15.5.2014   

MT

Il-Ġurnal Uffiċjali tal-Unjoni Ewropea

L 144/29

(1)

Fil-5 ta' Ġunju 2007, [l-ilmentatur] (*) ressaq ilment lill-Kummissjoni Ewropea dwar injezzjoni ta' kapital inizjali ta' EUR 150 miljun li minnha gawdiet il-kumpanija Ducroire (minn hawn 'il quddiem “SA Ducroire”) meta nħolqot f'Settembru 2004 mill-Office National du Ducroire (minn hawn 'il quddiem “l-ONDD”).

(2)

Permezz tal-ittra tas-7 ta' Diċembru 2007, il-Kummissjoni għamlet xi mistoqsijiet dettaljati lill-Belġju. It-tweġibiet għal dawn il-mistoqsijiet, li magħhom kienu mehmuża diversi dokumenti kif ukoll pjan ta' direzzjoni tan-negozju, wasslulha fit-12 ta' Frar 2008.

(3)

Fid-9 ta' Settembru 2008 saret laqgħa bejn l-ilmentatur u s-servizzi tal-Kummissjoni.

(4)

Il-Kummissjoni bagħtet verżjoni mhux kunfidenzjali tal-ilment lill-Belġju fl-4 ta' Diċembru 2008.

(5)

Verżjoni mhux kunfidenzjali tal-kummenti tal-Belġju kif ukoll mistoqsijiet speċifiċi ġew indirizzati lill-ilmentatur fit-12 u fis-17 ta' Diċembru 2008. L-ilmentatur wieġeb għalihom permezz ta' ittra tas-6 ta' Novembru 2009.

(6)

Saru mistoqsijiet ulterjuri lill-Belġju fil-21 ta' April 2010 li għalihom il-Belġju wieġbet fit-23 ta' Lulju 2010.

(7)

Fit-23 ta' Frar 2011, il-Kummissjoni ddeċidiet li tiftaħ il-proċedura ta' investigazzjoni formali prevista fl-Artikolu 108(2), tat-Trattat dwar il-Funzjonament tal-Unjoni Ewropea (minn hawn 'il quddiem “TFUE”) (3) fir-rigward tal-miżuri ta' għajnuna possibbli li ġejjin: (i) il-garanzija mill-Istat Belġjan li rċieva l-ONDD għar-riskji kummerċjabbli tiegħu; (ii) trasferiment intern wieħed jew diversi trasferimenti interni ta' riżorsi favur l-assigurazzjoni tar-riskji kummerċjabbli u (iii) il-kapital sottoskritt mill-ONDD favur attivitajiet ta' assigurazzjoni tar-riskji kummerċjabbli ta' SA Ducroire. Il-Kummissjoni stiednet lill-partijiet interessati jissottomettu l-kummenti tagħhom dwar il-miżuri inkwistjoni.

(8)

Saru żewġ laqgħat bejn l-awtoritajiet Belġjani, l-ONDD, SA Ducroire u s-servizzi tal-Kummissjoni fis-17 ta' Marzu 2011 u fit-28 ta' April 2011 rispettivament.

(9)

Fl-4 ta' Mejju 2011, l-awtoritajiet Belġjani talbu għal estensjoni ta' erba' ġimgħat tal-limitu ta' żmien għat-tweġiba għall-ftuħ tal-proċedura formali ta' investigazzjoni (minn hawn 'il quddiem “id-Deċiżjoni ta' ftuħ”). Fil-5 ta' Mejju 2011, il-Kummissjoni infurmat lill-awtoritajiet Belġjani li ma kellha l-ebda oġġezzjoni għat-talba ta' estensjoni taż-żmien u talbet aktar informazzjoni relatata mal-laqgħa tat-28 ta' April 2011.

(10)

Fl-1 ta' Ġunju 2011, l-awtoritajiet Belġjani taw it-tweġiba tagħhom għall-kummenti u l-mistoqsijiet magħmula mill-Kummissjoni fid-Deċiżjoni ta' ftuħ. L-annessi għat-tweġiba tagħhom intbagħtu fid-9 u fl-10 ta' Ġunju 2011.

(11)

Wara din it-tweġiba, il-Kummissjoni talbet aktar informazzjoni fis-27 ta' Lulju 2011.

(12)

Sabiex iħejju t-tweġiba tagħhom għall-mistoqsijiet tal-Kummissjoni, l-awtoritajiet Belġjani organizzaw żewġ laqgħat tekniċi mas-servizzi tal-Kummissjoni u l-benefiċjarju tal-miżuri ta' għajnuna, rispettivament fis-26 ta' Settembru u fit-18 ta' Ottubru 2011. Informazzjoni addizzjonali dwar it-temi diskussi f'dawn il-laqgħat intbagħtet mill-Belġju fl-14 ta' Novembru 2011.

(13)

Fil-5 ta' Diċembru 2011, l-awtoritajiet Belġjani bagħtu t-tweġiba tagħhom għall-mistoqsijiet tal-Kummissjoni tas-27 ta' Lulju 2011.

(14)

Fit-23 ta' April 2012 il-Kummissjoni talbet xi dettalji dwar l-informazzjoni differenti sottomessa, li l-awtoritajiet Belġjani pprovdew fis-16 ta' Mejju 2012.

(15)

Saret laqgħa bejn l-awtoritajiet Belġjani, l-ONDD, SA Ducroire u s-servizzi tal-Kummissjoni fil-21 ta' Mejju 2012, li warajha l-awtoritajiet Belġjani bagħtu aktar spjegazzjonijiet permezz tal-ittra tal-31 ta' Mejju 2012. Bl-ittra tal-14 ta' Ġunju 2012, l-awtoritajiet Belġjani tennew il-pożizzjoni tagħhom dwar il-miżura ta' allokazzjoni tal-kapital ikkontestata mill-Kummissjoni.

(16)

L-ONDD hija “istituzzjoni pubblika awtonoma” li topera fis-suq tal-assigurazzjoni tal-kreditu u li tibbenefika minn appoġġ u mill-garanzija tal-Istat Belġjan.

(17)

Sal-31 ta' Awwissu 2003, l-attivitajiet kollha mwettqa mill-ONDD kienu f'ismu stess, taħt il-garanzija tal-Istat. Ma kien hemm l-ebda kontijiet separati bejn l-attività ta' assigurazzjoni tal-kreditu ta' żmien qasir u u dik ta' żmien twil, lanqas f'dak li jirrigwarda r-riskji kummerċjabbli u dawk mhux kummerċjabbli. Il-komunikazzjoni tal-Kummissjoni lill-Istati Membri skont l-Artikolu 93(1) tat-Trattat KE li tapplika l-Artikoli 92 u 93 tat-Trattat lil assigurazzjoni ta' esportazzjonijiet bi kreditu ta' żmien qasir (minn hawn 'il quddiem “il-Komunikazzjoni dwar l-assigurazzjoni ta' esportazzjoni bi kreditu”) (4) tikkwalifika bħala kummerċjabbli r-riskji kummerċjali u politiċi ta' inqas minn sentejn, fuq debituri (5) stabbiliti f'wieħed mill-pajjiżi tal-Unjoni Ewropea jew f'ċerti pajjiżi membri tal-OECD, jiġifieri l-Awstralja, il-Kanada, l-Islanda, il-Ġappun, New Zealand, in-Norveġja, l-Isvizzera u l-Istati Uniti tal-Amerika (6).

(18)

Fl-1 ta' Settembru 2003, l-ONDD fetaħ kont “kummerċjali” li, skont l-awtoritajiet Belġjani, ma kienx igawdi mill-garanzija tal-Istat, li ġie allokat, minn dik id-data, għall-attività kollha relatata mar-riskji għal perjodu qasir. Kapital ta' EUR [45-70] miljun kien ġie allokat lil dan il-kont kummerċjali, biex b'hekk kiseb l-approvazzjoni tar-regolatur nazzjonali tal-assiguraturi, l-Office de Contrôle des Assurances (l-Awtorità Superviżorja tal-Assigurazzjonijiet — minn hawn 'il quddiem “l-OCA”). F'dan il-kont kummerċjali ma kinitx teżisti kontabilità separata bejn ir-riskji kummerċjabbli u dawk mhux kummerċjabbli.

(19)

F'Mejju 2004, l-ONDD iddeċieda li joħloq sussidjarja għall-attivitajiet eżistenti tiegħu ta' assigurazzjoni tal-kreditu ta' żmien qasir bil-ħolqien ta' SA Ducroire. Skont l-awtoritajiet Belġjani, id-deċiżjoni li tinħoloq SA Ducroire ittieħdet biex tiġi rrispettata l-Komunikazzjoni dwar l-assigurazzjoni ta' esportazzjoni bi kreditu li tistieden lill-Istati Membri sabiex jemendaw il-pjanijiet tagħhom għall-assigurazzjoni tal-kreditu għall-esportazzjoni sabiex l-aġenziji ta' assigurazzjoni tal-kreditu għall-esportazzjoni ma jibqgħux igawdu mill-appoġġ tal-Istat f'dak li jirrigwarda r-riskji meqjusa bħala “kummerċjabbli”.

(20)

Id-deċiżjoni li tinħoloq SA Ducroire u li tingħata kapital ta' EUR 150 miljun ittieħdet mill-Bord tad-Diretturi tal-11 ta' Mejju 2004 abbażi ta' pjan ta' direzzjoni tan-negozju mfassal mill-ONDD għall-2005-2007 li fih ġew meqjusa żewġ xenarji: xenarju A) definit bħala “realistiku”, ibbażat fuq il-klima ekonomika u msejjes fuq tkabbir tal-ammonti assigurati bi 3 %; u xenarju B) definit bħala “dinamiku”, ibbażat fuq approċċ proattiv f'termini ta' konkwista tas-suq imsejjes fuq ipotesi ta' tkabbir id-doppju ta' dak tax-xenarju realistiku, jiġifieri ta' 6 % (7).

(21)

SA Ducroire ġiet stabbilita fit-23 ta' Settembru 2004, data li fiha l-ONDD issottoskriva EUR 150 miljun għall-kapital ta' din il-kumpanija, li minnhom EUR 100 miljun ġew rilaxxati minnufih filwaqt li l-EUR 50 miljun li kien fadal ġew rilaxxati fl-2009.

(22)

Fl-1 ta' Jannar 2005, l-ONDD ittrasferixxa l-portafoll tiegħu ta' riskji għal żmien qasir lil SA Ducroire li tat bidu għall-attivitajiet tagħha minn dik id-data. Min-naħa tiegħu l-ONDD kompla jaħdem fuq ir-riskji għal żmien twil.

(23)

Għalhekk, SA Ducroire tamministra r-riskji kummerċjabbli kollha skont it-tifsira tal-Komunikazzjoni dwar l-assigurazzjoni għall-esportazzjoni bi kreditu (li, b'definizzjoni, huma għal żmien qasir) kif ukoll ir-riskji mhux kummerċjabbli għal żmien qasir, bħar-riskji ta' inqas minn sentejn relatati ma' debituri stabbiliti barra l-OECD.

(24)

Fl-2007, SA Ducroire akkwistat 33 % tal-kapital ta' Komerčni ύvěrová pojišt'ovna EGAP (KUP) (il-fergħa kummerċjali tal-aġenzija nazzjonali Ċeka tal-assigurazzjoni tal-kreditu għall-esportazzjoni) għas-somma ta' EUR [12-14]-il miljun. Dan l-akkwist kien sar flimkien ma' SACE BT, li kienet akkwistat ukoll 33 % tal-kapital ta' KUP. Fl-2009, SA Ducroire akkwistat l-ishma kollha ta' SACE BT fil-kapital ta' KUP għas-somma ta' EUR [0-20] miljun. SA Ducroire b'hekk akkwistat 66 % tal-kapital ta' KUP għal ammont totali ta' EUR [10-35] miljun. Minn dan l-aħħar ammont EUR 12-il miljun wara ġew irreġistrati bħala deprezzament fuq il-holding (aġġustament negattiv tal-valur tal-investiment).

(25)

Fil-5 ta' Ġunju 2007, tressaq ilment lill-Kummissjoni. Skont l-ilmentatur, l-ONDD għamel l-allokazzjoni tal-kapital f'kundizzjonijiet li investitur privat ma kienx jipprovdi. Minn naħa, ir-redditu ta' SA Ducroire, kif mistennija bl-injezzjoni tal-kapital huwa inqas minn dak mistenni minn investitur privat. Min-naħa l-oħra, il-kapital allokat lil SA Ducroire kien jaqbeż il-kapital meħtieġ, kemm f'termini ta' regoli prudenzjali dwar l-ekwità minima adegwata kif ukoll fir-rigward tal-medja tal-proporzjon ta' solvenza (primjums netti/ekwità) tal-parteċipanti l-oħrajn fis-settur. Skont l-ilmentatur, kien biss permezz tal-“kapitalizzazzjoni żejda” fl-2004 li SA Ducroire u SACE BT setgħu jitfgħu, matul it-tieni nofs tal-2006, offerta konġunta “imbattibbli” għax-xiri ta' 66 % tal-ishma ta' KUP.

(26)

L-investigazzjoni li nbdiet fit-23 ta' Frar 2011 tirrigwarda l-miżuri li ġejjin:

(27)

Fir-rigward tal-Miżura 3, id-deċiżjoni tal-ftuħ waslet għall-konklużjoni li l-partijiet li ġejjin tal-allokazzjoni tal-kapital lil SA Ducroire ma jikkostitwixxux għajnuna (8):

(28)

L-għajnuna ġdida possibbli inkwistjoni (Miżura 3) tirrigwarda biss il-parti tal-kapital allokat lil SA Ducroire li ma tappoġġjax l-attività ta' assigurazzjoni tal-kreditu tar-riskji mhux kummerċjabbli u li taqbeż il-parti tal-kapital li kienet diġà ta' benefiċċju għall-attività relatata mar-riskji kummerċjabbli fi ħdan l-ONDD fil-31 ta' Diċembru 2004 (eżatt qabel it-trasferiment tal-attivitajiet ta' assigurazzjoni tar-riskji fuq żmien qasir lil SA Ducroire).

(29)

Għall-finijiet ta' din id-deċiżjoni, japplikaw dawn id-definizzjonijiet li ġejjin:

(30)

Il-kapital addizzjonali jinkludi għalhekk b'mod partikolari l-kapital supplimentari (ara l-grafika fil-premessa (141)).

(31)

Fid-deċiżjoni ta' ftuħ, il-Kummissjoni assumiet l-eżistenza ta' kapital addizzjonali u supplimentari sostanzjali minħabba d-disparità bejn il-kapital ta' EUR 150 miljun mogħti lil SA Ducroire meta nħolqot u l-kapital ta' EUR [45-70] miljun allokati fi ħdan l-ONDD fil-kont kummerċjali ddedikat, mill-1 ta' Settembru 2003 sal-31 ta' Diċembru 2004, għall-attività relatata mar-riskji fuq żmien qasir, li kienet tinkludi r-riskji kummerċjabbli. Il-Kummissjoni għalhekk indikat li kien jidher li jeżisti kapital addizzjonali u supplimentari u li r-redditu mistenni tiegħu ma kienx jidher suffiċjenti.

(32)

In-nuqqas tal-ONDD u ta' SA Ducroire li jikkonformaw mal-punt 4.3 tal-Komunikazzjoni dwar l-assigurazzjoni ta' esportazzjoni bi kreditu (ara l-premessi (17) u (19)), jiġifieri li jkollhom amministrazzjoni u kontabilità separata li tiddistingwi bejn ir-riskji kummerċjabli u r-riskji mhux kummerċjabbli, għamilha impossibbli għall-Kummissjoni li tidentifika bi preċiżjoni l-kobor tal-“kapital supplimentari” fl-istadju tal-ftuħ tal-proċedura ta' investigazzjoni formali. Għalhekk fid-deċiżjoni tal-ftuħ tagħha, il- Kummissjoni stiednet lill-awtoritajiet Belġjani sabiex jikkonformaw mal-punt 4.3 tal-Komunikazzjoni dwar l-assigurazzjoni ta' esportazzjoni bi kreditu u jindikaw il-partijiet tal-kapital li kienu jsostnu rispettivament l-attività tar-riskji mhux kummerċjabbli fuq żmien qasir u l-attività tar-riskji kummerċjabbli, qabel u wara t-trasferiment tagħhom lil SA Ducroire.

(33)

Il-Kummissjoni ma rċeviet l-ebda kumment mill-partijiet interessati, fl-iskadenzi stabbiliti, dwar il-ftuħ tal-proċedura.

(34)

Il-Belġju ddikjara li l-ONDD dejjem iffoka fuq ir-riskji mhux kummerċjabbli u l-prevalenza ta' dawn ir-riskji fil-portafoll tiegħu kienet kostanti. Wara l-1993 (11) u qabel l-adeżjoni tal-għaxar Stati Membri ġodda tal-Unjoni Ewropea (UE) f'Mejju 2004, l-attività relatata mar-riskji kummerċjabbli fi ħdan l-ONDD kienet żgħira ħafna. Fl-aħħar tal-2003, il-primjums relatati ma' din l-attività kienu jammontaw biss għal madwar [0-1 %] tal-portafoll tar-riskju fuq żmien qasir u l-ammonti assigurati kienu jammontaw biss għal madwar EUR […] miljun (ara t-Tabella 1 hawn taħt). Għandu jkun innutat li l-perċentwal baxx ħafna ta' riskji kummerċjabbli li dak iż-żmien kien kopert, kien kopert biss minħabba r-rabta ta' dawn ir-riskji ma' riskju mhux kummerċjabbli (12).

(35)

Kien biss mill-1 ta' Mejju 2004, fi żmien l-adeżjoni tal-għaxar Stati Membri ġodda fl-Unjoni Ewropea, li l-bilanċ bejn ir-riskji kummerċjabbli u r-riskji mhux kummerċjabbli fuq żmien qasir inbidel fi ħdan il-portafoll tal-ONDD peress li s-sehem tar-riskji kummerċjabbli fil-portafoll tal-ONDD għadda minn [0-1 %] (f'termini ta' primjums) fl-2003 għal [15-20 %] fl-2004 (ara t-Tabella 1 hawn taħt). Din il-bidla kienet ir-riżultat ta' ċaqliq awtomatiku tal-kategorija mhux kummerċjabbli lejn il-kategorija kummerċjbbli tar-riskji fuq żmien qasir marbuta mad-debituri stabbiliti fl-għaxar Stati Membri ġodda tal-Unjoni Ewropea.

