253)

L-awtoritajiet Franċiżi ċċaraw, għas-sodisfazzjon tal-Kummissjoni, ir-raġunijiet li għalihom kienu għażlu fejn kien meħtieġ id-diversi proposti ta' titjib tal-mekkaniżmu fformulati mill-Awtorità tal-Kompetizzjoni.

(254)

Jirriżulta mill-kunsiderazzjonijiet preċedenti, li l-miżura hija tabilħaqq adatta biex tilħaq l-objettiv ta' interess komuni identifikat.

(255)

Il-Kummissjoni kienet diġà kkonkludiet fil-premessa 184 tad-Deċiżjoni tal-Ftuħ li l-mekkaniżmu seta jkollu l-effett ta' inċentiv meħtieġ. Hija għadha ssostni din il-kunsiderazzjoni.

(256)

Fid-Deċiżjoni tal-Ftuħ, il-Kummissjoni kienet identifikat riskju ta' sopravalutazzjoni tal-konsum mill-fornituri, b'mod partikolari, jekk l-obbligi tal-kapaċità individwali tal-fornituri ma jkunux ċari biżżejjed.

(257)

Mill-kummenti tal-Kummissjoni fil-premessi (245) sa (247) isegwi li l-awtoritajiet Franċiżi implimentaw miżuri sabiex jgħinu lill-fornituri jikkalkulaw aħjar l-obbligi tal-kapaċità tagħhom.

(258)

Dan ir-rimedju jissodisfa l-oġġezzjonijiet li għamlet il-Kummissjoni fid-Deċiżjoni tal-Ftuħ.

(259)

Fil-verżjoni inizjali tal-mekkaniżmu tal-kapaċità, id-diversi atturi kellhom ftit viżibbiltà tat-tranżazzjonijiet mhux irregolati, peress li kienu jiddependu mill-pubblikazzjoni f'intervalli regolari mis-CRE tad-dejta dwar il-volum ta' kummerċ ta' garanziji tal-kapaċità u dwar il-prezzijiet medji tat-tranżazzjonijiet. Barra minn hekk, biex jiġi evitat l-abbuż u n-nuqqas ta' trasparenza, l-awtoritajiet kienu obbligaw lill-atturi vertikalment integrati biex iżommu kontijiet separati fir-reġistru tal-garanziji tal-kapaċità (kont għall-operaturi tal-kapaċità u kont għall-fornituri).

(260)

Wara li l-Kummissjoni wriet tħassib dwar in-nuqqas ta' trasparenza tal-ftehimiet kummerċjali taħt il-mekkaniżmu, Franza pproponiet rimedji sabiex ittejjeb il-viżibbiltà fuq il-kummerċ kollu u fuq l-atturi kollha. L-ewwel nett, huma jipproponu li jagħtu lill-atturi kollha aċċess għar-reġistru tat-tranżazzjonijiet mhux irregolati (miżmuma anonimi), u b'hekk jiżguraw il-viżibbiltà tal-volumi u tal-prezzijiet, waqt li jiggarantixxu l-anonimat tal-operaturi (ara l-premessa 163). It-tieni, huma qegħdin jipproponu li jżidu l-irkantijiet organizzati, billi jżidu n-numru tagħhom matul l-erba' snin ta' qabel l-ewwel sena ta' konsenja għal 15, u billi jġiegħlu lil ċerti operaturi tal-kapaċità (l-RPCs > 3 GW) biex joffru ċ-ċertifikati tagħhom fis-suq skont skema speċifika (ara l-premessi 164 u 165).

(261)

L-approċċ propost mill-awtoritajiet Franċiżi joffri ċerta flessibbiltà lill-fornituri peress li jippermetti t-tranżazzjonijiet mhux irregolati, u fl-istess waqt jiżgura ċerta trasparenza f'dawn it-tranżazzjonijiet.

