31985R0632

Ir-Regolament Tal-Kummissjoni (KEE) Nru 632/85

tat-12 ta’ Marzu 1985

li jemenda r-Regolament (KEE) Nru 2182/77 rigward ir-rilaxx tal-garanzija fuq ix-xiri f’ċertu bejgħ tal-laħam taċ-ċanga

IL-KUMMISSJONI TAL-KOMUNITAJIET EWROPEJ,

Wara li kunsidrat it-Trattat li jistabbilixxi l-Komunità Ekonomika Ewropea,

Wara li kunsidrat ir-Regolament tal-Kunsill (KEE) Nru 805/68 tas-27 ta’ Ġunju 1968 dwar l-organizzazzjoni komuni tas-suq fil-laħam taċ-ċanga u l-vitella [1], kif l-aħħar emendat bl-Att ta’ Adeżjoni tal-Greċja, u partikolarment Artikolu 7(3) tiegħu,

Billi Artikolu 15(2) tar-Regolament tal-Kummissjoni (KEE) Nru 2173/79 ta’ l-4 ta’ Ottubru 1979 dwar regoli dettaljati ta’ applikazjoni sabiex jiġi mibjugħ il-laħam taċ-ċanga mixtri mill-aġenziji ta’ l-intervent u li jħassar ir-Regolament Nru 216/69 [2] li jipprovdi illi l-garanzija li trid tiġi depożitata mix-xerrej tista’ tiġi rilaxxjata biss meta x-xerrej iwettaq l-obbligi preskritti fir-Regolament imsemmi u fit-termini tal-kuntratt tal-bejgħ;

Billi Artikolu 4 tar-Regolament tal-Kummissjoni (KEE) Nru 2182/77 tat-30 ta’ Settembru 1977 li jippreskrivi regoli dettaljati għall-bejgħ tal-laħam taċ-ċanga friżat mill-ħażniet ta’ intervent għall-ipproċessar fil-Komunità u li jemenda r-Regolament (KEE) Nru 1687/76 [3], kif l-aħħar emendat bir-Regolament (KEE) Nru 1560/84 [4], jipprovdi illi għandha tiġi depożitata garanzija maħsuba sabiex tiggarantixxi illi l-prodotti jiġu proċessati; billi din il-garanzija trid tiġi rilaxxjata meta l-operatur ikun qeda’ l-impenji tiegħu kollha;

Billi, minħabba din il-garanzija ta’ proċessar, ma jidhirx meħtieġ illi tinżamm l-ewwel garanzija sakemm l-operatur jipprovdi prova illi l-prodotti jkunu ġew proċessati; billi, għalhekk, jidher rakkomandabbli illi jiġi emendat ir-Regolament (KEE) Nru 2182/77 billi jidderoga minn Artikolu 15 tar-Regolament (KEE) Nru 2173/79;

Billi l-miżuri provvduti f’dan ir-Regolament huma bi qbil mal-Kumitat ta’ Ġestjoni tal-Laħam taċ-Ċanga u l-Vitella,

ADOTTAT DAN IR-REGOLAMENT:

Artikolu 1

Artikolu 8a li ġej huwa hawnhekk miżjud mar-Regolament (KEE) Nru 2182/77;

"Artikolu 8a

Bħala deroga mit-tieni inċiż ta’ Artikolu 15(2)(a) u t-tieni inċiż ta’ Artikolu 15(2)(b) tar-Regolament (KEE) Nru 2173/79, u mingħajr preġudizzju għal Artikolu 16 tiegħu, l-garanzija riferita f’Artikolu 15(1) ta’ dan ir-Regolment għandha tiġi rilaxxjata mill-ewwel:

- jekk ix-xerrej ma jkunx irtira l-applikazzjoni jew l-offerta tiegħu, u

- meta x-xerrej ikun ħallas l-ammont kollu għall-prodott kif fissat fil-kuntratt."

Artikolu 2

Dan ir-Regolament għandu jidħol fis-seħħ fit-tielet jum tal-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fit-12 ta’ Marzu 1985.

Għall-Kummissjoni

Frans Andriessen

Viċi-President

[1] ĠU L 148, tat-28.6.1968, p. 24.

[2] ĠU L 251, tal-5.10.1979, p. 12.

[3] ĠU L 251, ta’ l-1.10.1977, p. 60.

[4] ĠU L 150, tas-6.6.1984, p. 11.

--------------------------------------------------