(36)

F'dak li jirrigwarda l-Miżura 1, l-awtoritajiet Belġjani żiedu wkoll li l-garanzija tal-Istat Belġjan ġiet diżattivata mill-1 ta' Settembru 2003 fir-rigward tar-riskji kummerċjabbli minħabba t-trasferimenti tagħhom fil-kont kummerċjali li għalih l-ONDD kiseb l-approvazzjoni tal-OCA (13), preċiżament minħabba li dan il-kont ma kienx igawdi mill-garanzija tal-Istat (l-attivitajiet li jgawdu mill-garanzija tal-Istat mhumiex irregolati mill-OCA).

(37)

F'dak li jirrigwarda t-trasferimenti interni possibbli tar-riżorsi favur ir-riskji kummerċjabbli fi ħdan l-ONDD, l-awtoritajiet Belġjani jargumentaw li minħabba ċ-ċokon tal-attività tar-riskji kummerċjabbli, kwalunkwe trasferiment ta' riżorsi kien inkonċepibbli u fi kwalunkwe każ ikun de minimis  (14).

(38)

L-awtoritajiet Belġjani jikkonkludu li għall-Miżura 1 u għall-Miżura 2, l-ammonti involuti huma fi kwalunkwe każ de minimis  (15).

Tabella 1:

L-evoluzzjoni tal-primjums u tal-ammonti assigurati għar-riskji kummerċjabbli u mhux kummerċjabbli għal perjodu qasir (poloz globali esportaturi — għal mien qasir)

(39)

Sabiex jiġġustifikaw li l-kapital allokat mill-ONDD lil SA Ducroire kien meħtieġ u kien jissodisfa l-kriterju tal-investitur privat, l-awtoritajiet Belġjani ressqu l-argumenti li ġejjin: (1) it-tranżazzjoni għandha tkun analizzata fil-kuntest tagħha, dak ta' trasferiment ta' attività eżistenti fil-forma ta' ħolqien ta' sussidjarja, (2) il-kontribuzzjoni f'kapital hija ġġustifikata abbażi tar-regoli ta' solvenza, (3) ir-redditu mistenni tal-attivitajiet kummerċjabbli ta' SA Ducroire kien biżżejjed biex jikkonvinċi lil investitur privat fl-ekonomija tas-suq jagħmel dan l-investiment.

(40)

L-awtoritajiet Belġjani jqisu li l-kontribuzzjoni f'kapital għandha tiġi evalwata fil-kuntest tagħha li huwa dak ta' trasferiment ta' attività eżistenti. L-attività kollha mqiegħda f'SA Ducroire meta nħolqot kienet tikkorrispondi purament għal trasferiment tal-portafoll tal-attivitajiet fuq perjodu qasir tal-ONDD.

(41)

Għal dan il-għan, l-awtoritajiet Belġjani jiddikjaraw li l-entrati kollha tal-karta tal-bilanċ tal-kont kummerċjali relatati mal-attività kummerċjali ġew trasferiti fil-karta tal-bilanċ tal-ftuħ ta' SA Ducroire. Fuq in-naħa tal-assi, ir-riċevibbli direttament marbuta mal-poloz tal-assigurazzjoni diġà fil-portafoll biss ġew trasferiti (l-investimenti ma ġewx trasferiti). Fuq in-naħa tal-obbligazzjonijiet, l-entrati trasferiti jirrigwardaw biss dawk marbuta mal-portafoll tal-assigurazzjoni eżistenti u jeskludu għalhekk il-kapital, ir-riżervi u l-provvedimenti ta' ugwalizzazzjoni u d-diżastri (18). L-awtoritajiet Belġjani jenfasizzaw li l-EUR [45-70] miljun allokati fil-kont kummerċjali mhumiex trasferiti lil SA Ducroire peress li l-identifikazzjoni tal-ammont tal-kapital kienet soġġetta għal evalwazzjoni speċifika.

(42)

L-awtoritajiet Belġjani jsostnu li l-kapital allokat għall-kont kummerċjali mhuwiex paragun rilevanti biex wieħed jivvaluta l-ħtiġijiet ta' kapital ta' SA Ducroire. Il-ħtieġa ta' kapital tal-kont kummerċjali kienet stmata permezz tal-applikazzjoni mekkanika tar-regoli tad-Direttiva 2002/13/KE tal-Parlament Ewropew u tal-Kunsill tal-5 ta' Marzu 2002 li temenda d-Direttiva 73/239/KEE tal-Kunsill fir-rigward tal-ħtiġiet tal-marġini ta' solvenza għal intrapriżi ta' assigurazzjoni mhux tal-ħajja (19) (minn hawn 'il quddiem “Direttiva Solvenza I”) li jikkorrispondu għar-regoli prudenzjali biex tinkiseb l-approvazzjoni tal-OCA għall-attività fuq żmien qasir peress li din ma baqgħetx tgawdi mill-garanzija tal-Istat, iżda dan il-kapital mhuwiex il-kapital ekonomiku meħtieġ biex ikopri l-profil tar-riskju ta' din l-attività.

(43)

Skont l-awtoritajiet Belġjani, hemm differenza bejn l-imġiba ta' investitur privat li jfittex ir-redditu ta' investiment ġdid u impriża ewlenija li toħloq sussidjarja għall-attivitajiet eżistenti tagħha. Li jiġi ġġudikat mod ieħor jista' skont l-awtoritajiet Belġjani jġiegħel lil kumpanija pubblika tbigħ jew twaqqaf attività ekonomika jekk din ma jkollhiex redditu biżżejjed għal investitur privat f'ekonomija tas-suq, li jkun ksur tal-prinċipju tan-newtralità tal-kapital pubbliku stabbilit fl-Artikolu 345 tat-TFUE.

(44)

L-awtoritajiet Belġjani jsostnu li fl-2004, żewġ metodi setgħu jiġu kkunsidrati sabiex jiġu ddeterminati l-ħtiġijiet ta' kapital tal-assiguraturi tal-kreditu: (a) il-metodu klassiku tas-settur tal-assigurazzjoni inġenerali, stabbilit mid-Direttiva Solvenza I u li huwa bbażat fuq ir-remunerazzjoni tar-riskji (jiġifieri l-primjums — “premium based approach”) u (b) il-metodu bbażat fuq ir-riskji involuti (“exposure based approach”), bħal pereżempju l-metodu tar-regoli ta' Basel applikati fis-settur bankarju u l-metodu Standard & Poor's għad-determinazzjoni tal-kapital meħtieġ għal assiguratur tal-kreditu.

(45)

Fil-każ ta' SA Ducroire, l-awtoritajiet Belġjani jqisu li l-metodu previst mid-Direttiva Solvenza I ma jirriflettix biżżejjed il-profil finanzjarju globali ta' assiguratur.

(46)

Skont id-Direttiva Solvenza I, il-ħtieġa tal-marġini ta' likwidità hija ugwali għall-ogħla ammont bejn żewġ riżultati, wieħed ibbażat fuq l-ammont annwali tal-primjums jew kontribuzzjonijiet, u l-ieħor fuq il-piż medju tal-pretensjonijiet għall-aħħar tliet snin finanzjarji. Madankollu, il-limitu minimu assolut huwa ta' EUR 3 miljun għas-snin 2004 sal-2006 u ta' EUR 3,2 miljun għas-snin 2007 sal-2009.

(47)

L-applikazzjoni ta' dawn ir-regoli mill-ONDD twassal għal livell ta' kapital minimu għal SA Ducroire ta' madwar EUR 3 sa 3,3 miljun  (20), bejn l-2005 u l-2007, fuq il-bażi tal-informazzjoni tal-pjan ta' direzzjoni tan-negozju (ara t-Tabella 2: hawn taħt).

(48)

Il-Belġju ssostni li l-ħtiġijiet ta' kapital tal-assiguraturi tal-kreditu jiddependu aktar fuq ir-riskji involuti milli fuq ir-remunerazzjoni tar-riskji (il-primjums) u li l-metodoloġiji bbażati fuq ir-riskji involuti (“exposure based approach”) (bħal pereżempju l-Artikolu 8 tal-Liġi tal-1939 dwar l-ONDD, il-metodu Standard & Poor's, jew il-metodu tar-regoli ta' Basel użati fis-settur bankarju) huma aktar adattati mid-Direttiva Solvenza I, ibbażata fuq ir-remunerazzjoni tar-riskji (“premium based approach”).

(49)

Skont l-awtoritajiet Belġjani, il-portafoll tar-riskji assigurati minn SA Ducroire mhux tas-soltu peress li, għall-kuntrarju tal-parti l-kbira tal-kompetituri tagħha, hija tkopri l-aktar riskji mhux kummerċjabbli fis-sens tal-Komunikazzjoni dwar l-assigurazzjoni ta' esportazzjoni bi kreditu. Il-livell ta' riskju assoċjat ma' portafoll bħal dan huwa sostanzjalment ogħla minn dak ta' portafoll esklussivament jew parzjalment magħmul minn riskji kummerċjabbli u jiġġustifika skont il-Belġju l-użu ta' regoli aktar prudenti.

(50)

L-awtoritajiet Belġjani jqisu l-applikazzjoni tal-Artikolu 8 tal-Liġi tal-31 ta' Awwissu 1939 dwar l-ONDD (21) (minn hawn 'il quddiem il-“Liġi tal-1939”) xierqa f'dan il-każ minħabba li hija ispirata mill-“exposure based approach”. Huwa importanti li wieħed jinnota li l-Artikolu 8 tal-Liġi tal-1939 ma għandu l-ebda ambitu regolatorju għal SA Ducroire minħabba li japplika biss għall-ONDD.

(51)

Barra minn hekk, għalkemm l-Artikolu 8 jindika l-ammont massimu tal-impenji tal-ONDD li jirriżultaw mill-attivitajiet tiegħu f'ismu stess bil-garanzija tal-Istat kif ukoll minn dawk f'isem l-Istat, l-awtoritajiet Belġjani jikkunsidraw li l-Artikolu 8 tal-Liġi tal-1939 jikkostitwixxi punt ta' referenza minimu għal SA Ducroire, li ma tgawdix minn garanzija tal-Istat.

(52)

Bl-applikazzjoni tal-Artikolu 8(1) tal-Liġi tal-1939  (22), li jindika li l-impenji ma jistgħux jaqbżu 20 darba l-ammont totali tal-allokazzjoni u tar-riżerva ġenerali, l-awtoritajiet Belġjani jistmaw (23) il-ħtieġa ta' kapital ta' SA Ducroire għal madwar EUR 92 sa 106 miljun bejn l-2005 u l-2007 abbażi tal-pjan ta' direzzjoni tan-negozju, (ara t-Tabella 2: hawn taħt).

(53)

Fil-kummenti tagħhom, l-awtoritajiet Belġjani jirreferu għall-metodu żviluppat minn Standard & Poor's sabiex jiddeterminaw il-kapital meħtieġ minn assiguratur tal-kreditu.

(54)

Biex jiġi stabbilit il-livell ta' dan il-kapital (24), Standard & Poor's jużaw mudell ibbażat fuq ir-riskji involuti (“exposure based approach”) flimkien ma' valutazzjoni tar-riassigurazzjoni tal-assiguratur. Il-kapital meħtieġ huwa ddeterminat skont metodoloġija li tqabbel il-pretensjonijiet grossi mal-ammonti assigurati grossi (“the gross loss over gross exposure method”) fuq perjodu ta' (normalment) 10 snin. L-ogħla proporzjon matul dan il-perjodu huwa mmultiplikat b'fattur ta' 1,25 u applikat għall-ammonti assigurati proġettati u aġġustati sabiex jirriflettu r-riassigurazzjoni. Il-mudell huwa bbażat fuq l-ipoteżi li l-portafoll tal-assiguratur huwa raġonevolment diversifikat tajjeb ġeografikament u skont il-linja tan-negozju (“line of business”).

(55)

Għalkemm jirreferu għalih, l-awtoritajiet Belġjani ma użawx il-metodu ta' Standard & Poor's sabiex jiddeterminaw il-livell tal-kapital meħtieġ għal SA Ducroire.

(56)

Skont l-awtoritajiet Belġjani, ir-regoli ta' Basel huma aktar adattati sabiex wieħed jivvaluta s-solvenza tal-assiguraturi tal-kreditu milli r-regoli prudenzjali fis-seħħ, jiġifieri d-Direttiva LikwidtàI. In-natura tal-attivitajiet tal-assiguraturi tal-kreditu u l-prinċipju ta' prekawzjoni jiġġustifikaw l-użu tar-regoli ta' Basel. Skont l-awtoritajiet, l-assigurazzjoni tal-kreditu tixbaħ lill-attività ta' kreditu tal-banek fil-livell tar-riskju tal-kontroparti (l-aktar ir-riskju ta' nuqqas ta' ħlas mid-debitur). Barra minn hekk, l-attività ta' SA Ducroire, għall-kuntrarju ta' dik ta' assiguraturi ta' kreditu oħrajn privati, tinkludi essenzjalment riskji ta' kreditu fuq debituri li jinsabu f'pajjiżi inqas żviluppati jew pajjiżi emerġenti (riskji li jinsabu fiż-Żona 2 (25)).

(57)

Għalhekk, skont l-awtoritajiet Belġjani, il-proporzjon ta' Cooke tar-regoli prudenzjali ta' Basel I li jeħtieġ kapitalizzazzjoni minima ugwali għal 8 % tal-impenji netti, huwa aktar xieraq biew wieħed jevalwa s-solvenza tal-assiguraturi tal-kreditu.

(58)

Jidher mill-minuti tal-Bord tad-Diretturi tal-ONDD tal-20 ta' April 2004 li dan tal-aħħar ibbaża fuq il-proporzjon ta' Cooke sabiex jiddetermina l-kapital meħtieġ għal SA Ducroire waqt li fl-istess ħin ikkunsidra l-ħtieġa li jipprovdi lill-kumpanija b'responsabbiltà limitata kredibbiltà suffiċjenti fil-konfront tal-kompetituri tagħha.

(59)

Fil-fatt, il-proporzjon magħżul mill-awtoritajiet Belġjani fil-kalkoli mhuwiex ta' 8 % kif preskritt mir-regoli ta' Basel I iżda ta' 10 % sabiex jipprovdu bafer ta' sigurtà.

(60)

Il-kapital iddeterminat b'dan il-mod mill-ONDD għal SA Ducroire u kif indikat (26) fil-pjanijiet finanzjarji sottomessi lir-regolatur u fin-nota ta' informazzjoni tal-20 ta' April 2004 li fuq il-bażi tagħha l-Bord tad-Diretturi ta l-kunsens tiegħu fil-prinċipju għall-ħolqien ta' SA Ducroire b'kapital sottoskritt ta' EUR 150 miljun, kien ta' madwar EUR 68 sa 74 miljun għal tmiem l-2006, (ara t-Tabella 2: hawn taħt). Is-suppożizzjonijiet magħmula kienu jinkludu biss il-kopertura tar-riskji li jinsabu fiż-Żona 2 u fl-għaxar pajjiżi li ssieħbu fl-Unjoni Ewropea f'Mejju 2004.

(61)

Għall-kuntrarju, fin-nota tal-istrateġija tat-28 ta' Settembru 2004 (27), il-kapital stmat mill-ONDD skont il-proporzjon ta' Cooke (10 % tal-impenji netti), bejn l-2005 u l-2007, kien ta' madwar EUR 74 sa 101 miljun. Għall-kuntrarju tal-projezzjonijiet finanzjarji tan-nota ta' April 2004, il-projezzjonijiet finanzjarji ta' Settembru 2004 kienu jinkludu l-kopertura tar-riskji kollha fuq żmien qasir, biex b'hekk kienu jinkorporaw iż-Żoni 1 u 2 kollha. F'din in-nota ġie konkluż li “kapital imħallas ta' EUR 100 miljun huwa biżżejjed biex titwettaq l-attività fuq żmien qasir ta' poloz globali għall-esportaturi sal-2007 iżda wara dan il-perjodu jkollu jiġi rivedut”.

(62)

L-awtoritajiet Belġjani jikkunsidraw li l-applikazzjoni tal-proporzjon ta' Cooke mhijiex metodu xieraq biex wieħed jaqsam il-ħtiġijiet ta' kapital bejn l-attività kummerċjabbli u l-attività mhux kummerċjabbli, peress li l-metodu tal-proporzjon ta' Cooke, li jiġi applikat għall-ammonti tal-impenji, joħloq ċerta linearità peress li ma jikkunsidrax biżżejjed il-varjetà tad-diversi riskji sottostanti.

(63)

Ir-regoli tas-Solvenza II ġejjin mid-Direttiva 2009/138/KE tal-Parlament Ewropew u tal-Kunsill tal-25 ta' Novembru 2009 dwar il-bidu u l-eżerċizzju tan-negozju tal-assigurazzjoni u tar-riassigurazzjoni (28) (minn hawn 'il quddiem “Direttiva Solvenza II”).

(64)

Biex titħaddem id-diviżjoni tal-ħtiġijiet ta' kapital bejn l-attivitajiet kummerċjabbli minn naħa u dawk mhux kummerċjabbli min-naħa l-oħra, l-ONDD żviluppa fl-2011 metodoloġija li huwa jqis aktar xierqa. Din hija l-formula standard ta' Solvenza II (29), żviluppata bħala parti mill-Quantitative Impact Study 5 (QIS 5), akkumpanjata minn mudell intern tal-ħtieġa ta' kapital li jkopri r-riskju politiku u kkalibrat sabiex jissodisfa solvenza ugwali għal rating A u applikata bil-parametri korrispondenti għall-2004.

(65)

Skont l-awtoritajiet Belġjani, wieħed jista' raġonevolment iqis li investitur privat prudenti kien jibbaża ruħu fuq din il-metodoloġija fl-2004.

(66)

Il-formula standard ta' Solvenza II QIS 5 ġiet applikata mill-ONDD għar-riskji kollha minbarra r-riskji politiċi. Skont l-awtoritajiet Belġjani, ir-riskju politiku fl-assigurazzjoni tal-kreditu jixbaħ lil forma ta' riskju ta' katastrofi. Madankollu, skont l-awtoritajiet Belġjani, ir-riskju ta' katastrofi għall-assigurazzjoni tal-kreditu mhijiex koperta tajjeb bil-formula standard ta' Solvenza II QIS 5. Għaldaqstant, fil-fehma tagħhom, huwa ġġustifikat li wieħed juża mudell intern għall-istima tal-ħtieġa ta' kapital tar-riskji politiċi.

