16.12.2011

MT

Il-Ġurnal Uffiċjali tal-Unjoni Ewropea

L 334/6

---

DEĊIŻJONI TAL-KUNSILL

tal-5 ta’ Diċembru 2011

dwar il-konklużjoni tal-Ftehim bejn l-Unjoni Ewropea u r-Repubblika tal-Kroazja dwar il-parteċipazzjoni tar-Repubblika tal-Kroazja fil-ħidma taċ-Ċentru Ewropew għall-Monitoraġġ tad-Droga u d-Dipendenza fuq id-Droga

(2011/841/UE)

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 168(5) flimkien mal-Artikolu 218(6)(a)(v) tiegħu,

Wara li kkunsidra l-proposta mill-Kummissjoni Ewropea,

Wara li kkunsidra l-kunsens tal-Parlament Ewropew,

Billi:

(1)

Ir-Regolament (KE) Nru 1920/2006 tal-Parlament Ewropew u tal-Kunsill tat-12 ta’ Diċembru 2006 dwar iċ-Ċentru Ewropew għall-Monitoraġġ tad-Droga u d-Dipendenza fuq id-Droga (1) jipprovdi, fl-Artikolu 21 tiegħu, illi ċ-Ċentru Ewropew għall-Monitoraġġ tad-Droga u d-Dipendenza fuq id-Droga għandu jkun miftuħ għall-parteċipazzjoni ta’ kwalunkwe pajjiż terz li jikondividi l-interessi tal-Unjoni u l-Istati Membri tagħha, fl-għanijiet u l-ħidma tiegħu.

(2)

Il-ftehim bejn l-Unjoni Ewropea u r-Repubblika tal-Kroazja dwar il-parteċipazzjoni tar-Repubblika tal-Kroazja fil-ħidma taċ-Ċentru għall-Monitoraġġ tad-Droga u d-Dipendenza fuq id-Droga (minn hawn 'il quddiem “il-Ftehim”) kien iffirmat f'isem l-Unjoni fis-6 ta’ Diċembru 2010, soġġett għall-konklużjoni tiegħu.

(3)	Il-Ftehim għandu jiġi approvat,

ADOTTA DIN ID-DEĊIŻJONI:

Artikolu 1

Il-ftehim bejn l-Unjoni Ewropea u r-Repubblika tal-Kroazja dwar il-parteċipazzjoni tar-Repubblika tal-Kroazja fiċ-Ċentru għall-Monitoraġġ tad-Droga u d-Dipendenza fuq id-Droga (minn hawn 'il quddiem “il-Ftehim”) huwa b'dan approvat.

It-test tal-Ftehim huwa mehmuż ma’ din id-Deċiżjoni.

Artikolu 2

Il-President tal-Kunsill għandu jaħtar il-persuna(i) bis-setgħa li tittrażmetti/jittrażmettu, f'isem l-Unjoni, in-nota diplomatika prevista fl-Artikolu 10 tal-Ftehim (2).

Artikolu 3

Din id-Deċiżjoni għandha tidħol fis-seħħ fil-jum tal-adozzjoni tagħha.

---

(1)  ĠU L 376, 27.12.2006, p. 1.

(2)  Id-data tad-dħul fis-seħħ tal-Ftehim ser tiġi ppubblikata f'Il-Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.

---

16.12.2011

MT

Il-Ġurnal Uffiċjali tal-Unjoni Ewropea

L 334/6

---

TRADUZZJONI

FTEHIM

bejn l-Unjoni Ewropea u r-Repubblika tal-Kroazja dwar il-parteċipazzjoni tar-Repubblika tal-Kroazja fil-ħidma taċ-Ċentru Ewropew għall-Monitoraġġ tad-Droga u d-Dipendenza fuq id-Droga

L-UNJONI EWROPEA (minn hawn ’il quddiem “l-Unjoni”),

min-naħa l-waħda, u

IR-REPUBBLIKA TAL-KROAZJA,

min-naħa l-oħra,

FILWAQT LI JFAKKRU li l-Kunsill Ewropew ta’ Thessaloniki fl-2003 kellu l-għan li jsaħħaħ aktar ir-relazzjonijiet privileġġjati bejn l-Unjoni Ewropea u l-Balkani tal-Punent waqt li jibni fuq l-esperjenza tat-tkabbir;

