(1)

I gcomhréir le Treoir 2006/112/CE ón gComhairle (3), tá díolmhú ó cháin bhreisluacha (CBL) le tabhairt ag na Ballstáit ar an allmhairiú earraí ag an Aontas Eorpach, ag an gComhphobal Eorpach do Fhuinneamh Adamhach, ag an mBanc Ceannais Eorpach nó ag an mBanc Eorpach Infheistíochta nó ag na comhlachtaí arna mbunú ag an Aontas Eorpach agus a bhfuil feidhm ag an bPrótacal (Uimh. 7) ar phribhléidí agus díolúintí an Aontais Eorpaigh, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh (“an Prótacal”), maidir leo, laistigh de theorainneacha an Phrótacail agus de réir choinníollacha an Phrótacail agus na gcomhaontuithe chun é a chur chun feidhme nó de réir na gcomhaontuithe ceanncheathrún, a mhéid nach dtiocfaidh saobhadh ar an iomaíocht mar gheall air, agus tá díolmhú ó cháin bhreisluacha le tabhairt ag na Ballstáit ar an soláthar earraí nó seirbhísí do na hinstitiúidí nó na comhlachtaí sin. Tá an díolúine sin teoranta go docht do cheannacháin arna ndéanamh lena n-úsáid oifigiúil, áfach, agus níl feidhm aici maidir le cásanna ina gceannaíonn comhlachtaí an Aontais earraí agus seirbhísí mar fhreagairt ar an éigeandáil dar siocair paindéim COVID-19, go háirithe i gcás ina bhfuil siad le cur ar fáil in aisce do na Ballstáit nó do thríú páirtithe amhail údaráis náisiúnta nó institiúidí náisiúnta.

(2)

Dá bhrí sin, toisc go bhfuil géarghá fós ann le bearta a ghlacadh d’fhonn ullmhacht chun gníomhú a chruthú agus aghaidh á tabhairt ar an ngéarchéim shláintíoch leanúnach, ní mór a áirithiú go mbeidh díolúine CBL ann maidir le hearraí agus seirbhísí a bheith á gceannach ag an gCoimisiún nó ag gníomhaireacht nó comhlacht arna mbunú faoi dhlí an Aontais i bhfeidhmiú a gcúraimí, mar fhreagairt ar phaindéim COVID-19. D’áiritheofaí leis sin nach gcuirfí isteach ar bhearta arna ndéanamh faoi thionscnaimh éagsúla an Aontais sa chás sin ag méideanna CBL nach féidir le hinstitiúidí an Aontais a aisghabháil, ná ag an ualach comhlíonta a eascraíonn as oibleagáidí chun clárú le haghaidh CBL.

(3)

Ní leor Treoir (AE) 2020/2020 ón gComhairle (4) chun an cuspóir a bhaint amach maidir leis an gcomhrac i gcoinne phaindéim COVID-19 a fheabhsú, ós rud é nach gceadaítear, ar feadh tréimhse theoranta ama, do na Ballstáit ach rátaí laghdaithe a chur i bhfeidhm ar sholáthar feistí leighis diagnóiseacha in vitro COVID-19 agus seirbhísí a bhfuil dlúthbhaint acu le feistí den sórt sin nó le deonú díolúine maille le hin-asbhainteacht CBL a íocadh ag an gcéim roimhe sin i ndáil le soláthar vacsaíní COVID-19 agus feistí leighis diagnóiseacha in vitro, agus le seirbhísí a bhfuil dlúthbhaint acu leis na vacsaíní agus na feistí leighis sin.

(4)

Ba cheart, dá bhrí sin, Treoir 2006/112/CE a leasú dá réir.

(5)

