1.Conclúidí agus moltaí

1.1Is díol sásaimh do CESE na tograí sa Straitéis Eorpach um Chúram le haghaidh gníomhaíochtaí ar an leibhéal Eorpach agus náisiúnta chun an bonneagar cúraim san Eoraip a neartú de réir cur chuige uile-shochaí agus molann sé an iarraidh a dhéantar inti trí na Tograí ón gComhairle maidir le seirbhísí ar chaighdeán níos fearr a sholáthar ó thús deireadh shaol an duine.

1.2Molann CESE an athuair Ráthaíocht Eorpach um Chúram a sheoladh, chun rochtain ar chúram sláinte agus seirbhísí cúraim inacmhainne ar ardchaighdeán a áirithiú do gach duine a bhfuil cónaí air nó uirthi san Aontas. Dá gcuirfí an ionstraim sin chun feidhme i gceart, chabhródh sí le haghaidh a thabhairt ar easnaimh sa chóras cúraim agus le dálaí oibre cuibhiúla do chúramóirí a chur chun cinn, lena n‑áirítear cúramóirí neamhfhoirmiúla.

1.3Leagann CESE béim ar a thábhachtaí atá sé tacú le teaghlaigh sa ról buntábhachtach atá acu. Chuige sin, de bhreis ar a ndéantar sna beartais shóisialta, ní mór infheistíocht a dhéanamh sna pobail. Líontán sábhála is ea na teaghlaigh de gach aon sórt a bhfuil an tacaíocht chuí acu agus is gné riachtanach iad den chóras cúraim inbhuanaithe atá bunaithe ar an dlúthpháirtíocht. Tá sé fíorthábhachtach béim a leagan ar a thábhachtaí atá sé tosaíocht a thabhairt d’inacmhainneacht agus leanúnachas na seirbhísí cúraim mar fhreagairt ar shuaitheadh a thiteann amach.

1.4Tá ról lárnach ag CESE i dtaca le feasacht a mhúscailt trí phríomhghnéithe den dea‑chleachtas a chruinniú agus a scaipeadh i measc na gcomhpháirtithe sóisialta agus na n‑eagraíochtaí sochaí sibhialta ó thaobh uirlisí agus bonneagair de, mar aon le cineálacha seirbhísí cúraim nua a roinnt. Tá an Coiste á iarraidh go leithdháilfí buiséid ar leith chun mapáil a dhéanamh ar riachtanais na ndaoine dá ndéantar cúram agus ar riachtanais na soláthraithe cúraim.

1.5Ba cheart an comhionannas inscne a bheith ina chuid lárnach de chur i bhfeidhm na straitéise, lena n‑áirítear trí bhíthin gníomhaíochtaí chun aghaidh a thabhairt ar steiréitíopaí díobhálacha inscne a chreimíonn earnálacha an chúraim fhoirmiúil agus neamhfhoirmiúil. Cuireann CESE in iúl an athuair gur cheart iarrachtaí a dhéanamh tuilleadh fear a dhreasú le dul isteach i lucht saothair an chúraim agus ualach an chúraim a roinnt níos fearr laistigh den teaghlach.

1.6Is mian leis an gCoiste aird a tharraingt ar an ngá atá le cur chuige lena gcuirtear san áireamh gach tráth de shaol an duine, lena gcuirtear chun cinn an t‑aosú folláin gníomhach, agus lena gcuirtear cosc ar an aoiseachas agus cineálacha eile idirdhealaithe, drochíde, drochbhaile agus steiréitíopála ar sheanóirí, agus lena gcuirtear cosaint ar fáil ar an méid sin. Tá CESE á iarraidh go bhforbrófaí Straitéis Eorpach i leith Daoine Scothaosta.

1.7Tá CESE á iarraidh go n‑úsáidfí na hacmhainní uile chun freastal ar an éileamh ilchineálach ar chúram atá ag dul i méid: ní mór cistiúchán leordhóthanach a leithdháileadh le haghaidh bonneagar cúraim agus cleachtóirí cúraim chun cur leis an bhfás agus an fhostaíocht. Ní mór an réimse iomlán soláthraithe cúraim a chur chun tairbhe, faoi chreataí láidre dearbhaithe cáilíochta. Ní mór do na Ballstáit cruthú post archáilíochta a spreagadh agus a áirithiú gurb é atá i bpoist in earnáil an chúraim shóisialta poist tharraingteacha a ngabhann pá leormhaith leo, a bhfuil meas orthu, agus a mbaineann deiseanna maithe gairmiúla leo.

