Cé sinn

Gníomhaireacht de chuid an Aontais Eorpaigh (AE) is ea Gníomhaireacht Drugaí an Aontais Eorpaigh (EUDA). Ó bhí 2 Iúil 2024 ann, tá EUDA ag teacht in ionad an Lárionaid Faireacháin Eorpaigh um Dhrugaí agus um Andúil i nDrugaí (‘EMCDDA’), a bunaíodh in 1993 le Rialachán (CEE) Uimh. 302/93 (1) ón gComhairle agus a athmhúnlaíodh in 2006 le Rialachán (CE) Uimh. 1920/2006 (2). Bunaíodh EUDA le Rialachán (AE) 2023/1322 (3) lena n-aisghairtear Rialachán Uimh. 1920/2006 (dá ngairtear Rialachán EUDA anseo feasta).

Aithnítear go forleathan gur mol bairr feabhais eolaíochta san Eoraip agus ar an leibhéal idirnáisiúnta í an Ghníomhaireacht a sholáthraíonn sonraí fíorasacha oibiachtúla iontaofa inchomparáide ar an leibhéal Eorpach maidir le drugaí, andúil i ndrugaí agus iarmhairtí na ndrugaí, agus a dhéanann faireachán rathúil ar bhagairtí agus ar threochtaí atá ag teacht chun cinn. Ó 2024 ar aghaidh, tá sainordú nua ag an nGníomhaireacht a chuireann ar a cumas cur leis an méid a bhain EMCDDA amach chun ról níos tábhachtaí a imirt i leith na dúshláin atá ann faoi láthair agus a bheidh ann amach anseo a bhaineann le drugaí aindleathacha san Aontas a shainaithint agus aghaidh a thabhairt orthu. Agus an sainordú nua aici, tá sé de chúram ar an nGníomhaireacht cur chuige réamhghníomhach a ghlacadh agus tá ról lárnach aici i leith na dúshláin atá ann faoi láthair agus a bheidh ann amach anseo a bhaineann le drugaí aindleathacha san Aontas a shainaithint agus aghaidh a thabhairt orthu. Tríd an méid sin a dhéanamh, cuireann an Ghníomhaireacht le hullmhacht an Aontais le freagra a thabhairt ar bhagairtí nua sláinte agus slándála. Tá ról idirnáisiúnta níos láidre ag an nGníomhaireacht freisin a mheid a chuireann sí le forbairt agus cur chun feidhme ghné sheachtrach bheartas drugaí an Aontais.

Is iad seo a leanas príomhchúraimí na Gníomhaireachta:

—

faisnéis fhíorasach oibiachtúil iontaofa inchomparáide a sholáthar don Aontas agus do na Ballstáit, chomh maith le luathrabhadh agus measúnú riosca ar leibhéal an Aontais maidir le drugaí, úsáid drugaí, neamhoird úsáide drugaí agus andúil i ndrugaí, cosc, cóireáil, cúram, laghdú riosca agus dochair, athshlánú, ath-imeascadh sóisialta, téarnamh, margaí agus soláthar drugaí, lena n-áirítear táirgeadh agus gáinneáil aindleathach, agus saincheisteanna ábhartha eile a bhaineann le drugaí agus a n-iarmhairtí; agus

—

gníomhaíochtaí iomchuí nithiúla atá fianaisebhunaithe a mholadh maidir le conas aghaidh a thabhairt, ar bhealach éifeachtúil tráthúil, ar na dúshláin a bhaineann le drugaí, úsáid drugaí, neamhoird úsáide drugaí agus andúil i ndrugaí, cosc, cóireáil, cúram, laghdú riosca agus dochair, athshlánú, ath-imeascadh sóisialta, téarnamh, margaí agus soláthar drugaí, lena n-áirítear táirgeadh agus gáinneáil aindleathach, agus saincheisteanna ábhartha eile a bhaineann le drugaí agus a n-iarmhairtí.

Tá cúraimí na Gníomhaireachta sonraithe in Airteagal 5 agus tá siad i gcomhréir le Rialachán EUDA.