(67)

Skont dan il-metodu, il-ħtieġa ta' kapital ta' SA Ducroire hija stmata (30) għal madwar EUR 80 sa 99 miljun, bejn l-2005 u l-2007, u għal madwar EUR [125-150] miljun fl-2009 abbażi tal-pjan ta' direzzjoni tan-negozju (ara t-Tabella 2: hawn taħt). Il-parti l-kbira ta' din il-ħtieġa ta' kapital ġejja mill-kopertura tar-riskju politiku.

(68)

Wara talba mill-Kummissjoni, l-awtoritajiet Belġjani stmaw il-ħtieġa ta' kapital ta' SA Ducroire bl-applikazzjoni tal-formula standard ta' Solvenza II QIS 5 għal kull tip ta' riskju (inkluż ir-riskju politiku). F'dan il-każ, il-ħtieġa ta' kapital ta' SA Ducroire hija (31) inqas minn EUR 23 sa 25 miljun bejn l-2005 u l-2007 u inqas minn EUR [25-50] miljun għall-2009 (ara t-Tabella 2: hawn taħt).

Tabella 2:

Determinazzjoni tal-kapital ta' SA Ducroire mill-ONDD/l-awtoritajiet Belġjani għas-snin 2005, 2007 u 2009 skont żewġ xenarji ta' tkabbir u skont metodi differenti

(69)

Fil-kummenti tiegħu tas-16 u tal-31 ta' Mejju 2012, l-ONDD qal li, wara d-deċiżjonijiet strateġiċi meħuda bejn l-2007 u l-2009 (pereżempju, tibdil fl-istrateġija tar-riassigurazzjoni, tibdil fil-parametri tar-riskji tal-portafoll tar-riskji mhux kummerċjabbli) li ma kinux previsti fil-pjan strateġiku tiegħu tal-2004, saru xi trasferimenti interni tal-kapital min-negozju mhux kummerċjabbli għan-negozju kummerċjabbli.

(70)

Skont l-awtoritajiet Belġjani, l-injezzjoni ta' kapital inizjali tal-ONDD meta nħolqot SA Ducroire tissodisfa l-kriterju tal-investitur privat f'ekonomija tas-suq.

(71)

Fin-nota ta' April 2004, l-ONDD assuma, skont ix-xenarju 1B ibbażat fuq tkabbir tal-attivitajiet ta' 6 %, rata ta' redditu azzjonarju (“return on equity” jew “ROE”) ta' 1,3 % sa 1,5 % għall-ewwel tliet snin ta' attività ta' SA Ducroire (2005, 2006, u 2007) inklużi l-provvedimenti ta' ugwalizzazzjoni, u ta' 2,2 % sa 2,9 % għal dawn l-istess snin mingħajr il-provvedimenti ta' ugwalizzazzjoni.

Tabella 3:

Projezzjonijiet finanzjarji ta' April 2004 (ambitu: Żona 1 “10 pajjiżi msieħba” + Żona 2)

(72)

Fin-nota ppreżentata lill-Bord tad-Diretturi tiegħu tat-28 ta' Settembru 2004 — jiġifieri wara l-ħolqien ta' SA Ducroire fit-23 ta' Settembru 2004 — l-ONDD assuma, skont ix-xenarju “dinamiku — tkabbir ta' 6 %”, ROE ta' 1,3 % sa 1,9 % għat-tliet snin 2005, 2006, u 2007 inklużi l-provvedimenti ta' ugwalizzazzjoni, u ta' 2,8 % sa 4,3 % għal dawn l-istess snin mingħajr provvedimenti ta' ugwalizzazzjoni. Il-projezzjonijiet finanzjarji ta' Settembru 2004 jippreżentaw riżultati kemxejn differenti minn dawk ta' April 2004 peress li dawk ta' Settembru 2004 huma bbażati fuq firxa ta' attivitajiet usa' (iż-Żona 1 kollha). Barra minn hekk ċerti suppożizzjonijiet kienu riveduti f'Settembru 2004.

Tabella 4:

Projezzjonijiet finanzjarji — Settembru 2004 (ambitu: Żona 1 u Żona 2 kollha)

(73)

Għall-kuntrarju tan-nota ta' April 2004, l-ROE huwa kkalkulat abbażi ta' EUR 100 miljun ta' kapital imħallas, mingħajr ma ġew ikkunsidrati l-EUR 50 miljun supplimentari investiti iżda mhux imħallsa.

(74)

F'dak li jirrigwarda l-ROE mistenni għall-attività tar-riskji kummerċjabbli, l-awtoritajiet Belġjani spjegaw li t-tqassim kif stipulat fin-nota tal-istrateġija ppreżentata lill-Bord tad-Diretturi tat-28 ta' Settembru 2004 (36) ma għandux ikun ikkunsidrat għall-analiżi tar-redditu mill-attivitajiet kummerċjabbli u mhux kummerċjabbli. L-awtoritajiet Belġjani spjegaw (37) li dawn il-projezzjonijiet huma assurdi, peress li l-livell ta' pretensjonijiet kien stmat għoli żżejjed għar-riskji li saru kummerċjabbli fl-2004, filwaqt li ma ġietx ikkunsidrata l-possibbiltà għal assiguratur li jaġġusta l-primjums f'każ ta' ammont kbir ta' pretensjonijiet li fil-fatt kien osservat. L-awtoritajiet Belġjani jfakkru li l-Bord tad-Diretturi tal-ONDD ma bbażax ruħu fuq it-tqassim magħmul fl-Anness 9 tan-nota strateġika sabiex jiddeċiedi l-livell ta' kapitalizzazzjoni ta' SA Ducroire.

(75)

Għalhekk dawn il-projezzjonijiet tal-2004 ma servewx ta' bażi għat-tqassim tal-projezzjonijiet tar-riskji kummerċjabbli u mhux kummerċjabbli ppreżentati lill-Kummissjoni f'Ġunju 2011. Il-kummenti ta' Ġunju 2011, min-naħa tagħhom, kienu bbażati fuq l-istorja ta' qabel l-2004 u fuq il-prestazzjoni tal-kompetituri ta' SA Ducroire f'dak iż-żmien. Il-Belġju jemmen li l-approċċ użat fil-kummenti ta' Ġunju 2011 jirrifletti aħjar ir-raġunamenti li seta' segwa investitur privat fl-2004, u fl-istess waqt jibqa' konsistenti mar-riżultat ikkonsolidat.

(76)

Fil-kummenti tagħhom ta' Ġunju 2011, l-awtoritajiet Belġjani stmaw ir-redditu għall-attivitajiet kummerċjabbli meta mqabbel mal-kapital allokat għal din l-attività skont il-mudell ta' Solvenza II (formula standard QIS 5 u mudell intern), metodu li ġie żviluppat ex post wara t-talba tal-Kummissjoni. Għandu jiġi nnutat li d-differenza bejn l-ammont tal-kapital minimu skont dan il-mudell, jiġifieri EUR 82 miljun, u l-kapital effettivament imħallas ta' EUR 100 miljun ġie allokat lill-attività kummerċjabbli u mhux kummerċjabbli b'mod proporzjonat mas-sehem rispettiv tagħhom fil-kapital minimu ta' EUR 82 miljun. Minn dan jirriżulta li l-kapital “aġġustat” stmat mill-ONDD għar-riskji kummerċjabbli jammonta għal EUR 9,8 miljun għall-2005 (38) (ara t-Tabella 5 hawn taħt).

(77)

Abbażi tal-projezzjonijiet finanzjarji riveduti u ppreżentati mill-awtoritajiet Belġjani fl-2011 u l-istimi tagħhom tal-kapital allokat għall-attività relatata mar-riskji kummerċjabbli kif spjegat fil-premessa (76), ir-redditu mill-attività tar-riskji kummerċjabbli għall-2005-2007, kif stabbilit mill-awtoritajiet Belġjani huwa ppreżentat hawn taħt:

Tabella 5:

Projezzjonijiet finanzjarji kkalkulati mill-ġdid fl-2011 (39)

(78)

L-ROE huwa kkalkulat mill-awtoritajiet Belġjani fuq il-bażi ta' EUR 100 miljun ta' kapital imħallas, mingħajr ma jiġu kkunsidrati l-EUR 50 miljun supplimentari investiti iżda mħallsa biss fl-2009.

(79)

Għad-dubju mqajjem fid-deċiżjoni tal-ftuħ li investitur privat jitlob remunerazzjoni fuq il-kapital mhux imħallas minħabba li jitilfu f'każ ta' falliment, l-awtoritajiet Belġjani wieġbu li huma jkomplu jsostnu l-pożizzjoni tagħhom, jiġifieri li l-kapital ta' EUR 50 miljun ma għandux jiġi kkunsidrat fil-kalkolu tal-profittabbiltà sakemm ikun effettivament imħallas. Fil-fehma tagħhom, il-falliment (jekk wieħed jissupponi li dan jirriżulta f'talba għall-bilanċ tal-kapital sottoskritt) ikollu biss l-effett li jnaqqas it-tul ta' tali investiment. Huma żiedu wkoll li, sal-ħlas tiegħu fl-2009, l-ONDD seta' jqiegħed liberament dan il-kapital ta' EUR 50 miljun fuq is-suq sabiex igawdi minn redditu korrispondenti.

(80)

Barra minn hekk, skont l-awtoritajiet Belġjani, rata ta' investiment ta' 2 %, użata fil-projezzjonijiet tal-2004 u kkunsidrata fil-kalkoli ppreżentati fit-Tabella 5, hija inqas minn dik li investitur privat kien aktarx juża. Bl-użu ta' rata ta' investiment ta' 3,5 %, l-awtoritajiet Belġjani ddeterminaw li l-projezzjoni tal-profittabbiltà tan-negozju kummerċjabbli (ROE aġġustat għall-provvediment ta' ugwalizzazzjoni) tilħaq bejn l-2005-2007 livell ta' madwar 9,7 sa 10,4 % (meta mqabbla ma' madwar 7,7 sa 8,4 % b'rata ta' investiment ta' 2 %) (41).

(81)

L-awtoritajiet Belġjani jqisu li r-rata l-aktar xierqa għall-valutazzjoni tar-redditu mistenni tal-investiment hija dik tal-“Economic Return on Revenue” (minn hawn 'il quddiem “ROR”), għalkemm din ir-rata hija nieqsa mill-projezzjonijiet finanzjarji ex ante (pjan ta' direzzjoni tan-negozju tal-ONDD). Din ir-rata hija kkalkulata bit-tqabbil tad-dħul tekniku (qabel l-allokazzjoni għall-provvediment ta' ugwalizzazzjoni) mal-fatturat (primjums tal-assigurazzjoni). Skont l-awtoritajiet Belġjani, l-ROR huwa l-aktar adattat peress li:

(82)

B'ROR ta' 16,5 % u 18,5 % rispettivament fl-2005 u fl-2006, SA Ducroire tkun aktar profittabbli (42) mit-tliet atturi l-kbar tal-assigurazzjoni tal-kreditu Coface, Euler Hermes u Atradius li l-ROR tagħhom fl-2005 u fl-2006 kienu rispettivament 9,7 % u 10,9 %, 16,0 % u 16,9 %, 9,3 % u 11,9 %.

(83)

Bi tweġiba għal kumment tal-Kummissjoni li seħqet li aktarx li investitur privat ma kienx jibbaża biss fuq il-proporzjon ROR sabiex jivvaluta r-redditu mill-investiment li jippjana li jagħmel, l-awtoritajiet Belġjani pproponew żewġ metodoloġiji ġodda, sabiex jiġġustifikaw li r-redditu ta' SA Ducroire kien biżżejjed fil-mument tal-kapitalizzazzjoni tagħha. Dawn huma (a) il-mudell “Capital Asset Pricing Model” (minn hawn 'il quddiem “CAPM”) (43), li permezz tiegħu tkun tista' tiġi vvalutata r-rata tar-redditu mistenni mis-suq għal assi finanzjarju bbażat fuq ir-riskju tiegħu u (b) valutazzjoni komparattiva (“benchmarking”) tar-redditu tal-assiguraturi tal-kreditu.

(84)

Skont il-mudell CAPM, l-ispiża tal-kapital hija ddeterminata bil-formula li ġejja:

(85)

L-awtoritajiet Belġjani stmaw il-kost tal-kapital ta' SA Ducroire kif indikat fil-grafika li ġejja.

(86)

Skont l-istimi tal-ONDD ibbażati fuq is-CAPM, investitur privat fis-settur Belġjan tal-assigurazzjoni mhux tal-ħajja kien jitlob fl-2004 redditu ta' mill-inqas ta' 7-8 %.

(87)

Biex jinkiseb il-valutazzjoni komparattiva tar-redditu storiku tas-settur, l-awtoritajiet Belġjani ħolqu kampjun ta' assiguraturi billi għażlu lil dawk li jissodisfaw dawn il-kriterji: (a) atturi Ewropej, (b) li l-attività ewlenija tagħhom hija l-assigurazzjoni tal-kreditu, (c) li huma attivi l-aktar fis-settur tar-riskji kummerċjabbli u għandhom attività fis-settur tar-riskji mhux kummerċjabbli, minbarra l-kumpaniji soġġetti għal proċedura ta' għajnuna mill-Istat jew li nħolqu wara l-2004 u minbarra s-sussidjarji ta' kumpanija li ntgħażlet fil-kampjun. Il-kampjun jinkludi 11-il assiguratur. Skont l-awtoritajiet Belġjani, għall-assiguraturi tal-kreditu attivi l-aktar fis-settur tar-riskji kummerċjabbli, wieħed josserva ROE medju ta' 6 sa 7,5 % skont il-perjodu kkunsidrat (jiġifieri inklużi jew esklużi s-snin tal-kriżi). L-ROE medju għal dawn il-11-il assiguratur fl-2004 huwa ta' 7,8 % meta mqabbel ma' 13.3 % ROE medju għat-tliet atturi ta' referenza tas-suq (ara t-Tabella 6).

Tabella 6:

Valutazzjoni komparattiva ta' redditu tal-assiguraturi tal-kreditu mressaq mill-Belġju

(88)

Skont l-awtoritajiet Belġjani, ir-redditu mistenni qabel il-provvediment ta' ugwalizzazzjoni (ROE qabel il-provvedimebt ta' ugwalizzazzjoni) tal-attività tar-riskji kummerċjabbli, skont il-projezzjonijiet finanzjarji kkalkulati mill-ġdid mill-awtoritajiet Belġjani fl-2011 taħt ix-xenarju 1B (ara t-Tabella 5), huwa konformi mal-aspettattivi ta' redditu li kien ikollu investitur privat fl-2004 (kif stmati mill-awtoritajiet Belġjani abbażi tal-ispiża tal-kapital skont il-mudell CAPM u fuq il-bażi tal-valutazzjoni komparattiva tar-redditu tal-assiguraturi tal-kreditu, ara l-premessi (86) u (87) rispettivament).

(89)

Wara t-talba tal-Kummissjoni, magħmula fid-deċiżjoni tal-ftuħ, għall-konformità mal-punt 4.3 tal-Komunikazzjoni dwar l-assigurazzjoni ta' esportazzjoni bi kreditu li teħtieġ ġestjoni separata u kontijiet separati għall-attivitajiet tal-assigurazzjoni tar-riskji kummerċjabbli u tar-riskji mhux kummerċjabbli, l-awtoritajiet Belġjani wieġbu li separazzjoni bħal din tal-kontijiet mhijiex meħtieġa. Wara l-1 ta' Jannar 2005, l-attivitajiet għal żmien qasir (riskji kummerċjabbli u mhux kummerċjabbli) isiru fi ħdan SA Ducroire bħala parti mit-trasferiment ta' attività eżistenti. Skont l-awtoritajiet Belġjani, peress li SA Ducroire ma għadhiex tgawdi mill-appoġġ tal-Istat, anki għall-attività relatata mar-riskji mhux kummerċjabbli li hija twettaq, il-Belġju huwa tal-fehma li mhemmx bżonn li jsiru kontijiet separati.

(90)

L-Artikolu 107(1) tat-TFUE jipprovdi li, ħlief għad-derogi previsti fit-Trattati, kull għajnuna, ta' kwalunkwe forma, mogħtija minn Stat Membru jew permezz ta' riżorsi tal-Istat, li twassal għal distorsjoni jew theddida ta' distorsjoni għall-kompetizzjoni billi tiffavorixxi ċerti impriżi jew ċerti produtturi għandha, safejn tolqot il-kummerċ bejn l-Istati Membri, tkun inkompatibbli mas-suq intern.

(91)

Il-Kummissjoni trid l-ewwel tanalizza jekk il-miżuri inkwistjoni humiex għajnuna mill-Istat skont l-Artikolu 107(1) tat-TFUE. Għaldaqstant, fit-taqsimiet li ġejjin, hija tanalizza l-miżuri fid-dawl tad-diversi kriterji li jikkostitwixxu għajnuna.

(92)

Skont il-punti 3.1 u 3.2 tal-Komunikazzjoni dwar l-assigurazzjoni ta' esportazzjoni bi kreditu, il-garanzija tal-Istat li minnha tgawdi kumpanija tal-assigurazzjoni tal-kreditu għall-esportazzjoni tista' tagħtiha vantaġġ finanzjarju fil-konfront tal-kompetituri tagħha. Għalhekk, l-investigazzjoni li nbdiet fit-23 ta' Frar 2011 (ara l-premessa (26)) kienet tirrigwarda prinċipalment il-garanzija tal-Istat Belġjan li minnha gawda l-ONDD għall-attività tiegħu marbuta mar-riskji kummerċjabbli.

(93)

Mill-1 ta' Settembru 2003, kont “kummerċjali” li ma kienx igawdi, skont l-awtoritajiet Belġjani, mill-garanzija tal-Istat ġie assenjat għall-attività tal-ONDD marbuta mar-riskji fuq żmien qasir, inklużi r-riskji kummerċjabbli.

