10.7.2009   

MT

Il-Ġurnal Uffiċjali tal-Unjoni Ewropea

L 179/1

(1)

Il-Kummissjoni, skont ir-Regolament tal-Kummissjoni (KE) Nru 194/2009 (2) (ir-“Regolament provviżorju”) imponiet dazju kumpensatorju provviżorju fuq l-importazzjonijiet tal-bijodiżil li joriġinaw fl-Istati Uniti tal-Amerika (“Stati Uniti” jew “il-pajjiż ikkonċernat”).

(2)

Fil-proċediment parallel kontra d-dumping, skont ir-Regolament tal-Kummissjoni (KE) Nru 193/2009 (3), il-Kummissjoni, imponiet dazju provviżorju kontra d-dumping fuq importazzjonijiet tal-bijodiżil fl-Istati Uniti tal-Amerika.

(3)

Wara li ġew żvelati l-fatti u l-kunsiderazzjonijiet essenzjali, li fuq il-bażi tagħhom ġie deċiż li jkunu imposti miżuri kumpensatorji provviżorji (“żvelar provviżorju”), għadd ta’ partijiet interessati ressqu preżentazzjonijiet bil-miktub biex jagħtu l-fehmiet tagħhom dwar ir-riżultati provviżorji. Il-partijiet li talbu dan, ingħataw l-opportunità li jinstemgħu. Il-Kummissjoni kompliet tfittex u tivverifika t-tagħrif kollu li qieset meħtieġ għas-sejbiet definittivi tagħha. Il-kummenti bil-fomm u bil-miktub ippreżentati mill-partijiet interessati tqiesu u, fejn xieraq, is-sejbiet provviżorji ġew immodifikati skont dan.

(4)

Il-partijiet kollha ġew infurmati bil-fatti u l-kunsiderazzjonijiet essenzjali li fuq il-bażi tagħhom kien maħsub li tkun rakkomandata l-impożizzjoni ta’ miżuri kumpensjatorji definittivi fuq importazzjonijiet ta’ bijodiżil li joriġinaw fl-Istati Uniti u l-ġbir definittiv tal-ammonti miġbura bħala dazju provviżorju (“żvelar finali”). Ingħataw ukoll perjodu li fih setgħu jagħmlu appelli wara dan l-iżvelar.

(5)

Il-Gvern tal-Istati Uniti (GSU) u l-partijiet interessati l-oħra, esprimew id-diżappunt tagħhom bid-deċiżjoni li jingħataw biss sittax-il ġurnata biex jibagħtu l-kummenti tagħhom dwar l-għeluq provviżorju u wkoll bid-deċiżjoni li ma jiġux milqugħa t-talbiet ta’ ċerti partijiet għal estensjoni sinifikanti ta’ żmien biex jintbagħtu dawn il-kummenti.

(6)

L-Artikolu 30(1) tar-Regolament bażiku jipprovdi li l-partijiet interessati jistgħu jingħatawlhom id-dettalji tal-fatti u l-kunsiderazzjonijiet essenzjali li fuq il-bażi tagħhom ġew imposti l-miżuri provviżorji. F’dan ir-rigward, hija l-prassi tal-Kummissjoni, mal-pubblikazzjoni f’Il-Ġurnal Uffiċjali tal-Unjoni Ewropea ta’ regolament li jimponi miżuri provviżorji, li twettaq l-iżvelar lill-partijiet interessati kollha fi proċediment u li tipprovdi perjodu ta’ żmien li fih il-partijiet ikun jistgħu jikkumentaw. F’dan il-proċediment, din il-prassi ssegwiet. Fir-rigward tal-perjodu ta’ żmien li fih il-partijiet kienu meħtieġa jikkummentaw, ir-Regolament bażiku ma jispeċifikax x’għandu jkun dan il-perjodu. F’dan il-proċediment, tqies li għandu jingħata perjodu ta’ sittax-il ġurnata (li wara ġie estiż għal sbatax-il ġurnata) minħabba l-kumplessità tal-proċediment u l-ħtieġa li jiġi rispettat ir-rekwiżit fl-Artikolu 11(9) tar-Regolament bażiku li l-investigazzjoni għandha tiġi konkluża fi żmien tlettax-il xahar mill-bidu tagħha.

(7)

Fir-rigward tar-rata tad-dazju stabbilita għall-kumpaniji fl-Istati Uniti li ma ppreżentawx lilhom infushom u ma kkooperawx fl-investigazzjoni, ir-rata tad-dazju provviżorja ġiet stabbilita fil-livell l-aktar baxx tal-ogħla marġini ta’ sussidjar jew marġini ta’ dannu li nstab fil-kampjun ta’ produtturi esportaturi li kkooperaw. Ir-rata ġiet stabbilita skont kif stipulat (ir-rata tal-“kumpaniji l-oħra kollha” ta’ EUR 237,0 kull tunnellata) fl-Artikolu 1(2) tar-Regolament provviżorju. Il-GSU jqis li din ir-rata tad-dazju hija rata punittiva li ġiet ikkalkulata ħażin fuq il-bażi tal-fatti disponibbli. Il-GSU jqis li, sabiex wieħed iserraħ fuq il-fatti disponibbli skont l-Artikolu 28 tar-Regolament bażiku, l-ewwel għandu jiġi determinat jekk parti interessata rrifjutatx jew naqqseti milli tipprovdi l-“informazzjoni neċessarja” (4). Il-GSU iżda jqis li minflok għandha tiġi applikata r-rata medja differenzjata kkalkulata għall-kumpaniji li kkooperaw imma li ma kinux fil-kampjun.

(8)

Bi tweġiba għal dan, ta’ min jinnota li, fl-istadju tal-bidu, il-Kummissjoni bagħtet il-formola tal-kampjun, l-ilment, u l-Avviż tal-Bidu lill-kumpaniji elenkati fl-ilment (iktar minn 150 kumpanija). Kopja tal-formola tal-kampjun ġiet mehmuża wkoll man-Note Verbale li ntbagħtet lill-Missjoni tal-Istati Uniti tal-Amerika lill-Komunitajiet Ewropej fil-bidu u huma ġew mistiedna jibagħtuha lill-esportaturi/produtturi fl-Istati Uniti tal-Amerika. Barra minn hekk, il-Bord Nazzjonali tal-Bijodiżil, li kien parti interessata mill-bidu ta’ dan il-proċediment, jirrappreżenta għadd kbir ta’ kumpaniji fl-industrija tal-bijodiżil fl-Istati Uniti tal-Amerika.

(9)

L-Avviż tal-Bidu, kif ukoll l-ittra mehmuża mal-formola tal-kampjun, ġibdet l-attenzjoni għall-konsegwenzi tan-nuqqas ta’ kooperazzjoni. Kif imsemmi fil-premessa (8) tar-Regolament provviżorju, aktar minn 50 kumpanija ppreżentaw irwieħhom fil-kuntest tal-eżerċizzju tal-kampjun u pprovdew it-tagħrif meħtieġ fi żmien il-perjodu ta’ 15-il jum. Dawn il-kumpaniji kienu responsabbli għal aktar minn 80 % tal-importazzjonijiet totali ta’ bijodiżil mill-Istati Uniti tal-Amerika lejn il-Komunità.

(10)

Wara l-impożizzjoni tal-miżuri provviżorji, l-awtoritajiet tal-Istati Uniti tal-Amerika ntalbu jagħtu informazzjoni addizjonali. Partikolarment, l-awtoritajiet ġew mistiedna jistiednu kull esportatur/produttur tal-bijodiżil fl-Istati Uniti tal-Amerika, għajr dawk elenkati fl-Artikolu 1 u l-Anness tar-Regolament provviżorju, li ma kinux magħrufa fil-waqt tal-bidu tal-proċediment u li qabel ma kinux irrifjutaw li jikkooperaw (5), biex jippreżentaw irwieħhom.

(11)

L-awtoritajiet tal-Istati Uniti tal-Amerika pprovdew lista bl-ismijiet ta’ iktar minn 100 kumpanija addizzjonali (produtturi/esportaturi) fl-Istati Uniti tal-Amerika. Ġie eżaminat jekk il-kumpaniji ġewx mistiedna jikkooperaw fl-istadju tal-bidu tal-proċediment. L-investigazzjoni wriet li għadd sinifikanti ta’ kumpaniji fuq il-lista kienu diġà ġew mistiedna jikkooperaw matul l-eżerċizzju ta’ teħid ta’ kampjuni iżda għażlu li ma jeħdux sehem f’dak il-waqt. Fi kliem ieħor, dawn il-kumpaniji kienu konxji mill-konsegwenzi ta’ nuqqas ta’ kooperazzjoni skont l-Artikolu 28 tar-Regolament bażiku.

(12)

Madankollu, fir-rigward ta’ dawn il-kumpaniji (iktar minn 40) fuq il-lista li l-Kummissjoni ma kinitx taf bihom fil-waqt tal-bidu ta’ dan il-proċediment, ġie nnutat li t-talba lill-awtoritajiet tal-Istati Uniti, biex jagħti dettalji ta’ dawn il-kumpaniji, saret wara l-impożizzjoni tal-miżuri provviżorji. Għalhekk, ġie deċiż li dawn il-kumpaniji jiżdiedu mal-Anness ta’ dan ir-Regolament u li tiġi applikata l-istess rata tad-dazju lil dawn il-kumpaniji bħal dawk li kkooperaw b’mod espress iżda ma ntgħażlux fil-kampjun. Dawn il-kumpaniji rċevew il-fatti essenzjali u l-kunsiderazzjonijiet li fuq il-bażi tagħhom kien maħsub li jiġu imposti miżuri definittivi u ġew mistiedna jikkummentaw fuq il-fatt li kien propost li isimhom jiżdied mal-Anness ta’ dan ir-Regolament.

(13)

Wara l-iżvelar finali, l-Istati Uniti laqa’ l-proposta li jiġi applikat id-dazju medju ddifferenzjat lill-kumpaniji addizzjonali. Madankollu, il-GSU qies li ma kinitx ingħatat spjegazzjoni għaliex il-kumpaniji l-oħra kienu soġġetti għar-rata tal-“kumpaniji l-oħra kollha”. F’dan ir-rigward ta’ min jinnota li għall-kumpaniji li ġew mistiedna jikkooperaw matul l-eżerċizzju tat-teħid tal-kampjun, l-ispjegazzjonijiet diġà ngħataw fuq. Fir-rigward ta’ produtturi/esportaturi possibbli tal-Istati Uniti li ma kinux notifikati individwalment dwar l-investigazzjoni u ma ssemmewx fil-lista msemmija fil-premessa (11), ta’ min jinnota l-ewwel nett li saru sforzi estensivi fil-bidu tal-proċediment biex jiġu kkuntattjati l-kumpaniji kollha fl-Istati Uniti li jistgħu jkunu kkonċernati b’dan il-proċediment (ara l-premessi (8) u (10) fuq). Barra minn hekk, saru sforzi oħra wara l-impożizzjoni tal-miżuri provviżorji kif imsemmi fil-premessa (10) hawn fuq biex il-kumpaniji l-oħra jiġu identifikati u dan irriżulta fiż-żieda ta’ iktar minn 40 kumpanija mal-lista ta’ dawk li japplikalhom id-dazju medju differenzjat. Tqies li dawn l-isforzi estensivi taw kull opportunità lill-kumpaniji tal-bijodiżil fl-Istati Uniti biex jippreżentaw irwieħhom. F’dan ir-rigward, ta’ min jinnota li l-assoċjazzjoni rilevanti tal-industrija kienet involuta fil-proċediment mill-bidu tiegħu. Konsegwentement, jitqies li r-rata tad-dazju tal-“kumpaniji l-oħra kollha” għandha tiġi applikata għall-kumpaniji li ma jippreżentawx lilhom infushom.

(14)

Kumpanija waħda li wieġbet għall-formola tal-kampjun u li wara ġiet elenkata fl-Anness għar-Regolament Provviżorju talbet li l-kumpanija possedenti tagħha tiżdied mal-lista ta’ kumpaniji fl-Anness. Din il-kumpanija talbet ukoll li l-belt fejn jinsabu ż-żewġ kumpaniji tinbidel fl-Anness biex tirrifletti korrettament l-indirizz fuq il-fatturi tal-kumpaniji.

(15)

Wara li t-talba ta’ din il-kumpanija ġiet eżaminata, tqies li l-kumpanija possedenti għandha tiġi elenkata wkoll fl-Anness tar-Regolament attwali billi kienet imsemmija fit-tweġiba tal-kumpanija għall-formola tal-kampjun bħala l-unika kumpanija relatata involuta fin-negozju tal-bijodiżil. Il-belt fejn jinsabu ż-żewġ kumpaniji qed tiġi riveduta wkoll.

(16)

Żewġ kumpanija oħra li kkooperaw talbu li isimhom jitneħħa mill-Anness billi saħqu li mhumiex produtturi esportaturi. Għaldaqstant, isem il-kumpaniji tneħħa.

(17)

Ta’ min jiftakar li l-investigazzjoni ta’ sussidjar u ta’ ħsara kopriet il-perjodu mill-1 ta’ April 2007 sal-31 ta’ Marzu 2008 (“il-perjodu tal-investigazzjoni” jew il-“PI”). Fir-rigward tax-xejriet rilevanti għall-evalwazzjoni tal-ħsara, il-Kummissjoni analizzat id-dejta li tkopri l-perjodu minn Jannar 2004 sa tmiem il-PI (“il-perjodu kkunsidrat”).

(18)

Fin-nuqqas ta’ kummenti fir-rigward tal-kampjun tal-produtturi esportaturi fl-Istati Uniti, is-sejbiet provviżorji fil-premessi (6) sa (10) tar-Regolament provviżorju huma b’dan ikkonfermati.

(19)

Ċerti partijiet ikkummentaw dwar ir-rappreżentattività tal-kampjun tal-produtturi Komunitarji. Dawn il-kummenti qed jiġu indirizzati fil-premessi (77) sa (81) hawn taħt.

(20)

Qed jitfakkar li fl-avviż tal-bidu, il-prodott li allegatament kien qed jiġi ssussidjat kien definit bħala esteri monoalkilitiċi aċidi xaħmija u/jew nafta paraffinika miksuba minn sinteżi u/jew idrotrattament, ta’ oriġini mhux fossila, magħruf komunement bħala “bijodiżil”, sew jekk f’forma pura jew f’taħlitiet.

(21)

L-ilment kien fih evidenza prima facie li l-bijodiżil u t-taħlitiet kollha ta’ bijodiżil bid-diżil minerali, prodotti u ssussidjati fl-Istati Uniti u esportati lejn il-Komunità kienu affettwaw il-qagħda ekonomika tal-prodotturi tal-bijodiżil fil-Komunità. B’konsistenza mal-karatteristiċi tal-produtturi rilevanti tal-Istati Uniti tal-bijodiżil u s-suq domestiku, id-definizzjoni tal-prodott ikkonċernat nħasbet biex tkopri l-bijodiżil anke meta jiġi inkorporat fit-taħlitiet tal-bijodiżil. Madankollu, tqies li d-definizzjoni tal-prodott ikkonċernat kif imsemmi fl-avviz tal-bidu u fil-premessa (20) hawn fuq, tista’ tqajjem tħassib dwar liema produtturi u tipi ta’ prodotti kienu maħsuba li jkunu koperti mill-investigazzjoni u liema ma kinux.

(22)

Bl-istess mod, għall-investigazzjoni tas-sussidjar u d-dannu, partikolarment għall-istabbiliment tal-marġini tas-sussidji u l-livelli ta’ eliminazzjoni tad-dannu, kien meħtieġ li l-prodotti kkonċernati jiġu identifikati biċ-ċar mill-investigazzjoni.