Na tríú tíortha a bhfuil comhaontú tugtha i gcrích acu leis an Aontas Eorpach maidir lena rannpháirtíocht in obair na Gníomhaireachta (an Iorua agus an Tuirc faoi láthair), féadfaidh siad páirt a ghlacadh inti. Oibríonn an Ghníomhaireacht i gcomhar le heagraíochtaí agus comhlachtaí ábhartha, go háirithe comhlachtaí de chuid an Aontais, comhlachtaí rialtasacha agus neamhrialtasacha agus comhlachtaí teicniúla chomh maith le heagraíochtaí agus comhlachtaí idirnáisiúnta atá inniúil in ábhair atá cumhdaithe ag a sainordú.

Tá an Ghníomhaireacht suite i Liospóin, an Phortaingéil.

In 2024, fuair sí fóirdheontas EUR 32 131 775 ón Aontas (is é EUR 34 584 952 buiséad iomlán an Lárionaid, lena n-áirítear ranníocaíocht na hIorua agus na Tuirce agus Tionscadal Cistiúcháin bhreise eile de chuid an Aontais) agus tá thart ar 133 dhuine fostaithe inti.

Tá tuilleadh eolais faoin nGníomhaireacht le fáil ar an suíomh gréasáin: https://www.euda.europa.eu/index_en.

An tairiscint

Is éard atá á tairiscint againn Feidhm Stiúrthóir Feidhmiúcháin na Gníomhaireachta.

Beidh an Stiúrthóir Feidhmiúcháin i gceannas ar an nGníomhaireacht agus mar bhainisteoir uirthi, agus glacfaidh sé freagracht fhoriomlán as a cuid oibríochtaí lena chinntiú go mbainfear amach na cuspóirí atá aici. Déanfaidh sé fís nua-aimseartha thrédhearcach a mhúnlú, a chur chun cinn agus a chur chun feidhme don Ghníomhaireacht, iomlán i gcomhréir leis an mbun-Rialachán, le luachanna an Aontais agus le beartas drugaí an Aontais Eorpaigh.

Léireoidh an Stiúrthóir Feidhmiúcháin forbairtí beartais straitéiseacha an Aontais i ngníomhaíochtaí na Gníomhaireachta, i ndlúthchomhar leis an gCoimisiún. Déanfaidh sé clár oibre agus cláir ilbhliantúla na Gníomhaireachta, chomh maith le cinntí Bhord Bainistíochta na Gníomhaireachta, a ullmhú, a mholadh agus a chur chun feidhme. Déanfaidh sé measúnú agus tuairisciú ar chur chun feidhme ghníomhaíochtaí na Gníomhaireachta.

Déanann an Stiúrthóir Feidhmiúcháin maoirseacht ar rialachas corparáideach agus cultúr na Gníomhaireachta agus bíonn sé ag spreagadh agus ag treorú na foirne chun barr feabhais a bhaint amach agus a beart a dhéanamh laistigh dá creat dlíthiúil.

Bainisteoidh an Stiúrthóir Feidhmiúcháin an Ghníomhaireacht agus beidh sé ina ionadaí dlíthiúil agus in a ionadaí os comhair an phobail di. Rachaidh sé i dteagmháil le páirtithe leasmhara agus leis an bpobal de réir mar is gá maidir le gach ábhar atá faoi shainordú na Gníomhaireachta.

Feabhsóidh an Stiúrthóir Feidhmiúcháin go gníomhach an comhar le gníomhaireachtaí eile de chuid an Aontais, go háirithe Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol), Gníomhaireacht an Aontais Eorpaigh um Oiliúint i bhForfheidhmiú an Dlí (CEPOL), an Ghníomhaireacht Leigheasra Eorpach (EMA) agus an Lárionad Eorpach um Ghalair a Chosc agus a Rialú (ECDC) chomh maith le páirtithe leasmhara eile de chuid an Aontais agus comhpháirtithe seachtracha. Déanfaidh sé, go háirithe, creat comhair idirnáisiúnta na Gníomhaireachta a stiúradh agus a chur chun feidhme, rud a fheabhsóidh an comhar le heagraíochtaí idirnáisiúnta agus le comhlachtaí eile agus comhlachtaí tríú tíortha chun cur le forbairt agus cur chun feidhme ghné sheachtrach bheartas drugaí an Aontais.

