ANNESS

QAFAS

L-għanijiet tal-kriterji

Dawn il-kriterji jimmiraw b’mod partikolari li jippromwovu t-tnaqqis tal-ħsara ambjentali jew riskji relatati mal-użu tal-enerġija (tisħin globali, aċidifikazzjoni, tnaqqir tar-riżorsi mhux rinnovabbli) billi jnaqqsu l-konsum tal-enerġija, mal-użu ta’ riżorsi kemm fil-manifattura kif ukoll fit-trattament/rimi ta’ sors tad-dawl billi jżidu l-ħajja medja tiegħu u mal-użu tal-merkurju billi jnaqqsu l-emissjonijiet totali tal-merkurju tul il-ħajja ta’ sors tad-dawl.

Il-kriterji jinkoraġġixxu wkoll l-implimentazzjoni tal-aqwa prattika (l-aħjar użu ambjentali) u jżidu l-għarfien ambjentali tal-konsumaturi. Il-kriterji huma stabbiliti f’livelli li jippromwovu t-tikkettar ta’ sorsi tad-dawl li huma prodotti b’impatt ambjentali baxx.

KRITERJI

Huma stabbiliti kriterji għal kull wieħed minn dawn l-aspetti:

1.	Effiċjenza fl-użu tal-enerġija, Tul tal-ħajja, Manutenzjoni tal-lumen u Kontenut ta’ merkurju

2.	Ix-xegħil/tifi

3.	L-indiċi tal-apparenza tal-kulur

4.	Il-konsistenza tal-kulur

5.	Sustanzi u taħlitiet perikolużi

6.	Sustanzi elenkati skont l-Artikolu 59(1) tar-Regolament (KE) Nru 1907/2006 tal-Parlament Ewropew u tal-Kunsill (1)

7.	Il-partijiet tal-plastik

8.	L-imballaġġ

9.	L-istruzzjonijiet għall-utent

10.	Ir-responsabbiltà soċjali

11.	L-informazzjoni li tidher fuq l-Ekotikketta tal-UE

Rekwiżiti ta’ valutazzjoni u verifika

Ir-rekwiżiti speċifiċi ta’ valutazzjoni u verifika huma indikati f’kull kriterju.

Fejn l-applikant huwa meħtieġ li jipprovdi dikjarazzjonijiet, dokumentazzjoni, analiżi tar-rapporti tat-test jew evidenza oħra li turi l-konformità mal-kriterji, huwa mifhum li dawn jistgħu joriġinaw mill-applikant u/jew il-fornitur(i) tiegħu u/jew il-fornitur(i) tagħhom, kif xieraq.

Fejn possibbli, l-ittestjar għandu jitwettaq minn laboratorji li jissodisfaw ir-rekwiżiti ġenerali ta’ EN ISO 17025 jew l-ekwivalenti.

Fejn ikun xieraq, jistgħu jintużaw metodi ta’ ttestjar oħra minbarra dawk indikati għall kull kriterju jekk il-korp kompetenti li jivvaluta l-applikazzjoni jaċċetta l-ekwivalenza tagħhom.

Fejn xieraq, il-korpi kompetenti jistgħu jitolbu dokumentazzjoni ta’ appoġġ u jistgħu jwettqu verifiki indipendenti.

KRITERJI TAL-EKOTIKKETTA TAL-UE

Kriterju 1 –   Effiċjenza fl-użu tal-enerġija, Tul tal-ħajja, Manutenzjoni tal-lumen u Kontenut ta’ merkurju

Is-sorsi tad-dawl għandhom jissodisfaw ir-rekwiżiti li ġejjin:

	B’tarf wieħed	B’tarf doppju
Effiċjenza fl-użu tal-enerġija	10 % aħjar mill-valur ta’ lumen għal kull watt skont il-Klassi A	10 % aħjar mill-valur ta’ lumen għal kull watt skont il-Klassi A
Tul tal-ħajja (sigħat)	15 000	20 000
Manutenzjoni tal-Lumen	80 % f’9 000 siegħa	90 % f’16 000 siegħa
Merkurju (mg)	< 1,5	< 3,0

Nota:

L-effiċjenza fl-użu tal-enerġija hija ddefinita fl-Anness IV tad-Direttiva tal-Kummissjoni 98/11/KE (2).