1.8Molann CESE soláthar sonraí níos fearr i dtaca le rannpháirtíocht leanaí in oideachas agus cúram na luath-óige lena áirithiú gur féidir comparáid a dhéanamh agus go mbíonn teacht ar fhaisnéis níos cuimsithí d’fhonn athchóirithe a cheapadh agus a chur chun feidhme.

1.9Iarrann CESE ar institiúidí an Aontais Eorpaigh Sainghrúpa Ardleibhéil um Chúram Fadtéarmach a bhunú a bheidh cothrom ó thaobh inscne de, lena dtabharfar le chéile na gníomhaithe uile agus a n‑eagraíochtaí chun an comhar a chur ar bhonn foirmiúil agus seirbhís cúraim na todhchaí a chruthú as lámha a chéile 1 . Moltar freisin go mbeadh rannpháirtíocht fhóinteach ag na daoine dá ndéantar cúram agus ag soláthraithe cúraim agus ag a n-eagraíochtaí ó thús deireadh thimthriall an bheartais.

1.10Cuireann CESE i bhfáth gur gá soghluaisteacht na ngairmithe cúraim agus imirce an lucht oibre ó thíortha nach tíortha de chuid an Aontais iad a chur san áireamh, mar aon le huirlisí chun éileamh agus soláthar a thabhairt le chéile agus cáilíochtaí a aithint agus tugann sé dá aire nach gcuirtear san áireamh a dhóthain sa Straitéis go bhfuil cúram á sholáthar san Eoraip cheana féin ag an-chuid oibrithe gan doiciméid.

1.11Tá CESE ag iarraidh go ndéanfaí athbhreithniú meántéarma ar na moltaí arna bhunú ar fhaireachán arna dhéanamh ar spriocanna Barcelona agus ar chuspóirí ginearálta athchóirithe fadtéarmacha an chúraim, agus timthriall cistiúcháin an Aontais á leanúint.

2.Cuspóirí agus raon feidhme na tuairime

2.1Is díol sásaimh do CESE na tograí sa Straitéis Eorpach um Chúram (an Straitéis) le haghaidh gníomhaíochtaí ar an leibhéal Eorpach agus náisiúnta chun an bonneagar cúraim san Eoraip a neartú, lena dtacaítear leo siúd dá ndéantar cúram (ón mbreith go dtí an tseanaois) agus le soláthraithe cúraim (foirmiúil agus neamhfhoirmiúil), agus molann sé cur chuige anailíseach na Teachtaireachta i dtaca le sainaithint na laigí, na scrogall agus na réimsí achrannacha a dhéanann difear do sholáthar an chúraim chomhtháite ardcháilíochta.

2.2Tá an Straitéis sin ag teacht le Plean Gníomhaíochta 2021 an Choimisiúin Eorpaigh maidir le Colún Eorpach na gCeart Sóisialta a chur chun feidhme, agus tugtar treoir úsáideach inti do na Ballstáit i dtaca le cúram inrochtana leordhóthanach ardcháilíochta a fhreastalaíonn ar na héilimh mhéadaitheacha éagsúla ar chúram, mar aon le spriocanna uaillmhianacha maidir le hoideachas agus cúram na luath-óige agus uirlisí rialachais fhónta chun faireachán a dhéanamh ar ghníomhaíochtaí cúraim fhadtéarmaigh. Cuireann sí le creataí Eorpacha 2 atá ann cheana, rud a thugann gné thrasearnálach di chun aghaidh a thabhairt ar easnaimh sa chóras cúraim agus chun cearta na gcúramóirí agus na ndaoine dá ndéantar cúram a chur chun cinn.

2.3Tá an‑chuid staidéar agus tuairimí ar fáil chun cur i bhfeidhm a threorú agus lena dtairgítear léargais agus sonraí ar ghnéithe éagsúla den chúram, lena n-áirítear inscne 3 4 , costas an chúraim neamhfhoirmiúil 5 6 , córais cúraim fhadtéarmaigh san Eoraip 7 , dálaí oibre agus fostaíochta an lucht saothair 8 9 .

2.4Chuir Parlaimint na hEorpa in iúl a thábhachtaí atá inrochtaineacht agus infhaighteacht an chúraim phoiblí agus gur chóir an ceart a bheith ag gach duine rogha mhaith seirbhísí a oireann dóibh féin agus dá dteaghlaigh (cúram teaghlaigh, cúram pobalbhunaithe, cúram otharláraithe, cúram pearsantaithe nó cineálacha eile cúraim 10 ) a bheith acu.