Beidh an Stiúrthóir Feidhmiúcháin freagrach as na bearta riaracháin, oibríochtúla agus airgeadais atá is gá chun an Ghníomhaireacht a oibriú mar is ceart a chur ar bun agus a bhainistiú. Beidh sé freagrach as riar laethúil na Gníomhaireachta.

Beidh an Stiúrthóir Feidhmiúcháin neamhspleách agus é ag déanamh a chuid dualgas agus beidh sé cuntasach don Bhord Bainistíochta.

Gan dochar do chumhachtaí an Bhoird Bainistíochta, glacfaidh an Stiúrthóir Feidhmiúcháin freagracht iomlán as cur chun feidhme na gcúraimí a chuirtear ar an nGníomhaireacht agus beidh sé faoi réir an nós imeachta um urscaoileadh bliantúil agus dhúnadh bliantúil cuntas a dhéanann Parlaimint na hEorpa chun an buiséad a chur chun feidhme.

Beidh an Stiúrthóir Feidhmiúcháin freagrach as cúraimí sonracha a leagtar síos i Rialachán EUDA ar féidir cur síos níos mionsonraithe a fháil orthu in Airteagail 29 agus 30 de.

Cad atá á lorg againn (na critéir roghnúcháin)

Ba cheart na nithe seo a leanas a bheith ag na hiarrthóirí:

Scileanna bainistíochta — Breithiúnas fónta agus an cumas cruthaithe líon mór baill foirne a bhainistiú ar leibhéil bainistíochta straitéisí agus inmheánaí araon agus cuspóirí a shocrú agus a bhaint amach; — Scileanna láidre riaracháin agus bainistíochta cruthaithe, go háirithe taithí ar acmhainní buiséid, airgeadais agus daonna a fuarthas i gcomhthéacs náisiúnta, Eorpach agus/nó idirnáisiúnta; — An cumas foireann ildisciplíneach a stiúradh, a spreagadh agus a fhorbairt i gcomhthéacs ilchultúrtha ilteangach Eorpach.

Sainscileanna agus saintaithí — Taithí chruthaithe ar eagraíocht a fhorbairt agus a stiúradh, foirne a bhfuil cúlraí ildisciplíneacha acu a stiúradh agus a bhainistiú ar ardleibhéal bainistíochta chomh maith le cumas agus taithí i leith fís oibríochtúil a fhorbairt agus a stiúradh de réir tosaíochtaí beartais, agus sainordú agus cuspóirí straitéiseacha na Gníomhaireachta ina mbun ag an obair; — Tuiscint mhaith agus eolas cruthaithe ar chomhthéacs an Aontais, amhail ról institiúidí agus nósanna imeachta cinnteoireachta an Aontais, agus ar an idirghníomhaíocht idir riaracháin náisiúnta agus institiúidí an Aontais; measfar gur buntáiste é eolas breise ar fheidhmiú eagraíochtaí idirnáisiúnta eile; — Eolas domhain agus taithí chruthaithe i réimse na mbeartas drugaí a fuarthas i gcomhthéacs náisiúnta, Eorpach nó idirnáisiúnta; measfar gur buntáiste í taithí bhreise i réimsí eile atá ábhartha do shainordú agus ghníomhaíochtaí na Gníomhaireachta, go háirithe sláinte, ceartas agus forfheidhmiú an dlí.

Buanna pearsanta — Sárscileanna idirphearsanta, anailíseacha, cinnteoireachta, eagrúcháin agus idirbheartaíochta; — An cumas cruthaithe cumarsáid líofa éifeachtúil a dhéanamh ar gach leibhéal, lena n-áirítear le páirtithe leasmhara, leis na meáin agus leis an bpobal (údaráis Eorpacha, idirnáisiúnta, náisiúnta agus áitiúla, eagraíochtaí idirnáisiúnta, eagraíochtaí na sochaí sibhialta, etc.).

