17.9.2011

MT

Il-Ġurnal Uffiċjali tal-Unjoni Ewropea

L 241/2

---

REGOLAMENT TA’ IMPLIMENTAZZJONI TAL-KUMMISSJONI (UE) Nru 926/2011

tat-12 ta’ Settembru 2011

għall-iskopijiet tad-Deċiżjoni tal-Kunsill 2009/470/KE fir-rigward tal-għajnuna finanzjarja tal-Unjoni lil-laboratorji ta’ referenza tal-UE għall-għalf u l-ikel u s-settur tas-saħħa tal-annimali

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Deċiżjoni tal-Kunsill 2009/470/KE tal-25 ta’ Mejju 2009 dwar in-nefqa fil-kamp veterinarju (1), u b’mod partikolari l-Artikolu 31(2) tagħha,

Billi:

(1)

Id-Deċiżjoni 2009/470/KE tistipula l-proċeduri li jirregolaw il-kontribuzzjoni finanzjarja tal-Unjoni lejn miżuri ta’ spezzjoni fil-kamp veterinarju. Skont dik id-Deċiżjoni, l-Unjoni għandha tikkontribwixxi fit-titjib tal-effiċjenza tal-ispezzjonijiet veterinarji billi tagħti għajnuna finanzjarja lil-laboratorji ta’ referenza tal-UE u dawk ta’ kollegament tal-UE. Hi tistipula li kull laboratorju ta’ kollegament jew ta’ referenza tal-UE li jkun nominat bħala tali skont il-leġiżlazzjoni veterinarja tal-Unjoni u li jaqdi d-dmirijiet u r- rekwiżiti li hemm imniżżla fiha, jista’ jirċevi għajnuna mill-Unjoni.

(2)

Ir-Regolament (KE) Nru 882/2004 tal-Parlament Ewropew u tal-Kunsill tad-29 ta’ April 2004 dwar il-kontrolli uffiċjali mwettqa biex tiġi żgurata l-verifikazzjoni tal-konformità mal-liġi tal-għalf u l-ikel, mas-saħħa tal-annimali u mar-regoli dwar il-welfare tal-annimali (2), jistabbilixxi l-kompiti, id-dmirijiet u r-rekwiżiti ġenerali għal-laboratorji ta’ referenza tal-UE għall-ikel u l-għalf u għas-saħħa tal-annimali u l-annimali ħajjin. Il-laboratorji ta’ referenza tal-UE għall-ikel u l-għalf huma mniżżla fil-Parti I filwaqt li l-laboratorji ta’ refernza tal-UE għas-saħħa tal-annimali u l-annimali ħajjin huma mniżżla fil-Parti II tal-Anness VII ta’ dak ir-Regolament.

(3)

Ir-Regolament tal-Kummisjoni (KE) Nru 1754/2006 tat-28 ta’ Novembru 2006 li jistabbilixxi r-regoli ddettaljati għall-għoti ta’ għajnuna finanzjarja tal-Komunità lil-laboratorji Komunitarji ta’ referenza għall-għalf u l-ikel tal-annimali u għas-settur tas-saħħa tal-annimali (3) jistabbilixxi r-regoli dettaljati dwar l-għoti ta’ għajnuna finanzjarja tal-Unjoni għall-operat tal-laboratorji ta’ referenza tal-UE, kif jistipulaw l-Artikolu 31 tad-Deċiżjoni 2009/470/KE u l-Artikolu 32 tar-Regolament (KE) Nru 882/2004, u għall-organizzazzjoni ta’ sessjonijiet ta’ ħidma.

(4)

Skont ir-Regolament (KE) Nru 1754/2006, ir-relazzjoni bejn il-Kummissjoni u l-laboratorji ta’ referenza tal-UE individwali għandha tiġi stabbilita permezz ta’ ftehimiet ta’ sħubija. It-tul ta’ żmien ta’ ftehimiet ta’ sħubija hu ta’ ħames snin u dawn għandhom ikunu akkumpanjati minn programm ta’ ħidma multiannwali.