(94)

Peress li fi ħdan l-ONDD ma kinux jeżistu kontijiet separati li jippermettu li wieħed jiddistingwi bejn l-attività ta' assigurazzjoni tar-riskji kummerċjabbli u dik marbuta mar-riskji mhux kummerċjabbli, l-awtoritajiet Belġjani ġew mistiedna jispjegaw il-parti tal-garanzija tal-Istat li setgħet titqies bħala allokata, sal-31 ta' Awwissu 2003, għall-attività marbuta mar-riskji kummerċjabbli. Huma ġew mistiedna wkoll jipprovdu l-evidenza li din il-garanzija waqfet fil-31 ta' Awwissu 2003 u mhux meta nħolqot SA Ducroire fl-1 ta' Jannar 2005.

(95)

L-awtoritajiet Belġjani ddikjaraw li l-ONDD waqaf joffri kopertura tar-riskji fuq debituri fiż-“Żona 1” (51) fl-1993. Wara l-1993, l-attività tal-ONDD kienet immirata biss lejn ir-riskji mhux kummerċjabbli. L-ONDD kien jaċċetta b'mod pjuttost eċċezzjonali l-kopertura tar-riskji kummerċjabbli.

(96)

Kif intqal fil-premessa (34), il-Belġju ddikjara li l-attività marbuta mar-riskji kummerċjabbli fi ħdan l-ONDD qabel Mejju 2004 kienet żgħira ħafna. Barra minn hekk, il-perċentwal baxx ħafna ta' riskji kummerċjabbli li dak iż-żmien kien kopert, kien kopert biss minħabba r-rabta ta' dawn ir-riskji ma' riskju mhux kummerċjabbli. Każ ipotetiku maħsub (52) huwa deskritt kif ġej: “Persuna assigurata X kienet tbigħ oġġetti lil intermedjarju A li jinsab fiż-żona 1, li kien jerġa' jbigħ l-oġġetti lill-klijent finali B, li jinsab fiż-żona 2. Ħafna drabi l-oġġetti kienu jitwasslu direttament lill-klijent finali B. Il-ħlas tal-fattura tal-assigurat X mill-intermedjarju A kien de facto marbut mal-ħlas tal-fattura tal-intermedjarju A mill-klijent finali B. Il-partijiet assigurati ġeneralment ma kinux isibu kopertura mingħand assiguratur ieħor tal-kreditu minħabba li dawn kienu operazzjonijiet li jiddependu fuq ir-riskju politiku tal-pajjiż fejn kien jinsab il-klijent finali B”.

(97)

L-awtoritajiet Belġjani affermaw mill-ġdid li dawn ir-riskji ma kinux isibu kopertura mingħand assiguraturi tal-kreditu oħrajn privati.

(98)

Fid-dawl tal-fatturi msemmija fil-premessi (93) sa (95), huwa stmat li dawn ir-riskji, għalkemm teoretikament jikkwalifikaw bħala kummerċjabbli (minħabba r-relazzjoni ewlenija bejn l-esportatur assigurat X, u l-intermedjarju A), fil-prattika għandhom jitqiesu bħala riskji mhux kumerċjabbli, minħabba l-kundizzjonijiet tas-suq ta' dan il-perjodu. Barra minn hekk, qabel Mejju 2004, dawn ir-riskji kienu koperti mill-ONDD b'mod għal kollox eċċezzjonali peress li kienu jirrappreżentaw inqas minn [0-2 %] tal-primjums (fil-perjodu 2000-2004) tal-portafoll fuq perjodu qasir tal-ONDD (ara l-premessa (34)).

(99)

L-awtoritajiet Belġjani ġabu wkoll l-evidenza li l-garanzija tal-Istat li minnha kien igawdi l-ONDD għall-attività tiegħu marbuta mar-riskji kummerċjabbli waqfet taħdem mill-1 ta' Settembru 2003. Fil-fatt, din il-garanzija ntemmet mat-trasferiment tar-riskji kummerċjabbli fil-kont kummerċjali, kont li għalih l-ONDD kiseb l-approvazzjoni tal-OCA (53), preċiżament minħabba li dan il-kont ma kellux garanzija mill-Istat. Id-Digriet Irjali li jiddefinixxi l-attivitajiet imwettqa mill-ONDD f'ismu stess mingħajr il-garanzija tal-Istat, ippubblikat fl-1 ta' Settembru 2003, data li fiha daħal fis-seħħ, jiddefinixxi l-operazzjonijiet li għandhom jitħallsu minn dan il-kont. Wara d-dħul fis-seħħ tad-Digriet Irjali (54), kull kopertura ta' riskji permezz ta' polza ta' esportazzjoni u ta' inqas minn sentejn hija rregolata mill-Artikolu 3(2) tal-Liġi tal-1939 (attività f'isem l-ONDD mingħajr il-garanzija tal-Istat).

(100)

Bħala konklużjoni, id-dubji mqajma mill-Kummissjoni fid-deċiżjoni tal-ftuħ u li kienu jirrigwardaw l-eżistenza ta' vantaġġ għall-attività ta' assigurazzjoni tar-riskji kummerċjabbli minħabba l-garanzija tal-Istat għandhom jitneħħew. Fil-fatt, huwa kkunsidrat li l-garanzija tal-Istat li minnha gawda l-ONDD għall-attività tiegħu marbuta mar-riskji kummerċjabbli sa Awwissu 2003 ma tatx vantaġġ kompetittiv lil din l-attività meta mqabbla mal-kompetituri tiegħu, peress li ma kienet teżisti l-ebda attività verament kummerċjabbli. Barra minn hekk, ma kien hemm l-ebda tentattiv ta' żvilupp ta' attività verament kummerċjabbli fuq il-bażi tal-garanzija tal-Istat. Wieħed jista' jikkonkludi wkoll li l-attività kollha marbuta mar-riskji fuq żmien qasir ma baqgħetx tgawdi mill-garanzija tal-Istat mill-1 ta' Settembru 2003.

(101)

Ma kienx hemm trasferimenti interni favur ir-riskji kummerċjabbli fi ħdan l-ONDD minħabba li ma kien hemm ebda attività ta' riskji verament kummerċjabbli. Ma kien hemm l-ebda tentattiv ta' żvilupp ta' attività verament kummerċjabbli fuq il-bażi ta' trasferiment ta' riżorsi tal-attività mhux kummerċjabbli (ara l-premessa (98)). Bħala konklużjoni, ma hemm l-ebda evidenza li ssostni l-eżistenza ta' trasferimenti ta' riżorsi favur ir-riskji kummerċjabbli fi ħdan l-ONDD jew ta' kwalunkwe vantaġġ li minnu seta' gawda l-ONDD wara trasferimenti bħal dawn.

(102)

Għaldaqstant, il-Miżuri 1 u 2 ma jagħtux vantaġġ skont l-Artikolu 107 tat-TFUE. Għalhekk, mhumiex għajnuna mill-Istat.

(103)

Minn dan jirriżulta li l-analiżi tal-kriterji l-oħrajn li jikkostitwixxu għajnuna (riżorsi tal-Istat, selettività, distorsjoni tal-kompetizzjoni) mhijiex sejra tkun żviluppata għall-Miżuri 1 u 2 fil-partijiet li ġejjin.

(104)

Skont id-deċiżjoni tal-ftuħ (ara l-premessi (27) u (28) ta' din id-deċiżjoni), iż-żewġ ammonti li ġejjin għandhom jitnaqqsu mill-ammont tal-allokazzjoni inizjali ta' kapital ta' SA Ducroire għaliex ma jikkostitwixxux għajnuna:

(105)

Biex issegwi l-approċċ żviluppat fid-deċiżjoni tal-ftuħ, il-Kummissjoni jkollha tibda billi tapplika dawn iż-żewġ kriterji ta' esklużjoni.

(106)

Madankollu, il-Belġju invoka argument ibbażat fuq it-tieni kriterju ta' esklużjoni u li, jekk jirriżulta tajjeb, jeskludi minnufih il-kwalifika ta' għajnuna tal-Miżura 3 kollha. Għaldaqstant il-Kummissjoni sejra l-ewwel turi li dan l-argument mhuwiex validu, qabel ma tapplika ż-żewġ kriterji ta' esklużjoni ppreżentati fid-deċiżjoni tal-ftuħ.

(107)

Bi tweġiba għad-deċiżjoni tal-ftuħ, il-Belġju invoka favur tiegħu u wessa' t-tieni kriterju ta' esklużjoni li l-kapital li, fi ħdan l-ONDD, kien diġà ta' benefiċċju għall-attivitajiet kummerċjabbli eżistenti eżatt qabel it-trasferiment tagħhom lil SA Ducroire fl-1 ta' Jannar 2005 ma jikkostitwixxix għajnuna. B'mod aktar speċifiku, il-Belġju jqis li l-kapital kollu inizjali ta' EUR 150 miljun allokat lil SA Ducroire kien jikkostitwixxi l-kapital ekonomiku assoċjat mal-attivitajiet ta' assigurazzjoni għal żmien qasir (kummerċjabbli u mhux kummerċjabbli) trasferiti. Huwa jqis li l-ħolqien ta' SA Ducroire bil-kapital inizjali tiegħu ta' EUR 150 miljun huwa biss bidla fil-forma ġuridika ta' attività eżistenti u tal-kapital marbut magħha. It-total tal-allokazzjoni inizjali tal-kapital għaldaqstant mhijiex għajnuna. Għalhekk, skont il-Belġju, mhemmx għalfejn ikun ivverifikat kif dan il-kapital intuża wara minn SA Ducroire (jiġifieri, jekk intużax għar-riskji kummerċjabbli jew mhux kummerċjabbli — l-ewwel kriterju ta' esklużjoni) minħabba li dan il-kapital ma kienx għajnuna.

(108)

Biex isostnu din id-dikjarazzjoni, l-awtoritajiet Belġjani jargumentaw li s-sottoskrizzjoni ta' EUR 150 miljun f'kapital lil SA Ducroire kienet meħtieġa, u dan, mill-bidu tal-2005. L-awtoritajiet Belġjani jiġġustifikaw dan il-livell ta' kapitalizzazzjoni abbażi tal-“istandards attwali” żviluppati fil-kuntest tal-adozzjoni tad-Direttiva Solvenza II (56) (metodu msejjaħ “standard” skont il-parametri tekniċi kif stabbiliti fi studju tal-impatt (“QIS 5” għall-Belġju, li jmur lura għal Marzu 2011) għar-riskji kollha ta' SA Ducroire bl-eċċezzjoni tar-riskji politiċi li għalihom intuża mudell intern sabiex tiġi determinata l-ħtieġa ta' kapital li jkopri dawn ir-riskji. Kif indikat fl-intestatura “Solvenza II bil-mudell intern għar-riskji politiċi” tat-Tabella 2, kien meħtieġ kapital ta' EUR [125-150] miljun sabiex ikopri l-livell ta' attività previst fl-2009.

(109)

Il-Kummissjoni tinnota li l-kunċett ta' “kapital marbut mal-attivitajiet trasferiti” huwa definit fid-Deċiżjoni tal-Kummissjoni tal-21 ta' Diċembru 2005“Miżuri relatati mal-ħolqien u l-operat tal-Banque Postale” (57). F'dan il-każ, kien ġie konkuż li t-trasferiment ma kienx jinkludi kapital ġdid peress li l-ekwità marbuta mal-attivitajiet tas-servizzi finanzjarji biss ta' La Poste kienu ġew trasferiti lill-entità ġuridika li kienet għadha kemm inħolqot imsejħa “La Banque Postale”. Fi kliem ieħor, kienet esklussivament ekwità eżistenti u assenjata qabel b'mod ċar għall-proprjetà, id-drittijiet u l-obbligi traferiti. L-analiżi kienet iffukata għalhekk fuq il-kapital li kien diġà formalment marbut mal-attivitajiet trasferiti u mhux fuq stima prospettiva tal-kapital li kien ikun xieraq li jingħata lill-entità l-ġdida bħala appoġġ għall-iżvilupp futur tagħha.

(110)

Kif spjegat qabel, l-attività marbuta mar-riskji għal żmien qasir (kummerċjabbli u mhux kummerċjabbli) trasferita lil SA Ducroire kienet ġestita fi ħdan l-ONDD permezz tal-kont kummerċjali mill-1 ta' Settembru 2003. Kapital ta' EUR [45-70] miljun kien ġie assenjat għal dan il-kont. Barra minn hekk, kif intqal fil-premessa (99), l-ONDD kiseb b'mod speċifiku u biss għall-kont kummerċjali (u l-kapital relatat ta' EUR [45-70] miljun) l-approvazzjoni tar-regolatur nazzjonali tal-asiguraturi (l-OCA). Ir-regoli u s-sorveljanza tal-OCA kienu jirrigwardaw fost l-oħrajn il-konformità mar-regoli ta' solvenza (fond minimu ta' garanzija, marġini ta' solvenza li trid issir) (58). Minn dan isegwi li, abbażi tar-regoli prudenzjali fis-seħħ f'dak iż-żmien, dawn l-attivitajiet għal żmien qasir fil-kont kummerċjali kienu kapitalizzati b'mod adegwat.

(111)

F'dan ir-rigward, il-Kummissjoni tinnota li, skont in-nota interna tal-20 ta' April 2004 (59) li fuq il-bażi tagħha ittieħdet id-deċiżjoni li tinħoloq SA Ducroire u li jingħatalha kapital ta' EUR 150 miljun, il-kapital strettament allokat għall-attività marbuta mar-riskji għal żmien qasir kien il-kapital irreġistrat fil-kont kummerċjali flimkien mal-benefiċċju ta' perjodu ta' 16-il xahar (mill-1 ta' Settembru 2003 sal-31 ta' Diċembru 2004) stmat għal EUR [0-5] miljun. In-nota tgħid li “fuq il-kapital ta' EUR 150 miljun tal-kumpanija b'responsabbiltà limitata, EUR [45-70] miljun ġejjin mit-trasferiment tal-ekwità tal-kont kummerċjali”. Il-Kummissjoni tikkonkludi għalhekk li fil-mument li ġie deċiż li tinħoloq SA Ducroire, il-kapital li seta' jiġi kkunsidrat bħala formalment allokat għall-attivitajiet għal żmien qasir fil-31 ta' Diċembru 2004 kien jammonta biss għal EUR [45-75] miljun (għal EUR [45-70] miljun flimkien mal-benefiċċju stmat ta' EUR [0-5] miljun). Għalhekk, it-trasferiment ta' dan il-kapital biss li jammonta għal EUR [45-75] miljun jikkostitwixxi l-parti tal-kapital li kienet diġà ta' benefiċċju fi ħdan l-ONDD għall-attività marbuta mar-riskji għal żmien qasir u sempliċement trasferita lil SA Ducroire. Għaldaqstant dan it-trasferiment ma jistax ikun vantaġġ ġdid għal din l-attività u allura ma jikkostitwixxix għajnuna.

(112)

Il-Kummissjoni għaldaqstant tiċħad l-allegazzjoni tal-Belġju li l-kapital inizjali kollu ta' EUR 150 miljun huwa l-kapital sempliċement trasferit, li kien diġà allokat fi ħdan l-ONDD għall-attività trasferita u, ma jistax għalhekk jitqies bħala vantaġġ. Il-Kummissjoni tqis li d-differenza bejn l-EUR [45-75] miljun u l-kapital effettivament sottoskritt ta' EUR 150 miljun hija għalhekk kapital addizzjonali li jirrappreżenta vantaġġ ġdid għal din l-attività.

(113)

B'mod sussidjarju, il-Kummissjoni tinnota li n-noti interni tal-2004, li appoġġjaw id-deċiżjoni tal-ONDD li tagħti lil SA Ducroire kapital ta' EUR 150 miljun (ferm ogħla mill-EUR [45-75] miljun allokati fil-kont kummerċjali), jindikaw li l-ONDD ikkunsidra diversi xenarji ta' tkabbir ta' attivitajiet għal SA Ducroire futura. Il-ħtieġa ta' kapital ta' EUR 150 miljun kienet għalhekk iddeterminata abbażi ta' suppożizzjonijiet ta' tkabbir futur tal-attivitajiet ta' SA Ducroire. Minn dan wieħed jista' jikkonkludi li l-approċċ tal-awtoritajiet Belġjani huwa ekwivalenti għall-esklużjoni mill-analiżi tal-eżistenza ta' vantaġġ tal-kapital kollu li wieħed kien iqis li teħtieġ l-entità l-ġdida biex issostni l-iżvilupp futur tagħha. Dan l-approċċ ma jistax jiġi aċċettat. Il-kapital biss, li minnu kienu diġà jibbenefikaw formalment l-attivitajiet trasferiti fi ħdan l-entità ġuridika eżistenti (attivitajiet ta' assigurazzjoni għal żmien qasir fi ħdan l-ONDD), ma jikkostitwixxix vantaġġ ġdid peress li preċiżament l-attivitajiet inkwistjoni kienu diġà qegħdin jibbenefikaw minnu. Bil-maqlub, kull kapital addizzjonali jikkostitwixxi vantaġġ ġdid peress li l-attività inkwistjoni ma kinitx tgawdi minn dan il-kapital qabel it-trasferiment. Id-deċiżjoni li tinħoloq SA Ducroire u li tiġi allokata kapital ta' EUR 150 miljun ma tistax għalhekk titqies bħala sempliċi tibdil tal-forma ġuridika ta' attività eżistenti b'sempliċi trasferiment tal-kapital allokat għall-attività trasferita. Għalhekk, l-affermazzjoni tal-awtoritajiet Belġjani li mill-2004 wieħed seta' jbassar diġà li SA Ducroire kienet ser teħtieġ kapital ta' EUR 150 miljun fl-2009 fuq il-bażi tat-tkabbir mistenni mill-attivitajiet tagħha hija irrilevanti. L-awtoritajiet Belġjani bl-ebda mod ma juru li dan il-kapital ta' EUR 150 miljun kien diġà allokat għall-attivitajiet fuq żmien qasir fi ħdan l-ONDD qabel it-trasferiment tagħhom lil SA Ducroire u li dan il-kapital ta' EUR 150 miljun ma jinkludix għalhekk vantaġġ ġdid għal dawn l-attivitajiet.

