Treoir d'iarrthóirí i nósanna imeachta roghnúcháin a eagraíonn Parlaimint na hEorpa

1.

RÉAMHRÁ

Cén leagan amach a bhíonn ar nós imeachta roghnúcháin?

2.	NA CÉIMEANNA SA NÓS IMEACHTA ROGHNÚCHÁIN

Glacadh le comhaid iarratais

Scrúdú an gcomhlíontar na coinníollacha ginearálta

Scrúdú an gcomhlíontar na coinníollacha sonracha

Cáilíochtaí a mheasúnú

Trialacha

Liosta d'iarrthóirí oiriúnacha

3.	CONAS IARRATAS A DHÉANAMH?

Faisnéis ghinearálta

Conas comhad iarratais comhlánaithe a chur isteach?

Cad iad na doiciméid tacaíochta nach mór a iniamh leis an gcomhad iarratais?

Faisnéis ghinearálta

Doiciméid tacaíochta a chruthaíonn go bhfuil na coinníollacha ginearálta á gcomhlíonadh

Doiciméid tacaíochta a chruthaíonn go bhfuil na coinníollacha sonracha á gcomhlíonadh agus le haghaidh cáilíochtaí a mheasúnú

4.

CUMARSÁID

5.	FAISNÉIS GHINEARÁLTA

Comhionannas deiseanna

Iarrataí ó iarrthóirí ar fhaisnéis a bhaineann leo a rochtain

Cosaint sonraí pearsanta

Speansais taistil agus cothaithe

IARSCRÍBHINN I

IARSCRÍBHINN II

1.   RÉAMHRÁ

Cén leagan amach a bhíonn ar nós imeachta roghnúcháin?

Sraith céimeanna atá sa nós imeachta roghnúcháin ina dtéann na hiarrthóirí in iomaíocht lena chéile; tá an nós imeachta ar oscailt do gach saoránach den Aontas Eorpach a chomhlíonann na critéir riachtanacha faoin spriocdháta atá socraithe chun na hiarratais a chur isteach, ar nós imeachta é a thugann deis chothrom do na hiarrthóirí go léir a scileanna a léiriú agus a thugann an deis roghnú a dhéanamh bunaithe ar thuillteanas, agus ag an am céanna prionsabal na córa comhionainne á urramú.

Déantar na hiarrthóirí a n-éiríonn leo sa nós imeachta roghnúcháin a chur ar an liosta d'iarrthóirí oiriúnacha as a roghnaíonn Parlaimint na hEorpa duine don phost a luaitear san fhógra earcaíochta.

I gcás gach nós imeachta roghnúcháin, déantar coiste roghnúcháin a cheapadh atá comhdhéanta de chomhaltaí atá ina n-ionadaithe ar an gCóras Riaracháin agus ar an gCoiste Foirne. Is ar mhodh rúin a dhéantar obair an choiste roghnúcháin agus cuirtear an obair sin i gcrích i gcomhréir le hIarscríbhinn III de Rialacháin Foirne Oifigigh an Aontais Eorpaigh.

Tá toirmeasc ar na hiarrthóirí aon teagmháil a dhéanamh, go díreach nó go hindíreach, leis an gcoiste roghnúcháin. Tá an ceart ar cosaint ag an údarás ceapacháin gach iarrthóir a sháraíonn an treoir sin a eisiamh as an gcomórtas.

Déanann an coiste roghnúcháin na coinníollacha don chomórtas, arna leagan síos san fhógra earcaíochta, a chur i bhfeidhm go diongbháilte le linn dóibh cinneadh a dhéanamh maidir le gach iarrathóir i dtaobh an nglacfaidh siad lena iarratas nó nach nglacfaidh. Má glacadh le hiarrthóir i gcomórtas nó i nós imeachta roghnúcháin roimhe seo, ní hionann sin agus a rá go bhfuil siad incháilithe go huathoibríoch don nós imeachta seo.

