1)

Maidir le Clásal 5 den Chomhaontú Réime maidir le hobair ar théarma socraithe arna tabhairt i gcrích an 18 Márta 1999 a leagtar amach san Iarscríbhinn a ghabhann le Treoir 1999/70/CE ón gComhairle an 28 Meitheamh 1999 i dtaca leis an gComhaontú Réime maidir le hobair ar théarma socraithe arna tabhairt i gcrích ag CES, UNICE agus CEEP,

ní mór léiriú a dhéanamh mar seo a leanas:

ní chuirtear cosc leis ar reachtaíocht náisiúnta faoina n-éiríonn mí-úsáid as conarthaí nó caidrimh fostaíochta téarma shocraithe comhleantacha san earnáil phoiblí i gcás nach gcomhlíonann an riarachán poiblí lena mbaineann na teorainneacha ama a leagtar síos sa dlí náisiúnta chun an post ina bhfuil an t-oibrí sealadach lena mbaineann a líonadh, ós rud é, i gcás den sórt sin, nach gcumhdaíonn na conarthaí nó caidrimh fostaíochta téarma shocraithe comhleantacha sin riachtanais shealadacha, ach riachtanais bhuana agus mharthanacha an riaracháin sin.

2)

Maidir le Clásal 5 den Chomhaontú Réime maidir le hobair ar théarma socraithe arna tabhairt i gcrích an 18 Márta 1999 a leagtar amach san Iarscríbhinn a ghabhann le Treoir 1999/70/CE, arna léamh i bhfianaise phrionsabail na comhréireachta agus an chúitimh iomláin as an damáiste a rinneadh,

ní mór léiriú a dhéanamh mar seo a leanas:

cuirtear cosc leis ar chásdlí agus ar reachtaíocht náisiúnta lena leagtar síos mar bhearta chun pionós a ghearradh ar mhí-úsáid conarthaí nó caidrimh fostaíochta téarma shocraithe comhleantacha, faoi seach, an t-oibrí lena mbaineann a choinneáil go dtí go ndéanfaidh an riarachán fostaíochta na nósanna imeachta roghnúcháin a eagrú agus a dhúnadh, chomh maith le nósanna imeachta den sórt sin agus cúiteamh airgeadais a íoc lena socraítear uasteorainn dhúbailte don oibrí sin nach n-éiríonn leis sna nósanna imeachta sin, i gcás nach bhfuil na bearta sin comhréireach nó éifeachtach agus athchomhairleach go leor chun lánéifeachtacht na rialacha arna nglacadh de bhun Chlásal 5 a áirithiú.

3)

Maidir le Clásal 5 den Chomhaontú Réime maidir le hobair ar théarma socraithe arna tabhairt i gcrích an 18 Márta 1999 a leagtar amach san Iarscríbhinn a ghabhann le Treoir 1999/70/CE, arna léamh i bhfianaise Airteagal 47 den Chairt um Chearta Bunúsacha an Aontais Eorpaigh,

ní mór léiriú a dhéanamh mar seo a leanas:

in éagmais bearta leordhóthanacha dá bhforáiltear sa dlí náisiúnta chun cosc a chur, agus i gcás inarb iomchuí, pionós a ghearradh, de bhun Chlásal 5, ar mhí-úsáid a eascraíonn as úsáid a bhaint as conarthaí nó caidrimh fostaíochta ar théarma shocraithe comhleantacha, d’fhéadfadh tiontú na gconarthaí nó na gcaidreamh fostaíochta comhleantacha sin go conradh fostaíochta nó caidreamh tréimhse éiginnte a bheith ina bheart den sórt sin, a mhéid nach bhfuil léiriú contra legem ar an dlí náisiúnta i gceist leis an tiontú sin.