B’KONT MEĦUD tar-Regolament (KE) Nru 1920/2006 tal-Parlament Ewropew u tal-Kunsill tat-12 ta’ Diċembru 2006 dwar iċ-Ċentru Ewropew għall-Monitoraġġ tad-Droga u d-Dipendenza fuq id-Droga (tfassil mill-ġdid) (1), (minn hawn 'il quddiem “ir-Regolament” u “iċ-Ċentru” rispettivament);

BILLI r-Regolament jistipula fl-Artikolu 21 tiegħu illi ċ-Ċentru se jkun miftuħ għall-parteċipazzjoni ta’ pajjiżi terzi li jikkondividu l-interessi tal-Unjoni u dawk tal-Istati Membri tagħha fl-objettivi u l-ħidma taċ-Ċentru;

BILLI r-Repubblika tal-Kroazja tikkondividi l-objettivi stabbiliti għaċ-Ċentru fir-Regolament, u billi l-objettiv aħħari tar-Repubblika tal-Kroazja huwa li ssir membru tal-Unjoni Ewropea;

BILLI r-Repubblika tal-Kroazja tissottoskrivi għad-deskrizzjoni tal-kompiti taċ-Ċentru u l-metodu ta’ ħidma u l-oqsma ta’ prijorità tiegħu kif deskritti fir-Regolament;

BILLI teżisti fir-Repubblika tal-Kroazja istituzzjoni adatta li tkun marbuta man-Netwerk Ewropew ta’ Informazzjoni dwar id-Droga u d-Dipendenza fuq id-Droga (Reitox);

FTIEHMU KIF ĠEJ:

Artikolu 1

Parteċipazzjoni

Ir-Repubblika tal-Kroazja għandha tipparteċipa b’mod sħiħ fix-xogħol taċ-Ċentru, fuq it-termini stabbiliti f’dan il-Ftehim.

Artikolu 2

Netwerk Ewropew ta’ Informazzjoni dwar id-Droga u d-Dipendenza fuq id-Droga (Reitox)

1.   Ir-Repubblika tal-Kroazja għandha tkun marbuta mar-Reitox.

2.   Ir-Repubblika tal-Kroazja għandha tinnotifika liċ-Ċentru dwar l-elementi prinċipali tan-netwerk ta’ informazzjoni nazzjonali tagħha, inkluż iċ-ċentru nazzjonali tagħha ta’ monitoraġġ, fi żmien 28 jum mid-data tad-dħul fis-seħħ ta’ dan il-Ftehim, u ssemmi kwalunkwe ċentru ieħor speċjalizzat li jista’ jagħti kontribut siewi għall-ħidma taċ-Ċentru.

Artikolu 3

Bord Maniġerjali

Il-Bord Maniġerjali taċ-Ċentru għandu jistieden rappreżentant mir-Repubblika tal-Kroazja biex jieħu sehem fil-laqgħat tiegħu. Dan ir-rappreżentant għandu jipparteċipa bis-sħiħ imma mingħajr id-dritt għall-vot. Il-Bord Maniġerjali jista’, b’mod eċċezzjonali, isejjaħ laqgħa limitata għar-rappreżentanti tal-Istati Membri u tal-Kummissjoni Ewropea dwar kwistjonijiet ta’ interess partikolari għall-Unjoni u l-Istati Membri tagħha.

Il-Bord Maniġerjali, f’seduta mar-rappreżentanti tar-Repubblika tal-Kroazja għandu jistabbilixxi l-arranġamenti ddettaljati li għandhom x’jaqsmu mal-parteċipazzjoni tar-Repubblika tal-Kroazja fil-ħidma taċ-Ċentru.

Artikolu 4

Baġit

Ir-Repubblika tal-Kroazja għandha tagħmel kontribut finanzjarju għall-attivitajiet taċ-Ċentru, skont id-dispożizzjonijiet stabbiliti fl-Anness għal dan il-Ftehim, li għandu jifforma parti integrali tiegħu.