(114)

It-tieni nett, anki jekk il-kapital meħtieġ għall-appoġġ tat-tkabbir mistenni mill-attivitajiet kien kriterju rilevanti għal din l-analiżi (li l-Kummissjoni tiddubita), il-Kummissjoni tinnota dan li ġej:

(115)

Il-Bord tad-Diretturi tal-ONDD tal-20 ta' April 2004 ibbaża ruħu fuq metodu ieħor sabiex jistabbilixxi l-kapital meħtieġ għal SA Ducroire, jiġifieri l-proporzjon ta' Cooke, filwaqt li kkunsidra l-ħtieġa li jagħti lil SA Ducroire kredibbiltà suffiċjenti fil-konfront tal-kompetituri tagħha. Fil-fatt, il-proporzjon magħżul fil-kalkoli mhuwiex ta' 8 % kif preskritt mir-regoli ta' Basel I iżda ta' 10 %. Għalhekk, il-kalkoli tal-ħtieġa ta' kapital magħmula fl-2004 kienu jinkludu bafer ta' sigurtà ta' 2 %. Għandu jiġi nnutat li l-kapital stabbilit b'dan il-mod għal tmiem is-sena 2004 kien jammonta għal EUR 66 miljun (62) u għaldaqstant huwa ferm inqas mill-EUR 150 miljun ta' kapital sottoskritt.

(116)

Rigward l-użu tal-proporzjon ta' Cooke biex ikun stabbilit il-kapital meħtieġ, il-Kummissjoni kkritikat, fid-deċiżjoni tal-ftuħ, ir-rilevanza tal-applikazzjoni tar-regoli bankarji (bħall-proporzjon ta' Cooke) għall-assiguraturi tal-kreditu, fid-dawl tal-bosta differenzi bejn ir-riskji li jieħdu l-assiguraturi tal-kreditu u dawk li jieħdu l-banek (ara l-premessa (90) tad-deċiżjoni tal-ftuħ). F'dan ir-rigward, il-Belġju ma ġabx evidenza li r-regoli ta' Basel (il-proporzjon ta' Cooke) — li, fil-liġi, japplikaw esklussivament għas-settur bankarju — huma fil-prattika applikati mill-korpi tal-assigurazzjoni tal-kreditu jew rakkomandati mill-aġenziji ta' klassifikazzjoni jew mill-istanzi tas-sorveljanza tal-assigurazzjonijiet.

(117)

F'dak li jirrigwarda l-applikazzjoni tal-Artikolu 8 tal-Liġi tal-1939 dwar l-ONDD, l-awtoritajiet Belġjani ikkonfermaw li din il-liġi ma tapplikax għal SA Ducroire. Barra minn hekk, dan l-Artikolu jirrigwarda biss lill-attivitajiet proprji tal-ONDD bil-garanzija tal-Istat kif ukoll dawk f'isem l-Istat.

(118)

Għalkemm il-Belġju jirreferi għall-metodu ta' Standard & Poor's, li kien jeżisti f'dak iż-żmien biex jistabbilixxi l-ħtiġijiet ta' kapital tal-assiguraturi tal-kreditu, għandu jiġi nnutat li l-awtoritajiet Belġjani ma ssottomettew l-ebda stima ta' kapital skont dan il-metodu. Barra minn hekk dan ma ntużax mill-ONDD fl-2004.

(119)

B'konklużjoni, anki jekk wieħed jassumi li l-kapital meħtieġ għall-appoġġ tat-tkabbir mistenni tal-attivitajiet ta' SA Ducroire huwa kriterju rilevanti għal din l-analiżi (li l-Kummissjoni tiddubita), l-awtoritajiet Belġjani ma ġabu l-ebda prova li turi b'mod konvinċenti li l-ħtieġa f'kapital relatat mar-riskji għal żmien qasir u trasferit f'SA Ducroire kellha tkun akbar mill-kapital eżistenti fuq il-kont kummerċjali tal-ONDD fl-aħħar tal-2004.

(120)

F'din it-taqsima, il-Kummissjoni wriet li kien jeħtieġ li tiċħad id-dikjarazzjoni tal-awtoritajiet Belġjani li l-allokazzjoni ta' kapital inizjali ta' EUR 150 miljun lil SA Ducroire fl-2004 hija biss it-trasferiment tal-kapital li kien diġà ta' benefiċċju għall-attività relatata mar-riskji għal żmien qasir fi ħdan l-ONDD. Il-Kummissjoni kkonkludiet fil-fatt li l-kapital li kien diġà ta' benefiċċju għall-attività relatata mar-riskji għal żmien qasir fi ħdan l-ONDD qabel it-trasferiment ta' din l-attività lil SA Ducroire kien jammonta għal EUR [45-75] miljun u li għalhekk kien jeżisti kapital addizzjonali ta' EUR [75-100] miljun għal din l-attività.

(121)

Issa jeħtieġ li tiġi eżaminata l-applikazzjoni taż-żewġ kriterji ta' esklużjoni deskritti fid-deċiżjoni tal-ftuħ. L-ewwel ser ikun żviluppat it-tieni kriterju ta' esklużjoni, imbagħad l-ewwel wieħed.

(122)

Fil-premessa (111), il-Kummissjoni kkonkludiet li, fi ħdan l-ONDD, kapital ta' EUR [45-75] miljun kien allokat għall-attività relatata mar-riskji għal żmien qasir fil-31 ta' Diċembru 2004. Biex jiġi applikat it-tieni kriterju ta' esklużjoni, jeħtieġ għalhekk li tiġi stmata fuq il-EUR [45-75] miljun allokati għall-attività tar-riskju għal żmien qasir fl-aħħar tal-2004, il-parti tal-kapital relatata mar-riskji kummerċjabbli (63). Kif deskritt qabel, dawn ir-riskji kummerċjabbli kienu esklussivament magħmula minn riskji assoċjati ma' debituri li jinsabu fl-għaxar Stati li ssieħbu fl-Unjoni Ewropea f'Mejju 2004.

(123)

Kif intqal ukoll qabel, il-kont kummerċjali li kien igawdi minn kapital ta' EUR [45-75] miljun fl-aħħar tal-2004 ma kienx fih kontijiet separati li jgħinu biex jiġi identifikat eżattament il-kapital li kien ta' benefiċċju biss għall-attività relatata mar-riskji kummerċjabbli. Għalhekk jeħtieġ li jiġi stmat is-sehem mill-EUR [45-75] miljun li wieħed jista' raġonevolment jikkunsidra li kien ta' benefiċċju għall-attività relatata mar-riskji kummerċjabbli.

(124)

Skont l-informazzjoni sottomessa lir-regolatur fl-2004, l-ammonti tal-impenji netti kienu ta' EUR 141,6 miljun għar-riskji relatati mal-għaxar Stati Membri ġodda u ta' EUR 661,4 miljun għall-poloz esportaturi kollha għal żmien qasir fl-aħħar tal-2004 (64). Abbażi ta' tqassim tal-EUR [45-75] miljun pro rata fuq il-bażi tal-impenji netti, EUR [10-25] miljun jistgħu għalhekk ikunu kkunsidrati li jikkostitiwixxu l-kapital marbut mar-riskji relatati mal-għaxar Stati msieħba ġodda qabel it-trasferiment tagħhom mill-kont kummerċjali tal-ONDD għal SA Ducroire.

(125)

Il-Kummissjoni tinnota li tali tqassim tal-kapital skont l-impenji netti hija konsistenti mal-approċċ segwit mill-ONDD stess fl-2004 (65).

(126)

Il-Kummissjoni tosserva wkoll li l-awtoritajiet Belġjani u l-ONDD/SA Ducroire konsistentement iddikjaraw matul il-proċedura li r-riskji mhux kummerċjabbli kienu jeħtieġu, għal ammont assigurat speċifiku, aktar kapital mir-riskji kummerċjabbli. Għaldaqstant, l-ammont ta' EUR [10-25] miljun jikkostitwixxi pjuttost limitu massimu milli minimu. Il-Kummissjoni tikkunsidra madankollu raġonevoli li żżomm din iċ-ċifra għaliex hija konsistenti mal-approċċ segwit mill-ONDD stess fl-2004.

(127)

Il-Kummissjoni tikkonkludi minn dan li, fuq l-ammont ta' kapital inizjali ta' EUR 150 miljun, wieħed jista' jqis li l-ammont ta' EUR [10-25] miljun ma jikkostitwixxix vantaġġ għall-attività tar-riskji kummerċjabbli, peress li kien diġà ta' benefiċċju għal din l-attività fi ħdan l-ONDD (66). F'dan il-każ hija biss kwistjoni ta' tibdil fil-forma ġuridika tal-istess attività ekonomika u tal-kapital li minnu kienet tibbenefika. It-trasferiment lil SA Ducroire ta' dan il-kapital mal-attività inkwistjoni għaldaqstant mhuwiex għajnuna.

(128)

B'analoġija, jeħtieġ li wieħed japplika l-istess raġunament għall-ammont tal-kapital relatat mar-riskji marbuta ma' debituri li jinsabu fir-Rumanija u fil-Bulgarija. Fil-fatt, fl-2007, kien hemm klassifikazzjoni mill-ġdid tar-riskji mhux kummerċjabbli marbuta ma' debituri li jinsabu fir-Rumanija u fil-Bulgarija lejn il-kategorija tar-riskji kummerċjabbli, minħabba s-sħubija ta' dawn l-Istati fl-Unjoni Ewropea. Il-kapital li kien diġà ta' benefiċċju għal dawn ir-riskji meta ma kinux kummerċjabbli ma jistax jikkostitwixxi vantaġġ ġdid mis-sempliċi fatt li dawn ir-riskji saru kummerċjabbli wara. Jeħtieġ għalhekk li anki dan il-kapital jiġi eskluż mill-kwalifika ta' għajnuna.

(129)

Għalhekk, il-kapital relatat mar-riskji mhux kummerċjabbli li saru kummerċjabbli huwa eskluż mill-analiżi tal-eżistenza ta' vantaġġ. Fil-kummenti tagħhom tas-16 ta' Mejju 2012, l-awtoritajiet Belġjani stmaw il-kapital relatat mar-riskji marbuta ma' debituri li jinsabu fir-Rumanija u fil-Bulgarija għal EUR [0-2] miljun billi ssopponew li dawn ir-riskji kienu kummerċjabbli fl-2005. Għall-kuntrarju, huma ma pprovdewx stima tal-kapital assoċjat ma' dawn ir-riskji fil-31 ta' Diċembru 2006. Peress li r-riskji inkwistjoni ma kinux partikolarment kummerċjabbli fl-2005, l-istima tal-awtoritajiet Belġjani tal-kapital allokat għal dawn ir-riskji tista tkun sottovalutata. Il-kontijiet separati maħluqa mill-ġdid retrospettivament mill-ONDD bħala parti minn din il-proċedura (il-kummenti tas-16 ta' Mejju 2012), juru li l-kapital allokat għar-riskji mhux kummerċjabbli jonqos b'EUR [0-5] miljun fl-2007 meta mqabbel mal-2006. Dan it-tnaqqis huwa spjegat mit-tibdil tal-kwalifika tar-riskji marbuta mar-Rumanija u mal-Bulgarija (ikkunsidrati bħala riskji kummerċjabbli mill-2007), iżda wkoll minn fatturi oħrajn, bħat-tibdil ta' politika ta' riassigurazzjoni. Abbażi tal-evidenza kollha disponibbli, wieħed jista' raġonevolment jikkunsidra li l-kapital li minnu r-riskji marbuta mal-Bulgarija u mar-Rumanija kienu jibbenefikaw qabel ma saru kumerċjabbli kien jammonta għal EUR [0-5] miljun.

(130)

Fid-dawl ta' dak li ntqal, il-Kummissjoni tikkonkludi li ammont ta' EUR [10-25] miljun kien diġà ta' benefiċċju għar-riskji kummerċjabbli qabel l-1 ta' Jannar 2005 u li t-trasferiment ta' dan il-kapital mal-attivitajiet inkwistjoni ma jistax għalhekk jikkostitwixxi vantaġġ. Bl-istess mod, ammont ta' EUR [0-5] miljun kien diġà ta' benefiċċju għar-riskji li saru kummerċjabbli fl-1 ta' Jannar 2007 (Rumanija u Bulgarija) qabel ma saru kummerċjabbli.

(131)

Kif kien deskritt qabel, kapital ta' EUR [45-75] miljun kien diġà ta' benefiċċju għar-riskji għal żmien qasir qabel it-trasferiment tagħhom lill-ONDD (ara l-premessa (120)). Minn fost dawn il-EUR [45-75] miljun, kien konkluż qabel li wieħed jista' raġonevolment jistma s-sehem tar-riskji kummerċjabbli għal EUR [10-25] miljun. Għalhekk, wieħed jista' raġonevolment jistma s-sehem tar-riskji mhux kummerċjabbli għal EUR [35-50] miljun (li minnhom EUR [0-5] miljun, relatati mar-riskji marbuta mal-Bulgarija u mar-Rumanija, saru kummerċjabbli fl-2007).

(132)

Għall-istess raġunijiet bħal dawk spjegati fil-premessa (127), peress li t-trasferiment tal-EUR [45-75] miljun kollu (inkluż is-sehem tar-riskji mhux kummerċjabbli stmat għal EUR [35-50] miljun) mhuwiex vantaġġ, dan tal-aħħar huwa eskluż mill-analiżi tal-eżistenza ta' għajnuna.

(133)

Bħala konklużjoni, fuq il-kapital inizjali ta' EUR 150 miljun allokat lil SA Ducroire, EUR [75-100] miljun biss jikkostitwixxu kapital addizzjonali, jiġifieri kapital ġdid. L-għoti ta' dawn il-EUR [75-100] miljun biss jista' għalhekk ikun ta' vantaġġ (ara l-premessa (120)).

(134)

Bħalma huwa mfakkar fil-premessa (65) tad-deċiżjoni tal-ftuħ, l-Istati Membri huma liberi li jappoġġjaw l-attività ta' assigurazzjoni ta' riskji mhux kummerċjabbli, minħabba li l-Kummissjoni tikkunsidra li ma jeżisti l-ebda suq għal dawn ir-riskji. Għalhekk ma jistax ikun hemm distorsjoni tal-kompetizzjoni fir-rigward ta' assiguraturi oħrajn. Madankollu, il-Kummissjoni tinnota li ma kien hemm l-ebda separazzjoni tal-kontijiet bejn l-attività tar-riskji kummerċjabbli u dik tar-riskji mhux kummerċjabbli fi ħdan SA Ducroire. Formalment, l-ebda kapital ma kien allokat għall-attività tar-riskji mhux kummerċjabbli. L-ebda parti tal-kapital ta' EUR 150 miljun ma ġiet imwarrba biex tiffinanzja l-attività tar-riskji mhux kummerċjabbli. Għalhekk, approċċ purament formali jista' jwassal biex ma tiġi eskluża l-ebda parti tal-kapital addizzjonali ta' EUR [75-100] miljun. Tali approċċ ikun ferm aktar iġġustifikat minħabba li l-obbligu li jiġu introdotti kontijiet separati huwa espressament previst fil-punt 4.3 tal-Komunikazzjoni dwar l-assigurazzjoni ta' esportazzjoni bi kreditu li kienet fis-seħħ mill-1998. Madankollu, huwa ċar li parti kbira mill-attivitajiet ta' SA Ducroire tirrigwarda l-assigurazzjoni tar-riskji mhux kummerċjabbli. SA Ducroire ma kinitx tkun tista' tassigura dawn ir-riskji mingħajr kapital adegwat. Għaldaqstant, minbarra l-EUR [45-75] miljun (li minnhom EUR [35-50] miljun għar-riskji mhux kummerċjabbli), il-Kummissjoni tista' taċċetta li teskludi wkoll mill-kwalifika ta' għajnuna l-porzjon tal-kapital li jista' jintwera b'mod raġonevoli li ntuża għall-appoġġ tal-attività ta' assigurazzjoni tar-riskji mhux kummerċjabbli.

(135)

Fid-deċiżjoni tal-ftuħ, il-Belġju kien mistieden jiżviluppa metodu li jiddetermina l-porzjon tal-kapital ta' SA Ducroire li jista' jitqies li jappoġġja l-attività tar-riskji kummerċjabbli u dak li jappoġġja l-attività tar-riskji mhux kummerċjabbli. Wara din it-talba tal-Kummissjoni, l-awtoritajiet Belġjani ssottomettew għall-perjodu 2005-2011 karta tal-bilanċ u dikjarazzjoni tad-dħul separati għall-attività tar-riskji kummerċjabbli u dik tar-riskji mhux kummerċjabbli. Il-karta tal-bilanċ tar-riskji mhux kummerċjabbli fil-31 ta' Diċembru 2011 tinkludi kapital ta' EUR [70-110] miljun u dak tar-riskji kummerċjabbli kapital ta' EUR [40-80] miljun. Għalkemm is-separazzjoni tal-kontijiet hija bbażata fuq ċerti suppożizzjonijiet jew informazzjoni parzjalment verifikabbli f'kuntest ta' rikostruzzjoni retrospettiva, il-Kummissjoni tqis il-livelli tal-kapital għall-attività tar-riskji kummerċjabbli u mhux kummerċjabbli fil-31 ta' Diċembru 2011 bħala raġonevoli.

(136)

Il-Kummissjoni għalhekk taċċetta li teskludi mill-kwalifika ta' għajnuna EUR [70-110] miljun peress li de facto dawn jappoġjaw attività li mhijiex soġġetta għall-kompetizzjoni skont il-Komunikazzjoni dwar l-assigurazzjoni ta' esportazzjoni bi kreditu.

(137)

Il-kapital li kien ta' benefiċċju għar-riskji għal żmien qasir mhux kummrċjabbli għaldaqstant tela' minn EUR [35-50] miljun fl-aħħar tal-2004 għal EUR [70-110] miljun fl-aħħar ta' Diċembru 2011, jiġifieri żieda ta' EUR [35-60] miljun. Billi l-ammont ta' EUR [35-50] miljun ta' kapital marbut mal-attività tar-riskji mhux kummerċjabbli jinkludi EUR [0-5] miljun relatati mar-riskji marbuta mar-Rumanija u mal-Bulgarija, ikkwalifikati mill-ġdid bħala kummerċjabbli fl-2007, iż-żieda grossa tal-kapital li kien ta' benefiċċju għar-riskji mhux kummerċjbbli hija ta' EUR [35-65] miljun. Fi kliem ieħor, fuq il-kapital addizzjonali ta' EUR [75-100] miljun, EUR [35-65] miljun appoġġjaw de facto l-attività tar-riskji mhux kummerċjabbli.

