28.1.2010   

MT

Il-Ġurnal Uffiċjali tal-Unjoni Ewropea

L 24/7

(1)

Ir-Regolament tal-Kummissjoni (KE) Nru 33/2008 tas-17 ta’ Jannar 2008 li jistipula regoli dettaljati għall-applikazzjoni tad-Direttiva tal-Kunsill 91/414/KEE fir-rigward ta’ proċedura regolari u aċċellerata għall-valutazzjoni ta’ sustanzi attivi li kienu jagħmlu parti mill-programm ta’ ħidma msemmi fl-Artikolu 8(2) ta’ dik id-Direttiva iżda li ma ġewx inklużi fl-Anness I tagħha japplika għas-sustanzi tat-tielet u r-raba’ stadju li kienu ġew vvalutati iżda mhux inklużi fl-Anness I (2) tad-Direttiva 91/414/KEE sal-31 ta’ Diċembru 2008. Ma japplikax fir-rigward tas-sustanzi tat-tielet u r-raba’ stadju vvalutati wara dik id-data.

(2)

Iżda, ir-Regolament tal-Kummissjoni (KE) Nru 2076/2002 (3) u d-Deċiżjoni tal-Kummissjoni 2003/565/KE (4) ġew emendati biex jiġi estiż il-perjodu ta’ żmien għall-programm tax-xogħol sal-31 ta’ Diċembru 2009 fir-rigward tas-sustanzi tat-tielet u r-raba’ stadju. Jeħtieġ li tiġi adattata d-data rispettiva fir-Regolament (KE) Nru 33/2008.

(3)

Fir-rigward tal-proċedura regolari, huwa issa ovvju li l-perjodu ta’ żmien mogħti lill-Awtorità biex tħejji l-konklużjonijiet tagħha għandu jiġi estiż minħabba l-komplessità u l-ammont ta’ xogħol involut. Dan għandu japplika biss fir-rigward ta’ sustanzi attivi li għalihom jintbagħat l-abbozz tar-rapport ta’ valutazzjoni lill-Kummissjoni wara d-dħul fis-seħħ ta’ dan ir-Regolament.

(4)

Għalhekk, ir-Regolament (KE) Nru 33/2008 għandu jiġi emendat skont dan.

(5)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali,

(1)

Fl-Artikolu 1, il-punt (c) jinbidel b’dan li ġej:

(2)

L-Artikolu 10 jinbidel b’dan li ġej:

“Artikolu 10

Konklużjoni tal-Awtorità

1.   L-Awtorità għandha tadotta konklużjoni dwar jekk is-sustanza attiva tistax tiġi mistennija li tilħaq ir-rekwiżiti tal-Artikolu 5 tad-Direttiva 91/414/KEE fi żmien sitt xhur minn mindu jintemm il-perjodu previst fit-tielet paragrafu tal-Artikolu 9 ta’ dan ir-Regolament, u għandha tikkomunikaha lill-applikant, lill-Istati Membri u lill-Kummissjoni.

Fejn xieraq, l-Awtorità għandha tindirizza fil-konklużjoni tagħha l-alternattivi ta’ mitigazzjoni tar-riskju fir-rigward ta’ użi maħsuba li ġew identifikati fl-abbozz tar-rapport ta’ valutazzjoni.

2.   Meta l-Awtorità teħtieġ tagħrif addizzjonali, b’konsultazzjoni mal-Istat Membru relatur, għandha tistipula perjodu ta’ żmien ta’ massimu ta’ disgħin jum li fih l-applikant irid jipprovdih lill-Awtorità u l-Istat Membru relatur. L-Awtorità għandha tinforma lill-Kummissjoni u lill-Istati Membri. It-tagħrif li jintbagħat fil-perjodu ta’ żmien mogħti biss se jitqies.

L-Istat Membru relatur għandu jivvaluta t-tagħrif addizzjonali u jippreżentah lill-Awtorità minnufih u mhux aktar tard minn sittin jum wara li jasallu t-tagħrif addizzjonali.

F’dan il-każ, il-perjodu ta’ sitt xhur għall-adozzjoni tal-konklużjoni mill-awtorità, kif ipprovdut fil-paragrafu 1, għandu jiġi estiż b’perjodu li għandu jintemm fil-mument meta l-valutazzjoni tat-tagħrif addizzjonali tasal għand l-Awtorità.

3.   Il-Kummissjoni u l-Awtorità għandhom jaqblu dwar skeda għall-preżentazzjoni tal-konklużjonijiet sabiex jiffaċilitaw l-ippjanar tax-xogħol. Il-Kummissjoni u l-Awtorità għandhom jaqblu dwar il-format li bih jintbagħtu l-konklużjonijiet tal-Awtorità.”