(262)

L-aċċess liberu għar-reġistru tat-tranżazzjonijiet (anonimizzat) jiżgura t-trasparenza tas-suq mhux irregolat u jiggarantixxi n-nuqqas ta' diskrepanzi fl-informazzjoni bejn l-operatur dominanti — li jkun il-bejjiegħ ewlieni — u l-kompetituri tiegħu. Jippermetti wkoll lill-atturi jqisu l-prezzijiet realizzati fis-suq mhux irregolat fil-formulazzjoni tal-offerti tagħhom fis-suq spot u b'hekk jiżgura konsistenza akbar bejn iż-żewġ swieq. F'dan is-sens, isaħħaħ ukoll il-kontroll tar-regolatur peress li jiżvela minnufih tentattiv ta' manipulazzjoni tal-prezz tas-sehem ta' operatur jekk dan jadotta mġiba radikalment differenti bejn is-suq organizzat u s-suq mhux irregolat.

(263)

Barra minn hekk, it-tisħiħ tal-irkantijiet organizzati għandu jiggarantixxi likwidità suffiċjenti ta' dawn l-irkantijiet u b'hekk isaħħaħ ir-rappreżentanza tal-prezz ta' referenza tas-suq (il-prezz tal-kapaċità użat mill-parti l-kbira tal-fornituri għall-bejgħ u wkoll bħala valur ta' referenza għall-mekkaniżmu tas-saldu tad-differenzi).

(264)

B'hekk dan ir-rimedju jgħin biex jipprevjeni r-riskju ta' “żamma ekonomika” tal-garanziji tal-kapaċità mill-operaturi tal-kapaċità l-kbar, tiżdied it-trasparenza fis-suq, tiżdied il-likwidità tas-suq organizzat u jiffaċilita s-sorveljanza tas-suq mir-regolatur.

(265)

L-introduzzjoni ta' “restrizzjoni doppja” għas-snin SK-3, SK-2 u SK-1 tilqa' għar-riskju ta' manipulazzjoni tas-suq mill-atturi integrati. Fil-fatt, dawn jistgħu, b'mod artifiċjali, inaqqsu n-numru ta' ċertifikati mhux mibjugħa tagħhom billi jagħmlu trasferimenti interni. Bl-introduzzjoni ta' restrizzjoni fil-livell tal-kapaċità ċertifikata, l-awtoritajiet Franċiżi jiżguraw li l-atturi integrati jkunu obbligati — anki jekk jagħmlu trasferimenti interni — jiggarantixxu ċerta likwidità fis-suq organizzat spot.

(266)

L-għażla li r-restrizzjoni fuq il-kapaċità ċċertifikata tiġi stabbilita għal 25 % tiżgura li l-atturi integrati — u l-operaturi dominanti b'mod partikolari — joffru ċ-ċertifikati tagħhom kollha jew uħud minnhom fis-suq organizzat spot u ma jkunux jistgħu jaħarbu minn dan ir-rekwiżit bit-trasferimenti interni tagħhom. Dan ir-rimedju jixbah soluzzjoni tat-tip market-making.

(267)

L-applikazzjoni ta' limitu (f'GW) għar-restrizzjoni li jiġu offruti ċerti volumi ta' garanziji tal-kapaċità fl-irkantijiet organizzati ser tiżgura li jkunu l-akbar atturi, u b'mod partikolari l-operatur stabbilit, li ser jassumu dan ir-rwol ta' “market maker” fil-mekkaniżmu, u b'hekk jiżguraw f'kull ħin il-likwidità tal-irkantijiet.

(268)

Bl-iżgurar tal-likwidità tas-suq, l-awtoritajiet Franċiżi solvew l-oġġezzjoni li qajmet il-Kummissjoni fil-premessa 200 tad-Deċiżjoni tal-Ftuħ.

(269)

B'mod aktar ġenerali, b'dawn ir-rimedji, l-awtoritajiet Franċiżi naqqsu t-tħassib li l-Kummissjoni wriet fid-Deċiżjoni tal-Ftuħ rigward in-nuqqas ta' trasparenza fil-mekkaniżmu tal-iffissar tal-prezz.