(138)

Ammont ta' EUR [70-110] miljun ġie eskluż mill-kwalifika ta' għajnuna peress li dan l-ammont seta' jitqies bħala appoġġ għall-attività tar-riskji mhux kummerċjabbli fid-data tal-31 ta' Diċembru 2011 (l-ewwel kriterju ta' esklużjoni). Ammont ta' EUR [10-25] miljun kien ukoll eskluż mill-kwalifika ta' għajnuna peress li seta' jitqies li ma jikkostitwixxix vantaġġ billi kien diġà ta' benefiċċju għar-riskji kummerċjabbli qabel it-trasferiment ta' dawn ir-riskji lil SA Ducroire fil-31 ta' Diċembru 2004 (it-tieni kriterju ta' esklużjoni). Barra minn hekk, ammont ta' EUR [0-5] miljun għandu wkoll jiġi eskluż peress li kien diġà ta' benefiċċju għar-riskji marbuta mal-Bulgarija u mar-Rumanija qabel ma saru kummerċjabbli fl-1 ta' Jannar 2007.

(139)

Bħala konklużjoni, EUR 36,6 miljun biss mill-allokazzjoni inizjali ta' kapital ta' EUR 150 miljun jistgħu jikkostitwixxu vantaġġ u għajnuna mill-Istat fis-sens tal-Artikolu 107(1) tat-TFUE.

(140)

Mod ieħor ta' kif jiġi ppreżentat ir-riżultat ta' EUR 36,6 miljun jikkonsisti fit-tnaqqis, mill-kapital inizjali ta' EUR 150 miljun mogħti lil SA Ducroire, (1) il-EUR [45-75] miljun li minnhom ir-riskji għal żmien qasir kienu jibbenefikaw diġà qabel it-trasferiment tagħhom lil SA Ducroire (inkluż iż-EUR [0-5] miljun marbuta mar-riskji relatati mad-debituri stabbiliti fir-Rumanija u fil-Bulgarija li saru kummerċjabbli fl-1 ta' Jannar 2007); u (2) il-EUR [35-65] miljun addizzjonali li kienu jappoġġjaw de facto lir-riskji mhux kummerċjabbli. B'hekk wieħed jikseb EUR 36,6 miljun.

(141)

Din l-analiżi tat-tqassim tal-kapital hija ppreżentata fil-grafika li ġejja:

(142)

B'mod sussidjarju, il-Kummissjoni tinnota dan li ġej. L-awtoritajiet Belġjani jiddikjaraw li bl-eċċezzjoni ta' madwar EUR 7 sa 13-il miljun (ara t-Tabella 2), il-kapital kollu ta' EUR 150 miljun kien allokat b'mod impliċitu fl-2004 għar-riskji mhux kummerċjabbli. Fuq il-bażi ta' din l-ewwel dikjarazzjoni, il-Belġju jgħid li kien biss aktar tard (fl-2007 u fl-2008), li parti mill-kapital inizjalment allokat għar-riskji mhux kummerċjabbli ġiet trasferita lejn ir-riskji kummerċjabbli. Il-Belġju jgħid imbagħad li dawn it-trasferimenti ta' kapital biss setgħu jikkostitwixxu għajnuna u li l-kriterju tal-investitur privat għandu jkun applikat għal dawn l-ammonti meta saru t-trasferimenti interni tagħhom u mhux meta saret l-allokazzjoni inizjali ta' kapital fl-2004. Dan ir-raġunament ma jistax jiġi aċċettat.

(143)

Fil-fatt, meta nħolqot SA Ducroire u fis-snin ta' wara, il-kapital ta' EUR 150 miljun qatt ma ġie formalment allokat għall-attività relatata mar-riskji kummerċjabbli u għal dik relatata mar-riskji mhux kummerċjabbli rispettivament. Dan il-kapital seta' jintuża liberament sabiex jappoġġja l-attività relatata mar-riskji kummerċjabbli jew dik relatata mar-riskji mhux kummerċjabbli (fi proporzjonijiet mhux definiti) skont l-okkażjonijiet tas-suq u l-għażliet strateġiċi ta' SA Ducroire. L-allokazzjoni ta' kapital bejn l-attività tar-riskji kummerċjabbli u dik tar-riskji mhux kummerċjabbli nħolqot biss mill-ġdid retroattivament taħt din il-proċedura. Id-dokumenti tal-2004, kif sottomessi mill-awtoritajiet Belġjani, ma kinux jippreżentaw allokazzjoni tal-kapital bejn id-diversi attivitajiet. Għalhekk il-Kummissjoni ma tistax taċċetta li teskludi mill-analiżi tal-eżistenza ta' għajnuna parti mill-EUR [75-100] miljun ta' kapital addizzjonali ta' SA Ducroire abbażi biss tal-fatt li f'dan iż-żmien dan l-ammont seta' jservi bħala appoġġ għall-attività ta' riskji mhux kummerċjabbli. Kif indikat qabel, il-parti tal-kapital addizzjonali ta' EUR [75-100] miljun biss li jista' jintwera li effettivament appoġġjat l-attività tar-riskji mhux kummerċjabbli tista' tkun eskluża mill-analiżi tal-eżistenza ta' għajnuna.

(144)

B'mod għal kollox sussidjarju, il-Kummissjoni tinnota li, anki jekk wieħed kellu jaċċetta l-argument tal-Belġju li parti mill-kapital inizjali ta' SA Ducroire kienet assenjata għar-riskji mhux kummerċjabbli u allura ma setgħetx taqa' taħt il-kamp ta' applikazzjoni tal-Artikolu 107(1) tat-TFUE, dan l-argument japplika biss għall-ammont ta' EUR 36,6 miljun kieku l-Belġju rnexxielu juri li l-kapital allokat għar-riskji mhux kummerċjabbli kien akbar minn EUR [70-110] miljun. (Fil-fatt, biex jiġu kkalkulati s-EUR 36,6 miljun, ammont ta' EUR [70-110] miljun li jappoġġja l-attività relatata mar-riskji mhux kummerċjabbli diġà tnaqqas mill-EUR 150 miljun). Madankollu, huwa ovvju li dan l-ammont qatt ma ġie allokat għar-riskji mhux kummerċjabbli fl-2004 peress li d-dokumenti interni jindikaw li kapital ta' EUR 100 miljun kien biżżejjed sabiex ikopri r-riskji kollha għal żmien qasir (mhux kummerċjabbli u kummerċjabbli) sal-2007.

(145)

Skont ġurisprudenza kostanti, biex ikun stabbilit li miżura tipprovdi vantaġġ ekonomiku, jeħtieġ li jkun iddeterminat jekk, f'ċirkostanzi simili, investitur privat f'ekonomija tas-suq ta' daqs komparabbli għal dik tal-kumpanija kkonċernata kienx jagħmel injezzjoni ta' kapital tal-istess kobor (67), partikolarment fid-dawl tal-informazzjoni disponibbli u l-iżviluppi prevedibbli fi żmien dan l-investiment.

(146)

F'dan il-każ, hija kwistjoni li jiġi analizzat jekk il-kapital supplimentari ta' EUR 36,6 miljun mogħti fl-2004 kienx jippreżenta redditu suffiċjenti sabiex jikkonvinċi investitur privat f'ekonomija tas-suq. Madankollu, ir-redditu ta' dan il-kapital supplimentari ma jistax jiġi analizzat b'mod separat mill-kapital kollu peress li dan il-kapital supplimentari huwa r-riżultat ta' diviżjoni artifiċjali tal-kapital ta' EUR 150 miljun sottoskritt fl-2004. L-ebda fluss ta' dħul definit ma jista' jkun identifikat bħala li ġej minn dawn is-EUR 36,6 miljun. Fi kliem ieħor, ir-redditu ta' attività speċifika ma kienx assenjat għal dawn is-EUR 36,6 miljun, peress li ma kinux jeżistu kontijiet separati. Il-Kummissjoni tqis għalhekk li sabiex tapplika b'mod korrett il-kriterju tal-investitur privat, jeħtieġ li tivverifika li l-kapital ta' EUR 150 miljun kollu kien jippreżenta redditu mistenni suffiċjenti. Jekk dan mhux il-każ, wieħed ikollu jikkonkludi li s-EUR 36,6 miljun huma vantaġġ.

(147)

B'mod għal kollox sussidjarju, possibbiltà oħra tkun li jiġi applikat metodu pro rata fuq id-dħul iġġenerat, li jagħti l-istess riżultat.

(148)

Il-Kummissjoni lanqas ma tikkunsidra li jeħtieġ li tanalizza biss ir-redditu mill-kapital addizzjonali ta' EUR [75-100] miljun u teskludi l-EUR [45-75] miljun allokati għall-attività tar-riskji għal żmien qasir qabel it-trasferiment taħghom lil SA Ducroire. Fil-fatt, l-ONDD seta' jiddeċiedi li jwaqqaf l-attività tiegħu marbuta mar-riskji għal żmien qasir u jirkupra l-ammont ta' kapital allokat lil din l-attività f'dak iż-żmien, jiġifieri EUR [45-75] miljun (68). Dawn il-EUR [45-75] miljun ma jistgħux għalhekk jitqiesu bħala spiża mġarrba fil-passat u li ma tistax tiġi rkuprata (“spejjeż mitlufa”).

(149)

Fil-premessi li ġejjin, il-Kummissjoni sejra turi li r-redditu mistenni ta' EUR 150 miljun ma kienx suffiċjenti sabiex jikkonvinċi lil investitur privat jagħmel investiment bħal dan. B'mod sussidjarju, hija sejra turi li, anki jekk wieħed jikkunsidra li l-attività tar-riskji kummerċjabbli kienet tgawdi virtwalment minn kapital ta' EUR [45-65] miljun (EUR 36,6 miljun u EUR [10-25] miljun) u mill-benefiċċji mistennija marbuta ma' din l-attività speċifika, ir-redditu mistenni minn din l-attività kien ukoll insuffiċjenti.

(150)

Il-kriterju tal-investitur privat f'ekonomija tas-suq għandu jkun applikat ex ante . Huwa fil-mument li ngħatat l-injezzjoni ta' kapital li jeħtieġ li wieħed iqiegħed lilu nnifsu sabiex jivvaluta jekk investitur privat kienx huwa wkoll jagħmel tali injezzjoni. Fl-evalwazzjoni tal-kriterju tal-investitur privat, jeħtieġ li wieħed iżomm lura milli jikkunsidra żviluppi wara l-injezzjoni tal-kapital. Barra minn hekk, il-konformità mal-kriterju tal-investitur privat f'ekonomija tas-suq tista' tintwera permezz ta' pjan ta' direzzjoni tan-negozju ex ante li abbażi tiegħu ttieħdet id-deċiżjoni li jsir l-investiment (69). Skont ġurisprudenza reċenti (70), Stat Membru jista' biss jinvoka elementi oġġettivi u verifikabbli li jkun ikkunsidra, qabel jew fl-istess waqt tad-deċiżjoni li jinvesti. Tista' tkun meħtieġa, f'dan ir-rigward, evidenza li turi li din id-deċiżjoni hija bbażatat fuq valutazzjonijiet ekonomiċi komparabbli ma' dawk li investitur privat raġonevoli, li jsib ruħu f'sitwazzjoni komparabbli, kien jistabbilixxi qabel li jagħmel l-imsemmi investiment sabiex jiddetermina r-redditu futur tiegħu. Iżda, il-valutazzjonijiet ekonomiċi stabbiliti wara l-għoti tal-imsemmi vantaġġ, l-osservazzjoni retrospettiva tar-redditu effettiv tal-investiment magħmul jew tal-ġustifikazzjonijiet sussegwenti tal-għażla tal-metodu fil-fatt magħżul mhumiex biżżejjed sabiex jiġi stabbilit li Stat Membru ħa d-deċiżjoni tal-investiment bħal azzjonist privat f'ekonomija tas-suq.

(151)

Minħabba li ebda investitur privat ma kien involut fil-miżura inkwistjoni u li SA Ducroire mhijiex elenkata fil-Borża, il-parametru li għandu jiġi vvalidat huwa r-redditu mistenni mill-investiment, kif jista' jkun mistenni fuq il-bażi tal-informazzjoni disponibbli u tal-iżviluppi prevedibbli f'dak iż-żmien (kif jidher, fil-prinċipju, fil-pjan ta' direzzjoni tan-negozju definit mill-ONDD fl-2004). Fil-fatt, skont il-ġurisprudenza tal-Qorti (71) u l-prattika deċiżjonali tal-Kummissjoni (72), il-fatt li l-injezzjoni ta' kapital tkun allegatament meħtieġa għall-insegwiment tal-attività tal-kumpanija jew għall-kapitalizzazzjoni adegwata tal-attività, skont ir-regoli prudenzjali jew l-istima tar-riskji mġarrba, ma jippermettix li wieħed jikkunsidra li l-kriterju tal-investitur privat f'ekonomija tas-suq huwa ssodisfat. Investitur privat f'kundizzjonijiet normali tas-suq ma jagħmilx din l-injezzjoni ta' kapital ħlief jekk ir-redditu mistenni jkun suffiċjenti, meta ssir din l-injezzjoni, minħabba l-informazzjoni disponibbli u l-iżviluppi prevedibbli f'dan il-mument speċifiku (73). Il-Kummissjoni tosserva għalhekk li l-argumenti mressqa mill-Belġju sabiex jiġġustifika li livell ta' kapital ta' EUR 150 miljun kien “meħtieġ” ekonomikament u/jew abbażi tar-regoli prudenzjali huma irrilevanti sabiex juru li dan l-investiment kien jippreżenta redditu suffiċjenti għal investitur tas-suq.

(152)

L-awtoritajiet Belġjani jibbażaw l-analiżi tagħhom tar-redditu fuq il-pjan ta' direzzjoni tan-negozju tat-28 ta' Settembru 2004. Iżda l-ħolqien ta' SA Ducroire jġib id-data tat-23 ta' Settembru 2004. Madankollu fir-realtà bdiet biss l-attivitajiet ekonomiċi tagħha fl-1 ta' Jannar 2005, minħabba li l-portafoll tar-riskji għal żmien qasir baqa' jappartjeni għall-ONDD sal-31 ta' Diċembru 2004, id-data li fiha ġie trasferit. Għaldaqstant wieħed jista' jikkunsidra li sa ftit qabel din id-data, l-ONDD seta' jbiddel id-deċiżjoni tiegħu li jinvesti f'din l-attività billi ma jittrasferixxix ir-riskji inkwistjoni u jillikwida l-entità ġuridika li kienet għadha kemm inħolqot. Għalhekk huwa aċċettabbli li wieħed jikkunsidra l-pjan ta' direzzjoni tan-negozju tal-ONDD tat-28 ta' Settembru 2004, kif jitolbu l-awtoritajiet Belġjani.

(153)

Jirriżulta min-noti u l-minuti tal-2004 li d-deċiżjoni tal-ONDD li tipprovdi lil SA Ducroire b'kapital ta' EUR 150 miljun kienet tissodisfa essenzjalment ir-rieda tal-ONDD li jipprovdi lis-sussidjarja tiegħu kapital inizjali meqjus “adegwat” għall-iżvilupp tal-attivitajiet tagħha u għal […] — “kapital imħallas ta' EUR 100 miljun huwa biżżejjed biex titwettaq l-attività għal perjodu qasir ta' poloz globali esportaturi sal-2007 iżda dan għandu jiġi rivedut wara dan il-perjodu” (74), mingħajr ma attwalment u speċifikament jintwera li r-redditu futur mistenni kien suffiċjenti mill-perspettiva ta' investitur privat. F'termini ta' analiżi tar-redditu mistenni, jidher li riżultat pożittiv antiċipat għall-attivitajiet kollha fl-ewwel tliet snin biss kien biżżejjed biex jikkonvinċi lill-ONDD jagħmel l-investiment.

(154)

Fil-fatt, skont il-projezzjonijiet tax-xenarju B tal-pjan ta' direzzjoni tan-negozju tat-28 ta' Settembru 2004, l-ONDD kien qed jistenna ROE fuq l-attivitajiet kollha ta' 1,3 % sa 1,9 % għas-snin 2005, 2006 u 2007 skont ix-xenarju “dinamiku — tkabbir ta' 6 %” tal-pjan ta' direzzjoni tan-negozju tat-28 ta' Settembru 2004 (l-ROE qabel iil-provvediment ta' ugwalizzazzjoni kien jammonta għal 2,8-4,3 %) (ara t-Tabella 4). Għandu jiġi nnutat li dan ir-redditu huwa kkalkulat abbażi ta' kapital ta' EUR 100 miljun mingħajr ma jitqiesu l-EUR 50 miljun mhux imħallsa, li jagħti riżultat ta' redditu akbar milli huwa fir-realtà. Ir-rata ta' redditu mistenni fil-projezzjonijiet finanzjarji tal-20 ta' April 2004 ma kinitx ogħla (ara t-Tabella 3).

(155)

Fid-dawl ta' dak li ntqal, jidher li r-redditu mistenni tal-futura SA Ducroire ma kienx biżżejjed biex jikkonvinċi lil investitur privat f'ekonomija tas-suq jagħmel investiment bħal dan. Fil-fatt, ir-redditu mistenni kien inqas mir-rata mingħajr riskju (redditu tal-bonds tal-Istat Belġjan fit-tul) għall-ewwel tliet snin (ir-rata medja tal-bonds tal-Istat Belġjan fit-tul fl-2004 kienet ta' 4,15 % (75)). Anki jekk wieħed jikkunsidra l-provvediment ta' ugwalizzazzjoni, ir-rata tar-redditu mistenni kienet biss tilħaq ir-rata mingħajr riskju.

(156)

Investitur privat f'ekonomija tas-suq ma jaċċettax redditu daqstant baxx matul l-ewwel snin sakemm ma jkunx jista' raġonevolment jistenna kumpens ieħor permezz ta' qligħ ferm ogħla mill-medja tas-settur, b'mod li r-ritorn totali fuq l-investiment (wara l-applikazzjoni ta' rata ta' skont xierqa) ikun suffiċjenti (76).