(5)

Il-laboratorji ta’ referenza tal-UE huma elenkati fl-Anness VII tar-Regolament (KE) Nru 882/2004. Iċ-Ċentru Konġunt Għar-Riċerka inħatar għal xi wħud minnhom. Billi dan huwa direttorat ġenerali tal-Kummissjoni, dan ir-Regolament ma japplikax għalih. Ir-regoli li fuqhom titmexxa l-għajnuna finanzjarja tal-Unjoni għaċ-Ċentru Konġunt Għar-Riċerka huma stabbiliti fl-arranġament amministrattiv annwali.

(6)	Il-livell tal-għajnuna finanzjarja annwali tal-Unjoni għall-attività ta’ ċerti laboratorji ta’ referenza tal-UE huwa deċiż fuq bażi ta’ kull sena permezz ta’ deċiżjonijiet finanzjarji annwali marbuta mas-sikurezza tal-għalf u l-ikel u s-saħħa tal-annimali u l-annimali ħajjin.

(7)

Fl-2008, is-Servizz tal-Awditjar Intern tal-Kummissjoni (IAS) wettaq verifika fuq immaniġġjar ta’ għotja f’attività tas-sikurezza tal-ikel, is-saħħa u l-benessri tal-annimali u s-saħħa tal-pjanti. L-IAS ikkonkluda li r-regoli dettaljati dwar l-għoti ta’ għajnuna finanzjarja tal-Unjoni lil-laboratorji ta’ referenza tal-UE għall-għalf u l-ikel u s-settur tas-saħħa tal-annimali għandhom jiġu ssimplifikati. Biex jiġu ssimplifikati r-regoli, l-IAS issuġġerixxa li l-Kummissjoni tkompli tadotta deċiżjonijiet finanzjarji annwali fuq bażi ta’ kull sena, iżda mingħajr il-ħtieġa ta’ ftehimiet ta’ sħubija bejn il-Kummissjoni u kull laboratorju ta’ referenza individwali tal-UE.

(8)	Il-laboratorji ta’ referenza tal-UE jeħtieġu li jorganizzaw laqgħat u attivitajiet ta’ taħriġ b’mod regolari. Għaldaqstant, l-attivitajiet u l-laqgħat għandhom jiġu miżjuda mal-lista tan-nefqa eliġibbli ta’ dan ir-Regolament.

(9)	Għal raġunijiet ta’ kontroll finanzjarju, l-Artikoli 9, 36 u 37 tar-Regolament tal-Kunsill (KE) Nru 1290/2005 tal-21 ta’ Ġunju 2005 dwar il-finanzjament tal-Politika Agrikola Komuni (4) huma applikabbli.

(10)	Minħabba li għandhom isiru għadd ta’ emendi lir-Regolament (KE) Nru 1754/2006, dak ir-Regolament għandu, f’ġieħ iċ-ċarezza, jiġi revokat u jeħodlu postu dan ir-Regolament, filwaqt li jiġi kkunsidrat ir-Regolament (KE) Nru 882/2004.

(11)

Dan ir-Regolament għandu japplika għal-laboratorji ta’ referenza kollha tal-UE li l-ftehimiet ta’ qafas tal-isħubija tagħhom jintemmu fl-2011 u għal-laboratorji ta’ referenza tal-UE li l-ftehimiet ta’ qafas tal-isħubija tagħhom jiġu terminati permezz ta’ ftehim reċiproku. Fil-każ ta’ laboratorji ta’ referenza tal-UE, li l-ftehimiet ta’ qafas tal-isħubija tagħhom ma jiġux terminati, jibqa’ japplika r-Regolament (KE) Nru 1754/2006.