(270)

Fid-Deċiżjoni tal-Ftuħ, il-Kummissjoni kienet ikkunsidrat li r-riskju tal-esklużjoni ta' ċerti atturi mill-mekkaniżmu, bħal ċerti kapaċitajiet ta' ġestjoni tad-domanda (minħabba l-possibbiltà ta' diskriminazzjoni bejniethom), il-kapaċitajiet barranin jew saħansitra kapaċitajiet ġodda ta' produzzjoni, seta' joħloq riskju ta' kumpens żejjed lill-atturi li setgħu jipparteċipaw fil-mekkaniżmu, minħabba inqas pressjoni kompetittiva.

(271)

Kif spjegat fit-Taqsimiet 5.3.2.1, 5.3.2.2 u 5.3.2.3 rispettivament, l-awtoritajiet Franċiżi ntrabtu li jieħdu miżuri adegwati sabiex jiżguraw il-parteċipazzjoni effettiva fil-mekkaniżmu tad-diversi atturi msemmija hawn fuq. Dan jiżgura l-kompetizzjoni fi ħdan il-mekkaniżmu u għandu jwassal għal prezz tal-kapaċità li jeskludi l-kumpens żejjed.

(272)

Biex ikunu konformi mal-GLAEE, il-mekkaniżmi proposti għall-parteċipazzjoni tal-kapaċitajiet transkonfinali u għall-kuntratti pluriennali mal-kapaċitajiet il-ġodda ta' produzzjoni jridu jkunu proporzjonati.

(273)

Il-mekkaniżmu ta' inklużjoni tal-kapaċitajiet transkonfinali huwa deskritt fil-premessi 119 sa 124 ta' dan id-dokument. Ladarba l-kapaċitajiet barranin ikunu kisbu biljetti ta' interkonnessjoni, huma ser jipparteċipaw direttament fis-suq Franċiż tal-garanziji tal-kapaċità, b'mod li, peress li dan is-suq huwa meqjus li ma joħloqx kumpens żejjed, ser jiġri l-istess għall-bejgħ tal-garanziji mill-kapaċitajiet barranin. Fil-kuntest tal-mekkaniżmu implimentat biex il-kapaċitajiet barranin ikunu jistgħu jipparteċipaw, il-kapaċitajiet ta' interkonnessjoni jkunu jistgħu wkoll igawdu minn ċertu kumpens permezz tal-bejgħ tal-biljetti ta' interkonnessjoni. Minħabba li wieħed jista' jbassar li l-parteċipazzjoni fl-irkantijiet ser tkun waħda kbira (il-kapaċità kollha ta' ġestjoni tad-domanda tal-Istat Membru ġar interkonness tista' tipparteċipa), b'mod partikolari minħabba l-volum tal-biljetti li huwa mistenni li ser jiġu rkantati, wieħed jista' jassumi li dawn l-irkantijiet mhumiex ser joħolqu kumpens żejjed. Għaldaqstant dan il-mekkaniżmu huwa proporzjonat.

(274)

Il-mekkaniżmu propost mill-awtoritajiet Franċiżi biex jippermettu lill-kapaċitajiet il-ġodda jipparteċipaw fis-suq tal-kapaċità Franċiż huwa deskritt fil-premessi 131 sa 138 ta' dan id-dokument. F'dak li jirrigwarda l-proporzjonalità ta' dan il-mekkaniżmu, il-Kummissjoni temmen li jeskludi kwalunkwe kumpens żejjed lill-kapaċitajiet il-ġodda. B'mod partikolari, l-offerti ta' dawn ser ikollhom ikunu, fi kwalunkwe każ, aktar baxxi mill-prezz ta' referenza inizjali, li huwa nnifsu jikkorrispondi għall-prezz medju li joħroġ mid-diversi proċessi kompetittivi (huwa propost li jiġi kkalkulat bħala l-prezz ponderat tal-kapaċità li jirriżulta mill-irkant organizzat fis-SK-4, u wkoll mill-irkanti tas-SK-2 u tas-SK-1 kurrenti). Il-fatt li l-prezz ta' referenza inizjali preċiż mhux ser ikun magħruf mill-fornituri tal-kapaċitajiet il-ġodda meta jagħmlu l-offerti tagħhom, għandu jiżgura li dawn l-offerti ser ikunu baxxi kemm jista' jkun biex ikunu kompetittivi. Peress li l-parteċipanti mhumiex ser ikunu jafu jekk il-kapaċitajiet il-ġodda għamlux diġà offerti oħrajn meta jagħmlu l-offerta tagħhom, il-limitazzjonijiet tal-volum għall-kapaċitajiet il-ġodda ser iħeġġeġ lill-offerenti jipproponu l-orħos prezz possibbli għall-investimenti tagħhom. Għal dawn ir-raġunijiet, il-Kummissjoni tqis li r-riskju ta' kumpens żejjed għandu jkun żero f'dak li jirrigwarda l-investimenti l-ġodda; għaldaqstant dan il-mekkaniżmu huwa proporzjonat.