Valutazzjoni u verifika: l-applikant għandu jipprovdi rapport tat-test li jiddikjara li l-effiċjenza fl-użu tal-enerġija, it-tul tal-ħajja u l-manutenzjoni tal-lumen tas-sorsi tad-dawl għajr l-LEDs ġew stabbiliti bl-użu tal-proċeduri tat-test imsemmijin f’EN 50285.

Għall-effiċjenza, it-tul tal-ħajja u l-manutenzjoni tal-lumen tas-sorsi tad-dawl LED, u għall-kontenut ta’ merkurju ta’ sorsi tad-dawl fluworexxenti, l-applikant għandu jipprovdi rapporti tat-test li jużaw proċeduri tal-kejl affidabbli, preċiżi u riproduċibbli, li jqisu l-aħjar metodi ta’ kejl disponibbli dak il-ħin u rikonoxxuti b’mod ġenerali, inklużi l-metodi stabbiliti f’dokumenti li n-numri ta’ referenza tagħhom kienu ppubblikati għal dak il-għan f’Il-Ġurnal Uffiċjali tal-Unjoni Ewropea. Ir-rapport għandu jiddikjara l-effiċjenza fl-użu tal-enerġija, it-tul tal-ħajja, il-manutenzjoni tal-lumen u l-kontenut ta’ merkurju tas-sors tad-dawl. Jekk it-test xieraq għat-tul tal-ħajja ma jkunx tlesta, it-tul tal-ħajja operattiv kif iddikjarat fuq l-imballaġġ huwa aċċettabbli sakemm jinkiseb ir-riżultat tat-test. Madankollu, ir-riżultat tat-test għandu jiġi pprovdut fi żmien 12-il xahar mid-data tal-applikazzjoni għall-Ekotikketta tal-UE. Għat-test tat-tul tal-ħajja, 75 % mill-kampjun tat-test għandu jissodisfa r-rekwiżit.

Kriterju 2 –   Ix-xegħil/tifi

Għall-bozoz fluworexxenti kumpatti (CFLs) u LEDs, l-għadd ta’ ċikli ta’ xegħil/tifi li s-sors tad-dawl jiflaħ għalih qabel ma jieqaf prematurament għandu jkun akbar mit-tul tal-ħajja tal-bozza rrappreżentat f’sigħat.

Għall-bozoz li jgħidu li jifilħu xegħil u tifi frekwenti, dan l-għadd għandu jkun ogħla minn 60 000 ċiklu ta’ xegħil/tifi.

Valutazzjoni u verifika: għas-CFLs l-applikant għandu jipprovdi rapport tat-test li jiddikjara li l-għadd ta’ ċikli ta’ xegħil/tifi għas-CFL ġie ddeterminat bl-użu ta’ test ta’ ċiklu rapidu (minuta (1) mixgħula, tliet (3) minuti mitfija) u l-proċeduri tat-test għat-tul tal-ħajja msemmijin f’EN 50285.

Għal-LEDs, l-applikant għandu jipprovdi rapport tat-test li juża proċeduri tal-kejl affidabbli, preċiżi u riproduċibbli, li jqisu l-aħjar metodi ta’ kejl disponibbli dak il-ħin u rikonoxxuti b’mod ġenerali, inklużi l-metodi stabbiliti f’dokumenti li n-numri ta’ referenza tagħhom ġew ippubblikati għal dak il-għan f’Il-Ġurnal Uffiċjali tal-Unjoni Ewropea.

Ir-rapport għandu jiddikjara l-għadd ta’ ċikli ta’ xegħil/tifi milħuq meta 50 % tas-CFLs jew LEDs ittestjati jissodisfaw ir-rekwiżiti għat-tul tal-ħajja ta’ bozza msemmija fl-istandards rispettivi.

Kriterju 3 –   L-indiċi tal-apparenza tal-kulur

L-indiċi tal-apparenza tal-kulur (Ra) tas-sors tad-dawl għandu jkun akbar minn 85.