Chun go ndéanfar na hiarrthóirí is fearr a roghnú, déanfaidh an coiste roghnúcháin comparáid idir feidhmíocht na n-iarrthóirí chun breithniú a dhéanamh ar a gcumas na cúraimí a bhfuil tuairisc orthu san fhógra a chomhall. Dá bhrí sin, ní amháin go bhfuil ar an gcoiste an leibhéal eolais a mheas ach ní foláir dó freisin na daoine is fearr atá cáilithe don phost a aithint, bunaithe ar thuillteanas na n-iarrthóirí.

Tabhair do d'aire, le do thoil, go dtógann sé idir sé agus naoi mí nós imeachta roghnúcháin a thabhairt chun críche, ag brath ar an líon iarrthóirí.

2.   NA CÉIMEANNA SA NÓS IMEACHTA ROGHNÚCHÁIN

Tá na céimeanna seo a leanas sa nós imeachta roghnúcháin:

—	glacadh le comhaid iarratais,

—	scrúdú an gcomhlíontar na coinníollacha ginearálta,

—	scrúdú an gcomhlíontar na coinníollacha sonracha,

—	measúnú ar cháilíochtaí na n-iarrthóirí (a nglacadh isteach chuig trialacha),

—	trialacha,

—	liosta d'iarrthóirí oiriúnacha.

Glacadh le comhaid iarratais

Ní foláir do na hiarrthóirí a shocraíonn iarratas a dhéanamh, comhad iarratais iomlán a chur isteach, ina mbeidh an fhoirm iarratais a ghabhann leis an bhfógra earcaíochta, í comhlánaithe agus sínithe, agus a mbeidh gach doiciméad tacaíochta a éilítear lena léirítear go gcomhlíontar na coinníollacha ginearálta agus na coinníollacha sonracha a leagtar amach san fhógra earcaíochta ag gabháil leis nó mura ndéanfaidh siad an méid sin déanfar iad a eisiamh as an nós imeachta. Ní foláir an comhad sin a sheoladh leis an bpost cláraithe faoin dáta atá leagtha síos san fhógra earcaíochta (measfar gurb ionann an comhad a sheoladh trí chuideachta phríobháideach chúiréireachta agus an comhad a sheoladh leis an bpost cláraithe. Sa chás go ndéantar an seoladh le cuideachta phríobháideach chúiréireachta, glacfar leis an dáta ar an bhfoirm seachadta mar dháta an tseolta). Féach Roinn C den fhógra earcaíochta, mar a bhfuil an seoladh agus an dáta deiridh chun iarratas a dhéanamh.

Scrúdú an gcomhlíontar na coinníollacha ginearálta

Scrúdóidh an tAonad um Chomórtais agus um Nósanna Imeachta Roghnúcháin an féidir glacadh leis na hiarratais, is é sin le rá, an ndearnadh na hiarratais a chur isteach ar an modh iomchuí agus faoin dáta deiridh, mar a shonraítear san fhógra earcaíochta iad, agus an gcomhlíonann na hiarrthóirí na coinníollacha ginearálta chun glacadh le hiarratais.

Dá réir sin, déanfar iarrthóirí a eisiamh más rud é :

—	go seoltar an comhad iarratais tar éis an dáta deiridh, arna fhianú ag an bpostmharc nó le foirm seachadta na cuideachta príobháidí cúiréireachta,

—	nach seoltar an comhad iarratais leis an bpost cláraithe ná le cuideachta phríobháideach chúiréireachta,

—	nach mbaintear leas as an bhfoirm iarratais a ghabhann leis an bhfógra earcaíochta agus/nó nach bhfuil an fhoirm iarratais sin comhlánaithe go cuí,

—	nach bhfuil an fhoirm iarratais sínithe,

—	nach gcomhlíontar na coinníollacha ginearálta chun glacadh le hiarratas.

Cuirtear in iúl go díreach do na hiarrthóirí má diúltaíodh dá n-iarratas agus déantar é sin tar éis an dáta deiridh chun iarratais a chur isteach.

Déanann an t-údarás ceapacháin liosta de na hiarrthóirí a chomhlíonann na coinníollacha ginearálta a shonraítear san fhógra earcaíochta a tharraingt suas agus cuireann sé an liosta sin ar aghaidh chuig an gcoiste roghnúcháin.