3.Barúlacha ginearálta

3.1Is díol sásaimh do CESE go n‑aithnítear sa Straitéis gur ar an tsochaí ina hiomláine atá freagracht an chúraim agus ní ar an teaghlach amháin, agus is díol sásaimh dó freisin an dá thogra le haghaidh Moltaí ón gComhairle ina n‑iarrtar seirbhísí ar chaighdeán níos fearr a sholáthar ó thús deireadh shaol an duine. Tá sé i bhfabhar aistriú paraidíme sochaíche ar luach an chúraim agus ar a sholáthar san Aontas, ar bhonn a shásódh na gnéithe cultúrtha difriúla agus na difríochtaí náisiúnta.

3.2Tá sé beartaithe leis an Straitéis an díospóireacht Eorpach ar an gcúram a aistriú i dtreo samhail chúraim inbhuanaithe atá bunaithe ar chearta an duine lena gcothaítear comhionannas inscne sa chúram foirmiúil agus neamhfhoirmiúil agus lena ráthaítear dínit an duine, an mhaireachtáil neamhspleách agus an cuimsiú sa phobal. Rinneadh athléimneacht agus leordhóthanacht na gcóras cúraim ar fud an Aontais a thástáil le linn phaindéim COVID-19, rud a ghéaraigh fadhbanna struchtúracha amhail tearc-chistiú agus tearclíon foirne.

3.3Is éard a theastaíonn ó straitéis éifeachtach ná cur chuige claochlaitheach uaillmhianach, ceann lena gcuirtear ina chroílár cearta bunúsacha agus riachtanais bhunúsacha na ndaoine dá ndéantar cúram agus na soláthraithe cúraim, ceann lena n-áirítear rannpháirtíocht iomlán fhóinteach a bheith acu i gcomhairliúcháin agus i gcinntí.

3.4Cuireann CESE i bhfáth gur cheart bearta coisctheacha, slánaithe agus athshlánaithe a bheith ina gcuid lárnach de chur chun feidhme na Straitéise. Ba cheart gníomhaíochtaí a dhíriú níos mó agus níos mó ar an luath-idirghabháil, ar an aosú folláin gníomhach, ar bhearta coisctheacha agus ar thacaíocht don neamhspleáchas lenar féidir an gá le dul i muinín an chúraim fhadtéarmaigh a íoslaghdú, agus an cuimsiú sa tsochaí agus an tsaoránacht ghníomhach a mhéadú, go háirithe trí Straitéis Eorpach chuimsitheach i leith Daoine Scothaosta a chruthú.

3.5Ag meabhrú dó an taithí a fuarthas le linn na ngéarchéimeanna airgeadais agus eacnamaíocha a tharla le déanaí, tá béim á cur ag CESE ar an ngá atá le tús áite a thabhairt d’inacmhainneacht agus do leanúnachas na seirbhísí cúraim mar fhreagairt ar na suaití atá ann faoi láthair a bhaineann leis an gcogadh san Úcráin, leis an bhfuinneamh agus leis na géarchéimeanna costais maireachtála.

3.6Is díol sásaimh do CESE príomhshruthú an chomhionannais inscne a dhéantar ar fud na Straitéise. Is iad na mná is mó a bhíonn ag obair in earnáil an chúraim, idir an cúram foirmiúil agus an cúram neamhfhoirmiúil. San Aontas Eorpach, deir 29 % de mhná gurb é an phríomhchúis nach bhfuil siad gníomhach i margadh an tsaothair nó go bhfuil siad ag obair go páirtaimseartha ná dualgais chúraim atá orthu, i gcomparáid le 6 % d’fhir 11 . Meastar go n‑íoctar EUR 242 bhilliún in aghaidh na bliana as dáileadh neamhchothrom na bhfreagrachtaí cúraim sin 12 . Is treoirlínte úsáideacha iad na moltaí do na Ballstáit chun dul i ngleic le steiréitíopaí inscne agus le bearnaí pá, pinsin agus cúraim idir na hinscní.

3.7Cuireann CESE i bhfáth a thábhachtaí atá an cúram teaghlaigh agus an cúram neamhfhoirmiúil mar ghné de chórais chúraim inbhuanaithe agus tá sé ag iarraidh go ndéanfaí riachtanais agus fírinne an chineáil sin cúraim a mhapáil go pras. Is gá aitheantas a thabhairt dóibh mar chomhpháirtithe chun leanúnachas sa chúram a áirithiú agus chun tacaíocht chuimsitheach a chur ar fáil dóibh, amhail deiseanna oiliúna le scéimeanna bailíochtaithe scileanna, agus a áirithiú go mbeidh siad rannpháirteach i margadh an tsaothair agus sa saol sóisialta trí mheascán d’acmhainní, seirbhísí agus socrú ama (a nasctar leis an Treoir maidir le Cothromaíocht Oibre is Saoil) agus rochtain ar chearta sóisialta, ar an gcúram faoisimh agus ar sheirbhísí meabhairshláinte a áirithiú ag an am céanna 13 .