(275)

Kif spjegat fil-premessa 64, punt (4), sottostanti għat-tħassib tal-Kummissjoni li EDF jista' faċilment jimmanipula l-prezzijiet tal-kapaċità favurih, kien hemm tliet riskji aktar speċifiċi tal-mekkaniżmu (li wħud minnhom jistgħu jseħħu fil-każ tal-atturi kollha):

(276)

Franza pproponiet tilet kategoriji ta' modifiki fil-mekkaniżmu sabiex tevita kemm jista' jkun ir-riskju taż-żamma tal-kapaċitajiet:

(277)

L-ewwel rimedju jiggarantixxi li l-operaturi tal-kapaċità li jkollhom portafoll kbir ta' kapaċitajiet ma jkunux jistgħu jimmanipulaw is-suq fil-“proċedura” ta' ċertifikazzjoni. Barra minn hekk, dan ir-rimedju jippermetti lill-awtoritajiet regolatorji jindividwaw aktar faċilment l-imġiba suspettuża meta mqabbla mal-qafas eżistenti.

(278)

It-tieni rimedju għandu jsaħħaħ l-inċentivi għall-atturi tas-suq biex jagħtu l-aħjar stima tal-livell ta' disponibbiltà tal-faċilitajiet tagħhom fi ħdan il-“proċedura” ta' ċertifikazzjoni. F'dak li jirrigwarda l-miżura fejn ir-riekwilibriju konsiderevoli qabel is-SK isir bi ħlas, l-awtoritajiet Franċiżi pproponew li jagħmlu din il-miżura assimetrika u li japplikaw il-ħlas tar-riekwilibriju għall-iżviluppi fil-livelli ta' ċertifikazzjoni biss għall-atturi li ġġeneraw volum sinifikanti ta' riekwilibriji. Ir-raġunament huwa li l-applikazzjoni ta' din il-miżura għall-atturi kollha tista' tkun ta' xkiel għall-kompetizzjoni għax tkun de facto ferm aktar restrittiva għall-atturi li jkollhom volum żgħir ta' kapaċitajiet meta mqabbla mal-operatur dominanti li jista' jakkumula d-differenzi tiegħu. L-introduzzjoni ta' limitu bħal dan (il-livell irid jiġi stabbilit, iżda mhux aktar minn 1 GW) tippermetti għalhekk (i) li tinżamm il-flessibbiltà tal-iskema attwali għall-parti l-kbira tal-atturi, iżda fl-istess ħin (ii) li telimina l-possibbiltà li l-atturi li jkollhom portafoll kbir ta' kapaċitajiet li jimmanipulaw is-suq billi jakkumulaw għadd ta' riekwilibriji “żgħar”.

(279)

It-tielet rimedju ser isaħħaħ l-inċentivi indirizzati lejn l-atturi kollha tas-suq biex ibiegħu ċ-ċertifikati tagħhom fis-suq tal-kapaċità, jikkontribwixxu għall-formazzjoni ta' prezz ta' referenza tas-suq li jiżvela effettivament il-valur tal-kapaċità, u ma jkunux jistgħu jagħmlu arbitraġġ bejn passaġġ mis-suq u sourcing fil-qafas tas-saldu tad-differenzi.