Scrúdú an gcomhlíontar na coinníollacha sonracha

Déanann an coiste roghnúcháin na comhaid iarratais a scrúdú agus tarraingíonn sé suas liosta de na hiarrthóirí a chomhlíonann na coinníollacha sonracha a leagtar amach san fhógra earcaíochta. Bunaíonn an coiste a chinntí go huile agus go hiomlán ar an bhfaisnéis atá tugtha sna foirmeacha iarratais agus a dtugann na doiciméid tacaíochta bonn cirt dóibh .

Ní foláir mionsonraí iomlána maidir le cúrsaí léinn, le hoiliúint, le heolas ar theangacha agus, i gcás inarb iomchuí, le taithí ghairmiúil a bheith tugtha san fhoirm iarratais, eadhon:

—	i gcás cúrsaí léinn: an dáta tosaigh agus an dáta críochnaithe do gach cúrsa, mar aon leis an gcineál dioplóma nó dioplómaí, lena n-áirítear na hábhair a ndearnadh staidéar orthu,

—	i gcás gur ann do thaithí ghairmiúil: an dáta tosaigh agus an dáta críochnaithe do gach tréimhse iomchuí agus tuairisc bheacht ar an gcineál cúraimí a bhí le comhall.

Maidir le hiarrthóirí a bhfuil saothair léinn, ailt nó téacsanna eile foilsithe acu, agus atá ábhartha don chineál cúraimí a bhaineann leis an bpost, ba cheart dóibh iad sin a lua san fhoirm iarratais.

Déantar na hiarrthóirí nach gcomhlíonann na coinníollacha sonracha a leagtar síos san fhógra earcaíochta a eisiamh ag an gcéim seo.

Cuirfear gach iarrthóir ar an eolas i litir i dtaobh chinneadh an choiste roghnúcháin i leith glacadh/nó gan glacadh lena iarratas sa nós imeachta.

Cáilíochtaí a mheasúnú

Chun na hiarrthóirí a nglacfar leo i gcomhair na dtrialacha a roghnú, déanann an coiste roghnúcháin cáilíochtaí na n-iarrthóirí a mbeidh glactha leo chuig an gcéim seo den nós imeachta a mheasúnú (léigh an mhír thíos). Bunaíonn an coiste a chinntí go huile agus go hiomlán ar an bhfaisnéis atá tugtha sna foirmeacha iarratais agus a dtugann na doiciméid tacaíochta bonn cirt dóibh (féach pointe 3 thíos). Bunaíonn an coiste roghnúcháin a chuid oibre ar na critéir a bhíonn socraithe roimh ré agus aird á tabhairt aige go háirithe ar na cáilíochtaí a shonraítear i Roinn B.2 den fhógra earcaíochta.

Cuirfear gach iarrthóir ar an eolas i litir i dtaobh chinneadh an choiste roghnúcháin i leith glacadh/nó gan glacadh leis ag céim na dtrialacha.

Trialacha

Tá na trialacha go léir éigeantach agus tá feidhm díbeartha ag roinnt leo. Tá an líon uasta d'iarrthóirí a nglacfar leo i gcomhair na dtrialacha leagtha síos i Roinn B.2 den fhógra earcaíochta.

Ar chúiseanna eagraíochtúla, d'fhéadfaí a iarraidh ar na hiarrthóirí na trialacha scríofa agus cainte uile a dhéanamh. Mar sin féin, déantar na trialacha sin a cheartú san ord ina bhfuil siad ar an bhfógra earcaíochta. Dá réir sin, mura mbaineann iarrthóir amach an marc íosta atá riachtanach i gceann de na trialacha a bhfuil feidhm díbeartha ag roinnt leo, ní mharcálann an coiste roghnúcháin na trialacha a leanann.

Más rud é nach ndéanann iarrthóir na trialacha go léir, ní mharcáiltear ceachtar acu.

Liosta d'iarrthóirí oiriúnacha

Ní dhéantar ach an líon uasta iarrthóirí, mar a leagtar síos i Roinn B.4 den fhógra earcaíochta, a chur ar an liosta d'iarrthóirí oiriúnacha.

