32001R0826

Ir-Regolament tal-Kummissjoni (KE) NRU 826/2001

tas-27 ta’ April 2001

li jemenda r-Regolament (KE) Nru 590/2001 li jidderoga minn, u jemenda r-Regolament (KE) Nru 562/2000 li jippreskrivi regoli dettaljati dwar l-applikazzjoni tar-Regolament tal-Kunsill (KE) Nru 1254/1999 fir-rigward tax-xiri tal-laħam taċ-ċanga għall-ħażna.

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1254/1999 tas-17 ta’ Mejju 1999 dwar l-organizzazzjoni komuni tas-suq tal-laħam taċ-ċanga u tal-vitella [1], u b’mod partikolari Artikolu 47(8) tiegħu,

Billi:

(1) Ir-Regolament tal-Kummissjoni (KE) Nru 590/2001 [2], kif emendat bir-Regolament (KE) Nru 719/2001 [3], jintroduċi numru ta’ emendi u derogi għar-Regolament tal-Kummissjoni (KE) Nru 562/2000 [4] sabiex tiġi trattata s-sitwazzjoni eċċezzjonali tas-suq b’riżultat tal-ġrajjiet reċenti assoċjati ma’ l-enċefalopatija sponġiformi bovina (ESB). L-epidemija sussegwenti tal-marda ta’ l-ilsien u d-dwiefer (MID) ħolqot il-ħtieġa ta’ xi emendi oħra.

(2) B’deroga minn Artikolu 4(2) tar-Regolament (KE) Nru 562/2000, Artikolu 1(2)(b) tar-Regolament (KE) Nru 590/2001 jiddisponi għax-xiri għall-ħażna ta’ kwarti ta’ quddiem b’ħames kustilji. Fid-dawl ta’ l-esperjenza, għandhom jiġu stabbiliti ċerti regoli dwar it-teħid tal-kwarti.

(3) Artikolu 1(3) tar-Regolament (KE) Nru 590/2001 jaħseb, fir-rigward ta’ l-ewwel żewġ proċeduri għal offerti għal xogħol bl-appalt tat-tieni tliet xhur ta’ l-2001, għall-possibbiltà ta’ xiri għall-ħażna ta’ karkassi li jiżnu aktar mill-piż massimu filwaqt li l-prezz tax-xiri għall-ħażna b’hekk ikun ristrett għall-prezz tal-piż massimu awtorizzat. Biex tiġi ċċarata s-sitwazzjoni fir-rigward tax-xiri ta’ kwarti ta’ quddiem għandha tiġi applikata restrizzjoni relatata mat-tieni proċedura ta’ offerti għal xogħol bl-appalt billi l-prezz tagħhom tax-xiri għall-ħażna jiġi limitat għal 40 % tal-piż massimu li jitħallas għal karkassi.

(4) Ir-Regolament (KE) Nru 590/2001 irid għalhekk jiġi emendat.

(5) Minħabba kif żviluppaw l-affarijiet dan ir-Regolament għandu jidħol fis-seħħ immedjatament.

(6) Il-miżuri previsti f’dan ir-Regolament huma skond l-opinjoni tal-Kumitat ta’ Ġestjoni għal-Laħam taċ-Ċanga u l-Vitella,

ADOTTAT DAN IR-REGOLAMENT:

Artikolu 1

Ir-Regolament (KE) Nru 590/2001 huwa emendat kif ġej:

1. Artikolu 1(3) jiġi sostitwit bit-test li ġej:

"3. Minkejja Artikolu 4(2)(g) tar-Regolament (KE) Nru 562/2000, għat-tieni tliet xhur ta’ l-2001 il-piż massimu tal-karkassi msemmijin fih għandu jkun:

- 430 kg għall-ewwel proċedura ta’ offerti għal xogħol bl-appalt; madankollu, karkassi li jiżnu aktar minn 430 kg jistgħu jinxtraw bl-intervent imma f’dak il-każ il-prezz imħallas tax-xiri għall-ħażna m’għandux jeċċedi l-prezz għal dak il-piż massimu,

- 430 kg għat-tieni proċedura ta’ offerti għal xogħol bl-appalt; madankollu, karkassi li jiżnu aktar minn 430 kg jistgħu jinxtraw bl-intervent iżda f’dak il-każ il-prezz mħallas tax-xiri għall-ħażna m’għandux jeċċedi l-prezz għal 40 % tal-piż massimu li jitħallas,

- 410 kg għat-tielet u r-raba’ proċeduri ta’ offerti għal xogħol bl-appalt,

- 390 kg għall-aħħar żewġ proċeduri ta’ offerti għal xogħol bl-appalt.";

2. F’Artikolu 1 jiżdied il-paragrafu 5a li ġej wara l-paragrafu 5:

"5a. Minkejja Artikolu 17 tar-Regolament (KE) Nru. 562/2000, fejn it-teħid huwa limitat għall-kwarti ta’ quddiem, dawn ta’ l-aħħar iridu jiġu ppreżentati flimkien mal-kwarti korrispondenti ta’ wara sabiex jiġu aċċettati mill-aġenzija ta’ l-intervent, sabiex il-piż massimu, il-preżentazzjoni u l-klassifikazzjoni tal-karkassi minn fejn ikunu oriġinaw jistgħu jiġu verifikati.

Madankollu, fejn tkun ġiet mwettqa spezzjoni preliminari tal-kwarti ta’ quddiem u ta’ wara bil-kondizzjonijiet imsemmija fil-paragrafu 3 ta’ dak l-Artikolu, il-kwarti ta’ quddiem li jkunu ġew aċċettati waqt dik l-ispezzjoni jistgħu jiġu ippreżentati mingħajr il-kwarti ta’ wara għat-teħid definittiv fiċ-ċentru ta’ l-interventi wara li jkunu ġew trasportati hemm ġo mezz ta’ trasport issiġillat."

Artikolu 2

Dan ir-Regolament għandu jidħol fis-seħħ fil-jum tal-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fis-27 ta’ April 2001.

Għall-Kummissjoni

Franz Fischler

Membru tal-Kummissjoni

[1] ĠU L 160, tas-26.6.1999, p. 21.

[2] ĠU L 86, tas-27.3.2001, p. 30.

[3] ĠU L 100, tal-11.4.2001, p. 13.

[4] ĠU L 68, tas-16.3.2000, p. 22.

--------------------------------------------------