6.8.2015   

MT

Il-Ġurnal Uffiċjali tal-Unjoni Ewropea

L 209/11

(1)

Id-Direttiva 2003/85/KE tistipula miżuri minimi ta' kontroll li jridu jiġu applikati fil-każ ta' tifqigħa tal-marda tal-ilsien u d-dwiefer u ċerti miżuri ta' prevenzjoni bl-għan li jrawmu iktar kuxjenza u jżidu t-tħejjija tal-awtoritajiet kompetenti u tal-komunità agrikola fir-rigward ta' dik il-marda.

(2)

Il-miżuri ta' prevenzjoni stipulati fid-Direttiva 2003/85/KE jinkludu d-dispożizzjoni li l-Istati Membri jridu jaċċertaw li l-laboratorji approvati biss, li huma mniżżla fl-Anness XI ta' dik id-Direttiva, ikollhom f'idejhom il-vajrus ħaj tal-marda tal-ilsien u d-dwiefer għar-riċerka, għad-dijanjożi u għall-manifatturar tat-tilqimiet.

(3)

Il-Parti A tal-Anness XI tad-Direttiva 2003/85/KE tagħti lista ta' laboratorji nazzjonali li huma awtorizzati li jkollhom f'idejhom il-vajrus ħaj tal-marda tal-ilsien u d-dwiefer għal għanijiet dijanjostiċi u ta' riċerka. Il-Parti B ta' dak l-Anness tagħti lista ta' laboratorji li jkollhom f'idejhom l-antiġen tal-vajrus matul il-manifatturar tat-tilqimiet.

(4)

Il-Kroazja u l-Litwanja għarrfu lill-Kummissjoni b'mod uffiċjali li l-laboratorji nazzjonali rispettivi tagħhom ta' referenza ma għadhomx jitqiesu li jissodisfaw l-istandards ta' bijosigurtà previsti fl-Artikolu 65(d) tad-Direttiva 2003/85/KE. Għalhekk, l-entrati għal dawk il-pajjiżi għandhom jitħassru mil-lista fil-Parti A tal-Anness XI ta' dik id-Direttiva. Il-Greċja u l-Ungerija talbu biex jinbidel l-isem tal-laboratorju nazzjonali tagħhom stipulat f'dik il-lista minħabba bidliet organizzattivi. Ir-Repubblika Ċeka talbet biex tiġi prevista korrezzjoni ta' żball ortografiku fl-isem tal-laboratorju nazzjonali tagħha f'dik il-lista.

(5)

Għal ċertezza ġuridika, huwa importanti li l-lista ta' laboratorji nazzjonali stipulata fil-Parti A tal-Anness XI tad-Direttiva 2003/85/KE tinżamm aġġornata. Għalhekk, jeħtieġ li jitneħħew l-entrati għall-Kroazja u għal-Litwanja minn dik il-lista ta' laboratorji, li jiġu emendati l-ismijiet tal-laboratorji nazzjonali fir-Repubblika Ċeka, fil-Greċja u fl-Ungerija, kif ukoll li f'dik il-lista ta' laboratorji jiġi speċifikat li l-Pirbright Institute jipprovdi s-servizzi ta' Laboratorju Nazzjonali ta' Referenza għall-Bulgarija, għall-Kroazja, għal-Litwanja u għall-Portugall.

(6)

Il-Ġermanja talbet biex jinbidel l-isem tal-laboratorju mniżżel fil-Parti B tal-Anness XI tad-Direttiva 2003/85/KE minħabba bidliet organizzattivi. Fl-istess ħin, il-Parti B ta' dak l-Anness għandu jiġi emendat sabiex jiġi kkoreġut il-kodiċi tal-ISO tal-pajjiż li jintuża għar-Renju Unit.

(7)

Għalhekk, il-Partijiet A u B tal-Anness XI tad-Direttiva 2003/85/KE għandhom jiġu emendati skont dan.

(8)

Il-punt 1 tal-Anness XII tad-Direttiva tal-Kunsill 2003/85/KE jistipula standards ta' bijosigurtà għal-laboratorji li jkollhom f'idejhom il-vajrus ħaj tal-marda tal-ilsien u d-dwiefer. Il-punt 1 jistabbilixxi li laboratorji bħal dawn iridu minn tal-inqas jissodisfaw ir-rekwiżiti stipulati fid-dokument “L-istandards minimi għal laboratorji li jaħdmu fuq il-vajrus tal-ilsien u d-dwiefer b'mod in vitro u in vivo” li ġie adottat mill-Kummissjoni Ewropea fit-38 Sessjoni Ġenerali għall-kontroll tal-marda tal-ilsien u d-dwiefer (EuFMD) li seħħet fid-29 ta' April 2009 f'Ruma (l-istandards ta' bijosigurtà). Fl-40 Sessjoni Ġenerali tal-EuFMD, li seħħet mit-22 sal-24 ta' April 2013 f'Ruma, ġiet adottata edizzjoni riveduta ta' dawk l-istandards ta' bijosigurtà (2).

