4.8.2009   

MT

Il-Ġurnal Uffiċjali tal-Unjoni Ewropea

L 202/42

(1)

Skont l-Artikolu 104 tat-Trattat, l-Istati Membri għandhom jevitaw żbilanċi eċċessivi tal-gvern.

(2)

Il-Patt ta’ Stabbiltà u Tkabbir huwa msejjes fuq l-għan ta’ finanzi sodi tal-gvern bħala mezz biex jissaħħu l-kondizzjonijiet għall-istabbiltà tal-prezzijiet u għal tkabbir sostenibbli qawwi li jwassal għall-ħolqien tal-impjiegi.

(3)

Il-proċedura ta’ żbilanċ eċċessiv (PŻE) skont l-Artikolu 104 tat-Trattat, kif iċċarata bir-Regolament tal-Kunsill (KE) Nru 1467/97 tas-7 ta’ Lulju 1997 dwar li titħaffef u li tiġi ċċarata l-implimentazzjoni tal-proċedura ta’ żbilanċ eċċessiv (1), li jagħmel parti mill-Patt ta’ Stabbiltà u Tkabbir, tipprovdi għal deċiżjoni dwar l-eżistenza ta’ żbilanċ eċċessiv. Il-Protokoll dwar il-proċedura ta’ żbilanċ eċċessiv anness mat-Trattat iniżżel aktar dispożizzjonijiet relatati mal-implimentazzjoni tal-PŻE. Ir-Regolament tal-Kunsill (KE) Nru 3605/93 (2) jistabbilixxi regoli u definizzjonijiet dettaljati għall-applikazzjoni tad-dispożizzjonijiet ta’ dak il-Protokoll.

(4)

Ir-riforma tal-2005 tal-Patt ta’ Stabbiltà u Tkabbir kellha l-għan li ssaħħaħ l-effikaċja u l-bażi ekonomika tiegħu kif ukoll li tissalvagwardja s-sostenibbiltà tal-finanzi pubbliċi fuq perijodu twil. Din kellha l-għan li tiżgura li, b’mod partikolari, l-isfond ekonomiku u baġitarju jitqies kompletament fl-istadji kollha tal-PŻE. B’dan il-mod, il-Patt ta’ Stabbiltà u Tkabbir jipprovdi l-qafas li jsostni l-politika tal-gvern għal ritorn ta’ malajr lejn pożizzjonijiet baġitarji sodi fid-dawl tal-qagħda ekonomika.

(5)

L-Artikolu 104(5) tat-Trattat jitlob li l-Kummissjoni tindirizza opinjoni lill-Kunsill jekk il-Kummissjoni tqis li jeżisti jew li jista’ jseħħ żbilanċ eċċessiv fi Stat Membru. Il-Kummissjoni, wara li qieset ir-rapport tagħha skont l-Artikolu 104(3) tat-Trattat u b’kunsiderazzjoni tal-opinjoni tal-Kumitat Ekonomiku u Finanzjarju skont l-Artikolu 104(4) tat-Trattat, ikkonkludiet li jeżisti żbilanċ eċċessiv f’Malta. Il-Kummissjoni għalhekk indirizzat tali opinjoni lill-Kunsill fir-rigward ta’ Malta fl-24 ta’ Ġunju 2009 (3).

(6)

L-Artikolu 104(6) tat-Trattat jiddikjara li l-Kunsill għandu jikkunsidra kull osservazzjoni li l-Istat Membru kkonċernat ikun jixtieq jagħmel qabel ma jiddeċiedi, wara evalwazzjoni ġenerali, jekk jeżistix żbilanċ eċċessiv. Fil-każ ta’ Malta, din l-evalwazzjoni ġenerali twassal għall-konklużjoni mniżżla f’din id-Deċiżjoni.

(7)

Skont id-data nnotifikata mill-awtoritajiet Maltin f’Marzu 2009 li mbagħad ġiet validata mill-Eurostat, l-iżbilanċ ġenerali tal-gvern f’Malta laħaq l-4,7 % tal-PDG fl-2008, u b’hekk eċċeda b’ammont kbir it-3 % tal-valur ta’ referenza tal-PDG. L-iżbilanċ m’huwiex qrib il-valur ta’ referenza ta’ 3 % tal-PDG u dak li jibqa’ “il fuq mill-valur ta” referenza ma jistax jiġi kkwalifikat bħala eċċezzjonali fit-tifsira tat-Trattat u tal-Patt ta’ Stabbiltà u Tkabbir. B’mod partikolari, dan ma rriżultax minn avveniment mhux tas-soltu jew minn tnaqqis qawwi fir-ritmu ekonomiku fl-2008 skont it-tifsira tat-Trattat u tal-Patt ta’ Stabbiltà u Tkabbir. Tabilħaqq, it-tkabbir reali tal-PDG bejn l-2005 u l-2007 kien ta’ iżjed minn 3 % fis-sena, li jaqbeż it-tkabbir potenzjali b’mod sinifikattiv. It-tkabbir ekonomiku naqas fl-2008, iżda baqa’ pożittiv b’1,6 % u, skont l-aktar data reċenti, ġie rivedut ‘il fuq għal 2,5 %. Barra minn hekk, l-eċċess fuq il-valur ta’ referenza ma jistax jitqies bħala temporanju. Skont il-previżjoni tar-rebbiegħa tal-2009 tas-servizzi tal-Kummissjoni, il-proporzjon tal-iżbilanċ huwa stmat li jonqos iżda jibqa’ ’l fuq mil-limitu matul il-perijodu tal-previżjoni, għal 3,6 % tal-PDG fl-2009 u, skont is-suppożizzjoni konswetudinarja li ma jkunx hemm tibdil ta’ politika, għal 3,2 % tal-PDG fl-2010. Il-kriterju ta’ żbilanċ fit-Trattat għalhekk mhuwiex sodisfatt.

(8)

Id-dejn gross ġenerali tal-gvern ilu ’l fuq mill-valur ta’ referenza ta’ 60 % tal-PDG mill-2003 u fl-2008 kien ta’ 64,1 % tal-PDG. Skont il-previżjoni tar-rebbiegħa tal-2009 tas-servizzi tal-Kummissjoni, id-dejn ġenerali tal-gvern huwa stmat li ser jieħu xejra ‘l fuq u jiżdied għal kważi 69 % sal-2010. Il-proporzjon tad-dejn ma jistax jitqies li qed jonqos b’rata suffiċjenti u li qed joqrob lejn il-valur ta’ referenza b’pass sodisfaċenti skont it-tifsira tat-Trattat u tal-Patt ta’ Stabbiltà u Tkabbir. Il-kriterju tad-dejn fit-Trattat għalhekk mhuwiex sodisfatt.

(9)

Skont l-Artikolu 2(4) tar-Regolament (KE) Nru 1467/97, il-“fatturi rilevanti” jistgħu jitqiesu biss fl-istadji li jwasslu għad-deċiżjoni tal-Kunsill dwar l-eżistenza ta’ żbilanċ eċċessiv skont l-Artikolu 104(6) tat-Trattat jekk il-kondizzjoni doppja - li l-iżbilanċ jibqa’ qrib il-valur ta’ referenza u li l-eċċess tiegħu “l fuq mill-valur ta” referenza jkun temporanju – tiġi osservata kompletament. Fil-każ ta’ Malta, din il-kondizzjoni doppja mhix osservata. Għalhekk, il-fatturi rilevanti mhumiex qed jitqiesu fl-istadji li jwasslu għal din id-Deċiżjoni,