3.8Is díol sásaimh do CESE go ndírítear ar chearta na n‑oibrithe cúraim a chosaint ar bhealach níos fearr. Iarrann CESE ar na Ballstáit aghaidh a thabhairt ar bhearnaí i bhforfheidhmiú dhlí saothair an Aontais, agus daingniú a dhéanamh ar Choinbhinsiún 189 EIS lena gcuirtear caighdeáin ar fáil maidir le dálaí oibre cuibhiúla d’oibrithe tí, agus lena ndéantar bearta chun staid na gcúramóirí a bhfuil cónaí orthu in aontíos le daoine dá ndéantar cúram 14 a rialáil, lena n‑áirítear oibrithe imirceacha agus oibrithe taistil. Mar sin féin, tugann sé dá aire nach leor an aird a thugtar sa Straitéis ar an iliomad oibrithe gan doiciméid a chuireann cúram ar fáil san Eoraip cheana féin, agus gur cheart díriú ar na hoibrithe cúraim uile atá ina gcónaí san Aontas – beag beann ar a stádas imirce ná cónaithe.

3.9Molann CESE an tiomantas chun feabhas a chur ar dhálaí oibre in earnáil an chúraim trí uas‑sciliú, athsciliú, agus bailíochtú scileanna a chur ar fáil, pá a mhéadú, cearta sóisialta agus saothair a chur chun cinn, aird a thabhairt ar rioscaí sláinte fisiciúla agus síceasóisialta agus aghaidh a thabhairt ar bhaol an fhoréigin agus an chiaptha ar an láthair oibre. Iarrann sé ar na Ballstáit Coinbhinsiún 190 EIS maidir le foréigean agus ciapadh a dhíothú i saol na hoibre a dhaingniú. Ní mór do na comhpháirtithe sóisialta agus do na rialtais oibriú le chéile chun deireadh a chur le cineálacha fíoréiginnte oibre cúraim agus chun creataí láidre rialála, airgeadais agus cómhargála a thógáil. Mar gheall ar ghanntanas pearsanra cáilithe i mbeagnach gach Ballstát, cuirtear caighdeáin sláinte agus chúraim i mbaol, go háirithe i bhfianaise an athraithe dhéimeagrafaigh, shoghluaisteacht na n-oibrithe agus an aosaithe.

4.Barúlacha sonracha

4.1Athdhearbhaíonn CESE a phráinní atá sé Ráthaíocht Eorpach thiomnaithe um Chúram 15 a leagan amach, mar ghné riachtanach chun an Straitéis a chur chun feidhme go rathúil, a bheidh bunaithe ar mheascán d’uirlisí beartais, cleachtais agus cistiúcháin chun a áirithiú go mbeidh gníomhaíochtaí na Straitéise leabaithe go hiomlán i gcreataí náisiúnta dlíthiúla, beartais, cistiúcháin agus seirbhíse. Tá sé ríthábhachtach caighdeáin a leagan síos chun feabhsú san earnáil a áirithiú, chomh maith le faireachán a dhéanamh orthu 16 .

4.2Ba cheart plean cur chun feidhme struchtúrtha Eorpach agus scéimeanna cistiúcháin Eorpacha a chur leis an Straitéis Eorpach um Chúram. Ní leor an infheistíocht phoiblí a dhéantar sa chúram sláinte i roinnt mhaith Ballstát. Ní mór úsáid a bhaint as cistí struchtúracha agus infheistíochta an Aontais (CSE+, CFRE) agus as an tSaoráid Téarnaimh agus Athléimneachta agus as an Ionstraim um Thacaíocht Theicniúil (TSI) chun tacú leis na Ballstáit i réimsí sonracha a bhaineann leis an gcúram (ó dhearadh beartas go cur chun feidhme seirbhísí agus faireachán tionchair) go háirithe trí sholáthar poiblí atá freagrach ón taobh sóisialta de.

