29.7.2014   

MT

Il-Ġurnal Uffiċjali tal-Unjoni Ewropea

C 247/122

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għat-tkabbir u l-impjiegi, Ewropa 2020, ibbażata fuq koordinazzjoni msaħħa tal-politiki tal-ekonomija, li tiffoka fuq l-oqsma ewlenin fejn tinħtieġ azzjoni biex tingħata spinta lill-potenzjal tal-Ewropa għal tkabbir u kompetittività sostenibbli.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, huwa adotta deċiżjoni dwar il-linji gwida għall-politiki tal-impjiegi tal-Istati Membri (2), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni f'livell nazzjonali, dak tal-UE kif ukoll taż-żona tal-euro permezz bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-Istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiżi.

(4)

Fid-9 ta' Lulju 2013, il-Kunsill adotta Rakkomandazzjoni (3) dwar il-Programm Nazzjonali ta' Riforma tas-Slovakkja għall-2013 u ta l-opinjoni tiegħu dwar il-Programm ta' Stabbiltà aġġornat tas-Slovakkja għall-perijodu 2012‐2016. Fil-15 ta' Novembru 2013, il-Kummissjoni, f'konformità mar-Regolament (UE) Nru 473/2013 tal-Parlament Ewropew u tal-Kunsill (4), ippreżentat l-opinjoni tagħha dwar l-abbozz ta' pjan baġitarju tas-Slovakkja għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011 tal-Parlament Ewropew u tal-Kunsill (5), adottat ir-Rapport ta' Mekkaniżmu ta' Twissija, li fih is-Slovakkja ma ġietx identifikata bħala wieħed mill-Istati Membri li għalihom ser issir reviżjoni fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidazzjoni fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidazzjoni fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fit-23 ta' April 2014, is-Slovakkja ppreżentat il-Programm Nazzjonali ta' Riforma tagħha għall-2014 kif ukoll il-Programm ta' Stabbiltà għall-2014. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(8)

L-objettiv tal-istrateġija baġitarja spjegata fil-Programm ta' Stabbiltà għall-2014 huwa li tiġi żgurata s-sostenibbiltà tal-korrezzjoni tad-defiċit eċċessiv u li jintlaħaq l-objettiv fuq terminu medju ta' defiċit strutturali ta' madwar 0,5 % tal-PDG sal-2017. Dan l-objettiv ta’ terminu medju huwa aktar strett minn dak li jeħtieġ il-Patt ta' Stabbiltà u Tkabbir. Fl-2013, id-defiċit tal-amministrazzjoni pubblika tas-Slovakkja ġie b'mod sostenibbli taħt it-3 % tal-PDG. Il-bidla ppjanata (rikalkulata) fil-bilanċ strutturali tal-2014 timplika li s-Slovakkja ser tiddevja b'mod sinifikanti mill-pjan ta' aġġustament lejn l-objettiv ta’ terminu medju tagħha. Fl-2015, it-titjib ippjanat ta' 0,3 % tal-PDG ikun konformi mar-regoli tal-Patt ta' Stabbiltà u Tkabbir. Fis-snin tal-aħħar, il-Programm ta' Stabbiltà ma jiżgurax aġġustament adegwat lejn l-objettiv ta’ terminu medju. In-nefqa tikber b'pass konsistenti mal-parametru referenzjarju tan-nefqa kemm fl-2014 kif ukoll fl-2015. Il-Programm ta' Stabbiltà jipprevedi li l-akbar parti tal-isforz ta' konsolidazzjoni biex jintlaħaq l-objettiv ta’ terminu medju ser isseħħ fl-2016 u 2017. B'mod ġenerali, il-pjan ta' aġġustament lejn l-objettiv ta’ terminu medju jippreżenta riskji fir-rigward tal-konformità mar-rekwiżiti tal-Patt ta' Stabbiltà u Tkabbir. Il-Programm ta' Stabbiltà jipprevedi li d-dejn tal-amministrazzjoni pubblika jibqa' taħt il-valur ta' referenza ta' 60 % tal-PDG matul il-perijodu kollu tal-ipprogrammar. Ix-xenarju makroekonomiku li jirfed il-projezzjonijiet baġitarji fil-Programm ta' Stabbiltà, li ġew approvati minn korp indipendenti (il-Kumitat tat-Tbassir Makroekonomiku), huwa plawsibbli.