(280)

Il-Kummissjoni tqis li dawn ir-rimedji kollha jgħinu biex ir-riskju taż-żamma tal-kapaċitajiet tal-inqas jitnaqqas kemm jista' jkun, għalkemm ma jistax jiġi eskluż għal kollox. Huwa ovvju li l-kontroll tas-suq mill-awtoritajiet regolatorji Franċiżi ser jikkomplementa dawn l-inċentivi integrati fil-mekkaniżmu.

(281)

Biex jevitaw ir-riskju taż-żamma tal-garanziji, l-awtoritajiet Franċiżi ntrabtu li jżidu n-numru ta' rkantijiet organizzati qabel is-sena ta' konsenja u li jobbligaw lill-operaturi tal-kapaċità li joffru ċerti volumi minimi ta' garanziji waqt kull sessjoni ta' rkant organizzata.

(282)

Dawn ir-rimedji jingħaqdu ma' dawk diġà stabbiliti, bħall-possibbiltà li l-fornituri jiksbu garanziji tal-kapaċità billi jiksbu l-prodott ARENH. F'dan ir-rigward l-awtoritajiet ipproponew li jistudjaw l-opportunità li “jiffinanzjalizzaw” is-sehem tal-kapaċità tal-prodott ARENH fil-kuntest ta' valutazzjoni futura tal-funzjonament tas-suq sabiex jiġi evitat li dan il-prodott ifixkel il-formazzjoni libera tal-prezzijiet fis-suq tal-kapaċità. Dan ir-rimedju jwieġeb parzjalment għas-suġġerimenti ta' reviżjoni tal-ARENH li għamlu ċerti partijiet interessati, u li jidhru fil-premessa 182 ta' dan id-dokument.

(283)

Ir-rimedji kollha tal-awtoritajiet Franċiżi għandhom jgħinu biex jonqsu kemm jista' jkun il-possibbiltà u l-interess tal-operaturi tal-kapaċità l-kbar, u b'mod partikolari tal-operatur stabbilit, li jżommu garanziji tal-kapaċità. Barra minn hekk, b'dan tkun żgurata l-likwiditá tas-sessjonijiet tal-irkantijiet tal-garanziji.

(284)

Il-Kummissjoni tqis, għalhekk, li dawn l-impenji jifformaw sett ta' rimedji proporzjonati għat-tħassib ta' likwidità li l-Kummissjoni qajmet fid-Deċiżjoni tal-Ftuħ.

(285)

Fil-premessa 194 tad-Deċiżjoni tal-Ftuħ, il-Kummissjoni kienet uriet tħassib dwar ir-riskju ta' sussidji trażversali bejn is-settur tal-produzzjoni u s-settur tal-kummerċjalizzazzjoni tal-operatur stabbilit (jiġifieri l-bejgħ tal-garanziji tal-kapaċità lill-kompetituri bi prezz ogħla mill-prezz tal-bejgħ intern bejn is-settur tal-produzzjoni u s-settur tal-kummerċjalizzazzjoni tiegħu, bil-konsegwenza li jiġu esklużi kompetituri mis-suq tal-provvista tal-elettriku).

(286)

Biex jiffaċilitaw id-detezzjoni ta' dawn il-prattiki u jirrimedjaw għalihom, l-awtoritajiet sejrin jikkoreġu minn naħa lakuna fir-regolamenti eżistenti li tippermetti t-trasferiment bla ħlas tal-garanziji. Wara din il-modifika fir-regolamenti, il-fornituri mhumiex ser ikollhom aktar il-possibbiltà li jittrasferixxu garanziji tal-kapaċità bla ħlas mill-fergħa tal-produzzjoni tagħhom lill-fergħa kummerċjali tagħhom. Ir-regolamenti se jkollhom jipprovdu li t-trasferimenti interni ta' operatur integrat għandhom isiru bi prezz rappreżentattiv tal-prezzijiet li joħorġu mis-sessjonijiet tas-suq organizzat. Għal dan il-għan, jekk il-prezz li joħroġ mis-sessjoni(jiet) tas-suq organizzat ma jkunx magħruf fid-data tat-trasferiment intern, l-operaturi integrati jkunu jistgħu jiddikjaraw prezz indiċjat fuq il-prezz tas-sessjonijiet tas-suq organizzat. Pereżempju, operatur integrat ikun jista' jiddikjara li trasferiment intern huwa ugwali għall-prezz ta' referenza tas-suq qabel ma l-valur preċiż tiegħu jkun stabbilit uffiċjalment mill-Kummissjoni li tirregola l-enerġija.