(9)

L-edizzjoni riveduta tal-istandards ta' bijosigurtà tinkludi t-Taqsima I dwar laboratorji li jaħdmu fuq il-vajrus tal-marda tal-ilsien u d-dwiefer b'mod in vitro u in vivo, u t-Taqsima II dwar laboratorji li jwettqu investigazzjonijiet dijanjostiċi għall-marda tal-ilsien u d-dwiefer fil-qafas ta' pjan nazzjonali ta' kontinġenza.

(10)

Għalhekk, ir-referenza għall-istandards ta' bijosigurtà fil-punt 1 tal-Anness XII tad-Direttiva 2003/85/KE għandha tiġi emendata sabiex tirreferi għat-Taqsima rilevanti tal-iktar edizzjoni riveduta attwali tagħhom.

(11)

Bejn Ġunju tal-2009 u Ġunju tal-2012, il-Kummissjoni wettqet 19-il awditu fi 15-il Stat Membru li jospitaw 16-il laboratorju nazzjonali u tliet laboratorji tal-produzzjoni tat-tilqimiet li huma awtorizzati li jkollhom f'idejhom il-vajrus ħaj tal-marda tal-ilsien u d-dwiefer u li huma mniżżlin fl-Anness XI tad-Direttiva 2003/85/KE. Dawk l-awditi kellhom l-għan li jivvalutaw il-kontrolli uffiċjali u li jevalwaw is-sistemi ta' bijosigurtà li jiġu applikati minn dawk il-laboratorji. L-eżitu tal-awditi ġie ppreżentat matul sessjoni ta' ħidma dwar il-bijosigurtà għal laboratorji li jkollhom f'idejhom il-vajrus ħaj tal-marda tal-ilsien u d-dwiefer, li seħħet fis-27 u fit-28 ta' Jannar 2015 fi Grange, fl-Irlanda. Ir-rapport tal-awditjar ġie ppubblikat immedjatament wara (3).

(12)

Il-punti 2 u 3 tal-Anness XII tad-Direttiva 2003/85/KE jipprevedu l-obbligu li jsiru spezzjonijiet tal-laboratorji u tal-istabbilimenti li jkollhom f'idejhom il-vajrus ħaj tal-marda tal-ilsien u d-dwiefer, u jistipulaw il-frekwenza tal-ispezzjonijiet, kif ukoll minn min ikun magħmul it-tim tal-ispezzjoni. Wara r-rakkomandazzjonijiet mis-sensiela ta' awditi li twettqu mill-Kummissjoni u filwaqt li jitqiesu l-obbligi li jsiru kontrolli uffiċjali f'konformità mal-Artikolu 45 tar-Regolament (KE) Nru 882/2004 tal-Parlament Ewropew u tal-Kunsill (4), jistgħu jiġu previsti spezzjonijiet abbażi tar-riskji u spezzjonijiet regolari tal-laboratorji li jkollhom f'idejhom il-vajrus ħaj tal-marda tal-ilsien u d-dwiefer mingħajr ma jiġu stabbiliti intervalli fissi u timijiet fissi tal-ispezzjoni.

(13)

Għalhekk, l-Anness XII tad-Direttiva 2003/85/KE għandu jiġi emendat skont dan.

(14)

L-Anness XV tad-Direttiva 2003/85/KE jistipula l-funzjonijiet u d-dmirijiet tal-laboratorji nazzjonali. Għal raġunijiet ta' ċarezza jeħtieġ li jiġi speċifikat li l-obbligi msemmija fil-punt 3 ta' dak l-Anness japplikaw biss għal dawk il-laboratorji nazzjonali ta' referenza li huma indikati bħala laboratorji nazzjonali ta' referenza f'konformità mal-Artikolu 68(1)(c) ta' dik id-Direttiva.

(15)

Barra minn hekk, wieħed mill-eżiti tal-awditi fl-Istati Membri u tad-diskussjoni fis-sessjoni ta' ħidma tas-27 u tat-28 ta' Jannar 2015 kien li l-Istati Membri għandhom iniżżlu bil-quddiem fil-pjanijiet tagħhom ta' kontinġenza liema huma l-laboratorji indikati l-oħra, imsemmija fil-punt 13 tal-Anness XV tad-Direttiva 2003/85/KE, u għandhom jiżguraw li l-miżuri meħuda biex jiġi evitat li l-vajrus tal-marda tal-ilsien u d-dwiefer b'xi mod joħroġ barra ż-żona ta' sigurtà fejn jinżamm, ikunu bbażati fuq ir-rakkomandazzjonijiet previsti fit-Taqsima II tal-istandards ta' bijosigurtà dwar laboratorji li jwettqu investigazzjonijiet dijanjostiċi għall-marda tal-ilsien u d-dwiefer fil-qafas ta' pjan nazzjonali ta' kontinġenza.

(16)

Għalhekk, l-Anness XV tad-Direttiva 2003/85/KE għandu jiġi emendat skont dan.

(17)

Għaldaqstant, id-Direttiva 2003/85/KE għandha tiġi emendata skont dan.

(18)

Il-miżuri previsti f'din id-Deċiżjoni huma f'konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,