Is ionann ainm iarrthóra a bheith ar an liosta d'iarrthóirí oiriúnacha agus go bhféadfaidh ceann de sheirbhísí na hinstitiúide cuireadh chun agallaimh a thabhairt don duine sin, ach ní hionann é sin agus ceart ná ráthaíocht go ndéanfaidh an institiúid é a earcú.

3.   CONAS IARRATAS A DHÉANAMH?

Faisnéis ghinearálta

Sula ndéanfaidh tú iarratas, ba cheart duit a sheiceáil go cúramach an gcomhlíonann tú na coinníollacha iontrála go léir, idir choinníollacha ginearálta agus choinníollacha sonracha, rud a chiallaíonn gur cheart duit ar dtús an fógra earcaíochta agus an treoir seo a léamh go cúramach agus aird chuí a thabhairt ar na coinníollacha a leagtar amach iontu.

Bíodh is nach bhfuil aon teorainn aoise leagtha síos sna fógraí earcaíochta, tugtar faoi deara go bhfuil an aois scoir don fhoireann leagtha síos i Rialacháin Foirne Oifigigh an Aontais Eorpaigh (http://ec.europa.eu/civil_service/docs/toc100_en.pdf).

Ní foláir do na hiarrthóirí úsáid a bhaint as an bhfoirm iarratais (an leagan bunaidh nó cóip de) atá ag gabháil leis an bhfógra earcaíochta agus atá foilsithe san Iris Oifigiúil seo ag Oifig Foilseachán an Aontais Eorpaigh.

Ní chuirfear san áireamh na doiciméid a sheoltar i ndiaidh an dáta deiridh chun iarratas a dhéanamh.

Maidir le hiarrthóirí faoi mhíchumas nó iarrthóirí atá i gcúinsí ar leith a d'fhágfadh go bhféadfadh deacrachtaí a bheith acu le linn na dtrialacha (m.sh. iad a bheith torrach nó leanbh acu atá fós á chothú ar an gcíoch, nó mar gheall go bhfuil fadhbanna sláinte acu nó go bhfuil siad faoi chóir dochtúra), ní foláir dóibh an méid sin a thabhairt le fios ar an bhfoirm iarratais agus aon fhaisnéis ábhartha a sholáthar ionas go mbeidh an córas riaracháin in ann, más féidir, bearta iomchuí a ghlacadh. Sa chás gurb amhlaidh an cás, ba cheart go leagfadh siad amach ina bhfoirm iarratais, ar bhileog ar leithligh, aon socruithe speisialta a mheasann siad a bheith riachtanach chun a rannpháirtíocht sna trialacha a éascú.

Conas comhad iarratais comhlánaithe a chur isteach?

1.	Comhlánaigh agus sínigh an fhoirm iarratais atá ag gabháil leis an bhfógra earcaíochta.

2.	Cuir faoi iamh liosta de na doiciméid tacaíochta go léir, á léiriú duit cad í an uimhir atá tugtha do gach ceann agat.

3.	Cuir faoi iamh na doiciméid tacaíochta riachtanacha go léir, agus bíodh siad uimhrithe ar dtús agat.

4.	Cuir isteach an comhad iarratais de réir an mhodha a shonraítear san fhógra earcaíochta agus faoin dáta deiridh atá leagtha síos san fhógra earcaíochta.

Cad iad na doiciméid tacaíochta nach mór a iniamh leis an gcomhad iarratais?

Faisnéis ghinearálta

Ná seol na leaganacha bunaidh de na doiciméid atá riachtanach, ba cheart gur fótachóipeanna nach bhfuil fíordheimhnithe a chuirfí faoi iamh. Ní fhéadfar tagairtí do láithreáin ghréasáin a mheas mar dhoiciméid tacaíochta chun na críche sin. Ní mheastar gur deimhniúcháin iad asphriontaí de leathanaigh as láithreán gréasáin, ach féadfar iad a chur faoi iamh mar fhaisnéis bhreise agus chuige sin amháin.