Valutazzjoni u verifika: l-applikant għandu jipprovdi rapport tat-test li jiddikjara li l-indiċi tal-apparenza tal-kulur tas-sors tad-dawl ġie ddeterminat bl-użu tal-proċedura tat-test imsemmija fid-dokument-CIE 13.3. Ir-rapport għandu jagħti l-indiċi tal-apparenza tal-kulur tas-sors tad-dawl.

Kriterju 4 –   Il-konsistenza tal-kulur

Is-sors tad-dawl għandu jkollu Temperatura tal-Kulur Ikkorrelatata (CCT) mifruxa fuq ellissi ta’ McAdam bi tliet fażijiet jew aħjar.

Valutazzjoni u verifika: l-applikant għandu jipprovdi rapport tat-test li jiddikjara li l-firxa tat-temperatura tal-kulur ikkorrelatata (CCT) hija f’ellissi ta’ McAdam bi tliet fażijiet jew aħjar bl-użu ta’ proċeduri affidabbli, preċiżi u riproduċibbli, li jqisu l-aħjar metodi ta’ kejl disponibbli dak il-ħin u rikonoxxuti b’mod ġenerali, inklużi l-metodi stabbiliti f’dokumenti li n-numri ta’ referenza tagħhom ġew ippubblikati għal dak il-għan f’Il-Ġurnal Uffiċjali tal-Unjoni Ewropea.

Kriterju 5 –   Sustanzi u taħlitiet perikolużi

Skont l-Artikolu 6(6) tar-Regolament (KE) Nru 66/2010, il-prodott jew kwalunkwe parti minnu ma għandux/għandhomx jinkludi/u sustanzi msemmijin fl-Artikolu 57 tar-Regolament (KE) Nru 1907/2006 u lanqas sustanzi jew taħlitiet li jistgħu jiġu jew li ġew assenjati d-dikjarazzjonijiet ta’ periklu jew il-frażijiet ta’ riskju li ġejjin.

Lista ta’ dikjarazzjonijiet ta’ periklu u frażijiet ta’ riskju:

Dikjarazzjoni ta’ Periklu (3)	Frażi ta’ Riskju (4)
H300 Fatali jekk jinbela’	R28
H301 Tossiku jekk jinbela’	R25
H304 Jista’ jkun fatali jekk jinbela’ u jidħol fil-pajpijiet tan-nifs	R65
H310 Fatali jekk jiġi f’kuntatt mal-ġilda	R27
H311 Tossiku jekk jiġi f’kuntatt mal-ġilda	R24
H330 Fatali jekk jiġi inalat	R23/26
H331 Tossiku jekk jiġi inalat	R23
H340 Jista’ jikkawża difetti ġenetiċi	R46
H341 Suspettat li jikkawża difetti ġenetiċi	R68
H350 Jista’ jikkawża l-kanċer	R45
H350i Jista’ jikkawża l-kanċer meta jiġi inalat	R49
H351 Suspettat li jikkawża l-kanċer	R40
H360F Jista’ jagħmel ħsara lill-fertilità	R60
H360D Jista’ jagħmel ħsara lit-tarbija li għadha ma twelditx	R61
H360FD Jista’ jagħmel ħsara lill-fertilità. Jista’ jagħmel ħsara lit-tarbija li għadha ma twelditx	R60/61/60-61
H360Fd Jista’ jagħmel ħsara lill-fertilità. Suspettat li jagħmel ħsara lit-tarbija li għadha ma twelditx	R60/63
H360Df Jista’ jagħmel ħsara lit-tarbija li għadha ma twelditx. Suspettat li jagħmel ħsara lill-fertilità	R61/62
H361f Suspettat li jagħmel ħsara lill-fertilità	R62
H361d Suspettat li jagħmel ħsara lit-tarbija li għadha ma twelditx	R63
H361fd. Suspettat li jagħmel ħsara lill-fertilità. Suspettat li jagħmel ħsara lit-tarbija li għadha ma twelditx.	R62-63
H362 Jista’ jikkawża ħsara lil tfal imreddgħa	R64
H370 Jikkawża ħsara lill-organi	R39/23/24/25/26/27/28
H371 Jista’ jikkawża ħsara lill-organi	R68/20/21/22
H372 Jikkawża ħsara lill-organi f’każ ta’ esponiment ripetut jew fuq perjodu twil ta’ żmien	R48/25/24/23
H373 Jista’ jikkawża ħsara lill-organi f’każ ta’ esponiment ripetut jew fuq perjodu twil ta’ żmien	R48/20/21/22
H400 Tossiku ħafna għall-organiżmi akkwatiċi	R50
H410 Tossiku ħafna għall-organiżmi akkwatiċi b’mod li jħalli effetti għat-tul	R50-53
H411 Tossiku għall-organiżmi akkwatiċi b’mod li jħalli effetti għat-tul	R51-53
H412 Jagħmel ħsara lill-organiżmi akkwatiċi b’mod li jħalli effetti għat-tul	R52-53
H413 Jista’ jikkawża effetti għat-tul lill-organiżmi akkwatiċi	R53
EUH059 Perikoluż għas-saff tal-ożonu	R59
EUH029 Meta jiġi f’kuntatt mal-ilma jillibera gass tossiku	R29
EUH031 Meta jiġi f’kuntatt mal-aċidi jillibera gass tossiku	R31
EUH032 Meta jiġi f’kuntatt mal-aċidi jillibera gass tossiku ħafna	R32
EUH070 Tossiku meta jiġi f’kuntatt mal-għajnejn	R39-41

