11.4.2014   

MT

Il-Ġurnal Uffiċjali tal-Unjoni Ewropea

L 108/16

(1)

Ir-Regolament tal-Kummissjoni (KE) Nru 474/2006 (3) stabbilixxa l-lista Komunitarja ta' trasportaturi tal-ajru li huma soġġetti għal projbizzjoni tal-operat fl-Unjoni, kif jissemma fil-Kapitolu II tar-Regolament (KE) Nru 2111/2005.

(2)

Skont l-Artikolu 4(3) tar-Regolament (KE) Nru 2111/2005, xi Stati Membri u l-Aġenzija Ewropea tas-Sikurezza tal-Avjazzjoni (l-EASA) għaddew informazzjoni lill-Kummissjoni li hi rilevanti fil-kuntest tal-aġġornament tal-lista Komunitarja. L-informazzjoni rilevanti bagħtuha wkoll il-pajjiżi terzi. Il-lista Komunitarja għandha tiġi aġġornata skont din l-informazzjoni.

(3)

Il-Kummissjoni għarrfet lil kull trasportatur tal-ajru kkonċernat direttament jew permezz tal-awtoritajiet responsabbli għas-sorveljanza regolatorja tagħhom, dwar il-fatti u l-kunsiderazzjonijiet essenzjali li jsawru l-bażi ta' deċiżjoni li skonthom timponi projbizzjoni tal-operat fl-Unjoni jew tibdel il-kundizzjonijiet ta' projbizzjoni tal-operat imposta fuq trasportatur tal-ajru imniżżel fil-lista Komunitarja.

(4)

Lit-trasportaturi tal-ajru kkonċernati l-Kummissjoni tathom l-opportunità li jikkonsultaw id-dokumenti li ressqu l-Istati Membri, biex jagħtu kummenti bil-miktub u jagħmlu preżentazzjoni orali lill-Kummissjoni u lill-Kumitat stabbilit bir-Regolament tal-Kunsill (KEE) Nru 3922/1991 (il-“Kumitat għas-Sikurezza tal-Ajru”) (4).

(5)

Il-Kumitat għas-Sikurezza tal-Ajru rċieva aġġornamenti mingħand il-Kummissjoni dwar il-konsultazzjonijiet konġunti li għaddejjin, fil-qafas tar-Regolament (KE) Nru 2111/2005 u r-Regolament ta' Implimentazzjoni tal-Kummissjoni tiegħu (KE) Nru 473/2006 (5), mal-awtoritajiet kompetenti u mat-trasportaturi tal-ajru tal-istati tal-Ġeorgja, tar-Repubblika ta' Ginea, l-Indja, l-Indoneżja, il-Kazakistan, il-Libanu, il-Madagaskar, ir-Repubblika Islamika tal-Mawritanja, il-Możambik, in-Nepal, il-Filippini, is-Sudan, ir-Renju ta' Sważiland, il-Jemen u ż-Żambja. Il-Kumitat għas-Sikurezza tal-Ajru rċieva wkoll informazzjoni mingħand il-Kummissjoni dwar l-Afganistan, l-Iran u l-Kirgiżistan. Il-Kumitat għas-Sikurezza tal-Ajru rċieva wkoll aġġornamenti mingħand il-Kummissjoni dwar konsultazzjonijiet tekniċi mal-Federazzjoni Russa u dwar il-monitoraġġ tal-Libja.

(6)

Il-Kumitat għas-Sikurezza tal-Ajru sema' l-preżentazzjonijiet tal-EASA dwar ir-riżultati tal-analiżi tar-rapporti ta' verifika li għamlet l-Organizzazzjoni Internazzjonali tal-Avjazzjoni Ċivili (l-ICAO) fil-qafas tal-Programm Universali ta' Verifika tas-Sorveljanza (l-USOAP). L-Istati Membri ntalbu jagħtu prijorità lill-ispezzjonijiet fir-rampa tat-trasportaturi tal-ajru li ngħataw il-liċenzja mill-istati li fil-każ tagħhom l-ICAO tkun identifikat Kwistjonijiet Sinifikanti dwar is-Sikurezza (SSCs) jew li fil-każ tagħhom l-EASA tkun ikkonkludiet li hemm nuqqasijiet sinifikanti fis-sistema tas-sorveljanza tas-sikurezza. Minbarra l-konsultazzjonijiet li għamlet il-Kummissjoni skont ir-Regolament (KE) Nru 2111/2005, bil-prijoritizzazzjoni tal-ispezzjonijiet fir-rampa se tkun tista' tinkiseb aktar informazzjoni dwar il-prestazzjoni tas-sikurezza tat-trasportaturi tal-ajru li huma liċenzjati f'dawk l-istati.

(7)

Il-Kumitat għas-Sikurezza tal-Ajru sema' l-preżentazzjonijiet tal-EASA dwar ir-riżultati tal-analiżi ta' spezzjonijiet fir-rampa li saru fil-Programm tal-Valutazzjoni tas-Sikurezza tal-Inġenji tal-Ajru Barranin (is-SAFA) skont ir-Regolament tal-Kummissjoni (UE) Nru 965/2012 (6).

(8)

Il-Kumitat għas-Sikurezza tal-Ajru sema' l-preżentazzjonijiet tal-EASA dwar il-proġetti ta' assistenza teknika li twettqu fi stati milquta b'miżuri jew monitoraġġ skont ir-Regolament (KE) Nru 2111/2005. Il-Kumitat ġie infurmat bil-pjanijiet tal-EASA u bit-talbiet għal aktar assitenza teknika u koperazzjoni biex jitjiebu l-kapaċità amministrattiva u teknika tal-awtoritajiet tal-avjazzjoni ċivili bil-għan li jissolvew nuqqasijiet ta' konformità ma' standards internazzjonali applikabbli. L-Istati Membri ntalbu wkoll iwieġbu dawn it-talbiet fuq bażi bilaterali f'koordinazzjoni mal-Kummissjoni u mal-EASA. Dwar dan, il-Kummissjoni saħqet is-siwi li tingħata informazzjoni lill-komunità tal-avjazzjoni internazzjonali, b'mod partikolari mill-bażi tad-dejta SCAN tal-ICAO, dwar l-assistenza teknika li jagħtu l-Unjoni u l-Istati Membri tagħha biex titjieb is-sikurezza tal-avjazzjoni madwar id-dinja.

(9)

Il-Kumitat għas-Sikurezza tal-Ajru sema' wkoll preżentazzjoni tal-ICAO dwar il-ħidma li qed tagħmel fejn jidħol il-monitoraġġ tal-prestazzjoni tas-sikurezza tal-Istati Membri tagħha, inkluż bil-programm USOAP tal-ICAO, li wriet ukoll l-għodod tat-teknoloġija tal-informazzjoni li nħolqu f'dan il-qafas. B'referenza għar-Riżoluzzjoni tal-Assemblea A38-5 (“Koperazzjoni reġjonali u assistenza biex jissolvew in-nuqqasijiet fis-sikurezza, jinstabu prijoritajiet u jitfasslu miri li jistgħu jitkejlu”), l-ICAO sejħet lill-Kumitat għas-Sikurezza tal-Ajru biex sakemm possibbli tkun evitata d-duplikazzjoni tal-attivitajiet skont ir-Regolament (KE) Nru 2111/2005 u l-programm USOAP tal-ICAO, u ħeġġet li tissokta l-kollaborazzjoni, li eventwalment jaf twassal għal reviżjoni tal-mandat tal-Kumitat għas-Sikurezza tal-Ajru.

(10)

Il-Kumitat għas-Sikurezza tal-Ajru sema' wkoll preżentazzjoni tal-Eurocontrol li taġġorna dwar il-qagħda tal-funzjoni ta' twissija tas-SAFA. Apparti l-istatistika għall-messaġġi ta' twissija għar-trasportaturi pprojbiti, l-Organizzazzjoni Eurocontrol ffukat fuq l-importanza ta' pjan tat-titjira depożitat sew fir-rigward tat-twissija tas-SAFA. Ittieħdu l-ewwel azzjonijiet biex titjieb il-kwalità tal-pjan tat-titjira depożitat. Qed jitħejjew aktar passi id f'id mill-qrib mal-Kummissjoni ħalli tibqa' dejjem titjieb il-funzjoni ta' notifika u twissija.

(11)

Wara l-analiżi li għamlet l-EASA tat-tagħrif li ħareġ minn spezzjonijiet fir-rampa tas-SAFA li saru fuq inġenji tal-ajru ta' ċertu trasportaturi tal-ajru tal-Unjoni jew minn spezzjonijiet ta' standardizzazzjoni li għamlet l-EASA, kif ukoll minn spezzjonijiet u verifiki speċifiċi li għamlu l-awtoritajiet nazzjonali tal-avjazzjoni, bosta Stati Membri ħadu ċertu miżuri ta' infurzar u għarrfu lill-Kummissjoni u lill-Kumitat għas-Sikurezza tal-Ajru dwar dawk il-miżuri. Rigward it-trasportatur tal-ajru Bingo Airways, il-Polonja informat li qed tivverifika l-implimentazzjoni proprja tal-pjan ta' azzjoni korrettiva min-naħa tat-trasportatur tal-ajru, u li kienet żiedet l-ispezzjonijiet. Rigward it-trasportatur tal-ajru Sonnig, l-Isvizzera informat li nbdiet proċedura ta' revoka kontra Sonnig, wara li t-trasportatur tal-ajru rrinunzja ċ-Ċertifikat tal-Operatur tal-Ajru (AOC) u l-liċenzja tal-operat tiegħu.

(12)

Jekk xi informazzjoni rilevanti tas-sikurezza turi li jeżistu riskji imminenti tas-sikurezza minħabba nuqqas ta' konformità min-naħa tat-trasportaturi tal-ajru tal-Unjoni ma' standards xierqa tas-sikurezza, l-Istati Membri saħqu li huma lesti jaġixxu kif meħtieġ.

(13)

Minħabba s-sejbiet li ħarġu mill-Verifika Komprensiva tas-Sistema (is-CSA) tal-ICAO fil-Ġeorġja f'Ottubru 2013, l-ICAO għarrfet lil kull Stat Kontraenti għall-Konvenzjoni ta' Chicago b'SSC wieħed relatat mal-Operazzjonijiet tal-Inġenji tal-Ajru.

(14)

Wara li qieset din in-notifika, il-Kummissjoni bdiet konsultazzjonijiet formali mal-awtoritajiet kompetenti tal-Ġeorġja (il-GCAA) biex tkun taf fid-dettall dwar x'azzjonijiet kienet ħadet il-Ġeorġja biex tindirizza n-nuqqasijiet tas-sikurezza li ħarġu mill-verifika tal-ICAO.

(15)

Għal dan l-għan, fis-17 ta' Marzu 2014 saret laqgħa bejn il-GCAA, il-Kummissjoni u l-EASA. Il-GCAA spjegaw il-kawża ewlenija tal-SSC u taw id-dettalji tal-Pjan ta' Azzjoni Korrettiva (il-PAK) li ressqu lill-ICAO. L-informazzjoni mressqa fil-laqgħa wriet l-impenn qawwi tal-GCAA biex jimplimentaw u jinfurzaw l-istandards rilevanti tas-sikurezza f'konformità mar-rekwiżiti tal-Konvenzjoni ta' Chicago. Waqt il-laqgħa, il-GCAA ddikjaraw li l-azzjonijiet kollha li kienet tlestiet parti mill-pjan ta' azzjoni korrettiva li ntbagħat lill-ICAO u li issa kienu qed jistennew li aktar tard din is-sena l-ICAO tagħmel missjoni ta' verifika.

(16)

Skont l-informazzjoni li taw il-GCAA, il-Kummissjoni dehrilha li mhemmx bżonn titlob lill-GCAA biex jidhru quddiem il-Kumitat għas-Sikurezza tal-Ajru. Il-Kummissjoni rrappurtat lill-Kumitat għas-Sikurezza tal-Ajru dwar l-implimentazzjoni tal-PAK li żviluppa il-GCAA.

(17)

Skont il-kriterji komuni stabbiliti fl-Anness tar-Regolament (KE) Nru 2111/2005 u fid-dawl tal-azzjonijiet li ħadu l-GCAA, hu vvalutat li f'dan l-istadju m'hemmx raġunijiet biex tinbidel il-lista Komunitarja tat-trasportaturi tal-ajru li huma soġġetti għal projbizzjoni tal-operat fl-Unjoni fir-rigward tat-trasportaturi tal-ajru mill-Ġeorġja. Madankollu, jekk ir-riżultati tal-monitoraġġ mill-qrib tal-implimentazzjoni tal-pjan ta' azzjoni korrettiva min-naħa tal-GCAA, li fuqhom il-Kummissjoni se tirrapporta fil-laqgħa li jmiss tal-Kumitat għas-Sikurezza tal-Ajru, ma jkunux jitqiesu sodisfaċenti, il-Kummissjoni jkollha tieħu azzjoni ulterjuri skont ir-Regolament (KE) Nru 2111/2005.

(18)

Kif inqabel fil-laqgħa li saret Brussell f'Jannar 2013, l-awtoritajiet kompetenti tar-Repubblika tal-Ginea (id-DNAC) taw tagħrif regolari dwar l-implimentazzjoni li għaddejja tal-Pjan ta' Azzjoni Korrettiva (PAK), li approvat l-ICAO f'Diċembru 2012, kif ukoll kull attività relatata miegħu.

(19)

L-aħħar rapport ta' progress li wasal fis-27 ta' Frar 2014 ta dettalji dwar l-aktar attivitajiet u żviluppi riċenti dwar l-implimentazzjoni tal-PAK. Il-Liġi tal-Avjazzjoni Ċivili riveduta adottaha l-Parlament fil-5 ta' Novembru 2013 u daħlet fis-seħħ fit-28 ta' Novembru 2013. Għadd ta' abbozzi ta' atti ta' implimentazzjoni ngħaddew lill-gvern għall-adozzjoni. Mit-2 sas-6 ta' Diċembru 2013 saret missjoni konġunta tal-ICAO u l-Bank Dinji biex tivvaluta l-implimentazzjoni tal-PAK u tidentifika xi ħtiġijiet ikun għad fadal mil-lat ta' sikurezza u sigurtà. Bħalissa qed issir it-traduzzjoni għall-Franċiż tal-manwali tal-proċeduri tal-OPS, l-AIR u l-AGA u din għandha tgħin biex tgħolli l-livelli tas-sikurezza. Fl-oqsma tar-riżoluzzjoni tat-tħassib tas-sikurezza, l-approvazzjoni tal-ispeċifikazzjonijiet operattivi tal-AOC u s-servizzi tan-navigazzjoni fl-ajru twettqu għadd ta' azzjonijiet speċifiċi ta' taħriġ għall-ispetturi.