(287)

Min-naħa l-oħra, l-atturi tas-suq ser ikollhom aċċess sħiħ għar-reġistru tat-tranżazzjonijiet tal-garanziji tal-kapaċità. Is-suq b'hekk ikollu kontroll fuq it-trasferimenti mhux irregolati, ladarba dawn it-trasferimenti (anonimi) ser ikunu pubbliċi. Kif spjegat fil-premessa 263, b'dan il-mod din il-miżura tiżgura t-trasparenza tas-suq mhux irregolat.

(288)

B'hekk l-awtoritajiet Franċiżi indirizzaw l-oġġezzjonijiet tal-Kummissjoni rigward ir-riskji ta' kompressjoni tat-tariffi mill-operatur stabbilit.

(289)

Minħabba d-diversi rimedji proposti minn Franza, il-Kummissjoni tqis li l-mekkaniżmu rivedut huwa proporzjonat mal-objettiv tiegħu.

(290)

Biex jirrimedjaw għall-problemi tal-kapaċitajiet ġodda ta' produzzjoni li jipparteċipaw fil-mekkaniżmu, kif identifikati mill-Kummissjoni fid-Deċiżjoni tal-Ftuħ, l-awtoritajiet Franċiżi ntrabtu li jemendaw il-mekkaniżmu kif ġej:

(291)

Dawn ir-rimedji huma tali li jneħħu l-ostakli għad-dħul tal-kapaċitajiet il-ġodda.

(292)

Kif spjegat fil-premessa 237, il-Kummissjoni tqis li Franza sabet bilanċ tajjeb bejn id-diversi obbligi tal-kapaċitajiet ta' ġestjoni tad-domanda mingħajr ma illimitat il-parteċipazzjoni tagħhom fil-mekkaniżmu. Għalkemm il-parteċipazzjoni taż-żewġ tipi ta' ġestjoni tad-domanda fil-mekkaniżmu mhijiex l-istess, il-Kummissjoni tqis li din id-differrenzjazzjoni hija meħtieġa biex tippermetti l-aħjar parteċipazzjoni taż-żewġ tipi ta' kapaċitajiet ta' ġestjoni tad-domanda.

(293)

Kif indikat fil-premessi 119 sa 125, bi tweġiba għat-tħassib tal-Kummissjoni u tal-partijiet terzi, l-awtoritajiet Franċiżi pproponew mudell ibridu, li jipprovdi l-għoti ta' biljetti ta' interkonnessjoni li b'mod definittiv jippermettu l-parteċipazzjoni tal-kapaċitajiet ta' produzzjoni barranin.

(294)

Kif spjegat fil-premessa 239, l-awtoritajiet Franċiżi pproponew rimedju adegwat li jippermetti l-parteċipazzjoni espliċita tal-kapaċitajiet transkonfinali fil-mekkaniżmu. Dan l-ilment tal-Kummissjoni għalhekk ġie riżolt.

(295)

Is-soluzzjoni għall-parteċipazzjoni espliċita tal-kapaċitajiet transkonfinali magħżula minn Franza tippermetti wkoll li jiġu kkumpensati l-interkonnessjonijiet jekk dan l-assi huwa rari. Is-soluzzjoni magħżula twieġeb għalhekk għar-riskju li jiġi kompromess l-akkoppjar tas-swieq identifikati mill-Kummissjoni fil-premessa (206) tad-Deċiżjoni tal-Ftuħ (35).