(157)

Madankollu, ma kien hemm l-ebda studju serju fl-2004 li fuqu wieħed seta' jistenna li dan ir-redditu inizjali baxx kien ser ikun ikkumpensat minn redditu ferm aktar ogħla fis-snin segwenti. Il-Kummissjoni tinnota wkoll li l-projezzjonijiet finanzjarji disponibbli dak iż-żmien kienu juru ċerta linearità fil-prestazzjonijiet bejn l-2005 u l-2007, jew għall-inqas tkabbir bil-mod (ara t-Tabella 4), u għalhekk ma kien hemm xejn fuq xiex wieħed jassumi titjib rapidu tar-riżultati għas-snin ta' wara l-2007. F'dan ir-rigward, ta' min jinnota li l-ħolqien tas-sussidjarja SA Ducroire ma jistax jitqies bħala l-bidu ta' negozju ġdid peress li kien previst dak iż-żmien li hija għandha tkompli l-attivitajiet li qabel kienu jsiru mill-kumpanija prinċipali u l-assi u l-obbligazzjonijiet korrispondenti ġew sempliċement trasferiti mill-ONDD għal SA Ducroire għal dan l-iskop. Din il-konklużjoni hija bbażata wkoll fuq il-mod li bih tħejjew il-projezzjonijiet finanzjarji dak iż-żmien. Jirriżulta li fl-2004, l-ONDD, meta kien qed jagħmel il-projezzjonijiet finanzjarji tal-futura SA Ducroire, ibbaża ruħu fuq il-prestazzjonijiet tal-passat tal-attività inkwistjoni (riskji għal żmien qasir, inklużi r-riskji kummerċjabbli) fi ħdan l-ONDD. Is-suppożizzjonijiet f'termini ta' primjums u ta' spejjeż kienu bbażati l-aktar fuq il-medja tad-dejta finanzjarja storika tal-ħames snin preċedenti, ħlief għal ċerti aġġustamenti marbuta mal-bidliet fiċ-ċirkostanzi tas-suq, bħal pereżempju t-tnaqqis fuq primjums għar-riskji li saru kummerċjabbli fl-2004 wara s-sħubija fl-Unjoni Ewropea tal-għaxar Stati Membri ġodda.

(158)

Barra minn hekk, jirriżulta min-noti interni li kien previst li t-total tal-kapital imħallas ta' EUR 100 miljun ikun assorbit l-aktar mit-tkabbir progressiv tal-attivitajiet imwettqa mill-ONDD fil-passat u dan sal-aħħar tas-sena 2007 (ara l-premessa (61)). Dan kien għalhekk it-tkabbir organiku tal-attivitajiet eżistenti (ma kienet prevista l-ebda espansjoni lejn attivitajiet oħrajn aktar profittabbli fl-2004).

(159)

F'dak li jirrigwarda l-kapital sottoskritt iżda mhux imħallas (ta' EUR 50 miljun), ma tħejja l-ebda proġett preċiż għall-użu ta' dan il-kapital f'dak iż-żmien u, għalhekk, ma saret l-ebda projezzjoni dwar ir-redditu mistenni minn dan il-kapital. Barra minn hekk la l-akkwist ta' KUP u lanqas b'mod aktar ġenerali strateġija ta' akkwisti ma ġiet ikkunsidrata meta ngħata l-kapital lil SA Ducroire.

(160)

Wieħed għandu jinnota wkoll li l-projezzjonijiet għall-perjodu 2005-2014 saru biss ex post, wara li l-Kummissjoni bdiet il-proċedura ta' investigazzjoni formali. Fil-fatt l-uniċi projezzjonijiet finanzjarji li saru ex ante mill-ONDD kienu limitati għal perjodu ta' tliet snin (l-ewwel tliet snin ta' attività tal-futura SA Ducroire, jiġifieri s-snin 2005, 2006 u 2007), perjodu relattivament qasir biex jissodisfa l-ħtiġijiet ta' investitur privat.

(161)

Il-Kummissjoni tikkonkludi li r-redditu mistenni mill-kapital ma kienx suffiċjenti, u għalhekk is-EUR 36,6 miljun jikkostitwixxu vantaġġ favur l-attività tar-riskji kummerċjabbli ta' SA Ducroire.

(162)

B'mod sussidjarju, il-Kummissjoni tanalizza fil-premessi li ġejjin ir-redditu mistenni mill-attività tar-riskji kummerċjabbli.

(163)

Il-Kummissjoni tinnota li, skont l-Anness 9 għan-nota strateġika tat-28 ta' Settembru 2004, il-projezzjonijiet finanzjarji kif stabbiliti mill-ONDD kienu jipprovdu riżultat negattiv għall-attività ta' assigurazzjoni relatata mar-riskji kummerċjabbli (jiġifieri għall-pajjiżi b'riskji kummerċjabbli skont il-Komunikazzjoni dwar l-assigurazzjoni ta' esportazzjoni bi kreditu għal żmien qasir)  (77) għall-perjodu kollu pproġettat mill-2005 sal-2007 b'mod li l-attività tar-riskji mhux kummerċjabbli kienet tissussidja l-attività tar-riskji kummerċjabbli. Minn dan wieħed jiddeduċi, li l-istima tar-redditu tar-riskji kummerċjabbli kienet inqas minn dik stmata għall-attivatijiet kollha, li kienu huma stess insuffiċjenti għal investitur privat. Il-Kummissjoni tikkonkludi għalhekk li anki jekk tanalizza b'mod separat ir-redditu mistenni mill-attività tar-riskji kummerċjabbli fuq il-bażi tal-projezzjonijiet finanzjarji eżistenti fl-2004 (78), ikollha tikkonkludi li r-redditu mistenni kien negattiv, u għalhekk bla dubju insuffiċjenti sabiex jikkonvinċi investitur privat jagħmel investiment bħal dan.

(164)

L-awtoritajiet Belġjani jsostnu, għar-raġunijiet imsemmija fil-premessa (74), li l-projezzjonijiet ta' Settembru 2004 ma għandhomx jiġu kkunsidrati għall-analiżi tar-redditu tal-attivitajiet kummerċjabbli u mhux kummerċjabbli peress li “jagħtu riżultati assurdi”. L-awtoritajiet Belġjani jgħidu li l-metodu, kif żviluppat fl-2011, biex jaqsam ir-riskji kummerċjabbli u mhux kummerċjabbli jirrifletti aħjar ir-raġunament li investitur privat seta' jsegwi meta ttieħdet id-deċiżjoni fl-2004. L-awtoritajiet Belġjani qishom għalhekk qegħdin jissuġġerixxu a posteriori li l-projezzjonijiet tal-2004 għar-riskji kummerċjabbli (79) kienu bbażati fuq suppożizzjonijiet żbaljati. Fil-fatt, ir-rata ta' pretensjonijiet prevista kienet għolja iżda kostanti filwaqt li l-livell tal-primjums previst (li suppost kellhom iħallsu r-riskji), kien ferm imnaqqas. Minn dan kien jirriżulta proporzjon ta' telf (“Loss ratio”) ta' 94 %. Il-Kummissjoni ma tistax taċċetta tibdil retrospettiv tar-redditu ipproġettat ta' attività (ara l-premessa (150)). B'mod sussidjarju, il-Kummissjoni tinnota li dan l-argument tal-awtoritajiet Belġjani jerġa' jikkonferma li ma saritx analiżi serja saparata tar-redditu mistenni għar-riskji kummerċjabbli u li għalhekk, għal applikazzjoni korretta tal-prova tal-investitur privat, jeħtieġ li jiġi analizzat ir-redditu tal-kapital kollu mogħti lil SA Ducroire.

(165)

Il-Kummissjoni tinnota b'mod għal kollox sussidjarju li, anki kieku kellha tikkunsidra l-projezzjonijiet tar-riżultat tal-attività tar-riskji kummerċjabbli kif riveduti u ppreżentati mill-awtoritajiet Belġjani fl-2011 (80) — li l-Kummissjoni ma taċċettax peress li dawn ma kinux jeżistu fiż-żmien tal-investiment — u, tiddividi dan ir-riżultat bil-kapital relatat mar-riskji kummerċjabbli kif stmat mill-Kummissjoni (jiġifieri EUR [45-65] miljun), l-ROE stmat għall-2005-2007 jibqa' taħt ir-rata mingħajr riskju.

(166)

L-istima tar-redditu mistenni, kif indikata fil-premessa preċedenti, hija bbażata fuq il-kapital kollu stmat relatat mar-riskji kummerċjabbli, inkluż il-porzjon mhux imħallas tal-kapital, għall-kuntrarju tal-kalkoli ta' redditu li saru mill-ONDD. L-argument tal-awtoritajiet Belġjani (ara l-premessa (79), li l-porzjon tal-kapital sottoskritt fl-2004 iżda mħallas fl-2009 ma għandux jiġi kkunsidrat fil-kalkoli tal-profittabbiltà stmata qabel l-2009 ma jistax jiġi aċċettat. Fil-fatt, għalkemm dan il-kapital ma tħallasx fl-2004, dan seta' jitħallas fi kwalunkwe ħin peress li kien ġie sottoskritt malli nħolqot SA Ducroire. Investitur privat f'ekonomija tas-suq jitlob għalhekk kumpens għar-riskji assoċjati ma' dan l-investiment, peress li jista' jitlef l-investiment kollu tiegħu jew parti minnu f'każ ta' falliment. Għaldaqstant il-kalkoli tal-awtoritajiet Belġjani ma jistgħux ikunu aċċettati.

(167)

Madankollu, wieħed għandu jirrikonoxxi li dan l-investitur jista' jqiegħed l-ammont tal-kapital mhux imħallas li jikkorrispondi għall-investiment tiegħu, u dan sakemm ma jitħallasx il-kapital, f'investimenti mingħajr riskju, likwidi għal żmien qasir jew medju, u b'hekk igawdi mir-rata ta' redditu applikabbli għal dan it-tip ta' investiment. Minn dan jirriżulta li tali investitur jistenna kumpens għal investiment f'kapital mhux imħallas li jikkorrispondi biss għall-primjum tar-riskju tal-kumpanija li qed jinvesti fiha (jiġifieri d-differenza bejn ir-rata ta' redditu mistenni ta' investiment f'kapital f'kumpanija simili u r-rata ta' redditu ta' investimenti mingħajr riskju likwidi għal żmien qasir sa medju) (81).

(168)

Għaldaqstant, ir-redditu mistenni minn investiment f'kapital, li jkun parzjalment imħallas, għandu jiġi stmat billi wieħed jikkunsidra l-kapital kollu sottoskritt, iżda bl-aġġustament tar-riżultat ta' rata ta' redditu mistenni għall-kapital mhux imħallas. Il-Kummissjoni simulat diversi xenarji fosthom il-każ l-aktar favorevoli għar-redditu mistenni, jiġifieri dak li jikkonsisti li taċċetta li, fuq il-EUR [45-65] miljun li kienu ta' benefiċċju għall-attività relatata mar-riskji kummerċjabbli, EUR [10-25] miljun biss tħallsu fl-2004 (jiġifieri l-kapital li kien diġà ta' benefiċċju għall-attività marbuta mar-riskji kummerċjabbli fi ħdan l-ONDD) u l-eċċess ta' EUR 36,6 miljun kien ikkunsidrat bħala kapital mhux imħallas u għalhekk kien jeħtieġ biss primjum ta' riskju. Din is-simulazzjoni saret biż-żieda, mar-redditu mistenni tal-attivitajiet kummerċjabbli, tad-dħul li jikkorrispondi għar-redditu ta' investiment mingħajr riskju għal żmien medju li jammonta għal EUR 36,6 miljun. B'mod aktar eżatt, mar-riżultat provviżorju tal-attivitajiet kummerċjabbli (82) jiżdied il-porzjon tal-kapital mhux imħallas immultiplikat bir-rata ta' redditu mistenni dak iż-żmien għal investimenti mingħajr riskju likwidi għal żmien medju (83). Wara dan l-ammont huwa diviż bil-kapital medju li huwa ta' benefiċċju għall-attività relatata mar-riskji kummerċjabbli. B'hekk, wieħed jikseb redditu azzjonarju medju (“return on average equity” jew “ROAE”) stmat għall-investiment ta' madwar 4 % għall-2005-2007. Ir-redditu mistenni, ikkalkulat b'dan il-mod, bil-kemm jilħaq ir-rata medja tal-bonds tal-Istat Belġjan fit-tul fl-2004 (ara l-premessa (155)).

(169)

Anki jekk wieħed juża rata ta' investiment ta' 3,5 %, kif jissuġġerixxi l-Belġju (ara l-premessa (80)), ir-redditu mistenni ma jinbidilx b'mod sinifikanti u ma jilħaqx l-ispiża tal-kapital stmata mill-Belġju nnifsu.

(170)

Ir-redditu stmat (imsemmi fil-premessa (168)) jikkunsidra l-għotjiet għall-provvediment ta' ugwalizzazzjoni għall-kuntrarju ta' dak li jirrakkomandaw l-awtoritajiet Belġjani. Peress li l-kostituzzjoni ta' din id-dispożizzjoni, imposta mill-awtoritajiet prudenzjali Belġjani, għandha l-għan li tibbilanċja r-riżultati fiż-żmien u tkopri telf futur li jista' jirriżulta mill-attività futura, huwa aktar xieraq li jiġu kkunsidrati fil-kalkolu tar-redditu. L-approċċ tal-Kummissjoni huwa konformi mal-approċċ tal-kontabilità, li jikkunsidra din id-dispożizzjoni bħala spiża li tnaqqas il-profitt. Anki kieku ma jiġix ikkunsidrat (bħala spiża fl-istima tal-profitt), ir-redditu mistenni ma jilħaqx l-ispiża tal-kapital stmat mill-awtoritajiet Belġjani nfushom (f'din id-deċiżjoni, il-Kummissjoni ma tiddeċidix dwar il-validità tal-istima magħmula mill-awtoritajiet Belġjani tal-ispiża tal-kapital peress li r-raġunament spjegat f'din id-deċiżjoni ma jibbażax fuq din il-figura).

(171)

Jidher għalhekk li anki jekk jintużaw l-elementi mressqa mill-awtoritajiet Belġjani — elementi li l-Kummissjoni tqis żbaljati — ir-redditu mistenni mill-attività marbuta mar-riskji kummerċjabbli kien insuffiċjenti sabiex jikkonvinċi investitur privat f'ekonomija tas-suq li jagħmel investiment bħal dan.

(172)

B'mod sussidjarju, rigward il-metodu rakkomandat mill-awtoritajiet Belġjani, bħala parti mit-tweġiba tagħhom għat-talba ta' informazzjoni tal-Kummissjoni ta' Diċembru 2007, biex jiġi stmat ir-redditu, jiġifieri l-proporzjon ROR, il-Kummissjoni tinnota li dan il-proporzjon ma ntużax fil-projezzjonijiet finanzjarji ex ante (il-pjan ta' direzzjoni tan-negozju) tal-ONDD. Barra minn hekk, proporzjon bħal dan jenfasizza d-dħul tekniku fuq il-fatturat, ma jikkunsidrax il-kapital investit u ma jindikax ir-redditu meta mqabbel ma' dan tal-aħħar. Lanqas ma jikkunsidra r-riżultat tal-attivitajiet purament finanzjarji, li madankollu jagħmel parti mir-redditu tal-kontabilità u li jitqassam lill-azzjonisti. Investitur tal-ekwità (bħal azzjonist) ma kienx juża din ir-rata waħdanija — li ma tindikax ir-redditu tal-ekwità jew dak tal-ammonti investiti — sabiex jivvaluta r-redditu tal-investiment li jkun ħaseb li jagħmel.

(173)

B'konklużjoni, is-EUR 36,6 miljun jikkostitwixxu vantaġġ mogħti mill-ONDD lil SA Ducroire fil-forma ta' kapital, li ma kinitx tikseb fuq is-suq bl-istess kundizzjonijiet.

(174)

L-allokazzjoni ta' kapital favur SA Ducroire hija deċiżjoni tal-ONDD imputabbli lill-Istat Belġjan peress li l-ONDD hija “istituzzjoni pubblika awtonoma” fis-sens tal-liġi pubblika Belġjana, imwaqqfa minn liġi organika tal-31 ta' Awwissu 1939. Il-membri tal-Bord tad-Diretturi tiegħu jinħatru (b'digriet deliberat fil-Kunsill tal-Ministri) u jistgħu jiċċaħdu mir-Re tal-Belġju (li jistabbilixxi wkoll il-ħlas u l-emolumenti tagħhom) fuq proposta, fil-parti l-kbira tagħhom, tal-Ministri federali responsabbli u tal-gvern reġjonali tat-tliet reġjuni tal-Belġju (84). Deskritti bħala “delegati ministerjali” il-membri tal-Bord tad-Diretturi maħtura fuq proposta tal-ministri responsabbli jistgħu, waqt id-deliberazzjonijiet tal-Bord tad-Diretturi, jissospendu d-deċiżjonijiet li huma jqisu kuntrarji għall-interessi tal-Istat. F'dan il-każ, id-delegat ministerjali li jkun issospenda d-deċiżjoni jirrapporta minnufih lill-ministru li tiegħu għandu l-mandat. Fl-aħħar nett, l-ONDD jibbenefika mill-garanzija tal-Istat Belġjan u jista' jintervjeni f'isem l-Istat Belġjan.

(175)

Għaldaqstant l-Istat Belġjan, irrappreżentat fil-Bord tad-Diretturi tal-ONDD u nnotifikat dwar id-deċiżjonijiet li jittieħdu fih, kien direttament involut fil-miżura ta' allokazzjoni tal-kapital lil SA Ducroire mill-ONDD. L-awtoritajiet Belġjani ma kkontestawx l-imputabbiltà lill-Istat Belġjan tal-miżura ta' allokazzjoni ta' kapital.

(176)

L-allokazzjoni ta' kapital lil SA Ducroire mill-ONDD, entità pubblika li l-imġiba tagħha hija imputabbli lill-Istat Belġjan, tikkostitwixxi għalhekk riżorsa tal-Istat fis-sens tal-Artikolu 107 tat-TFUE.

(177)

L-allokazzjoni ta' kapital li seħħet fl-2004 hija selettiva peress li hija tibbenefika direttament u biss lil SA Ducroire.

(178)

Peress li l-ONDD alloka l-kapital inkwistjoni mingħajr ma stenna redditu suffiċjenti, SA Ducroire ibbenefikat minn vantaġġ kompetittiv meta mqabbla ma' korpi privati tal-assigurazzjoni tal-kreditu li l-azzjonisti tagħhom jistennew ritorn fuq l-investiment tagħhom li jkun daqs ir-ritorn fuq l-investiment li jistgħu jiksbu minn investimenti komparabbli.

(179)

Fuq kollox, SA Ducroire ma kinitx tkun kapaċi tikseb kapital bħal dan fuq is-suq minħabba li r-redditu tal-investiment kien insuffiċjenti. Dan ifisser li, mingħajr il-kapital injettat mill-Istat permezz tal-ONDD, SA Ducroire ma kinitx tkun tista' testendi l-attivitajiet tagħha fuq is-suq kif fil-fatt għamlet.