(12)	Il-miżuri previsti f’dan ir-Regolament huma f’konformità mal-opinjoni tal-Kumitat Permanenti għall-Katina Alimentari u s-Saħħa tal-Annimali,

ADOTTAT DIN ID-DEĊIŻJONI:

KAPITOLU I

DISPOŻIZZJONIJIET ĠENERALI

Artikolu 1

Is-suġġett

Dan ir-Regolament jistabbilixxi r-regoli għall-implimentazzjoni tar-Regolament (KE) Nru 882/2004 u d-Deċiżjoni 2009/470/KE fir-rigward tal-arranġament għall-għoti tal-għajnuna finanzjarja tal-Unjoni stipulata fl-Artikolu 32(7) tar-Regolament (KE) Nru 882/2004 u l-Artikolu 31(1) tad-Deċiżjoni 2009/470/KE għall-attivitajiet tal-laboratorji ta’ referenza tal-UE (“laboratorji”) għajr iċ-Ċentru Konġunt għar-Riċerka, inkluż għall-organizzazzjoni ta’ sessjonijiet ta’ ħidma, u l-kundizzjonijiet li skonthom tingħata din l-għajnuna.

Dan ir-Regolament għandu japplika għal-laboratorji ta’ referenza kollha tal-UE li l-ftehimiet ta’ qafas tal-isħubija tagħhom jintemmu fl-2011 u għal-laboratorji ta’ referenza tal-UE li l-ftehimiet ta’ qafas tal-isħubija tagħhom jiġu terminati permezz ta’ ftehim reċiproku. Fil-każ ta’ laboratorji tal-UE, li l-ftehimiet ta’ qafas tal-isħubija tagħhom ma jiġux terminati, jibqa’ japplika r-Regolament (KE) Nru 1754/2006.

Artikolu 2

Programm ta’ ħidma u baġit stmat

1.   Il-laboratorji għandhom, sal-1 ta’ Settembru ta’ kull sena kalendarja “n”:

(a)	jiffissaw l-attivitajiet tal-Unjoni ppjanati matul is-sena kalendarja “n + 1”, inkluża l-organizzazzjoni ta’ sessjonijiet ta’ ħidma, (“il-programm ta’ ħidma”) b’kollaborazzjoni mas-servizzi tal-Kummissjoni;

(b)	jissottomettu lill-Kummissjoni: (i) il-programm ta’ ħidma; (ii) il-baġit stmat għal kull attività li tikkonċerna n-nefqa tal-programm ta’ ħidma (“il-baġit stmat”).

2.   Il-laboratorji għandhom jipprovdu l-baġit stmat b’forma elettronika b’konformità mal-Annessi I(a) u I(b).

Artikolu 3

Rata tal-kambju

Għal baġits stmati f’munita oħra għajr l-euro, il-Kummissjoni għandha tapplika l-ewwel rata tal-kambju ffissata f’Settembru tas-sena “n”, kif maħruġa fis-serje C ta’ Il-Ġurnal Uffiċjali tal-Unjoni Ewropea.

Artikolu 4

L-approvazzjoni

Il-Kummissjoni għandha tadotta deċiżjoni finanzjarja annwali (“id-deċiżjoni finanzjarja annwali”) li tapprova l-programmi ta’ ħidma u l-baġits korrespondenti għal-laboratorji kollha.

Kwalunkwe emenda għall-programmi ta’ ħidma għandha tkun suġġetta għall-ftehim miktub minn qabel tal-Kummissjoni.

Artikolu 5

Prefinanzjament

Wara l-addozzjoni mill-Kummissjoni tad-deċiżjoni finanzjarja annwali, il-laboratorji jistgħu jitolbu prefinanzjament li jammonta għal 70 % tal-għajnuna totali għall-programm ta’ ħidma tagħhom.

Artikolu 6

Pagament tal-għajnuna

Il-bilanċ tal-għajnuna finanzjarja tal-Unjoni għall-programmi ta’ ħidma għandu jitħallas lil-laboratorji wara l-approvazzjoni tar-rapporti finanzjarji u tekniċi msemmija fl-Artikoli 11 u 16 sakemm il-laboratorji jkunu:

(a)	implimentaw il-programm ta’ ħidma b’mod effettiv;

(b)	issottemettew rapporti finanzjarji u tekniċi fil-limiti ta’ żmien stipulati f’dawk l-Artikoli.