I bhfianaise phaindéim reatha COVID-19, tá na bearta a d’fhéadfaí a chumhdach faoin díolúine nua chun aghaidh a thabhairt ar éifeachtaí phaindéim COVID-19 á ndéanamh cheana féin, mar shampla faoin Ionstraim Tacaíochta Éigeandála a bunaíodh le Rialachán (AE) 2020/521 ón gComhairle (5). Dá n-íocfaí CBL ar idirbhearta a bhaineann leis na bearta sin, chaillfí acmhainní luachmhara, rud a d’fhágfadh go gcuirfí níos lú earraí agus seirbhísí ar fáil do na Ballstáit le hais an mhéid cánach a bheadh le híoc. Chun an leas is fearr a bhaint as buiséad an Aontais chun aghaidh a thabhairt ar iarmhairtí tromchúiseacha phaindéim COVID-19, ba cheart feidhm chúlghabhálach a bheith ón 1 Eanáir 2021, dá bhrí sin, ag na díolúintí a thugtar isteach leis an Treoir seo. Tá cur i bhfeidhm cúlghabhálach den sórt sin fíor-riachtanach chun nach mbainfear a n-éifeacht de na bearta atá á ndéanamh chun aghaidh a thabhairt ar éifeachtaí phaindéim COVID-19. Aon choigeartú is gá i ndáil le hidirbhearta a ngearrtar cáin orthu i dtosach, d’fhéadfaí é a dhéanamh trí úsáid a bhaint as sásraí ceartúcháin atá i bhfeidhm cheana féin, mar shampla trí thuairisceán CBL ina dhiaidh sin.

(6)

I bhfianaise na práinne atá leis an staid a bhaineann le paindéim COVID-19, ba cheart an Treoir seo a theacht i bhfeidhm lá a fhoilsithe in Iris Oifigiúil an Aontais Eorpaigh,

(1)

I Rialachán (AE) 2019/1241 déantar foráil maidir le bearta teicniúla le haghaidh na Mara Thuaidh a bhunú.

(2)

Tá leas díreach bainistíochta maidir le hiascaigh sa Mhuir Thuaidh ag an mBeilg, ag an Danmhairg, ag an nGearmáin, ag an bhFrainc, ag an Ísiltír agus ag an tSualainn (Grúpa Scheveningen). An 15 agus an 19 Deireadh Fómhair 2020 chuir na Ballstáit sin dhá mholadh chomhpháirteacha isteach i gcomhréir le hAirteagal 18(1) de Rialachán (AE) Uimh. 1380/2013 ó Pharlaimint na hEorpa agus ón gComhairle (2) agus le hAirteagal 15(3) de Rialachán (AE) 2019/1241, lena moltar modhnuithe áirithe ar na forálacha atá ann faoi láthair maidir leis an mbosca leathóg agus an bosca salán sa Mhuir Thuaidh a leagtar amach in Iarscríbhinn V de Rialachán (AE) 2019/1241 trí bhíthin gníomh tarmligthe ón gCoimisiún. Chuir siad leagan nuashonraithe den mholadh comhpháirteach isteach maidir leis an mbosca salán an 2 Feabhra 2021. Sheol na Ballstáit sin an dá mholadh chomhpháirteacha chuig na comhairlí comhairleacha ábhartha le haghaidh comhairliúcháin.

(3)

Ós rud é go moltar athruithe ar Iarscríbhinn V de Rialachán (AE) 2019/1241, sa dá mholadh chomhpháirteacha, leis an Rialachán tarmligthe seo, déantar foráil maidir leis na bearta a mhol na Ballstáit a mhéid a bhaineann leis an mbosca salán agus an bosca leathóg araon.

(4)

Rinne an Coiste Eolaíoch, Teicniúil agus Eacnamaíoch um Iascach (STECF) measúnú ar an bhfianaise a chuir na Ballstáit ar fáil lena dtacaítear leis na forálacha a chumhdaítear sa dá mholadh chomhpháirteacha (3). Rinneadh meastóireacht ar na bearta atá beartaithe i gcomhréir leis na prionsabail a bhunaítear le hAirteagal 15(4) de Rialachán (AE) 2019/1241.

(5)

Sa mholadh comhpháirteach a chuir na Ballstáit isteach maidir leis an mbosca leathóg, moladh díolúine shonrach a thabhairt isteach le haghaidh soithí ar mó ná 221 kW a gcumhacht innill agus a úsáideann saighní Danmhargacha, ar choinníoll go gcomhlíonann siad na rialacha maidir leis na mogallmhéideanna a leagtar amach i bpointe 1.1 de Chuid B d’Iarscríbhinn V a ghabhann le Rialachán (AE) 2019/1241. Rinne STECF anailís ar an bhfianaise a thíolaic na Ballstáit agus tháinig sé ar an gconclúid, i bhfianaise líon teoranta na soithí lena mbaineann agus an tionchair theoranta atá ag an saighean Dhanmhargach ar an ngrinneall, ní mheastar go mbeadh éifeacht shuntasach ag tabhairt isteach na díolúine le haghaidh saighní Danmhargacha ar an leibhéal cosanta laistigh den limistéar. Ba cheart, dá bhrí sin, an beart atá beartaithe a áireamh sa Rialachán seo.

