26.11.2015   

MT

Il-Ġurnal Uffiċjali tal-Unjoni Ewropea

L 311/47

(1)

Ir-Regolament tal-Kummissjoni (UE) Nru 316/2014 tal-21 ta’ Marzu 2014 dwar l-applikazzjoni tal-Artikolu 101(3) tat-Trattat dwar il-Funzjonament tal-Unjoni Ewropea għal kategoriji ta’ ftehimiet dwar trasferiment ta’ teknoloġija (1) għandu jiġi inkorporat fil-Ftehim ŻEE.

(2)

L-Anness XIV tal-Ftehim ŻEE għandu għalhekk jiġi emendat skont dan,

(a)

Fl-Artikolu 6(1) jiddaħħal il-kliem segwenti ‘jew id-dispożizzjoni korrispondenti fl-Artikolu 29(1) tal-Kapitolu II tal-Parti I tal-Protokoll 4 tal-Ftehim bejn l-Istati tal-EFTA dwar it-Twaqqif ta’ Awtorità ta’ Sorveljanza u ta’ Qorti tal-Ġustizzja’ wara l-kliem ‘skont l-Artikolu 29(1) tar-Regolament (KE) Nru 1/2003’.

(b)

Fl-Artikolu 6(2) jiddaħħal il-kliem segwenti ‘jew id-dispożizzjoni korrispondenti fl-Artikolu 29(2) tal-Kapitolu II tal-Parti I tal-Protokoll 4 tal-Ftehim bejn l-Istati tal-EFTA dwar it-Twaqqif ta’ Awtorità ta’ Sorveljanza u ta’ Qorti tal-Ġustizzja’ wara l-kliem ‘skont l-Artikolu 29(2) tar-Regolament (KE) Nru 1/2003’.

(c)

Is-segwenti jiddaħħal fi tmiem l-Artikolu 7:

‘Skont id-dispożizzjonijiet tal-Ftehim bejn l-Istati tal-EFTA dwar it-Twaqqif ta’ Awtorità ta’ Sorveljanza u ta’ Qorti tal-Ġustizzja, l-Awtorità ta’ Sorveljanza tal-EFTA tista’ permezz ta’ rakkomandazzjoni tiddikjara li, meta netwerks paralleli ta’ ftehimiet simili dwar trasferiment ta’ teknoloġija jkunu jkopru aktar minn 50 % ta’ suq rilevanti fl-Istati EFTA, dan ir-Regolament ma jkunx japplika għal ftehimiet dwar trasferiment ta’ teknoloġija li jkun fihom limitazzjonijiet speċifiċi għal dak is-suq.

Għandha tkun indirizzata rakkomandazzjoni skont il-paragrafu 1 lill-Istat tal-EFTA jew l-Istati tal-EFTA li fih jew fihom ikun jinsab is-suq rilevanti inkwistjoni. Il-Kummissjoni tkun mgħarrfa dwar il-ħruġ ta’ tali rakkomandazzjoni.

Fi żmien tliet xhur mill-ħruġ ta’ rakkomandazzjoni skont il-paragrafu 1, l-Istati tal-EFTA kollha indirizzati għandhom jinnotifikaw lill-Awtorità ta’ Sorveljanza tal-EFTA dwar jekk jaċċettawx ir-rakkomandazzjoni. Jekk it-terminu perentorju ta’ tliet xhur jiskadi mingħajr risposta, dan jinftiehem bħala aċċettazzjoni min-naħa tal-Istat tal-EFTA li ma jkunx irrisponda fil-ħin.

Skont il-Ftehim, jekk Stat tal-EFTA destinatarju tar-rakkomandazzjoni jew jaċċetta r-rakkommandazzjoni inkella ma jirrispondix fil-ħin, għandu jiġi impost fuqu obbligu ġuridiku li jimplimenta r-rakkommandazzjoni fi żmien tliet xhur mill-ħruġ tagħha.

Jekk fi żmien l-iskadenza ta’ tliet xhur, Stat tal-EFTA destinatarju jinnotifika lill-Awtorità ta’ Sorveljanza tal-EFTA li ma jaċċettax ir-rakkomandazzjoni tagħha, l-Awtorità ta’ Sorveljanza tal-EFTA tinnotifika lill-Kummissjoni b’din ir-risposta. F’każ li l-Kummissjoni ma taqbilx mal-pożizzjoni tal-Istat tal-EFTA inkwistjoni, ikun japplika l-Artikolu 92(2) tal-Ftehim.

L-Awtorità ta’ Sorveljanza tal-EFTA u l-Kummissjoni għandhom jiskambjaw it-tagħrif u jikkonsultaw lil xulxin dwar l-applikazzjoni ta’ din id-dispożizzjoni.

Meta netwerks paralleli ta’ ftehimiet simili dwar trasferiment ta’ teknoloġija jkunu jkopru aktar minn 50 % ta’ suq rilevanti fit-territorju tal-Ftehim ŻEE, iż-żewġ awtoritajiet ta’ sorveljanza jistgħu jagħtu bidu għal kooperazzjoni bl-għan li jadottaw miżuri separati. Jekk iż-żewġ awtoritajiet ta’ sorveljanza jaqblu dwar suq rilevanti u dwar l-adegwatezza tal-adozzjoni ta’ miżura skont din id-dispożizzjoni, il-Kummissjoni tadotta Regolament indirizzat lill-Istati Membri tal-KE, u l-Awtorità ta’ Sorveljanza tal-EFTA tadotta rakkomandazzjoni b’kunsiderazzjonijiet korrispondenti għall-Istat tal-EFTA jew l-Istati tal-EFTA li fih jew fihom ikun jinsab is-suq rilevanti inkwistjoni.’ ”