4.3Beidh sé ríthábhachtach meastóireacht a dhéanamh ar dhul chun cinn agus ar an tionchar orthu siúd dá ndéantar cúram agus ar sholáthraithe an chúraim. Trí threoirlínte teicniúla sonracha maidir le creataí faireacháin agus meastóireachta a thógáil, d’fhéadfaí tacú le haireachtaí náisiúnta trí threoir shonrach a thabhairt maidir le samhlacha seirbhísí cúraim inbhuanaithe a fhorbairt, agus maidir le tomhas tionchair agus táscairí. Mar chuid d’fhaireachán an Choimisiúin Eorpaigh, ba cheart tuarascálacha a dhéanamh ar bheartais agus ar chistiúchán araon agus gairm a dhéanamh ar athbhreithniú meántéarma ar na Moltaí. Ní mór don Seimeastar Eorpach a mholtaí tírshonracha a dhíriú ar bhealach níos fearr chun cabhrú leis na Ballstáit tosaíocht a thabhairt do chistiú leordhóthanach don chúram mar infheistíocht tháirgiúil inbhuanaithe seachas mar ualach eacnamaíoch.

4.4Tar éis an dá Mholadh ón gComhairle a ghlacadh, ba cheart bearta agus treoirlínte a leabú go pras i gcreataí beartais agus dlíthiúla náisiúnta. Cuireann CESE i bhfáth a thábhachtaí atá comhordaitheoirí náisiúnta an chúraim fhadtéarmaigh chun comhleanúnachas a áirithiú agus chun cúram a phríomhshruthú i réimsí, in aireachtaí agus i leibhéil rialachais eile, a théann níos faide ná na beartais shóisialta agus sláinte (tithíocht, iompar, fuinneamh, geilleagar, etc.).

4.5Is féidir go ndéanfar níos measa neamhionannais i dtaca le rochtain ar chúram de dheasca roghnú rioscaí neamh‑inmhianaithe, tráchtálú agus tús áite a thabhairt don ioncam agus don bhrabús ar an gcúram agus an tsláinte. Tá gá le bearta rialaithe comhréireacha chun cleachtais mhífholláine a chosc agus chun ráthaíochtaí láidre maidir le seirbhísí ar ardchaighdeán agus úsáid chuí na gcistí a chinntiú. Ó thaobh an chúraim fhadtéarmaigh agus oideachas agus chúram na luath-óige de, tá gá ar leibhéal na mBallstát le córais láidre cosanta sóisialta agus seirbhísí poiblí ar ardchaighdeán atá bunaithe ar an dlúthpháirtíocht, ar an infheistíocht shóisialta agus ar ghníomhaithe an gheilleagair shóisialta – e.g. cumainn fhrithpháirteacha – chun cineálacha éagsúla maoinithe agus comhroinnte costas a chur ar fáil don chúram pobalbhunaithe agus don chúram sa bhaile arna dhéanamh ag cúramóirí atá oilte go cuí 17 . Chun na forálacha a chistiú, ba cheart roghanna malartacha ar ranníocaíochtaí sóisialta a bheartú 18 . Ní mór cuimhneamh ar thacaíocht dheonach ó eagraíochtaí neamhbhrabúsacha a théann chun tairbhe na gcóras cúraim agus sláinte araon a chur san áireamh, ach ní mar bheart costchiorraithe.

4.6I dtaca leis na hinniúlachtaí náisiúnta agus an choimhdeacht, ba cheart don Choimisiún Eorpach a áirithiú gur seirbhísí cuimsitheacha a bheidh sna seirbhísí cúraim ardcháilíochta a fhorbraíonn na Ballstáit. Ní mór don Straitéis a chinntiú go mbeidh rochtain iomlán chomhionann ar na seirbhísí ag gach duine a bhfuil cúram de dhíth orthu, go háirithe trí chreataí cáilíochta láidre ceangailteacha. Ba cheart aird ar leith a thabhairt ar ghrúpaí a eisiatar de ghnáth amhail Romaigh, imircigh, etc. agus ar an éifeacht a bhíonn ag idirdhealú trasnach agus ag idirdhealú struchtúrach. Ciallaíonn sé sin freisin go mbeidh rochtain ar bhonneagar cúraim i gceantair iargúlta agus i gceantair daonra ísealdlúis.

4.7Trí infheistiú i mbonneagar digiteach, is féidir pleanáil agus soláthar éifeachtach cúraim a éascú, faisnéis a stóráil, a mhalartú agus a chur in iúl idir soláthraithe éagsúla sláinte agus cúraim shóisialta, rud a fhágann gur féidir faireachán éifeachtach a dhéanamh ar cháilíocht agus ar rochtain chomhionann. Is féidir le deiseanna iomadúla, amhail teicneolaíochtaí cúnta, bearta coisctheacha, an róbataic, an teileashláinte agus eile, má tá siad go hiomlán cuimsitheach agus inrochtana, tacú le for-rochtain, leanúnachas, comhordú agus ardchaighdeán seirbhísí cúraim.