(23)

F’konformità mal-karatteristiċi tas-suq tal-Istati Uniti, il-prodott ikkonċernat ġie definit provviżorjament bħala esteri monoalkilitiċi aċidi xaħmija u/jew nafta paraffinika miksuba minn sinteżi u/jew idrotrattament, ta’ oriġini mhux mill-fossili, magħrufa normalment bħala “bijodiżil”, kemm jekk f’forma pura kif ukoll f’taħlitiet, li huma ogħla minn B20. Għalhekk, il-prodott ikkonċernat kopra l-bijodiżil pur (B100) u t-taħlitiet kollha li fihom iktar minn 20 % bijodiżil (“il-prodott ikkonċernat”). Dan il-limitu tqies bħala xieraq biex jippermetti distinzjoni ċara bejn it-tipi varji ta’ taħlitiet intiżi biex jitħalltu iktar u dawk intiżi għall-konsum dirett fis-suq Amerikan.

(24)

L-intestigazzjoni wriet li t-tipi kollha ta’ bijodiżil u l-bijodiżil fit-taħlitiet koperti minn din l-investigazzjoni, minkejja d-differenzi possibbli fir-rigward tal-materja prima użata għall-produzzjoni, jew varjazzjonijiet fil-proċessi tal-produzzjoni, għandhom l-istess karatteristiċi fiżiċi, kimiċi u tekniċi bażiċi u jintużaw għall-istess għanijiet. Il-varjazzjonijiet possibbli fil-prodott ikkonċernat ma jbiddlux id-definizzjoni bażika tiegħu, il-karatteristiċi jew il-perċezzjoni li bosta partijiet għandhom tiegħu.

(25)

Waslu asserzjonijiet minn partijiet interessati dwar id-definizzjoni tal-prodott ikkonċernat u l-prodott simili fejn ikkontestaw kemm id-definizzjoni tal-prodott ikkonċernat kif ukoll tal-prodott simili f’daqqa bl-istess argumenti mingħajr ma għamlu distinzjoni bejn il-kunċett tal-prodott ikkonċernat u tal-prodott simili fil-kuntest tal-proċediment.

(26)

Ta’ min ifakkar li filwaqt li l-kunċett tal-prodott ikkonċernat jitmexxa mid-dispożizzjonijiet tal-Artikolu 1(1) sa 1(4) tar-Regolament bażiku, l-interpretazzjoni tat-terminu “prodott simili” jissemma fl-Artikolu 1(5) tar-Regolament bażiku. Għalhekk, l-asserzjonijiet se jiġu indirizzati separatament hawn taħt.

(27)

Parti waħda staqsiet sa liema punt it-taħlitiet bi proporzjon baxx ta’ bijodiżil (eż. B21) għandhom xorta jitqiesu li jikkwalifikaw bħala bijodiżil fl-istess livell bħall-bijodiżil pur (B100) jew bħal taħlitiet simili li jikkonsistu primarjament f’bijodiżil b’ammont iktar baxx ta’ diżil minerali (eż. B99). Huma saħqu li B100 u B99 bażikament għaddew mill-investigazzjoni u li l-kalkoli tad-dumping u l-ħsara saru fuq il-bażi ta’ dawn iż-żewġ tipi ta’ prodotti. Fil-fehma tagħhom, l-iffissar ta’ limitu eżatt iktar minn B20, jiġifieri t-taħlita bil-livell baxx mibjugħa direttament lill-konsumaturi fl-Istati Uniti, iwassal għal definizzjoni artifiċjali tal-prodott ikkonċernat.

(28)

L-istess parti staqsiet ukoll jekk taħlita b’20 % bijodiżil tibqax tikkwalifika bħala karburant bijodiżil minflok diżil minerali li mhuwiex inkluż fid-definizzjoni tal-prodott ikkonċernat. Din il-parti tifhem li l-UE tappoġġa l-fehma li għandha tinħolaq intestatura doganali ġdida (6) għall-bijodiżil fis-Sistema Doganali Armonizzata (HS). Fil-fehma tagħha, il-Kummissjoni wessgħet id-definizzjoni tal-prodott fil-proċediment preżenti u espandiet it-tipi ta’ prodotti milquta mill-impoiżizzjoni tal-miżuri.

(29)

Barra minn hekk, il-parti tqis li fil-waqt tal-investigazzjoni, ma kienx jeżisti limitu speċifiku biex jiġi determinat x’inhu l-bijodiżil għall-klassifikazzjoni fil-kodiċi tan-NM 3824 90 91, il-kodiċi speċifiku maħluq mill-1 ta’ Jannar 2008 għall-bijodiżil mill-UE. Hi staqsietjekk skont ir-regola 3(b) tar-regoli ġenerali għall-interpretazzjoni tan-nomenklatura magħquda (7), taħlita li jkun fiha inqas minn 50 % ta’ bijodiżil tkunx għadha tikkwalifika bħala bijodiżil. Hi semmiet ukoll li l-eżempji ta’ taħlitiet imsemmija fil-kwestjonarju tal-Kummissjoni kellhom kontenuti għolja ta’ bijodiżil u għalhekk kienu jimplikaw li l-prodott ikkonċernat kien biss bijodiżil u taħlitiet li fihom biss livelli għolja ta’ bijodiżil.

(30)

Il-parti saħqet ukoll li l-UE ma tistax tbiddel id-definizzjoni tal-prodott ikkonċernat filwaqt li żżomm prodott simili differenti. Hija semmiet l-Artikolu 15.1 tad-WTO ASCM (Agreement on Subsidies and Countervailing Measures – Ftehim dwar is-Sussidji u l-Miżuri Kumpensatorji). Skonthom, is-sussidju u d-dannu misjuba saru abbażi tal-B100 u l-B99 u l-kodiċijiet tas-Sistema tat-Tariffi Armonizzati tal-Istati Uniti (HTS) (8) li ntużaw fl-investigazzjoni ma jidhrux li jinkludu prodotti b’volum ta’ bijodiżil baxx daqs 20 %. Huma semmew ukoll l-iżvelar provviżorju lill-prodotturi tal-Istati Uniti tal-bijodiżil li kienu fil-kampjun, li juri li l-produtturi tal-Istati Uniti fil-kampjun kienu jbiegħu taħlitiet magħmula esklussivament minn tipi varji ta’ bijodiżil. Għalhekk, il-prodott ikkonċernat għandu jkun limitat għall-prodotti li fihom 100 % ta’ bijodiżil (B100), anki jekk komposti minn bijodiżil magħmul minn materja bażika differenti jew għal taħlitiet li fihom 99 % ta’ bijodiżil (B99).

(31)

Il-parti semmiet Sentenza riċenti tal-Qorti (9) dwar importazzjonijiet tan-nitrat tal-ammonju u kkonkludiet li r-raġunar wara dik is-sentenza japplika wkoll għall-proċediment attwali u li l-bijodiżil li ma kienx parti minn taħlitiet f’kontenut għoli ħafna ma jistax ikun soġġett għall-investigazzjoni u għall-miżuri billi mhuwiex il-prodott simili li għalih saru s-sejbiet ta’ dumping u dannu, jiġifieri prodotti li fihom biss il-bijodiżil (B100) jew taħlitiet b’99 % ta’ bijodiżil (B99).

(32)

Il-partijiet ma tawx evidenza jew referenza legali li turi li l-prodott ikkonċernat ma kienx definit b’mod korrett f’din l-investigazzjoni. Id-dispożizzjonijiet fl-Artikolu 1(1) sa 1(4) tar-Regolament bażiku li jipprovdu gwida dwar id-definizzjoni tal-prodott ikkonċernat. L-Artikolu 1(1) jgħid li: “Dazju ta’ kumpens jista’ jkun impost għall-iskop ta’ tpaċija ta’ xi sussidju mogħti, direttament jew indirettament, għall-manifattura, il-produzzjoni, l-esportazzjoni jew it-trasport ta’ xi prodott li r-rilaxx tiegħu fiċ-ċirkolazzjoni libera fil-Komunità toħloq ħsara.”

(33)

Kif imsemmi fil-premessa (21) hawn fuq, l-ilment kien fih evidenza prima facie li l-bijodiżil u t-taħlitiet kollha ta’ bijodiżil bid-diżil minerali, manifatturati fl-Istati Uniti u esportati lejn il-Komunità bi prezz issussidjat kienu affettwaw il-qagħda ekonomika tal-prodotturi tal-bijodiżil fil-Komunità.

(34)

Il-partijiet ma tawx evidenza li wriet li l-limitu ffissat fir-Regolament provviżorju li jifred il-prodott ikkonċernat u l-prodott mhux ikkonċernat kien artifiċjali. Kif imsemmi fil-premessi (26) u (28) tar-Regolament provviżorju, l-investigazzjoni wriet li B20, u potenzjalment taħlitiet b’livelli iktar baxxi, ġew fil-fatt mibjugħa direttament lill-konsumaturi fl-Istati Uniti. L-investigazzjoni wriet ukoll li s-suq għat-taħlit u s-suq għall-prodotti tal-konsumaturi kienu swieq differenti bi klijenti differenti: suq wieħed fejn il-bijodiżil u t-taħlitiet tal-bijodiżil kienu maħsuba għal iktar taħlit min-negozjanti u min iħallat u suq ieħor fejn it-taħlitiet kienu maħsuba għan-netwerk ta’ distribuzzjoni u għalhekk għall-konsumaturi. Id-definizzjoni tal-limitu għall-prodott ikkonċernat iktar minn B20 ippermetta li jkun hemm linja diviżiva ċara u li tiġi evitata l-konfużjoni bejn il-prodotti, is-swieq u l-partijiet varji fl-Istati Uniti. Għalhekk, din l-asserzjoni ġiet miċħuda.

(35)

Fl-investigazzjonijiet kollha kontra s-sussidji, huwa komuni li l-kumpaniji individwali investigati ma jipproduċux u ma jbiegħux it-tipi kollha ta’ prodotti inklużi fid-definizzjoni tal-prodott ikkonċernat. Xi kumpaniji jistgħu jipproduċu firxa limitata ħafna ta’ tipi ta’ prodotti filwaqt li oħrajn jistgħu jipproduċu firxa ikbar. Madankollu, dan ma jaffettwax id-definizzjoni tal-prodott ikkonċernat. Għalhekk, qed jitqies li l-asserzjoni li l-prodott ikkonċernat għandu jkopri biss it-tipi ta’ prodott li ġew esportati mill-produtturi tal-Istati Uniti u użati għas-sussidjar u l-kalkoli tad-dannu mhijiex ġustifikata.

(36)

Kif imsemmi fir-Regolament provviżorju u fil-premessa (20) hawn fuq, l-investigazzjoni ffukat primarjament fuq il-bijodiżil, f’għamla pura u inkorporata f’taħlitiet. Il-miżuri kumpensatorji se japplikaw biss għat-taħlitiet rilevanti esportati lejn is-suq tal-Komunità. Għalhekk, jitqies li l-mistoqsija dwar jekk taħlita b’20 % bijodiżil tibqax tikkwalifika bħala fjuwil bijodiżil minflok diżil minerali li mhuwiex inkluż fid-definizzjoni tal-prodott ikkonċernat mhijiex rilevanti.

(37)

Ta’ min wieħed jiċċara li s-sussidji u d-dannu misjuba ta’ kull kumpanija investigata kienu bbażati esklussivament fuq it-tipi ta’ prodott rilevanti li ġew prodotti u mibjugħa mill-kumpanija rilevanti matul il-PI. L-asserzjoni li d-definizzjoni tal-prodott ikkonċernat inkluż taħlitiet ‘il fuq minn B20 jaffettwaw b’mod ħażin lill-produtturi tal-Istati Uniti mhijiex ġustifikata u ma tistax twassal għall-konklużjoni li l-prodott ikkonċernat għandu jkun limitat għall-prodotti li fihom 100 % bijodiżil (B100) anki jekk magħmula minn bijodiżil ta’ materja bażika differenti jew taħlita magħmula minn 99 % bijodiżil (B99). L-inklużjoni ta’ taħlitiet ogħla minn B20 fid-definizzjoni tal-prodott ikkonċernat ma kellhiex impatt fuq is-sejbiet magħmula għall-kumpaniji investigati li ma jipproduċux u ma jesportawx dan it-tip ta’ prodott.

(38)

L-allegazzjoni tal-parti li r-raġunar tas-Sentenza tal-Qorti (10) japplika wkoll għall-proċediment attwali u li l-bijodiżil li mhuwiex parti minn taħlitiet f’kontenut għoli ħafna ma jistax ikun soġġett għall-ambitu tal-investigazzjoni lanqas ma hi ġustifikata. Fil-fatt, għal kull kumpanija investigata, kull marġini tal-ħsara u s-sussidji se jaqblu eżattament mal-prodott ikkonċernat u l-prodott simili li għalih ġew stabbiliti s-sussidji u d-dannu misjuba, jiġifieri t-tipi ta’ prodotti rilevanti li fihom il-bijodiżil u li jinbiegħu fis-suq domestiku u esportati lejn il-Komunità minn dik il-kumpanija. Ukoll, is-sentenza li semma l-operatur kienet tikkonċerna reviżjoni ta’ miżuri eżistenti kontra d-dumping li rriżultat fl-estensjoni tagħhom għal prodotti oħra minbarra l-prodott ikkonċernat, li mhux l-istess każ fl-investigazzjoni attwali.

(39)

Għalkemm, jitqies li l-eżempji pprovduti fi kwestjonarju maħsuba biex jiġbor dejta għall-iskop ta’ investigazzjoni ma jistgħu jintużaw biex isiru suppożizzjonijiet dwar il-konklużjoni tal-investigazzjoni, ta’ min jinnota li l-Kummissjoni ma tistax tkun taf minn qabel, jiġifieri qabel ma tagħmel l-investigazzjoni fuq il-post, liema tipi ta’ prodotti jiġu prodotti u jinbiegħu fis-suq domestiku u għall-esportazzjoni mill-kumpaniji kkonċernati meta jkun sar il-kwestjonarju. Skont l-Artikolu 1 tar-Regolament bażiku, it-tipi ta’ prodotti rilevanti li għandhom jiġu inklużi fl-ambitu ta’ investigazzjoni kontra s-sussidjar huma dawk meqjusa li huma ssussidjati minn sussidju kumpensatorju. F’dan il-każ, dazju kumpensatorju jista’ jkun impost biex jagħmel tajjeb għal kull sussidju mogħti, direttament jew indirettament, għall-manifattura, il-produzzjoni, l-esportazzjoni jew it-trasport ta’ prodott.

(40)

Jitqies ukoll li B100 ma għandux ikun eskluż mid-definizzjoni tal-prodott. L-ewwelnett billi B100 jew il-bijodiżil pur huwa l-prodott ewlieni li għalih ġew stabbiliti s-sussidji tal-Istati Uniti. Dan joħroġ biċ-ċar mill-Kodiċi tad-Dħul Intern tal-Istati Uniti (Kodiċi. tal-Istati Uniti), partikolarment it-Titolu 26, $40A, punt (d), li jiddefinixxi biċ-ċar it-terminu bijodiżil u li l-iskema sħiħa tas-sussidji ġiet implimentata biex tappoġġa l-industrija tal-bijodiżil fl-Istati Uniti. It-tieni, billi matul iż-żjara tal-verifika fil-post tal-GSU, jidher li l-bijodiżil, anki meta mħallat barra mill-Istati Uniti, minn kumpanija li għandha sussidjarju fl-Istati Uniti tista’ tibbenefika mill-kreditu tat-taxxa Federali għall-bijodiżil ta’ USD 1 kull gallun fl-Istati Uniti.

(41)

L-investigazzjoni wriet ukoll li l-produzzjoni tal-bijodiżil pur minn kull produttur fl-Istati Uniti timplika l-ħruġ ta’ ċertifikat ta’ produttur imsemmi fil-premessa 51 tar-Regolament provviżorju. Dan iċ-ċertifikat huwa trasferibbli u għandu jiġi ppreżentat lill-Gvern tal-Istati Uniti meta ssir it-talba għas-sussidju.