(20)

Il-PAK ġie aġġornat sabiex jirrifletti dawn l-aħħar żviluppi u tressaq lill-ICAO permezz tal-għodda onlajn tas-CMA. Il-validazzjoni ta' dawn l-azzjonijiet mill-ICAO għadha pendenti.

(21)

Iċ-ċertifikati tal-operatur tal-ajru li kienu jeżistu qabel, ġew sospiżi fl-aħħar ta' Marzu 2013, u qed issir ċertifikazzjoni (f'5 fażijiet) konformi mal-ICAO ta' trasportatur tal-ajru nazzjonali (PROBIZ Guinée b'inġenju tal-ajru wieħed (1) tat-tip BE90) bl-għajnuna u l-appoġġ ta' missjoni CAFAC/BAGASOO speċifika, u qed isir taħriġ simultanju fuq lant tax-xogħol lill-ispetturi tad-DNAC dwar il-proċess kollu. Bħalissa l-proċess taċ-ċertifikazzjoni qed jistenna l-approvazzjoni tal-programm ta' manutenzjoni mill-FAA li hi l-awtorità tal-istat għar-reġistrazzjoni tal-inġenji tal-ajru. PROBIZ Guinée ma joperax lejn l-Unjoni.

(22)

Id-DNAC kienu talbu ICVM biex jivvalidaw il-progress fl-implimentazzjoni tal-PAK u l-ICAO kienet qed tippjana li twettaq dan f'Mejju 2014. Minħabba bidliet riċenti fil-ġestjoni għolja tal-Ministeru tat-Trasport inħoloq xi dewmien u l-ICVM qed titħejja għat-tieni nofs ta' Settembru 2014.

(23)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, hu vvalutat li f'dan l-istadju m'hemmx raġunijiet biex tinbidel il-lista Komunitarja tat-trasportaturi tal-ajru li huma soġġetti għal projbizzjoni tal-operat fl-Unjoni fir-rigward tat-trasportaturi tal-ajru mir-Repubblika tal-Ginea. Jekk xi informazzjoni rilevanti tas-sikurezza turi li jeżistu riskji imminenti tas-sikurezza minħabba nuqqas ta' konformità ma' standards internazzjonali tas-sikurezza, il-Kummissjoni jkollha tieħu azzjoni f'konformità mar-Regolament (KE) Nru 2111/2005.

(24)

Il-Kummissjoni pprovdiet lill-Kumitat għas-Sikurezza tal-Ajru bid-dettalji dwar l-iżviluppi riċenti fejn tidħol is-sorveljanza tat-trasportaturi tal-ajru ċċertifikati fl-Indja mill-awtoritajiet kompetenti ta' dan il-pajjiż. Fatt direttament rilevanti hu li skont il-Valutazzjoni tas-Sikurezza tal-Avjazzjoni Internazzjonali (l-IASA) tal-Amministrazzjoni tal-Avjazzjoni Federali tal-Istati Uniti (il-FAA) għaż-żjara ta' Settembru 2013, fil-31 ta' Jannar 2014 il-FAA ħabbret tnaqqis fil-kategorija ta' konformità tal-Indja minn Livell 1 għal Livell 2 minħabba nuqqasijiet li ħarġu mill-verifika.

(25)

Qabel, f'Novembru 2013, il-Kummissjoni kienet tat dettalji lill-Kumitat għas-Sikurezza tal-Ajru dwar il-kapaċità tal-awtoritajiet kompetenti tal-Indja biex iwettqu l-obbligi tagħhom ta' sorveljanza skont l-istandards internazzjonali inkluż dak tal-Konvenzjoni ta' Chicago. Saret referenza speċifika għall-Missjoni Koordinata ta' Validazzjoni tal-ICAO (l-ICVM) ta' Diċembru 2012 u l-ICVM ta' segwitu ta' Awwissu 2013. Barra minn hekk, saret referenza għall-korrispondenza li l-Kummissjoni kienet bagħtet qabel lill-awtoritajiet Indjani b'referenza għal tħassib dwar is-sikurezza. Wara l-ICVM ta' Awwissu 2013, l-ICAO formalment għalqet iż-żewġ Kwistjonijiet Sinifikanti dwar is-Sikurezza (SSCs), u dan ġie rrappurtat lill-Kumitat għas-Sikurezza tal-Ajru ta' Novembru 2013. Ir-rapport finali ppubblikat tal-ICVM jipprovdi dettalji dwar l-azzjonijiet korrettivi li ħa d-Direttorat Ġenerali Indjan tal-Avjazzjoni Ċivili (id-DGCA) biex issolvi l-kwistjonijiet pendenti.

(26)

Wara li l-FAA ħabbret tnaqqis tal-Indja fil-klassifika tal-konformità tal-IASA kategorija, il-Kummissjoni fit-12 ta' Frar 2014 ltaqgħet mad-Direttur Ġenerali tal-Avjazzjoni Ċivili u esprimiet it-tħassib tagħha dwar dan it-tnaqqis. Il-Kummissjoni talbet lill-awtoritajiet Indjani biex jispjegaw b'mod ċar l-azzjonijiet korrettivi li kienu qed iwettqu fejn jidħol it-tnaqqis fl-IASA mill-FAA. Barra minn hekk, fil-laqgħa saret enfasi mill-ġdid fuq il-miżuri li jaf ikunu meħtieġa jittieħdu fl-awspiċji tar-Regolament (KE) Nru 2111/2005.

(27)

Bħala segwitu tal-ewwel laqgħa tat-12 ta' Frar 2014, fis-17 ta' Frar 2014 id-Direttur Ġenerali tal-Avjazzjoni Ċivili kiteb lill-Kummissjoni. Din l-ittra tat dettalji tal-azzjonijiet li ħadu d-DGCA rigward it-tnaqqis. L-informazzjoni mogħtija tat dettalji dwar azzjonijiet li ttieħdu dwar il-biċċa l-kbira tas-sejbiet, u għall-aktar oqsma ta' tħassib preżentat pjan ta' azzjoni korrettiva.

(28)

Fis-6 ta' Marzu 2014 il-Kummissjoni kitbet u infurmat lid-DGCA Indjani li kienet qed tistieden konsultazzjonijiet uffiċjali mal-awtoritajiet responsabbli għas-sorveljanza regolatorja tat-trasportaturi tal-ajru ċċertifikati fl-Indja, skont id-dispożizzjonijiet stabbiliti fl-Artikolu 3(2) tar-Regolament tal-Kummissjoni (KE) Nru 473/2006. L-ittra saħqet fuq il-ħtieġa ta' impenn kontinwu u talbet laqgħa teknika biex il-Kummissjoni u l-Istati Membri ikunu jistgħu jevalwaw il-kwistjonijiet f'aktar dettall. Fit-18 ta' Marzu 2014, id-DGCA wieġbu, u indikaw li jaqblu ma' din il-laqgħa.

(29)

Fid-dawl tad-dispożizzjoni tad-DGCA li jaħdmu id f'id mal-Kummissjoni u tal-valutazzjoni tal-informazzjoni li waslet s'issa, hu vvalutat, skont il-kriterji komuni, li f'dan l-istadju l-lista Komunitarja tat-trasportaturi tal-ajru ma għandhiex tinbidel biex jiddaħħlu t-trasportaturi tal-ajru mill-Indja. Se jsir monitoraġġ mill-qrib tas-sitwazzjoni u jekk xi informazzjoni rilevanti tas-sikurezza turi li mhumiex qed jintlaħqu l-istandards internazzjonali tas-sikurezza, il-Kummissjoni jkollha tieħu azzjoni f'konformità mar-Regolament (KE) Nru 2111/2005.

(30)

L-Istati Membri se jibqgħu jivverifikaw il-konformità effettiva mal-istandards rilevanti tas-sikurezza bil-prijoritizzazzjoni tal-ispezzjonijiet fir-rampa li jridu jsiru lit-trasportaturi tal-ajru Indjani skont ir-Regolament (UE) Nru 965/2012.

(31)

Il-konsultazzjonijiet mal-awtoritajiet kompetenti tal-Indoneżja (id-DGCA) se jissoktaw bil-għan li jikkonfermaw li d-DGCA għaddejjin b'ħidma biex jiżguraw li s-sorveljanza tas-sikurezza tat-trasportaturi tal-ajru kollha ċċertifikati fl-Indoneżja tkun konformi mal-istandards internazzjonali tas-sikurezza.

(32)

Fl-14 ta' Jannar 2014 il-Kummissjoni kitbet lid-DGCA biex tikseb tagħrif aġġornat dwar trasportaturi tal-ajru li huma fis-sorveljanza tagħhom. B'ittra datata l-10 ta' Frar 2014, id-DGCA għarrfu lill-Kummissjoni li sa mill-aħħar aġġornament ġew iċċertifikati tliet trasportaturi tal-ajru ġodda. Fil-25 ta'Ottubru 2013 inħareġ AOC Nru 121-028 għal Sky Aviation, fl-1 ta' Novembru 2013 inħareġ AOC Nru 121-043 għal Aviastar Mandiri u fid-29 ta' Novembru 2013 inħareġ AOC Nru 121-058 għal NAM Air. Madankollu, billi d-DGCA ma tawx evidenza li tiżgura li s-sorveljanza tas-sikurezza ta' dawn it-trasportaturi tal-ajru hi konformi mal-istandards internazzjonali tas-sikurezza, skont il-kriterji komuni, hu meqjus li dawn it-trasportaturi tal-ajru għandhom jiddaħħlu wkoll fl-Anness A.

(33)

Fl-2012, id-DGCA bdew korrispondenza mal-Kummissjoni bil-għan li PT. Citilink Indonesia jitneħħa mill-Anness A, kif ġara lill-kumpanija prinċipali tiegħu Garuda Indonesia. Bħala rispons għat-tweġiba tal-Kummissjoni, it-talba ġiet segwita b'korrispondenza mingħand Garuda Indonesia u fl-2013 mingħand PT. Citilink Indonesia. Wara li lill-Kummissjoni PT. Citilink Indonesia ressqilha dokumentazzjoni sostanzjali dwar iċ-ċertifikazzjoni tat-trasportatur tal-ajru, fil-5 ta' Novembru 2013 saret laqgħa teknika fi Brussell. F'din il-laqgħa attendew il-Kummissjoni, l-EASA u l-Istati Membri. Fi tmiem il-laqgħa, PT. Citilink Indonesia intalab jagħti aktar evidenza dwar l-attivitajiet ta' sorveljanza li għamlu d-DGCA lil PT. Citilink Indonesia. PT. Citilink Indonesia għadda din l-informazzjoni fl-20 ta' Frar 2014.

(34)

F'ittra tal-10 ta' Frar 2014, id-DGCA taw informazzjoni lill-Kummissjoni dwar it-talba tagħhom biex titneħħa l-projbizzjoni tal-operat lil PT. Citilink Indonesia. F'din l-ittra d-DGCA ressqu dejta dwar ir-riżorsi u l-kapaċitajiet ta' PT. Citilink Indonesia, ir-rekords tas-sikurezza kif ukoll evidenza tal-attivitajiet ta' sorveljanza tas-sikurezza tat-trasportaturi li wettqu d-DGCA. Skont din id-dokumentazzjoni, id-DGCA ddikjaraw li fil-fehma tagħhom PT. Citilink Indonesia topera b'mod sikur u skont l-istandards internazzjonali tas-sikurezza.

(35)

Fil-25 ta' Marzu 2014, il-Kumitat għas-Sikurezza tal-Ajru sema' preżentazzjoni tad-DGCA dwar aġġornament fir-rigward tal-leġiżlazzjoni u s-sorveljanza kif ukoll informazzjoni dwar is-sorveljanza ta' PT. Citilink Indonesia. Wara l-preżentazzjoni tad-DGCA saret preżentazzjoni ta' PT. Citilink Indonesia li kien ħarġet bi pjanijiet tal-espansjoni tal-flotta u kwistjonijiet relatati mar-reklutaġġ tal-bdoti kif ukoll temi dwar il-ġestjoni tas-sikurezza.

(36)

Il-Kumitat għas-Sikurezza tal-Ajru staqsa mistoqsijiet lid-DĠAĊ u lil PT.Citilink Indonesia rigward il-ġestjoni tas-sikurezza, fosthom dwar ir-riskji u l-perikli li identifika t-trasportatur tal-ajru. Skont ir-rispon li ngħata, il-Kumitat għas-Sikurezza tal-Ajru wera tħassib dwar il-mod kif l-awtoritajiet, PT. Citilink Indonesia u trasportaturi tal-ajru oħra ċċertifikati l-Indoneżja jikkontrollaw ir-riskji assoċjati mar-rati għoljin ta' espansjoni li għandhom dawk il-kumpaniji. Il-Kumitat għas-Sikurezza tal-Ajru wera tħassib ukoll dwar il-kapaċità ta' PT. Citilink Indonesia biex jiġbed konklużjonijiet mill-informazzjoni miġbura mis-sistema tiegħu tal-ġestjoni tas-sikurezza u li jaġixxi skonthom.

(37)

Fid-dawl tal-informazzjoni mogħtija u t-tħassib muri dwar il-kapaċità ta' PT. Citilink Indonesia biex jikkontrolla r-riskji assoċjati mat-tkabbir tat-trasportaturi, kif ukoll it-tħassib dwar il-kapaċità tat-trasportatur biex jimmaniġġja s-sikurezza, skont il-kriterji komuni, il-Kumitati għas-Sikurezza tal-Ajru ma kellux evidenza biżżejjed li PT. Citilink Indonesia jikkonforma bis-sħiħ mal-istandards internazzjonali tas-sikurezza u għalhekk ikkonkluda li għalissa t-trasportatur ma jistax jitneħħa mill-Anness A.