Il-miżuri li diġà huma kwantifikati ma jiżgurawx li l-miri fiskali definiti mill-awtoritajiet ser jintlaħqu. Madankollu, mhux il-miżuri tad-dħul kollha huma speċifikati biżżejjed u riformi ta' ffrankar tal-ispejjeż tal-amministrazzjoni tal-Istat jibqgħu soġġetti għal riskji ta' implimentazzjoni filwaqt li l-kont tal-pagi pubbliċi jista' ma jkunx tal-valuri bbaġitjati, kif ġara fil-passat. Min-naħa l-oħra, iċ-ċifri ppreżentati fil-Programm ta' Stabbiltà għadhom mhux iqisu l-iffrankar li jirriżulta mill-attivazzjoni tat-trażżin tad-dejn domestiku. Skont it-tbassir tar-Rebbiegħa tas-servizzi tal-Kummissjoni tal-2014, li jinkorpora l-impatt tal-iffrankar fin-nefqa minħabba t-trażżin tad-dejn, id-devjazzjoni mill-pjan ta' aġġustament tkun iżgħar fl-2014 milli mbassar fil-Programm ta' Stabbiltà, filwaqt li aġġustament strutturali suffiċjenti huwa pprojettat fl-2015, bil-parametru referenzjarju tan-nefqa jintlaħaq kemm fl-2014 kif ukoll fl-2015.

(9)

Filwaqt li kemm il-Programm Nazzjonali ta’ Riforma u dak ta' Stabbiltà jiddikjaraw intenzjoni li jżidu l-infiq li jsaħħaħ it-tkabbir, dan ma jidhirx li huwa sostnut bis-sħiħ mill-pjanijiet sottostanti. L-infiq fuq l-edukazzjoni mill-baġit tal-Istat jiżdied fl-2014 iżda jonqos fis-snin ta' wara. Abbażi tal-valutazzjoni tal-Programm ta' Stabbiltà u t-tbassir tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li jeżisti riskju ta' devjazzjoni mill-pjan ta' aġġustament lejn l-objettiv ta’ terminu medju fl-2014 filwaqt li fl-2015 hija mistennija korrezzjoni xierqa.

(10)

B'reazzjoni għar-rekwiżiti tat-Trattat dwar l-Istabbiltà, il-Koordinazzjoni u l-Governanza, is-Slovakkja introduċiet regola ta' baġit bilanċjat f'Novembru 2013. Madankollu, il-qafas baġitarju huwa mdgħajjef bin-nuqqas ta' limiti massimi għan-nefqa vinkolanti u li jistgħu jiġu infurzati. Filwaqt li l-introduzzjoni tagħhom kienet prevista mill-Programm ta' Stabbiltà 2013, l-impenn għadu s'issa ma ġiet implimentat u s-Slovakkja tibqa' pajjiż b'riskju medju fir-rigward tas-sostenibbiltà tal-finanzi pubbliċi u n-nefqa fil-kura tas-saħħa hija projettata li tibqa' l-mutur ewlieni tal-kostijiet li qed jiżdiedu tat-tixjieħ u tikkontribbwixxi għal 2 % tal-PDG, it-tieni l-akbar żieda projettata fil-kura tas-saħħa fl-Istati Membri kollha. Il-problemi jinħassu l-aktar fil-kura in-patient u l-kura primarja. F'Diċembru 2013, il-Gvern adotta l-Qafas Strateġiku tal-2014‐30 għas-Saħħa biex itejjeb il-kosteffettività. L-Istrateġija issa titlob pjanijiet dettaljati ta' implimentazzjoni.

(11)

Is-Slovakkja għamlet progress biex ittejjeb il-konformità tat-taxxa u l-implimentazzjoni tal-pjan ta' Azzjoni biex tiġġieled il-frodi fit-taxxa qiegħda titwettaq b'bejn wieħed u ieħor nofs il-miżuri fis-seħħ. B'riżultat ta' dan, l-effiċjenza tas-sistema tat-taxxa Slovakka tidher li tjiebet fl-2013, speċjalment għall-VAT, għalkemm il-ħtieġa li l-isforzi jiġu konsolidati u li tissaħħaħ il-kapaċità analitika u tal-awditjar tal-amministrazzjoni tat-taxxa u l-unifikazzjoni tal-ġbir tat-taxxi, id-dazji doganali u l-kontribuzzjonijiet tas-sigurtà soċjali jinsabu lura. Biex tkompli l-konsolidazzjoni fiskali b'mod ġentili, is-Slovakkja tista' tiddependi aktar fuq taxxi li huma ta' inqas ħsara għat-tkabbir, b'mod partikolari t-tassazzjoni rikorrenti fuq il-proprjetà u ambjentali. F'dan ir-rigward, ma kien hemm l-ebda progress fir-riforma tat-tassazzjoni tal-proprjetà u l-irbit tagħha mal-valur fis-suq tal-proprjetà. Id-dħul minn din it-taxxa għadu baxx u ma nbidilx f'termini relattivi mis-sena 2000. Fl-2013, il-Gvern implimenta miżuri biex inaqqas diskrepanza kbira fil-porzjon tat-taxxa bejn l-impjegati u dawk li jaħdmu għal rashom, iżda d-differenza sostanzjali fir-rati tat-taxxa effettivi bejn iż-żewġ gruppi li kien hemm fl-2012 għadha teżisti.