(42)

Abbażi tal-fatti u l-kunsiderazzjonijiet ta’ hawn fuq, huwa kkonfermat li t-tipi kollha ta’ bijodiżil u l-bijodiżil fit-taħlitiet koperti minn din l-investigazzjoni, jiġifieri bijodiżil pur (B100) u taħlitiet ta’ iktar minn B20, minkejja d-differenzi possibbli fir-rigward tal-materja prima użata għall-produzzjoni, jew varjazzjonijiet fil-proċess tal-produzzjoni, għandhom l-istess karatteristiċi fiżiċi, kimiċi u tekniċi bażiċi u jintużaw għall-istess għanijiet. Il-varjazzjonijiet possibbli fil-prodott ikkonċernat ma jbiddlux id-definizzjoni bażika, il-karatteristiċi tagħha jew il-perċezzjoni li bosta partijiet għandhom tagħha.

(43)

Instab provviżorjament li l-prodotti manifatturati u mibjugħa fis-suq domestiku tal-Istati Uniti, li huma koperti minn din l-investigazzjoni, għandhom karatteristiċi u użi fiżiċi, kimiċi u tekniċi bażiċi simili għal dawk esportati minn dan il-pajjiż lejn is-suq Komunitarju. Bl-istess mod, il-prodotti manifatturati milll-industrija tal-Komunità u mibjugħa fis-suq tal-Komunità għandhom karatteristiċi u użi fiżiċi, kimiċi u tekniċi bażiċi simili meta mqabbla ma’ dawk esportati lejn il-Komunità mill-pajjiż ikkonċernat.

(44)

Għalhekk, ma nstabet ebda differenza bejn it-tipi varji tal-prodott ikkonċernat u t-tipi Komunitarji tal-prodott mibjugħ fis-suq tal-Komunità li tista’ twassal għall-konklużjoni li t-tipi ta’ prodotti manifatturati u mibjugħa fis-suq tal-Komunità mhumiex prodotti simili, li għandhom l-istess karatteristiċi fiżiċi, kimiċi u tekniċi, jew simili ħafna, bħat-tipi tal-prodott ikkonċernat manifatturat fl-Istati Uniti u esportat lejn il-Komunità. Għalhekk, ġie konkluż li t-tipi kollha ta’ bijodiżil koperti minn din l-investigazzjoni għandhom jitqiesu li huma l-istess skont it-tifsira tal-Artikolu 1(5) tar-Regolament bażiku.

(45)

Parti waħda saħqet li d-definizzjoni tal-prodott simili hija marbuta mill-qrib mal-identifikazzjoni tal-prodott ikkonċernat u għandha tiġi stabbilita f’termini tal-karatteristiċi fiżiċi u l-użu aħħari tal-prodott. Bażikament qalu li mhux il-B20 jiġi kkunsmat fl-UE iżda taħlita iktar baxxa li hi B5. Għalhekk, il-prodott simili ġie definit ħażin. Saħqu wkoll li d-definizzjoni tal-prodott ikkonċernat ma tistax titbiddel filwaqt li jinżamm prodott simili differenti.

(46)

Billi tidher ċar fil-premessi (31) sa (37) tar-Regolament provviżorju, id-definizzjoni tal-prodott simili hija marbuta mal-identifikazzjoni tal-prodott ikkonċernat u ġiet stabbilita primarjament f’termini tal-karatteristiċi fiżiċi tal-prodott. L-użu aħħari effettiv tal-prodotti tqies ukoll u tqies li l-limitu tal-B20 għandu jinżamm ukoll għad-definizzjoni tal-prodott simili. F’dan il-każ, l-għadd ta’ tipi ta’ prodotti koperti mid-definizzjoni tal-prodott simili tnaqqas ukoll biex jaqbel mad-definizzjoni tal-prodott ikkonċernat.

(47)

Għalhekk, l-asserzjonjiet tal-partijiet li d-definizzjoni tal-prodott simili kienet inkorretta kellhom jiġu rrifjutati u d-definizzjoni provviżorja tal-prodott simili tista’ tiġi kkonfermata.

(48)

Kumpanija waħda saħqet li l-Kummissjoni kienet taf bir-raġunijiet stipulati fil-premessa 9 tar-Regolament provviżorju għall-esklużjoni tagħha mill-kampjun meta oriġinarjament għażlet il-kampjun. Fuq din il-bażi, il-kumpanija ma kellhiex tiġi eskluża mill-kampjun.

(49)

Fir-rigward ta’ din l-asserzjoni, ġie nnutat li, jekk il-kumpanija tkunx inkluża jew le fil-kampjun ma kellux impatt materjali fuq il-kumpanija f’termini tar-riżultati tal-investigazzjoni. Jekk kellha tiġi inkluża fil-kampjun, il-kumpanija jkollha r-rata tad-dazju kumpensatorju individwali tagħha stabbilita kif sar fl-istadju provviżorju anki jekk il-kumpnaija ġiet eskluża mill-kampjun. Ir-Regolament attwali stabbilixxa wkoll rata kumpensatorja tad-dazju individwali għall-kumpanija. Wara l-iżvelar finali ta’ dawn is-sejbiet, il-kumpanija saħqet li “l-esklużjoni de-facto” tagħha mill-kampjun tal-esportaturi telfitilha xi drittijiet sostantivi inkluż drittijiet li jirriżultaw minn kalkoli speċifiċi kif applikati għad-dejta mogħtija mill-esportaturi fil-kampjun. Bi tweġiba għal dan, ġie nnutat li sar kalkolu speċifiku tal-livell tas-sussidjar ta’ din il-kumpanija. Fir-rigward tal-marġini tal-ħsara għal din il-kumpanija, dan ġie stabbilit kif stipulat fil-premessi (173) sa (175) hawn taħt, jiġifieri fuq il-bażi tal-fatti disponibbli skont l-Artikolu 28 tar-Regolament bażiku, jekk wieħed iqis li l-kumpanija ma tatx l-informazzjoni mitluba fir-rigward tal-bejgħ tal-esportazzjoni u l-bejgħ mill-ġdid tagħha fil-Komunità. F’dawn iċ-ċirkostanzi, l-asserzjoni tal-kumpanija ma ntlaqgħetx.

(50)

Kumpanija waħda saħqet li r-rata tad-dazju kumpensatorju dehret li ġiet ikkalkulata fuq il-bażi tal-bejgħ domestiku minbarra l-bejgħ għall-esportazzjoni. Il-kumpanija talbet li l-kalkoli jiġu kkoreġuti skont dan.

(51)

Fir-rigward ta’ din l-asserzjoni, ġie nnutat li l-iskemi kollha tas-sussidji li qed jiġu kkumpensati nstabu li kienu sussidji domestiċi, jiġifieri li jibbenefikaw lill-bejgħ domestiku kif ukoll lil dak tal-esportazzjoni. F’konformità mal-prassi standard, l-ammont tal-benefiċċju minn kull skema fil-PI ġie allokat fuq il-bejgħ totali tal-prodott ikkonċernat (jiġifieri bejgħ domestiku flimkien mal-esportazzjonijiet). Għalhekk, l-argument tal-kumpanija ma ntlaqax.

(52)

Din il-kumpanija, kif ukoll kumpanija oħra, innutat ukoll li l-valuri CIF użati għall-kalkolu tar-rata tad-dazju kompensatorju mhumiex l-istess bħal dawk użati għall-kalkoli tal-ħsara u d-dumping. Il-kumpaniji jqisu li, sabiex ikun hemm konsistenza, il-valuri CIF korretti li ntużaw għall-kalkoli tad-dumping u l-ħsara għandhom jintużaw ukoll għall-kalkoli tar-rata tad-dazju kumpensatorja.

(53)

Fir-rigward ta’ din l-asserzjoni, wieħed għandu jerġa’ jinnota li, kif imsemmi fil-premessa (51) hawn fuq, l-iskemi kollha tas-sussidji li qed jiġu kkumpensati nstabu li kienu sussidji domestiċi. F’dawn iċ-ċirkostanzi, id-denominatur użat fl-istabbiliment tal-benefiċċju fil-PI huwa l-bejgħ totali u mhux, bħal fi proċedimenti tal-anti-dumping fejn il-bejgħ għall-esportazzjoni lejn l-UE biss huwa d-denominatur. F’dawn iċ-ċirkostanzi, din l-asserzjoni ma ntlaqgħetx.

(54)

Għadd ta’ kumpaniji u l-Bord Nazzjonali tal-Bijodiżil (NBB) argumentaw li dazju kumpensatorju ma għandux jitpoġġa fuq importazzjonijiet ta’ B100 fuq il-bażi li l-marġinijiet tas-sussidji u l-ħsara ġew ikkalkulati mingħajr ma jiġi inkluż il-bejgħ ta’ B100. Fir-rigward ta’ dan l-argument, ta’ min jinnota li l-bejgħ ta’ B100 prodotti mill-kumpaniji fil-kampjun tqiesu fil-kalkolu tal-ammont tas-sussidju kumpensatorju kif ukoll fil-kalkollu tal-marġini tal-ħsara. F’dawn iċ-ċirkostanzi, din l-asserzjoni ma ntlaqgħetx.

(55)

Kumpanija waħda saħqet li l-ammont ta’ benefiċċju li rċeviet bit-taxxa tas-sisa federali/kreditu fuq it-taxxa tad-dħul fil-perjodu tal-investigazzjoni, ikun inqas minn USD 1 kull gallun jekk il-benefiċċju jiġi kkalkulat billi jinfirex fuq il-volum totali tal-bejgħ fil-PI.

(56)

Fir-rigward tal-benefiċċju miksub bl-iskema tat-taxxa tas-sisa/kreditu tat-taxxa tad-dħul, dan ġie kkalkulat, kif imniżżel fil-premessa (59) tar-Regolament provviżorju, fuq il-bażi ta’ USD 1 kull gallun ta’ bijodiżil pur mibjugħ fil-PI, kemm jekk mibjugħ bħala bijodiżil pur (B100) u kemm jekk f’taħlita. Dan il-benefiċċju ġie rifless fil-livell ta’ dazju kumpensatorju provviżorju impost. Id-dazju provviżorju, u tabilħaqq id-dazju definittiv li issa għandu jiġi impost minn dan ir-Regolament, jistipula li d-dazju kumpensatorju fuq it-taħlitiet għandu jkun applikabbli proporzjonalment għat-taħlita skont il-kontentut totali tal-bijodiżil. F’dawn iċ-ċirkostanzi, jitqies li dazju bbażat fuq USD 1 kull gallun ta’ bijodiżil waħdu jirrifletti korrettament il-benefiċċju fil-PI billi dazju orħos jiġi impost fuq, pereżempju, importazzjonijiet ta’ B99 peress li fih inqas bijodiżil. F’dawn iċ-ċirkostanzi, l-asserzjoni tal-kumpanija ma ntlaqgħetx.

(57)

Għadd ta’ kumpaniji u l-NBB saħaq li, billi mhemmx disponibbli taxxa tas-sisa federali/kreditu fuq it-taxxa tad-dħul fuq il-bejgħ ta’ B100, ma hemmx bażi biex wieħed iqis li dan il-bejgħ ibbenefika minn dan il-kreditu fuq it-taxxa. Waħda minn dawn il-kumpaniji argumentat partikolarment li, għall-bejgħ tagħha ta’ B100 fil-PI, ma ntweriex li kienu l-benefiċjarju indirett tad-USD 1 kull gallun ta’ kreditu fuq it-taxxa.

(58)

Fl-indirizzar ta’ dawn l-asserzjonijiet, ta’ min ifakkar li l-Kodiċi tal-Istati Uniti jistipula li ma għandux jingħata kreditu għat-taħlitiet ta’ bijodiżil sakemm il-kumpanija (min iħallat) li tagħmel it-taħlit tal-bijodiżil u d-diżil minerali tikseb ċertifikat (“Ċertifikat għall-Bijodiżil”) mill-produttur tal-bijodiżil li fih il-produttur jiċċertifika l-kwantità ta’ bijodiżil li għalih jirreferi ċ-ċertifikat. Iċ-ċertifikat tal-bijodiżil huwa trasferibbli u jintitola lid-detentur għal kreditu ta’ taxxa ta’ USD 1 fuq kull gallun għall-ammont ta’ glalen ta’ bijodiżil użati mill-pretendent fil-produzzjoni ta’ kull taħlita ta’ bijodiżil. Fir-rigward tal-bejgħ tal-B100 mill-kumpaniji investigati fil-PI, hemm benefiċċju għall-kumpaniji billi ċ-ċertifikat tal-bijodiżil jagħti dritt għal kreditu fiskali ta’ USD 1 għal kull gallun.

(59)

Wara l-iżvelar finali, xi partijiet argumentaw li l-benefiċċju milll-kreditu fiskali ta’ min iħallat jinkiseb mnn dak li jħallat il-bijodiżil u li ma ġiex iddeterminat li għall-bejgħ tal-bijodiżil pur (B100), il-benefiċċju jinkiseb mill-produttur/bejjiegħ tal-B100. Bi tweġiba għal dan, ta’ min jinnota li, kif spjegat hawn fuq, iċ-ċertifikat tal-bijodiżil huwa trasferibbli. Tabilħaqq, għalhekk, id-detentur taċ-ċertifikat jaf li ċ-ċertifikat għandu valur ta’ USD 1 kull gallun.

(60)

L-GSU jqis li, billi fil-premessa 44 tar-Regolament Provviżorju hemm li sabiex tkun eliġibbli għall-kreditu tat-taħlitiet tal-bijodiżil, kumpanija trid toħloq taħlita ta’ bijodiżil u diżil, l-ammont tal-benefiċċju ma għandux ikun stabbilit fuq il-bażi ta’ bijodiżil pur jew f’taħlita kif stipulat fil-premessa (59) tar-Regolament Provviżorju. F’dan ir-rigward, ta’ min jinnota li, għar-raġunijiet imsemmija fil-premessa (58) hawn fuq u kif indirizzat fil-premessi (54) sa (55) tar-Regolament Provviżorju, qed jitqies li l-bijodiżil kollu huwa sussidjat.

(61)

F’dawn iċ-ċirkostanzi, jitqies li l-bejgħ ta’ B100 instab li jagħti benefiċċju lill-produtturi ta’ dan il-prodott u, għalhekk, l-asserzjonijiet tal-premessi (57) u (60) ma ntlaqgħux.

(62)

Xi kumpaniji u l-NBB argumentaw li ma għandux ikun hemm dazju kumpensatorju fuq importazzjonijiet ta’ B100 billi dan il-bejgħ lejn l-UE ma jistax jibbenefika minn kreditu fiskali tal-bijodiżil. Kif intqal fil-premessa (60) hawn fuq, instab li l-bijodiżil kollu huwa ssussidjat bl-iskema tal-kreditu fiskali. F’dawn iċ-ċirkostanzti, tqies li dazju kumpensatorju jista’ jitqiegħed fuq l-importazzjonijiet tal-bijodiżil pur u bijodiżil f’taħlita. Barra minn hekk, ta’ min jinnota li l-bejgħ tal-B100 fil-Komunità huma eliġibbli wkoll għall-benefiċċji taħt il-kreditu tat-taxxa fuq id-dħul tal-Produttur ż-Żgħir tal-Agribijodiżil.

(63)

Matul il-PI, xi kumpaniji fil-kampjun kienu esportaw kwantitajiet żgħar ta’ B100 lill-Komunità. Madankollu, deher li ma kienx hemm ġustifikazzjoni ekonomika biex jiġi esportat il-B100 minflok il-B99 lejn il-Komunità, billi direttament jew indirettament tal-aħħar kien jibbenefika mill-kreditu għat-taħlitiet tal-bijodiżil sakemm l-esportatur jew ix-xerrej ma kkwalifikax għall-kreditu tat-taxxa fuq id-dħul imsemmi hawn fuq. F’dak il-każ, ikun hemm benefiċċju għall-produttur tal-Istati Uniti fl-istess mod bħall-bejgħ tal-B100 fis-suq domestiku. Wara l-iżvelar finali, l-Istati Uniti qalu li ma ġietx ikkwotata evidenza biex tissostanzja l-istqarrija li ma hemmx ġustifikazzjoni ekonomika biex jiġi esportat il-B100 minflok il-B99 lejn il-Komunità. F’dan ir-rigward, ta’ min jinnota li s-sejba ta’ hawn fuq tgħid li “jidher” li ma hemmx ġustifikazzjoni ekonomika biex jiġi esportat il-B100 minflok il-B99 lejn il-Komunità. Ir-raġunijiet għal din il-konklużjoni huma kif stipulat hawn fuq.