(38)

Il-Kummissjoni u l-Kumitat għas-Sikurezza tal-Ajru jirrikonoxxu l-isforzi tad-DGCA biex ikollhom sistema tal-avjazzjoni konformi għalkollox mal-istandards tal-ICAO. Ġie nnotat li d-DGCA kellhom it-trasparenza meħtieġa u r-rieda li jaqsmu l-informazzjoni.

(39)

Il-Kummissjoni u l-Kumitat għas-Sikurezza tal-Ajru jħeġġu lid-DGCA biex jagħtu attenzjoni speċifika lill-isfidi pendenti li jeżistu fl-iżvilupp ulterjuri ta' sistemi tal-ġestjoni tas-sikurezza u fi strateġija xierqa li ttaffi r-riskji ta' espansjoni mgħaġġla fis-settur tal-avjazzjoni fl-Indoneżja.

(40)

Fil-laqgħa tal-Kumitat għas-Sikurezza tal-Ajru ta' Novembru 2013, ġie miftiehem li għal-laqgħa li jmiss tal-Kumitat il-Kummissjoni għandha tħejji reviżjoni ta' limitazzjonijiet attwali tal-operat ta' Air Astana.

(41)

Il-Kummissjoni bl-għajnuna tal-EASA u l-Istati Membri, fl-20 ta' Jannar 2014 iltaqgħet ma' uffiċjali tal-gvern tal-Kazakistan u ma' rappreżentanti tat-trasportatur tal-ajru Air Astana.

(42)

F'din il-laqgħa, il-Kummissjoni tal-Avjazzjoni Ċivili (is-CAC), jiġifieri l-awtorità tal-avjazzjoni tal-Kazakistan assenjat spettur tas-sikurezza speċifikament għat-trasportatur tal-ajru Air Astana. Ismu u s-CV tiegħu ġew notifikati lill-Kummissjoni. Dan l-ispettur irid jieħu ħsieb is-sorveljanza tal-operatur min-naħa tal-awtorità u jżomm kuntatt sikwit mad-diretturi tal-operatur u mal-persunal tekniku u operattiv tiegħu ħalli jivvaluta t-tħaddim tal-organizzazzjoni tiegħu u l-prestazzjoni tal-persunal tiegħu meta jkunu qed jagħmlu operazzjonijiet, manutenzjoni u taħriġ. Għal kull nuqqas li jsib l-ispettur għandu minnufih jiġbed l-attenzjoni tal-operatur. Mill-inqas darbtejn fis-sena, l-ispettur għandu jibgħat rapporti lill-Kummissjoni (direttament jew minn punt fokali) bl-osservazzjonijiet tiegħu, xahrejn qabel kull laqgħa tal-Kumitat għas-Sikurezza tal-Ajru jew, aktar minn hekk, meta titolbu l-Kummissjoni. F'din il-laqgħa, inħatar ukoll punt fokali fi ħdan is-CAC biex iħeffef il-komunikazzjoni dwar kwistjonijiet ta' sikurezza bejn din l-awtorità u l-Kummissjoni. Barra minn hekk, fl-istess laqgħa, id-diretturi ta' Air Astana ftiehmu li se jibqgħu jgħarrfu lill-Kummissjoni, skont il-prattika attwali, b'kull żvilupp relatat mas-sikurezza fil-kumpanija, inkluż (iżda mhux biss) it-tiġdid fil-flotta u r-rotot ġodda lejn l-UE.

(43)

Fis-7 ta' Frar 2014, il-Kummissjoni u tal-EASA ltaqgħu għat-tieni darba ma' rappreżentanti tas-CAC (b'mod partikolari mal-ispettur tas-sikurezza u l-punt fokali) u mar-rappreżentanti ta' Air Astana biex ikomplu jiddiskutu kwistjonijiet tekniċi abbażi tat-tweġibiet preliminari li waslu mingħand il-Kazakistan fil-kwestjonarji tal-Kummissjoni. F'din l-okkażjoni, ġie miftiehem li s-CAC tressaq il-pjan ta' spezzjoni tagħha għall-2014, il-proċeduri tal-ispettur intern u status aġġornat taċ-ċertifikati tal-operatur tal-ajru maħruġa fil-pajjiż. Is-CAC intrabtet ukoll li tallinja l-ispeċifikazzjonijiet tal-operazzjonijiet ta' Air Astana mal-istandards tal-ICAO, b'mod partikolari valuri minimi tal-viżibbiltà baxxa. Air Astana ntalbet tagħti analiżi komprensiva tal-prestazzjoni tas-SAFA tal-operatur. Kull dokumentazzjoni mitluba ngħatat lill-Kummissjoni fi ftit żmien wara l-laqgħa.

(44)

Fil-25 ta' Marzu 2014 il-Kumitat għas-Sikurezza tal-Ajru sema' lis-CAC and lil Air Astana. Matul is-seduta, is-CAC tat dettalji fuq il-progress fil-qasam tal-leġiżlazzjoni tal-avjazzjoni, l-infrastruttura, l-organizzazzjoni tas-CAC u t-taħriġ tal-ispetturi tas-sikurezza. Air Astana aġġorna lill-Kumitat għas-Sikurezza tal-Ajru dwar l-istruttura korporattiva tiegħu, il-kompożizzjoni tal-flotta, il-pjanijiet ta' żmien qasir għall-iżvilupp tas-suq u s-sistema tal-ġestjoni tas-sikurezza.

(45)

Il-Kumitat għas-Sikurezza tal-Ajru nnota li l-prestazzjoni attwali tas-sikurezza ta' Air Astana mhix ta' tħassib fejn jidħlu t-tipi ta' inġenji tal-ajru li jitħallew joperaw lejn l-Unjoni. It-trasportatur tal-ajru kapaċi jadatta għall-bidliet u teżisti sistema li tippermetti titjiriet bla periklu. Madankollu, il-Kumitat għas-Sikurezza tal-Ajru ħa nota li l-awtoritajiet tal-avjazzjoni tal-Kazakistan għad għandhom sfidi serji fl-implimentazzjoni tas-sistema tal-Istat ta' sorveljanza tas-sikurezza, inkluż fejn jidħol in-nuqqas ta' spetturi kwalifikati, u bħalissa ma jistgħux jiżguraw sorveljanza kontinwa fil-qasam tal-operazzjonijiet tat-titjir u fl-ajrunavigabbiltà. L-awtoritajiet tal-Kazakistan huma mħeġġa bil-qawwa biex jibqgħu jirriformaw is-settur tal-avjazzjoni tagħhom, u biex isiru konformi mal-istandards internazzjonali tas-sikurezza.

(46)

Għalhekk, skont il-kriterji komuni, hu vvalutat li jista' jitneħħa l-limitu tal-livell ta' operazzjonijiet impost fuq Air Astana fl-2009, filwaqt li r-restrizzjonijiet l-oħra ma jinbidlux bħalma jipprevedi l-Anness B. Skont il-kriterji komuni, hu vvalutat li kull trasportatur tal-ajru ċċertifikat il-Kazakstan għandu jibqa' fl-Anness A.

(47)

Il-Kummissjoni u l-EASA għandhom jibqgħu jsegwu mill-qrib is-sitwazzjoni tas-sikurezza ta' kull trasportatur tal-ajru ċċertifikat fil-Kazakistan, inkluż Air Astana. L-awtoritajiet kompetenti tal-Istati Membri għandhom jivverifikaw il-konformità effettiva mal-istandards rilevanti tas-sikurezza bil-prijoritizzazzjoni tal-ispezzjonijiet fir-rampa li jridu jsiru lill-inġenji tal-ajru ta' Air Astana skont ir-Regolament (UE) Nru 965/2012.

(48)

Baqgħu jsiru konsultazzjonijiet mal-awtoritajiet kompetenti tal-Libanu (l-LCAA) bil-għan li jkun konfermat li l-Libanu qed jindirizza n-nuqqasijiet li stabilixxiet l-ICAO waqt il-ICVM li saret il-Libanu mill-5 sal-11 ta' Diċembru 2012. Il-LCAA għamlu Pjan ta' Azzjoni Korrettiva u għaddejjin iwettqu dawn l-azzjonijiet, l-aktar fejn jidħol is-SSC.

(49)

F'Novembru 2013 il-Kummissjoni u l-EASA rċevew l-ewwel sett ta' dokumentazzjoni mingħand l-LCAA li kien fiha l-korrispondenza bejn l-LCAA u l-ICAO relatata mas-SSC in kwistjoni, il-lista tal-verifiki u tal-ispezzjonijiet li saru fl-2013 fil-kuntest tas-SSC, il-pjan ta' verifika tas-sorveljanza tal-LCAA għat-trasportaturi tal-ajru għall-2014, u l-pjan direzzjonali tal-LCAA relatat mal-Programm għas-Sikurezza tal-Istat tal-Libanu (l-SSP). Il-Kummissjoni u l-EASA analizzaw id-dokumentazzjoni li waslet u talbu aktar tagħrif mingħand l-LCAA biex ikun jistgħu janalizzaw aktar il-korrispondenza bejn l-LCAA u l-ICAO dwar l-SSC, il-kapaċità tas-sorveljanza tal-LCAA u aktar dettalji dwar il-pjan direzzjonali tal-LCAA relatat mal-SSP.

(50)

Dwar il-korrispondenza bejn l-LCAA u l-ICAO fuq ir-riżoluzzjoni tal-SSC, il-Kummissjoni u l-EASA nnotaw li l-ICAO wasslet biex l-LCAA jieħdu azzjoni pronta dwar l-SSC, u li l-validazzjoni li min-naħa tal-ICAO tal-PAK li pproponew l-LCAA kienet qed tiddewwem.

(51)

Dwar id-dokumentazzjoni addizzjonali mitluba biex tiġi vvalutata l-kapaċità tas-sorveljanza tal-LCAA, id-dokumentazzjoni waslet u ġiet analizzata fejn jidħlu t-trasportaturi tal-ajru TMA, Open Sky, Wings of Lebanon, Executive Aircraft Services, MED Airways, Corporate Jet u IBEX Air Charter. Is-sejbiet li ħarġu bihom l-LCAA rigward dawn it-trasportaturi tal-ajru għandhom x'jaqsmu l-aktar ma' problemi bid-dokumentazzjoni u ż-żamma tar-rekords. Madankollu, jidher li xi oqsma tekniċi speċifiċi oħra, bħat-taħriġ tal-bdoti, ma ġewx evalwati għalkollox mill-LCAA.

(52)

Dwar il-pjan direzzjonali tal-LCAA għall-SSP, l-LCAA ppreżentaw pjan, fi ħdan il-qafas tal-proġett tal-MASC (iċ-Ċellula Mediterranja tas-Sikurezza tal-Avjazzjoni) ħalli fis-sitt xhur li ġejjin jadottaw pjan direzzjonali regolatorju li jkun fih l-introduzzjoni ta' SSP. Il-Kummissjoni u l-EASA intrabtu li jieħdu ħsieb li jsegwu mill-qrib l-adozzjoni u l-implimentazzjoni tal-pjan direzzjonali u li jgħarrfu lill-Kumitat għas-Sikurezza tal-Ajru kif jixraq.

(53)

Saru iktar konsultazzjonijiet bejn il-Kummissjoni, l-Istati Membri, l-EASA u l-LCAA, inkluż waqt laqgħa teknika li saret Brussell fis-27 ta' Frar 2014, li matulha l-LCAA taw tagħrif addizzjonali. Il-LCAA wrew li tejbu s-sorveljanza tat-trasportaturi tal-ajru tagħhom u qed jaħdmu pass pass għal organizzazzjoni aktar indipendenti u sostenibbli. S'issa ttieħdu l-ewwel passi fl-implimentazzjoni tal-SSP. Deher li l-LCAA qed jużaw sew l-assistenza teknika li tawhom l-Unjoni u l-Istati Membri u qed jgħarrxu għal modi biex jivverifikaw l-azzjonijiet korrettivi li ttieħdu s'issa.

(54)

Abbażi tas-sitwazzjoni deskritta fil-premessi 48 sa 53, se jibqgħu jsiru konsultazzjonijiet mal-awtoritajiet Libaniżi skont l-Artikolu 3(2) tar-Regolament (KE) Nru 473/2006.

(55)

Għaldaqstant, hu vvalutat li f'dan l-istadju m'hemmx raġunijiet biex tinbidel il-lista Komunitarja tat-trasportaturi tal-ajru li huma soġġetti għal projbizzjoni tal-operat fl-Unjoni fir-rigward tat-trasportaturi tal-ajru mil-Libanu. Jekk xi informazzjoni rilevanti tas-sikurezza turi li jeżistu riskji imminenti tas-sikurezza minħabba nuqqas ta' konformità ma' standards internazzjonali tas-sikurezza, il-Kummissjoni jkollha tieħu azzjoni ulterjuri f'konformità mar-Regolament (KE) Nru 2111/2005.

(56)

Il-konsultazzjonijiet mal-awtoritajiet kompetenti tal-Libja (l-LYCAA) se jissoktaw bil-għan li jikkonfermaw li l-Libja għaddejja b'ħidma biex tirriforma s-sistema tas-sikurezza tal-avjazzjoni ċivili tagħha, u b'mod partikolari biex tiżgura li s-sorveljanza tas-sikurezza tat-trasportaturi tal-ajru kollha ċċertifikati fil-Libja tkun konformi mal-istandards internazzjonali tas-sikurezza.