Ní mór na cáilíochtaí seo a bheith ag iarrthóirí (ceanglais incháilitheachta)

Is ar bhonn na gcritéar foirmiúil seo a leanas amháin, nach mór iad a bheith comhlíonta faoin sprioc-am le hiarratas a dhéanamh, a chuirfear na hiarrthóirí san áireamh nuair a bheidh an rogha á déanamh:

—	Náisiúntacht: ní mór do na hiarrthóirí a bheith ina saoránaigh de cheann amháin de Bhallstáit an Aontais Eorpaigh.

—

Céim nó dioplóma ollscoile: ní mór d’iarrthóirí: — leibhéal oideachais a bheith acu is comhionann le cúrsa iomlán ollscoile ar baineadh dioplóma amach dá bharr i gcás ina maireann an ghnáth-thréimhse oideachais ollscoile 4 bliana nó níos mó; — nó leibhéal oideachais a bheith acu is comhionann le cúrsa iomlán ollscoile ar baineadh dioplóma amach dá bharr agus taithí oibre chuí bliain amháin ar a laghad i gcás ina maireann an ghnáth-thréimhse oideachais ollscoile 3 bliana ar a laghad (ní féidir an bhliain amháin sin de thaithí oibre a chur san áireamh sa taithí oibre iarchéime a iarrtar thíos).

—	Taithí ghairmiúil: ní mór d’iarrthóirí taithí ghairmiúil iarchéime 15 bliana ar a laghad a bheith acu (4) ar leibhéal ar féidir tosú air leis na cáilíochtaí dá dtagraítear thuas. Ní mór 5 bliana ar a laghad den taithí ghairmiúil sin a bheith faighte i réimse ghníomhaíochtaí na Gníomhaireachta.

—	Taithí bhainistíochta: ní mór 5 bliana ar a laghad den taithí oibre iarchéime a bheith faighte i bhfeidhm bainistíochta ardleibhéil (5) i réimse atá ábhartha don phost seo.

—

Teangacha: ní mór d’iarrthóirí eolas cuimsitheach a bheith acu ar cheann amháin de theangacha oifigiúla an Aontais Eorpaigh (6) agus eolas sásúil ar cheann eile de na teangacha oifigiúla sin. Deimhneoidh na painéil roghnúcháin le linn na n-agallamh an gcomhlíonann iarrthóirí an ceanglas maidir le heolas sásúil ar cheann eile de theangacha oifigiúla an Aontais Eorpaigh. D’fhéadfaí an t-agallamh nó cuid den agallamh a dhéanamh sa teanga eile sin mar chuid den tástáil sin.

—

Teorainn aoise: ní mór d’iarrthóirí a bheith in ann, ag an sprioc-am le hiarratais a dhéanamh, an sainordú iomlán 5 bliana a chur i gcrích sula mbainfidh siad aois scoir amach. I gcás baill foirne shealadacha de chuid an Aontais Eorpaigh, sainítear an aois scoir mar dheireadh na míosa ina mbeidh 66 bliana slán ag an duine (féach Airteagal 47 de Choinníollacha Fostaíochta Sheirbhísigh eile an Aontais Eorpaigh (7)).

Roghnú agus ceapadh

Is é Bord Bainistíochta Ghníomhaireacht Drugaí an Aontais Eorpaigh a cheapfaidh an Stiúrthóir Feidhmiúcháin ar bhonn gearrliosta de thrí iarrthóir ar a laghad a mholfaidh an Coimisiún Eorpach.

Chun an gearrliosta sin a thiomsú, eagróidh an Coimisiún Eorpach an próiseas de réir a nós imeachta roghnúcháin agus earcaíochta (féach an Doiciméad maidir leis an mBeartas um Oifigigh Shinsearacha (8)). Féadfaidh an Coimisiún ionadaí ón mBord Bainistíochta a áireamh mar bhreathnóir sa nós imeachta roghnúcháin.