L-użu ta’ sustanzi jew taħlitiet li mal-ipproċessar jibdlu l-proprjetajiet tagħhom (eż. ma jibqgħux aktar bijodisponibbli, jgħaddu minn modifika kimika) b’mod li l-periklu identifikat ma japplikax aktar, huma eżentati mir-rekwiżit ta’ hawn fuq.

Il-limiti ta’ konċentrazzjoni għal sustanzi jew taħlitiet li jissodisfaw il-kriterji ta’ klassifikazzjoni bil-klassijiet jew kategoriji ta’ periklu msemmijin hawn fuq, u għal sustanzi li jissodisfaw il-kriterji fl-Artikolu 57(a), (b) jew (c) tar-Regolament (KE) Nru 1907/2006, ma għandhomx jaqbżu l-limiti ta’ konċentrazzjoni ġeneriċi jew speċifiċi ddeterminati skont l-Artikolu 10 tar-Regolament (KE) Nru 1272/2008. Jekk il-limiti ta’ konċentrazzjoni speċifiċi jkunu ġew iddeterminati, huma għandhom jieħdu preċedenza fuq dawk ġeneriċi.

Il-limiti ta’ konċentrazzjoni għal sustanzi li jissodisfaw il-kriterji tal-Artikolu 57(d), (e) jew (f) tar-Regolament (KE) Nru 1907/2006 ma għandhomx jaqbżu 0,1 % piż skont il-piż.

Is-sustanzi/użijiet li ġejjin tas-sustanzi huma dderogati speċifikament minn dan ir-rekwiżit:

Partijiet omoġenji b’piż taħt 5 g

Id-dikjarazzjonijiet ta’ periklu u l-frażijiet ta’ riskju kollha elenkati hawn fuq

Valutazzjoni u verifika: għal kull parti ta’ aktar minn 5 gm l-applikant għandu jipprovdi dikjarazzjoni ta’ konformità ma’ dan il-kriterju, flimkien mad-dokumentazzjoni relatata, bħal dikjarazzjonijiet ta’ konformità ffirmati mill-fornituri tas-sustanzi u kopji rilevanti tal-Iskedi tad-Dejta dwar is-Sikurezza skont l-Anness II għar-Regolament (KE) Nru 1907/2006 għas-sustanzi jew it-taħlitiet. Il-limiti ta’ konċentrazzjoni għandhom ikunu speċifikati fl-Iskedi tad-Dejta dwar is-Sikurezza skont l-Artikolu 31 tar-Regolament (KE) Nru 1907/2006 għas-sustanzi u t-taħlitiet.