Artikolu 7

Dokumenti ta’ sostenn

1.   Il-laboratorji għandhom jirreġistraw in-nefqa tal-programmi ta’ ħidma fis-sistema tal-kontabbilità tal-kostijiet tagħhom u jżommu d-dokumenti oriġinali jew kopji ċċertifikati kollha għal seba’ snin għal finijiet ta’ kontroll finanzjarju.

2.   Il-laboratorji għandhom iżommu d-dokumenti ta’ sostenn oriġinali jew kopji ċċertifikati tad-dokumenti ta’ sostenn kollha marbuta mal-programm ta’ ħidma li jirċievi għajnuna finanzjarja tal-Unjoni.

3.   Id-dokumenti ta’ sostenn, li jservu ta’ xhieda għan-nefqa kollha msemmija fl-applikazzjoni għal rimborż, għandhom jintbagħtu lill-Kummissjoni fuq rikjesta.

Artikolu 8

Kontrolli

Għal finijiet ta’ kontroll finanzjarju, japplikaw l-Artikoli 9, 36 u 37 tar-Regolament (KE) Nru 1290/2005.

KAPITOLU II

L-ATTIVITAJIET TAL-LABORATORJI, ESKLUŻA L-ORGANIZZAZZJONI TA’ SESSJONIJIET TA’ ĦIDMA

Artikolu 9

Definizzjoni

L-attivitajiet tal-laboratorji huma definiti bħala dawk il-kompiti li jfeġġu mir-responsabbiltajiet tagħhom stabbiliti fl-Artikolu 32 tar-Regolament (KE) Nru 882/2004.

Artikolu 10

L-eliġibbiltà

1.   Huma eliġibbli bħala attivitajiet tal-laboratorji n-nefqa marbuta mal-persunal dedikat għall-attivitajiet tal-laboratorji, is-sottokuntrattar, it-tagħmir kapitali, il-konsumibbli, il-bgħit tal-kampjuni għal analiżijiet komparattivi, il-missjonijiet, il-laqgħat, l-attivitajiet ta’ taħriġ u l-ispejjeż ġenerali neċessarji (overheads).

2.   In-nefqa msemmija fil-paragrafu 1 għandha tkun eliġibbli fil-limiti ffissati fid-deċiżjoni finanzjarja annwali rilevanti u skont ir-regoli tal-eliġibbiltà ffissati fl-Anness II.

3.   Il-laboratorji għandhom jissottomettu rikjesta bil-miktub lill-Kummissjoni għall-approvazzjoni tagħha minn qabel għal żjieda fil-baġit ta’ xi wieħed mill-punti ta’ nfiq (persunal, sottokuntrattar, tagħmir kapitali, konsumibbli, bgħit tal-kampjuni għal analiżijiet komparattivi, missjonijiet, laqgħat, attivitajiet ta’ taħriġ) u/jew xi waħda mill-attivitajiet imsemmija fil-programm ta’ ħidma b’aktar minn 10 % u bla ma jinqabżu l-ispejjeż eliġibbli totali stipulati fid-deċiżjoni finanzjarja annwali.

Artikolu 11

Is-sottomissjoni tar-rapporti dwar l-attivitajiet tal-laboratorji

1.   Il-laboratorji għandhom jissottemettu lill-Kummissjoni, mhux aktar tard mill-31 ta’ Marzu tas-sena kalendarja “n + 2”, dawn ir-rapporti:

(a)	verżjoni stampata u verżjoni elettronika tar-rapport finanzjarju tagħhom li jkun tħejja skont l-Annessi III(a) u (b);

(b)	rapport teniku tal-attivitajiet tagħhom iċċertifikat mid-direttur tekniku tal-laboratorju.

Madankollu, fil-każ ta’ laqgħat u attivitajiet ta’ taħriġ, ir-rapport finanzjarju għandu jitħejja u jiġi sottomess skont l-Artikolu 16.

It-timbru postali għandu jservi ta’ xhieda tad-data ta’ meta jkunu ġew impustati r-rapport finanzjarju u dak tekniku.