Mar chuid den phróiseas roghnúcháin seo, cuirfidh an Coimisiún Eorpach painéal réamhroghnúcháin ar bun. Déanfaidh an painéal sin anailís ar na hiarratais go léir, déanfaidh siad an chéad fhíorú incháilitheachta ina dhiaidh sin agus sainaithneoidh siad na hiarrthóirí a bhfuil na próifílí is fearr acu i bhfianaise na gcritéar roghnúcháin atá luaite thuas, agus a bhféadfaí cuireadh a thabhairt dóibh agallamh a dhéanamh leis an bpainéal réamhroghnúcháin.

I ndiaidh na n-agallamh sin, tarraingeoidh an painéal réamhroghnúcháin suas a thuairimí agus molfaidh sé liosta iarrthóirí le haghaidh agallaimh eile le Coiste Comhairleach an Choimisiúin Eorpaigh um Cheapacháin (CCA). Cuirfidh CCA na tuairimí ón bpainéal réamhroghnúcháin san áireamh agus é ag cinneadh cé na hiarrthóirí a dtabharfar cuireadh chun agallaimh dóibh.

Glacfaidh na hiarrthóirí a dtabharfar cuireadh chun agallaimh le CCA dóibh páirt in ionad measúnaithe bainistíochta a mhairfidh lá iomlán a reáchtálfaidh comhairleoirí earcaíochta seachtracha. Agus torthaí an agallaimh agus an tuarascáil ón ionad measúnaithe á gcur san áireamh aige, tiomsóidh CCA gearrliosta d’iarrthóirí a mheasann sé a bheadh oiriúnach do bheith ag feidhmiú mar Stiúrthóir Feidhmiúcháin Ghníomhaireacht Drugaí an Aontais Eorpaigh.

Is é/iad Comhalta/Comhaltaí an Choimisiúin atá freagrach as an Ard-Stiúrthóireacht a bhfuil caidreamh leis an nGníomhaireacht faoina cúram (9) a chuirfidh na hiarrthóirí atá ar ghearrliosta CCA faoi agallamh.

Tar éis na n-agallamh sin, glacfaidh an Coimisiún Eorpach gearrliosta de na hiarrthóirí is oiriúnaí, agus cuirfear an gearrliosta sin ar aghaidh chuig Gníomhaireacht Drugaí an Aontais Eorpaigh. Féadfaidh an Bord Rialaithe cinneadh a dhéanamh na hiarrthóirí a chur faoi agallamh sula ndéanfaidh siad an Stiúrthóir Feidhmiúcháin a cheapadh as na hiarrthóirí ar ghearrliosta an Choimisiúin. Ní hionann duine a bheith ar an bpainéal agus ráthaíocht a bheith aige go gceapfar é.

D’fhéadfaí a iarraidh ar iarrthóirí dul faoi agallaimh bhreise agus/nó tástálacha breise a dhéanamh, sa bhreis orthu siúd a luadh thuas. Sula gceapfaidh an Bord Bainistíochta é do phost an Stiúrthóra Feidhmiúcháin, féadfar a iarraidh ar na hiarrthóirí ar an ngearrliosta arna mholadh ag an gCoimisiún, gan mhoill, ráiteas a dhéanamh os comhair choiste inniúil nó choistí inniúla Pharlaimint na hEorpa agus ceisteanna ó chomhaltaí an choiste a fhreagairt. Tar éis di éisteacht leis an ráiteas agus na freagraí, féadfaidh Parlaimint na hEorpa tuairim a ghlacadh lena leagfar amach a tuairimí, agus í a chur faoi bhráid an Bhoird Bainistíochta.

Ba cheart don iarrthóir a roghnófar deimhniú bailí imréitigh slándála óna údarás náisiúnta slándála a bheith aige nó a bheith in ann an deimhniú sin a fháil. Is éard atá in imréiteach slándála pearsanta cinneadh riaracháin a dhéantar i ndiaidh d’údarás náisiúnta slándála inniúil an duine grinnfhiosrúchán slándála a chur i gcrích i gcomhréir leis na dlíthe agus na rialacháin náisiúnta slándála is infheidhme, agus lena ndeimhnítear go bhféadfar cead a thabhairt don duine sin rochtain a fháil ar fhaisnéis rúnaicmithe suas le leibhéal áirithe. (Tabhair do d’aire gur ar iarraidh an fhostóra amháin is féidir tús a chur leis an nós imeachta is gá maidir le himréiteach slándála, agus ní ar iarraidh an iarrthóra).

