An 3 Aibreán 2024, i gcomhréir le hAirteagal 10(3) de Rialachán (AE) 2022/2560 ó Pharlaimint na hEorpa agus ón gComhairle (1) (an ‘Rialachán maidir le Fóirdheontais Eachtracha’), chinn an Coimisiún grinn-imscrúdú a thionscnamh sa chás thuasluaite tar éis dó teacht ar thásca leordhóthanacha, bunaithe ar réamh-athbhreithniú, gur deonaíodh fóirdheontais eachtracha lena saobhtar an margadh inmheánach do ENEVO Group – LONGi Solar Technologie Consortium, ina bhfuil ENEVO Group SRL agus LONGi Solar Technologie GmbH (na ‘Páirtithe a bhfuil fógra á thabhairt acu’) sa nós imeachta soláthair phoiblí ar a dtugtar tuairisc thíos. Tá tionscnamh an ghrinn-imscrúdaithe maidir leis an nós imeachta soláthair phoiblí faoina dtugtar fógra gan dochar don chinneadh críochnaitheach sa chás seo.

1.   An nós imeachta soláthair phoiblí

An 27 Meán Fómhair thionscain ‘Societatea PARC FOTOVOLTAIC ROVINARI EST S.A.’ (dá ngairtear ‘an tÚdarás Conarthach’ anseo feasta) nós imeachta soláthair phoiblí oscailte dar luach thart ar EUR 375 mhilliún chun páirc fhótavoltach a dhearadh, a thógáil agus a oibriú sa Rómáin. Bhí an nós imeachta ar an ardán Tenders Electronic Daily faoin tagairt ‘Romania-Târgu Jiu: Obair foirgníochta le haghaidh gléasra cumhachta, 2023/S 189-592487. Nasc TED: Oibreacha - 592487-2023 - TED Tenders Electronic Daily (europa.eu)

2.   An Páirtí a bhfuil fógra á thabhairt aige agus ranníocaíochtaí airgeadais eachtracha faoina dtugtar fógra

Is soláthraí seirbhísí innealtóireachta agus comhairliúcháin é ENEVO Group, ceannaire an chuibhreannais. Tá an ball cuibhreannais nua-bhunaithe LONGi Solar Technologie GmbH atá faoi úinéireacht agus faoi rialú iomlán ina fhochuideachta Ghearmánach de LONGi Green Energy Technology Co., Ltd, ar soláthraí réiteach fótavoltach gréine é. Tá ról gníomhach ag an ngrúpa i monarú grianphainéal agus i dtionscal an fhuinnimh in-athnuaite. Is é Rodina Construction LLC, cuideachta de chuid na hÚcráine a bhfuil ról gníomhach aici in earnáil na tógála sibhialta, príomhfhochonraitheoir aonair an chuibhreannais.

An 22 Eanáir 2024 rinne an tÚdarás Conarthach, de réir bhrí Airteagal 29(1) FSR, dearbhú a chur ar aghaidh chuig an gCoimisiún, ar dearbhú é a chuir na Páirtithe a bhfuil fógra á thabhairt acu isteach. Mheas an Coimisiún go raibh an fógra neamhchríochnaithe. Dá bhrí sin, an 19 Feabhra 2024 ghlac an Coimisiún cinneadh de bhun Airteagal 29(4) FSR agus Airteagal 7(1) de Rialachán Cur Chun Feidhme (AE) 2023/1441 ón gCoimisiún (2) inar dearbhaíodh go raibh an fógra neamhchríochnaithe.

An 4 Márta 2024 chuir na Páirtithe a bhfuil fógra á thabhairt acu fógra críochnaithe isteach, agus dá bhrí sin, de bhun Airteagal 7 de Rialachán Cur Chun Feidhme (AE) Uimh. 2023/1441, dhearbhaigh an Coimisiún gurbh é an 4 Márta 2024 dáta éifeachtach an fhógra. I gcomhréir le hAirteagal 30(2) de FSR, rinne an Coimisiún an réamh-athbhreithniú ar an bhfógra críochnaithe laistigh de 20 lá oibre.

3.   Tásca maidir le fóirdheontais eachtracha a bheith ann

Ar bhonn na faisnéise atá ar fáil don Choimisiún ag an gcéim seo, measann sé go bhfuil tásca leordhóthanacha ann go bhfuair na Páirtithe a bhfuil fógra á thabhairt acu – i gcomhréir le hAirteagal 28(1)(b) den Rialachán maidir le Fóirdheontais Eachtracha – na fóirdheontais eachtracha seo a leanas de réir bhrí Airteagal 3 den Rialachán maidir le Fóirdheontais Eachtracha:

4.   Tásc maidir le saobhadh sa mhargadh inmheánach

Ar bhonn na faisnéise atá ar fáil don Choimisiún ag an gcéim seo, measann sé go bhfuil tásca leordhóthanacha ann go bhféadfadh na fóirdheontais eachtracha a sainaithníodh roimh ré i Roinn 3 feabhas a chur ar staid iomaíoch na bPáirtithe a bhfuil fógra á thabhairt acu sa mhargadh inmheánach agus, ar an gcaoi sin, difear diúltach iarbhír nó féideartha a dhéanamh d’iomaíocht sa mhargadh inmheánach de réir bhrí Airteagal 4 den Rialachán maidir le Fóirdheontais Eachtracha.