(57)

Grupp ta' konsulenti żaru l-Libja bejn it-2 u s-7 ta' Frar 2014 fil-qafas tal-programm Euromed, bil-għan li lill-Kummissjoni jwasslulha l-osservazzjonijiet tagħhom dwar il-qagħda fattwali fil-LYCAA kif ukoll fit-trasportaturi tal-ajru Afriqiyah Airways u Libyan Airlines. L-osservazzjonijiet ewlenin kienu li l-LYCAA jidhru mgħammra sew b'persunal u uffiċini xierqa, il-proċessi tal-ħidma mhumiex effiċjenti; il-leġiżlazzjoni primarja u sekondarja tas-sigurezza tal-avjazzjoni kienu dgħajfin wisq u r-regolamenti dwar is-sikurezza ma nħarġux; il-ġestjoni tas-sikurezza ma ġietx implimentata fil-livell ta' awtorità kompetenti; il-LYCAA jidhru dipendenti mill-appoġġ ta' konsulenti esterni biex jtejbu l-kapaċità tagħhom biex iwasslu riżultati aċċettabbli fi żmien qarib u mingħajr evidenza ta' sostenibbiltà għax l-effetti fuq it-tiswir tal-kapaċità huma limitati; ma kienx ċar jekk kull trasportatur tal-ajru kienx qed ikun soġġett għal ċertifikazzjoni u sorveljanza; Libyan Airlines kien reġa' ġie ċċertifikat f'Diċembru 2013; u fl-aħħar nett, il-konsulenti dehrilhom li kien hemm evidenza biżżejjed ta' ġesjoni xierqa tas-sikurezza mal-organizzazzjoni.

(58)

Fl-4 ta' Marzu 2014 saret laqgħa bejn il-Kummissjoni, l-EASA, l-Istati Membri, rappreżentant tal-LYCAA u grupp mit-trasportatur tal-ajru Afriqiyah Airways. F'din il-laqgħa, Afriqiyah Airways ippreżenta aktar progress fejn jidħlu r-rakkomandazzjonijiet tas-sikurezza li joħorġu mir-rapport tal-inċident li sar wara d-diżgrazzja tat-12 ta' Mejju 2010. Ittieħdu bosta inizjattivi iżda xi wħud għadhom fi stadji bikrin ħafna. It-trasportatur tal-ajru spjega li għamel kuntratt ma' kumpanija Irlandiża detentur ta' AOC biex tnejn mill-inġenji tal-ajru tat-tip Airbus A320 imorru f'reġistru Irlandiż bi ftehim ta' kiri mingħajr ekwipaġġ u mbagħad jerġa' jikri mingħandha bl-ekwipaġġ filwaqt li juża parzjalment ekwipaġġ ta' Afriqiyah Airways li jkun isegwi l-validazzjoni xierqa tal-liċenzja għal titjiriet skont il-liġi tal-Unjoni.

(59)

Fit-13 ta' Marzu 2014 saret laqgħa bejn il-Kummissjoni, l-EASA, l-Istati Membri, rappreżentanti mill-LYCAA u Libyan Airlines. F'din il-laqgħa, il-LYCAA ippreżentaw aġġornament dwar il-kapaċitajiet tas-sorveljanza tagħhom, l-attivitajiet tas-sorveljanza tagħhom u l-attivitajiet tagħhom dwar iċ-ċertifikazzjoni mill-ġdid tat-trasportaturi tal-ajru. Barra minn hekk, il-LYCAA ippreżentaw il-progress li għamlu rigward il-ġestjoni tas-sikurezza. Abbażi ta' dan, fi tmiem il-laqgħa il-LYCAA reġgħu argumentaw favur it-tneħħija tar-restrizzjonijiet għax skonthom issa qed tintlaħaq kull kundizzjoni miftiehma. Libyan Airlines ma għamilx preżentazzjoni, iżda sarulu mistoqsijiet dwar il-ġestjoni tas-sikurezza. Fil-fehma tal-Kummissjoni, mir-rispons mogħti joħroġ li dan il-qasam jeħtieġlu aktar żvilupp.

(60)

F'ittra lill-Kummissjoni datata l-20 ta' Marzu 2014, il-LYCAA reġgħu kitbu fil-qosor l-azzjonijiet tagħhom biex isawru awtorità skont l-istandards internazzjonali tas-sikurezza, kif ukoll l-azzjonijiet tagħhom biex ikunu jistgħu jispiċċaw ir-restrizzjonijiet li bħalissa jimponu fuq it-trasportaturi tal-ajru Libjani bi ftehim mal-Kummissjoni u l-Kumitat għas-Sikurezza tal-Ajru.

(61)

Madankollu, fl-istess ittra datata l-20 ta' Marzu 2014, il-LYCAA jikkonfermaw li mhux se jaġixxu waħedhom fir-rigward tar-restrizzjonijiet operattivi attwali u li “kull azzjoni li tittieħed se ssir b'koordinazzjoni mal-Kumitat għas-Sikurezza tal-Ajru”.

(62)

Il-Kummissjoni u l-Kumitat għas-Sikurezza tal-Ajru tħeġġu bil-progress li kisbu l-LYCAA u ddikjaraw li l-iżvilupp li jmiss għandu jinbena fuq dak li kisbet it-tmexxija attwali.

(63)

Il-Kummissjoni u l-Kumitat għas-Sikurezza tal-Ajru osservaw li bħalma talbu huma stess, il-LYCAA se jibqgħu jżommu r-restrizzjonijiet attwali fuq kull trasportatur tal-ajru Libjan li jtir fl-Unjoni.

(64)

Għaldaqstant, hu vvalutat li f'dan l-istadju m'hemmx raġunijiet biex tinbidel il-lista Komunitarja tat-trasportaturi tal-ajru li huma soġġetti għal projbizzjoni tal-operat fl-Unjoni fir-rigward tat-trasportaturi tal-ajru mil-Libja. Madankollu, il-Kummissjoni u l-Kumitat għas-Sikurezza tal-Ajru ddikjaraw li qabel ma l-LYCAA jikkunsidraw li joħorġu awtorizzazzjoni lit-trasportaturi tal-ajru tagħhom biex itiru lejn l-Unjoni, għandu jintwera għas-sodisfazzjon tal-Kummissjoni u tal-Kumitat għas-Sikurezza tal-Ajru li l-proċess ta' riċertifikazzjoni effettivament tlesta u li ssir sorveljanza kontinwa sostenibbli skont l-istandards tal-ICAO. Sabiex jara dan, u bil-kundizzjoni li jingħataw arranġamenti xierqa ta' sikurezza, il-Kumitat għas-Sikurezza tal-Ajru talab lill-Kummissjoni biex malajr kemm jista' jkun, tniedi żjara ta' valutazzjoni fuq il-post il-Libja bi grupp ta' esperti mill-EASA u mill-Istati Membri tal-UE, l-aħjar, qabel il-laqgħa li jmiss tal-Kumitat.

(65)

Jekk xi informazzjoni rilevanti tas-sikurezza turi li jeżistu riskji imminenti tas-sikurezza minħabba nuqqas ta' konformità ma' standards internazzjonali tas-sikurezza, il-Kummissjoni jkollha tieħu azzjoni ulterjuri f'konformità mar-Regolament (KE) Nru 2111/2005.

(66)

It-trasportatur tal-ajru Air Madagascar hu suġġett għal restrizzjonijiet operattivi u tniżżel fl-Anness B skont ir-Regolament ta' Implimentazzjoni tal-Kummissjoni (UE) Nru 390/2011 (7). Saru konsultazzjonijiet mal-awtoritajiet kompetenti tal-Madagaskar (l-“ACM”) u ma' Air Madagascar bil-ħsieb li jiksbu aġġornamenti dwar l-implimentazzjoni tal-azzjonijiet korrettivi.

(67)

B'reazzjoni għat-talbiet ripetuti tal-ACM u t-trasportatur tal-ajru Air Madagascar biex terġa' tivvaluta r-restrizzjonijiet operattivi imposti bir-Regolament ta' Implimentazzjoni (UE) Nru 390/2011, il-Kummissjoni bl-assistenza tal-EASA u esperti mill-Istati Membri, għamlet żjara ta' valutazzjoni tas-sikurezza fil-Madagaskar mill-10 u sat-13 ta' Frar 2014. Din iż-żjara kellha l-għan li tivverifika l-implimentazzjoni sodisfaċenti tal-miżuri li ħadu l-ACM u Air Madagascar biex jindirizzaw it-tħassib tas-sikurezza deskritt fir-Regolament imsemmi hawn fuq.

(68)

Matul iż-żjara, l-ACM ma setgħux jipprovdu evidenza lit-tim ta' valutazzjoni li tkun turi l-effettività tal-pjan ta' azzjonijiet korrettivi u preventivi, kif żviluppat u implimentat, biex ikun indirizzat in-nuqqas ta' sorveljanza xierqa tas-sikurezza tal-operazzjonijiet ta' Air Madagascar. It-tim innota li fil-programm ta' sorveljanza tal-attivitajiet ta' Air Madagascar adottat għall-2013, kienu saru biss 60 % tal-ispezzjonijiet skedati f'oqsma magħquda tal-operazzjonijiet u l-liċenzji, u inqas minn 25 % fil-qasam tal-ajrunavigabbiltà. L-analiżi tal-ispezzjonijiet li għamlu l-ACM turi wkoll li s-sejbiet kienu ngħalqu abbażi tal-pjanijiet ta' azzjoni korrettiva u mhux abbażi ta' verifika tal-azzjoni implimentata.

(69)

Skont l-ACM, in-nuqqas ta' riżorsi kwalifikati xierqa hu l-akbar tal-kawża ewlenija li ma saritx implimentazzjoni sew ta' programm tas-sorveljanza xierqa. Dan il-punt kien diġà ġie diskuss fil-laqgħa tal-Kumitat għas-Sikurezza tal-Ajru f'Novembru 2012. Dak iż-żmien, kif jiddeskrivi r-Regolament ta' Implimentazzjoni tal-Kummissjoni (UE) Nru 1146/2012 (8), l-ACM għarrfu lill-Kumitat għas-Sikurezza tal-Ajru li kienu għamlu kuntratt ta' sentejn biex jiksbu assistenza teknika esterna biex isostnu l-obbligi tagħhom ta' sorveljanza tas-sikurezza. Waqt iż-żjara t-tim innota li dan il-kuntratt kien sospiż 6 xhur wara li kien daħal fis-seħħ.

(70)

Meta t-tim żar lit-trasportatur tal-ajru, dan ivvaluta l-implimentazzjoni tal-pjan ta' azzjonijiet korrettivi u preventivi li żviluppa Air Madagascar b'reazzjoni għar-restrizzjonijiet operattivi li jimponi r-Regolament ta' Implimentazzjoni (KE) Nru 390/2011. It-tim ingħata evidenza li t-trasportatur tal-ajru għamel titjib fis-sistemi tal-ġestjoni tal-ajrunavigabbiltà tal-inġenji tal-ajru, fid-dokumentazzjoni u fil-kontroll tal-kwalità. It-trasportatur tal-ajru kien identifika dawk is-sistemi tal-ġestjoni bħala l-akbar nuqqas bħalma ssemmi l-analiżi tal-kawżi ewlenin tar-riżultati tal-programm tas-SAFA.

(71)

Il-valutazzjoni li għamel it-tim ma żvelat l-ebda sejba maġġuri fl-oqsma tal-operazzjonijiet u l-liċenzjar, filwaqt li kien hemm xi tħassib fil-qasam tal-ajrunavigabbiltà, u għalhekk għad jonqos li jitjiebu l-proċessi implimentati mit-trasportatur tal-ajru. Barra minn hekk, l-għadd u n-natura tar-rakkomandazzjonijiet li t-tim kellu jagħti lil Air Madagascar joħorġu fid-dieher id-dipendenza tat-trasportatur tal-ajru fuq ir-riżultati tal-attivitajiet ta' sorveljanza li jagħmlu partijiet terzi biex ikomplu jitjiebu s-sistemi tas-sikurezza tiegħu.

(72)

Sabiex jiġu indirizzati s-sejbiet li tqajmu waqt iż-żjara ta' valutazzjoni tas-sikurezza tal-UE, l-ACM u Air Madagascar ħolqu żewġ pjanijiet ta' azzjonijiet preventivi u korrettivi differenti.

(73)

Wara talba li għamlu l-ACM u Air Madagascar biex terġa' ssir valutazzjoni tar-restrizzjonijiet operattivi li jimponi r-Regolament ta' Implimentazzjoni (UE) Nru 390/2011, fis-26 ta' Marzu 2014 il-Kumitat għas-Sikurezza tal-Ajru ltaqa' mal-ACM u Air Madagascar. F'din il-laqgħa, l-ACM u Air Madagascar taw dettalji dwar il-pjan ta' azzjoni korrettiva stabbilit biex jindirizza l-osservazzjonijiet li saru waqt iż-żjara fuq il-post. L-ACM iddikjaraw ukoll li l-operazzjonijiet tat-titjir ta' kull trasportatur tal-ajru ċċertifikat il-Madagaskar — ħlief Air Madagascar — huma ristretti għal titjiriet domestiċi. Barra minn hekk, l-unika deroga għal din ir-regola hi għal titjiriet ta' evakwazzjoni medika. Il-Kummissjoni u l-Kumitat għas-Sikurezza tal-Ajru enfasizzaw li l-Kummissjoni għandha tkun infurmata dwar kull bidla f'din il-politika.

(74)

Filwaqt li l-Kumitat għas-Sikurezza tal-Ajru rrikonoxxa t-titjib li kisbu l-ACM u Air Madagascar fl-implimentazzjoni tal-istandards internazzjonali tas-sikurezza, dan kellu jikkonkludi li abbażi tar-rapport taż-żjara ta' valutazzjoni tas-sikurezza tal-UE u l-informazzjoni li taw l-ACM u Air Madagascar waqt is-seduta quddiem il-Kumitat għas-Sikurezza tal-Ajru, għad hemm bżonn aktar titjib xi jsir, l-aktar min-naħa tal-ACM rigward l-attivitajiet ta' sorveljanza tagħhom. Għalhekk, skont il-kriterji komuni mniżżlin fl-Anness tar-Regolament (KE) Nru 2111/2005, hu vvalutat li Air Madagascar għandu jibqa' fl-Anness B.

(75)

L-Istati Membri se jivverifikaw il-konformità effettiva mal-istandards rilevanti tas-sikurezza bil-prijoritizzazzjoni tal-ispezzjonijiet fir-rampa li jridu jsiru lill-inġenji tal-ajru tat-trasportatur tal-ajru Air Astana skont ir-Regolament (UE) Nru 965/2012.