(64)

Għalhekk, fid-dawl tal-fatt li huwa possibbli mija fil-mija li l-esportazzjoni tal-B100 tkun sussidjata u li jidher li ma hemmx ġustifikazzjoni ekonomika għall-esportazzjoni lejn il-Komunità mingħajr is-sussidju, l-asserzjonijiet ta’ hawn fuq ma ntlaqgħux.

(65)

Fid-dawl ta’ dak li ntqal hawn fuq, is-sejbiet marbuta ma’ din l-iskema kif stipulati fil-premessi (41) sa (63) tar-Regolament provviżorju huma b’dan ikkonfermati.

(66)

Fin-nuqqas ta’ kummenti rigward din l-iskema, il-premessi (64) sa (72) tar-Regolament provviżorju huma b’dan ikkonfermati.

(67)

Fin-nuqqas ta’ kummenti rigward din l-iskema, il-premessi (73) sa (86) tar-Regolament provviżorju huma b’dan ikkonfermati.

(68)

Fin-nuqqas ta’ kummenti rigward l-iskemi, il-premessi (87) sa (157) tar-Regolament provviżorju huma b’dan ikkonfermati.

(69)

L-ammont ta’ sussidji kumpensatorji bi qbil mad-dispożizzjonijiet tar-Regolament bażiku, espress ad valorem, għall-kumpaniji investigati jvarja bejn 29,1 % u 41,1 %. Billi dawn huma fl-istess livell kif stabbilit fil-premessa (158) tar-Regolament provviżorju, din il-premessa hija għalhekk ikkonfermata.

(70)

Il-metodoloġija għall-istabbilment tal-marġini tas-sussidji għall-kumpaniji li kkooperaw u li mhumiex fil-kampjun, ġiet stipulata fil-premessa (159) tar-Regolament provviżorju. Skont l-Artikolu 15(3) tar-Regolament bażiku, il-marġini tas-sussidju għall-kumpaniji li kkooperaw u li mhux inklużi fil-kampjun, ikkalkolat fuq il-bażi tal-marġini medju tas-sussidju b’piż differenzjat stabbilit għall-kumpaniji fil-kampjun li kkooperaw, huwa ta’ 36.0 %. Għaldaqstant, il-premessa (159) tar-Regolament provviżorju hi kkonfermata.

(71)

Il-bażi għall-istabbiliment ta’ marġini ta’ sussidji għall-pajjiż kollu ġiet stabbilita fil-premessa (160) tar-Regolament provviżorju. Fin-nuqqas ta’ kummenti, il-premessa (160) tar-Regolament provviżorju hija kkonfermata.

(72)

Parti interessata waħda kkontestat l-esklużjoni mill-evalwazzjoni tal-produzzjoni totali tal-Komunità tal-grupp ta’ produtturi marbuta ma’ produttur esportatur fl-Istati Uniti msemmija fil-premessa (162) tar-Regolament provviżorju fuq il-bażi tal-Artikolu 9(1) tar-Regolament bażiku. Huwa argumentat li d-denominatur korrett biex jiġi stabbilit l-appoġġ lill-ilment għandu jinżamm f’madwar 5 400 elf tunnellata u mhux imnaqqas għal madwar 4 200 sa 4 600 elf tunnellata kif sar fl-istadu provviżorju.

(73)

Id-dispożizzjonjiet rilevanti tar-Regolament bażiku biex jevalwa l-pożizzjoni jew l-appoġġ għall-investigazzjoni huma l-Artikolu 9(1) u l-Artikolu 10(8) tar-Regolament bażiku. Għall-informazzjoni, id-dispożizzjonijiet rilevanti tal-Ftehim dwar is-Sussidji u l-Miżuri Kumpensatorji dwar id-definizzjoni tal-industrija domestika jinsabu fil-leġiżlazzjoni fl-Artikolu 9(1) tar-Regolament bażiku. Minn dawn id-dispożizzjonijiet, jidher ċar li d-definizzjoni tal-produzzjoni domestika biex tiġi stabbilita l-pożizzjoni għanda ssir flimkien mal-istess rekwiżiti bħal dawk fid-definizzjoni tal-industrija domestika u hija soġġetta għalihom. Fi kwalunkwe każ, din l-asserzjoni mhijiex tali li tbiddel il-konklużjoni li l-investigazzjoni ġiet appoġġata minn proporzjoni kbira tal-produzzjoni Komunitarja. Anki jekk id-denominatur inżamm fi 5 400 elf tunnellata, l-appoġġ għall-investigazzjoni jkun iktar minn 50 %, jiġifieri fil-biċċa l-kbira ogħla mir-rekwiżiti tar-Regolament bażiku.

(74)

L-istess parti interessata argumentat li fid-dawl tad-definizzjoni tal-prodott ikkonċernat u l-prodott simili li huwa l-bijodiżil, f’għamla pura jew f’taħlitiet li fihom iktar minn 20 % ta’ bijodiżil (B20), l-industrija Komunitarja u l-produzzjoni Komunitarja għandha tkun magħmula mill-kumpaniji Komunitarji kollha li jipproduċu l-bijodiżil u t-taħlitiet ogħla minn B20. Intqal li ma hemmx evidenza li dak li ressaq l-ilment jew il-Kummissjoni ppruvaw jinkludu dawn il-kumpaniji fil-produzzjoni totali jew iddeterminaw li dawn il-produtturi appoġġaw l-ilment.

(75)

F’dan ir-rigward, ta’ min jinnota li ċ-ċifra tal-produzzjoni totali tal-Komunità indikata fil-premessa (162) tar-Regolament provviżorju ma tqisx il-volum tal-produzzjoni tal-bijodiżil f’taħlitiet ogħla minn B20. Jista’ jkun iċċarat iktar li skont l-informazzjoni disponibbli, il-produzzjoni fil-Komunità ta’ taħlitiet li fihom bejn 21 % (B21) u 99 % (B99) ta’ bijodiżil kienet limitata ħafna matul il-PI. L-unika produzzjoni tat-taħlitiet f’din il-firxa kienet ikkonċentrata fuq taħlitiet ta’ B30 u ma qabżitx is-60 000 tunnellata f’termini ta’ kontenut ta’ bijodiżil. Barra minn hekk, il-Kummissjoni kkuntattjat produtturi magħrufa ta’ B30 wara l-impożizzjoni ta’ miżuri provviżorji u r-risponsi li waslu minn tnejn mill-produtturi jindikaw li jappoġġaw l-ilment.

(76)

Minħabba li m’hemmx kummenti oħra, il-premessi (161) sa (163) tar-Regolament provviżorju dwar id-definizzjoni tal-produzzjoni Komunitarja, l-industrija Komunitarja u tal-kwalità tal-produttur Komunitarju, huma b’dan ikkonfermati.

(77)

Parti waħda argumentat li r-rendiment ta’ produttur Komunitarju wieħed fil-kampjun li naqas milli jikkoopera fl-investigazzjoni kien tajjeb ħafna u kellu jitqies fl-evalwazzjoni tal-ħsara lill-industrija Komunitarja. Ġie argumentat li dan il-produttur ma ġarrabx ħsara matul il-PI u li l-aħjar fatti disponibbli għandhom jintużaw skont l-Artikolu 28 tar-Regolament bażiku. F’dan ir-rigward, il-parti ssuġġeriet li tintuża dejta finanzjarja disponibbli għall-pubbliku ta’ dan il-produttur għall-2007 u l-2008 għall-eżami tal-ħsara lill-industrija Komunitarja.

(78)

Hija prassi komuni fl-investigazzjoni ta’ kontra s-sussidji li l-Kummissjoni teskludi produtturi li ma kkooperawx bl-iskop tal-evalwazzjoni tal-ħsara u li ma tużax fatt disponibbli f’konformità mal-Artikolu 28 tar-Regolament bażiku. Id-dejta dwar il-ħsara tkopri perjodu estiż ta’ 4 snin u mhux possibbli li tinkiseb dwar sorsi pubbliċi, l-informazzjoni meħtieġa kollha biex jiġu stabbiliti l-indikaturi kollha tal-ħsara għall-perjodu kollu. F’dan il-każ partikolari, il-produttur Komunitarju msemmi ġie eskluż mill-investigazzjoni billi ma pprovdiex l-informazzjoni sinifikanti sħiħa għas-snin 2004 sa 2006 u ta biss informazzjoni parzjali għall-2007 u l-PI. Bl-użu tal-informazzjoni pubblika għall-attività ta’ dan il-produttur fil-bijodiżil għall-2007 u l-2008, ma kienx jippermetti li tinkiseb dejta għall-fatturi kollha tal-ħsara u għas-snin kollha tal-perjodu kkunsidrat. Dan kien ifixkel ix-xejriet kollha li huma rilevanti għall-evalwazzjoni tal-ħsara.

(79)

Barra minn hekk, kieku l-produttur imsemmi nżamm fil-kampjun, ma kinitx tkun possibbli l-evalwazzjoni tar-roħs fil-prezz li kellha ssir għat-totalità tal-bejgħ tal-produtturi fil-kampjun billi l-kumpanija msemmija ma tatx lista tal-bejgħ dettaljata skont it-tip ta’ prodott għall-PI. Fl-aħħar nett, ta’ min jinnota li bil-maqlub għall-asserzjoni tal-parti interessata, ir-rendiment finanzjarju tal-produttur imsemmi, f’termini ta’ profittabbilità kif jidher fid-dejta tiegħu disponibbli għall-pubbliku, kien inqas sewwa mill-profittabilità medja stabbilita għall-produtturi Komunitarju kkooperaw fil-kampjun li kif jidher fit-Tabella 7 tar-Regolament provviżorju. Fuq il-bażi ta’ dan ta’ hawn fuq, it-talba li saret minn din il-parti ġiet miċħuda.

(80)

L-istess parti saħqet li l-kampjun tal-produtturi Komunitarji ma kienx rappreżentattiv tal-industrija Komunitarja billi kien ibbażat biss fuq il-produtturi ta’ bijodiżil pur (B100) u għalhekk ma inkludiex produtturi ta’ taħlitiet minn B99 sa B20 kif ukoll produtturi ta’ taħlitiet tal-B100.

(81)

F’dan ir-rigward, ta’ min ifakkar li, kif imsemmi fil-premessa (75) hawn fuq, il-produzzjoni Komunitarja tat-taħlitiet tal-bijodiżil bejn B20 u B99 kienet limitata ħafna matul il-PI. Fid-dawl ta’ din il-kwantità limitata, li tirrappreżenta inqas minn 2 % tal-produzzjoni Komunitarja totali tal-prodott simili fil-PI, jista’ jiġi konkluż li l-għażla tal-kampjun, li kien primarjament ibbażat fuq l-ikbar volum tal-produzzjoni u l-bjegħ fil-Komunità, kienet rappreżentattiva. Sa fejn għandhom x’jaqsmu l-produtturi ta’ taħlitiet tal-B100, dawn il-kumpanija ma jistgħux jitqiesu bħala produtturi tal-prodott simili billi qed jipproċessaw, permezz ta’ operazzjoni sempliċi ta’ taħlit, prodott simili eżistenti. L-asserzjoni kienet għalhekk miċħuda.

(82)

Billi m’hemmx kummenti oħra, il-premessi (164) sa (166) tar-Regolament provviżorju huma b’dan ikkonfermati.

(83)

Kif imsemmi fil-premessa (17) hawn fuq, l-eżami tax-xejriet li jikkonċernaw l-evalwazzjoni tal-ħsara kopra l-perjodu minn Jannar 2004 sal-aħħar tal-PI. Madankollu, l-investigazzjoni wriet li l-industrija Komunitarja kienet prattikament għadha tibda fl-2004. Għalhekk, tqies iktar xieraq li ssir analiżi tal-ħsara possibbli u tas-sitwazzjoni ekonomika tal-industrija Komunitarja bbażata fuq ix-xejriet għall-perjodu 2005 sal-PI (“perjodu analizzat”). Billi ebda parti ma kkummentat dwar dan l-approċċ, il-premessa (167) tar-Regolament provviżorju ġiet ikkonfermata.

(84)

Fin-nuqqas ta’ kummenti li jistgħu jiġġustifikaw bidla rigward il-konsum tal-Komunità kif indikat fit-tabella hawn fuq, il-premessi (168) u (173) tar-Regolament provviżorju huma b’dan ikkonfermati.

(85)

It-tabella ta’ hawn taħt turi t-total tal-importazzjonijiet fis-suq tal-Komunità mill-produtturi esportaturi tal-Istati Uniti matul il-perjodu kkunsidrat.

Tabella 2

(86)

Parti interessata waħda saħqet li l-analiżi tad-dannu u l-kawża tal-proċediment ta’ kontra s-sussidji għandha ssir fuq dejta differenti minn dik fil-proċediment parallel ta’ kontra d-dumping. Ġie argument li s-sejbiet dwar is-sussidji huma bbażati fuq bijodiżil i) prodott minnhom stess, ii) prodott u mħallat u iii) mixtri u mħallat esportat lejn il-Komunità filwaqt li s-sejbiet tad-dumping, partikolarment il-bejgħ tal-esportazzjonijiet lejn il-Komunità, huma bbażati biss fuq il-bijodiżil tal-produtturi fil-kampjun prodott minnhom stess.

(87)

Din l-asserzjoni jidher li tissuġġerixxi li l-proċediment kontra d-dumping għandu dejjem ikun ibbażat fuq dejta idjeq meta mqabbel mal-proċediment kontra s-sussidji. Madankollu, fi stadju provviżorju nstab li fil-proċediment parallel kontra d-dumping, l-esportazzjonijiet kollha tal-produzzjoni tal-kumpaniji stess inklużi fil-kampjun ta’ produtturi tal-Istati Uniti saru bi prezzijiet oġġett ta’ dumping fis-suq tal-Komunità. F’din l-investigazzjoni kontra s-sussidji, instabet xi ħaġa simili. Għalhekk, fiż-żewġ investigazzjonijiet, l-esportazzjonijiet kollha mill-Istati Uniti tqiesu li kienu oġġett ta’ dumping u ssusidjati u għalhekk kienu kollha inklużi fl-analiżi tad-dannu u l-kawża.

(88)

Madankollu, ta’ min jinnota li, fi stadju definittiv, kumpanija waħda mill-Istati Uniti fil-kampjun ma nstabitx li kienet qed tagħmel dumping u dan wassal għal differenza bejn il-volum ta’ importazzjonijiet oġġett ta’ dumping u l-volum ta’ importazzjonijiet sussidjati li għandha titqies fl-analiżi tal-ħsara u l-kawża fil-proċedimenti. Fil-proċedimenti ta’ kontra d-dumping, il-volum totali tal-importazzjonijiet oġġett ta’ dumping mill-Istati Uniti ġie aġġustat biex jitqies il-fatt li l-importazzjonijiet ta’ produttur esportatur wieħed fil-kampjun ma nstabx li kienu oġġett ta’ dumping. Madankollu, dan ma jaffettwax il-proċediment kontra s-sussidji.

(89)

Fid-dawl ta’ dawn il-fatti, din l-asserzjoni kellha tiġi miċħuda.