Artikolu 5

Il-Protezzjoni u l-Kunfidenzjalità tad-Data

1.   Fejn fuq il-bażi ta’ dan il-Ftehim informazzjoni tiġi mgħoddija miċ-ċentru lill-awtoritajiet Kroati skont il-liġi tal-Unjoni u dik Kroata, tali informazzjoni għandha tintuża biss għall-fini ddikjarat u skont il-kondizzjonijiet preskritti mill-awtorità li tkun qed tgħaddiha. Tali informazzjoni m’għandhiex tinkludi data personali.

2.   Data dwar drogi u d-dipendenza fuq id-Droga pprovduta lill-awtoritajiet Kroati miċ-Ċentru tista’ tkun ippubblikata soġġetta għall-konformità mar-regoli tal-Unjoni u dawk Kroati dwar it-tixrid u l-kunfidenzjalità tal-informazzjoni. Data personali ma tistax tiġi ppubblikata jew issir disponibbli għall-pubbliku.

3.   Ċentri speċjalizzati magħżula fir-Repubblika tal-Kroazja m’għandhom ikunu taħt l-ebda obbligu li jagħtu informazzjoni li tkun ikklassifikata bħala kunfidenzjali taħt il-leġislazzjoni Kroata.

4.   Fir-rigward ta’ data mgħoddija liċ-Ċentru mill-awtoritajiet Kroati, dawn tal-aħħar ikunu marbutin bir-regoli stipulati fl-Artikolu 6 tar-Regolament.

Artikolu 6

Status legali

Iċ-Ċentru għandu jgawdi fir-Repubblika tal-Kroazja l-istess kapaċità legali mogħtija lill-entitajiet legali skont il-liġi tal-Kroazja.

Artikolu 7

Responsabbiltà

Ir-responsabbiltà taċ-Ċentru għandha tkun irregolata mir-regoli stabbiliti fl-Artikolu 19 tar-Regolament.

Artikolu 8

Il-privileġġi

Sabiex iċ-Ċentru u l-persunal tiegħu jkunu jistgħu jwettqu dmirijiethom, ir-Repubblika tal-Kroazja għandha tagħtihom il-privileġġi u l-immunitajiet identiċi għal dawk li jinsabu fl-Artikoli 1 sa 4, l-Artikoli 5 u 6, l-Artikoli 10 sa 13, l-Artikoli 15, 17 u 18 tal-Protokoll Nru 7 dwar il-Privileġġi u l-Immunitajiet tal-Unjoni Ewropea anness għat-Trattat dwar l-Unjoni Ewropea, għat-Trattat dwar il-Funzjonament tal-Unjoni Ewropea u għat-Trattat li jistabbilixxi l-Komunità Ewropea tal-Enerġija Atomika.

Artikolu 9

Regolamenti tal-Persunal

Skont il-kondizzjonijiet stipulati fl-Artikolu 12(2)(a) tal-Kondizzjonijiet ta’ Impjieg ta’ uffiċjali oħra tal-Komunitajiet Ewropej stabbiliti fir-Regolament (KEE, Euratom, KEFA) Nru 259/68 (2), iċ-ċittadini Kroati li jgawdu mid-drittijiet sħaħ tagħhom bħala ċittadini jistgħu jkunu impjegati b’kuntratt mid-Direttur taċ-Ċentru.

Artikolu 10

Dħul fis-seħħ

Dan il-Ftehim għandu jidħol fis-seħħ fl-ewwel jum tat-tieni xahar wara d-data ta’ meta tasal in-nota diplomatika tal-aħħar li tikkonfema illi ġew imwettqa r-rekwiżiti legali tal-Parti Kontraenti rispettiva dwar id-dħul fis-seħħ tal-Ftehim.

Artikolu 11

Validità u Terminazzjoni

1.   Dan il-Ftehim huwa konkluż għal perijodu ta’ żmien mhux limitat. Għandu jiġi tterminat fid-data tal-adeżjoni tar-Repubblika tal-Kroazja mal-Unjoni.

2.   Kull waħda mill-Partijiet Kontraenti tista’ tiddenunzja dan il-Ftehim permezz ta’ notifika bil-miktub mibgħuta lill-Parti Kontraenti l-oħra. Dan il-Ftehim ma jibqax fis-seħħ sitt xhur wara d-data tal-wasla ta’ tali notifika.