Ní bheidh rochtain ag an iarrthóir ar fhaisnéis rúnaicmithe an Aontais Eorpaigh (FRAE) ar an leibhéal CONFIDENTIEL UE/EU CONFIDENTIAL nó os a chionn sin, agus ní fhreastalóidh an t-iarrthóir ar aon chruinniú ag a bpléifear FRAE den sórt sin, go dtí go dtabharfaidh an Ballstát lena mbaineann an t-imréiteach slándála pearsanra agus go gcuirfear an nós imeachta imréitigh i gcrích leis an seisiún faisnéise, a bhfuil ceangal dlí leis, ó Stiúrthóireacht Slándála an Choimisiúin.

Comhdheiseanna

Tá cuspóir straitéiseach á shaothrú ag an gCoimisiún agus ag an nGníomhaireacht an comhionannas inscne a bhaint amach ar gach leibhéal bainistíochta faoi dheireadh a thréimhse oifige reatha agus cuireann siad beartas comhdheiseanna agus neamh-idirdhealaithe i bhfeidhm, i gcomhréir le hAirteagal 1(d) de na Rialacháin Foirne, (10) lena spreagtar iarratais a d’fhéadfadh cur leis an éagsúlacht, leis an gcomhionannas inscne agus leis an gcothromaíocht gheografach fhoriomlán.

Coinníollacha fostaíochta

Tá na tuarastail agus na coinníollacha fostaíochta leagtha síos i gCoinníollacha Fostaíochta Sheirbhísigh Eile an Aontais Eorpaigh.

Déanfaidh Bord Bainistíochta Ghníomhaireacht Drugaí an Aontais Eorpaigh an t-iarrthóir ar éirigh leis a fhostú mar Ghníomhaire Sealadach ar ghrád AD14 (11). Rangófar é i gcéim 1 nó i gcéim 2 laistigh den ghrád sin, de réir fhad a thaithí gairmiúla roimhe sin.

Déanfar é a cheapadh le haghaidh tréimhse oifige thosaigh 5 bliana, agus an fhéidearthacht ann síneadh nach mó ná 5 bliana a chur léi aon uair amháin de réir an Rialacháin lena mbunaítear an Ghníomhaireacht de réir mar is infheidhme tráth an cheapacháin.

Ba cheart d’iarratasóirí a thabhairt dá n-aire go gceanglaítear de réir Choinníollacha Fostaíochta Sheirbhísigh Eile an Aontais Eorpaigh nach mór do gach ball foirne nua tréimhse phromhaidh 9 mí a chur i gcrích agus toradh sásúil a bheith uirthi.

Is i Liospóin, an Phortaingéil, atá an t-ionad oibre.

Beidh an folúntas ann ón 1 Eanáir 2026 ar aghaidh.

Eolas tábhachtach d’iarrthóirí

Cuirtear i gcuimhne d’iarrthóirí gur faoi rún atá an obair a dhéanann na painéil roghnúcháin. Tá cosc ar iarrthóirí dul i dteagmháil, bíodh sé díreach nó indíreach, le comhaltaí na bpainéal sin, agus tá cosc ar dhuine ar bith eile déanamh amhlaidh thar a gceann. Ní mór gach fiosrúchán a sheoladh chuig rúnaíocht an phainéil lena mbaineann.

Sonraí pearsanta a chosaint

Cinnteoidh an Coimisiún go bpróiseálfar sonraí pearsanta na n-iarrthóirí de réir mar a cheanglaítear le Rialachán (AE) 2018/1725 ó Pharlaimint na hEorpa agus ón gComhairle (12). Baineann sé sin go háirithe le rúndacht agus slándáil na sonraí sin.