Kriterju 6 –   Is-sustanzi elenkati skont l-Artikolu 59(1) tar-Regolament (KE) Nru 1907/2006

Ma għandha tingħata l-ebda deroga mill-esklużjoni fl-Artikolu 6(6) rigward sustanzi identifikati bħala ta’ tħassib serju ħafna u inklużi fil-lista stabbilita fl-Artikolu 59 tar-Regolament (KE) Nru 1907/2006, preżenti f’taħlitiet, f’oġġett jew fi kwalunkwe parti omoġenja ta’ oġġett kumpless f’konċentrazzjonijiet ogħla minn 0,1 %. Il-limiti ta’ konċentrazzjoni speċifiċi stabbiliti skont l-Artikolu 10 tar-Regolament (KE) Nru 1272/2008 għandhom japplikaw fil-każ li l-konċentrazzjoni tkun aktar baxxa minn 0,1 %.

Valutazzjoni u verifika: il-lista ta’ sustanzi identifikati bħala sustanzi ta’ tħassib serju ħafna u inklużi fil-lista tal-kandidati skont l-Artikolu 59 tar-Regolament (KE) Nru 1907/2006 tista’ tinstab fuq is-sit elettroniku:

http://echa.europa.eu/chem_data/authorisation_process/candidate_list_table_en.asp

Fid-data tal-applikazzjoni għandha ssir referenza għal din il-lista.

L-applikant għandu jipprovdi dikjarazzjoni ta’ konformità ma’ dan il-kriterju, flimkien mad-dokumentazzjoni relatata, bħad-dikjarazzjonijiet ta’ konformità ffirmati mill-fornituri tas-sustanzi jew kopji tal-Iskedi tad-Dejta dwar is-Sikurezza rilevanti skont l-Anness II għar-Regolament (KE) Nru 1907/2006 għas-sustanzi jew it-taħlitiet. Il-limiti ta’ konċentrazzjoni għandhom ikunu speċifikati fl-Iskedi tad-Dejta dwar is-Sikurezza skont l-Artikolu 31 tar-Regolament (KE) Nru 1907/2006 għas-sustanzi u t-taħlitiet.

Kriterju 7 –   Il-partijiet tal-plastik

(a)

Jekk fil-proċess tal-manifattura tkun applikata kwalunkwe sustanza plastifikanti, din għandha tikkonforma mar-rekwiżiti dwar is-sustanzi perikolużi stabbiliti fil-Kriterji 5 u 6. Barra dan, id-DNOP (il-ftalat tad-di-n-ottil), id-DINP (il-ftalat tad-di-isononil) u d-DIDP (il-ftalat tad-di-isodeċil) ma għandhomx jiżdiedu intenzjonalment mal-prodott.

(b)

Il-partijiet tal-plastik ma għandhomx jinkludu kontenut ta’ klorur akbar minn 50 % skont il-piż.

Valutazzjoni u verifika: ċertifikat iffirmat mill-manifattur li jiddikjara l-konformità ma’ dawn ir-rekwiżiti għandu jiġi ppreżentat lill-korp kompetenti tal-għoti. Għandha tiġi pprovduta wkoll dikjarazzjoni ta’ konformità ffirmata mill-fornituri tal-plastik u kopji tal-Iskedi tad-Dejta dwar is-Sikurezza rilevanti dwar materjali u sustanzi lill-korp kompetenti tal-għoti.

Kriterju 8 –   Imballaġġ

Ma għandhomx jintużaw il-laminati u l-plastiks kompożiti.

Fejn jintużaw kaxxi tal-kartun, dawn għandhom ikunu magħmulin minn 80 % ta’ materjal postkonsumatur irriċiklat.

Fejn jintużaw materjali tal-plastik, dawn għandhom ikunu magħmulin tal-inqas minn 50 % ta’ materjal postkonsumatur irriċiklat.

Valutazzjoni u verifika: għandu jiġi pprovdut kampjun tal-imballaġġ tal-prodott mal-applikazzjoni, flimkien mad-dikjarazzjoni korrispondenti ta’ konformità ma’ dan il-kriterju. L-imballaġġ primarju biss, kif iddefinit fid-Direttiva 94/62/KE tal-Parlament Ewropew u tal-Kunsill (5), huwa soġġett għal dan il-kriterju.