(76)

Skont ir-Regolament (KE) Nru 965/2012, l-Istati Membri vverifikaw il-konformità effettiva mal-istandards rilevanti tas-sikurezza bil-prijoritizzazzjoni tal-ispezzjonijiet fir-rampa li jridu jsiru lill-inġenji tal-ajru tat-trasportaturi tal-ajru liċenzjati fil-Mawritanja. L-aktar analiżi riċenti tas-SAFA tal-EASA turi li saru ħames spezzjonijiet lill-inġenji tal-ajru tal-operatur tal-ajru Mauritania Airlines International (il-MAI). Għalkemm l-analiżi tan-nuqqasijiet identifikati waqt dawn l-ispezzjonijiet tas-SAFA turi xi titjib, l-EASA rrakkomandat lill-istati parteċipanti biex ma jehdewx jagħmlu spezzjonijiet lil dan l-operatur. L-aktar spezzjonijiet riċenti jenfasizzaw xejra irregolari ma' għadd ta' sejbiet, inkluż fil-kategorija 3 (il-livell tas-SAFA ta' sejbiet li jaf jinfluwenzaw sew lis-sikurezza).

(77)

Il-Kummissjoni u l-EASA talbu aktar tagħrif, b'mod partikolari rapporti regolari tas-sikurezza mingħand l-awtoritajiet nazzjonali tal-Mawritanja (l-ANAC) u mingħand il-MAI fir-rigward tas-segwitu tas-sikurezza. Finalment il-MAI bagħat tagħrif preliminari dwar l-implimentazzjoni u t-tħaddim tas-sistema tal-ġestjoni tas-sikurezza tiegħu.

(78)

Il-Kumitat għas-Sikurezza tal-Ajru nnotaw li l-ANAC u l-MAI għandhom jibqgħu jtejbu l-qagħda l-aktar fejn tidħol it-trażmissjoni ta' tagħrif dwar is-sikurezza lill-Kummissjoni. Il-Kummissjoni indikat li se ttenni lill-Mawritanja l-importanza tal-impenji li ħadet fejn jidħlu l-pjan ta' azzjoni korrettiva tagħha, il-ħtieġa li tanalizza l-kawżi ewlenin, u l-ħtieġa li tgħaddi r-rapporti regolari li l-ANAC u l-MAI iridu jipprovdu.

(79)

Skont il-kriterji komuni, hu vvalutat li f'dan l-istadju m'hemmx raġunijiet biex tinbidel il-lista Komunitarja tat-trasportaturi tal-ajru li huma soġġetti għal projbizzjoni tal-operat fl-Unjoni fir-rigward tat-trasportaturi tal-ajru mir-Repubblika Islamika tal-Mawritanja. Jekk ir-riżultati tal-ispezzjonijiet fir-rampa jew xi informazzjoni rilevanti dwar is-sikurezza juru li l-istandards internazzjonali tas-sikurezza laħqu livell mhux aċċettabbli, il-Kummissjoni jkollha tieħu azzjoni skont ir-Regolament (KE) Nru 2111/2005.

(80)

L-awtoritajiet kompetenti tal-Możambik (l-IACM) irrapportaw fuq l-implimentazzjoni attwali tal-Pjan ta' Azzjoni Korrettiva li ressqu lill-ICAO u li din approvat. L-aħħar rapport ta' progress, li wasal għand il-Kummissjoni u l-EASA fis-26 ta' Frar 2014 waqt telekonferenza, u ssostanzjat bis-sottomissjoni ta' għadd ta' dokumenti ta' appoġġ fit-13 ta' Marzu 2014, juri li l-IACM baqgħu jaħdmu biex jaġġornaw il-qafas legali li jsaħħaħ ir-rekwiżiti għar-rappurtar obbligatorju jew volontarju tal-okkorrenzi, l-investigazzjoni tal-aċċidenti u l-inċidenti, l-interċettazzjoni tal-inġenji tal-ajru, l-istabbiliment ta' programm tas-sikurezza tal-istat. Bħalissa qed issir separazzjoni bejn ir-regolatur u l-provdituri tas-servizzi, u għalhekk qed jiġu trasferiti l-attivitajiet tal-informazzjoni ajrunawtika mingħand l-IACM għal għand Aeroportos de Moçambique jiġifieri l-Provditur tas-Servizzi tal-Ajrunavigazzjoni (l-“ANSP”) eżistenti. Jissoktaw ir-reklutaġġ u t-taħriġ tal-persunal bil-għan li tibqa' tissaħħaħ il-kapaċità tas-sorveljanza, l-aktar fl-oqsma tal-operazzjonijiet u tal-liċenzjar, in-navigazzjoni u l-ajrudromi, l-ajrunavigabbiltà, it-tfassil tar-regoli u l-infurzar, il-ftehimiet tat-trasport bl-ajru, il-ġestjoni tat-traffiku tal-ajru u l-komunikazzjoni, in-navigazzjoni u s-sorveljanza. Bħalissa qed issir il-validazzjoni mill-ġdid tal-liċenzji tal-persunal tas-Servizzi tat-Traffiku tal-Ajru kollha u se titlesta sa Ġunju 2014. Fl-2014 se jibda l-proċess taċ-ċertifikazzjoni tal-ajrudromi għall-ajruport ta' Maputo u warajh isegwi dak ta' tliet ajruporti oħra li jservu t-traffiku internazzjonali. Iċ-ċertifikazzjoni tal-ANSP se tibda f'Settembru 2014 u se tistrieħ fuq regolamenti aġġornati li għandhom jidħlu fis-seħħ fl-aħħar ta' Marzu 2014.

(81)

L-IACM baqgħu jindirizzaw is-sejbiet tal-USOAP miftuħa mil-lat ta' mistoqsijiet tal-protokolli assoċjati, u nħolqu u ttellgħu l-aktar regolamenti u proċeduri meħtieġa biex jappoġġjaw it-tweġibiet, permezz tal-għodda onlajn tas-CMA li għandha l-ICAO. Il-validazzjoni ta' dawn l-azzjonijiet mill-ICAO għadha pendenti.

(82)

Il-baġit tal-IACM għall-2014 żdied bi kważi 20 %, biex jirrifletti l-appoġġ politiku kontinwu u l-impenn li jissaħħu l-kapaċità u l-effikaċja tagħhom.

(83)

L-operatur tal-ajru Linhas Aéreas de Moçambique (il-LAM) għadda minn diżgrazzja fid-29 ta' Novembru 2013. Wieħed mill-Embraer ERJ-190 tal-operatur li kien qed itir minn Maputo lejn Luwanda, iġġarraf fin-Namibja u miet kull min kien abbord (28 passiġġier — inklużi 6 ċittadini tal-UE — u 6 membri tal-ekwipaġġ). Il-Kummissjoni tal-Investigazzjoni tal-Inċidenti fin-Namibja ħarġet rapport preliminari dwar l-investigazzjoni tal-inċident fid-9 ta' Jannar 2014 u l-konklużjonijiet preliminari jippuntaw lejn azzjoni intenzjonali min-naħa tal-kaptan. L-aħħar rapport tal-inċident hu mistenni sal-aħħar tal-2014.

(84)

L-IACM irrapportaw ukoll li t-trasportatur tal-ajru LAM baqa' għaddej bl-implimentazzjoni tal-fażijiet avvanzati, l-aktar il-Fażi III, tas-Sistema tal-Ġestjoni tas-Sikurezza tagħhom (l-“SMS”). Bħala reazzjoni għall-inċident, LAM saħħaħ il-proċeduri operattivi ħalli jiżgura li jkun hemm żewġ membri tal-ekwipaġġ fil-kabina tal-ekwipaġġ f'kull waqt u f'kull fażi tat-titjira.

(85)

L-IACM talbu ICVM ħalli tivvalida l-progress fl-implimentazzjoni tal-Pjan ta' Azzjoni Korrettiva u l-ICAO qed tippjana li tagħmilha fil-ħarifa tal-2014.

(86)

L-IACM irrapportaw ukoll li ssoktaw bil-proċess taċ-ċertifikazzjoni mill-ġdid tat-trasportaturi tal-ajru skont is-SARPs tal-ICAO u, s'issa ġew iċċertifikati mill-ġdid 13-il trasportatur tal-ajru (LAM-Linhas Aéreas de Moçambique S.A., MEX-Moçambique Expresso SARL, ETA-Empresa de Transportes Aéreos Lda, CPY-Cropsprayers, CFM-Trabalhos e Transportes Aéreos Lda, KAY-Kaya Airlines Lda, SAM-Solenta Aviation Mozambique SA, HCP-Helicópteros Capital Lda, SAF-Safari Air Lda, CRA-CR Aviation Lda, COA-Coastal Aviation, TTA-Trabalhos e Transportes Aéreos Lda u OHI-Omni Helicópteros International Lda) skont il-lista li taw l-IACM. Billi l-IACM ma setgħux jagħtu evidenza li s-sorveljanza tas-sikurezza ta' dawn it-13-il trasportatur tal-ajru hi żgur konformi mal-istandards internazzjonali tas-sikurezza, skont il-kriterji komuni, hu vvalutat li dawn għandhom jiddaħħlu fl-Anness A.

(87)

Minħabba progress inadegwat fil-proċess taċ-ċertifikazzjoni mill-ġdid tagħhom, l-IACM issospendew l-AOCs ta' tliet trasportaturi tal-ajru (Emilio Air Charter Lda, Aero-Serviços SARL u Unique Air Charter Lda) u waqqfu l-flotot rispettivi tagħhom. Billi sospensjoni mhix definittiva, u billi l-IACM ma setgħux jagħtu evidenza li s-sorveljanza tas-sikurezza ta' dawn it-tliet trasportaturi tal-ajru hi żgur konformi mal-istandards internazzjonali tas-sikurezza, skont il-kriterji komuni, hu vvalutat li dawn għandhom jiddaħħlu fl-Anness A.

(88)

Il-Kummissjoni u l-Kumitat għas-Sikurezza tal-Ajru laqgħu il-progress sinifikanti li rrapportaw l-IACM fir-ratifika tan-nuqqasijiet li identifikat l-ICAO u ħeġġew l-isforzi tagħhom ħalli jirnexxielhom iwaqqfu sistema tal-avjazzjoni li tkun konformi għalkollox mal-istandards internazzjonali. Il-Kummissjoni u l-Kumitat għas-Sikurezza tal-Ajru għarfu u laqgħu it-titjib sostnut li rrapporta l-LAM fl-isforzi kontinwi tiegħu biex jadotta u jaderixxi mal-istandards internazzjoni tas-sikurezza. Minħabba l-progress sinifikanti li diġà nkiseb u l-progress ulterjuri mistenni, fl-aħħar kwart tal-2014 jaf issir missjoni ta' valutazzjoni tas-sikurezza tal-UE.

(89)

Wara l-adozzjoni tar-Regolament ta' Implimentazzjoni tal-Kummissjoni (UE) Nru 1264/2013 (9), kull trasportatur tal-ajru ċċertifikat in-Nepal iddaħħal fl-Anness A tar-Regolament tal-Kummissjoni (KE) Nru 474/2006.

(90)

Il-Kummissjoni bl-għajnuna ta' esperti mill-EASA u l-Istati Membri, għamlet żjara n-Nepal bejn it-3 u t-8 ta' Frar 2014 biex tivvaluta aktar il-kapaċitajiet tal-awtorità kompetenti tan-Nepal (il-CAAN) u ta' għadd ta' trasportaturi tal-ajru tan-Nepal, bil-ħsieb li jinstab jekk tistax tittaffa l-projbizzjoni tal-operat. Il-valutazzjonijiet kienu jinkludu lit-trasportaturi tal-ajru Nepal Airlines Corporation, Buddha Air, Shree Airlines, Tara Air, Yeti Airlines u Sita Air.

(91)

Il-Kummissjoni ppreżentat ir-rapport lill-Kumitat għas-Sikurezza fuq din iż-żjara ta' valutazzjoni. Il-konklużjonijiet ewlenin tal-valutazzjoni tat-trasportaturi tal-ajru kienu li Buddha Air, Shree Airlines, Tara Air u Yeti Airlines setgħu juru li jifhmu tajjeb kwistjonijiet ta' ġestjoni tas-sikurezza u taw evidenza li turi konformità ma' regolamenti nazzjonali tas-sikurezza, filwaqt li Sita Air ma setgħetx turi li kapaċi twettaq operazzjoni sikura jew ma setgħetx turi ajrunavigabbiltà kontinwa sħiħa tal-inġenju tal-ajru misjuq. Barra minn hekk, l-operatur ma implimentax għalkollox ir-rakkomandazzjonijiet tas-sikurezza li ngħataw wara inċident fatali fl-2012 jiġifieri fit-taħriġ li jagħti ma kienx qed juża simulatur.

(92)

Dwar Nepal Airlines Corporation, il-Kumitat għas-Sikurezza tal-Ajru osserva li filwaqt li l-qafas bażiku ta' ġestjoni tas-sikurezza kien fis-seħħ, l-operatur kien jeħtieġlu jistabbilixxi metodi aktar effettivi tal-promozzjoni tas-sikurezza, rappurtar aħjar, analiżi aħjar u jintrabat b'miri tal-prestazzjoni tas-sikurezza biex jilħaq u jikkwantifika l-“Livell Aċċettabbli tas-Sikurezza” li wiegħed fil-politika tas-sikurezza tiegħu. Il-Kumitat għas-Sikurezza tal-Ajru nnota anki l-pjanijiet tal-espansjoni ambizzjużi ta' Nepal Airlines Corporation, li fihom tniżżel li f'sena l-flotta tagħha kienet se tiżdied bi tliet tipi ġodda ta' inġenji tal-ajru, u ddikjara li dawn il-pjanijiet jeħtieġ jitmexxew sew biex jinkludu r-riskji tas-sikurezza.

(93)

Barra minn hekk, fis-16 ta' Frar 2014 seħħ inċident fatali li kien jinvolvi inġenju tal-ajru ta' Nepal Airlines Corporation u mietu t-18-il persuna abbord, fosthom ċittadin tal-Unjoni. Fit-3 ta' Marzu 2014 il-Kummissjoni kitbet lill-CAAN u talbitha tagħrif dwar l-inċident u tagħrif dwar l-azzjonijiet li ħadu l-CAAN biex fil-futur ikunu evitati inċidenti simili. Il-CAAN wieġbet b'ittra datata t-18 ta' Marzu 2014 biex tispjega l-azzjonijiet li kienet ħadet. Madankollu, l-informazzjoni ma kinitx meqjusa xierqa biex il-Kummissjoni tkun tista' tivvaluta jekk l-azzjonijiet li ħadet il-CAAN kinux xierqa fir-rigward tal-gravità tal-aċċident.