Ar an gcéad dul síos, dearbhmhéid na bhfóirdheontas eachtrach féideartha sin a théann chun tairbhe na bPáirtithe a bhfuil fógra á thabhairt acu, tá sé níos airde ná luach na gconarthaí a bhfuil cuibhreannas na bPáirtithe a bhfuil fógra á thabhairt acu ag tairiscint ina leith. I gcomhréir leis na breithnithe in aithris (19) FSR ar dá réir is dócha gur cúis le saobhadh iad fóirdheontais eachtracha lena gcumhdaítear cuid mhór de luach measta conartha atá le dámhachtain i nós imeachta soláthair phoiblí. Cé go ndearna an Coimisiún iarracht tograí airgeadais na dtairgeoirí a fháil, níor chuir an tÚdaras Conarthach na tograí sin ar fáil le linn an réamh-athbhreithnithe. Dá bhrí sin, níl an Coimisiún in ann measúnú a dhéanamh ar an tairiscint airgeadais a mhol na Páirtithe a bhfuil fógra á thabhairt acu agus ní eisiann sé go raibh éifeacht shaobhach fhéideartha ag na fóirdheontais a sainaithníodh ar an tairiscint, rud a d’fhéadfaí a léiriú ina thairiscint airgeadais.

Ar an dara dul síos, níor chuir na Páirtithe a bhfuil fógra á thabhairt acu aon fhaisnéis ar fáil maidir le cineál sonrach, coinníollacha, cuspóir nó úsáid na bhfóirdheontas eachtrach féideartha a shainaithnítear i Roinn 3 thuas. Mar sin féin, cé gur deonaíodh na bearta go díreach do LONGi Green Energy Technology Co., Ltd, i bhfianaise na gceart caipitil atá aige in LONGi Solar Technologie GmbH, agus d’ainneoin na fianaise atá i seilbh an Choimisiúin maidir le maoiniú inghrúpa, agus ó tharla nach bhfuil aon tásc ann go raibh na fóirdheontais fhéideartha a deonaíodh do LONGi Green Energy Technology Co., Ltd teoranta sa chaoi nach bhféadfadh na Páirtithe a bhfuil fógra a thabhairt acu iad a úsáid ná tairbhe a bhaint astu, measann an Coimisiún go bhféadfadh éifeacht shaobhach a bheith ag na fóirdheontais eachtracha sin ar an tairiscint agus, dá bhrí sin, ar an margadh inmheánach.

Ar deireadh, is tásca breise iad na creidmheasanna onnmhairiúcháin a cuireadh ar fáil do LONGi Green Energy Technology Co., Ltd, i gcás ina gcomhlíonann siad na ceanglais in Airteagal 5(1)(c) FSR, nuair a mheastar iad in éineacht leis na gnéithe eile a shainaithnítear sa chinneadh seo.

5.   Conclúid

I bhfianaise na mbuntáistí eacnamaíocha móra a d’fhéadfadh a bheith ann do na Páirtithe a bhfuil fógra á thabhairt acu trí LONGi Green Energy Technology Co., Ltd, ar buntáistí iad a eascraíonn as na fóirdheontais a fuarthas 3 bliana roimh an bhfógra ar a dtugtar tuairisc i Ranna 3 agus 4 thuas, measann an Coimisiún go bhfuil tásca leordhóthanacha aige gur deonaíodh do na Páirtithe a bhfuil fógra á thabhairt acu fóirdheontais eachtracha a d’fhéadfadh an margadh inmheánach a shaobhadh.

6.   Cuireadh chun barúlacha a chur isteach

I gcomhréir le hAirteagail 10(3)(d) agus 40(1) den Rialachán Cur Chun Feidhme maidir le Fóirdheontais Eachtracha agus le hAirteagal 8(1) de Rialachán (AE) 2023/1441, iarrann an Coimisiún ar aon duine nádúrtha nó dlítheanach, Ballstát agus tríú tír a dheonaigh na fóirdheontais eachtracha a shainaithnítear i Roinn 3 a mbarúlacha a chur isteach. I gcomhréir le hAirteagal 8(3) de Rialachán (AE) 2023/1441, i gcás ina mbeidh faisnéis rúnda sna barúlacha i scríbhinn a chuirfear isteach, soláthróidh an duine a bhfuil aighneacht á cur isteach aige leagan neamhrúnda den aighneacht an tráth céanna leis an leagan rúnda.

I gcásanna a bhfuil údar cuí leo, féadfaidh soláthraithe barúlacha a iarraidh nach nochtfar a gcéannacht. Deonófar anaithnideacht bunaithe ar chúis mhaith fhollasach a léirítear san iarraidh.

Chun go gcuirfear barúlacha san áireamh go hiomlán mar chuid den nós imeachta, ba cheart na barúlacha sin a bheith faighte ag an gCoimisiún tráth nach déanaí ná 10 lá oibre tar éis dháta foilsithe an fhoilseacháin seo. Is féidir barúlacha a sheoladh chuig an gCoimisiún trí ríomhphost chuig grow-fsr-pp-notifications@ec.europa.eu, agus an tagairt FSP leis. 100151.

(1)  Rialachán (AE) 2022/2560 ó Pharlaimint na hEorpa agus ón gComhairle an 14 Nollaig 2022 maidir le fóirdheontais eachtracha lena saobhtar an margadh inmheánach (IO L 330, 23.12.2022, lch. 1).

(2)  Rialachán Cur Chun Feidhme (AE) 2023/1441 ón gCoimisiún an 10 Iúil 2023 maidir le socruithe mionsonraithe i dtaca leis an gCoimisiún imeachtaí a sheoladh de bhun Rialachán (AE) 2022/2560 ó Pharlaimint na hEorpa agus ón gComhairle maidir le fóirdheontais eachtracha lena saobhtar an margadh inmheánach (IO L 177, 12.7.2023, lch. 1).