(90)

Parti interessata waħda saħqet li l-intestatura HTS 3824 90 tal-istatistika tal-esportazzjoni tal-Istati Uniti li ntużat fir-Regolament provviżorju biex jiġu stabbiliti l-importazzjonijiet mill-pajjiż ikkonċernat, minbarra l-bijodiżil, tkopri wkoll prodotti oħra bħal “sustanzi xaħmija li joriġinaw mill-annimali jew il-ħxejjex jew taħlit tagħhom”. Għalhekk, l-analiżi tal-volum tal-importazzjoni mill-Istati Uniti ma kinitx tajba. L-istess parti interessata pproponiet li minflok jistgħu jintużaw ix-xejriet stabbiliti għall-produtturi investgati tal-Istati Uniti.

(91)

F’dan ir-rigward, l-ewwel qed jiġi nnutat li l-kodiċi HTS tal-Istati Uniti 3824 90 4000 intuża biex jiġu kkalkulati l-volumi tal-importazzjoni li joriġinaw fl-Istati Uniti u mhux l-intestatura tariffarja ta’ sitt ċifri kif saħqet din il-parti.

(92)

Barra minn hekk, ta’ min ifakkar li kif imsemmi fil-premessa (170) tar-Regolament provviżorju, id-dejta tal-Eurostat ma setgħetx tintuża biex jiġu vvalutati l-importazzjonijiet tal-bijodiżil mill-Istati Uniti billi sa tmiem l-2007 ma kienx hemm kodiċi distint tan-NM disponibbli għall-klassifikazzjoni doganali ta’ dak il-prodott. Il-bijodiżil seta’ tabilħaqq jiġi kklassifikat taħt bosta kodiċijiet tan-NM differenti li wkoll kien fihom id-dejta tal-importazzjoni għal prodotti oħra. Ir-raġuni għaliex l-istatistika tal-esportazzjoni tal-Istati Uniti ntużat kienet li din dehret li ġabret l-esportazzjonijiet tal-prodott ikkonċernat taħt kodiċi tariffarju wieħed, u li l-volum tal-prodotti l-oħra taħt l-istess kodiċi kellhom importanza żgħira sa fejn għandhom x’jaqsmu l-esportazzjonijiet tal-Komunità.

(93)

Fid-dawl tal-limiti fuq l-użu tad-dejta tal-Eurostat, alternattiva oħra flok l-istatistika tal-esportazzjoni tal-Istati Uniti kienet tkun li tintuża d-dejta tal-importazzjoni rrappurtata fl-ilment. Din id-dejta nkisbet minn dawk li għamlu l-ilment minn sorsi kunfidenzjali ta’ intelliġenza tas-suq u għalhekk l-użu ta’ din l-informazzjoni kien ikollha din ir-restrizzjoni. Madankollu, f’ġieħ il-kompletezza, ix-xejriet tal-volumi tal-importazzjonijiet kienu juru l-istampa li ġejja f’għamla indiċizzata:

Tabella 3

(94)

It-tqabbil tat-Tabella 3 hawn fuq mat-Tabella 2 turi li l-evalwazzjoni tal-Kummissjoni tal-volumi tal-importazzjoni tal-prodott ikkonċernat fil-perjodu analizzat kienet iktar konservattiva minn dik li alternattivament kienet tintuża. Barra minn hekk, din l-istampa ġenerali tal-volumi tal-importazzjonijiet tat-Tabella 3 hija miġbura minn dejta kunfidenzjali li ma tistax tiġi żvelata filwaqt li l-istatistika tal-Istati Uniti hija informazzjoni disponibbli għall-pubbliku.

(95)

Il-metodu propost mill-parti interessata kien juri l-istampa li ġejja fir-rigward tax-xejriet tal-volumi tal-esportazzjoni fuq il-bażi tal-informazzjoni miġbura mill-produtturi esportaturi investigati:

Tabella 4

(96)

It-tqabbil tat-Tabella 4 mat-Tabella 2 hawn fuq juri xejriet simili ħafna bejn il-metodu użat mill-Kummissjoni u dak propost minn din il-parti.

(97)

L-istess parti interessata saħqet li minħabba li l-prodott ikkonċernat huwa l-bijodiżil u taħlitiet tal-bijodiżil b’kontenut tal-bijodiżil ‘il fuq minn 20 % tal-volum tal-importazzjonijiet muri fit-Tabella 2 hawn fuq ma jistax jikkorrelata mal-volum korrett tal-importazzjonijiet għall-prodott ikkonċernat.

(98)

F’dan ir-rigward ta’ min jinnota li l-investigazzjoni ma identifikatx importazzjonijiet tal-prodott ikkonċernat b’kontenut tal-bijodiżil ogħla minn B20 u inqas minn B99 matul il-PI. Fi kliem ieħor, l-investigazzjoni ma identifikatx importazzjonijiet tal-prodott ikkonċernat li minħabba l-kontenut baxx ta’ bijodiżil tagħhom jiġu kklassifikati taħt kodiċi HTS tal-Istati Uniti differenti.

(99)

Abbażi ta’ dawn ta’ hawn fuq, huwa konkluż li l-volum tal-importazzjoni ppreżentat fit-Tabella 2 tar-Regolament provviżorju jirrappreżenta stima affidabbli, oġġettiva u konservattiva tal-importazzjonijiet fil-Komunità tal-prodott ikkonċernat.

(100)

Parti interessata waħda saħqet li l-kwantitajiet splash and dash esportati mill-Istati Uniti kellhom ikunu distinti mill-importazzjonijiet tal-prodott ikkonċernat li joriġina mill-Istati Uniti billi dan tal-aħħar ma jistax jiġi ttrattat bħala importazzjonijiet li joriġinaw mill-Istati Uniti.

(101)

Barra minn hekk, l-istess parti u l-GSU saħqu li bil-maqlub għal dak li ntqal fil-premessi (179) u (182) tar-Regolament provviżorju, l-esportazzjonijiet kollha mill-Istati Uniti ma jitqisux li joriġinaw fl-Istati Uniti. Mhemmx awtorità fl-Istati Uniti li tagħmel evalwazzjoni jew determinazzjoni fir-rigwrard tal-pajjiż tal-oriġini ta’ prodott partikolari għall-esportazzjoni u wieħed ma jistax jassumi li l-bijodiżil kollu li telaq mit-territorju tal-Istati Uniti joriġina minn hemm stess.

(102)

L-istess parti stqarret ukoll li r-Regolament dwar l-oriġini stabbilit mill-US Census Bureau dwar id-determinazzjoni tal-oriġini tal-prodotti esportati mhumiex magħrufa ħafna mal-industrija tal-bijodiżil u għalhekk l-esportaturi tal-bijodiżil, huma u jimlew id-dikjarazzjoni tal-esportazzjoni “Shippers Export Declaration” (SED) normalment jindikaw li l-prodotti esportati huma ta’ oriġini domestika.

(103)

Hija tenniet l-asserzjoni tagħha li għamlet fl-istadju provviżorju li l-volumi importati fil-Komunità “splash and dash” jirrappreżentaw iktar minn 40 % tal-prodott ikkonċernat esportat mill-Istati Uniti. B’appoġġ għall-asserzjoni tagħha, użat id-dejta tal-importazzjonijiet u l-esportazzjonijiet tal-Istati Uniti tal-kodiċijiet HTS 3824 90 4020 u 3824 90 4000, u prattikament saħqet li l-importazzjonijiet kollha tal-bijodiżil fl-Istati Uniti kienu riesportazzjonijiet fix-xejra “splash and dash” fil-Komunità.

(104)

Dwar dan, ta’ min jinnota li l-kjarifika mitluba mill-awtoritajiet tal-Istati Uniti dwar il-fatt li ebda awtorità tal-Istati Uniti ma tagħmel evalwazzjoni jew determinazzjoni tal-oriġini ta’ prodott partikolari għall-esportazzjoni tista’ tiġi aċċettata.

(105)

L-asserzjoni li splash and dash jirrappreżenta għallinqas 40 % tal-esportazzjonijiet tal-Istati Uniti lill-Komunità kienet ibbażata fuq l-assunzjoni li l-bijodiżil kollu importat fl-Istati Uniti fl-aħħar mill-aħħar jerġa’ jiġi esportat lill-Komunità bix-xejra splash and dash mingħajr ma jiġi kkunsmat xejn fl-Istati Uniti jew jitħallat iktar fl-Istati Uniti qabel l-esportazzjoni.

(106)

Madankollu, id-dejta ppreżentata minn din il-parti turi li fis-snin 2004 sa 2006, l-importazzjonijiet qabżu sewwa l-esportazzjonijiet u dan jissuġġerixxi li hemm domanda domestika għall-bijodiżil minn pajjiżi oħra. Barra minn hekk, din l-assunzjoni hija pjuttost simplistika billi ma tqisx il-kwantitajiet ta’ bijodiżil mħallta fl-Istati Uniti u esportati lejn il-Komunità fejn i) il-karatteristiċi tat-taħlitiet huma differenti minn dawk tal-materja prima li jagħtu oriġini Amerikana lill-prodott imħallat kollu kemm hu jew ii) taħlitiet fejn il-proporzjoni ta’ bijodiżil li toriġina mill-Istati Uniti tkun dik dominanti u tagħti oriġini Amerikana lill-prodott imħallat kollu kemm hu. Ta’ min ifakkar f’dan ir-rigward li, kif imsemmi fil-premessa (180) tar-Regolament provviżorju, il-kumpaniji tal-Istati Uniti investigati ddikjaraw li ma kienx possibbli li l-kwantitajiet esportati lill-Komunità jew mibjugħa fis-suq domestiku jiġu differenzjati bejn il-kwantitajiet prodotti minnhom stess jew li joriġinaw fl-Istati Uniti jew importati. Ta’ min jinnota wkoll li l-oriġini donna kienet iddikjarata korrettament mill-kumpaniji tal-Istati Uniti kkonċernati billi fil-każijiet kollha, it-taħlit sussegwenti ta’ bijodiżil li ma joriġinax mill-Istati Uniti kien qed iseħħ fl-Istati Uniti. Tabilħaqq, fil-biċċa l-kbira tal-każijiet, il-produtturi esportaturi investigati huma kumpaniji kbar ħafna jew gruppi ta’ kumpaniji b’kumpaniji relatati fil-Komunità u huwa diffiċli għalihom li jaċċettaw li ma kinux konxji mir-regoli eżistenti tal-Istati Uniti u tal-Komunità dwar id-determinazzjoni tal-oriġini.

(107)

Fuq il-bażi ta’ dan kollu, qed jiġi konkluż li ma hemmx ġustifikazzjoni biex l-importazzjonijiet lejn il-Komunità bix-xejra splash and dash għall-perjodu meqjus jiġu identifikati b’mod ċar. Qed jitqies ukoll li ma hemmx ġustifikazzjoni biex dawn l-esportazzjonijiet, jekk hemm, jiġu ttrattati bħala importazzjonijiet b’oriġini mhux Amerikana.

(108)

It-tabella ta’ hawn taħt turi l-prezz unitarju tal-bejgħ tal-importazzjonijiet kollha fis-suq tal-Komunità li joriġinaw mill-Istati Uniti matul il-perjodu meqjus kif aċċertat fil-premessi (183) u (184) tar-Regolament provviżorju.

Tabella 5

(109)

Għall-iskop tal-analiżi tar-roħs fil-prezz, il-prezzijiet medji differenzjati tal-bejgħ tal-produtturi Komunitarji fil-kampjun iċċarġjati lil klijenti mhux relatati fis-suq Komunitarju, aġġustati għal livell ta’ xogħol li joħroġ mill-fabbrika, tqabblu mal-prezzijiet medji differenzjati korrispondenti tal-importazzjonijiet oġġett ta’ dumping mill-Istati Uniti, stabbiliti fuq bażi CIF għall-produtturi esportaturi fil-kampjun fl-Istati Uniti li nstabu li kienu qed jagħmlu d-dumping fis-suq Komunitarju. Ġie applikat aġġustament għad-dazji doganali, l-ispejjeż post-importazzjoni u għad-differenzi fil-materja bażika użata għall-produzzjoni tal-bijodiżil, kif deskritt fil-premessa (186) tar-Regolament provviżorju.

(110)

Ċerti produtturi esportaturi allegaw li l-aġġustament għad-differenzi fil-materja bażika kien baxx wisq billi ma jirriflettix korrettament il-valur tas-suq tad-differenzi. Huma saħqu wkoll li d-differenzi għandhom jinkisbu fuq il-bażi tal-prezzijiet għat-tipi differenti ta’ bijodiżil fis-suq tal-Komunità u kkwantifikaw din l-asserzjoni b’referenza għall-kwotazzjonijiet tal-prezzijiet, li ġew aċċettati mid-dwana ta’ Antwerp, ippubblikati minn analista tas-suq.

(111)

F’dan ir-rigward, ta’ min jinnota li l-aġġustament kien ibbażat fuq id-dejta totali u vverifikata miġbura mill-produtturi esportaturi fil-kampjun għall-operazzjonijiet tagħhom fl-Istati Uniti u, għalhekk, kien ibbażat fuq is-sejbiet tal-investigazzjoni li għalihom hemm sors affidabbli ħafna ta’ informazzjoni. Barra minn hekk, il-kwotazzjonijiet tal-prezz fil-livell tal-Komunità ma kienux jkunu bażi xierqa għal dan l-aġġustament billi dawn il-livelli tal-prezzijiet kienu jkun affettwati mil-livelli tal-prezzijiet tal-importazzjonijiet sussidjati li joriġinaw mill-Istati Uniti. Fuq din il-bażi, l-asserzjoni ma ntlaqgħetx.

(112)

L-istess produtturi esportaturi saħqu li l-aġġustament għad-differenzi fil-materja bażika għandu jiġi applikat biss lill-bejgħ tal-produtturi esportaturi fil-kampjun u mhux lill-bejgħ tal-produtturi Komunitarji fil-kampjun billi l-bejgħ ta’ dan tal-aħħar jikkonsisti f’taħlit kompatibbli mal-istandards Komunitarji.

(113)

Din l-asserzjoni nstabet li kienet irrilevanti billi l-iskop tal-aġġustament kien li jiġu indirizzati d-differenzi tal-materja bażika u mhux kull differenza għar-rispett tal-istandards differenti applikabbli fil-livell Komunitarju. Għalhekk, l-asserzjoni ma ntlaqgħetx.

(114)

L-ilmentatur ikkontesta kemm huwa xieraq dan l-aġġustament billi qal li kemm il-produtturi Komunitarji u l-esportaturi tal-Istati Uniti użaw varjetà ta’ materja bażika u t-tnejn ipproduċew varjetà ta’ taħlitiet li huma pprovduti fuq iż-żewġ swieq u, għalhekk, joperaw bl-istess firxa ta’ possibilitajiet meta jiġu għall-għażla tal-materja prima.

(115)

F’dan ir-rigward, ta’ min jinnota li, filwaqt li huwa minnu li kemm il-produtturi Komunitarji kif ukoll il-produtturi esportaturi tal-Istati Uniti jużaw varjetà ta’ taħlitiet ibbażati fuq materja bażika differenti, it-tqassim tal-materja bażika fit-taħlita jista’ jvarja ħafna minn produttur għall-ieħor u anki minn klijent għall-ieħor tal-istess produttur. Tabilħaqq, l-investigazzjoni wriet li tqabbil preċiż tat-taħlitiet mibjugħa mill-produtturi Komunitarji fil-kampjun u dawn mibjugħa mill-produtturi esportaturi fis-suq Komunitarju kien il-każ fi ftit okkażjonijiet biss. Għalhekk, sabiex il-kalkoli tar-roħs jqisu t-tipi differenti ta’ prodotti, tqies meħtieġ li jkun hemm aġġustament għad-differenzi fil-materja bażika. Għalhekk, din l-asserzjoni kellha tiġi miċħuda.

(116)

Ċerti produtturi esportaturi saħqu li l-prezzijiet użati għall-kalkoli tal-marġini tal-ħsara kienu l-prezzijiet CIF tal-fruntiera Komunitarja u mhux il-prezzijiet tal-bejgħ mill-ġdid lill-ewwel klijent mhux relatat. Dawn saħqu li dawn il-kalkoli kellhom jiġu kkoreġuti sabiex iqisu l-valur u l-kwantitajiet tal-bejgħ lill-ewwel klijent mhux relatat.