(12)

Is-suq tax-xogħol jkompli jaffaċċa għadd ta' sfidi. Ħafna mill-qgħad, li għadu madwar 14 %, huwa fit-tul, u jindika li l-problema tal-qgħad fis-Slovakkja hija ta' natura strutturali. Is-Slovakkja għamlet xi progress lejn li tnaqqas il-proporzjon tat-taxxa għall-ħaddiema bi dħul baxx li jidħlu fis-suq tax-xogħol wara li jkun ilhom qiegħda fit-tul, iżda l-effettività tal-miżuri teħtieġ tiġi mmonitorjata u vvalutata. Sar biss progress limitat f'oqsma oħra, speċjalment it-tisħiħ tal-kapaċità tas-servizzi pubbliċi tal-impjiegi biex jipprovdu servizzi personalizzati u jsaħħu r-rabta bejn il-miżuri tal-attivazzjoni u l-għajnuna soċjali. Fir-rigward tal-qgħad fost iż-żgħażagħ, is-servizz pubbliku tal-impjiegi għandu kapaċità limitata ta' intervent bikri u għal servizzi individwalizzati għall-profili ta' min ikun qed ifittex xogħol u biex jilħaq liż-żgħażagħ mhux reġistrati. Għalhekk, hemm il-bżonn ta' azzjoni f'dawn l-oqsma, f'konformità mal-objettivi ta' garanzija għaż-żgħażagħ. Huma meħtieġa miżuri aktar immirati fost dawk li qed ifittxu xogħol u li huma żvantaġġati, fosthom ir-Rom, li r-rati tal-impjiegi tagħhom għadha baxxa ħafna. In-nuqqas ta' faċilitajiet xierqa għall-indukrar tat-tfal partikolarment għat-tfal taħt it-tliet snin tagħmilha diffiċli biex l-ommijiet jirritornaw fis-suq tax-xogħol.

(13)

Ir-rilevanza limitata tal-edukazzjoni għas-suq tax-xogħol tfixkel il-provvista ta' ħaddiema b'ħiliet. Il-prestazzjoni tal-istudenti fl-edukazzjoni obbligatorja hija taħt il-medja tal-UE u naqset b'mod sinifikanti. In-nefqa pubblika fl-edukazzjoni tibqa' baxxa minkejja ż-żidiet reċenti fis-salarji tal-għalliema; taħriġ inizjali lill-għalliema qed jissaħħaħ u l-esperjenza prattika qed titjieb, iżda jeħtieġ li dawn l-isforzi jkomplu. Minkejja l-isforzi tal-gvern biex jirriforma l-edukazzjoni u t-taħriġ vokazzjonali u jagħti sussidji għall-impjiegi għaż-żgħażagħ, ir-rata tal-qgħad fost iż-żgħażagħ għadha l-ogħla fl-Unjoni u t-transizzjoni mill-iskola għad-dinja tax-xogħol għadha problematika. Il-perċentwali relattivament baxx ta' programmi fil-livell ta' baċellerat orjentati lejn ix-xogħol u kooperazzjoni insuffiċjenti ma' min iħaddem inaqqsu r-rilevanza tal-edukazzjoni terzjarja għas-suq tax-xogħol. It-titjib tal-kwalità tal-edukazzjoni għolja u l-kooperazzjoni bejn in-negozji u l-istituzzjonijiet tal-edukazzjoni tgħin ukoll biex titjieb il-kapaċità tal-innovazzjoni tal-ekonomija. Il-pjanijiet fl-Istrateġija Intelliġenti tal-Ispeċjalizzazzjoni tmur fid-direzzjoni t-tajba, iżda jeħtieġ li tiġi implimentata b'mod effettiv. Il-forniment ta' kwalità ħażina persistenti tal-edukazzjoni u l-indukrar bikrija tat-tfal iħallu impatt fuq il-kisbiet edukattivi, partikolarment għar-Rom. Sa issa, l-inizjattivi mmirati lejn it-titjib tal-eżiti edukattivi għall-istudenti Rom jiddependu wisq fuq il-proġetti kofinanzjati mal-UE.