4.8Tugtar faoi deara sa Mholadh maidir leis an gcúram fadtéarmach atá beartaithe nach mór do chórais freastal ar riachtanais tacaíochta daoine faoi mhíchumas, agus tagairt shoiléir á déanamh ag an am céanna do Choinbhinsiún na Náisiún Aontaithe ar Chearta Daoine faoi Mhíchumas. Ba cheart don Choimisiún a áirithiú go n‑urramóidh cistí an Aontais a shlógtar faoin Straitéis cuspóir an dí‑institiúidithe agus go dtacófar leis an gcuimsiú trí sheirbhísí pobalbhunaithe a fhorbairt le lucht saothair dea‑oilte 19 . Athdhearbhaíonn CESE an gá atá le tacaíocht a thabhairt do leanaí agus do thuismitheoirí faoi mhíchumas 20 agus is díol sásaimh dó an bhéim a leagtar ar an méid sin sa mholadh maidir le hoideachas agus cúram na luath-óige.

5.An Moladh maidir le hOideachas agus Cúram na Luath-óige a chur chun feidhme

5.1Tacaíonn CESE leis an athbhreithniú ar spriocanna Barcelona chun infhaighteacht cúraim leanaí inrochtana, inacmhainne, chuimsithigh agus ardcháilíochta a fheabhsú. Ba cheart do na Ballstáit a bhfuil na spriocanna bainte amach acu nó a sháraigh iad díriú níos mó ar chaighdeáin cháilíochta a sholáthar agus ar chineálacha éagsúla oideachais agus cúraim luath‑óige a fhorbairt de réir na n-aoisghrúpaí éagsúla. Ní mór spriocanna maidir le hinfhaighteacht oideachas agus chúram na luath‑óige a mhéadú a bheith fite fuaite le creataí dearbhaithe cáilíochta agus dálaí oibre cuibhiúla. Ba cheart do na Ballstáit oibriú ar tháscairí chun faireachán a dhéanamh ar an rochtain ar shamhlacha cúraim de réir roghanna agus difríochtaí náisiúnta, agus cuspóirí, cáilíocht agus caighdeáin eile na spriocanna athbhreithnithe á gcomhlíonadh ag an am céanna.

5.2Is díol sásaimh do CESE an iarraidh go n‑áiritheofar go mbeidh teidlíocht dhlíthiúil ag gach leanbh ar rochtain a fháil ar sheirbhísí ardcháilíochta. Is díol sásaimh dó freisin an nasc atá ag an straitéis leis an Ráthaíocht Eorpach do Leanaí agus go bhfuil cur chuige ilghlúine na ráthaíochta sin á chur chun cinn sa straitéis, ar cur chuige é atá ríthábhachtach chun cothromaíocht oibre is saoil agus folláine teaghlaigh a bhaint amach. Ní mór cur le rochtain saor in aisce ar oideachas agus cúram na luath‑óige do theaghlaigh atá i ngátar trí bhearta éagsúla a dhéanamh, lena n‑áirítear béilí saor in aisce, táirgí sláinteachais saor in aisce (e.g. clúidíní leanaí) agus cúnamh le haghaidh forbairt fhisiciúil agus mheabhrach (scileanna mínluaileacha, teiripe urlabhra agus teanga, etc.).

5.3Is díol sásaimh do CESE tagairtí do chreataí comhionannais an Aontais agus do leanaí atá i gcúinsí leochaileacha, chun córais chuimsitheacha a chruthú lena n‑urramaítear gach cineál teaghlaigh. Ba cheart go n-áireofaí ar na gníomhaíochtaí atá le cur i bhfeidhm for-rochtain, oiliúint don fhoireann maidir le cearta úsáideoirí seirbhíse agus maidir le cuimsiú agus claontacht. Is díol sásaimh do CESE go háirithe na tograí maidir le cóimheas leordhóthanach leanaí/foirne a áirithiú, oiliúint ghairmiúil leanúnach na foirne, agus ceanglais ama a chur san áireamh sna táscairí, rud atá ábhartha go háirithe do leanaí faoi mhíchumas nach féidir leo rochtain a fháil ach go páirteach ar oideachas agus cúram na luath‑óige.