(117)

Din l-asserzjoni nstabet li kienet rilevanti għal żewġ produtturi esportaturi u l-kalkoli tal-ħsara ġew ikkoreġuti skont dan.

(118)

Fuq il-bażi ta’ dan ta’ hawn fuq, il-medja tal-marġini tar-roħs tal-prezzijiet fil-PI, espressa bħala perċentwali tal-prezzijiet tax-xogħol li ġej mill-fabbrika medji differenzjati tal-industrija tal-Komunità, nstabet li tvajra minn 18,9 % u 31.9 %, minflok firxa bejn 18,9 % sa 33,0 % fl-istadju provviżorju.

(119)

Kif imsemmi fil-premessi (209) sa (212) tar-Regolament provviżorju, instab li l-industrija Komunitarja ġarrbet ħsara materjali skont it-tifsira tal-Artikolu 8(5) tar-Regolament bażiku.

(120)

L-analiżi provviżorja wriet li r-rendiment tal-industrija Komunitarja tjieb fir-rigward ta’ xi indikaturi tal-volum, iżda li l-biċċa l-kbira tal-indikaturi relatati mas-sitwazzjoni finanzjarja tal-industrija Komunitarja ddeterjoraw b’mod sinifikanti matul il-perjodu kkunsidrat. Minkejja l-abilità tal-industrija Komunitarja li tiġbor il-kapital għal investimenti, il-qligħ fuq l-investimenti naqas drammatikament fil-PI u l-profittabilità naqset b’mod sinifikanti matul il-perjodu kkunsidrat.

(121)

Parti interessata waħda saħqet li l-analiżi fil-premessa (195) tar-Regolament provviżorju dwar it-tkabbir tal-industrija Komunitarja ma kinitx korretta. Partikolarment, din il-parti argumentat li r-Regolament provviżorju ssuġġerixxa li ż-żieda qawwija fid-domanda għall-bijodiżil fis-suq tal-Komunità għandu jwassal għal żieda komparabbli fis-sehem tas-suq tal-industrija Komunitarja, filwaqt li ma hemmx korrelazzjoni diretta bejn iż-żieda fid-domanda u s-sehem tas-suq.

(122)

L-istess parti kompliet targumenta li l-fatturi tal-ħsara msemmija fl-istess premessa (195) tar-Regolament provviżorju, jiġifieri l-produzzjoni, l-użużu tal-kapaċità tal-produzzjoni, il-produttività, il-bejgħ, il-politika dwar l-investiment, il-qligħ mill-investiment, ma jistgħux jitqiesu li huma milquta b’mod ħażin.

(123)

L-argument dwar il-dekorrelazzjoni bejn id-domanda u s-sehem mis-suq huwa aċċettat. Madankollu, jibqa’ li bejn l-2006 u l-PI, is-sehem tas-suq tal-produtturi Komunitarji fil-kampjun ġie mmultiplikat b’1,2 filwaqt li fl-istess ħin, is-sehem mis-suq tal-importazzjonijiet sussidjati ġie mmultiplikat b’madwar 17. Din iż-żieda komparattivament kbira fis-sehem mis-suq għall-importazzjonijiet tal-Istati Uniti hija r-riżultat ta’ prezzijiet ħafna irħas għal dawn l-importazzjonijiet tal-Istati Uniti kif jidher fit-Tabella 5 u l-premessa (118) hawn fuq.

(124)

Rigward l-asserzjoni dwar l-evalwazzjoni globali tal-fatturi kollha tal-ħsara, huwa rikonoxxut li mhux dawn il-fatturi kollha marru lura matul il-perjodu meqjus. Madankollu, jingħad li fatturi marbuta mas-sitwazzjoni finanzjarja tal-industrija Komunitarja ntlaqtu ħażin tassew, jiġifieri ntlaqtu l-profittabilità u l-qligħ fuq l-investiment u sa ċertu punt, il-produttività. Dan jirriżulta mill-fatt li l-industrija Komunitarja kellha tadatta għall-kompetizzjoni tal-prezzijiet tal-importazzjonijiet sussidjati tal-Istati Uniti u għażlet li żżomm il-preżenza fis-suq għad-detriment tal-profittabilità minflok ma żammet il-profittabilità iżda tilfet is-sehem mis-suq.

(125)

Ċerti partijiet interessati u l-GSU saħqu li l-livelli tal-profittabilità u l-qligħ fuq l-investiment għall-produtturi tal-UE fil-kampjun għadhom tajbin fl-2007 u matul il-PI, f’valur assolut, minkejja t-tnaqqis qawwi meta mqabbel mas-snin preċedenti. Huma jargumentaw li l-livelli ta’ profittabilità u l-qligħ fuq l-investiment inkisbu mill-2004-2006 ma kinux sostenibbli u li l-industrija tal-bijodiżil tal-UE, bħal kull industrija li għadha tibda, esperjenzat fenomenu “boom and bust” normali matul il-perjodu meqjus.

(126)

F’dan ir-rigward, ta’ min ifakkar li xi kumpaniji tal-Istati Uniti fil-kampjun kisbu profitabilità ħafna ogħla, iktar minn 30 %, fil-kuntest simili ta’ suq li qed jiżviluppa matul il-perjodu meqjus. Intqal ukoll li t-tnaqqis fil-profittabilità u l-qligħ mill-investiment esperjenzat mill-industrija Komunitarja kien brutali ħafna billi seħħ mill-2006 sal-2007 u jaħbat eżatt maż-żieda fl-importazzjonijiet tal-Istati Uniti tal-bijodiżil.

(127)

Bosta produtturi Komunitarji saħqu li s-sitwazzjoni ta’ kumpaniji Komunitarji mhux fil-kampjun għandha titqies bis-sħiħ fl-evalwazzjoni tal-ħsara, partikolarment fid-dawl tal-bosta każijiet ta’ tnaqqis, għeluq jew posponiment ta’ proġetti ġodda li ġew identifikati fost dawn il-kumpaniji matul il-perjodu meqjus.

(128)

Min-naħa l-oħra, parti interessata waħda saħqet li r-referenza li saret fir-Regolament provviżorju lill-produtturi fil-Komunità mhux inklużi fil-kampjun hija irrilevanti, billi d-dejta mhux verifikata mill-produtturi barra mill-kampjun ma tistax tintuża biex turi l-ħsara. Din il-parti insistiet ukoll fuq d-dejta pubblika li turi li xi wħud minn dawn il-produtturi barra mill-kampjun kienu profittabbli.

(129)

Fir-rigward taż-żewġ asserzjonijiet hawn fuq, ta’ min ifakkar li r-Regolament provviżorju fil-premessi (205) sa (208) jirreferi għas-sitwazzjoni tal-produtturi barra mill-kampjun fil-Komunità bħala indikazzjoni supplimentari ta’ ħsara, mingħajr impatti fuq il-kalkoli tal-indikaturi tal-ħsara u l-marġini tal-ħsara li għalihom intużat informazzjoni ivverifikata. Għalhekk, l-asserzjoni ma ntlaqgħetx. Min-naħa l-oħra, fin-nuqqas ta’ statistika vverifikata jew informazzjoni individwali disponibbli dwar is-sitwazzjoni tal-produtturi tal-UE kollha barra mill-kampjun, mhuwiex possibbli li ssir determinazzjoni preċiża għall-produtturi Komunitarji kollha kif issuġġerit mill-produtturi Komunitarji. Għalhekk din l-asserzjoni ma nlaqgħetx lanqas.

(130)

Fin-nuqqas ta’ kummenti oħra fir-rigward tas-sejbiet provviżorji dwar is-sitwazzjoni ekonomika tal-industrija Komunitarja, il-premessi (188) sa (194) u (196) sa (208) tar-Regolament provviżorju huma b’dan ikkonfermati.

(131)

Il-konklużjoni li l-industrija Komunitarja ġarrbet danni materjali, kif spjegat fil-premessi (209) sa (212) tar-Regolament provviżorju, hija kkonfermata wkoll.

(132)

Ta’ min ifakkar li l-volumi tal-importazzjonijiet sussidjati mill-Istati Uniti żdiedu sewwa fil-perjodu analizzat. Kien hemm ukoll koinċidenza ċara fiż-żmien bejn iż-żieda tal-importazzjonijiet sussidjati u d-deterjorament tas-sitwazzjoni ekonomika tal-industrija tal-Komunità. Dik l-industrija ma kinitx kapaċi tiffissa l-prezzijiet tagħha f’konformità mal-kundizzjonijiet tas-suq u ż-żidiet tal-ispejjeż, billi l-prezzijiet tagħha kienu ogħla fil-PI minn dawk tal-importazzjonijiet sussidjati.

(133)

Huwa għalhekk ikkonfermat li ż-żieda ta’ importazzjonijiet sussidjati mill-Istati Uniti kellha impatt negattiv kbir fuq is-sitwazzjoni ekonomika tal-industrija Komunitarja matul il-PI.

(134)

Fin-nuqqas ta’ kummenti li jiġġustifikaw bdil fis-sejbiet provviżorji qed jiġi kkonfermat li l-importazzjonijiet minn pajjiżi terzi oħra ma setgħu kienu xejn aktar għajr kontribut negliġibbli għad-dannu mġarrab mill-industrija Komunitarja.

(135)

Parti interessata waħda saħqet li t-tnaqqis fid-domanda bejn l-2007 u l-PI avolja kien negliġibbli (0,5 %) xorta waħda kien jikkawża ħsara lill-industrija Komunitarja billi allega li żieda ipotetika ta’ 10 % fid-domanda kienet twassal għal volum addizzjonali ta’ bejgħ ta’ 205 733 tunnellati jekk l-industrija Komunitarja tkun żammet l-istess sehem mis-suq ta’ 29,8 % li kellha fil-PI.

(136)

F’dan ir-rigward, ta’ min jinnota li l-asserzjonijiet li għamlet din il-parti kienu bbażati fuq assunzjonijiet wiesa’ u mhux sostanzjati. Barra minn hekk, minħabba li bejn l-2007 u l-PI, is-sehem mis-suq tal-industrija Komunitarja żdied b’2,8 % punti perċentwali, dan tabilħaqq jappoġġa l-konklużjoni fil-premessa (223) tar-Regolament provviżorju li l-ħsara li ġarrbet l-industrija Komunitarja ma tistax tiġi attribwita għal dan it-tnaqqis żgħir fid-domanda bejn l-2007 u l-PI. Għalhekk, fin-nuqqas ta’ kummenti oħra rigward l-iżvilupp tad-domanda fis-suq tal-Komunità, il-premessa (223) tar-Regolament provviżorju hija b’dan ikkonfermata.

(137)

Parti waħda interessata tenniet l-asserzjoni tagħha li l-introduzzjoni mill-ġdid ta’ taxxi fuq l-enerġija fil-Ġermanja, għandha mnejn influwenzat b’mod negattiv il-qagħda ekonomika tal-produtturi Komunitarji li jfornu is-suq billi minħabba dawn il-miżuri d-domanda għall-bijodiżil B100 li jirrappreżenta għallinqas 1,5 miljun tunnellati kien jikkollassa. Saħqet ukoll, bi tweġiba għas-sejbiet tal-investigazzjoni stipulati fil-premessa (225) tar-Regolament provviżorju, li anki jekk l-introduzzjoni ta’ rekwiżit ta’ taħlit ta’ 4,4 % għad-diżil imqiegħed fis-suq Ġermaniżi għal skopijiet ta’ trasport (B5) kien jikkompensa għat-telf allegat fil-bejgħ ta’ B100, il-livelli tal-prezzijiet ta’ B100 kienu differenti minn dawk tal-bijodiżil maħsub għat-taħlitiet B5. Hija allegat li B100 kien prodott biss mill-materja bażika taż-żerriegħa tal-kolza l-iktar għoli, filwaqt li l-bijodiżil B5 minn varjetà ta’ materja bażika, u għalhekk kellu influwenza negattiva fuq il-prezz medju tal-produtturi Komunitarji.

(138)

F’dan ir-rigward ta’ min ifakkar li, bil-maqlub għall-allegazzjonijiet li għamlet din il-parti, l-investigazzjoni wriet li l-volumi tal-bejgħ tal-produtturi Komunitarji fil-kampjun li jfornu s-suq Ġermaniż żdiedu b’68 % bejn l-2006 u l-PI, li tabilħaqq jikkonferma s-sejba provviżorja li kull telf fuq il-bejgħ tal-B100 ġew ikkumpensati mir-rekwiżit mandatorju tat-taħlit. Innutat ukoll li l-introduzzjoni tal-EUR 0,09 kull litru ta’ bijodiżil mill-1 ta’ Awwissu 2006 ma wassalx għall-kollass tas-suq kif allegat din il-parti, iżda tabilħaqq, il-bejgħ ta’ B100 naqsu sewwa fl-aħħar kwart tal-PI meta din it-taxxa kompliet tiżdied għal Euro 0,15 kull litru mill-1 ta’ Jannar 2008. Fir-rigward tal-effett fuq il-prezzijiet, l-allegazzjonijiet li għamlet din il-parti ma kinux ġustifikati billi l-bijodiżil użat għaż-żewġ tipi ta’ prodotti kellu jikkonforma mal-istess standards li jfisser li kemm fiż-żewġ fjuwils tal-bijodiżil, setgħet tintuża l-istess taħlita ta’ materja prima li jfisser li ma kienx hemm differenzjazzjoni ppruvata fil-prezz bejn iż-żewġ tipi ta’ bijodiżil. Fuq il-bażi ta’ dan t’hawn fuq, l-asserzjoni ma ntlaqgħetx.

(139)

Fin-nuqqas ta’ kummenti oħra dwar id-deċiżjonijiet tal-politika pubblika, il-premessa (226) tar-Regolament provviżorju hija hawnhekk konfermata.

(140)

Parti interessati waħda, filwaqt li aċċettat li r-rati tal-użu tal-kapaċità baqgħu pjuttost għoljin għall-produtturi Komunitarji fil-kampjun, saħqet li l-kapaċità żejda tal-produtturi Komunitarji fil-kampjun xorta tkun kawża ta’ ħsara minħabba li tirriżulta fi spejjeż fissi ogħla li jkollhom effett negattiv fuq il-profittabilità. Hija saħqet ukoll li ż-żieda fil-valur nett tal-assi tal-produtturi msemmija kienet tirriżulta f’żidiet fl-ispejjeż fissi billi d-deprezzament u l-ispejjeż finanzjarji kienu jkun ogħla.

(141)

F’dan ir-rigward, ta’ min ifakkar li mill-analiżi dettaljata tat-tqassim tal-ispejjeż varjabbli u fissi fl-istruttura tal-ispejjeż tal-industrija Komunitarja, ġie stabbilit li s-sehem tal-ispejjeż fissi jirrappreżenta biss 6 % tal-ispejjeż globali (il-premessa 228 tar-Regolament provviżorju). Barra minn hekk, ta’ min jinnota li din l-analiżi wriet flussi mhux sinifikanti f’dan il-perċentwali fil-perjodu analizzat. Fir-rigward tal-asserzjoni dwar l-effett fuq il-profittabilità kkawżat miż-żieda tal-valur nett tal-assi, ta’ min jinnota li ż-żieda fl-ispejjeż f’termini assoluti, ma twassalx awtomatikament għal żieda fl-ispejjeż tal-produzzjoni unitarja billi din tiddependi fuq il-volum tal-produzzjoni li, kif muri fit-Tabella 4 tar-Regolament provviżorju, żdiedet kostantament fil-perjodu analizzat. Għalhekk, spejjeż fissi ogħla f’termini assoluti ġew attribwiti lil volum ogħla ta’ produzzjoni li rriżulta fit-tqassim imsemmi fuq tal-ispejjeż fissi f’rabta mal-ispejjeż globali. Abbażi ta’ dan, l-asserzjoni ta’ din il-parti interessata ma setgħetx tintlaqa’.