Tarraingítear aird na n-iarrthóirí ar an bhfíoras go mbeidh ar iarrthóirí a bheidh ar an liosta d'iarrthóirí oiriúnacha agus a ndéanfar post a thairiscint dóibh na leaganacha bunaidh de gach doiciméad riachtanach a thabhairt ar aird sula bhféadfar na hiarrthóirí sin a earcú.

Ní mheastar gur doiciméad tacaíochta atá in curriculum vitae.

Ní fhéadfaidh na hiarrthóirí tagairt a dhéanamh do dhoiciméid, d'fhoirmeacha iarratais ná do dhoiciméid eile a cuireadh isteach mar chuid d'iarratas a rinneadh roimhe sin (1).

Ní sheolfar aon cheann de na doiciméid atá sa chomhad ar ais chuig na hiarrthóirí.

Doiciméid tacaíochta a chruthaíonn go bhfuil na coinníollacha ginearálta á gcomhlíonadh

Ní iarrtar doiciméad ar bith ag an bpointe seo chun a chruthú:

—	gur náisiúnach de cheann amháin de Bhallstáit an Aontais Eorpaigh iad na hiarrthóirí,

—	go bhfuil a lánchearta mar shaoránach á dteachtadh ag na hiarrthóirí,

—	go bhfuil a ndualgais comhlíonta ag na hiarrthóirí i ndáil leis na hoibleagáidí míleata is infheidhme de réir dlí,

—	go bhfuil na teistiméireachtaí carachtair ag na hiarrthóirí is iomchuí do na cúraimí atá i gceist a chomhlíonadh.

Ní mór do na hiarrthóirí an fhoirm iarratais a shíniú. Is leis an síniú sin a dhearbhaíonn na hiarrthóirí ar a n-onóir go bhfuil na coinníollacha sin á gcomhlíonadh acu agus go bhfuil an fhaisnéis a thugann siad fíor agus iomlán.

Doiciméid tacaíochta a chruthaíonn go bhfuil na coinníollacha sonracha á gcomhlíonadh agus le haghaidh cáilíochtaí a mheasúnú

Tá ar na hiarrthóirí an fhaisnéis go léir agus na doiciméid uile a sholáthar don choiste roghnúcháin a chuirfidh ar chumas an choiste sin beachtas na faisnéise atá tugtha san fhoirm iarratais a fhíordheimhniú.

Dioplómaí agus/nó teastais lena ndeimhnítear gur bhain na hiarrthóirí cáilíocht amach i gcúrsa léinn

Ní foláir do na hiarrthóirí fótachóip a sholáthar de na dioplómaí nó teastais atá acu lena ndeimhnítear gur bhain siad cáilíocht amach i gcúrsa léinn ar an leibhéal a éilítear leis an bhfógra earcaíochta.

Tabharfaidh an coiste roghnúcháin aird ar chórais dhifriúla oideachais Bhallstáit an Aontais Eorpaigh.

Maidir le dioplómaí tríú leibhéal, ní foláir an fhaisnéis is mionsonraithe agus is féidir a chur ar fáil, go háirithe maidir leis na hábhair a ndearnadh staidéar orthu agus an tréimhse a mhair na cúrsaí, ionas go mbeidh ar chumas an choiste roghnúcháin a mheas cé chomh hábhartha do chúraimí an phoist atá na dioplómaí sin.

Maidir le hoiliúint theicniúil nó ghairmiúil, nó le cúrsaí breisoideachais nó speisialtóireachta, ní foláir do na hiarrthóirí a chur in iúl an cúrsaí lánaimseartha, cúrsaí páirtaimseartha nó ranganna oíche a bhí i gceist leo, agus na hábhair a rinneadh mar aon le fad oifigiúil na gcúrsaí a chur in iúl chomh maith.