5.4Ní mór múnlaí dea-chleachtais oideachas agus chúram na luath‑óige a bheith i gcroílár na mbeart chun an moladh ón gComhairle a chur chun feidhme, le tacaíocht ó bheartais fhonáisiúnta agus ó chreataí cistiúcháin, trí bhuiséid shonracha a leithdháileadh chun riachtanais na ndaoine dá ndéantar cúram agus riachtanais na soláthraithe cúraim a mhapáil, agus trí chineálacha nua seirbhísí cúraim a thástáil. Ba cheart cearta na leanaí a choinneáil i lár an scéil i gcónaí. Teastaíonn timpeallacht shláintiúil chothaitheach ó leanaí i luathbhlianta an linbh, cibé acu trí chúram teaghlaigh nó trí chúram gairmiúil; dá bhrí sin, ní mór samhlacha cúraim éagsúla (ionaid lae, naíolanna san ionad oibre, feighlithe leanaí, cúntóirí máthartha, grúpaí súgartha, cúram lasmuigh den scoil) a bheith ar fáil chun rogha a thabhairt, agus riachtanais forbartha leanaí d’aoiseanna éagsúla á gcur san áireamh.

6.An Moladh maidir leis an gCúram Fadtéarmach a chur chun feidhme

6.1Tá CESE ag iarraidh go mbeadh pleananna láidre cur chun feidhme ann lena gcumhdófaí raon iomlán an chúraim fhadtéarmaigh. Ba cheart don Choimisiún Eorpach an comhar a chur ar bhonn foirmiúil trí Shainghrúpa Ardleibhéil um an gCúram Fadtéarmach a bhunú, lena dtabharfar le chéile comhpháirtithe sóisialta, eagraíochtaí sochaí sibhialta, comhordaitheoirí náisiúnta, tairbhithe an chúraim fhadtéarmaigh, go háirithe daoine scothaosta agus daoine faoi mhíchumas agus saineolaithe agus cleachtóirí ábhartha eile. Chun bonn eolais a chur faoi obair an ghrúpa, d’fhéadfaí ardán poiblí ar líne a chruthú chun sonraí agus taighde a bhailiú agus chun comhroinnt dea-chleachtais a chothú.

6.2Tá roinnt tuairimí maidir le soláthar an chúraim fhadtéarmaigh san Aontas 21 glactha ag CESE, inar cuireadh i bhfáth an gá atá le hinfheistíocht a dhéanamh i gcúram ardchaighdeáin inbhuanaithe inrochtana do chách. Tá béim á cur ag CESE ar an ngá atá leis an gcomhlántacht agus an tsineirgíocht a uasmhéadú idir na soláthraithe cúraim agus sláinte uile san earnáil phoiblí agus san earnáil phríobháideach araon (brabúsach agus neamhbhrabúsach) chun cumhdach a bhaint amach do chách, agus dea-chleachtais sna Ballstáit á gcur san áireamh.

6.3Is díol sásaimh do CESE go n-aithnítear sa togra maidir le cúram fadtéarmach a thábhachtaí atá gníomhaithe an gheilleagair shóisialta mar sholáthraithe seirbhíse. Molann CESE don Choimisiún féachaint tuilleadh ar bhealaí chun línte struchtúrtha cumarsáide a chruthú idir gníomhaithe an gheilleagair shóisialta agus na hinstitiúidí Eorpacha i spás beartais an chúraim fhadtéarmaigh.

6.4Tugann CESE dá aire a thábhachtaí atá na tionscnaimh éagsúla faoin aistriú glas agus digiteach chun leas a bhaint as acmhainneacht iomlán na dteicneolaíochtaí chun an stoc tithíochta a chruthú, agus athmhachnamh agus athchóiriú a dhéanamh air ar bhealach níos cuimsithí agus níos inbhuanaithe.

6.5Is féidir tacaíocht bhaile níos struchtúrtha agus níos éifeachtúla a chur san áireamh i múnlaí dea-chleachtais maidir leis an gcúram fadtéarmach, chomh maith le roghanna tithíochta nua, amhail tithíocht dhídeanach, mhaoirsithe nó phobalbhunaithe, aonaid chomhchónaithe nó roghanna eile, de réir riachtanais agus roghanna na ndaoine dá ndéantar cúram, agus bunaithe ar chreataí cáilíochta atá formheasta go dlíthiúil. Ba cheart cuimhneamh ar chineálacha eile samhlacha cúraim freisin chun speictream iomlán an chúraim a chumhdach i gcur chuige comhtháite, amhail tacaíocht mheabhairshláinte, ionaid teaghlaigh, grúpaí tacaíochta do thuismitheoirí agus tacaíocht tithíochta ghearrthéarmach ar bhealach lena n‑éascaítear an t‑aistriú ó shamhail amháin go samhail eile agus éagsúlacht i ndéine nó i gcineál na seirbhísí is gá, gan cur isteach ar leanúnachas an chúraim.

