Comhaontú Cobhsaíochta agus Comhlachais leis an gCosaiv*

PRÍOMHPHOINTÍ

Cuimsítear 10 gceannteideal sa CCC.

1. Prionsabail ghinearálta

   Tá an CCC bunaithe ar líon prionsabal bunúsach. Aontaíonn an Chosaiv leis an méid seo a leanas:

   • go mbeidh meas aici ar phrionsabail dhaonlathacha agus ar chearta an duine, ar phrionsabail an dlí idirnáisiúnta, an smacht reachta agus prionsabail an gheilleagair mhargaidh;
   • cloí leis an dlí idirnáisiúnta agus le hionstraimí;
   • tiomnú d'fheabhas feiceálach agus inbhuanaithe ina caidreamh leis an tSeirbia agus comhoibriú go héifeachtach le misean an chomhbheartais slándála agus cosanta fad is atá sé i bhfeidhm;
   • comhoibriú leis an mBinse Coiriúil Idirnáisiúnta don Iar-Iúgslaiv agus lena shásra iarmharach, chomh maith le himscrúduithe agus ionchúisimh eile a sheoltar faoi choimirce idirnáisiúnta agus chun Reacht na Róimhe den Chúirt Choiriúil Idirnáisiúnta a chomhlíonadh;
   • leanúint le comhar agus caidreamh maith idir comharsana a chothú sa réigiún.
2. Idirphlé polaitiúil

   Tá idirphlé polaitiúil idir an dá pháirtí le forbairt tuilleadh. Déantar an méid seo a leanas a chur chun cinn leis go háirithe:

   • Rannpháirtíocht na Cosaive sa phobal daonlathach idirnáisiúnta, ag brath ar chúinsí oibiachtúla;
   • cur chun cinn pheirspictíocht Eorpach na Cosaive agus comhchuibhiú de réir a chéile (raprochement) leis an Aontas Eorpach;
   • coinéasú le bearta áirithe de chomhbheartas eachtrach agus slándála an Aontais Eorpaigh a mhéadú;
   • comhar réigiúnach éifeachtach, uilechuimsitheach agus ionadaíoch agus forbairt caidrimh mhaith idir comharsana sna Balcáin Thiar;
   • próiseas normalú an chaidrimh idir an Chosaiv agus an tSeirbia. Geallann an Chosaiv rannpháirtíocht leanúnach i dtreo feabhsúchán infheicthe agus inbhuanaithe sa chaidreamh leis an tSeirbia.
3. Comhar réigiúnach

   Ceanglaítear ar na gCosaiv roinnt beart a dhéanamh. Féadfaidh an tAontas Eorpach, trí ionstraimí iomchuí, tacú leis na hiarrachtaí sin, lena n–áirítear:

   • cur chun feidhme Chomhaontú Saorthrádála Lár na hEorpa;
   • dul i mbun comhair leis na tíortha a bhfuil CCC leis an Aontas Eorpach sínithe acu cheana d’fhonn comhaontuithe déthaobhacha maidir le comhar réigiúnach a chur i gcrích;
   • féachaint le comhar déthaobhach réigiúnach a bhaint amach le tíortha lena mbaineann an próiseas cobhsaíochta agus comhlachais (PCC) i roinnt de na réimsí nó i ngach réimse um chomhar atá cumhdaithe sa chomhaontú seo;
   • comhar a chothú agus comhaontuithe um chomhar a chur i gcrích, más féidir, le haon tír AE is iarrthóir nach bhfuil bainteach leis an PCC.
4. Saorghluaiseacht earraí
   • Tá an 2 pháirtí tiomnaithe do limistéar saorthrádála déthaobhaí a bhunú de réir a chéile thar tréimhse a mhairfidh 10 mbliana ar a mhéad.
   • Leagtar amach sa Chomhaontú Cobhsaíochta agus Comhlachais próiseas maidir le taraifí custaim agus cuótaí ar earraí ón AE agus ón gCosaive araon a laghdú nó a bhaint.
5. Gluaiseacht oibrithe, bunú, soláthar seirbhísí agus gluaiseacht caipitil
   • Beidh cead ag cuideachtaí (chomh maith le fochuideachtaí agus brainsí) atá bunaithe i bpáirtí amháin oibríochtaí a bhunú ar chríoch an pháirtí eile faoi na coinníollacha céanna is a bhaineann le cuideachtaí atá bunaithe sa chríoch sin.
   • Féadfaidh cuideachta AE atá bunaithe i gcríoch na Cosaive nó cuideachta de chuid na Cosaive atá bunaithe in AE, faoi choinníollacha áirithe, fostaithe ar náisiúnaigh AE nó saoránaigh de chuid na Cosaive iad faoi seach a fhostú, nó féadfar ceann dá bhfochuideachtaí nó dá mbrainsí iad a fhostú.
   • Ní mór don dá pháirtí bearta a dhéanamh lena gceadófar dá gcuideachtaí nó dá náisiúnaigh de réir a chéile seirbhísí a sholáthar i gcríoch an pháirtí eile.
   • Ní mór gach íocaíocht agus aistriú ar chuntas reatha chomhardú na n–íocaíochtaí idir AE agus an Chosaiv a cheadú in airgeadra saor-inchomhshóite.
6. Ailíniú dhlíthe na tíre le dlíthe AE
   • Aontaíonn an Chosaiv a áirithiú go ndéanfar an dlí reatha agus an reachtaíocht amach anseo comhoiriúnach de réir a chéile le acquis AE agus go ndéanfar na dlíthe sin a chur chun feidhme agus a fhorfheidhmiú mar is ceart.
   • Díreofar é sin ar dtús ar ghnéithe bunúsacha dhlí AE sna réimsí maidir leis an margadh inmheánach agus maidir le saoirse, slándáil agus ceartas, agus ar réimsí a bhaineann le trádáil chomh maith.
   • Tá an dá thaobh ceangailte le rialacha iomaíochta, atá bunaithe ar dhlí AE, a bhaineann le gníomhartha a d’fhéadfadh difear a dhéanamh den trádáil idir an 2 pháirt.
7. Saoirse, slándáil agus ceartas

   Cuirtear béim sa CCC ar an tábhacht a bhaineann leis an smacht reachta agus le hinstitiúidí a neartú ar gach leibhéal sna réimsí maidir leis an riarachán ginearálta agus forfheidhmiú an dlí agus riarachán ar cheartas go háirithe.

   Dírítear an comhar go sonrach ar:

   • neamhspleáchas, neamhchlaontacht agus cuntasacht na breithiúnachta sa Chosaiv a neartú agus a héifeachtúlacht a fheabhsú;
   • struchtúir imleora a fhorbairt do na póilíní, do na hionchúisitheoirí agus do na breithiúna agus do chomhlachtaí forfheidhmithe dlí eile chun
     • iad a ullmhú go leormhaith do chomhar i gcúrsaí sibhialta, tráchtála agus coiriúla, agus
     • a chur ar a gcumas coireacht eagraithe, éilliú agus sceimhlitheoireacht a chosc, a imscrúdú, a ionchúisimh agus a bhreith ar bhealach éifeachtach.
8. Beartas um chomhar

   Bunóidh AE Agus an Chosaiv dlúthchomhar ar réimse leathan réimsí beart chun cuidiú le hacmhainneacht forbartha agus fáis na Cosaive.

9. Comhar airgeadais

   Chun cuidiú a fháil le cuspóirí an Chomhaontaithe seo a bhaint amach d’fhéadfadh an Chosaiv cúnamh airgeadais a fháil ó AE i bhfoirm deontas agus iasachtaí, lena n–áirítear iasachtaí ón mBanc Eorpach Infheistíochta.

   Tá cúnamh airgeadais an Aontais Eorpaigh ag brath ar thuilleadh dul chun cinn maidir le critéir Chóbanhávan a chomhlíonadh.

10. Maoirseacht

    Bunaítear leis an CCC comhairle cobhsaíochta agus comhlachais (CCC) chun maoirseacht a dhéanamh ar chur i bhfeidhm agus ar chur chun feidhme CCC.

    Cuidíonn coiste cobhsaíochta agus comhlachais leis an CCC a dhualgais a chomhlíonadh.