(14)

Fl-enerġija, is-Slovakkja għamlet progress fil-ħidma għal aktar interkonnessjonijiet tal-elettriku u l-gass mal-pajjiżi ġirien; madankollu, għadhom meħtieġa miżuri biex is-suq tal-enerġija Slovakk jaħdem aħjar, u partikolarment biex titjieb it-trasparenza tal-mekkaniżmu tal-issettjar tat-tariffi. Pakkett ta' miżuri biex titjieb l-effiċjenza enerġetika kien propost biex jiġi ffinanzjat mill-UE fil-perijodu il-ġdid tal-ipprogrammar.

(15)

Ir-riforma fis-seħħ fl-amministrazzjoni pubblika ser ittejjeb l-orjentazzjoni lejn il-klijenti, madankollu l-amministrazzjoni pubblika għadha mhix trendi la f'termini ta' kwalità u lanqas ta' effiċjenza. Ir-rata tal-bidla tal-persunal li hija għolja b'mod persistenti marbuta maċ-ċiklu politiku flimkien ma' mmaniġġar dgħajjef tar-riżorsi umani u kapaċità analitika dgħajfa jxekklu t-twettiq ta' politika bbażata fuq l-evidenza. Is-Slovakkja għadha tiġi kklassifikata ħażin fl-indikaturi internazzjonali tal-korruzzjoni u ftit għamlet progress fit-titjib tal-effiċjenza u t-trasparenza tas-sistema ġudizzjarja tagħha. Il-kwalità tal-ambjent kummerċjali fis-Slovakkja mar għall-agħar u l-appoġġ għal kumpanniji li qed jikbru b'rata mgħaġġla huwa staġnat. Is-Slovakkja reċentament irriformat ir-regoli tal-akkwist pubbliku tagħha bil-għan li ttejjeb it-trasparenza u l-effiċjenza iżda l-applikazzjoni ta' dawn ir-regoli għadha diffiċli u l-impatt tar-riforma tal-2013 fl-akkwist pubbliku kien limitat.

(16)

Fil-kuntest tas-Semestru Ewropew, il-Kummissjoni għamlet analiżi komprensiva tal-politika ekonomika tas-Slovakkja. Hija vvalutat il-Programm Nazzjonali ta’ Riforma u l-Programm ta’ Stabbiltà. Hija qieset mhux biss ir-rilevanza tagħhom għall-politika fiskali u soċjoekonomika sostenibbli fis-Slovakkja iżda anki l-konformità tagħhom mar-regoli u l-gwida tal-UE, fid-dawl tal-ħtieġa li tissaħħaħ il-governanza ekonomika ġenerali tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew huma riflessi fir-rakkomandazzjonijiet minn (1) sa (6) hawn taħt.

(17)

Fid-dawl ta’ din il-valutazzjoni, il-Kunsill eżamina l-Programm ta' Stabbiltà tas-Slovakkja, u l-opinjoni tiegħu (6) hija riflessa b’mod partikolari fir-rakkomandazzjoni (1) hawn taħt.

(18)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika taż-zona tal-euro inġenerali. Abbażi ta' dan, il-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (7). Bħala pajjiż li l-munita tiegħu hija l-euro, is-Slovakkja għandha wkoll tiżgura l-implimentazzjoni sħiħa u f'waqtha ta' dawk ir-rakkomandazzjonijiet,

1.

Wara l-korezzjoni tad-defiċit eċċessiv, issaħħaħ il-miżuri baġitarji għall-2014 fid-dawl tad-differenza emerġenti ta' 0,3 % tal-PDG relattiva għall-parti preventiva tar-rekwiżiti tal-Patt ta' Stabbiltà u Tkabbir abbażi tat-tbassir tar-Rebbiegħa 2014 tas-servizzi tal-Kummissjoni. Fl-2015, tiżgura l-aġġustament meħtieġ ta' 0,1 % tal-PDG lejn l-objettiv ta’ terminu medju filwaqt li tqis il-kundizzjonijiet ekonomiċi dgħajfa mistennija. Minn hemm 'il quddiem, sakemm jintlaħaq l-objettiv ta’ terminu medju, twettaq aġġustament strutturali annwali ta' 0,5 % tal-PDG bħala parametru referenzjarju. Issaħħaħ aktar il-qafas fiskali, anki billi tiżgura limiti massimi vinkolanti u li jistgħu jiġu infurzati fuq in-nefqa. Ittejjeb is-sostenibbiltà fit-tul tal-finanzi pubbliċi billi żżid il-kosteffettività tas-settur tal-kura tas-saħħa, partikolarment billi tirrazzjonalizza l-kura u l-immaniġġjar fl-isptarijiet u ssaħħaħ il-kura primarja.