---

(1)  ĠU L 376, 27.12.2006, p. 1.

(2)  ĠU L 56, 4.3.1968, p. 1.

---

ANNESS

IL-KONTRIBUT FINANZJARJU TAR-REPUBBLIKA TAL-KROAZJA LIĊ-ĊENTRU EWROPEW GĦALL-MONITORAĠĠ TAD-DROGA U D-DIPENDENZA FUQ ID-DROGA

1.

Il-kontribut finanzjarju li għandu jitħallas mir-Repubblika tal-Kroazja għall-baġit ġenerali tal-Unjoni Ewropea sabiex tipparteċipa fiċ-Ċentru se tiżdied progressivament fuq perijodu ta’ erba' snin li matulhom l-attivitajiet ikunu introdotti gradwalment mir-Repubblika tal-Kroazja. Il-kontributi finanzjarji meħtieġa huma: — matul l-ewwel sena ta’ parteċipazzjoni EUR 100 000, — matul it-tieni sena ta’ parteċipazzjoni EUR 150 000, — matul it-tielet sena ta’ parteċipazzjoni EUR 210 000, — matul ir-raba' sena ta’ parteċipazzjoni EUR 271 000. Mill-ħames sena ta’ parteċipazzjoni, il-kontribut finanzjarju annwali li għandu jitħallas mir-Repubblika tal-Kroazja liċ-Ċentru għandu jkun il-kontribut tar-raba' sena ta’ parteċipazzjoni indiċizzat fuq bażi tar-rata taż-żieda tas-sovvenzjoni tal-Unjoni għaċ-Ċentru. Biex tħallas il-kontribut tagħha liċ-Ċentru, ir-Repubblika tal-Kroazja tista' tuża parzjalment l-għajnuna tal-Unjoni b'kontribut massimu tal-Unjoni ta’ 75 % fl-ewwel sena ta’ parteċipazzjoni, 60 % fit-tieni sena ta’ parteċipazzjoni u 50 % minn hemm ‘il quddiem. Soġġett għal proċedura separata ta’ programmar, il-fondi rikjesti tal-Unjoni għandhom ikunu ttrasferiti lir-Repubblika tal-Kroazja permezz ta’ memorandum separat ta’ finanzjament. Il-parti li jkun fadal mill-kontribut tkun koperta mir-Repubblika tal-Kroazja.

2.

Il-kontribut tar-Repubblika tal-Kroazja għandu jkun ġestit skont ir-Regolament tal-Kunsill (KE, Euratom) Nru 1605/25 tal-25 ta’ Gunju 2002 rigward ir-Regolament Finanazjarju applikabbli ghall-bagit generali tal-Komunitajiet Ewropej (1) u r-Regolament tal-Kummissjoni (KE, Euratom) Nru 2342/2002 tat-23 ta’ Diċembru 2002 li jippreskrivi regoli ddettaljati għall-implimentazzjoni tar-Regolament tal-Kunsill (KE, Euratom) Nru 1605/2002 fuq ir-Regolamenti Finanzjaru li jgħodd għall-baġit ġenerali tal-Komunitajiet Ewropej (2). L-ispejjeż tal-ivjaġġar u tal-għajxien tar-rappreżentanti u l-esperti tar-Repubblika tal-Kroazja għall-finijiet tal-parteċipazzjoni fl-attivitajiet taċ-Ċentru jew laqgħat relatati mal-implimentazzjoni tal-programm ta’ ħidma taċ-Ċentru għandhom ikunu rimborżati miċ-Ċentru fuq l-istess bażi bħall-proċeduri li huma bħalissa fis-seħħ għall-Istati Membri tal-Unjoni u f’konformità magħhom.

3.	Għall-ewwel sena kalendarja tal-parteċipazzjoni tagħha, ir-Repubblika tal-Kroazja se tħallas kontribut ikkalkulat mid-data tal-parteċipazzjoni sal-aħħar tas-sena fuq bażi pro rata. Għas-snin ta’ wara, il-kontribut ser ikun skont dan il-Ftehim.

---

(1)  ĠU L 248, 16.9.2002, p. 1.

(2)  ĠU L 357, 31.12.2002, p. 1.