Taithí ghairmiúil

Sa chás go n-éilítear taithí ghairmiúil san fhógra, ní chuirfear san áireamh ach amháin an taithí ghairmiúil a bheidh faighte ag an iarrthóir i ndiaidh dó an dioplóma nó an cháilíocht léinn is gá a bhaint amach. Ní foláir cruthúnas a bheith sna doiciméid tacaíochta de thréimhse agus leibhéal na taithí gairmiúla agus ní mór an cineál cúraimí a cuireadh i gcrích a thabhairt chomh mionsonraithe agus is féidir ionas go mbeidh ar chumas an choiste roghnúcháin a mheas cé chomh hábhartha do chúraimí an phoist atá an taithí ghairmiúil sin.

Ní foláir go mbeidh doiciméad tacaíochta ann le haghaidh gach tréimhse d'obair ghairmiúil lena mbaineann, mar shampla:

—	deimhniúcháin ó iarfhostóirí agus ón bhfostóir reatha lena ndeimhnítear an taithí ghairmiúil a éilítear chun cur isteach ar an nós imeachta roghnúcháin,

—	más rud é, ar chúiseanna rúndachta, nach féidir leis na hiarrthóirí na deimhniúcháin sin a chur faoi iamh, tá sé ríthábhachtach, go ndéantar fótachóip den chonradh oibre nó den litir earcaíochta agus/nó den chéad duillín pá agus den duillín pá deiridh a chur faoi iamh,

—

i gcás nach thar ceann fostóra a rinneadh an obair ghairmiúil (duine féinfhostaithe, duine a ghabhann le saorghairmeacha, etc.), glacfar mar chruthúnas le sonraisc nó le foirmeacha ordaithe ina dtugtar mionsonraí faoi na seirbhísí a soláthraíodh nó le haon doiciméad tacaíochta oifigiúil eile atá ábhartha.

Eolas ar theangacha

Ní foláir an t-eolas ar na teangacha a éilítear don phost a bheith deimhnithe le dioplóma, le teastas nó le dearbhú ar onóir an iarrthóra, é sin á chur ar fáil ar bhileog ar leithligh, lena mínítear an chaoi ar baineadh amach an t-eolas ar na teangacha i dtrácht.

Más rud é, ag céim ar bith den nós imeachta, go ndéantar a shuíomh go bhfuil an fhaisnéis a thugtar san fhoirm iarratais mícheart nó nach bhfuil an fhaisnéis sin ag luí leis na doiciméid a éilítear chun an fhoirm iarratais a mheas nó nach bhfuil na coinníollacha uile a leagtar amach san fhógra earcaíochta á gcomhlíonadh, déanfar an t-iarrthóir a eisiamh as an nós imeachta.

4.   CUMARSÁID

De bhua na bhfreagrachtaí atá ar na hiarrthóirí, iarrtar orthu a áirithiú go ndéantar an fhoirm iarratais (an leagan bunaidh nó cóip de), í comhlánaithe agus sínithe go cuí, mar aon leis na doiciméid tacaíochta, a sheoladh in am trátha leis an bpost cláraithe (2), arna fhianú ag an bpostmharc.

Is faoin iarrthóir atá sé litir, facs nó teachtaireacht ríomhphoist (3) a sheoladh chuig an Aonad um Chomórtais agus um Nósanna Imeachta Roghnúcháin más rud é, faoin dáta atá luaite sa mhír dheiridh den fhógra earcaíochta, nach mbeidh litir faighte aige tríd an ríomhphost maidir lena iarratas.

I ngach comhfhreagras a sheolann an t-iarrthóir maidir le foirm iarratais a cuireadh isteach, ní foláir go luafar an t-ainm a thugtar san fhoirm iarratais agus uimhir an nós imeachta roghnúcháin.

Déanfar an comhfhreagras go léir a sheolann Parlaimint na hEorpa maidir leis an nós imeachta roghnúcháin, lena n-áirítear cuireadh chuig trialacha, a sheoladh le ríomhphost chuig an seoladh a thugann an t-iarrthóir ar an bhfoirm iarratais. Is ar an iarrthóir atá an mhortabháil a chuntas ríomhphoist a sheiceáil (lena n-áirítear an fillteán turscair) go tráthrialta (faoi dhó sa tseachtain ar a laghad) agus aon athrú ar a chuid sonraí pearsanta a chur in iúl don Aonad um Chomórtais agus um Nósanna Imeachta Roghnúcháin.