(94)

Dwar il-CAAN, il-valutazzjoni żvelat nuqqasijiet serji l-aktar fl-oqsma tal-liċenzjar u t-taħriġ tal-persunal, iċ-ċertifikazzjoni tat-trasportaturi tal-ajru u s-sorveljanza fil-qasam tal-operazzjonijiet tal-ajru.

(95)

Fil-qasam tal-liċenzjar u t-taħriġ tal-bdoti, instab li l-awtoritajiet kompetenti ma segwewx ir-rekwiżiti tal-Anness 1 tal-ICAO l-aktar fejn jidħlu l-approvazzjoni tal-organizzazzjonijiet tat-taħriġ, l-għarfien teoriku, il-validazzjoni ta' liċenzji barranin u l-apparat tat-taħriġ tas-simulazzjoni tat-titjira. Għalhekk, ma setax ikun żgurat li l-bdoti kienu kwalifikati biżżejjed biex iwettqu dmirijiethom f'konformità mal-istandards applikabbli tal-ICAO.

(96)

Minħabba dawn in-nuqqasijiet, ma jistax ikun żgurat li t-trasportaturi tal-ajru vvalutati, li kienu jeħtieġu ċ-ċertifikazzjoni u l-liċenzjar mingħand il-CAAN, kienu konformi mal-istandards rilevanti tal-ICAO.

(97)

F'Lulju 2013 l-ICAO wettqet ICVM li wasslet għal SSC relatata mal-operat tal-inġenji tal-ajru. L-azzjonijiet stabbiliti fl-ewwel Pjan ta' Azzjoni Korrettiva li ressqu l-CAAN lill-ICAO biex isewwu n-nuqqasijiet innotati fl-SSC, ma kinux tlestew sal-iskadenza stipulata, u l-SSC baqgħet fis-seħħ. Il-Kummissjoni u l-Kumitat għas-Sikurezza tal-Ajru nnutat ukoll li skont l-ICAO xorta kien hemm nuqqas sinifikanti ta' implimentazzjoni li jolqot il-kapaċità tal-pajjiż fl-oqsma tal-leġiżlazzjoni primarja dwar l-avjazzjoni u r-regolamenti tal-avjazzjoni ċivili, l-organizzazzjoni tal-avjazzjoni ċivili u l-liċenzjar u t-taħriġ tal-persunal.

(98)

Il-Kummissjoni u l-Kumitat għas-Sikurezza tal-Ajru għarfu li l-CAAN għamlu xi progress minn mindu saret il-verifika tal-ICAO fl-2009, mindu saret l-ICVM tal-ICAO fl-2013 bl-introduzzjoni ta' emendi fl-Att tal-Avjazzjoni, u b'rekwiżiti ġodda u riveduti, manwali u proċeduri. Madankollu, ħafna minn dawn il-bidliet ma kinux sħaħ u għad baqagħlhom biex jiġu implimentati b'mod sostenibbli.

(99)

Il-Kummissjoni u l-Kumitat għas-Sikurezza tal-Ajru għarfu d-diffikultajiet li sabu l-CAAN biex jagħmlu progress sostenibbli u ħeġġew lill-Unjoni u lill-Istati Membri biex jagħtu assistenza teknika. Il-Kummissjoni tenniet l-impenn tagħha li tevalwa l-possibilitajiet biex jitwessa' l-programm ta' koperazzjoni teknika li diġà jeżisti bejn il-CAAN u l-EASA.

(100)

Fid-dawl tar-rapport tal-UE miż-żjara ta' valutazzjoni fuq il-post, billi baqa' SSC tal-ICAO li għadha ma ssolvietx u billi seħħ inċident fatali ieħor minn mindu sar l-aħħar aġġornament, il-Kummissjoni u l-Kumitat għas-Sikurezza tal-Ajru waslu għall-konklużjoni li l-awtoritajiet kompetenti tan-Nepal mhumiex kapaċi jimplimentaw u jinfurzaw biżżejjed l-istandards internazzjonali rilevanti tas-sikurezza sa ċertu livell li jippermetti li tittaffa l-projbizzjoni tal-operat għal xi trasportaturi tal-ajru.

(101)

Għaldaqstant, skont il-kriterji komuni, hu vvalutat li f'dan l-istadju m'hemmx raġunijiet biex tinbidel il-lista Komunitarja tat-trasportaturi tal-ajru li huma soġġetti għal projbizzjoni tal-operat fl-Unjoni fir-rigward tat-trasportaturi tal-ajru mil-Jemen.

(102)

Il-Kummissjoni stiednet rappreżentanti tal-Awtorità tal-Avjazzjoni Ċivili tal-Filippini (il-CAAP) u lit-trasportatur tal-ajru Cebu Pacific Air għal laqgħa teknika fit-28 ta' Jannar 2014 ħalli jiddiskutu l-azzjonijiet tas-sikurezza f'aktar dettall u fatturi rilevanti oħra dwar l-inċident ta' ħruġ mir-runway li sar fl-Ajruport Internazzjonali ta' Davao fit-2 ta' Ġunju 2013.

(103)

Il-Kummissjoni, esperti tal-EASA u tal-Istati Membri, kif ukoll rappreżentanti anzjani mis-CAAP u Cebu Pacific Air, attendew din il-laqgħa.

(104)

Is-CAAP tat dettalji lil Cebu Pacific Air dwar is-sorveljanza regolatorja. Dawn kienu jinkludu l-fatt li fl-20 ta' Ġunju 2013, il-“Bord Regolatorju u ta' Sorveljanza” tas-CAAP kiteb lill-kap eżekuttiv ta' Cebu Pacific Air u taf dettalji dwar l-azzjonijiet korrettivi tas-CAAP minħabba l-inċident. Fost l-azzjonijiet, l-eżekuttivi responsabbli u l-amministraturi tal-istazzjonijiet ta' Cebu Pacific Air kellhom iwettqu evalwazzjoni mill-ġdid li tisħaq fuq l-operazzjoni, is-sistema tal-ġestjoni tas-sikurezza u l-kultura korporattiva. Is-CAAP irrapportat ukoll li kienet se tieħu kampjun aleatorju tal-kapaċitajiet tal-ekwipaġġ ta' titjira waqt sitwazzjonijiet mhux tas-soltu fis-simulatur tat-titjira. Minn perspettiva organizzattiva, it-trasportatur tal-ajru tħeġġeġ jadatta l-politika tagħha dwar il-ħin tat-turnaround tal-inġenji tal-ajru, minn 30 minuta għal 45 minuta.

(105)

Fl-4 ta' Ottubru 2013, it-trasportatur Cebu Pacific Air wieġeb l-ittra tal-20 ta' Ġunju 2013 u ta sommarju tal-azzjonijiet li kien diġà ħa. Fost dawn l-azzjonijiet, ġiet riveduta l-istruttura organizzattiva tat-trasportatur, ingħata taħriġ SMS lill-persunal kollu, inħolqu Gruppi ta' Azzjoni tas-Sikurezza (SAG) f'kull dipartiment fejn tidħol il-ġestjoni tal-operazzjonijiet u saru valutazzjonijiet aleatorji tas-simulatur fiċ-ċentru tat-taħriġ tat-trasportatur tal-ajru bejn it-3 u d-19 ta' Lulju 2013. Dan ta dettalji speċifiċi fuq it-taħriġ il-bidliet, inkluż il-programm ta' Taħriġ ta' Titjir f'Linja (il-LOFT), u fuq il-fatt li l-ekwipaġġ se jitħarreġ aħjar fis-simulatur bejn il-LOFT u kontrolli tal-profiċjenza. Dan wieġeb ukoll ir-rakkomandazzjoni organizzattiva dwar il-ħin tat-turnaround tal-inġenji tal-ajru, u ddikjara li dan se jsir 45 minuta fl-iskeda tax-xita tal-2013.

(106)

Barra minn hekk, fit-2 ta' Awwissu 2013 is-CAAP kitbet lil kull trasportatur tal-ajru tal-Filippini dwar l-investigazzjoni tas-sikurezza li qed issir fuq l-inġenju tal-ajru Airbus 319/320, u ssemmi l-ħtieġa li jittieħed avviċinament mhux-ta'-preċiżjoni u t-taħriġ tidwira li t-trasportaturi tal-ajru għandhom itemmu. Fl-4 ta' Ottubru 2013Cebu Pacific Air wieġeb u ddikjara l-bidliet li għamel f'dan ir-rigward.

(107)

Barra minn hekk, l-Uffiċċju tal-Bord tal-Inkjesta u l-Investigazzjoni tal-Inċidenti tal-Inġenji tal-Ajru (AAIIB) tal-Filippini talab inkjesta dwar l-inċident ta' Cebu Pacific Air ta' ħruġ mir-runway li sar fl-Ajruport Internazzjonali ta' Davao fit-2 ta' Ġunju 2013. Fit-13 ta' Diċembru 2013, l-uffiċjal inkarigat mill-investigazzjoni avża lid-Direttur tas-Sikurezza ta' Cebu Pacific Air li l-investigazzjoni kienet għaddejja, filwaqt li ta biċċiet tad-dejta mill-“Abbozz tar-Rapport Finali” (DFR) u dettalji disponibbli dwar il-konklużjonijiet u r-rakkomandazzjonijiet indirizzati lis-CAAP u lil Cebu Pacific Air.

(108)

Is-CAAP wettqet programm ta' sorveljanza elevat ta' Cebu Pacific Air. Il-programm ta' spezzjonijiet annwali minimi meħtieġa (MRAI) żied l-ispezzjonijiet ta' sorveljanza minn 34 spezzjoni skedati għall-2013 għal 62 spezzjoni b'kollox.

(109)

Dwar l-inċident tat-2 ta' Ġunju 2013, Cebu Pacific Air niżżel fil-qosor l-azzjonijiet li ttieħdu. L-azzjonijiet jinkludu tweġibiet lis-CAAP matul l-investigazzjoni u dettalji dwar il-kontroll u s-superviżjoni tal-operazzjoni. Fost azzjonijiet oħra msemmija hemm dettalji dwar analiżi tad-dejta tat-titjiriet (FDA) u l-programm ta' mitigazzjoni ta' ħruġ mir-runway tat-trasportatur tal-ajru. Il-programm inqasam f'azzjonijiet immedjati, azzjonijiet fi żmien medju u azzjonijiet fit-tul, filwaqt li komponent ewlieni hu d-dettalji li taw dwar programm ta' appoġġ tal-Airbus. Dwar dan il-programm ta' appoġġ, saret żjara operattiva estiża, u saru FDA u osservazzjonijiet tas-simulatur u t-titjir.

(110)

Cebu Pacific Air u s-CAAP taw ukoll dettalji dwar il-programm ta' aġġornament b'approċċ ta' Navigazzjoni taż-Żona (RNAV) li għaddej bħalissa u l-infrastruttura u l-bidliet tekniċi li diġà saru. Jidher li l-pjan għal żmien medju se jieħu post ħafna mill-għajnuniet eżistenti ta' avviċinament mhux ta' preċiżjoni bbażati fl-art, bħala komponent tal-pakkett ġenerali ta' mitigazzjoni.

(111)

Is-CAAP tat ukoll ċertu dettall dwar l-introduzzjoni tal-Airbus A330 fis-servizz ta' Cebu Pacific Air, u indikat li t-trasportatur tal-ajru, bħala komponent tal-varjazzjoni AOC assoċjata, ingħata l-mandat li jagħmel rotta ta' 100 siegħa rotta PROVING fl-Asja fuq bażi ta' trasport bl-ajru mhux kummerċjali, qabel ma jitħalla jopera operazzjonijiet kummerċjali. Cebu Pacific ma ngħatax approvazzjoni għal operazzjonijiet doppji b'firxa estiża (ETOPS) mingħand is-CAAP għax għad trid issir aktar valutazzjoni u sakemm jilħaq jikseb l-esperjenza fl-operazzjoni.

(112)

F'laqgħa teknika fit-28 ta' Jannar 2014, abbażi ta' mistoqsijiet dettaljati, ingħata tagħrif dwar l-istorja tal-inċidenti reċenti speċifiċi għal Cebu Pacific Air. Żewġ inċidenti diskussi jinkludu eskursjoni b'inġenju tal-ajru tal-ATR f'Davao fit-2 ta' Ġunju 2013 u b'Airbus 319 f'Manila fit-13 ta' Ġunju 2013. Wara d-devjazzjoni, fiż-żewġ każijiet l-inġenju tal-ajru reġa' lura fir-runway. Is-CAAP fil-preżentazzjoni tagħha tat ukoll ġabra fil-qosor ta' aċċidenti u inċidenti ta' trasportaturi tal-ajru ċċertifikati l-Filippini mill-2010 sal-2013.

(113)

Cebu Pacific Air ta kull dettall dwar il-flotta kif ukoll pjanijiet ta' espansjoni tal-flotta u tar-rotot.

(114)

Fil-laqgħa tat-28 ta' Jannar 2014 is-CAAP u Cebu Pacific Air aġġornaw ukoll ir-reazzjonijiet tagħhom dwar l-osservazzjonijiet li ħarġu miż-żjara ta' verifika fuq il-post li għamlet l-UE bejn it-3 u s-7 ta' Ġunju 2013.

(115)

Fis-26 ta' Marzu 2014, is-CAAP u Cebu Pacific Air instemgħu mill-Kumitat għas-Sikurezza tal-Ajru. Is-CAAP tat dettalji dwar it-taħriġ għal għarfien tas-sorveljanza tas-Sistema tal-Ġestjoni tas-Sikurezza (SMS) li ngħata lill-ispetturi tagħha. Barra minn hekk, is-CAAP irrappurtat lill-Kumitat li kien hemm akkwist pubbliku għat-teknoloġija tal-informazzjoni (l-IT) fejn jidħlu s-sistemi tagħha tas-sorveljanza. Is-CAAP tat ħarsa ġenerali dwar il-qagħda tal-Programm għas-Sikurezza tal-Istat (SSP) tal-Filippini. Rigward is-sorveljanza tagħha ta' Cebu Pacific Air, bħala segwitu tal-laqgħa teknika tat-28 ta' Jannar 2014, is-CAAP enfasizzat li fis-seħħ hemm programm ta' sorveljanza akbar.