(6)

Sa mholadh comhpháirteach maidir leis an mbosca leathóg, moladh freisin an téarma “tráil dobharchú íochtair” a chur in ionad an téarma “tráil ghrinnill” i bpointe 2.2(c) de chuid C d’Iarscríbhinn V a ghabhann le Rialachán (AE) 2019/1241. Rinne STECF anailís ar an bhfianaise a thíolaic na Ballstáit agus tháinig sé ar an gconclúid gur dócha, leis an athrú atá beartaithe, go mbainfí aon débhríocht as an Rialachán agus go dtabharfaí leibhéil níos airde cosanta nó leibhéil chosanta atá coibhéiseach ar a laghad lena leagtar amach i Rialachán (AE) 2019/1241 faoi láthair. Ba cheart, dá bhrí sin, an beart atá beartaithe a áireamh sa Rialachán seo.

(7)

Sa mholadh comhpháirteach maidir leis an mbosca leathóg, moladh freisin fad iomlán na soithí nach mó ná 24 mhéadar i leith na dtrálaer bíoma atá le háireamh i liosta na soithí a leagtar amach i bpointe 2.4 de chuid C d’Iarscríbhinn V a ghabhann le Rialachán (AE) 2019/1241, tar éis theacht i bhfeidhm an Rialacháin sin. Rinne STECF anailís ar an bhfianaise a thíolaic na Ballstáit agus tháinig sé ar an gconclúid go n-áireofaí leis an srian sin leibhéil chosanta atá coibhéiseach ar a laghad lena leagtar amach i Rialachán (AE) 2019/1241 faoi láthair. Ba cheart, dá bhrí sin, an beart atá beartaithe a áireamh sa Rialachán seo.

(8)

Leis an moladh comhpháirteach a chuir na Ballstáit isteach maidir leis an mbosca salán, moladh leanúint den chleachtas, ar feadh tréimhse 3 bliana, an bosca scadán a chur i leataobh le haghaidh soithí a úsáideann trealaimh áirithe ón 1 Iúil go dtí an 31 Deireadh Fómhair, dá bhforáiltear le Rialachán Tarmligthe (AE) Uimh. 1395/2014 ón gCoimisiún (4) le haghaidh na tréimhse go dtí an 31 Nollaig 2020. Rinne STECF anailís ar an bhfianaise a thíolaic na Ballstáit maidir leis an mbosca salán agus tháinig sé ar an gconclúid nach léirítear go soiléir go ndearnadh aon dochar do stoc na scadán le cur i leataobh an bhosca salán ó bhí 2017 ann. Ina theannta sin, tháinig STECF ar an gconclúid nach dócha go mbeadh leibhéil níos ísle cosanta ann ná mar atá ann faoi láthair de bharr an bhosca salán a chur i leataobh. Thug STECF faoi deara, áfach, go bhfuil gá le blianta breise d’fhaireachán iascaigh chun a chruthú go gcoinneofaí leibhéil choibhéiseacha chosanta ar bun. Dá bhrí sin, mhol STECF athmheasúnú a dhéanamh ar thionchar an chur i leataobh tar éis faireachán a dhéanamh ar feadh 3 bliana. Thug na Ballstáit gealltanas maidir le faireachán a dhéanamh ar thionchar chur i leataobh an bhosca salán le linn na tréimhse sin trí na sonraí a bhailiú a leagtar amach ina moladh comhpháirteach a mhéid a bhaineann le foghabhálacha scadáin san iascaigh le haghaidh salán. Cuirfear na sonraí sin isteach lena measúnú ag STECF. Ba cheart, dá bhrí sin, an beart atá beartaithe a áireamh sa Rialachán seo.

(9)

Dá bhrí sin, ba cheart Rialachán (AE) 2019/1241 a leasú dá réir.

(10)

Ós rud é go bhfuil tionchar díreach ag na bearta dá bhforáiltear sa Rialachán seo ar phleanáil an tséasúir iascaireachta maidir le soithí an Aontais agus ar na gníomhaíochtaí eacnamaíocha a bhaineann leo, ba cheart don Rialachán seo teacht i bhfeidhm láithreach tar éis a fhoilsithe,