Ba cheart gach cumarsáid a bhaineann leis an nós imeachta roghnúcháin a sheoladh mar theachtaireacht ríomhphoist chuig an mbosca poist feidhme: PE-170-S@ep.europa.eu

Sa chás nach bhfuil ar do chumas do chuntas ríomhphoist a sheiceáil, is ort féin atá an mhortabháil é sin a chur in iúl láithreach don Aonad um Chomórtais agus um Nósanna Imeachta Roghnúcháin agus seoladh ríomhphoist nua a sholáthar don Aonad.

Ar mhaithe leis an tsoiléireacht agus le hintuigtheacht, is i mBéarla, i bhFraincis nó i nGearmáinis, agus sna teangacha sin amháin, a bheidh gach téacs de chineál ginearálta, gach cumarsáid a dhírítear chuig na hiarrthóirí nó a fhaightear ó na hiarrthóirí, na cuirí chuig na trialacha éagsúla agus gach cumarsáid idir an tAonad um Chomórtais agus um Nósanna Imeachta Roghnúchán agus na hiarrthóirí. Ní dhéanfar aon mhalartú cumarsáide i bpríomhtheanga (teanga 1) an iarrthóra.

Chun a chinntiú go mbeidh an coiste roghnúcháin neamhspleách, tá toirmeasc ar na hiarrthóirí i gcúinse ar bith aon teagmháil a dhéanamh, go díreach nó go hindíreach, leis an gcoiste roghnúcháin agus má dhéanann siad é sin d'fhéadfaí iad a eisiamh as an nós imeachta roghnúcháin.

Ní foláir gur chuig an Aonad um Chomórtais agus um Nósanna Imeachta Roghnúcháin, ar a bhfuil an cúram déileáil le gach cumarsáid leis na hiarrthóirí nó go dtabharfar an nós imeachta roghnúcháin chun críche (3), a dhírítear gach comhfhreagras leis an gcoiste roghnúcháin agus aon iarraidh ar fhaisnéis nó aon chomhfhreagras eile a bhaineann leis an nós imeachta.

5.   FAISNÉIS GHINEARÁLTA

Comhionannas deiseanna

Glacann Parlaimint na hEorpa fíorchúram chun gach cineál d'idirdhealú a sheachaint le linn an nós imeachta roghnúcháin.

Is fostóir comhionannais deiseanna í agus glacann sí le hiarratais gan idirdhealú a dhéanamh ar fhorais ar bith amhail inscne, cine, dath, bunadh eitneach nó sóisialta, tréithe géiniteacha, teanga, reiligiún nó creideamh, tuairimí polaitiúla nó aon tuairim eile, a bheith i do dhuine de mhionlach náisiúnta, maoin, breith, míchumas, aois, gnéaschlaonadh, stádas pósta nó cibé an bhfuil clann ar an iarrthóir nó í a bheith ag iompar clainne.

Iarrataí ó iarrthóirí ar fhaisnéis a bhaineann leo a rochtain

Tá ceart sonrach ag na hiarrthóirí i nósanna imeachta roghnúcháin faisnéis áirithe a bhaineann leo go díreach agus go leithleach a rochtain, faoi réir na gcoinníollacha a dtugtar tuairisc anseo thíos orthu. De bhua an chirt sin, féadfaidh Parlaimint na hEorpa an fhaisnéis bhreise seo a leanas a sholáthar d'iarrthóir arna iarraidh sin dó:

(a)

Féadfaidh na hiarrthóirí sin nach bhfaigheann pas i dtrialacha scríofa agus/nó nach bhfuil i measc na n-iarrthóirí a dtugtar cuireadh chuig triail chainte dóibh, arna iarraidh sin dóibh, cóip a fháil de na páipéir a scríobh siad don triail mar aon le cóip den bhileog meastóireachta pearsanta ina bhfuil trácht an choiste roghnúcháin i dtaobh chomh maith agus a d'éirigh leo. Ní foláir an iarraidh ar chóipeanna a dhéanamh laistigh de mhí amháin ón dáta ar seoladh an litir ag tabhairt fógra don iarrthóir den chinneadh gur cuireadh deireadh lena rannpháirtíocht sa nós imeachta roghnúcháin.