Kriterju 9 –   L-istruzzjonijiet għall-utent

Il-prodott għandu jinbiegħ bl-informazzjoni rilevanti għall-utent jew fuq l-imballaġġ jew f’fuljett separat mibjugħ mal-prodott, li jipprovdi parir dwar l-użu ambjentali xieraq tiegħu. B’mod partikolari:

(a)	Għal bozoz li għandhom kappa (cap) E27, E14, B22 jew B15, id-daqs jew l-għamla relattiv(a) tas-sors tad-dawl meta mqabbel ma’ bozza inkandexxenti konvenzjonali għandu/għandha jkun/tkun indikat(a) fuq l-imballaġġ.

(b)	Għal sorsi tad-dawl b’tarf doppju: l-informazzjoni fuq l-imballaġġ għandha tindika li l-prestazzjoni ambjentali tas-sors tad-dawl titjieb meta jintuża ma’ tagħmir b’kontroll elettroniku ta’ frekwenza għolja.

(ċ)	Linji gwida għat-tindif għal sorsi tad-dawl fluworexxenti mkissrin elenkati fuq l-imballaġġ.

(d)	Il-manutenzjoni xierqa ta’ bozoz, bħal tindif, biex jinżamm l-output tal-lumen.

(e)	It-tifi tad-dwal jiffranka l-enerġija u l-flus.

Valutazzjoni u verifika: l-applikant għandu jiddikjara l-konformità tal-prodott ma’ dawn ir-rekwiżiti, u għandu jipprovdi kopja tal-imballaġġ jew tal-fuljett lill-korp kompetenti li jivvaluta l-applikazzjoni.

Kriterju 10 –   Ir-responsabbiltà soċjali

Il-prinċipji u d-drittijiet fundamentali rigward il-kundizzjonijiet tax-xogħol għandhom jiġu ssodisfati waqt il-produzzjoni tas-sors tad-dawl bl-Ekotikketta.

Il-liċenzjatarju għandu jiżgura li l-produzzjoni tas-sors tad-dawl issegwi l-konvenzjonijiet tal-ILO (6) rigward xogħol mit-tfal, xogħol sfurzat, saħħa u sikurezza, diskriminazzjoni, dixxiplina, sigħat tax-xogħol, pagi, libertà ta’ assoċjazzjoni u negozjar kollettiv.

Valutazzjoni u verifika: l-applikant għandu jiddikjara konformità ma’ dan ir-rekwiżit u għandu jipprovdi speċifikazzjoni ta’ kuntratti lill-awtoritajiet ta’ spezzjoni u jew kodiċi ta’ kondotta rigward il-konvenzjonijiet tal-ILO inkella ċertifikazzjoni SA8000.

Kriterju 11 –   L-informazzjoni li tidher fuq l-Ekotikketta tal-UE

It-tikketta fakultattiva b’kaxxa tat-test għandha tinkludi t-test li ġej:

“—	Effiċjenza għolja fl-użu tal-enerġija – tiffranka l-flus

—	Tul ta’ ħajja twil

—	Prestazzjoni ttestjata”.

Jekk is-sors tad-dawl ma fihx merkurju, it-tikketta fakultattiva tista’ tiddikjara li s-sors tad-dawl ma fihx merkurju.

Il-linji gwida għall-użu tat-tikketta fakultattiva bil-kaxxa tat-test jistgħu jinstabu fil-“Linji gwida għall-użu tal-logo tal-Ekotikketta” fuq is-sit elettroniku: http://ec.europa.eu/environment/ecolabel/promo/logos_en.htm

Valutazzjoni u verifika: l-applikant għandu jipprovdi kampjun tat-tikketta, flimkien ma’ dikjarazzjoni ta’ konformità ma’ dan il-kriterju.

---

(1)  ĠU L 396, 30.12.2006, p. 1.

(2)  ĠU L 71, 10.3.1998, p. 1.

(3)  Kif ipprovdut fir-Regolament (KE) Nru 1272/2008 tal-Parlament Ewropew u tal-Kunsill (ĠU L 353, 31.12.2008, p. 1)

(4)  Kif ipprovdut fid-Direttiva tal-Kunsill 67/548/KEE (ĠU L 196, 16.8.1967, p. 1)

(5)  ĠU L 365, 31.12.1994, p. 10.

(6)  http://www.ilo.org/