(142)

L-istess parti allegat li l-kapaċità żejda totali tal-produtturi Komunitarji għandha impatt dirett fuq il-prezzijiet billi jkun hemm ġlieda ħarxa bejn il-produtturi biex jirbħu l-kuntratti sal-ispejjeż marġinali u għalhekk, il-produtturi b’rati għoljin ta’ użu kellhom ikunu l-aktar aggressivi fil-bejgħ tagħhom biex ibiegħu taħt il-prezz tal-kompetituri tagħhom. B’appoġġ għal din l-asserzjoni, bagħtet stqarrija ta’ kumpanija waħda fil-kampjun lid-dikjarazzjonijiet finanzjarji tagħha tas-sena 2007.

(143)

L-allegazzjonijiet, madankollu, ta’ din il-parti ma kinux appoġġati b’evidenza billi ma saret ebda referenza lill-ġlieda allegata tal-prezzijiet minħabba l-kapaċità żejda f’din id-dikjarazzjoni. Din l-istqarrija minflok irreferiet għaż-żieda mill-gvern Ġermaniż tat-taxxa tal-enerġija fuq il-bijodiżil B100 mill-1 ta’ Jannar 2008 li stimulat il-kompetizzjoni mis-suq tal-bijodiżil B5. Fuq il-bażi ta’ dan t’hawn fuq, it-talba kellha tiġi rrifjutata.

(144)

Fin-nuqqas ta’ kummenti oħra rigward kapaċità mhux użata tal-produtturi tal-Komunità, il-premessi (227) sa (230) tar-Regolament provviżorju huma kkonfermati.

(145)

Parti interessata waħda u l-gvern tal-Istati Uniti saħqu li ebda wieħed mill-argumenti fil-premessi (231) sa (235) tar-Regolament provviżorju ma jindirizza l-kwistjoni li l-prezzijiet taż-żejt tas-sojja, iż-żejt tal-palm u l-kanola fl-Istati Uniti mill-2004 dejjem baqgħu orħos mill-prezzijiet għaż-żerriegħa tal-kolza fil-Komunità li jagħti vantaġġ kompetittiv kbir lill-bijodiżil impurtat mill-Istati Uniti.

(146)

Wieħed irid jiftakar li l-investigazzjoni trid tistabbilixxi jekk l-importazzjonijiet sussidjati (fir-rigward tal-prezzijiet u l-volum) ikkawżawx ħsara materjali lill-industrija Komunitarja jew jekk dik il-ħsara materjali kinetx dovuta għal fatturi oħra. F’dan ir-rigward, l-Artikolu 8(6) tar-Regolament bażiku jiddikjara li jeħtieġ li jintwera li l-livell tal-prezzijiet tal-importazzjonijiet sussidjati jikkawża dannu. Għalhekk sempliċement jirreferi għal differenza bejn il-livelli tal-prezzijiet, u b’hekk mhemm l-ebda rekwiżit li jiġu analizzati l-fatturi li jaffettwaw il-livell ta’ dawk il-prezzijiet.

(147)

Fil-prattika, l-effett ta-importazzjonijiet sussidjati fuq il-prezzijiet tal-industrija Komunitarja essenzjalment ġie eżaminat billi ġie stabbilit it-traħħis tal-prezzijiet taħt il-prezz normali, id-depressjoni tal-prezzijiet u s-sopressjoni tal-prezzijiet. Għal dan l-għan, jitqabblu l-prezzijiet tal-esportazzjoni sussidjati u l-prezzijiet tal-bejgħ tal-industrija Komunitarja, u l-prezzijiet tal-esportazzjoni li ntużaw għall-kalkoli tad-dannu f’ċerti każi jista’ jkun hemm il-ħtieġa li jiġu aġġustati sabiex ikun hemm bażi komparabbli. Konsegwentement, l-użu ta’ aġġustamenti f’dan il-kuntest jiżgura biss li d-differenza fil-prezzijiet tiġi stabbilita fuq bażi paragunabbli. Minn dan, joħroġ ċar li l-prezzijiet tal-materja prima fil-pajjiż esportatur ma jistgħux fil-prinċipji jkunu fattur ieħor tal-ħsara.

(148)

Dak li ngħad hawn fuq ġie kkonfermat ukoll mill-kliem tal-Artikolu 8(7) tar-Regolament bażiku, li jirreferi għal fatturi magħrufa għajr l-importazzjonijiet sussidjati. Il-lista tal-fatturi l-oħra magħrufa f’dan l-Artikolu ma tagħmel referenza għall-ebda fattur li jaffettwa l-livell tal-prezzijiet tal-importazzjonijiet sussidjati. Fi ftit kliem, jekk l-importazzjonijiet sussidjati, u anki jekk ibbenefikaw minn żvilupp favorevoli fil-prezzijiet tal-materja prima, ma jitqiesx li dan l-iżvilupp jista’ jkun fattur ieħor li jikkawża dannu.

(149)

B’hekk, l-analiżi tal-fatturi li jaffettwaw il-livell tal-prezzijiet tal-importazzjonijiet sussidjati, bħall-vantaġġ kompetittiv allegat minħabba l-prezzijiet orħos tal-materja prima, ma tistax tkun konklużiva u tali analiżi tmur lilhinn mir-rekwiżiti tar-Regolament bażiku.

(150)

Madankollu, u mingħajr ħsara għal li ntqal hawn fuq, ta’ min ifakkar li ż-żieda ġenerali fil-prezzijiet tal-prodotti agrikoli madwar id-dinja seħħet fil-PI u li ż-żieda fil-prezz taż-żejt tas-sojja (is-sustanza ewlenija użata mill-produtturi fil-pajjiż ikkonċernat) kienet ikbar miż-żieda taż-żejt tal-kolza fl-istess perjodu. Madankollu, dawn iż-żidiet fl-ispejjeż fl-Istati Uniti ma ġewx riflessi fil-prezzijiet tal-importazzjonijiet sussidjati fis-suq Komunitarju b’riżultat li l-prezzijiet tagħhom kienu ħafna orħos minn tal-industrija Komunitarja.

(151)

Fuq il-bażi ta’ dan t’hawn fuq, l-asserzjoni ma ntlaqgħetx.

(152)

Fin-nuqqas ta’ kummenti oħra rigward iż-żieda fid-domanda għall-materja bażika u ż-żieda fil-prezzijiet, il-premessi (231) sa (238) tar-Regolament provviżorju huma kkonfermati.

(153)

Parti interessata waħda tenniet l-asserzjoni tagħha (ara l-premessa 236 tar-Regolament provviżorju) u kompliet targumenta li l-prezzijiet tad-diżil minerali jagħmel limitu sa liema l-produtturi tal-bijodiżil ma jkunux jistgħu jżidu l-prezzijiet tagħhom f’konformità maż-żidiet fil-materja bażika

(154)

F’dan ir-rigward, ta’ min jinnota li l-produtturi Komunitarji kollha kienu qed ifornu swieq fejn jeżistu limiti mandatorji ta’ taħlit. Barra minn hekk, il-bijodiżil kien soġġett għat-tnexxija tat-taxxi f’ħafna mill-Istati Membri li jfisser li l-prezz tiegħu huwa komparabbli mal-prezz tad-diżil minerali b’żieda ta’ fattur biex titqies it-taxxa fuq l-enerġija li dan tal-aħħar huwa soġġett għaliha. Dan ifisser li filwaqt li wieħed jista’ jaċċetta ċerta korrelazzjoni bejn il-prezzijiet taż-żejt, l-investigazzjoni stabbiliet li għar-raġunijiet imsemmija fuq, il-bijodiżil jista’ tabilħaqq jinbiegħ bi prezzijiet ogħla mid-diżil minerali. Barra minn hekk, din il-parti ma bagħtitx evidenza konvinċenti li wriet li l-prezzijiet tad-diżil minerali li kienu f’livelli għolja ħafna fit-tieni nofs tal-PI tefgħu pressjoni fuq il-prezzijiet tal-bijodiżil tal-produtturi Komunitarji fil-PI.

(155)

Fin-nuqqas ta’ kummenti oħra dwar l-iżvilupp tal-prezz tad-diżil minerali, qed jiġi konkluż li dan il-fattur ma kkawżax ħsara lill-industrija Komunitarja.

(156)

Fin-nuqqas ta’ kummenti oħra rigward fejn jinsabu l-impjanti tal-bijodiżil fil-Komunità, il-premessi (239) sa (241) tar-Regolament provviżorju huma b’dan ikkonfermati.

(157)

Fin-nuqqas ta’ kummenti oħra rigward l-impatt tal-importazzjonijiet mill-Istati Uniti mill-produtturi marbuta mal-esportaturi tal-Istati Uniti, il-premessa (242) tar-Regolament provviżorju hija kkonfermata.

(158)

Fid-dawl ta’ dan ta’ hawn fuq u fin-nuqqas ta’ kummenti oħra, il-premessi (243) sa (245) tar-Regolament provviżorju huma b’dan ikkonfermati.

(159)

Wara l-iżvelar provviżorju, il-produtturi tal-industrija Komunitarja approvaw is-sejbiet tal-Kummissjoni u kkonfermaw li l-miżuri jkunu fl-interess tagħhom.

(160)

Parti interessata waħda saħqet li l-miżuri ma jkunux fl-interess tal-industrija tal-Komunità billi l-miżuri se jirriżultaw f’bidla fil-flussi kummerċjali, jiġifieri qalba lejn importazzjonijiet minn pajjiżi mhux koperti mill-miżuri, billi i) l-operaturi tas-suq Komunitarju se jkomplu jeħtieġu bijodiżil orħos abbażi taż-żejt tas-sojja u tal-palm sabiex jikkomplementawha bil-bijodiżil iktar għoli taż-żerriegħa tal-kolza li hija prodotta mill-industrija Komunitarja u ii) billi l-bijodiżil taż-żejt tal-kolza mhux se jkun biżżejjed biex ikopri d-domanda.

(161)

F’dan ir-rigward, ta’ min jinnota li filwaqt li l-materja bażika ewlenija użata mill-produtturi tal-industrija Komunitarja hija ż-żerriegħa tal-kolza, l-istess produtturi ma jserrħux biss fuq din il-materja bażika għall-produzzjoni tal-bijodiżil iżda wkoll fuq materja bażika oħra bħaż-żejt tas-sojja u tal-palm. Madankollu, minħabba li ħafna drabi l-prezz ta’ materja bażika oħra jkun ogħla mill-prezz tal-importazzjonijiet sussidjati tal-bijodiżil abbażi ta’ din il-materja bażika, il-produtturi tal-industrija Komunitarji tneħħitilhom il-possibilità li jużaw iż-żejt tas-sojja u tal-palm fuq skala ikbar. Għalhekk, huwa mistenni li l-impożizzjoni tal-miżuri tirrestawra l-kundizzjonijiet normali tas-suq f’dan ir-rigward u l-produtturi tal-industrija Komunitarja jkunu jistgħu jadattaw b’mod iktar effiċjenti l-produzzjoni tagħhom għat-tipi differenti ta’ bijodiżil meħtieġ fis-suq Komunitarju. Fuq din il-bażi, l-asserzjoni ma ntlaqgħetx.

(162)

Fin-nuqqas ta’ kummenti oħra rigward l-interess tal-industrija tal-Komunità, il-premessi (247) sa (249) tar-Regolament provviżorju huma b’dan ikkonfermati.

(163)

Fin-nuqqas ta’ reazzjoni mill-importaturi wara l-impożizzjoni tal-miżuri provviżorji, qed jiġi konklużi li l-effett tal-miżuri aktarx ma jkollux impatt materjali fuq l-importaturi/ il-kummerċjanti.

(164)

Fin-nuqqas ta’ reazzjoni mill-utenti wara l-impożizzjoni tal-miżuri provviżorji, qed jiġi konklużi li d-dazji kumpensatorji aktarx ma jkollhomx impatt materjali fuq l-utenti.

(165)

Fin-nuqqas ta’ reazzjoni mill-fornituri wara l-impożizzjoni tal-miżuri provviżorji, il-premessi (256) sa (258) tar-Regolament provviżorju huma ikkonfermati.

(166)

Wara l-iżvelar provviżorju, parti interessata waħda stqarret li l-manifatturi tal-karozzi li investew fil-produzzjoni ta’ vetturi aġġustati għall-użu tal-bijodiżil jistgħu ma jkunux jistgħu japprofittaw mill-investimenti tagħhom billi jbiegħu dawn il-vetturi jekk il-prezzijiet tal-bijodiżil fil-Komunità jogħlew minħabba l-miżuri għal livelli li ma jkunux kompetittivi ma’ dawk tad-diżil minerali.

(167)

F’dan ir-rigward, ta’ min jinnota li l-possibilità allegata minn din il-parti setgħet isseħħ anki mingħajr il-miżuri, jiġifieri l-prezzijiet tad-diżil minerali (li jiddependu fuq il-prezzijiet taż-żejt mhux raffinat) jistgħu jonqsu għal livelli li jagħmluhom ħafna iktar kompetittivi mill-bijodiżil. Għalhekk, jidher mhux raġonevoli li wieħed jissuġġerixxi li l-industrija tal-karozzi għamlet investimenti mingħajr ma qieset dan il-parametru. Għalhekk, din il-klejm ġiet irrifjutata.

(168)

Wara l-iżvelar provviżorju, assoċjazzjoni waħda tal-bdiewa tal-UE esprimiet l-appoġġ tagħha u indikat li l-importazzjonijiet tal-bijodiżil tal-Istati Uniti telfu lill-produtturi tal-UE taż-żerriegħa taż-żejt minn madwar 6 miljun tunnellata ta’ żerriegħa taż-żejt jew madwar 11 % tal-produzzjoni tal-UE fl-2007 u l-2008 taż-żerriegħa taż-żejt, u waslu għal tnaqqis ta’ 90 EUR għal kull tunnellata fil-valur potenzjali taż-żerriegħa tal-kolza użata għal skopijiet mhux gastronomiċi. Dawn l-aħħar kummenti, madankollu, ma setgħu jiġu vverifikati.

(169)

Parti interessata waħda tenniet il-kummenti tagħha dwar l-inkoerenza tal-miżuri kumpensatorji mal-politika tal-Unjoni Ewropea għall-promozzjoni tal-użu tal-bijofjuwils. Hija żiedet li l-Unjoni Ewropea ma tistax biss tiddependi fuq il-bijodiżil ibbażat fuq iż-żerriegħa tal-kolza prodott fil-Komunità biex tiżviluppa s-suq tal-bijodiżil tagħha.

(170)

Filwaqt li dan il-kumment ġie indirizzat fit-taqsima 7.6 tar-Regolament provviżorju, għall-kwistjoni tal-bijodiżil taż-żerriegħa tal-kolza imqajma minn din il-parti, issir referenza wkoll għall-premessa (161) hawn fuq.

(171)

Fin-nuqqas ta’ kummenti rigward effetti ta’ distorsjoni tal-kompetizzjoni u l-kummerċ, il-premessi (259) sa (261) tar-Regolament provviżorju huma kkonfermati.

(172)

Meta jitqies dak li ngħad aktar ‘il fuq, qed jiġi konkluż li f’dan il-każ m’hemm l-ebda raġuni konvinċenti kontra l-impożizzjoni ta’ dazji kumpensatorji.

(173)

Kumpanija waħda saħqet li, fir-rigward tal-iffissar tal-marġini tad-dannu tagħha fil-livell tal-ogħla marġini tad-dannu misjub għall-kumpaniji fil-kampjun (ara l-premessi (268) sa (270) tar-Regolament provviżorju), hija offriet li tipprovdi l-informazzjoni meħtieġa biex jiġi kkalkulat il-marġini tagħha stess. Barra minn hekk, il-kumpanija kienet lesta tippermetti żjara fuq il-post tas-sussidjarja tal-kumpanija. IL-kumpanija bagħtet tgħid li din l-istedina għadha miftuħa.