(180)

F'dan ir-rigward, il-punt 3.2 tal-Komunikazzjoni dwar l-assigurazzjoni ta' esportazzjoni bi kreditu jispeċifika li l-injezzjonijiet ta' kapital mill-Istat mogħtija lil ċerti kumpaniji, u li jinvolvu element ta' għajnuna mill-Istat jekk dan tal-aħħar ma jaġixxix bħal investitur privat f'ekonomija tas-suq, joħolqu distorsjoni fil-kompetizzjoni.

(181)

B'mod konformi mal-ġurisprudenza tal-Qorti, titjib fil-pożizzjoni kompetittiva ta' kumpanija wara għajnuna mill-Istat jikkostitwixxi ġeneralment il-prova ta' distorsjoni tal-kompetizzjoni fir-rigward tal-kumpaniji l-oħrajn li ma jkunux gawdew minn għajnuna simili (85).

(182)

L-appoġġ mogħti mill-Istat lill-ONDD fil-forma ta' allokazzjoni ta' kapital favur ir-riskji kummerċjabbli għaldaqstant joħloq distorsjoni jew jhedded li joħloq distorsjoni tal-kompetizzjoni.

(183)

SA Ducroire tinsab f'kompetizzjoni ma' kumpaniji oħrajn tal-Unjoni Ewropea fuq is-suq tal-assigurazzjoni tal-kreditu. Dan kien japplika wkoll għall-ONDD f'dak li jirrigwarda r-riskji kummerċjabbli qabel ma SA Ducroire laqgħet l-attivitajiet ta' assigurazzjoni tal-kreditu mingħand l-ONDD għar-riskji għal żmien qasir, inklużi r-riskji kummerċjabbli.

(184)

Barra minn hekk, l-ONDD u SA Ducroire huma attivi fl-Istati Membri l-oħrajn, l-aktar permezz tal-akkwist ta' KUP, il-fergħa kummerċjali tal-aġenzija nazzjonali Ċeka ta' assigurazzjoni tal-kreditu għall-esportazzjoni.

(185)

Il-punt 3.2 tal-Komunikazzjoni dwar l-assigurazzjoni ta' esportazzjoni bi kreditu jindika li meta l-Istat jagħti lil xi korp tal-assigurazzjoni tal-kreditu għall-esportazzjoni, f'dak li jirrigwarda r-riskji kummerċjabbli, garanzija jew kapital mingħajr ma jaġixxi bħalma jagħmel investitur privat f'ekonomija tas-suq, tali garanzija jew tali injezzjoni ta' kapital tikkostitwixxi għajnuna li tfixkel il-kummerċ intrakomunitarju.

(186)

Skont ġurisprudenza kostanti, hemm effett fuq il-kummerċ bejn l-Istati Membri meta l-kumpanija jew il-kumpaniji li jibbenefikaw mill-għajnuna jwettqu l-attivitajiet tagħhom f'qasam miftuħ għall-kompetizzjoni u li huwa suġġett għall-kummerċ bejn l-Istati Membri (86).

(187)

Il-fatt li, fil-bidu ta' din il-proċedura, kompetitur minn Stat Membru ieħor li mhuwiex il-Belġju lmenta mid-distorsjoni tal-kompetizzjoni maħluqa mill-intervent ta' SA Ducroire fi Stat Membru ieħor (ir-Repubblika Ċeka) ikompli jikkonferma li SA Ducroire hija attiva f'settur soġġett għall-kummerċ bejn l-Istati Membri.

(188)

Għaldaqstant il-kummerċ bejn l-Istati Membri huwa affettwat biżżejjed mill-Miżura 3.

(189)

Fid-dawl ta' dan li ntqal, il-Miżura 3 tikkostitwixxi għajnuna.

(190)

Il-Kummissjoni tqis li din l-għajnuna hija għajnuna ġdida li ma kinitx ġiet innotifikata lilha minn qabel, u allura għajnuna illegali.

(191)

L-ONDD issottoskriva l-kapital inkwistjoni f'Settembru 2004 u SA Ducroire irċeviet l-attività relatata mar-riskji għal żmien qasir (inklużi r-riskji kummerċjabbli) fl-1 ta' Jannar 2005.

(192)

Għaldaqstant din il-miżura:

(193)

Il-porzjon tal-kapital ta' EUR 36,6 miljun mogħti mill-ONDD lil SA Ducroire, li ma ġiex innotifikat minn qabel lill-Kummissjoni, jikkostitwixxi għalhekk, mill-bidu, għajnuna ġdida illegali.

(194)

Il-Kummissjoni tivverifika l-kompatibbiltà tal-Miżura 3 skont id-dispożizzjonijiet tal-Komunikazzjoni dwar l-assigurazzjoni ta' esportazzjoni bi kreditu, applikabbli f'dan il-perjodu. Il-Komunikazzjoni l-ġdida lill-Istati Membri dwar l-applikazzjoni tal-Artikoli 107 u 108 tat-Trattat dwar il-Funzjonament tal-Unjoni Ewropea għall-assigurazzjoni ta' esportazzjoni bi kreditu għal żmien qasir (minn hawn 'il quddiem “il-Komunikazzjoni l-ġdida dwar l-assigurazzjoni ta' esportazzjoni bi kreditu”), ippubblikata fid-19 ta' Diċembru 2012, tapplika mill-1 ta' Jannar 2013.

(195)

Fil-prinċipju, skont il-punti 3.2. u 4.1. tal-Komunikazzjoni dwar l-assigurazzjoni ta' esportazzjoni bi kreditu, id-derogi previsti mid-dispożizzjonijiet tat-Trattat dwar l-għajnuniet mill-Istat ma japplikawx għall-għajnuna mogħtija għall-assigurazzjoni tar-riskji kummerċjabbli. Fil-fatt, din l-għajnuna żgur toħloq distorsjoni fil-kompetizzjoni bejn l-assiguraturi iżda twassal l-aktar għal “varjazzjonijiet fil-kopertura tal-assigurazzjoni li qiegħda għad-disposizzjoni għal riskji kummerċjabbli fi Stati Membri differenti, b'hekk ifixklu l-kompetizzjoni bejn kumpaniji fi Stati Membri u jkollhom effetti sekondarji fuq il-kummerċ intraKomunitarju irrispettivament ta' jekk esportazzjonijiet intraKomunitarji barra mil-Komunità humiex inkwistjoni. L-eċċezzjonijiet previsti fl-Artikolu 92 tat-Trattat ma japplikawx lil għajnuna għall-assigurazzjoni ta' riskji kummerċjabbli. L-effetti ta' tfixkil ta' din l-għajnuna fil-Komunità huma ta' importanza akbar minn kwalunkwe interess possibbli nazzjonali jew Komunitarju fl-appoġġ ta' esportazzjonijiet.” (87). Fi kliem ieħor, fil-prinċipju din l-għajnuna mhijiex eliġibbli għal ebda eżenzjoni prevista fl-Artikolu 107(3) tat-TFUE, b'mod partikolari dik prevista fl-Artikolu 107(3)(c) — għaliex tikkostitwixxi distorsjoni kbira ħafna tal-kompetizzjoni fi ħdan is-suq intern.

(196)

Barra minn hekk, l-għajnuna inkwistjoni ma tissodisfax il-kundizzjonijiet biex tkun eliġibbli għal xi eżenzjoni jew diversi eżenzjonijiet previsti fl-Artikolu 107(3) tat-TFUE. B'mod partikolari, kif kien indikat fid-deċiżjoni tal-ftuħ, l-għajnuna inkwistjoni ma tistax tikkostitwixxi għajnuna għas-salvataġġ jew għar-ristrutturar skont il-Linji Gwida tal-Komunità dwar l-għajnuna mill-Istat għas-salvataġġ u r-ristrutturar ta' kumpaniji f'diffikultà (88), b'mod partikolari minħabba r-raġunijiet li ġejjin:

(197)

Id-dispożizzjonijiet tal-Komunikazzjoni l-ġdida dwar l-assigurazzjoni ta' esportazzjoni bi kreditu probabbilment mhumiex sejrin jaffettwaw il-valutazzjoni tal-Kummissjoni.

(198)

Għaldaqstant, il-miżura inkwistjoni ma tistax tkun iddikjarata kompatibbli mas-suq intern skont l-Artikolu 107(3) tat-TFUE.

(199)

Skont il-punt 4.3 tal-Komunikazzjoni dwar l-assigurazzjoni ta' esportazzjoni bi kreditu, sakemm l-attività ta' riskji mhux kummerċjabbli tgawdi mill-appoġġ tal-Istat, biex ikun żgurat li l-kapital allokat għall-attività relatata mar-riskji mhux kummerċjabbli ma jkunx ta' benefiċċju għall-attività relatata mar-riskji kummerċjabbli u allura ma jfixkilx il-kompetizzjoni, il-kumpanija għandha, mill-inqas, ikollha amministrazzjoni separata u żżomm kontijiet separati għall-attivitajiet tal-assigurazzjoni tar-riskji kummerċjabbli u dawk tar-riskji mhux kummerċjabbli.

(200)

Skont l-awtoritajiet Belġjani, l-attivitajiet għal żmien qasir ilhom jitwettqu mill-1 ta' Jannar 2005 fi ħdan SA Ducroire bħala parti mit-trasferiment ta' attività eżistenti bil-kapital eżistenti tagħha (mingħajr l-allokazzjoni ta' kapital supplimentari). B'mod sussidjarju, il-Belġju jikkunsidra li l-kapital ingħata taħt termini aċċettabbli għal investitur privat. Peress li, skont l-awtoritajiet Belġjani, SA Ducroire ma tgawdix mill-appoġġ tal-Istat — anki għall-attività relatata mar-riskji mhux kummerċjabbli li twettaq -, mhux meħtieġ li jinżammu kontijiet separati.

(201)

Fis-sezzjoni V.1.1.2, kien konkluż li l-kapital allokat għall-attività trasferita kien jammonta għal EUR [45-75] miljun u għalhekk kien hemm kapital addizzjonali ta' EUR [75-100] miljun, li minnhom EUR [35-65] miljun kienu ta' benefiċċju de facto għall-attività relatata mar-riskji mhux kummerċjabbli. Dawn il-EUR [35-65] miljun kienu esklużi mill-kwalifika ta' għajnuna għal din ir-raġuni. L-argument tal-awtoritajiet Belġjani li l-attività tar-riskji mhux kummerċjabbli ma tgawdix minn appoġġ tal-Istat għaldaqstant għandu jkun miċħud peress li ntweriet l-eżistenza ta' kapital addizzjonali li minnu bbenefikat parzjalment l-attività tar-riskji mhux kummerċjabbli. Barra minn hekk, il-projezzjonijiet finanzjarji tal-2004 għall-attività kollha ta' SA Ducroire kienu jipprovdu redditu mistenni aktar baxx mir-rata mingħajr riskju ta' dak iż-żmien (89). Ir-redditu mistenni għalhekk ma kienx suffiċjenti biex jissodisfa r-rekwiżiti ta' investitur privat f'ekonomija tas-suq. Għaldaqstant jista' jkun konkluż li l-attività relatata mar-riskji mhux kummerċjabbli kompliet tgawdi minn appoġġ mill-Istat.

(202)

Peress li l-attività tar-riskji mhux kummerċjabbli gawdiet u għadha tgawdi minn appoġġ mill-Istat, SA Ducroire kellha mill-ħolqien tagħha tikkonforma mal-punt 4.3 tal-Komunikazzjoni dwar l-assigurazzjoni ta' esportazzjoni bi kreditu li timponi amministrazzjoni u kontijiet separati li jagħmlu distinzjoni bejn l-attivitajiet relatati mar-riskji kummerċjabbli u dawk relatati mar-riskji mhux kummerċjabbli u dan sakemm tibqa' twettaq l-attività tagħha marbuta mar-riskji kummerċjabbli. Id-dispożizzjonijiet tal-Komunikazzjoni l-ġdida dwar l-assigurazzjoni ta' esportazzjoni bi kreditu jżommu dan l-obbligu (ara l-punt 15 tal-Komunikazzjoni l-ġdida dwar l-assigurazzjoni ta' esportazzjoni bi kreditu).

(203)

Għalhekk SA Ducroire kienet u baqgħet dejjem marbuta b'dan l-obbligu. Amministrazzjoni separata u kontijiet separati għall-attività tar-riskji mhux kummerċjabbli u dik tar-riskji kummerċjabbli għandhom għalhekk jiddaħħlu minnufih. Jekk ma jsirx dan, l-appoġġ ta' EUR [35-65] miljun mogħti lill-attività marbuta mar-riskji mhux kummerċjabbli jkollu jiġi kkwalifikat bħala għajnuna. Fil-fatt, il-konklużjoni ta' din id-deċiżjoni li dan l-ammont ta' EUR [35-65] miljun huwa ta' benefiċċju għall-attività relatata mar-riskji mhux kummerċjabbli hija bbażata fuq ċerti suppożizzjonijiet parzjalment mhux verifikabbli f'kuntest ta' rikostruzzjoni retrospettiva ta' kontijiet separati (fil-fatt, formalment ma teżisti l-ebda separazzjoni tal-kontijiet fi ħdan SA Ducroire). Il-Kummissjoni mhijiex sejra taċċetta aktar rikostruzzjoni retrospettiva bħal din jekk ikollha terġa' tinvestiga l-użu tal-kapital ta' SA Ducroire fil-futur. L-obbligu li jkun hemm amministrazzjoni separata u kontijiet separati għandu eżattament l-għan li jevita l-ħtieġa ta' tali studju retrospettiv li jibbaża neċessarjament fuq ċertu numru ta' suppożizzjonijiet parzjalment mhux verifikabbli.

(204)

Din id-deċiżjoni u b'mod partikolari l-kalkolu tal-ammont ta' EUR 36,6 miljun huma bbażati fuq kontijiet (karta tal-bilanċ u rapporti tal-introjtu) separati għar-riskji kummerċjabbli u mhux kummerċjabbli fil-31 ta' Diċembru 2011 kif ippreżentati mill-awtoritajiet Belġjani f'Mejju 2012. Għalhekk mhuwiex aċċettabbli li l-introduzzjoni ta' amministrazzjoni separata u kontijiet separati ssir abbażi ta' suppożizzjonijiet u metodi oħrajn ħlief dawk użati għad-determinazzjoni tal-ammonti ppreżentati taħt din il-proċedura. B'mod partikolari, mhuwiex aċċettabbli li wieħed jalloka lill-attività relatata mar-riskji mhux kummerċjabbli inqas kapital — u allura aktar kapital għall-attività relatata mar-riskji kummerċjabbli — minn dak imsemmi fil-karta tal-bilanċ separata tal-31 ta' Diċembru 2011 ippreżentata mill-awtoritajiet Belġjani f'Mejju 2012.

(205)

B'mod sussidjarju, il-Kummissjoni tenfasizza li n-nuqqas ta' kontijiet separati mill-ħolqien ta' SA Ducroire ikkomplika b'mod sinifikanti l-analiżi tal-Miżura 3 u ġiegħel lill-Kummissjoni tagħmel l-analiżi tagħha abbażi ta' ċerti suppożizzjonijiet. Minħabba li SA Ducroire kellha l-obbligu li żżomm kontijiet separati, din ma tistax tikkritika lill-Kummissjoni talli għamlet ċerti suppożizzjonijiet jew żviluppat approċċ ikkumplikat fl-analiżi tagħha. Fil-fatt, mingħajr dan l-approċċ ikkumplikat, il-Kummissjoni setgħet sempliċement tikkunsidra l-EUR [75-100] miljun kollha bħala vantaġġ skont l-Artikolu 107(1), tat-TFUE.

(206)

F'din id-deċiżjoni, il-Kummissjoni eskludiet mill-kwalifika ta' għajnuna l-porzjon tal-kapital li kien ta' benefiċċju de facto għall-attività marbuta mar-riskji mhux kummerċjabbli, anki jekk din il-parti tal-kapital kienet appoġġ li ma kienx jissodisfa r-rekwiżiti ta' investitur privat. L-ammont tal-għajnuna mhux kompatibbli għalhekk ma jinkludix l- appoġġ lill-attivitajiet mhux kummerċjabbli. Huwa għalhekk fil-loġika ta' din id-deċiżjoni li l-irkupru tal-għajnuna mhux kompatibbli jkun strettament iffinanzjat mill-attivitajiet kummerċjabbli u l-kapital tiegħu, l-uniku mezz li permezz tiegħu tista' tiġi stabbilita mill-ġdid is-sitwazzjoni kompetittiva fuq is-suq tar-riskji kummerċjabbli li kienet teżisti qabel l-għoti tal-għajnuna mhux kompatibbli. Kif indikat qabel, dan l-irkupru għandu jsir fuq il-bażi tal-kontijiet separati b'mod konsistenti mal-kummenti tal-awtoritajiet Belġjani ta' Mejju 2012.

(207)

Il-Kummissjoni ssib li, fost it-tliet miżuri li dwarhom saret il-proċedura ta' investigazzjoni formali, il-Miżuri 1 u 2 (il-garanzija tal-Istat u t-trasferimenti interni possibbli ta' riżorsi favur ir-riskji kummerċjabbli fi ħdan l-ONDD) mhumiex għjanuna fis-sens tal-Artikolu 107(1) tat-TFUE. Iżda, l-analiżi tal-Miżura 3 twassal għall-konklużjoni li teżisti għajnuna fis-sens tal-Artikolu 107(1) tat-TFUE, li tammonta għal EUR 36,6 miljun. Peress li l-ONDD (f'isem l-Istat Belġjan) illegalment implimenta l-Miżura 3 bi ksur tal-Artikolu 108(3) tat-TFUE, u li din l-għajnuna mhijiex kompatibbli mas-suq intern, din trid tiġi rkuprata. L-irkupru ta' din l-għajnuna tkun iffinanzjat mill-attività marbuta mar-riskji kummerċjabbli ta' SA Ducroire.

(a)

l-ammont totali f'kapital u imgħax tal-għajnuna li għandu jirkupra mingħand SA Ducroire;

(b)

deskrizzjoni dettaljata tal-miżuri li diġà ttieħdu u dawk previsti sabiex jikkonforma ma' din id-deċiżjoni;

(c)

id-dokumenti li juru li SA Ducroire ġiet ordnata tħallas lura l-għajnuna.