20.5.2008   

MT

Il-Ġurnal Uffiċjali ta’ l-Unjoni Ewropea

L 130/22

(1)

Skond id-Deċiżjoni tal-Kummissjoni 2006/133/KE tat-13 ta’ Frar 2006 li titlob lill-Istati Membri temporanjament biex jieħdu miżuri addizzjonali kontra t-tixrid tal-Bursaphelenchus xylophilus (Steiner et Buhrer) Nickle et al. (the pine wood nematode – PWN)) fir-rigward ta’ żoni fil-Portugall, għajr dawk li fihom huwa magħruf li ma tinsabx (2), il-Portugall ħa miżuri kontra t-tixrid tal-pine wood nematode.

(2)

Il-Portugall bagħat rapport lill-Kummissjoni fil-11 ta’ April 2008 dwar is-sejba ta’ tifqigħat ġodda tal-PWN, wara investigazzjoni straordinarja mill-awtoritajiet Portugiżi flimkien ma’ l-istħarriġ annwali, fil-parti tal-Portugall fejn s’issa huwa magħruf li l-PWN ma tinstabx.

(3)

L-istħarriġiet obbligatorji annwali tas-snin ta’ qabel ma kinux żvelaw dawn it- tifqigħat ta’ l-aħħar ta’ PWN fil-Portugall. Fid-dawl ta’ din it-tifqigħa l-ġdida, huwa meħtieġ li l-Portugall iwettaq minnufih stħarriġ addizzjonali msejjes fuq ir-riskji fit-territorju Portugiż kollu kemm hu fuq il-bażi ta’ pjan ta’ stħarriġ approvat mill-Kummissjoni u li jressaq ir-riżultati ta’ dan l-istħarriġ lill-Kummissjoni hekk kif dawn ikunu disponibbli.

(4)

Wara l-esperjenza ta’ l-implimentazzjoni tal-miżuri eżistenti ta’ emerġenza u t-tagħrif xjentifiku reċenti, huwa meħtieġ li jittieħdu miżuri partikolarment effettivi fir-rigward ta’ tifqigħat f’żoni fejn sa issa huwa magħruf li ma nstabitx il-PWN.

(5)

Id-Deċizjoni 2006/133/KE għandha għalhekk tiġi emendata skond dan.

(6)

Il-miżuri stipulati f’din id-Deċiżjoni huma skond l-opinjoni tal-Kumitat Permanenti dwar is-Saħħa tal-Pjanti,

(1)

L-Artikolu 4 huwa mibdul b’dan li ġej:

“Artikolu 4

1.   L-Istati Membri għandhom iwettqu stħarriġiet annwali uffiċjali għall-PWN, fuq injam u l-qoxra tas-sigar u fuq pjanti suxxettibbli li joriġinaw fil-pajjiż tagħhom, biex jiddeterminaw jekk teżistix xi prova ta’ infestazzjoni mill-PWN.

Bla ħsara għall-Artikolu 16(1) tad-Direttiva 2009/29/KE, ir-riżultati ta’ stħarriġiet bħal dawn għandhom jiġu nnotifikati lill-Istati Membri l-oħra u lill-Kummissjoni kull sena sal-15 ta’ Diċembru.

2.   Flimkien ma’ l-istħarriġiet imsemmija fil-paragrafu 1, il-Portugall għandu jħejji pjan ta’ stħarriġ għat-territorju kollu Portugiż u jressqu lill-Kummissjoni għall-approvazzjoni. Dan il-pjan għandu jkun imsejjes fuq apprezzament tar-riskji u jqis it-tixrid ta’ pjanti suxxettibbli fi ħdan it-territorju Portugiż. Fil-każ li l-pjan ta’ l-istħarriġ ma jitressaqx sas-16 ta’ Mejju 2008, il-Kummissjoni tista’ tieħu l-miżuri xierqa.

Ir-riżultati ta’ l-istħarriġ imwettaq fuq il-bażi ta’ dan il-pjan għandhom jiġu nnotifikati lill-Kummissjoni u lill-Istati Membri l-oħra hekk kif ikunu disponibbli.”

(2)

Fl-Artikolu 5, it-tielet paragrafu jinbidel b’dan li ġej:

“Dik il-lista għandha tiġi aġġornata skond ir-riżulati ta’ l-istħarriġiet imsemmija fl-Artikolu 4 u skond is-sejbiet notifikati fl-Artikolu 16(1) tad-Direttiva 2000/29/KE.”

(3)

L-Anness tad-Deċiżjoni 2006/133/KE qed tiġi emendata skond l-Anness ta’ din id-Deċiżjoni.