An Bhruiséil, 24 Eanáir 2023

Christa Schweng

Uachtarán Choiste Eacnamaíoch agus Sóisialta na hEorpa

_____________

(1)    Tuairim ó CESE Seirbhísí leasa ghinearálta a chomhchruthú mar rannchuidiú le daonlathas níos rannpháirtí san Aontas Eorpach, IO C 486, 21.12.2022, lch. 76 .

(2)    Straitéis Eorpach maidir le Cearta Daoine faoi Mhíchumas 2021-2030, an Ráthaíocht Eorpach do Leanaí, Straitéis an Aontais maidir le Cearta an Linbh, an Treoir maidir le Cothromaíocht Oibre is Saoil, an Straitéis um Chomhionannas Inscne agus tionscnaimh ábhartha eile faoi Cholún Eorpach na gCeart Sóisialta.

(3)    Gender inequalities in care and pay in the EU: https://eige.europa.eu/publications/gender-inequalities-care-and-pay-eu

(4)    Innéacs Comhionannais Inscne: https://eige.europa.eu/gender-equality-index/2022

(5)    What if care work were recognised as a driver of sustainable growth?: https://epthinktank.eu/2022/09/07/what-if-care-work-were-recognised-as-a-driver-of-sustainable-growth/

(6)    Study on exploring the incidence and costs of informal long-term care: https://ec.europa.eu/social/main.jsp?catId=738&langId=ga&pubId=8423&furtherPubs=no

(7)    Cúram fadtéarmach 2021 san Aontas: https://ec.europa.eu/social/main.jsp?catId=738&langId=ga&pubId=8396

(8)    Long-term care workforce: Employment and working conditions: https://www.eurofound.europa.eu/nb/publications/customised-report/2020/long-term-care-workforce-employment-and-working-conditions

(9)    Tuairim ó CESE Lucht Saothair na Sláinte agus Straitéis Chúraim do Thodhchaí na hEorpa, IO C 486, 21.12.2022, lch. 37 .

(10)    Rún ó Pharlaimint na hEorpa an 22 Meitheamh 2022: Tuarascáil i dtreo comhghníomhaíocht Eorpach ar chúram.

(11)    An Institiúid Eorpach um Chomhionannas Inscne (EIGE), idem.

(12)    Taighde de chuid Pharlaimint na hEorpa, idem.

(13)    An Chairt Eorpach um Chúramóirí Teaghlaigh: https://coface-eu.org/european-charter-for-family-carers/ (níl leagan Gaeilge ann).

(14)     IO C 487, 28.12.2016, lch. 7 .

(15)    Tuairim ó CESE Lucht Saothair na Sláinte agus Straitéis Chúraim do Thodhchaí na hEorpa, IO C 486, 21.12.2022, lch. 37 .

(16)    An Eagraíocht um Chomhar agus Forbairt Eacnamaíochta (ECFE), 2019, Improving healthcare quality in Europe – Characteristics, effectiveness and implementation of different strategies.

(17)    Tuairim ó CESE Tionchar na hInfheistíochta Sóisialta ar Fhostaíocht agus ar Bhuiséid Phoiblí, IO C 226, 16.7.2014, lch. 21 (níl leagan Gaeilge ann).

(18)    Event report: European Care systems: Solidarity and sustainability – friends or foes?: https://www.aim-mutual.org/mediaroom/event-report-european-care-systems-solidarity-and-sustainability-friends-or-foes/

(19)    An Sainghrúpa Eorpach maidir leis an aistriú ó chúram institiúideach go cúram pobalbhunaithe, EU Guidance on independent living and inclusion in the community agus EU funds checklist to promote independent living and deinstitutionalisation .

(20)    Tuairim ó CESE An ról atá ag baill teaghlaigh a thugann aire do dhaoine faoi mhíchumas agus do dhaoine scothaosta: an méadú ollmhór a tháinig ar an bhfeiniméan sin le linn na paindéime, IO C 75, 28.2.2023, lch. 75 .

(21)     IO C 129, 11.4.2018, lch. 44 ; IO C 487; 28.12.2016, lch. 7 ; IO C 204, 9.8.2008, lch. 103 ; Bróisiúr agus Tuairim CCMI/165 ó CESE Athruithe eacnamaíocha, teicneolaíochta agus sóisialta ar ardseirbhísí do dhaoine scothaosta (níl leagan Gaeilge ann); IO C 240, 16.7.2019, lch. 10 ; IO C 194, 12.5.2022, lch. 19 .