(174)

Wara li rċeviet it-tweġiba ta’ din il-kumpanija għar-rispons fuq il-kwestjonarju wara l-bidu tal-proċediment, ġie nnutat li kien hemm ċerti nuqqasijiet fl-informazzjoni fir-rigward tal-bejgħ tal-esportazzjoni lill-Komunità u l-bejgħ mill-ġdid tal-importatur relatat tagħha fil-Komunità. Il-kumpanija ntalbet tipprovdi l-informazzjoni kkonċernata fi skadenza speċifikata iżda l-kumpanija ma weġbitx għat-talba. Il-kumpanija mbagħad ġiet mgħarrfa li, skont kif imniżżel fil-premessa (268) tar-Regolament provviżorju, jekk it-tagħrif mitlub ma jingħatax, skont l-Artikolu 28 tar-Regolament bażiku, it-tagħrif nieqes ipprovdut fir-rispons tal-kwestjonarju tagħha jista’ ma jitqiesx. Il-kumpanija għarrfet dwar il-konsegwenzi tal-kooperazzjoni parzjali tagħha u ngħatat l-opportunità li tikkummenta. Il-kumpanija wieġbet kważi ġimagħtejn wara l-iskadenza preskritta billi qalet, fost oħrajn, li l-kumpanija “se tibgħat urġentement l-informazzjoni mitluba”. Madankollu, l-informazzjoni mitluba qatt ma ngħatat mill-kumpanija.

(175)

Fid-dawl ta’ hawn fuq, huwa kkonfermat li l-livell ta’ eliminazzjoni ta’ dannu għal din il-kumpanija jiġi stipulat fil-livell tal-ogħla marġini ta’ dannu li nstab għall-kumpaniji fil-kampjun.

(176)

Għadd ta’ partijiet interessati u l-GSU kkuntestaw id-determinazzjoni provviżorja li marġini ta’ profitt ta’ 15 % ikun il-marġini ta’ profitt li jista’ jinkiseb b’mod raġonevoli minn industrija ta’ dan it-tip f’kundizzjonijiet normali ta’ kompetizzjoni.

(177)

Parti interessata waħda qalet li l-marġini ta’ profitt għall-industrija tal-Komunità użat għad-determinazzjoni tal-livell ta’ eliminazzjoni ta’ ħsara għandu jkun stabbilit fil-livell ta’ profitt imwettaq mill-industrija tal-Komunità matul il-PI, jiġifieri, 5,7 % billi dan il-marġini ta’ profitt ikun fil-firxa ta’ profitti miksuba għall-prodotti bħall-bijodiżil. B’appoġġ għal din il-klejm, qed issir referenza għall-profitti miksuba mill-produtturi tal-Istati Uniti għall-etanol, żjut veġetali u raffinerji petrolifiċi.

(178)

Ta’ min jinnota li l-livell tal-eliminazzjoni tad-dannu għandha tkun ibbażata fuq valutazzjoni tal-profitt li l-industrija tista’ tistenna li tikseb b’mod raġonevoli fin-nuqqas ta’ importazzjonijiet sussidjati, fuq il-bejgħ tal-prodott simili fuq is-suq tal-Komunità. F’investigazzjoni partikolari, il-profitt miksub fil-bidu tal-perjodu kkunsidrat jista’ jiġi raġonevolment ikkunsidrat bħala l-profitt miksub fin-nuqqas ta’ importazzjonijiet sussidjati. Tabilħaqq, f’dan il-każ speċifiku, fis-snin bikrija tal-perjodu kkunsidrat (2004-2006) l-importazzjonijiet mill-Istati Uniti qatt ma kellhom sehem mis-suq ikbar minn 1 % u għalhekk jista’ jiġi raġonevolment konkluż li dawn il-perjodi kienu kkaratterizzati min-nuqqas ta’ importazzjonijiet sussidjati. Għalhekk, il-profitt medju miksub f’dawn il-perjodi mill-industrija Komunitarja tqiesu bħala bażi raġonevoli għad-determinazzjoni tal-livell tal-eliminazzjoni tal-ħsara filwaqt li tqies ukoll il-bżonn li jiġi ggarantit l-investiment fil-produzzjoni ta’ din l-industrija ġdida. Barra minn hekk, u b’rabta mal-klejm li għamlet il-parti interessata, l-investigazzjoni wriet li l-profitti miksuba mill-ikbar produtturi esportaturi tal-Istati Uniti għall-operazzjonijiet domestiċi tagħhom tal-bijodiżil kienu ’l fuq sewwa mill-profitt użat għad-determinazzjoni tal-livell tal-eliminazzjoni tal-ħsara. Fuq il-bażi ta’ dan t’hawn fuq, it-talba kellha tiġi rrifjutata.

(179)

Ċerti klejms minn kumpaniji tal-Istati Uniti dwar il-konverżjoni tad-dazji ad valorem f’dazji ta’ ammonti fissi, deskritti fil-premessa (185) hawn taħt, żvelaw li l-ammont ad valorem tar-roħs fil-prezz ġie kkalkulat bħala l-proporzjon bejn it-total tar-roħs u l-prezz CIF aġġustat (ara l-aġġustament imsemmi fil-premessa (109)), filwaqt li l-prezz CIF mhux aġġustat kellu jintuża kif sar biex jiġi kkalkulat il-marġini tad-dumping ad valorem. Għalhekk, il-livelli kollha ad valorem tal-eliminazzjoni tal-ħsara ġew ikkalkulati mill-ġdid għall-kumpaniji tal-Istati Uniti.

(180)

Fin-nuqqas ta’ kummenti oħra wara l-iżvelar provviżorju, l-istess metodoloġija msemmija fil-premessi (266) u (267) tar-Regolament provviżorju ntużat biex ikunu kkalkolati l-prezzijiet li ma jikkawżawx ħsara. Il-livell tal-eliminazzjoni tal-ħsara ġiet ikkalkulata bħala perċentwali tal-valur totali CIF tal-importazzjoni mhux aġġustat.

(181)

Fid-dawl ta’ dan ta’ hawn fuq u skont l-Artikolu 15(1) tar-Regolament bażiku, għandu jiġi impost dazju definittiv kumpensatorju f’livell għoli biżżejjed biex titneħħa l-ħsara kkawżata mill-importazzjonijiet sussidjati mingħajr ma jinqabeż il-marġini ta’ sussidjar misjub.

(182)

Fid-dawl tal-kummenti li waslu minn ċerti partijiet interessati wara l-iżvelar provviżorju u fid-dawl tar-reviżjonijiet deskritti f’dan ir-Regolament, ċerti marġini ġew emendati.

(183)

Fuq il-bażi ta’ dan ta’ hawn fuq, ir-rati tad-dazju kumpensatorju ġew stabbiliti permezz ta’ qbil bejn il-marġini ta’ eliminazzjoni ta’ dannu u l-marġini ta’ sussidju. Għaldaqstant, id-dazju kumpensatorju propost huwa kif ġej:

(184)

Fid-dawl tal-fatt li d-dazju kumpensatorju għandu japplika għal taħlitiet li fihom bil-piż aktar minn 20 % ta’ bijodiżil, fi proporzjon mal-kontenut tagħhom ta’ bijodiżil, qed jitqies meħtieġ għall-implimentazzjoni effettiva tal-miżuri mill-awtoritajiet doganali tal-Istati Membri li jiddeterminaw id-dazji bħala ammonti fissi fuq il-bażi tal-kontenut tal-bijodiżil.

(185)

Ċerti partijiet ikkuntestaw il-metodoloġija użata biex ir-rati tad-dazju ad valorem jiġu kkonvertiti f’dazji fl-għamla ta’ ammonti fissi. Huma saħqu li l-valuri CIF li kellhom jintużaw għall-konverżjoni ta’ dazju ad valorem f’ammont fiss kellhom ikunu l-valuri CIF effettivi u mhux dawk aġġustati biex jitqiesu d-differenzi tal-materja bażika deskritti fil-premessi (185) u (186) tar-Regolament provviżorju.

(186)

Din il-klejm ġiet eżaminata u tabilħaqq instab li l-valuri CIF aġġustati ntużaw għall-konverżjoni tad-dazji ad valorem f’dazji ta’ ammonti fissi. Madankollu, instab ukoll li ntużaw l-istess valuri bħala l-bażi għall-espressjoni tal-ammont tar-roħs fil-prezz bħala dazju ad valorem. Għalhekk, kellha ssir korrezzjoni waħda biex l-ammont tar-roħs fil-prezz jiġi espress bħala perċentwali tal-totali effettiv tal-valur CIF tal-importazzjoni. Fuq din i-bażi, il-marġinijiet tad-dannu ġew riveduti skont dan. Il-kalkolu sussegwenti tar-rati tad-dazju b’ammont fiss, madankollu, ma weriex differenza mir-rati tad-dazju li jidhru fl-Artikolu 1(2) tar-Regolament provviżorju billi d-dazju ad valorem ogħla kien kumpensat eżattament mit-tnaqqis tal-prezzijiet CIF (minn aġġustati għal effettivi) użati għall-konverżjoni tal-espressjoni tal-aħħar f’dazji fissi.

(187)

Ir-rati tad-dazju kumpensatorju ta’ kumpanija individwali speċifikati f’dan ir-Regolament ġew stabbiliti fuq il-bażi tas-sejbiet ta’ din l-investigazzjoni. Għalhekk, dawn jirriflettu s-sitwazzjoni li nstabet waqt l-investigazzjoni rigward dawn il-kumpaniji. Dawn ir-rati ta’ dazju (għall-kuntrarju tad-dazju nazzjonali applikabbli għall-“kumpaniji l-oħrajn kollha”) huma għalhekk esklussivament applikabbli għal importazzjonijiet ta’ prodotti li joriġinaw fil-pajjiż ikkonċernat u magħmula mill-kumpaniji u għalhekk mill-entitajiet legali speċifikati msemmija. Il-prodotti importati mmanifatturati minn xi kumpanija oħra mhux imsemmija speċifikament fil-parti operattiva ta’ dan ir-Regolament bl-isem u l-indirizz tagħha, inklużi entitajiet relatati ma’ dawk imsemmija speċifikament, ma jistgħux jibbenefikaw minn dawn ir-rati u għandhom ikunu suġġetti għar-rata tad-dazju applikabbli għall-“kumpaniji l-oħrajn kollha”.

(188)

Kwalunkwe talba gћall-applikazzjoni ta’ din ir-rata ta’ dazju kumpensatorju gћal kumpaniji individwali (eż. wara bdil fl-isem tal-entità jew wara li jiġu stabbiliti entitajiet ġodda ta’ produzzjoni jew ta’ bejgћ) gћandha tiġi indirizzata minnufih lill-Kummissjoni (11) bit-tagħrif kollu rilevanti, b’mod partikolari fir-rigward ta’ kwalunkwe modifika fl-attivitajiet tal-kumpanija marbuta mal-produzzjoni, mal-bejgћ domestiku u ma’ dak tal-esportazzjoni u li jkunu assoċjati, pereżempju, ma’ dik il-bidla fl-isem jew ma’ dik il-bidla fl-entitajiet ta’ produzzjoni u ta’ bejgћ. Jekk ikun xieraq, ir-Regolament jiġi mbagħad emendat skont dan billi tiġi aġġornata l-lista ta’ kumpaniji li jgawdu minn rati ta’ dazju individwali.

(189)

Il-partijiet kollha kienu informati bil-fatti essenzali u konsiderazzjonijiet li fuq il-bażi tagħhom kien intiż li tirrakkomanda l-impożizzjoni ta’ taxxi kompensatorji definittivi. Ingħataw ukoll perjodu li fih setgħu jagħmlu appelli wara dan l-iżvelar. Il-kummenti mressqa mill-partijiet tqiesu sewwa, u, fejn xieraq, is-sejbiet inbidlu skont dan.

(190)

Ċerti produtturi esportaturi tal-Istati Uniti li kkooperaw offrew impenji tal-prezz skont l-Artikolu 13(1) tar-Regolament bażiku. Ġie nnutat li fid-dawl tal-varjazzjonijiet sinifikanti tal-prezz tal-materja prima, il-prodott ma jitqiesx li huwa adatt għall-impenn ta’ prezz fiss. F’dan il-kuntest, il-kumpaniji pproponew li l-prezzijiet minimi tal-importazzjoni (PIMs) jiġu indiċjati regolarment b’relazzjoni mal-varjazzjonijiet tal-prezzijiet taż-żejt taż-żerriegħa tal-kolza. Barra minn hemm, offrew PIMs għal tliet tipi biex titqies il-varjetà tal-prodott fl-importazzjoni (bijodiżil mis-sojja, il-palma jew il-kanola) fuq il-bażi tal-koeffiċjenti tal-materja bażika stabbiliti fil-PI.

(191)

Fir-rigward tal-offerti tal-produtturi esportaturi li kkooperaw, qed jiġi nnutat li l-bażi biex fuqha jiġi stabbilit PIM indiċjat kien f’medja ta’ bejn 7-8 % inqas mill-prezz mhux dannuż stabbilit matul il-PI. Barra minn hekk, il-koeffiċjenti proposti biex wieħed jasal għal PIMs aġġustati għat-tipi msemmija hawn fuq ma kinux rilevanti għax kienu jikkonċernaw il-PI. Tabilħaqq, fid-dawl tal-fatt li dawn il-koeffiċjenti, li jiddependu fuq id-differenza fil-prezz bejn il-materja bażika, ivarjaw kontinwament, dawn il-koeffiċjenti jistgħu jkunu nbidlu sewwa meta mqabbel mas-sitwazzjoni osservata matul il-PI. Għalhekk, l-indiċjar propost ta’ PIMs għall-bijodiżil tas-sojja jew iż-żejt tal-palma fuq il-bażi tal-varjazzjonijiet fil-prezz taż-żejt taż-żerriegħa tal-kolza ma tqiesx wieħed xieraq billi dan ikun ibbażat fuq l-evoluzzjoni tal-prezzijiet ta’ materja prima differenti minn dik użata għall-produzzjoni tal-prodott esportat ikkonċernat.

(192)

Fuq il-bażi ta’ dan ta’ hawn fuq, u mingħajr referenza għal ebda kwistjoni prattika oħra speċifika għall-kumpaniji dwar l-aċċettanza tagħhom, tqies li l-impenji ma setgħux jintlaqgħu billi l-metodu biex il-PIMs jiġu ddeterminati ma kienx adatt u l-PIMs offruti ma kinux f’livelli li jeliminaw is-sussidji dannużi.

(193)

Wara l-iżvelar tas-sejbiet finali, l-ilmentatur talab miżuri speċjali biex il-miżuri ma jiġux evitati fid-dawl tal-fatt li s-suq ikkonċernat huwa suq tal-prodotti globali bi prodott funġibbli li jinbiegħ b’diversi modi differenti ta’ bejgħ.

(194)

Fid-dawl ta’ dak ta’ hawn fuq, tabilħaqq jitqies xieraq li l-importazzjonijiet tal-bijodiżil jiġu ssorveljati mill-qrib mid-destinazzjonijiet kollha, bil-ħsieb li tiġi ffaċilitata l-azzjoni rapida jekk is-sitwazzjoni tkun tirrikjediha.

(195)

Minħabba l-kobor tal-marġini ta’ sussidji li nstabu u fid-dawl tal-livell ta’ ħsara ikkaġunata lill-industrija tal-Komunità, jitqies meħtieġ li l-ammonti li nġabru permezz tad-dazju kumpensatorju provviżorju, impost bir-Regolament provviżorju, għandhom jinġabru b’mod definittiv sal-ammont tad-dazji definittivi imposti. Fejn id-dazji definittivi jkunu aktar baxxi mid-dazji provviżorji, l-ammonti miġbura b’mod provviżorju li jkunu ogħla mir-rata definittiva ta’ dazji kumpensatorji għandhom jinħelsu. Fejn id-dazji definittivi huma ogħla mid-dazji provviżorji, l-ammonti assigurati fil-livell ta’ dazji provviżorji biss għandhom jinġabru b’mod definittiv,