2.

Ittejjeb l-effiċjenza tal-amministrazzjoni tat-taxxa billi ssaħħaħ il-kapaċità tagħha tal-awditjar, il-valutazzjoni tar-riskji u l-ġbir tad-dejn. Torbot il-bażi tat-tassazzjoni tal-proprjetà immobbli mal-valur tas-suq tal-proprjetà.

3.

Tindirizza b'mod aktar effettiv il-qgħad fit-tul permezz ta' miżuri ta' attivazzjoni, possibbiltajiet ripetuti għal edukazzjoni u taħriġ ta' kwalità individwalizzat. Issaħħaħ il-kapaċità tas-servizzi pubbliċi tal-impjieg għall-immaniġġar tal-każijiet, il-konsulenza personalizzata u l-attivazzjoni ta' min ikun qed ifittex xogħol, u ssaħħaħ r-rabta bejn l-attivazzjoni u l-għajnuna soċjali. Tindirizza b'mod effettiv il-qgħad fost iż-żgħażagħ billi ttejjeb l-intervent bikri, f'konformità mal-objettivi tal-garanzija għaż-żgħażagħ. Ittejjeb l-inċentivi għall-impjiegi tan-nisa, billi ssaħħaħ il-provvediment tal-faċilitajiet tal-indukrar tat-tfal, partikolarment għat-tfal taħt it-tliet snin.

4.

Tieħu miżuri biex iżżid il-kwalità tat-tagħlim sabiex ittejjeb l-eżiti edukattivi. Issaħħaħ il-provvediment tat-tagħlim abbażi tax-xogħol f'kumpanniji fl-edukazzjoni u t-taħriġ vokazzjonali. Tadatta l-akkredizzazzjoni, il-finanzjament u l-miżuri ta' governanza biex tħeġġeġ il-ħolqien ta' programmi fil-livell ta' baċelorat orjentati lejn ix-xogħol. Ittejjeb il-kwalità u r-rilevanza tal-bażi tax-xjenza u timplimenta pjanijiet biex trawwem it-trasferiment effettiv tal-għarfien u l-kooperazzjoni bejn l-akkademja, ir-riċerka u n-negozju. Tadotta miżuri sistemiċi biex ittejjeb l-aċċess għal edukazzjoni preskolastika u skolastika ta' kwalità għolja u inklużiva għall-komunitajiet emarġinati, fosthom ir-Rom u tieħu passi biex iżżid il-parteċipazzjoni usa' tagħhom fit-taħriġ vokazzjonali u l-edukazzjoni għolja.

5.

Iżżid l-isforzi biex is-suq tal-enerġija jaħdem aħjar, partikolarment billi żżid it-trasparenza pubblika tal-qafas regolatorju u billi tesplora x'qed jikkawża t-tariffi għolja tan-netwerk tal-elettriku b'mod partikolari tal-konsumaturi industrijali. Tibni fuq il-progress li sar sa issa, tiżviluppa aktar l-interkonnessjonijiet mal-pajjiżi ġirien, fosthom l-Ukraina, skont il-Memorandum ta’ Qbil iffirmat f'April.

6.

Tieħu miżuri, fosthom billi temenda l-Att dwar is-Servizz Ċivili, biex iżżid l-indipendenza tas-servizz pubbliku. Tadottat strateġija biex ittejjeb l-immaniġġar tar-riżorsi umani fl-amministrazzjoni pubblika. Iżżid l-isforzi biex issaħħaħ il-kapaċità analitika fil-ministeri ewlenin bil-għan li tadottat politiki bbażati fuq l-evidenza u ttejjeb il-kwalità tal-valutazzjoni tal-impatt tal-politika. Tieħu passi biex tiġġieled il-korruzzjoni u tħaffef l-isforzi biex ittejjeb l-effeċjenza u l-kwalità tas-sistema ġudizzjarja. Tintroduċi miżuri biex ittejjeb l-ambjent kummerċjali inkluż għall-SMEs. Iżżid l-isforzi biex ittejjeb l-effiċjenza tal-akkwist pubbliku.