2.   L-għajnuna finanzjarja tal-Unjoni tista’ titnaqqas jekk il-programm ta’ ħidma ma jitwettaqx b’mod effettiv u/jew b’mod sħiħ.

3.   Jekk ir-rapport finanzjarju u dak tekniku ma jintbagħtux fil-limitu ta’ żmien provdut fil-paragrafu 1, l-għajnuna finanzjarja tal-Unjoni għandha titnaqqas.

Jekk l-iskadenza tas-sottomissjoni tinqabeż b’aktar minn xahar, l-għajnuna finanzjarja tal-Unjoni għandha titnaqqas b’25 %.

Jekk l-iskadenza tas-sottomissjoni tinqabeż b’aktar minn xahrejn, l-għajnuna finanzjarja tal-Unjoni għandha titnaqqas b’50 %.

Jekk l-iskadenza tas-sottomissjoni tinqabeż b’aktar minn tliet xhur, l-għajnuna finanzjarja tal-Unjoni għandha titnaqqas b’75 %.

Jekk l-iskadenza tas-sottomissjoni tinqabeż b’aktar minn erba’ xhur, l-għajnuna finanzjarja tal-Unjoni għandha titnaqqas b’100 %.

Artikolu 12

Ir-rati tal-kambju għal ħlasijiet f’munita oħra għajr l-euro

Għal rikjesti li jirrigwardjaw il-ħlasijiet tal-bilanċi sottomessi f’munita oħra għajr l-euro, il-Kummissjoni għandha tapplika l-ewwel rata tal-kambju ffissata f’Marzu tas-sena “n”, kif tkun inħarġet fis-serje C ta’ Il-Ġurnal Uffiċjali tal-Unjoni Ewropea.

Madankollu, ir-rata tal-kambju għal rikjesti għal ħlas tal-bilanċi għal laqgħat u attivitajiet ta’ taħriġ sottomessi f’munita oħra għajr l-euro għandha tkun ir-rata stipulata fl-Artikolu 17.

Artikolu 13

Taxxa fuq il-Valur Miżjud

It-taxxa fuq il-valur miżjud (VAT) mhux rikoverabbli li tkun tħallset mil-laboratorji għandha titqies bħala nefqa eliġibbli skont dan ir-Regolament sakemm il-laboratorji jissottomettu, flimkien mar-rapport finanzjarju stipulat fl-Artikolu 11 (1), attestazzjoni mill-Ministeru tal-Finanzi tal-Istat Membri rilevanti jew minn awtorità ekwivalenti, li tikkonferma li l-laboratorju mhux suġġett jew huwa suġġett b’mod parzjali għall-VAT u li l-qasam tal-attività tiegħu mhux suġġett għal din it-taxxa.

KAPITOLU III

ORGANIZZAZZJONI TA’ SESSJONIJIET TA’ ĦIDMA

Artikolu 14

Definizzjoni

Sessjoni ta’ ħidma hija data annwali għal informazzjoni u koordinazzjoni li għaliha l-Laboratorji ta’ Referenza Nazzjonali kollha huma mistiedna mil-laboratorji.

Artikolu 15

L-eliġibbiltà

1.   Huma eliġibbli għall-organizzazzjoni tas-sessjonijiet ta’ ħidma l-infiq marbut mal-ispejjeż għal vjaġġ, l-ispejjeż tal-lukandi u l-kumpens għas-sussistenza ta’ kuljum għal minimu ta’ 32 parteċipant fis-sessjonijiet ta’ ħidma, li jinkludu stedina għal tal-anqas parteċipant wieħed minn kull Stat Membru.

2.   Infiq ieħor addizzjonali marbut mal-ispejjeż tal-ivvjaġġar, l-ispejjeż tal-lukandi u l-kumpens għas-sussistenza ta’ kuljum għal massimu ta’ tliet kelliema mistiedna fis-sessjonijiet ta’ ħidma għandu jkun eliġibbli taħt il-kappa tal-organizzazzjoni tas-sessjonijiet ta’ ħidma.