Neamhspleáchas agus dearbhú leasanna

Sula rachaidh an Stiúrthóir Feidhmiúcháin: i mbun a chuid dualgas, beidh sé de cheangal air dearbhú a thabhairt go bhfuil sé tiomanta do bheith ag gníomhú go neamhspleách neamhchlaonta trédhearcach ar mhaithe leis an bpobal, agus dearbhú a thabhairt maidir le haon leas atá aige a d’fhéadfaí a mheas a bheith dochrach dá neamhspleáchas a dhearbhú. Beidh sé de cheangal air an dearbhú sin a athnuachan gach bliain.

Nós imeachta maidir le hiarratas a dhéanamh

Sula gcuirfear an t-iarratas isteach, ba cheart don iarrthóir a sheiceáil go cúramach an gcomhlíonann sé gach ceann de na ceanglais incháilitheachta (‘Ní mór na cáilíochtaí seo a bheith ag iarrthóirí’), go háirithe iad sin a bhaineann leis na cineálacha dioplóma, an taithí oibre ardleibhéil agus an acmhainn theangeolaíoch atá ag teastáil. Má tá aon cheann de na ceanglais incháilitheachta nach gcomhlíonann iarrthóir, eisiafar é go huathoibríoch ón bpróiseas roghnúcháin.

Más mian leat iarratas a dhéanamh, ní mór duit clárú ar an idirlíon ar an suíomh gréasáin seo thíos agus na treoracha maidir le céimeanna éagsúla an phróisis a leanúint:

https://ec.europa.eu/dgs/human-resources/seniormanagementvacancies/.

Ní mór seoladh ríomhphoist bailí a bheith agat. Bainfear úsáid as an seoladh ríomhphoist sin chun do chlárú a dheimhniú agus chun dul i dteagmháil leat ag céimeanna éagsúla den phróiseas. Dá bhrí sin, coinnigh an Coimisiún Eorpach ar an eolas faoi aon athrú ar do sheoladh ríomhphoist.

Chun iarratas a chríochnú, ní mór CV a uaslódáil i bhformáid PDF, i bhformáid CV Europass más féidir é (13), agus litir inspreagtha a líonadh isteach ar líne (uasmhéid 8 000 carachtar). Is féidir leat an CV agus an litir inspreagtha a chur isteach in aon cheann de theangacha oifigiúla an Aontais Eorpaigh.

Is chun do leasa é a chinntiú go bhfuil d’iarratas cruinn, críochnúil agus fírinneach.

Ar chríochnú do chlárúcháin ar líne duit, gheobhaidh tú ríomhphost a dheimhneoidh gur cláraíodh d’iarratas. Mura bhfaighidh tú ríomhphost deimhnithe, níor cláraíodh d’iarratas!

Tabhair do d’aire nach féidir monatóireacht a dhéanamh ar dhul chun cinn d’iarratais ar líne. Rachaidh an Coimisiún Eorpach i dteagmháil go díreach leat maidir le stádas d’iarratais.

Ní ghlacfar le hiarratais a sheolfar le ríomhphost. Má tá tuilleadh eolais uait nó má bhíonn fadhbanna teicniúla agat, seol ríomhphost chuig: HR-MANAGEMENT-ONLINE@ec.europa.eu.

Is fútsa atá sé do chlárúchán ar líne a chríochnú in am. Moltar go láidir duit gan fanacht go dtí cúpla lá roimh an sprioc-am chun iarratas a dhéanamh, mar go bhféadfadh trácht trom ar an idirlíon nó fadhb a bhaineann leis an nasc idirlín deireadh a chur leis an gclárúchán ar líne sula mbeadh sé críochnaithe agat, rud a chuirfeadh iallach ort an próiseas clárúcháin a thosú athuair. Nuair a bheidh an sprioc-am le hiarratas a chur isteach thart, ní bheidh tú in ann tuilleadh sonraí a chur isteach. Ní ghlacfar le clárú déanach.

Dáta deiridh

Is é an 30 Deireadh Fómhair 2024, 12.00 meán lae, am na Bruiséile, an sprioc-am le clárú. Ní féidir clárú ina dhiaidh sin.