(116)

Fis-seduta tal-Kumitat għas-Sikurezza tal-Ajru tas-26 ta' Marzu 2014, Cebu Pacific Air ta dettalji dwar l-istruttura organizzattiva attwali tiegħu u ġie rrappurtat li minn Jannar 2014 dan kien qed jopera 50 inġenju tal-ajru inklużi 3 ajruplani tat-tip Airbus A330. It-trasportatur tal-ajru silet parti mir-reġistru tiegħu tar-Riskji u l-Identifikazzjoni tal-Perikli, inklużi dettalji dwar il-miżuri ta' mitigazzjoni li ħa, u dwar il-miri u l-għanijiet tas-sikurezza tiegħu għall-2014. Cebu Pacific Air irrapporta lill-Kumitat għas-Sikurezza tal-Ajru li r-rata ta' rkupru fl-FDA tat-trasportatur tal-ajru kienet 94 %. It-trasportatur tal-ajru ta ħarsa ġenerali dwar is-sistema tal-valutazzjoni u tal-ġestjoni tas-sikurezza tiegħu, kif ukoll analiżi dettaljata li wettaq tad-dejta b'approċċ go-around u mhux-stabbilizzat. It-trasportatur tal-ajru ta dettalji wkoll dwar il-mentalità tar-rappurtar prevalenti f'Cebu Pacific Air, inkluż il-fatt li teżisti sistema ta' rappurtar kunfidenzjali. Barra minn hekk, Cebu Pacific Air ta dettalji dwar il-programm attwali tiegħu tal-ġestjoni tar-riżorsi tal-ekwipaġġ (CRM). Cebu Pacific Air ta dettalji lill-Kumitat tas-Sikurezza tal-Ajru dwar ir-rekwiżiti tal-livell ta' esperjenza tal-bdoti mexxejja li għandu t-trasportatur tal-ajru għall-flotot tal-Airbus għal titjiriet qosra kif ukoll għal titjiriet fit-tul.

(117)

Il-Kumitat għas-Sikurezza tal-Ajru osserva li fl-4 ta' Novembru 2013Philippine Airlines reġa' beda jopera servizzi lejn l-Unjoni, wara li f'Lulju 2013 tneħħa mill-Anness A tar-Regolament tal-Kummissjoni (KE) Nru 474/2006. Minn mindu ssoktaw is-servizzi lejn l-Unjoni, ir-rapporti tal-ispezzjonijiet fir-rampa li saru fil-Programm tal-Valutazzjoni tas-Sikurezza tal-Inġenji tal-Ajru Barranin (is-“SAFA”) ma jurux xejriet negattivi li jistgħu joħolqu tħassib.

(118)

Fid-dawl tal-evidenza mogħtija rigward is-sorveljanza tas-CAAP ta' Cebu Pacific Air u l-kapaċità ta' Cebu Pacific Air biex jikkonforma mar-regolamenti rilevanti tas-sikurezza tal-avjazzjoni, kif ukoll fid-dawl tad-dikjarazzjonijiet li taw l-Awtorità u t-trasportatur tal-ajru waqt is-seduta quddiem il-Kumitat għas-Sikurezza tal-Ajru, skont il-kriterji komuni hu vvalutat li Cebu Pacific Air għandu jkun eżentat mill-projbizzjoni tal-operat fuq kull trasportatur tal-ajru rreġistrat il-Filippini, u għandu jitneħħa mill-Anness A tar-Regolament tal-Kummissjoni (KE) Nru 474/2006.

(119)

L-Istati Membri qablu li għandhom jivverifikaw il-konformità effettiva ta' Philippine Airlines u Cebu Pacific Airmal-istandards rilevanti tas-sikurezza bil-prijoritizzazzjoni ta' spezzjonijiet fir-rampa li jridu jsiru skont ir-Regolament (UE) Nru 965/2012. Jekk ir-riżultati ta' dawn l-ispezzjonijiet, jew xi informazzjoni tas-sikurezza rilevanti oħra jkunu juru li mhumiex jintlaħqu l-istandards internazzjonali tas-sikurezza, il-Kummissjoni jkollha tieħu azzjoni skont ir-Regolament (KE) Nru 2111/2005.

(120)

Il-Kummissjoni, l-EASA u l-Istati Membri baqgħu jsegwu mill-qrib il-prestazzjoni tas-sikurezza tat-trasportaturi tal-ajru ċċertifikati fil-Federazzjoni Russa u li joperaw lejn l-Unjoni, inkluż bil-prijoritizzazzjoni tal-ispezzjonijiet fir-rampa li jridu jsiru lit-trasportaturi tal-ajru Russi skont ir-Regolament (UE) Nru 965/2012.

(121)

Sabiex tikkonferma li s-sejbiet tal-ispezzjonijiet SAFA qed jiġu indirizzati kif jixraq, fl-10 ta' Marzu 2014 il-Kummissjoni bl-għajnuna tal-EASA u l-Istati Membri, iltaqgħet mal-Aġenzija Federali Russa tat-Trasport bl-Ajru (il-FATA). Għal-laqgħa ġew mistiedna wkoll rappreżentanti tat-trasportatur tal-ajru Kogalymavia ħalli jirrapportaw x'miżuri korrettivi ħa dan it-trasportatur tal-ajru biex itejjeb is-sikurezza tat-titjiriet minn mindu saru l-konsultazzjonijiet ta' qabel f'Novembru 2013.

(122)

Fil-laqgħa, il-FATA indikat li l-aħħar riżultati tal-ispezzjonijiet fir-rampa tas-SAFA li saru lil trasportaturi tal-ajru Russi li joperaw lejn l-Unjoni ma taw l-ebda raġuni għal tħassib, iżda indikat li meta kellha sejbiet kbar jew ripetuti, din interveniet bi spezzjonijiet mhux skedati u kkontrollat mill-qrib it-tneħħija tas-sejbiet. Il-FATA infurmat ukoll li wara verifika komprensiva tal-uffiċċju reġjonali ta' Tatarstan u ta' kull trasportatur tal-ajru li qed jissorveljah dan l-uffiċċju, iċ-ċertifikati tal-operaturi tal-ajru Tulpar Airlines u Tatarstan Airlines ġew revokati minħabba nuqqasijiet kbar fil-ġestjoni tas-sikurezza tagħhom. Dwar Kogalymavia, il-FATA indikat li t-trasportatur tal-ajru kien soġġett għal bosta spezzjonijiet mhux skedati matul l-aħħar erba' xhur, u dan billi fl-2013 kellu proporzjon tas-SAFA għoli. Skont il-FATA, sal-lum it-trasportatur tal-ajru xejjen kull sejba preċedenti u kapaċi jopera titjiriet domestiċi u internazzjonali skont il-kundizzjonijiet tal-AOC tiegħu.

(123)

Fil-laqgħa, Kogalymavia ta preżentazzjoni dwar azzjoni korrettiva li għaddejja. It-trasportatur tal-ajru rrapporta li l-prestazzjoni tas-SAFA tiegħu tjiebet għax il-proporzjon naqas għal 3.49, u li ddaħħlu tibdiliet strutturali u tekniċi importanti, fosthom bit-tnedija ta' pjan kbir għal tisbiħ intern fil-kabina; kull attività kontinwa tal-organizzazzjoni tal-ġestjoni tal-ajrunavigabbiltà ngħatat b'subkuntratt lil organizzazzjoni approvata mill-EASA; bl-organizzazzjoni mill-ġdid tal-katina tal-provvista tiegħu tal-ispare-parts. it-twaqqif ta' Ċentru tal-Kontroll tal-Manutenzjoni (MCC); inbidel il-biċċa tal-kbira tal-persunal tad-Dipartiment tal-Manutenzjoni u nħatar inġinier kap ġdid bl-esperjenza xierqa.

(124)

Minn informazzjoni li waslet waqt dawn il-konsultazzjonijiet, ġie konkluż li l-awtoritajiet Russi tal-avjazzjoni jew it-trasportaturi tal-ajru ċċertifikati fil-Federazzjoni Russa m'għandhomx għalfejn jidhru quddiem il-Kumitat għas-Sikurezza tal-Ajru. Il-FATA ntalbet issaħħaħ il-monitoraġġ ta' bosta trasportaturi tal-ajru bi proporzjon tas-SAFA għoli, u tgħarraf b'dan lill-Kummissjoni. Dwar Kogalymavia, il-Kummissjoni indikat li, minkejja t-titjib innotat, is-sostenibbiltà tal-miżuri li ħa l-operatur għad trid tiġi validata, flimkien mal-effiċjenza tal-ġestjoni tas-sikurezza tagħha.

(125)

Għaldaqstant, skont il-kriterji komuni, hu vvalutat li f'dan l-istadju m'hemmx raġunijiet biex tinbidel il-lista Komunitarja tat-trasportaturi tal-ajru li huma soġġetti għal projbizzjoni tal-operat fl-Unjoni fir-rigward tat-trasportaturi tal-ajru mill-Federazzjoni Russa. Madankollu, jekk xi informazzjoni rilevanti tas-sikurezza turi li jeżistu riskji imminenti tas-sikurezza minħabba nuqqas ta' konformità ma' standards internazzjonali tas-sikurezza, il-Kummissjoni jkollha tieħu azzjoni f'konformità mar-Regolament (KE) Nru 2111/2005.

(126)

Il-prestazzjoni tas-sikurezza tat-trasportaturi tal-ajru ċċertifikati fil-Federazzjoni Russa li joperaw lejn l-Unjoni għandha tibqa' tkun soġġetta għal monitoraġġ mill-qrib. Jekk ir-riżultati tal-ispezzjonijiet fir-rampa, jew xi informazzjoni tas-sikurezza rilevanti oħra jkunu juru li mhumiex jintlaħqu l-istandards internazzjonali tas-sikurezza, il-Kummissjoni jkollha tieħu azzjoni skont ir-Regolament (KE) Nru 2111/2005.

(127)

Il-Kummissjoni għarrfet lill-Kumitat għas-Sikurezza tal-Ajru bil-parteċipazzjoni tagħha fl-avveniment tal-avjazzjoni li organizzat l-Awtorità tal-Avjazzjoni Ċivili tas-Sudan (is-SCAA) fil-5 u s-6 ta Diċembru 2013 f'Khartoum. B'din il-parteċipazzjoni l-Kummissjoni setgħet tosserva li l-SCAA ġiet ristrutturata u li kellha l-appoġġ politiku biex tibqa' tinvesti fis-sikurezza. Dan l-appoġġ stqarru pubblikament il-Ministru Sudaniż responsabbli mill-avjazzjoni ċivili quddiem il-komunità lokali tal-avjazzjoni u r-rappreżentanti tal-ICAO.

(128)

Lill-awtoritajiet Sudaniżi għamlu progress sew biex isiru awtorità kredibbli, b'mod partikolari b'żieda fil-baġit ħalli l-SCAA setgħet timpjega persunal speċjalizzat u tħarreġ sew il-persunal tagħha.

(129)

Dan it-titjib irid jidher ukoll fit-trasportaturi tal-ajru li għandhom AOC Sudaniża. Tnejn minnhom, Sudan Airways u Nova Airways, aġġornaw l-istandards tagħhom u l-proċeduri tagħhom ġew awditjati.

(130)

Il-Kummissjoni u l-Kumitat għas-Sikurezza tal-Ajru laqgħu dawn l-isforzi li qed isiru. Jaf issir missjoni ta' verifika tal-Unjoni fuq il-post meta l-SCAA jidhrilha li t-trasportaturi tal-ajru ħolqu proċeduri b'saħħithom f'konformità mal-istandards internazzjonali.

(131)

Għaldaqstant, hu vvalutat li f'dan l-istadju m'hemmx raġunijiet biex tinbidel il-lista Komunitarja tat-trasportaturi tal-ajru li huma soġġetti għal projbizzjoni tal-operat fl-Unjoni fir-rigward tat-trasportaturi tal-ajru mis-Sudan.

(132)

Wara l-verifika tal-USOAP fl-2007, l-awtoritajiet tal-avjazzjoni ċivili ta' Sważiland (l-SWACAA) talbu lill-ICAO għal kodiċi ġdid tal-pajjiż u ħassru kull reġistrazzjoni eżistenti li kienet saret fir-reġistru tagħhom. L-SWACAA neħħew ukoll kull AOC li nħareġ qabel u minħabba f'hekk bħalissa m'hemm l-ebda AOC validu fil-pajjiż.

(133)

Minn mindu nħatar id-Direttur Ġenerali l-ġdid f'Diċembru 2009, l-SWACAA urew impenn ċar biex jindirizzaw is-sejbiet tal-USOAP li għamlet l-ICAO fl-2007. L-SWACAA kisbu kodiċi tal-pajjiż ġdid tal-ICAO (3DC) għar-reġistrazzjoni tal-inġenji tal-ajru.

(134)

Inbdiet riforma wiesgħa tal-funzjoni tas-sorveljanza kollha u diġà nkisbu żviluppi sinifikanti fosthom tlesta t-tiswir mill-ġdid tal-qafas legali, qed issir separazzjoni tar-regolatur minn mal-fornitur tas-servizzi tal-ajruport u ġew iffirmati u daħlu fis-seħħ bosta sħubijiet ma' pajjiżi ġirien.

(135)

Fil-21 ta' Jannar 2014 il-Kummissjoni stiednet lill-SWACAA biex għal laqgħa ta' konsultazzjoni teknika fi Brussell fis-27 ta' Jannar 2014. Għalkemm għall-ewwel l-SWACAA aċċettaw l-istedina, wara biddlu l-ħsieb u talbu aktar żmien biex jikkonsolidaw iktar il-preparazzjoni tagħhom.