3.   Infiq ieħor addizzjonali marbut mal-ispejjeż tal-ivvjaġġar, l-ispejjeż tal-lukandi u l-kumpens għas-sussistenza ta’ kuljum għal massimu ta’ għaxar rappreżentanti ta’ pajjiżi terzi fis-sessjonijiet ta’ ħidma għandu jkun eliġibbli taħt il-kappa tal-organizzazzjoni tas-sessjonijiet ta’ ħidma.

4.   L-infiq għas-sessjonijiet ta’ ħidma msemmi fil-paragrafi 1, 2 u 3 għandu jkun eliġibbli fil-limiti ffissati fid-deċiżjonijiet finanzjarji annwali u skont ir-regoli tal-eliġibbiltà ffissati fl-Anness IV. Derogi mill-paragrafi 1, 2 u 3 jistgħu jingħataw f’każijiet ġustifikati kif jixraq skont id-deċiżjonijiet finanzjarji annwali.

Artikolu 16

Is-sottomissjoni tar-rapporti dwar is-sessjonijiet ta’ ħidma

1.   Il-laboratorji għandhom jissottomettu lill-Kummissjoni, sa mhux aktar minn xahrejn wara s-sessjoni ta’ ħidma, dawn li ġejjin:

(a)	verżjoni stampata u verżjoni elettronika tar-rapport finanzjarju tagħhom dwar is-sessjonijiet ta’ ħidma li jkun tħejja skont l-Anness V;

(b)	rapport teniku ffirmat mid-direttur tekniku tal-laboratorju.

It-timbru postali għandu jservi ta’ xhieda tad-data ta’ meta jkun ġew impustati r-rapport finanzjarju u dak tekniku.

2.   Jekk ir-rapport finanzjarju u dak tekniku tas-sessjoni ta’ ħidma ma jintbagħtux fil-limitu ta’ żmien provdut fil-paragrafu 1, l-għajnuna finanzjarja tal-Unjoni għandha titnaqqas.

Jekk l-iskadenza tas-sottomissjoni tinqabeż b’aktar minn xahar, l-għajnuna finanzjarja tal-Unjoni għandha titnaqqas b’25 %.

Jekk l-iskadenza tas-sottomissjoni tinqabeż b’aktar minn xahrejn, l-għajnuna finanzjarja tal-Unjoni għandha titnaqqas b’50 %.

Jekk l-iskadenza tas-sottomissjoni tinqabeż b’aktar minn tliet xhur, l-għajnuna finanzjarja tal-Unjoni għandha titnaqqas b’75 %.

Jekk l-iskadenza tas-sottomissjoni tinqabeż b’aktar minn erba’ xhur, l-għajnuna finanzjarja tal-Unjoni għandha titnaqqas b’100 %.

Artikolu 17

Ir-rata tal-kambju għall-ħlasijiet f’munita oħra għajr l-euro

Fil-każ ta’ rikjesti li jirrigwardjaw il-ħlasijiet ta’ bilanċi sottomessi f’munita oħra għajr l-euro, il-Kummissjoni għandha tapplika l-ewwel rata tal-kambju ffissata fix-xahar li fih tkun saret is-sessjoni ta’ ħidma, kif maħruġa fis-serje C ta’ Il-Ġurnal Uffiċjali tal-Unjoni Ewropea.

KAPITOLU IV

DISPOŻIZZJONIJIET FINALI

Artikolu 18

Revoka

Ir-Regolament (KE) Nru 1754/2006 huwa rrevokat.

Referenzi għar-Regolament (KE) Nru 1754/2006, għandhom jiftiehmu bħala referenzi għal dan ir-Regolament.

Artikolu 19

Dħul fis-seħħ u applikabbiltà

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika għall-għajnuna finanzjarja tal-Unjoni mogħtija lil-laboratorji mill-2012 ‘il quddiem.

---

(1)  ĠU L 155, 18.6.2009, p. 30.

(2)  ĠU L 165, 30.4.2004, p. 1.

(3)  ĠU L 331, 29.11.2006, p. 8.

(4)  ĠU L 209, 11.8.2005, p. 1.

---

---

---

---

---

---

---

---