(b)

Maidir leis na hiarrthóirí ar tugadh cuireadh chuig na trialacha cainte dóibh agus nach bhfuil a n-ainm ar an liosta d'iarrthóirí oiriúnacha, ní chuirfear torthaí na dtrialacha éagsúla in iúl dóibh go dtí go mbeidh an liosta d'iarrthóirí oiriúnacha tarraingthe suas ag an gcoiste roghnúcháin. Féadfaidh na hiarrthóirí sin freisin cóip dá dtrialacha scríofa a fháil ar an gcaoi chéanna a leagtar amach i bpointe (a).

(c)	Maidir leis na hiarrthóirí a bheidh ar an liosta d'iarrthóirí oiriúnacha, is é a ndéanfar a chur in iúl dóibh gur iarrthóirí iad ar éirigh leo sa nós imeachta roghnúcháin.

Déileálfar le hiarrataí i gcomhréir leis an gceanglas go ndéantar obair an choiste roghnúcháin ar mhodh rúin, amhail a leagtar síos sna Rialacháin Foirne (Airteagal 6 d'Iarscríbhinn III) agus i gcomhlíonadh na rialacha maidir le cosaint daoine aonair a mhéid a bhaineann le sonraí pearsanta a phróiseáil.

Cosaint sonraí pearsanta

Déanann Parlaimint na hEorpa, ina cáil mar an comhlacht atá freagrach as nósanna imeachta roghnúcháin a eagrú, a áirithiú go bpróiseáiltear sonraí pearsanta na n-iarrthóirí i ndlúthchomhlíonadh Rialachán (CE) Uimh. 45/2001 ó Pharlaimint na hEorpa agus ón gComhairle an 18 Nollaig 2000 maidir le daoine aonair a chosaint i ndáil le sonraí pearsanta a phróiseáil ag institiúidí agus ag comhlachtaí an Chomhphobail agus maidir le saorghluaiseacht na sonraí sin (4), go sonrach a mhéid a bhaineann le rúndacht agus slándáil na sonraí sin.

Speansais taistil agus cothaithe

Déanfar ranníocaíocht i dtreo speansais taistil agus cothaithe na n-iarrthóirí a dtabharfar cuireadh chuig trialacha dóibh. Déanfar mionsonraí faoin nós imeachta agus na rátaí is infheidhme a thabhairt sa litir lena dtugtar cuireadh don iarrthóir chuig na trialacha.

Glacfar leis gurb é an seoladh a thabharfaidh an t-iarrthóir san fhoirm iarratais an áit óna bhfágfaidh an t-iarrthóir le dul chuig an áit ina n-iarrfar air na trialacha a dhéanamh. Maidir leis sin, ní fhéadfar aird a thabhairt ar athrú ar an seoladh a chuirfidh an t-iarrthóir in iúl tar éis do Pharlaimint na hEorpa cuirí chuig trialacha a sheoladh, ach amháin sa chás go measann an Pharlaimint go bhfuil force majeure i gceist nó gur cás é atá go hiomlán eisceachtúil.

---

(1)  Tá feidhm ag na coinníollacha seo maidir leis na hiarrthóirí go léir, lena n-áirítear oifigigh agus seirbhísigh eile an Aontais Eorpaigh.

(2)  Measfar gurb ionann an comhad a sheoladh le seirbhís phríobháideach chúiréireachta agus é a sheoladh leis an bpost cláraithe. Sa chás sin, glactar leis an dáta ar an bhfoirm seachadta mar dháta an tseolta.

(3)  Seoladh: PARLEMENT EUROPÉEN, Unité concours — MON 04 S 010, Procédure de sélection PE/170/S, Rue Wiertz 60, 1047 Bruxelles/Brussel, BELGIQUE/BELGIË

Uimhir facs: +32 22831717. Seoladh ríomhphoist: PE-170-S@ep.europa.eu

(4)  IO L 8, 12.1.2001, lch. 1.