(296)

Kif spjegat fil-premessi 245 sa 247 u fit-Taqsima 5.3.4.1, il-Kummissjoni kienet identifikat riskju li l-fornituri alternattivi, u speċjalment il-parteċipanti ġodda, jistgħu jsibu diffikultajiet biex jistmaw l-obbligi tal-kapaċità individwali tagħhom. Mill-kummenti tal-Kummissjoni fl-imsemmija premessi isegwi li l-awtoritajiet Franċiżi implimentaw miżuri adegwati sabiex jgħinu lill-fornituri jikkalkulaw aħjar l-obbligi tal-kapaċità tagħhom.

(297)

Barra minn hekk, fil-verżjoni inizjali tal-mekkaniżmu tal-kapaċità, id-diversi atturi kellhom ftit viżibbiltà fuq it-tranżazzjonijiet mhux irregolati, u b'hekk ma kellhomx stampa sħiħa fuq il-prezz tal-kapaċità. Franza pproponiet rimedji sabiex ittejjeb il-viżibbiltà fuq il-kummerċ kollu għall-atturi kollha, kif deskritt fit-Taqsima 5.3.4.2. Dawn il-miżuri jinkludu l-għoti tal-aċċess lill-atturi kollha għar-reġistru tat-tranżazzjonijiet mhux irregolati (miżmuma anonimi), u t-tisħiħ tal-irkantijiet organizzati.

(298)

Dawn ir-rimedji kollha jiżguraw li l-atturi l-oħrajn apparti l-operatur stabbilit ser ikollhom idea aħjar tal-obbligi tagħhom ta' kapaċità, minn naħa, u tal-volumi u tal-prezz tal-kummerċ, min-naħa l-oħra. Dawn il-miżuri jtejbu ħafna t-trasparenza tal-mekkaniżmu u b'hekk jirriekwilibraw id-diskrepanzi fl-informazzjoni favur l-operatur stabbilit, li ser ikun l-akbar attur fil-mekkaniżmu kemm min-naħa tal-operaturi tal-kapaċità kif ukoll min-naħa tal-fornituri.

(299)

Il-Kummissjoni tinnota li, għall-kapaċitajiet il-ġodda, l-awtoritajiet Franċiżi qiegħdin jippjanaw l-introduzzjoni ta' kriterji ambjentali li jwasslu biex tingħata preferenza lill-produtturi bi ftit emissjonijiet tal-karbonju (ara l-premessa 137).

(300)

Dawn id-dispożizzjonijiet jirrispettaw il-GLAEE (36), li jinsistu fuq il-ħtieġa li dawn il-miżuri jagħtu preferenza lill-produtturi bi ftit emissjonijiet tal-karbonju, b'parametri tekniċi u ekonomiċi ekwivalenti.

(301)

Għar-raġunijiet imsemmija hawn fuq, il-Kummissjoni tikkonkludi li l-mekkaniżmu mgħadux f'riskju li jgħawweġ indebitament il-kompetizzjoni u/jew il-kummerċ intra-UE.

(302)

Peress li l-mekkaniżmu Franċiż huwa l-ewwel mekkaniżmu tal-kapaċità deċentralizzat approvat mill-Kummissjoni taħt l-iskema tal-GLAEE u peress li l-ħtieġa tal-mekkaniżmu tiddependi ħafna mill-iżviluppi fis-suq tal-enerġija, suq li għadu qed jiżviluppa f'kuntest ta' liberalizzazzjoni tas-suq, il-Kummissjoni tqis li l-approvazzjoni tal-mekkaniżmu għandha tkun għal żmien limitat. Il-Kummissjoni tqis li terminu ta' għaxar (10) snin huwa raġonevoli u konformi mad-deċiżjonijiet preċedenti (37).

(303)

Il-Kummissjoni tinnota li r-Repubblika Franċiża implimentat suq tal-kapaċità fi Franza bi ksur tal-Artikolu 108(3) tat-TFUE. Madankollu, minħabba d-diversi rimedji proposti minn Franza u deskritti hawn fuq, il-miżura hija konformi mal-GLAEE.