---

(1)  Rialachán (CEE) Uimh. 302/93 ón gComhairle an 8 Feabhra 1993 maidir le Lárionad Faireacháin Eorpach um Dhrugaí agus um Andúil i nDrugaí a bhunú (IO L 36, 12.2.1993, lch. 1).

(2)  Rialachán (CE) Uimh. 1920/2006 ó Pharlaimint na hEorpa agus ón gComhairle an 12 Nollaig 2006 maidir leis an Lárionad Faireacháin Eorpach um Dhrugaí agus um Andúil i nDrugaí (IO L 376, 27.12.2006, lch. 1).

(3)  Rialachán (AE) 2023/1322 ó Pharlaimint na hEorpa agus ón gComhairle an 27 Meitheamh 2023 maidir le Gníomhaireacht Drugaí an Aontais Eorpaigh (EUDA) agus lena n aisghairtear Rialachán (CE) Uimh. 1920/2006 (IO L 166, 30.6.2023, lch. 6).

(4)  Ní chuirtear taithí oibre san áireamh ach amháin más fíorchaidreamh oibre atá i gceist léi, caidreamh atá sainmhínithe mar fhíorobair a bhfuarthas pá aisti agus mar fhostaí (aon chineál conartha) nó mar sholáthraí seirbhíse. Déanfar gníomhaíocht ghairmiúil a rinneadh ar bhonn páirtaimseartha a ríomh ar bhonn pro rata, de réir chéatadán deimhnithe na n-uaireanta lánaimseartha a oibríodh. Cuirtear saoire mháithreachais/saoire tuismitheora/saoire páiste a uchtú san áireamh más faoi chuimsiú conradh oibre atá sí. Is cuid den taithí ghairmiúil í an dochtúireacht, fiú amháin nuair nach dochtúireacht ar pá í, ach tá uastréimhse 3 bliana i gceist leis sin, agus ní mór an dochtúireacht a bheith curtha i gcrích. Ní féidir tréimhse a chomhaireamh ach uair amháin.

(5)  Ba cheart d’iarrthóirí a léiriú go soiléir ina gcuraclam vitae na blianta go léir ina bhfuair siad taithí bhainistíochta: (1) teideal agus ról na bpost bainistíochta a bhí acu; (2) an líon ball foirne a ndearna siad maoirseacht orthu sna poist sin; (3) méid na mbuiséad a bhainistigh siad; (4) an líon sraitheanna ordlathais os a gcionn agus faoina mbun; agus (5) líon a bpiaraí.

(6)   https://eur-lex.europa.eu/legal-content/GA/TXT/?uri=CELEX%3A01958R0001-20130701.

(7)   IO 45, 14.6.1962, lch. 1385/62, téacs comhdhlúite: https://eur-lex.europa.eu/legal-content/EN/TXT/?uri=CELEX%3A01962R0031-20240101.

(8)   https://commission.europa.eu/jobs-european-commission/job-opportunities/managers-european-commission_ga#vacancies (ar fáil i mBéarla amháin)

(9)  Ach amháin i gcás ina dtarmligfidh an Comhalta den Choimisiún lena mbaineann, i gcomhréir le Cinneadh ón gCoimisiún an 5 Nollaig 2007 (PV(2007) 1811), agus an 30 Meán Fómhair 2020 (PV(2020) 2351) an cúram sin do Chomhalta eile de chuid an Choimisiúin.

(10)   IO 45, 14.6.1962, lch. 1385/62, téacs comhdhlúite: https://eur-lex.europa.eu/legal-content/EN/TXT/?uri=CELEX%3A01962R0031-20240101.

(11)  Tá an chomhéifeacht cheartúcháin is infheidhme don Phortaingéil maidir le luach saothair agus pinsin oifigeach agus seirbhíseach eile de chuid an Aontais socraithe ag 96.6 % ón 1 Iúil 2023. Tá an chomhéifeacht sin faoi réir athbhreithniú bliantúil.

(12)  Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39).

(13)  Tá eolas le fáil faoi conas CV Europass a chruthú ar líne ag: https://europa.eu/europass/en/create-europass-cv.