(136)

Bejn l-10 u l-14 ta' Frar 2014 l-EASA wettqet missjoni ta' assistenza teknika. Il-missjoni kellha x'taqsam mal-għoti ta' assistenza lill-SWACAA biex isaħħu l-isforz li qed jagħmlu fit-tiswir tal-kapaċità, u biex jiggwidaw dwar kif għandhom jiġu indirizzati bl-aqwa mod l-azzjonijiet miftuħa bil-verifika tal-USOAP tal-ICAO. Filwaqt li mhux verifika, il-missjoni ta' assistenza teknika tal-EASA identifikat għadd sinifikanti ta' titjib siewi.

(137)

Fis-26 ta' Marzu 2014, l-SWACAA dehru quddiem il-Kumitat għas-Sikurezza tal-Ajru. L-SWACAA għamluha ċara li bħalissa impenjati bl-implimentazzjoni tal-PAK rivedut li nqabel mal-ICAO f'Mejju 2013. B'dan il-PAK, u bl-għajnuna ta' appoġġ u impenn politiku qawwi u b'finanzjament imsaħħaħ, qed isir sforz kbir għal reklutaġġ u taħriġ tal-persunal kif jixraq. L-SWACAA kienu bbenefikaw ukoll mill-appoġġ ta' proġett tal-ICAO ta' Koperazzjoni Teknika (TCB) maħsub biex iħarreġ, jagħti appoġġ legali u organizzattiv u jsaħħaħ il-kapaċità tal-funzjoni ta' sorveljanza. Ħidmet l-esperti tal-ICAO f'dan il-proġett bħalissa tistma li n-Nuqqas ta' Implimentazzjoni Effettiva (il-LEI) għal 40 %, b'mira ta' 35 % fi tmiem il-proġett (fl-aħħar ta' Ġunju 2014). B'aktar sforz biex jiżguraw is-sostenibbiltà lil hinn minn tmiem il-proġett, minn Lulju 2014 'il quddiem is-Sważiland se jospita lill-Organizzazzjoni tas-Sikurezza tal-Avjazzjoni (is-SASO) tal-SADC (il-Komunità għall-Iżvilupp tan-Nofsinhar tal-Afrika). Dawn indikaw ukoll li l-inġenji tal-ajru bil-kodiċi tal-pajjiż il-qadim tal-ICAO (3D) għar-reġistrazzjoni tal-inġenji tal-ajru, l-SWACAA ma jqisuhomx bħala inġenji li huma fis-sorveljanza tagħhom.

(138)

L-SWACAA indirizzaw u wieġbu bosta mistoqsijiet miftuħa PQs (Mistoqsijiet tal-Protokoll) u taw evidenza ta' appoġġ, permezz tal-għodda onlajn tas-CMA tal-ICAO. Il-validazzjoni ta' dawn l-azzjonijiet mill-ICAO għadha pendenti u allura l-prestazzjoni uffiċjali għadha l-istess bħall-2007, għalkemm minn dak iż-żmien 'l hawn sar titjib sinifikanti.

(139)

L-SWACAA talbu ICVM f'Novembru 2014 biex issir validazzjoni tal-ICAO ta' ħafna azzjonijiet korrettivi li diġà twettqu.

(140)

Il-Kummissjoni u l-Kumitat għas-Sikurezza tal-Ajru laqgħu l-impenn tas-SWACAA għall-implimentazzjoni tal-PAK rivedut, il-passi kbar li diġà għamlu, u ħeġġew l-isforzi tas-SWACAA biex jistabbilixxu sistema tal-avjazzjoni li tkun konformi għalkollox mal-istandards tal-ICAO.

(141)

Billi diġà qed isir rinfurzar sinifikanti tal-funzjoni ta' sorveljanza, u billi ma jeżistux AOCs u d-domanda għal AOCs ġodda qed tiżviluppa bil-mod ħafna, skont il-kriterji komuni, hu vvalutat li r-Renju tas-Sważiland għandu jitneħħa mil-lista Komunitarja tat-trasportaturi tal-ajru soġġetti għal projbizzjoni tal-operat fl-Unjoni.

(142)

Il-Kummissjoni u l-Kumitat għas-Sikurezza tal-Ajru se jibqgħu jissorveljaw mill-qrib il-kapaċità tal-SWACAA biex jeżerċitaw bis-sħiħ ir-responsabbiltà tas-sorveljanza tagħhom. Il-Kummissjoni u l-Kumitat għas-Sikurezza tal-Ajru talbu lill-SWACAA biex jgħarrfu lill-Kummissjoni b'kull AOC ġdid maħruġ jew mibdul. Jekk xi informazzjoni rilevanti tas-sikurezza turi li jeżistu riskji imminenti tas-sikurezza minħabba nuqqas ta' konformità ma' standards internazzjonali tas-sikurezza, il-Kummissjoni jkollha tieħu azzjoni f'konformità mar-Regolament (KE) Nru 2111/2005.

(143)

Ir-rapport uffiċjali dwar l-investigazzjoni tal-inċidenti rigward l-inċident tat-trasportatur tal-ajru Yemen Airways (Yemenia) li ġara fid-29 ta' Ġunju 2009 fil-Gżejjer Moroni Comoros ġie ppubblikat fil-25 ta' Ġunju 2013. Ir-rapport ta tliet rakkomandazzjonijiet ewlenin, jiġifieri li l-awtoritajiet ta' Comoros idaħħlu miżuri permanenti ta' emerġenza skont ir-riċerka u salvataġġ sussegwenti ta' inċident tal-ajru li jseħħ fil-baħar qrib il-wesgħat tal-avjazzjoni tagħha; li l-awtoritajiet tal-Jemen jiżguraw li kull ekwipaġġ li jtir lejn Moroni jkun imħarreġ sew biex jitlestew il-proċeduri tal-Manuvru Viżwali b'Rotta Preskritta (MVI); u li l-awtoritajiet tal-Jemen jirrevedu t-taħriġ tal-bdoti ta' Yemenia, l-aktar biex dawn ikunu kapaċi jaġixxu f'każ ta' emerġenza.

(144)

Fis-7 ta' Novembru 2013, l-Awtorità tal-Avjazzjoni Ċivili Meteoroloġika tal-Jemen (il-CAMA) kitbet lill-Kummissjoni. Fl-ittra tat ċertu dettall dwar l-azzjonijiet tas-sikurezza li ttieħdu minħabba l-inċident. Fl-laqgħa tiegħu ta' Novembru 2013 il-Kumitat għas-Sikurezza tal-Ajru kien infurmat b'dawn l-azzjonijiet u bi żviluppi assoċjati.

(145)

Fid-9 ta' Jannar 2014 il-Kummissjoni organizzat laqgħa teknika fi Brussell. Il-Kummissjoni, esperti tal-EASA u tal-Istati Membri, kif ukoll rappreżentanti tal-CAMA u Yemenia, attendew din il-laqgħa.

(146)

Qabel il-laqgħa teknika, fis-17 ta' Diċembru 2013 il-Kummissjoni bagħtet mistoqsijiet speċifiċi lill-CAMA mhux biss dwar ir-rapport tal-inċident iżda anke dwar ir-responsabbiltajiet usa' tal-CAMA fejn tidħol is-sorveljanza tas-sikurezza tat-trasportaturi tal-ajru ċċertifikati l-Jemen. Il-Kummissjoni bagħtet ukoll sett ta' mistoqsijiet speċifiċi lill-CAMA li kellhom jingħataw lil Yemenia. Iż-żewġ settijiet ta' mistoqsijiet tfasslu biex jgħinu lill-Kummissjoni tivvaluta l-kwalità tar-reazzjonijiet tal-CAMA u ta' Yemenia għar-rakkomandazzjonijiet li ta r-rapport tal-inċident.

(147)

B'reazzjoni għar-rakkomandazzjonijiet speċifiċi li saru lill-awtoritajiet tal-Jemen, il-CAMA spjegat li fost l-azzjonijiet kien hemm żieda fis-sorveljanza tas-sikurezza ta' Yemenia, fosthom b'aktar spezzjonijiet fil-kabina tal-ekwipaġġ u fil-kabina tal-bdoti u b'ordni lil Yemenia biex jagħmel kontrolli ta' kwalifika tal-linja tal-ajru u tal-ajruport għall-ekwipaġġ kollu li jaħdem fl-ajruporti klassifikat fil-livell “C”. Fost l-azzjonijiet addizzjonali, il-CAMA tat struzzjonijiet lil Yemenia biex it-taħriġ dwar “irkupru minn stolljaturi u telf ta' kontroll” tagħmlu aktar spiss.

(148)

B'reazzjoni għar-rakkomandazzjonijiet speċifiċi li saru lil Yemenia, it-trasportatur tal-ajru spjega li kien implimenta bidliet fil-kariga tal-Ġestjoni u ċ-Ċertifikat tal-Operatur tal-Ajru, u għamel reviżjoni tal-politika u tal-proċeduri u bidliet relatati. Issemma wkoll xi titjib fl-awditjar, it-taħriġ u l-implimentazzjoni. Barra minn hekk, waqt it-taħriġ tas-simulatur rikorrenti li sar skont is-sillabu tat-taħriġ tal-Airbus, Yemenia saħaq mill-ġdid fuq il-proċeduri ta' emerġenza tal-ekwipaġġ tiegħu.

(149)

Il-Kumitat għas-Sikurezza tal-Ajru ngħata aktar dettall dwar id-diskussjonijiet tekniċi li saru fil-laqgħa u ngħata sommarju tad-dokumentazzjoni li l-CAMA u Yemenia kienu ressqu.

(150)

Skont il-kriterji komuni, hu vvalutat li f'dan l-istadju m'hemmx raġunijiet biex tinbidel il-lista Komunitarja tat-trasportaturi tal-ajru li huma soġġetti għal projbizzjoni tal-operat fl-Unjoni fir-rigward tat-trasportaturi tal-ajru mil-Jemen. Madankollu, se jissokta l-monitoraġġ mill-qrib tal-prestazzjoni tas-sikurezza ta' kull trasportatur tal-ajru ċċertifikat il-Jemen, inkluż Yemenia. Jekk ikun jidher li mhumiex jintlaħqu l-istandards internazzjonali tas-sikurezza, il-Kummissjoni jkollha tieħu azzjoni skont ir-Regolament (KE) Nru 2111/2005.

(151)

L-Istati Membri se jibqgħu jivverifikaw il-konformità effettiva mal-istandards rilevanti tas-sikurezza tat-trasportaturi tal-ajru ċċertifikati l-Jemen, bil-prijoritizzazzjoni tal-ispezzjonijiet fir-rampa skont ir-Regolament (UE) Nru 965/2012.

(152)

Il-Kummissjoni għarrfet lill-Kumitat għas-Sikurezza tal-Ajru dwar korrispondenza riċenti li rċeviet mingħand l-awtoritajiet taż-Żambja, fosthom ittra fl-10 ta' Diċembru 2013 mingħand il-Ministeru tat-Trasport. L-ittra semmiet korrispondenza preċedenti mingħand il-Kummissjoni fl-1 ta' Ottubru 2013 li tat gwida dwar oqsma li l-awtoritajiet għandhom jiffukaw fuqhom ħalli jagħmlu aktar progress u titjib.

(153)

L-ittra tal-10 ta' Diċembru 2013 mingħand l-awtoritajiet taż-Żambja għarrfet li nħatar Bord tad-Diretturi għall-Awtorità tal-Avjazzjoni Ċivili ta' dan il-pajjiż u li għandhom il-ħsieb jimpjegaw Direttur Ġenerali tal-Avjazzjoni Ċivili sal-31 ta' Jannar 2014.

(154)

Fil-21 ta' Jannar 2014 il-Kummissjoni wieġbet biex tikkonferma li xtaqet iżżomm rabta kostruttiva mal-awtoritajiet taż-Żambja. F'din it-tweġiba l-Kummissjoni ssuġġeriet ukoll li meta jinħatar id-Direttur Ġenerali l-ġdid tal-Avjazzjoni Ċivili, għandha ssir laqgħa teknika bil-ħsieb li tinkiseb informazzjoni dwar il-progress, ħalli l-Kumitat għas-Sikurezza tal-Ajru jkun jista' jinżamm infurmat sew.

(155)

Il-Kummissjoni u l-Kumitat għas-Sikurezza tal-Ajru nnotaw il-progress kontinwu li għamel id-Dipartiment tal-Avjazzjoni Ċivili taż-Żambja, u ħeġġew lill-awtoritajiet taż-Żambja biex ma jehdewx, bil-ħsieb li meta jkun xieraq u wara verifika meħtieġa, jitqies jekk jistgħux jintreħew ir-restrizzjonijiet attwali tal-operat.

(156)

Għaldaqstant, skont il-kriterji komuni, hu vvalutat li f'dan l-istadju m'hemmx raġunijiet biex tinbidel il-lista Komunitarja tat-trasportaturi tal-ajru li huma soġġetti għal projbizzjoni tal-operat fl-Unjoni fir-rigward tat-trasportaturi tal-ajru miż-Żambja.

(157)

L-Artikolu 8(2) tar-Regolament (KE) Nru 2111/2005 jagħraf il-bżonn li jittieħdu d-deċiżjonijiet malajr u, meta jixraq, b'mod urġenti, minħabba l-implikazzjonijiet tas-sikurezza. Għaldaqstant hu essenzjali, li biex titħares l-informazzjoni sensittiva u biex jonqsu kemm jista' jkun l-impatti kummerċjali, id-deċiżjonijiet fil-kuntest tal-aġġornament tal-lista tat-trasportaturi tal-ajru li huma soġġetti għal projbizzjoni jew restrizzjoni tal-operat fl-Unjoni, jiġu ppubblikati u jidħlu fis-seħħ minnufih wara l-adozzjoni tagħhom.

(158)

Għalhekk ir-Regolament (KE) Nru 474/2006 għandu jinbidel skont dan.

(159)

Il-miżuri previsti f'dan ir-Regolament huma konformi mal-opinjoni tal-Kumitat għas-Sikurezza tal-Ajru,

(1)

L-Anness A jinbidel bit-test tal-Anness A ta' dan ir-Regolament.

(2)

L-Anness B jinbidel bit-test tal-Anness B ta' dan ir-Regolament.